மனிதனின் நீர் சார்ந்த வாழ்வியல் கோலங்களும், ஊடகங்களும், வந்து சென்ற சுனாமியும் ! : எம்.ரிஷான் ஷெரீப்

Water-Splashசூழப்பல தேசங்களிலும் என் தேசத்திலும் மழை விடாமல் பொழிவதாயும், வீடுகள்,வீதிகள், மரங்கள் அனைத்துமென வெள்ளம் வழிவதாயும் செய்தித்தாள் சொல்லிற்று. தடவிப் பார்த்தேன். ஈரத்தின் சுவடுகள் விரல்களில் பொசிந்தன. காலம் காலமாக என் வானில் பெய்த மழை இன்று நான் வாழும் இப் பாலைவன தேசத்தில் பொய்த்தது. சூழலை இருட்டாக்கி, தேகங்களை வெம்பச் செய்து, மேகக் கூட்டங்கள் கருக்கட்டி, வான நடை போட்டுப் பார்த்துப் பல காலமாயிற்று.

மழையின் துளிகளை முகத்தில் வாங்கி , அன்னை கூப்பிட்டலுத்து அன்பால் திட்டித் திட்டித் தலை துவட்டி விடும் சிறுபராயம் நினைவுகளில் இடறுகிறது. தலையின் பின்புறம் கட்டாயம் துடைக்கவேண்டும். ஈரத்தின் சாயல் கண்டு தடிமன் வரும். பின்னர் காய்ச்சல் வரும். நீர் தேங்கி நிற்கும் குட்டைகள் தோறும் விஷக்கிருமிகள் பெருகித்தொற்றி விதவிதமான நோய்கள் வரும் என்றெல்லாம் தந்தை மடியிலிருத்தி மழை குறித்த கதைகள் சொன்னதும் ஞாபக அடுக்குகளிலிருந்து மீளெழும்பிக் கிளர்த்துகிறது.

riverபல காலமாக மழையற்ற எனது சிறுவயதின் காலமொன்று நினைவுக்கு வருகிறது. ஊரின் குறுக்கே ஓடும் பேராற்றில் நீர் வரண்டு நிறைந்திருந்த மணல்மேட்டில் ஊரின் இளைஞர்கள் கிரிக்கெட்டும் கால்பந்தும் விளையாடினர். சிறுவர்கள் பட்டம் விட்டனர். மரங்கள், செடி கொடிகள் வாடிய அக்காலத்தில் பட்டாம்பூச்சிகளும், மழைக்குருவிகளும் கூட வேறெங்கோ பறந்திருக்கவேண்டும். தண்ணீருக்குக் கடும்பஞ்சம். எங்கும் கடும்வெயில். சொன்னது கேட்காப்பிள்ளையை பிசாசுகளை நினைவுருத்தி வெருட்டுவது போலச் சூடும் வெயிலும் எல்லாவற்றையும், எல்லோரையும் மிரட்டியபடி அலைந்தது.

அக் கோடையில் அத்தியவசியத் தேவைகளுக்கே நீரற்றுப் போனதனால் விவசாயங்கள் பொய்த்துப் போயிற்று. வளர்ப்புப் பிராணிகள் மெலிந்து கொண்டு வந்தன. நீரோடி வற்றிய ஆற்றில் ஆழக்குழி தோண்டி உள்ளே ஊறித் தெரிந்த நீரை அகப்பையிலள்ளிக் குடங்களுக்கு சேலைத் திரையிட்டு அதனூடாக வடிகட்டி நீரைச் சேகரித்ததையும் கண்டிருக்கிறேன். தெளிந்த நீர்க் கிணறு உள்ளதென அறிந்து வெகுதூரம் நடந்தும், சைக்கிள்களிலும் தேடிப் போய்த் தண்ணீர் காவி வந்தனர் ஊரார். நாடு முழுதும் இதே நிலைமை. எல்லா நீர்த் தேக்கங்களிலும் தண்ணீரின் மட்டம் குறைந்ததனால் மின்சாரம் வழங்குவது கூட அரசுக்குச் சிக்கலாயிற்று. நாளொன்றின் பெரும்பகுதிகள் மின்சாரமற்றுப் போக விதிக்கப்பட்டன. நாட்டின் பெரும் பாகங்கள் இருளுக்குள் மூழ்கின.

கடல் எங்களூரிலிருந்து மிகத் தொலைவில் அலையடித்தபடி இருக்கிறது. நேரில் கண்டதில்லை. கடல் பற்றிய பிம்பங்களை போத்தலில் அடைக்கப்பட்ட பூதமொன்று அலையில் மிதந்து வந்து சிறுவனொருவனுக்கு எட்டிய கதையூடாக சிறுவயதில் அறிந்திருக்கிறேன். ஆழக் கடலெனில் அது நிறைய என்றும் வற்றா நீரிருக்கும் என்ற தந்தையிடம் நீர் எப்படி வற்றுமெனக் கேட்டுத் தெரிந்த பின்னர் , கடல் பிரதேசங்களில் சூரியன் அலையாதா எனக் கேட்டுத் திண்டாடச் செய்திருக்கிறேன்.

பள்ளிக்கூடச் சுற்றுலா போய் கடல் பார்த்து வந்த பின்னர், வெயில் வராத தெருக்களோடு, எல்லா ஊர்களிலும் என்றுமே வற்றாத கடல்கள் இருப்பின் எவ்வளவு நன்றாக இருந்திருக்குமெனக் கூட்டாளிகளுடன் கூடிக் கதைத்த கதைகளும், கடற்கரை இரவுகளின் மணல் நடையும் நிலாச் சோறுண்ணும் ஆசையும் சில வருடங்களுக்கு முன் வந்து சென்ற சுனாமியுடனும், பின் வந்த அடைமழையுடனும், அது கொண்டு வந்த வெள்ளத்துடனும் வடிந்து போயிற்று.

tsunami_sri_lankaஇலங்கையில் விடிந்தும் விடியாப்பொழுதுகளிலிருந்து புதுத்திரையிசைப் பாடல்களோடு கும்மாளமிடும், மொழிக் கொலையுடன் அரட்டையடிக்கும் பல வானொலிகள் 26-12-2004 அன்று சுனாமி குறித்தான நேரடி அறிவிப்பினைத் தொடர்ந்தும் தந்துகொண்டிருந்தன. வீட்டுக்குத் தேவையான சில பொருட்களை வாங்க கடைவீதிக்குச் சென்றிருந்த எனக்குள்ளும், பலரிடமும் ஆழிப்பேரலை குறித்து வானொலிகள் அலறியது பெரும் கலவரத்தை ஏற்படுத்தியது. வழமையாகக் காலைவேளையில் மகளிருக்கான நிகழ்ச்சிகளை அள்ளிவழங்கும் தொலைக்காட்சி அலைவரிசைகள் கூட அன்று பேரலைத்தாக்கத்தை நேரடியாகக் காட்சிப்படுத்தின. இந்நேரத்தில் நேரடிக்காட்சிப்பதிவுக்காக கடற்கரை சென்ற ஒரு தொலைக்காட்சி ஊடகவியலாளரையும் படப்பிடிப்பாளரையும் அலைவிழுங்கியதை வருத்தத்துடனும், இன்னும் இலங்கையின் மற்ற ஊடகங்களை நன்றியுடனும் நினைவுகூறுகிறேன்.

The-Boxing_dayஅந்த ஞாயிறன்று பல தொலைக்காட்சிகளும் கடலனர்த்தம் குறித்துச் சொல்லிக் கொண்டிருக்கையில்தான் அப் பாய் வியாபாரி வந்தார். இவ் அசம்பாவிதங்கள் குறித்து ஏதும் அறியா அவரிடம் தொலைக்காட்சி ஒளிபரப்பைக் காட்டி ஊரை விசாரித்ததில் கடலுக்கு அண்மையிலுள்ள ‘காத்தான்குடி’ என்றார். சமையலறைக் கழிவு நீரைக் கடலுக்குள் வீசியெறியும் தூரத்தில்தான் அவர் வீடிருப்பதாகச் சொல்லி இரு கைகளையும் தலையில் வைத்துக் கொண்டு செய்வதறியாது நிலத்தில் அமர்ந்து விசித்து விசித்தழத் தொடங்கினார். வாழ்வில் முதல்முறையாக கடலலைகளின் சீற்றம் குறித்து அறியக்கிடைத்தது அவருக்கும் எங்களுக்கும். எப்பாடுபட்டாவது இப்பொழுது ஊருக்குப் புறப்படவேண்டும். கர்ப்பிணி மனைவியும், இரு சிறுகுழந்தைகளும், பாரிசவாத நோய் தாக்கிப் பாயோடு முடங்கிய வயோதிபத்தாயும் குடிசையில் தனித்திருப்பதாகச் சொல்லி அவர் உடனே ஊருக்குப் புறப்பட்டார். வானம் இருட்டியிருந்தது. சூரியன் வெட்கி எங்கோ ஒளிந்திருந்தது.

ஊடகங்களின் தொடர்ந்த அறிவிப்புக்கள் எனது ஊர்மக்களின் மனதினை பெருமளவில் இளகச் செய்திருந்தன. ஊர்ப் பள்ளிவாயிலிலிருந்து அறிவிப்புக்களோடு பல வாகனங்கள் ஊர்த்தெரு முழுதும் உலா வந்தது. வீடுகளிலிருந்த அரிசி, பருப்பு, கோதுமை மா முதல் கடைகளிலிருந்த பால் மா, சீனி,பாண், நூடுல்ஸ்,பிஸ்கட்டுகள் எனப் பல உணவுப் பொருட்களையும் மக்கள் தாமாகவே அள்ளியள்ளிக் கொடுத்துதவினர். பல தாய்மார்கள் ஒன்று கூடி கோதுமை மாவை , ரொட்டிகளாக சுட்டுத்தந்தனர். இப்படியாக உணவுப்பொருட்களாலும் சடலங்களைப் போர்த்தவென வெள்ளைத்துணிகளாலும் பாண்டங்களாலும் இரு பஸ்கள் நிறைந்தன. மாலைத்தொழுகை வரை சேர்ந்த பொருட்களை எடுத்துக்கொண்டு சுனாமியால் பாதிக்கப்பட்ட இடங்கள் நோக்கி நகர்ந்த பஸ்ஸொன்றுக்குள் நானும் இருந்தேன்.

வெகுநேரம் பயணித்து , விடிகாலையில் அம்பாறை எனும் நகரத்துக்குப் போய்ச் சேர்ந்தோம். சாய்ந்தமருது, சம்மாந்துறை, நிந்தவூர் எனப் பல பிரதேசங்களுக்கும் நிவாரணப்பணிக்கென வந்திருந்த நாம் மனம் முழுதும் வியாபித்திருந்த துயரச் சலனத்தோடு பிரித்தனுப்பப்பட்டோம். பள்ளிவாயல்களுக்கு இரவிரவாகத் தட்டுவண்டிகள் சடலங்களை அள்ளிக்கொண்டு வந்துசேர்ந்தன. ஒவ்வொன்றாகத் திண்ணையில் கிடத்தி (அனேகமான சடலங்களில் ஆடையிருக்கவில்லையாதலால் ) துணியால் போர்த்திப் பின்னர் தூய நீரால் குளிப்பாட்டினோம். குளிப்பாட்டி , வெண்துணியால் போர்த்தப்பட்டவைகளை ஏற்றியபடி தட்டு வண்டிகள் மயானம் நோக்கிச் சென்றன. ஒரு கட்டத்தில் சடலங்களின் மீட்பும் , வருகையும் அதிகரிக்க எல்லாவற்றையும் திண்ணையில் வரிசையில் கிடத்தி அவசரமாகக் குளிப்பாட்டி, அவசரமாக எடுத்துச் சென்று ஒரு பெரிய குழியில் பிரார்த்தனைகளோடு ஒன்றாகப் புதைக்கவேண்டியேற்பட்டது. அவ்வளவு சடலங்கள். நீர் குடித்து, ஊதிப் பெருத்த சடலங்கள். தலைமயிர்களில் கடல்வேர்கள் சிக்குண்டிருந்தன. ஹஜ் பெருநாளும், கிறிஸ்மஸும் அண்மித்த தினமாகையில் அனேகமான பெண் சடலங்களின் கரங்களில் மருதாணி விரல்கள். சிறு குழந்தைகள் பொம்மைகளைப் போலத் துயில் கொண்டிருந்தன.

ninthavurவிடிந்து பார்க்கையில் எல்லா இடங்களிலும் அழுது சோர்ந்த விழிகளுடன், எல்லா மதத்தவர்களுமான ஊர் மக்கள் பரவிக்கிடந்தனர். நிந்தவூரின் கடற்கரைப்பள்ளிக்கூடம் அலையால் மூழ்கடிக்கப்பட்டதில் அதில் கல்விக்காகச் சென்றிருந்த ஊர்ச் சிறுவர், சிறுமியர்கள் அருகிலிருந்த மயானத்தில் தாமாகவே சடலங்களாக மூடப்பட்டிருந்தனர். கொண்டு போயிருந்த உணவும் , மற்றையவும் பள்ளிவாயில் தலைமைப் பொறுப்பிடம் ஒப்படைக்கப்பட்டு பாதிக்கப்பட்ட எல்லா மக்களுக்கும் பகிர்ந்தளிக்கப்பட்டது. இலங்கையில் மாவனல்லை மக்கள் சேர்த்தளித்த பொருட்கள்தான் முதன்முதலாக பாதிக்கப்பட்ட மக்களுக்குப் போய்ச்சேர்ந்தனவென்று ஊடகங்கள் செய்தியறிக்கைகளில் சொன்னதும் பல ஊர்களிலிருந்தும் நிவாரணப்பொருட்கள் குவியத் தொடங்கின.

train_in_tsunamiஇந் நிலையில் ஆழிப் பேரலையின் கோரத்தாண்டவத்தில் சிக்கிய சில பிரதேசங்களில் திருட்டுக்களும் நிகழ்ந்திருக்கின்றன. கடற்கரையோரமாகப் பயணித்த ஒரு ரயில் வண்டியும் அதன் தண்டவாளங்களும் காட்டேறியொன்றின் கோர நகங்களையொத்த வளைவு நெளிவுகளுக்காளாகியிருந்தபோது அதில் பயணித்தவர்கள் அனைவரும் மரணித்துப் போயினர். உலா வந்த கொள்ளையர்கள் ஊதிப் பருத்திருந்த அச் சடலங்களின் காதுச் சோனைகளை வெட்டித் தோடுகளையும், விரல்களை வெட்டி மோதிரங்களையும், கைகளை வெட்டி வளையல்களையும் சங்கிலிகளையும் திருடிப் போயிருந்தனர். நகைகளின் பிரகாசம், அனர்த்தம் குறித்தான அவர்களது அனுதாபங்களை முழுவதுமாக மனதிலிருந்து அகற்றியிருக்க வேண்டும்.

இலங்கை, காலியில் நடந்த சம்பவமொன்று இன்னும் நினைவிலிருந்து அகற்ற முடியாதுள்ளது. சுனாமி தினத்தன்று தற்செயலாகத் தொலைக்காட்சிச் செய்தியில் காட்சிப்படுத்தப்பட்ட சில நிமிடக் காட்சிகளைக் கூர்ந்து கவனித்த ஒருவர் , அதிலொரு பெண்ணுக்கு இழைக்கப்பட்ட அநீதி குறித்து வழக்குப் பதிவு செய்தார். சில மாதங்கள் கழித்து வழக்கு விசாரணைக்கு வந்த பொழுது அவ் வீடியோக் காட்சிகள் பெரும் சாட்சியொன்றை அளித்தன. காலி நகரத்தை முழுதாக பேரலை தாக்கிய பொழுதில் தப்பி நீந்திவந்த ஒரு இளம்பெண்ணின் கழுத்துச் சங்கிலியைக் கழட்டியெடுத்து அவரைத் தண்ணீருக்குள் மூழ்கடித்து கொல்கிறான் ஒருவன். அக் கொலைகாரனைக் கண்டுபிடித்து மரணதண்டனை வழங்கித் தீர்ப்பளித்தது நீதிமன்றம்.

இது போலப் பல கோரங்கள் சுனாமியினால் இலங்கை, இந்தியா, இந்தோனேஷியா இன்னும் சில நாடுகளில் கடலலை அனர்த்தத்தோடு நிகழ்ந்து கொண்டேயிருந்தன. வைத்தியசாலைகளும், பிரதேச சபைகளும் அடையாளம் தெரியாச் சடலங்களால் நிறைந்தன. இந் நிகழ்வுகளின் போதும் நிவாரணப் பணிகளின் போதும் ஊடகங்கள் பெரிதும் உதவின. பல நாடுகளும் தம் உதவிக்கரங்களை நீட்டின. இருப்பிடங்களை இழந்தவர்களுக்கு வீடுகளும், தொழில் இழந்தவர்களுக்கு தொழிலும் மற்றும் இழப்புகளுக்கும் தாம் உதவுவதாகச் சொல்லின. சில நிறைவேறின.

அப்போதைய இலங்கை ஜனாதிபதி சந்திரிக்கா பண்டாரநாயக்க குமாரதுங்க விடுதலைப்புலிகளின் கட்டுப்பாட்டுப் பிரதேசங்களுக்குச் சென்று அவர்களுக்குக் கைகொடுத்து உரையாடி வந்ததை உலகின் பேரதிசயம் போல ஊடகங்கள் எண்ணிப்பலவாறாக விளம்பரப்படுத்தி வந்தன. பிறகு வந்த காலங்களில் ஊடகங்களுக்கு எழுதத்தெரிந்த அனேகர் ஆழிப்பேரலை குறித்துக் கவிதை, கட்டுரை, கதைகளெனக் கிறுக்கத் தொடங்கினர். அது சுனாமியை விடவும் மோசமாக இருந்தது.

” சுனாமியை விடக் கொடுமையானவை அதையொட்டி எழுதப்பட்ட பல கவிதைகள். இவற்றை எழுதிய கவிஞர்கள் பலரையும் டிசம்பர் 26, 2004 காலை 8.20 மணிக்கு மீன் வாங்கி வரும்படி கடற்கரைக்கு அனுப்பாதது நாம் விட்ட மகா வரலாற்றுப்பிழை. ‘ஆடை களவாடும் சுனாமி நீதானோ?’ எனக் காதலியின் விரகக்குரலுக்குப் பாடல்வரிகள் எழுதிய வைரமுத்துவையும் சேர்த்துத்தான் சொல்கிறேன்” எனத் தன் பத்தியொன்றில் கூறும் எழுத்தாளர் திரு.உமா வரதராஜனின் கருத்தை முழுமையாக ஏற்றுக்கொள்ளும்படியாகப் பல கவிதைகள் அலைகளின்றி ஆர்ப்பாட்டமின்றி ஆட்களைக் கொன்றன.

அது போலவே அக் காலத்தில் மிகைத்திருந்த ஆழிப்பேரலை அனர்த்தத்தில் பாதிக்கப்பட்டவர்களுக்குச் செய்துதருவதாகச் சொன்ன அரசியல்வாதிகளின், நடிகர்களின் வாக்குறுதிகள் அனேகமானவை நிறைவேற்றப்படாமல் போன இடம் குறித்துத்தகவல்கள் இல்லை.

இலட்சக்கணக்கான மக்களைக் காவுகொண்ட சுனாமியைப் போலவே தான் பேய்மழைகள் பெரும் இடர்களைக் கொண்டுவருவனவென்றும் அவை மரணத்தின் தூதுவனுக்கு உதவுபவையென்றுமான எண்ணங்கள் எல்லோர் மனதிலும் வலுப்பெற்று நிற்கும்படி பின் வந்த மழைநாட்கள் நாட்டின் பெரும்பாகங்களை வெள்ளத்துக்குள் மூழ்கடித்தன. எங்கு பார்க்கிலும் வெள்ள நீர் மட்டம். அனேக குடியிருப்புக்களின் கூரைகள் மட்டும் தமதிருப்பை உணர்த்தியபடி நீருக்குள் மிதந்தன. ஆட்களேற்றிய வள்ளங்கள் இடமற்ற காரணத்தால் விட்டுச் சென்ற செல்லப்பிராணிகள் சடலங்களாக மிதந்து காகங்களினதும் ,அனைத்துமுண்ணிப் பறவைகளினதும் வயிற்றினை நிரப்பின.

பல இடங்களில் மண்சரிவினாலும், மழை, வெள்ளத்தாலும் மனிதர்களும் கூடத் தமது இருப்பிடங்களோடு மீளப்பெற முடியாச் சடலங்களாக மண்ணுக்குள் புதையுண்டனர். பாதுகாப்பான இடங்களுக்கு இடம்பெயர்ந்து வெள்ளத்துக்காக விட்டுச் சென்ற வீடுகளில் கொள்ளையர்கள் புகுந்து திரவியங்களைத் தேடினர். எல்லாம் பார்த்திருந்த மழை, தொடர்ந்தும் வருடங்கள் தோறும் சில காலங்களுக்கொரு முறை அமோகமாக வந்து மேலும் மேலும் இன்னல்களைத்தான் சேகரித்துத் தந்துவிட்டுச் செல்கின்றது.

காலநிலை மாற்றங்கள், யாராலும் நிறுத்த முடியா மழை, புயலின் பாதிப்புக்கள், திசைகள் நோக்கி நகரும் சூறாவளியின் தாக்கங்கள் எனப் பல சொல்லும் வானிலை அறிக்கைகளைக் கூடச் சில சமயங்களில் மழை ஏமாற்றிவிடுகிறது. எதிர்பாராத் தருணங்களில் ஒரு திருட்டுப் பூனையைப் போல வந்துவிடுகிறது. அடைமழை வரலாம் என அறிவிக்கப்பட்ட நாட்களில் தபால்காரனின் கரத்திலிருந்து தொலைந்து போன கடிதமாய் மழை வராமலே போய்விடுகிறது.

இருமாதங்களாக இலங்கையின் பல பிரதேசங்களிலும், இந்தியாவின் தமிழ்நாடு, இன்னும் சில பிரதேசங்களிலும் புயலுடனான மழை கோரத்தாண்டவமாடிச் சென்று நகரங்கள் ஈரலித்துக் கிடந்தமையையும், மனிதர்கள் ஏற்றத்தாழ்வு பாராமல் வெள்ளம் தீண்டாத ஊர்ப்பொது இடங்களில் கூடிக் கதைத்தபடியிருந்ததையும் காணும் வாய்ப்புக்கள் புகைப்படங்கள் மூலம் கிட்டியது. நகரங்களில் நேர காலமற்ற பணி நெருக்கடி, அயலவரைக் கூட அறிமுகமற்றவர்களாக ஆக்கியிருக்கிறது. பெற்ற பிள்ளைகளிடம் பல விடயங்களை பேசுதல், அவர்களது கல்வி, வாழ்வியல் முறைகள், நடவடிக்கைகள் எனக் கலந்தாலோசித்தல் போன்றவைக்கும் துணைகளிடம் மனம் விட்டுப் பேசுவதற்கும் நேரம் இடமளிக்கா வீடுகளில் உள்ளவர்களையெல்லாம் கூட வெள்ளம் ஒன்றாக்கி ஓரிடத்துக்குக் கூட்டி வந்து கலந்துரையாட விட்டது.

playing-rainவெள்ளங்களும், பல இயற்கை அனர்த்தங்களும் சமூகத்தின் கீழ்நிலை மற்றும் நடுத்தர மக்களையே அதிகம் பாதிக்கிறது. அன்றாட வாழ்க்கைக்காக அன்றாடம் உழைப்பவர்களும், மாத வருவாய் போதா மக்களுமே அதிகளவில் இன்னல்களுக்குள்ளாகின்றனர். வசதிப்பட்டவர்களின் மாளிகைகளுக்கு வெள்ளம் வராது. வரினும் அவர்கள் மாடிகளிலிருந்து வேடிக்கை பார்ப்பர். அவர்களுக்கான உணவுகள் குளிரூட்டப்பட்ட இயந்திரங்களுக்குள்ளும் சூடான சமையல் உபகரணங்களுக்குள்ளும் அடைபட்டுக்கிடக்க, மாடிகளிலிருந்து வெள்ளநீரையும், மழையையும் வேடிக்கை பார்ப்பர். சினிமா நாயகிகள் நீரில் அழியா முக ஒப்பனைகளுடன் மழையில் குதித்தாடுவதை தொலைக்காட்சிகளில் வேடிக்கை பார்த்தும் பொழுதைக் கடத்தலாம் அவர்கள்.

இன்னும், இலேசான மழை தூறும் நாட்களில் கூட சுகமான போர்வைக்குள் பலத்த நித்திரையிலிருக்கும் பலர் நனைந்த தரையில், குளிரெடுக்கும் இரவில் வீதியோரங்களிலும், வெளிப்புறக்கடைத் திண்ணைகளிலும், புனிதஸ்தல வாயில்களிலும் ஒண்டிக் கிடக்கும் யாசக மனிதர்கள் குறித்து சிந்திப்பதேயில்லை. மழை நாட்களில் அவர்களது பண வரவுகள், ஊண், உறையுள், உறக்கம் எதுபற்றியும் யோசித்துப்பார்ப்பதில்லை. மேற்கூறிய இடங்களில் அடைக்கலமாகி இரவுறக்கம் பெறும் சகமனிதர்களின் நிலை குறித்தும், மழை வந்தால் அவர்களது போக்கிடம், இருப்பு குறித்தும் உரையாடுவதுவும், நினைவுபடுத்துவதும் இங்கு அவசியமாகிறது.

இன்றைய காலகட்டத்தில் அரசு வழிநடத்தும் ஊடகங்கள் மற்றும் தனியார் ஊடகங்கள் பலவும் இது போன்ற அனர்த்தங்களுக்காக, அதற்கான நிவாரணங்களுக்காக ஒன்றுகூடுவதென்பது குறைவாகவே உள்ளது. குடும்பமே கூடிப் பார்த்துக் களிக்கும் தொலைக்காட்சித் திரைகள் கூடத் திரைநாயகிகளின் அங்க அசைவுகளையும், அதி பல சூரக் கதாநாயகர்களின் அடிதடிகளையும் , பொய் சொல்லும் விளம்பரங்களையும் காட்சிப்படுத்திக் காட்சிப்படுத்தியே மக்களின் நேரங்களை வீணடிப்பதோடு அவர்கள் மனதில் வக்கிரத்தையும் வன்முறைகளையும் விதைத்தபடியிருக்கிறது.

எழுத்து ஊடகங்கள் கூட அனேகமாக நடிகைகளின் நாய்க்குட்டிகளுக்கும், நடிகர்களின் புதுப்படங்கள், அரசியல் பொய் வாக்குறுதிகளுக்கும் கொடுக்கும் முக்கியத்துவம் கூட இதுபோன்ற அனர்த்தங்கள் பற்றிய செய்திகளுக்கும், அதற்கான நிவாரணத்துக்காக ஒன்றுதிரள ஊக்கப்படுத்துவதற்கும் கொடுப்பதாயில்லை. பாதிக்கப்பட்டவர்களுக்காகவும், இயலாதவர்களுக்காகவும் எவ்வளவோ செய்யமுடியுமானவை மக்களுடன் நேரடித் தொடர்பிலிருக்கும் ஊடகங்கள்தான். சில ஊடகங்கள் உள்ளனதான். மறுப்பதற்கில்லை. எனினும் அவையும் காலத்தின் இடர்நிலைக்குச் சிலகாலம் தம்மைக்கொடுத்துவிட்டுப் பின்னர் திரும்பவும் தமது இன்னிசைகளிலும், ஆட்டம்பாட்டங்களிலும், நடிகைகளின் இடைகளிலும், அரசியல் வீரப்பிரதாபங்களுக்குள்ளும் தம்மை ஒளித்துக்கொள்கின்றன.

காலநிலை மாற்றங்களால் இது போன்ற இயற்கை அழிவுகள் தொடரும் சாத்தியக்கூறுகள் அனேகமிருப்பதால் பாதிக்கப்படும் மக்களின் அரசினை இது போன்ற இன்னல்கள் ஏற்படுமிடத்து உடனடியாகச் செய்யவேண்டியவை குறித்துப் பல நடவடிக்கைகளை எடுக்கச் சொல்லிக் கட்டாயப்படுத்த வேண்டிய கடமையில் நாம் இருக்கிறோம். ஆறுகளில் நீர் நிரம்பி ஊருக்குள் திரும்பும் வெள்ளங்களைக் கட்டுப்படுத்த தேவையான அணைகளைக் கட்டி, வேற்று வழிகளினால் நீர் வழிந்தோடச் செய்யவேண்டும். அழுக்குகளும், கழிவுகளும் தேங்கி, நீர் வழிந்து நிரம்பும் வாய்க்கால்கள் அடைக்கப்பட்டு, குப்பைகளால் நகர வீடுகள் நீருள் மூழ்குவது குறித்து மக்களுக்கு விழிப்புணர்வை ஏற்படுத்துவதோடு அதைத் தடுக்கத் தேவையான வழிவகைகளையும் செய்யவேண்டும்.

இவையெல்லாவற்றுக்கும் ஊடகங்கள் தான் பேருதவி செய்யவேண்டும். மக்களின் காலடிக்கு தினமும் போய்வருகின்றன ஊடக அலைகள். உலகில் சுனாமி எச்சரிக்கை விடுக்கும் நல்ல சேவை செய்யும் ஆராய்ச்சி மையங்கள் பல இப்பொழுது தோன்றிவிட்டன. அது போலவே இயற்கை அனர்த்தங்கள் குறித்தும், அதன் போதான முதலுதவிகள் குறித்தும் மக்களிடம் விழிப்புணர்வு ஏற்படுத்தும் கல்விகள், பிரச்சாரங்கள் போன்றவற்றை ஊடகங்கள் தினமும் முன்னின்று செய்துவரின் பல பேரிழப்புக்கள் தடுக்கப்படலாம். அறிந்த மக்கள், அறியாதவர்களிடமும், பாமரர்களிடமும் எடுத்துச் சொல்லாவிடின், சுனாமிக் கொள்ளையருக்கும் நமக்குமென்ன வித்தியாசம் இருக்கப் போகிறது ? நீருக்குத் தாகமெடுத்து உயிர்களைப் பருகித் துப்பவிடுவது இன்னும் எத்தனை நாளைக்கு ?

– எம்.ரிஷான் ஷெரீப்,
மாவனல்லை,
இலங்கை.
mrishanshareef@gmail.com

பகவத்கீதைஇந்துக்களின் ஒரு புனிதநூலா? அல்லது பார்ப்பனிய புனைவா? : வி.இ.குகநாதன்

bhagavadgita1இந்தியாவின் ஒரு பகுதி இயற்கையின் சீற்றத்தாலும் உட்கடுமான க் குறைபாடுகளினாலும் நீரில் மூழ்கிக்கொண்டிருக்கும்போதும், மற்றொரு பகுதி மதசகிப்புத்தன்மை,மாட்டிறைச்சி விவகாரம் போன்ற மதவாதத்தீயில் வெந்துகொண்டிருக்கும்போதும், இவைபற்றி போதிய அக்கறையின்றி நமது இந்துத்துவா நாயகன் மோடி உலகம் பூராகச்சுற்றிவந்து இந்தியாவினை பல்தேசியக்கம்பனிகளிற்கு விற்றுவருகிறார்.

இப்பயணங்களின்போது மோடி உலகத்தலைவர்களிற்கு இந்தியாவின் பொக்கிசம் எனக்கூறி ஒரு பரிசுப்பொருளினை வழங்கிவருகிறார். அப்பரிசுப்பொருள்தான் பகவத்கீதை. மோடிதான் இப்படி என்றால் இந்திய வெளியுறவு அமைச்சர் சுஸ்மிதா சுவராச் பகவத்கீதையினை இந்தியாவின் தேசியநூலாக்கவேண்டும் என்கிறார். இவ்வாறெல்லாம் புகழப்படும் பகவத்கீதையின் யோக்கிதை என்ன என ஆராய்வதே இவ்வாக்கத்தின் நோக்கம்.

பகவத்கீதை என்றால் எது நடந்ததோ அது நன்றாகவே நடந்தது எது ……, கடமையினைச்செய் பலனை எதிர்பார்க்காதே போன்ற மேற்பூச்சுகள் பூசப்பட்டு எமக்கு அறிமுகப்படுத்தப்படுகிறது. ஆனால் அதன் நோக்கம், உட்கருத்து எல்லாமே இரண்டு விடயங்களேயாகும்.

1. வர்ண தர்மம்(சாதியமைப்பு) பேணல், பெண் அடிமைத்தனம்.

2. வன்முறையினை தூண்டல்.

இதில் வருணங்கள் பற்றிப்பேசும்போதெல்லாம் வருணங்கள் ஒருவருடைய செயல்கள், குணங்களாலேயே தீர்மானிக்கப்படுகின்றன என்று மழுப்ப முயலலாம். ஆனால் பகவத்கீதையின் 9வது இயலின் 32வது பாடலில் பின்வருமாறு கூறப்படுகிறது.

Subramanian-Swaami”பாவயோனியில் பிறந்த பெண்கள், வைசியர்கள், சூத்திரர்கள் கூட என்னிடத்தில் பற்றுவைத்தால் அவர்களில் சிலரையும் உயர்வுநிலைக்கு கொண்டு செல்வேன்”. இதனடிப்படையிலேயே மோடி பிரதமராக தெரிவுசெய்யப்பட்டபோது , சுப்பிரமணிய சுவாமி தனது (twitter)பதிவில் மோடியினை பிரமணராக கருதலாம் என தரமுயர்த்திவிட்டதும் இதனடிப்படையிலேயே போலும்.

கீதையின் 18 இயலின்44-47 வது பாடல்களில் நாலு வருணங்களின் பெயர் குறிப்பிடப்பட்டு அவற்றிற்கான தொழில்களும் குறிப்பிடப்படுகிறது. மேலும் வருணங்களை படைத்தது நானே என கிருஸ்ணர் சுயவாக்குமூலமே கீதையில் கொடுத்துள்ளார். கீதையின்படி ஒரு வர்ணத்தை சேர்ந்த ஒருவர் வேறு ஒரு தொழினை சிறப்பாக செய்வார் எனினும் தனது குலத்தொழிலினைவிட வேறு தொழில் செய்யக்கூடாது. இவ்வாறு வர்ண அமைப்பினை பேணுவதே கீதையின் அடிப்படை நோக்கம்.

கீதையின் இரண்டாவது நோக்கம் வன்முறையினை தூண்டல், அதாவது தமது நலன்களிற்காக கொலை செய்யத்தூண்டுவதாகும். போர்க்களத்தில் அருச்சுணன் தனது எதிர்தரப்பில் நிற்கும் தனது சத்திரிய உறவினர்களைப் பார்த்து தயங்கிநிற்கிறான். அப்போது அவனை கொலை செய்யத்தூண்டும்விதமாகவே கிருஸ்ணர் கீதையினை கூறுவதாக கூறப்படுகிறது. இங்கு யுத்தம் என்பது மக்களினை யார் ஆள்வது என்பதற்கான ஒரு ஆதிக்கப்போரே அது.

இதனை எவ்விதத்திலும் நியாயமான போராகக் கருதமுடியாது. இதில் பாண்டவர்கள் பக்கம் நியாயம் இருப்பதாக பலர் கருதலாம். ஆனால் பாண்டவர்கள் யாருமே பாண்டுவிற்கு பிறக்கவில்லை. (உதாரணமாக அருச்சுணன் இந்திரனின் மகனே). எனவே பாண்டவர்கள் பாண்டுவின் வழியில் ஆட்சியுரிமை கோரமுடியாது. இது நீதிக்கான போரல்ல.

இவ்விடத்தில் போரிற்கு அருச்சுணன் தயங்குவதற்கான காரணம் யாதெனில் போரின்போது சத்திரியர்கள் பலரும் இறப்பார்கள், இதனால் பின்பு சத்திரியப்பெண்களிற்கு உறவுகொள்ள சத்திரிய ஆண்கள் இல்மால்போய்விடுவார்கள், அவ்வாறான நிலையில் சத்திரியப்பெண்கள் வேறு வர்ண ஆண்களுடன் கலக்கவேண்டிவரும் என்றே தயங்குகிறான். (போர்க்களத்திலும் அருச்சுணனின் நினைப்பினை பாருங்கள்). அதன்போது கிருஸ்ணன் அவனிற்கு கூறுகிறான் அவ்வாறு தர்மம் (வர்ணாஸ்திர தர்மம்) அழியும் நிலை வந்தால் நான் வருவேன் என்று. இப்போது புரிகிறதா எந்த தர்மம் அழியும்போது கிருஸ்ணன் வருவான் என்று .

வன்முறையினை கீதை எவ்வாறு நியாயப்படுத்துகிறது என்பதற்கு கோட்சேயின் வரலாறே சாட்சியாகும். தீண்டாமைக்கு எதிராக போராடிய (கவனிக்கவும்: வர்ண அமைப்பிற்கு எதிராக காந்தி போராடவில்லை) காந்தியினை கொன்றதற்கு கீதையினையே கோட்சே ஆதாரம் காட்டினான்.

India's prime minister Narendra Modi walks with Prime Minister David Cameron and his wife Samantha in a backstage area at Wembley Stadium
India’s prime minister Narendra Modi walks with Prime Minister David Cameron and his wife Samantha in a backstage area at Wembley Stadium

அண்மையில் இலண்டன் வெம்பிளி அரங்கில் மோடி உரையாற்றும்போது வேறுபாடுகளற்ற சமுதாயம், வன்முறை மற்றும் தீவிரவாத ஒழிப்புப்பற்றியெல்லாம் பேசினார். அவர் அவ்வாறு பேசும்போது டேவிட் கமரோன் மோடியால் பரிசளிக்கப்பட்ட பகவத்கீதையின் ஆங்கில வடிவத்கினைப் பார்த்துக்கொண்டிரந்தார். அக் கீதையோ சாதிப்பாகுபாடு, வன்முறை என்பவற்றினை நியாயப்படுத்திக் கொண்டிருந்தது . இதில் ஆச்சரியம் எதுவுமில்லை ஏனெனில் மோடி போன்ற மதவாதிகளின் சொல்லுக்கும் செயலிற்கும் எப்போதும் தொடர்பிருப்பதில்லை.

கொல்லென கொல்லும் மழை.. : கவிஞர் அஸ்மின்

rainவானம் அழுது
பூமிக்கு வந்த மழை
நாங்கள் அழுத
கண்ணீரில்
நனைந்தது.

நிலம் கடலானது
குளம் கூளமானது
ஆறு ஏழானது
எங்கள் வாழ்வு பாழானது….
ஒரு நாளில்….

அன்று மழை வேண்டி
தொழுதவர்கள்
இன்று
மழை தீண்டி
அழுத கொண்டிருக்கிறோம்….

போன வருடப் போரில்
தோற்றுப்போய்
புறமுதுகிட்டோடிய
மழையரசன்…

இம்முறை
கோடான கோடி
போர்வீரர்களோடும்
இடி மின்னல்களோடும்
புயலோடும் வந்து
அடித்த அடியிலும்
இடித்த இடியிலும்
கோட்டை
கொத்தளங்களை இழந்து
கட்டடங்களை
கட்டியணைத்து
கதறிக்கொண்டிருக்கிறோம்.

குளத்தை
துடிக்கத் துடிக்க கொன்றோம்
ஆற்றினை சிறைபிடித்தோம்
வயல் நிலங்களை
சிலுவையில் அறைந்தோம்…
மரங்களின் கரங்களை
முறித்தோம்
காட்டினை கதறக்கதற
கற்பழித்தோம்.

காட்டுமிராண்டிகள்
நாங்கள்
இயற்கைக்கு செய்த கொடுமை
கொஞ்ச நஞ்சமல்ல….
நேற்று நாங்கள் விதைத்தோம்
இன்று அறுவடை செய்கிறோம்….

இயற்கை என்பது
சிங்கம் புலி போன்று
சினம் கொண்டதல்ல
நாயைப்போன்று
நன்றியுள்ளது

வாழவைத்தால் வாலாட்டும்
காதலோடு
காவலிருக்கும்
நாங்கள்
கல்லெடுத்து அடித்தால்
கடிக்குமா..
இல்லை
வா …வந்து
என்னை கொல்லென்று
செங்கம்பளம் விரித்து வரவேற்குமா….?

இயற்கையை
கொன்றொழித்த
அயோக்கிய
கொலைகாரர்கள் நாங்கள்
வாருங்கள்…
மரங்களை நட்டு
மன்னிப்பு கேட்போம்…..!!

கவிஞர் அஸ்மின்
கவிஞர் அஸ்மின்

கடந்த கால தவறுகளை
நாம் கொல்லாதவரை…
எம்மை திருத்திக்கொள்ளாதவரை
தொடர்ந்தும்
இதுபோல் கொல்லென கொல்லும் மழை….

கவிஞர் பொத்துவில் அஸ்மின்

தமிழ்த்திரை இசையில் ராகங்கள் : [ 26 ] : T.சௌந்தர்.

ராகமாலிகை.:

6th_century_inscriptionமரபு ராகங்களின் உள்ளோட்டங்களில் புதைந்த இன்பங்களை நமது திரையிசையமைப்பாளர்கள் இதயத்தை வருடும் பாடல்களாக்கித் தந்திருக்கிறார்கள்.புராதன ராகங்களிலிருந்து அமுதம் கடைந்து அயர்வில்லாத ஊக்கத்தோடு அவர்கள் தந்த நல்லிசை நயத்தால் விளைந்த பயன்கள் ஏராளம்!

தங்களுக்கு எட்டாதென்று , அன்னியப்படுத்தப்பட்டு , கர்னாடக இசை வித்துவான்களால் துரத்தியடிக்கப்பட்ட சாதாரண இசைரசிகர்களை புதிய அணுகுமுறைகளால் கவர்ந்திளுத்தார்கள்.திரும்பத் திரும்ப ஒப்புவிக்கின்ற இசைவித்தையாக அல்லாமல் ராகங்களை படைப்பாற்றலின் உந்துசக்தியாக கருதி செயல்பட்டவர்கள் சினிமா இசையமைப்பாளர்களே!

இதமும், மென்மையும், இனிமையுமிக்க மெல்லிசை கானங்களால் மனம் லயிக்கவைத்து.அதனூடே , ராகங்களின் இனிமையை ரசிக்க வைத்ததுடன் ,அதன் விளைபயனால் செவ்வியல் இசையை ரசிக்கும் ஓர் உள்நுழைவு படியையும் அமைத்துக் கொடுத்ததில் சினிமா இசையமைப்பாளர்களின் பங்கு மிகப்பெரியது.

ராகங்களின் அடிப்படையை மாற்றாத ,இலக்கணப் புலமையோடியைந்து புதிய உருவம் பெற்ற இசை திரையில் மலர்ந்தது.அது பாமரரசிகனை மட்டுமல்ல கட்டுபெட்டியான வித்துவான்களையும் சலனப்பட வைத்தது.

செவ்வியலிசையின் மறுவார்ப்பாக இருந்த 1940 களின் திரையிசையில் கர்னாடக இசைக்கலைஞர்கள் ஆங்கங்கே பாடினார்களெனினும் பரந்த இசை ராசிகளின் மனதில் அவர்களால் இடம் பிடிக்க முடியவில்லை.

1950 , 1960 களில் சினிமாவில் பாடல்களைப் பாடிய பாடகர்களின் புகழ் அவர்களுக்கு பரந்த ரசிகர் வட்டத்தையும் ,அதனால் அவர்கள் பெற்ற மவுசும் குறைத்து மதிப்பிடக்கூடியதல்ல.

சமூகப் பொறுப்பற்ற கர்னாடக இசை வித்துவான்கள் செய்ய முடியாததை சினிமாவில் புகழ் பெற்ற , கர்நாடக இசை அறிந்த பாடகர்கள் சாதித்துக் காட்டினார்கள்.பரந்துபட்ட மக்களை விட்டு அன்னியமாகப் போய்கொண்டிருந்த , பழம் பஞ்சாங்கங்களின் இசை என்ற கசப்பு இசையாக இருந்த கர்நாடக இசை மேடைகளை இளைஞர்களால் நிறைத்துக்காட்டினார்கள்.

கர்னாடக இசை பாடும் இளங்கலைஞர்களும் கிழட்டுக் குரலில் பாடிக்கொண்டிருந்த வேளையில்
[ இப்போதும் சிலர் அப்படித்தான் பாடுகிறார்கள்] கே .ஜே .ஜேசுதாஸ் ,பின் அவரைத் தொடர்ந்து பி.உன்னிகிருஷ்ணன் போன்றோர் கம்பீரமிக்க , இனிமையான குரல்களால் கர்னாடக இசையரங்குகளை நிமிர வைத்தார்கள்.

புராதன இசையின் பெருங்கொடையான நமது ராகங்களில் உள்ள சுவையை அதனதன் குணங்களுக்கேற்ப நெஞ்சைத் தழுவும் இசைவார்ப்புகளாக தந்த இசையமைப்பாளர்கள், விதம், விதமான ராகங்களை இணைத்து அழகு காட்டியும் நம்மை மகிழ்வித்திருக்கிறார்கள்.ஒரு வட்டத்துக்குள் முடங்கிக் கிடந்த ராகங்களை வெளிக்கொணர்ந்து ராகம் பற்றிய சிந்தனை விரிவையும் ,ஏலவே இருந்த முன்முடிவுகளையும் மாற்றியமைத்தனர்.

புதிய இசைபோக்குகளுடன் ராகங்களின் மோதல் புதிய உன்னதங்களை அடைய உதவியது.

உணர்வுகளின் பலநிலைகளை உந்துசக்தியாகக் கொண்டு ஜீவன் நிறைந்த பாடல்களை தர ராகமாலிகை முறையையும் அழகு குன்றாமல் பயன்படுத்தி வெற்றியும் நிலைநாட்டினார்கள்.

வெவ்வேறு ராகங்களை இணைத்து பாடும் முறையை ராகமாலிகை என்றழைப்பர்.ராகமாலிகையில் பாடுவது என்பதும் இசையுலகிற்கு தமிழர்கள் வழங்கிய கொடையாகும்.இசையின் உன்னதங்களை எல்லாம் புராதன காலத்திலேயே கண்டறிந்ததென்பது அவர்களது நுண்ணறிவின் அடர்த்திக்கும் , முதிர்ச்சிக்கும் சிறந்த எடுத்துக்காட்டாகும்.

தமிழ் செவ்வியல் இசையில் ராகமாலிகைக்கு சிறப்பிடம் உண்டு.ஒன்றுக்கொன்று நுண்மையான வேறுபாடுகளைக் கொண்ட ராகங்களைப் பாடும் போது ஒரு பாடகரின் ராகப்புலமையையும் , நுட்பத்தையும் , நுண்ணிய அறிவையும் நாம் உணர்ந்து கொள்ளலாம்.

ராகமாலிகை என்றால் மாலையாகத் தொடுக்கப்பட்ட ராகங்கள் என்று அர்த்தமாகும்.

ஒன்றுக்கு ஒன்று நெருக்கமான, ஒரே தன்மைவாய்ந்த ராகங்களில் பாடல்களை அமைப்பது , அதே போல் வெவ்வேறு குண இயல்புகளைக் கொண்ட ராகங்களை இணைப்பது என்பது நமது இசை வகைகளில் முக்கியம் பெறுகின்ற அம்சமாக உள்ளது.

உணர்வுகளை துலாம்பரமாகக் காட்ட மொழியால் முடியாத போது மரபார்ந்த ராகங்களின் நுண்மையான திறனால் சுருக்கமாகவும் சிக்கனமாகவும் வெளிப்படுத்த முடியும் என்பதை முன்னோர்கள் துல்லியமாக அறிந்து வைத்தார்கள்.வெவ்வேறு வகையான உணர்வுகளை வெளிப்படுத்த அதற்கான குறியீடுகளையும் ராகங்களில் அமைத்தனர்.

பக்திகாலத்தில் சம்பந்தர் தனது தேவாரங்களை திருநீலகண்டயாழ்பாணரின் யாழிசையுடன் பாடியதாகவும் , சம்பந்தரின் சந்தங்களை யாழில் இசைக்க முடியாத திருநீலகண்டர் யாழை முறித்ததாகவும், அதனால் யாழ்முரிபண் என அழைக்கப்பட்டதாகவும் ஒரு வரலாறு உண்டு. சம்பந்தர் பாடிய ” மாதர் மடப்பிடி யானை ” என்று தொடங்கும் தேவாரம் பாடும் போதே இந்த சம்பவம் நடந்ததாகவும் அதன் காரணமாக யாழ்முரி அல்லது யாழ்மூரி என்ற பண்ணிலே அந்த தேவாரப்பாடல் பாடப்பட்டது என்பர்.

ஆயினும் தேவார காலத்திற்கு முன்னரே சிலப்பதிகாரத்தில் இதுபற்றிய குறிப்புக்கள் கிடைக்கின்றன என்பதும் குறிப்பிடத்தக்கதாகும்.

சிலப்பதிகாரத்தில் கானல்வரிப்பாடல்களில் முரிபாடல் பற்றிய குறிப்பும் பின் சம்பந்தர் காலத்தில் யாழ்முரி என்றும் சொல்லப்பட்ட இசை முறை அல்லது பண்முறை ராகமாலிகை தான் என்பதை அனுமானிக்க வைக்கிறது.

எடுத்த இயலும், இசையும் தம்மில்
முரித்துப் பாடுதல் முரியெனப்படுமே’ …(சிலப்.7) (14) – (16) என்று சிலப்பதிகாரமும் ,

மொந்தை முழாக்குழல் தாளமோர் வீணை
முதிர ஓர் வாய் முரிபாடி (தேவா. 45: 5) என்று சம்பந்தர் தேவாரமும் முரிப்பாடல் பற்றிய குறிப்பைத் தருகின்றன.

“முரி என்பது தாளக் கணக்கிற்கும் பண் நுண்ணுமைக்கும் ஏற்ப பகுத்துப் பாடுதலாகும்.இது தொன்று தொட்டு இசைத்துறையில் சிறந்து வருவது “என்று தமிழிசைக் களஞ்சியமும்

” நடைக்கேற்ப சொற்களின் எழுத்துக்கள் காலப்படுத்தப்பட்டு பிரித்து இசைக்கப்பட்டது முரி எனப்பட்டது ” என தழிசையியலும்,

இசை வடிவத்தில் முரி அமைப்பது குறித்து பஞ்சமரபு எனும் நூல்

01 வாரம் கூடை முதலிய நடைகளை மாற்றுதல்
02 நடையுள் நடை வைத்தல்
03 தாளம் முரித்தல்
04 இசைக்காலம் முரித்தல்
05 பண் முரித்தல்

போன்ற குறிப்புக்களை சான்று காட்டுகிறது..

இன்றைய ராகமாலிகை என்பது முரிப்பாடலே என இசையறிஞர்கள் கருதுகின்றனர்.

தமிழ் செவ்வியல் இசையில் மகாராஜபுரம் சந்தானம் பாடும்
“விநாயகா ,விநாயகா விக்ன வினாசக் விநாயகா ” என்று ஆரம்பிக்கும் பாடல்,மற்றும் “கண்ணா வா மணி வண்ணா வா ” என்ற அம்புயம் கிருஷ்ணனின் பாடலும் பிரபல்யமானவை

இந்த ராகமாலிகை முறையை கையாளும் முறையில் இசைக்கலைஞனின் திறமையும் , ராகத்தில் அவனது திளைப்பும் புலப்படும்.

ஒரு மாறுதலுக்காக அல்லது புது சுவைக்காக ராகமாலிகை பயன்பட்டாலும் செவ்வியல் மேடைக்கச்சேரிகளை விட , காட்சிகள் மாறும் சினிமாவுக்கே இது மிகப்பொருத்தமானதொரு முறை என்று துணிந்து கூறிவிடலாம்.

ஏலவே எழுதப்பட்ட பாடல்களை இசையமைக்க சினிமா இசையமைப்பாளர்கள் பயன்படுத்தும் ஒரு நுட்பமாகவும் ராகமாலிகை பயன்பட்டிருக்கிறது.

நெருடும் சந்தங்களை மடக்கி பிடிக்கவும் சாதுர்யமாகத் தாண்டி செல்லவும் இராகமாலிகை 1950,.1960 களில் வெளிவந்த திரைப்படங்களில் விரிவாகப்பயன்பட்டிருக்கிறது.ராஜா ,ராணி கதைகளில் வரும் நாட்டியப் பாடல்களில் பெரும்பாலும் ராகமாலிகைப்பாடல்களாக அமைத்து நாட்டிய இசைமரபையும் இசையமைப்பாளர்கள் பின்பற்றி சென்றிருக்கிறார்கள்..ஒரு சில படங்களுக்கு இசையமைத்தவர்களும் ராகமாலிகையில் துணிந்து பாடல்களைத் தந்திருக்கிறார்கள்.

வெறும் இனிய ஓசை நயத்தை மட்டும் தராமல் பாடல் வரிகளின் உணர்வுகளையும் , ராகத்தின் இனிமையை , அதன் உணர்வை, குறுகிய நேரத்தில் அள்ளித் தெளித்து இசை ரசிகர்களை வித,விதமான உணர்வூட்டி கிளர்த்தி விடுவது ராகமாலிகையின் பண்பாகும்.

ஒரு பாடலின் முழுமையில் பல நிலைகளை விரித்து , பாடல் உணர்த்தும் நிலைகளில் திளைக்க வைத்து நுண்ணிய ரச அனுபவத்தை , உன்னதத்தை தந்துவிடுவது ராகமாலிகை.

ஒவ்வொரு மலரும் அழகாய் இருப்பதை ரசிக்கும் நாம் பல வண்ணமலர்கள் இணைந்த பூங் கொத்தையும் ரசிப்பது போன்ற உணர்வை நாம் ராகமாலிகைக்கு ஒப்பிடலாம்.

அரங்கேற்றுக் காதை என்னும் தலைப்பில் அரங்கேற்றம் பற்றியும் ,இசை பற்றியும் விவரிக்கும் சிலப்பதிகார காலம் தொட்டு இன்றுவரை ஆடிவரப்படும் தமிழ் நடனக்கலையான இன்றைய பரத நாட்டியத்தில் ஜதீஸ்வரம் என்ற பகுதி ராகமாலிகையில் அமைந்த பாடல்களால் நிறைந்து காணப்படுகிறது.

தமிழ் சினிமாவைப் பொருத்தவரையில் தமிழ்மரபுவழி வந்த கலைகளின் தொடர்ச்சியாக அமைந்தமையால் புராணம் சார்ந்த பக்திப்படங்களில் அதிகமாக மிக இயல்பாக ராகமாலிகையில் பாடல்கள் அமைக்கப்பட்டுள்ளன.பின் , சமூகம் சார்ந்த கதைகளுக்கு ஏற்பவும் இசை நெகிழ்ச்சி போக்கு காட்டினாலும் ராகமாலிகை ராகம் சார்ந்த மெல்லிசை பாடல்களிலும் நெறிப்படுத்தபட்டுள்ளமை குறிப்பிடத்தக்கதாகும்.

சமூகக் கதைகள் பெருகிவர ராகமாலிகையில் பாடல்கள் உரியவாறு குறைந்தும் வரலாயிற்று. எனினும் ஞானமும் , இசைவேட்கையுமிக்க இசையமைப்பாளர்கள் மெல்லிசையில் அவ்வப்போது பயன்படுத்தியும் வருவது குறிப்பிடத்தக்கது.

தமிழ் திரையில் ராகமாலிகை அமைந்த பாடல்கள் :

01 ஐய்யே மெத்தக் கடினம் – படம்: நந்தனார் [1935] – பாடியவர்: எம் .எம் .தண்டபாணி தேசிகர் – இசை :எம்.டி.பார்த்தசாரதி + எஸ்.ராஜேஸ்வரராவ்
பொய்யாத பொன்னம்பலம் இருக்குமிடம் அறிந்த நந்தனிடம் பாவமன்னிப்பு கேட்கும் வேதியர் மன்றாடும் காட்சியில் பாடப்படும் பாடல்.
பாடல் அமைந்த ராகங்கள் 1.புன்னாகவராளி – 2. நாதநாமக்கிரியை 3 பிருந்தாவனசாரங்கா = 4.செஞ்சுருட்டி

trm02 காயாத கானகத்தே – படம்: ஸ்ரீவள்ளி [1948] – பாடியவர்: டி.ஆர்.மகாலிங்கம் – இசை :சங்கரதாஸ் // சுதர்சனம்
சங்கரதாஸ் நாடகங்களில் கிட்டப்பா பாடி புகழ் பெற்ற இந்தப்பாடல் பைரவி ராகத்தில் விருத்தமாக ஆரம்பித்து ” மேயாத மான் ” என்று விதம் விதமான நளினங்கள் காட்டி, பின் காபி ராகத்தில் நிறைவும் பாடல். ஸ்ரீவள்ளி என்றால் இந்த பாடல் தான் கேட்பவர்கள் மனதில் ஒலிக்கும் வண்ணம் பாடி அசத்தியிருப்பவர் கிட்டப்பாவை மானசீகக் குருவாக கொண்ட டி.ஆர்.மகாலிங்கம்.

03 சிற்பக் கலைவிழாவின் – படம்: தூக்கு தூக்கி [1954] – பாடியவர்கள் : டி.வீ.ரத்தினம் + பி.லீலா + ராதா ஜெயலட்சுமி – இசை: ஜி ராமநாதன்
அழகான பல்லவியுடன் இனிமையாக ஆரம்பிக்கும் பாடல் பல்வகை உணர்வுகளை மிக சிறப்பாக உணர்த்தி அவலச் சுவையுடன் நிறைவுறுகிறது.பாடலின் நிறைவு நம்மை கதி கலங்க வைக்கிறது .

அம்பிகாபதி – அமராவதி காதல் கதையை நெகிழ்வுடன் சொல்ல ஜி ராமநாதன் கையாண்ட ராகங்கள் இசையை தீவிரமாக ரசிப்பவர்களுக்கு பெரும் செல்வமாக அமைந்து விடுகிறது.பாடலின் உணர்வுகள் ஒரு புறம் அதனை அற்புதமாகப்பாடிய பாடகிகளின் திறமை ஒரு புறம் என கதையில் நம்மை மூழ்கவும் வைத்து வீறு கொண்டெழவும் வைக்கின்றன.

இன்னுமொரு முக்கிய விடயம் இந்தப்பாட்டைப் பாடிய பாடகிகளின் குரல்கள் வெவேறு ரகங்களைச் சேர்ந்தவை.வெவேறு ராகங்களை உரசி செல்லும் இந்தப்பாடலை வெவ்வேறு அலைவரிசையில் பாயும் தன்மையும் , அதில் தனித் தன்மையுமிக்க குரல்களைக் கொண்டு பாட வைத்த இசை மேதை ஜி.ராமனாதனின் தீராத இசைத்தாகத்தையும் இந்தப்பாடலில் நாம் தரிசிக்கின்றோம்.

இந்தப்பாடல் அமைந்த ராகங்கள் :கல்யாணி + மாண்டு + சிந்துபைரவி + சரஸ்வதி + சண்முகப்ரியா + நீலாம்பரி ” + சாருகேஷி + முகாரி + சண்முகப்ரியா + ரேவதி

04 பாற்கடல் அலைமேலே பாம்பணையின் மீதே – படம்: ராஜாதேசிங்கு[1960]- பாடியவர்:எம்.எல்.வசந்தகுமாரி – இசை :ஜி.ராமநாதன்

பாடல் சண்முகப்ரியா ராகத்தில் ஆரம்பிக்கிறது.அதைத்தொடர்ந்து ” பாதகனாம் ஒரு ” என்ற பகுதி கேதார கௌளை ராகத்திலும் , ” வானவரும் ” என்ற பகுதி சாமா ராகத்திலும் , ” இரணியன் எனும் ஒரு படுபாவி ” என்ற பகுதி அடாணா ராகத்திலும், ” எங்கிருக்கிறான் ஹரி எங்கிருக்கிறான் ” என்ற பகுதி – மோகனராகத்திலும் , “மூவடி மண்கேட்டு வந்து ” என்ற பகுதி – பிலஹரி ராகத்திலும் , ” தேவர்களை சிறை மீட்டக “என்ற பகுதி கானடா ராகத்திலும். ” ஆவணி ரோகிணியில் “என்ற பகுதி காபி ராகத்திலும் ” அதைத்தொடர்ந்து சிவரஞ்சனி ராகத்திலும் பாடல் நிறைவு பெறுகிறது.

05 வீணைக் கொடியுடைய வேந்தனே – படம்:சம்பூரண ராமாயணம் [1958] – பாடியவர்கள் :சிதம்பரம் ஜெயராமன் +திருச்சி லோகநாதன் – இசை : கே.வீ.மகாதேவன்
இசைவேந்தன் ராவணனை போற்றி ஆரம்பிக்கும் அற்புதமான பாடலில் ராவணன் அரசவையின் வேண்டுகோளுக்கிணங்க சங்கீத ராகங்கள் பற்றி விளக்கிப்பாடும் இனிய பாடல்.
இந்தப்பாடலைக் கேட்கும் போதெல்லாம் ” சுவாமி , கைலைநாதனை தங்கள் கானத்தால் கவர்ந்த ராகம் ” என்றென்றும் நம் நினைவுக்கு வரும்.

இந்தப்பாடலைப் பற்றி சுருக்கமாகக் குறிப்பிடுவதென்றால் கே.வீ .மகாதேவன் தந்த உயிரெனவே நினைந்து உலவும் ஆனந்த கான அமுத மழை என்று தான் குறிப்பிடத் தோன்றுகிறது.
இந்தப்பாடல் அமைந்த ராகங்கள் :
மோகனம் +அடானா + பூபாளம் + சாரங்கா + வசந்தா +நீலாம்பரி + தன்யாசி +கம்பீரநாட்டை + சங்கராபரணம் + தோடி + கல்யாணி + காம்போதி.

06 ஆடிவரும் ஆடகர் பொற் பாவையடி நீ – படம்:தாய் மகளுக்குக் கட்டிய தாலி [1956] – பாடியவர்கள் :சீர்காழி + எஸ்.ஜானகி – இசை: டி.ஆர்.பாப்பா
சிந்து பைரவி ராகத்தில் ஆரம்பிக்கும் பாடல்.”வெண்ணிலவை கைபிடித்து விளையாட ” என்ற பகுதி காபி ராகத்திலும் , “உன்னெதிரே வெண்ணிலவு ” என்ற பகுதி கமாஸ் ராகத்திலும் , “சங்கத் தமிழ் பண்பும்,அன்பும் ” என்ற பகுதி கல்யாணி ராகத்திலும் ,குறிப்பாக பொங்கி வரும் அழகினிலே ஏழை இல்லை என்ற பகுதியில் கல்யாணி மிக இனிமையாக ஒலிக்கும்.

ஆரம்பகால இளம் ஜானகியின் மென்மையான குரலில் ஒலிக்கும் இனிமையான பாடல்.
டி.ஆர்.பாப்பா இசையமைத்த அருமையான பாடல்.

07 பாட்டு வேணுமா உனக்கொரு – படம்:மோகனசுந்தரம் [1953] – பாடியவர்கள் :டி.ஆர்.மகாலிங்கம் – இசை: டி .ஜி .லிங்கப்பா
வட நாட்டு படத்தில் வரும் மெட்டில் – நமது
நல்ல தமிழை புகுத்தி தொல்லை தரும்
சினிமா பாட்டு வேணுமா

என்று எள்ளி நகையாடும் இந்தப்பாடலை ஜனரஞ்சகமான இசையில் சிந்துபைரவி + காபி + சிந்துபைரவி + மாண்டு என ராகங்களை மிக அழகாக அமைத்திருக்கிறார் டி .ஜி .லிங்கப்பா

08 ஸ்ரீ சரஸ்வதி மாதா ஜெயம் அருள் – படம்: ராணி லலிதாங்கி [1958] – பாடியவர்கள் :பி.லீலா + டி.பி.ராமசந்திரன் – இசை: ஜி.ராமநாதன்
அழகிய சரஸ்வதி ராகத்தில் ஆரம்பிக்கும் இந்தப்பாடல் அதே தாள வேகத்துடன் “ஸ்ரீரஞ்சனி ஜெகமே புகழ் ரமணி “என்ற பகுதியில் ஸ்ரீரஞ்சினி ரகத்திலும் , தாள மாற்றத்துடன் “சதங்கை நாதம் சப்திக்கும் ” என்ற பகுதியில் லலிதா ராகத்திலும் கலந்து நிறைவுறுகிறது.
ஜி.ராமநாதனின் உதவியாளரான டி.பி.ராமசந்திரன் மிக அருமையாக லீலாவுடன் இணைந்து பாடிய பாடல்.லீலாவின் குரல் முன்னணியிலும் ராமசந்திரனின் குரல் பின் பாட்டு பாடுவது போன்ற உணர்வையும் தரும் பாடல்.

09 அன்னையின் அருளே வா வா – படம்: ஆடிப்பெருக்கு [1962] – பாடியவர்: சீர்காழி கோவிந்தராஜன் + பி.பானுமதி – இசை : ஏ.எம்.ராஜா
பாடல்கள் நிறைந்த தமிழ் சினிமாவில் டைட்டிலிலேயே பாடல்கள் அமைக்கும் ஒரு முறையையும் கையாண்டு வந்திருக்கிறார்கள்.அந்த வகையில் கதாநாயகன் பாடுவதாய் அமைந்த அழகான பாடல்.மெல்லிசையில் புதுப்பாதை வகுத்த முன்னோடியான ஏ.எம்.ராஜா செவ்வியல் பாங்கிலும் தனது கைவரிசையைக் காட்டிய பாடல் இது.

கட்டிக்கரும்பின் சுவை போன்று இனிமை சொட்டும் ராகங்களை அநாசாயமாக கையாண்டுள்ளார் இசையமைப்பாளர் ஏ.எம்.ராஜா.அதை பொருத்தமானவரைக் கொண்டு பாட வைத்ததை பாராட்டாமல் இருக்க முடியவில்லை.

பாடல் ஆபோகி ராகத்தில் ஆரம்பிகிறது. ” குடகில் ஊற்றுக்கண்ணாகி “-சண்முகப்ப்ரியா ராகத்திலும், “திருவாய் மொழியாம் “என்ற பகுதி ஹிந்தோள ராகத்திலும் , “கட்டிக்கரும்பின் சுவையும் நீயே “என்ற பகுதி கல்யாணி ராகத்திலும், ” வான் பொய்த்தாலும் ” என்ற பகுதி மோகன ராகத்திலும் அமைந்து மிகக்குதூகலம் தந்து காவேரியின் பெருமையை கூறி நிறைவுறும் பாடல்.

10 வேலன் வருவாரோடி வடிவேலன் – படம்: திருமணம் [1957] – பாடியவர்கள் : எம்.எல்.வசந்தகுமாரி – இசை:
கர்னாடக இசையுலகில் கோலோச்சிய வசந்தகுமாரி தனக்கேஉரிய தனித்துவத்துடன் பாடிய செவ்வியல் இசை கலந்த பாடல்.
இந்தப்பாடலில் காம்போதி + ஹிந்தோளம் + கேதாரகௌளை + ஆரபி போன்ற ராகங்களைக் கேட்கலாம்.

11 மாலையிலே மன சாந்தி தந்து – படம்:கோகிலவாணி [1957] – பாடியவர்கள் :சீர்காழி கோவிந்தராஜன் – இசை: ஜி .ராமநாதன்
கிட்டப்பா பாடி பெரும் புகழ்பெற்ற ” கோடையிலே இளைப்பாற்றிக் கொள்ள ” என்று தொடங்கும் திருவருட்பாவின் மறு அவதாரம் என்று சொல்லும் வகையில் அமைக்கப்பட்ட பாடல்.விருத்தமாக அமைந்த இந்தப்பாடலில் ராமனாதனின் இனிய சங்கதிகளை சீர்காழியாரின் குரலினிமையில் நாம் கேட்டு இன்புறலாம்.
விருத்தப்பாடல் .. அமைந்த ராகங்கள் பந்துவராளி + காம்போதி + சண்முகப்ரியா.

12 காத்திருப்பான் கமலக்கண்ணன் – படம்:உத்தம புத்திரன் [1955] – பாடியவர்கள்: பி.லீலா – இசை:ஜி.ராமநாதன்

ரீங்காரம் என்ற சொல்லுக்கு உதாரணம் சொல்லத்தக்க பாடல்.அற்புதமான இசையமைப்பை இயல்புடனும் , விறுவிறுப்புடனும் பாடி பெருமைப்படுத்தியவர் பி.லீலா.அலாதி சுகம் தரும் பாடல் இது என்பதில் சந்தேகமில்லை.

இனிய தாளத்தின் அடர்த்தியும் ,ராகத்தின் இனிமையும் , பாடகியின் முதிர்ச்சிமிக்க குரலிலும் கேட்கும்போதெல்லாம் பரவசப்படவைக்கும் இந்தப்பாடல் அமைந்த ராகங்கள் ஜோன்புரி + திலங் + மோகனம்.

இளையராஜா இந்தப்பாடலின் அமைப்பை வியந்து பாராட்டியுள்ளார்.

13 சேவை செய்வதே ஆனந்தம் – படம்: மகாதேவி [1958] – பாடியவர்கள்: சௌந்தரராஜன் + ராஜேஸ்வரி – இசை விஸ்வநாதன் ராமமூர்த்தி
தேஷ் +கானடா என இரண்டு ராகங்களைப் பயன்படுத்தி மெல்லிசைமன்னர்கள் தந்த எழுச்சிமிக்க இனிமையான பாடல்.

14 மஞ்சள் வெயில் மாலையிலே வண்ண பூகாவிலே- படம்:காவேரி[1955] – பாடியவர்கள்:சி.எஸ்.ஜெயராமன்+ எம்.எல்.வசந்தகுமாரி – இசை:ஜி.ராமநாதன்
கல்யாணி + கானடா ரகங்களில் அமைந்த மிக நுண்ணிய சங்கதிகளைக் கொண்ட பாடல்.” பஞ்சவர்ணக்கிளிகள் கொஞ்சும் பரவசம் பார் ” என்ற வரிகளை மிக அனாயாசமாக சிதம்பரம் ஜெயராமன் பாடுவது ,அவரது பேராளுமையைக் காட்டி நிற்கும்.

15 எல்லையில்லாத இன்பத்திலே – படம்:சக்கரவர்த்தித் திருமகள் [1957] – பாடியவர்கள்:சீர்காழி + பி.லீலா – இசை:ஜி.ராமநாதன்
மீண்டும் கல்யாணி + கானடா இரண்டு ராகங்களை எடுத்தாண்டு ஜி.ராமநாதன் படைத்த இனிய கானம்.

16 மாசிலா நிலவே நம் காதலை – படம்: அம்பிகாபதி [1957] – பாடியவர்: சௌந்தரராஜன் + பி.பானுமதி – இசை : ஜி.ராமநாதன்
அம்பிகாபதி திரைப்படத்தில் இடம் பெற்ற மறக்க முடியாத காதல் பாடல்.எப்போது கேட்டாலும் எழுச்சியும் உற்சாகமும் தரும் ஜி.ராமனாதனின் கைவண்ணப்பாடல் என்று துணிந்து சொல்லிவிடலாம்.இளமையும் , எடுப்புமிக்க சௌந்தரராஜனின் குரலும் , இனிமையான அதிர்வு கொண்ட பானுமதியின் குரலும் ,ராமனதனுக்கேயுரிய தனித்துவமான, மிக துல்லியமான , இனிமை துலங்கும் தாளக்கட்டும் , ஒத்திசைந்து உடலெங்கும் அதிர்வலைகளை உண்டாக்கும் இனிய பாடல்.

இருபக்க இசையாக இசைத்தட்டில் ஒலிக்கும் இந்தப்பாடல் மாண்டு ராகத்தில் எழுச்சியுடன் ஆரம்பிக்கிறது.அதைத்தொடர்ந்து பின் “அன்பே இன்பம் ” என்ற பகுதி நடபைரவி ராகத்திலும் , பாடலின் இறுதிப்பகுதியான “வானமிங்கே பூமி இங்கே” என்ற பகுதி புன்னாகவராளி ராகத்திலும் கனிவுடன் நிறைவு பெறுகிறது.

17 சோறு மணக்கும் சோனாடா – படம்: அம்பிகாபதி [1957] – பாடியவர்: வீ.என்.சுந்தரம் + சீர்காழி கோவிந்தராஜன் + T .M .சௌந்தரராஜன் – இசை : ஜி.ராமநாதன்
இப்பாடலின் ஆரம்பத்தை வீ.என் சுந்தரம் நாட்டை ராகத்தில் மிகவும் கம்பீரமாக ஆரம்பிப்பார் ..” வெல்க நின் கொற்றம் மன்னா ” என்ற பகுதியை சீர்காழி கோவிந்தராஜன் கம்பீரமாக அடானா ராகத்திலும் ” வரும் பகைவர் படை வென்று ” என்ற பகுதியை சௌந்தரராஜன் கம்பீரக் குரலில் மோகன ராகத்திலும் பாடுவார்கள்.

இந்தப்பாடலில் அம்பிகாபதி பாடும் பகுதி போர் வீரர்கள் பற்றியும் ,அவர்களது பெற்றோர்கள் , மனைவிகள் பற்றியும் ,அவர்களுக்கு வாழ்த்து சொல்லும் வகையிலும் பட்டுக்கோட்டை கல்யாணசுந்தரம் எழுதியிருப்பார்.

பின்னாளில் கர்ணன் படத்தில் கர்ணனைப்பற்றிய புகழ்ச்சிப் பாடலின் முன்னோடிப்பாடல்.

18 தண்ணீர் விட்டோ வளர்த்தோம் – படம்: கப்பலோட்டிய தமிழன் [1960] – பாடியவர்: திருச்சி லோகநாதன் – இசை : ஜி.ராமநாதன்

கேட்கும் போதெல்லாம் நெஞ்சம் குமுறி வெடிக்கும் உணர்வைவையும் ,அளவில்லாத சோகத்தையும்
, வலிகளையும் , வேதனைகளையும் தந்து நெஞ்சை நீறாக்கும் பாடல்.

பாரதியின் இந்தப்பாடலை ஒப்பரிய ஆற்றல் மிகுந்த இசையால் எட்டமுடியாத உச்சத்திற்கு ஏற்றி வைக்கிறார் இசை மேதை ஜி.ராமநாதன். வழமை போலவே உச்சஸ்தாயியில் இசையமைக்கும் ராமநாதன் இந்தப்பாடலையும் தனது பாணியில் ஆரம்பிக்கிறார்.

ஜி.ராமநாதன் அதிகம் பயன்படுத்திய ராகங்களில் ஒன்றான சிந்துபைரவி ராகம் போல ஒலிக்கின்ற ஜோன்புரி ராகத்தில் தொகையறாவுடன் ஆரம்பமாகிறது.
தொடரும் பல்லவியிலேயே எத்தனை எத்தனை ஆற்றுதல்கள் ! தேற்றுதல்கள் ! குறிப்பாக
” எண்ணமெல்லாம் ,மெய்யாக என்னுயிரினுள் வளர்ந்த
வண்ண விளக்கிது மடிய திருவுள்ளமோ ”
என்ற வரிகளில் ராகத்தின் உள்ளோட்ட அலைகளால் மனதை நெகிழ வைக்கிறார்.

என்ற வரிகளை பாடும் போது
“ஓராயிரம் வருடம் ஓய்ந்து கிடந்த பின்னர்
வாராது போல வந்த மாமணியைத் தோற்போமோ ” என்ற வரிகளை தேஷ் ராகத்தில் பாடும் போது தரும் மனக்கனிவும் தந்து

“தருமமே வெல்லும் என்னும் சான்றோர் சொல் பொய்யாமோ “என்ற வரிகளை சிவரஞ்சனி ராகத்தில்

“மேலோர்கள் வெஞ்சிறையில் வீழ்ந்து கிடப்பதுவும் ” வரிகளை தேஷ் ராகத்தில் பாடும் போது உணர்ச்சி கொப்பளிப்பும் , மடைதிறந்த வெஞ்சினமும் ,,உருக்கமும் இசையில் வெளிப்படுகிறது.

இசை என்றால் உணர்வுகளைத் தெளிவுற வெளிப்படுத்தும் கலைவடிவம் என்பதற்கு சிறந்த எடுத்துக்காட்டாக அமைந்த பாடல் இது என துணித்து கூறலாம்.

gramanathanஇது போல வேறு சில பாடல்களை திருச்சி லோகநாதன் போல யாரும் பாட முடியாது என்று கருதிய இசைமேதை ஜி.ராமநாதன் மலேசியாவில் இசை நிகழ்சசி செய்ய சென்ற லோகநாதன் வரும் வரை காத்திருந்து பதிவு செய்தார் என்பது குறிப்பிடத்தக்கது.வேறு சில பாடகர்கள் பல்லாயிரம் பாடல்கள் பாடினாலும் அவர்களைவிட இந்தப்பாடலில் உச்சங்களைத் தொட்டார் என்று சொல்லலாம்.

நிராசை , சோகம் ,ஆற்றாமை , கோபம் எல்லாம் ஒன்றிணைந்து எழும் உணர்வை ராகங்களின் குணம் அறிந்து அவற்றின் நுண்ணிசையால் தெளிவுற உணர்த்துகிறார் ஜி.ராமநாதன்.

19 ஒரு நாள் போதுமா இன்றொரு நாள் போதுமா – படம்: திருவிளையாடல் [1967] – பாடியவர்: பாலமுரளி கிருஷ்ணா – இசை : கே.வீ. மகாதேவன்
பாடலின் இசையமைப்பு , பாடியவரின் திறமை , திரையில் தோன்றிய தமிழ் சினிமாவின் ஒப்பற்ற குணசித்திர நடிகர் பாலைய்யாவின் திறமை என அமைந்த வெற்றிக்கூட்டணியின் ஒப்பற்ற பாடல்.இன்று ராகமாலிகை என்று சொன்னால் உடனே நினைவுக்கு வரும் பாடல்.
மாண்டு +தோடி + தர்பார் + மோகனம் + கானடா போன்ற ராகங்கள் பயன்பாடுள்ள பாடல்.

20 அறுபடை வீடு கொண்ட திருமுருகா – படம்: கந்தன் கருணை [1966] – பாடியவர்: சீர்காழி கோவிந்தராஜன் – இசை : கே.வீ. மகாதேவன்
பக்திப்படங்களின் ராகங்கள் தூக்கலாகத் தெரியும் வகையில் பாடல்கள் அமைப்பதில் தனி சிறப்பு வாய்ந்தவர் இசை மேதை கே.வீ.மகாதேவன்.உணர்ச்சி பாவமும் , இனிமையும் உயர்ந்து நிற்கும் பாடல்களை , அவை மெல்லிசை வடிவம் பெற்றவையாயினும் மரபு ராகங்களிலேயே தர முயன்ற இசையமைப்பாளர்களில் முதலிடம் வகிப்பபவர் திரையிசைத்திலகம் கே.வீ.மகாதேவன்.

இந்தப்பாடலில் காம்போதி . ஹிந்தோளம் , சக்கரவாகம் ,கானடா , ஹம்சாநந்தி போன்ற ராகங்களால் வண்ணங்களால் அமைத்த மிக அழகிய இசையோவியம். உள்ளங்களில் இன்பக்கனல்களை எழுப்பும் அருமையான பாடல்.

21 மழை கொடுக்கும் கொடையும் ஒரு – படம்:கர்ணன் [1964] – பாடியவர்கள் :சௌந்தரராஜன் + ஸ்ரீநிவாஸ் + சீர்காழி கோவிந்தராஜன் + திருச்சி லோகநாதன் – இசை: விஸ்வநாதன் – ராமமூர்த்தி

எடுத்த எடுப்பிலேயே உள்ளத்தை உருக வைக்கும் ஆலாபனையுடன் ஆரம்பிக்கும் பாடல்.ஒருபாடலின் பல்லவியில் எவ்வளவு கனிவு , எவ்வளவு இனிமை கொடுக்க வேண்டும் அதன் மூலம் கேட்கும் இசை ரசிகனை எப்படிக் கட்டிப்போட வேண்டுமென்ற சிருஸ்டி ரகசியம் தெரிந்த மெல்லிசைமன்னர்களின் படைப்பாற்றல்மிக்க பாடல்
ஹிந்தோளம் + ஹம்சானந்தி + கானடா + மோகனம் + சக்கரவாகம் போன்ற ராகங்களின் சாறுகளைபபிழிந்து உணர்வின் மென்மையையும்

22 உலகின் முதலிசை தமிழிசையே – படம்:தவப்புதல்வன் [1972] – பாடியவர்கள் :சௌந்தரராஜன் +ஸ்ரீநிவாஸ் -இசை: எம்.எஸ்.விஸ்வநாதன்

இசைப்போட்டியாக பாடப்படும் இனிமையான பாடல்.கர்னாடக இசை பாடும் போது விறுவிறுப்பும் , ஹிந்துஸ்தானி இசை பாடும் போது இனிமையும் மென்மையும் அதனுடன் உள்ளுறையும் வாத்திய இனிமையையும் காண்பிக்கிறார் மெல்லிசைமன்னர்.

இரண்டு இசை வகைகளையும் பிரித்துக்காட்டும் வகையில் ராகங்களை கையாண்டவிதம் மெல்லிசைமன்னரின் இசைபுலமையை காட்டுகிறது.ஸ்ரீராகம் + பகாடி + சிந்துபைரவி போன்ற ராகங்கள் மிக அருமையாகப்பயன்பட்டுள்ளன.

23 எங்கோ பிறந்தவராம் – படம்:பொம்மை [1964] – பாடியவர் : பி.சுசீலா – இசை: எஸ்.பாலசந்தர்
வீணை மேதை எஸ்.பாலசந்தரின் இனிய இசையமைப்பு
பாடலின் ஆரம்பம் ..சகானா ராகத்திலும் + ” விழிவாசல்” என்ற பகுதி சாரங்கா + ” நிலவு தன்னை ” என்ற பகுதி நாட்டக்குறிஞ்சி + ” தென்றலை ” என்ற பகுதி குசேனி .

24 மேரே பியாரி நிம்மல் மேலே – படம்:தூக்குத் தூக்கி [1954] – பாடியவர்கள் :வீ.என்.சுந்தரம் – இசை: ஜி .ராமநாதன்
நகைச்சுவை கலந்த இந்தப்பாடலில் காபி + ஆனந்தபைரவி போன்ற ராகங்களை எளிமையாகத் தந்திருக்கிறார் இசைமேதை ஜி.ராமநாதன்.

25 வாரணம் ஆயிரம் – படம்:தூக்குத் தூக்கி [1954] – பாடியவர்கள் :எம்.எல்.வசந்தகுமாரி – இசை: டி .ஜி .ராமநாதன்
விருத்தத்துடன் மோகன ராகத்தில் வசந்தகுமாரியின் குரலில் ஆரம்பிக்கும் இந்தப்பாடலை பின் ஆரபி ராகத்திலும், அதைத்தொடர்ந்து குதூகலத்தில் காம்போதியில் மிதக்க வைக்க பி.லீலாவின் விறு விறுப்பான குரலிலும் தாது நெகிழ வைக்கிறார் இசை மேதை ஜி.ராமநாதன்.

26 சின்னஞ் சிறு கிளியே கண்ணம்மா – படம்:மணமகள் [1951] – பாடியவர்கள் :வீ.என்.சுந்தரம் + எம்.எல்.வசந்தகுமாரி – இசை: சி.ஆர்.சுப்பராமன்.
சினிமாவுக்காக இசையமைக்கப்பட்ட இந்த பாடல் கர்னாடக இசை மேடையில் இன்று வலம் வருகிற பாடலாகியும் உள்ளது.ராக்ப்பயன்பாட்டில் சிறந்து விளங்கும் இந்தாபாடலின் இசையமைப்பு அன்றைய இளம் இசையமைப்பாளராயிருந்த இசைமேதை சி.ஆர்.சுப்பராமனின் இசைஞானத்திற்கு எடுத்துக்காட்டாகும்.
இந்தபாடலில் காபி + மாண்டு + வசந்தா + திலங் + நீலமணி போன்ற ராகங்கள் பயன்பட்டு இன்று ராகமாலிகையின் குறியீடு எனக்கருதும் அளவுக்கு முக்கிய பாடலாகி நிற்கிறது எனலாம்.

27 எல்லாம் இன்ப மாயம் – படம்:மணமகள் [1951] – பாடியவர்கள் :பி.லீலா + எம்.எல்.வசந்தகுமாரி – இசை: சி.ஆர்.சுப்பராமன்.
இன்பக் கிளர்ச்சியும் ,கனிவும் , நெஞ்சை நெகிழ்த்தும் எழிலும் நிறைந்த கானாமுதம் என்று தான் இந்தப்பாடலை பற்றி எழுத முடியும்.அவ்வளவு இனிமை நிறைந்த சுழற்சிமுறை உள்ள பாடல்.
சிம்மேந்திரமத்திமம் , மோகனம் , ஹிந்தோளம் , தர்பார் போன்ற ராகங்கள் பயன்படுத்தப்பட்டுள்ளன.

28 வடிவேலும் மயிலும் துணை – படம்:அம்பிகாபதி [1957] – பாடியவர்கள் :சௌந்தரராஜன் – இசை: ஜி .ராமநாதன்
காம்போதியில் ஆரம்பிக்கும் பாடல் ..”சற்றே சரிந்த குழலே ” என்ற பகுதி கேதார கௌளை ராகத்திலும் பாடப்படும்.100 பாடல் காதல் ரசம் கலக்காமல் பாட வேண்டும் என்பது கட்டளை , பாடல் எங்களை எண்ணிக்கொண்டிருந்த அமராவதியின் தவறால் 100 பாடலும் முடிந்தது என எண்ணி அம்பிகாபதி காதல் வேகத்தில் பாடும் பாடலாக அமைந்த இந்த பாடலை மிகவும் கம்பீரமாக சௌந்தரராஜன் பாடுவது எழுச்சியூட்டும்.

29 ஆருயிரே பிரேமா அமுத வாரியில் – படம்:பொன்முடி [1951] – பாடியவர்கள் :ஜி .ராமநாதன் + டி.வீ.ரத்தினம் – இசை: ஜி .ராமநாதன்
பொன்முடியில் இடம்பெற்ற மிகவும் இனிமையான பாடல்.காதல் சுவைக்கு சகானா ராகத்தைப் பயன்படுத்திய முன்னோடிப்பாடல் எற்று சொல்லும் வகையில் ஜி.ராமநாதன் இஅசையமைத்து அழககப்பாடிய பாடல்.தொடர்ந்து கல்யாணி மற்றும் தேஷ் போன்ற ராகங்கள் இனிமையை பறைசாற்றுகின்றன.

30 தேசுலாவுதே தேன் மலராலே – படம்:மணாளனேமங்கையின் பாக்கியம் [1956] – பாடியவர்கள் :கண்டசாலா + பி .சுசீலா – இசை: ஆதி நாராயணராவ்
பாடலின் பெரும் பகுதி ஹம்சானந்தி ராகத்தில் அமைந்தபாடல் என்பதால் அந்த ராகமே முதன்மையாக தெரிகின்ற பாடல்.எடுத்த எடுப்பில் ஹம்சானந்தி ராகத்தில் தமிழ் சினிமாவில் வெளிவந்த பாடல்களைப் பட்டியல் போட முனைந்தால் ஆண்டு வரிசையில் முதலில் இனம் காட்டிய பாடல் எனலாம்.
பாடல் அமைப்பிலும் , அதில் நிறைந்த அனாயசமான சங்கதிகளும் ,அதைப்பாடிய விதமும் மெய்சிலிர்க்க வைப்பதாய் அமைந்திருக்கும்.இன்று வரை பாடுபவர்களுக்கு சவாலாய் அமைந்ததாகவும் அமைந்த இந்தப்பாடல் வெளிவந்த காலத்தை கருத்தில் எடுத்து பார்க்கும் போது புதிய , மாற்று சிந்தனையை காதல் பாடல்களில் வைத்ததெனலாம்.

அது மட்டுமல்ல பின்வரும் ராகங்களின் அழகையும் , நளினத்தையும் காதலின் மென்மையையும் . மரபு மீறாத தடத்தை பற்றிக்கொண்டு குறுகிய நேரத்தில் ராகங்களின் கனிவையும் காட்டி புத்துணர்ச்சியைத் தூண்டி மகிழ்விக்கிறார் இசையமைப்பாளர்.
குறிப்பாக கல்யாணி ராகத்தை பாடும் போது மனம் இலவம் பஞ்சாக மிதந்து செல்கிறது!

இந்தப்பாடல் அமைந்த ராகங்கள் ஹம்சானந்தி + கானடா + வசந்தா + கல்யாணி.

31 வண்ணக்கிளி சொர்ணகிளி வாய் திறந்தாள் – படம்: – பாடியவர் : எம்.எல்.வசந்தகுமாரி – இசை:
கல்யாணி + ரஞ்சினி + சிந்துபைரவி போன்ற ராகங்களை வைத்து கோர்க்கப்பட்ட செறிவான இசைப்பாடல்.

32 ஆகா இவர் யாரடி – படம்: – பாடியவர்கள் :பி.லீலா + சூலமங்கலம் – இசை:
இனிமையை தரும் சரஸ்வதி + காம்போதி + கானடா + சிந்துபைரவி போன்ற ராகங்களால் அலங்கரிக்கப்பட்ட இசை விருந்து.

33 ஆடும் அழகே அழகு – படம்:ராஜ ராஜன் [1956] – பாடியவர்கள் :சூலமங்கலம் சகோதரிகள் + பி .லீலா – இசை: கே.வீ.மகாதேவன்
ரஞ்சினி ராகத்தில் ஆரம்பிக்கும் பாடல்.”ஊதும் மகுடி தரும் ஓசைதனை கேட்டு ” என்ற பகுதி சாருமதி ராகத்திலும் அமைந்த பாடல்.

34 தாயே உன் செயல் அல்லவோ – படம்: இரு சகோதரிகள் [1957] – பாடியவர்கள் :பி.லீலா + ML வசந்தகுமாரி – இசை: எஸ்.ராஜேஸ்வரராவ்
விறுவிறுப்பான பாடலை மிக எழுச்சியாக வசந்தகுமாரியும் லீலாவும் பாடிய பாடல்.செவ்வியலிசை பயிலும் இரு சகோதரிகள் பாடும் இந்தப் பாடல் ஒரு நாட்டிய காட்சிக்கு மிகவும் பொருத்தமானதாக இருந்தும் ,படத்தில் பாடும் காட்சியாக அமைந்த பாடல்.

சகோதிரிகள் இணைந்து பாடும் பாடல் அமைந்த ராகங்கள் மோகனம் +காம்போதி + சண்முகப்பிரியா + மத்யமாவதி/ ஸ்ரீராகம் + மோகனம் ஆகியவை ஆகும்.

35 பிரமன் தாளம் போட – படம்: கொஞ்சும் சலங்கை [1961] – பாடியவர்கள் : ராதா ஜெயலட்சுமி + சூலமங்கலம் ராஜலட்சுமி – இசை: எஸ்.எம்.சுப்பைய்யா நாயுடு
சண்முகப்பிரியா ராகத்தில் தொகையாறாவுடன் ஆரம்பமாகி , பின் ” அபிநயங்கள் காட்டியே நீ ஆடலாமோ போட்டியே ” என்ற பல்லவியுடன் தொடரும் பாடல்.
நாட்டியப்போட்டியாக அமைக்கப்பட்ட இந்த பாடலில் பின்வரும் ராகங்கள் மாலையாக அமைக்கப்பட்டுள்ளன.
சண்முகப்பிரியா + காபி + மோகனம் + ஆனந்தபைரவி + காம்போதி + சாமா + போன்ற ராகங்களைக் கொண்டு அமைக்கப்பட்ட இந்தப்பாடலை மிக அருமையாகப் பாடியிருக்கிறார்கள்.

36 மங்கியதோர் நிலவினிலே – படம்: திருமணம் [1957] – பாடியவர்கள் : டி.எம்.சௌந்தரராஜன் + – இசை: எஸ்.எம்.சுப்பைய்யாநாயுடு
பாரதி எழுதிய இந்தபாடல் பலவகையில் பயன்படுத்தப்பட்டாலும் இரு ராகங்களில் மிக அருமையாக இசையமைக்கப்பட்ட இந்தப்பாடலில் *தேஷ் + சாருகேஷி போன்ற ராகங்கள் பயன்படுத்தப்பட்டுள்ளன.

37 வேலன் வருவாரோடி வடிவேலன் – படம்: திருமணம் [1957] – பாடியவர்கள் : எம்.எல்.வசந்தகுமாரி – இசை:
கர்னாடக இசையுலகில் கோலோச்சிய வசந்தகுமாரி தனக்கேஉரிய தனித்துவத்துடன் பாடிய செவ்வியல் இசை கலந்த பாடல்.
பாடல் அமைந்த ராகங்கள் காம்போதி + ஹிந்தோளம் + கேதாரகௌளை + ஆரபி.

38 கண்ணோடு கண் கலந்தால் காதலின் – படம்:மாங்கல்யபாக்யம் [1957] – பாடியவர்கள் : சீர்காழி + பி.சுசீலா – இசை: ஜி ராமநாதன்
ஜி.ராமநாதன் தரும் இன்னுமொரு ஜீவன்மிகுந்த காதல் பாடல்.
நடபைரவி + ஜோன்புரி +

39 நாயகர் பட்டமடி எனக்கது – படம்: தூக்கு தூக்கி [1954] – பாடியவர்கள் : கோமளா + பி.ஏ.பெரியநாயகி – இசை: ஜி ராமநாதன்
இந்தப்பாடலைக் கேட்கும் போது புராதனமானது என்பதான ஓர் இனம்புரியாத உணர்வு நம்மை ஆட் கொள்வதை உணரவைக்கும் பாடல்.60 வருடங்களைக் கடந்த இந்தப்பாடல் , அதைப்பாடிய பெரியநாயகி, கோமளா குரலில் ஒருவிதமான லாகிரி நம்மை தழுவி செல்கிறது.வாத்திய அமைப்பும் இதன் நூதனமான உணர்வை தந்து பழமையை தாங்கி நிற்கிறது.

தொல்லிசையின் கானரசத்தை இன்னிசையில் தந்த ஜி.ராமனாதனின் கைவண்ணம் மின்னும் பாடல்.இந்தப்பாடல் சுத்தசாவேரி , சண்முகப்ப்ரியா , தேஷ் போன்ற ராகங்களை மலையாகக் கொண்டது.

40. மானம் ஒன்றே பெரிதெனக் கொண்டு – படம்:மகாதேவி [1958] – பாடியவர் : டி.எஸ்.பகவதி + எம்.எஸ்.ராஜேஸ்வரி – இசை : எம்.எஸ்.விஸ்வநாதன்

திரைக்கதையின் போக்கை இசை உயர்த்தி சென்று உணர்ச்சி பிரவாகம் ஆக்கிவிடுகிறது.எனது பால்யவயதில் பார்த்த படங்களில் இந்தப்பாடல் என்னை அதிதுயர்கொள்ள வைத்த பாடல் என்பேன்.
ராகங்களில் புதைந்திருக்கும் ஒப்பாரி இசையின் கூறுகளைத் தீண்டாத, புறக்கணித்து ஓரம்கட்டிய செவ்வியலிசையாளர்கள் போலல்லாமல் அவற்றை தகுந்தமுறையில் பயன்படுத்தி இசையில் போடப்பட்ட திரைகளை திரையிசையமைப்பாளர்கள் அறுத்தார்கள். அதன் மூலம் மக்களை இசையால் கட்டி போட்டார்கள்.
இந்தப்பாடலை ராகமாலிகையில் அமைத்து உணர்வுகளை கிளற வைத்திருக்கிறார்கள் மெல்லிசைமன்னர்கள் விஸ்வநாதன் ராமமூர்த்தி.
சோக ரசத்திற்கு கன கச்சிதமாகப் பொருந்தும் முகாரி ராகத்தில் பாடல் ஆரம்பிக்கிறது..”கௌரவர்கள் படை கண்டான் ” என்ற பகுதி சிவரஞ்சினி ராகத்திலும், “அபிமன்யு போர்க்களத்தில் சாய்ந்து விட்டான் “என்ற பகுதி ஹிந்தோள ராகத்தில் அமைக்கப்பெற்று சோகத்தின் உச்சத்திற்கு சென்று உருகாதவர்களையும் உருக வைத்துவிடுகிறது.

இடையிடையே வரும் உணர்ச்சிபூர்வமான வசனங்களைத் தொடர்ந்து ” சிங்காரப்புன்னனகை ” என்ற பாடல் சோகமாக ஆபேரி ராகத்திலும் நம்மை சகஜ நிலைக்கு கொண்டுவருவதாக பாவலா காட்டி ஆசுசுவாசப்படுத்த முயல்கிறது.இருந்தாலும் சோகம் நம்மை மூழ்கடித்து விடுகிறது.

அமங்கலங்கள் நிறைந்த உணர்ச்சி பிரவாகத்தில் ,இதயம் கசிய வைக்கும் பாடல் இது.கேட்கும்கணம் தோறும் கண்ணீர் பெருக்கெடுத்து ஓடவைக்கும் பாடல்.தாலாட்டும் ஒப்பாரியுமாக அமைந்த வித்தியாசமான பாடல் இது.
இந்தப்பாடல் காட்சியில் உணர்ச்சிப்பிழம்பாக தோன்றும் சாவித்திரி காட்டும் மிக இயல்பான முகபாவங்கள்,முக அசைவுகள் நம்மை நெகிழ வைக்கின்றன.

மிகச் சிறப்பாக இசையமைத்த மெல்லிசைமன்னர்களின் ராகபிரயோகங்கள் அவர்களின் மேதமையைக் காட்டி நிற்கிறது.கதையின் பொருள் அறிந்து பாடல் புனைந்த கண்ணதாசனும் தனது கைவண்ணத்தைக் காண்பித்திருக்கிறார்.

41 வில்லேந்தும் வீரர் எல்லாம் – படம்: குல்கேபஹாவளி [1955] – பாடியவர்: திருச்சி லோகநாதன் + பி.லீலா – இசை :விஸ்வநாதன் -ராமமூர்த்தி

இளவரசி ஒருத்தி பகடை விளையாட்டில் பல நாட்டு மன்னர்களையும் தனது தந்திரத்தால் அடிமையாக்கும் காட்சியில் வரும் பாடல்.பல நாட்டு மன்னர்களும் , இளவரசர்களும் போட்டியில் பங்குபற்றும் போதுபாடும் பாடல்.

பாடல் அமைந்த ராகங்கள்

கமாஸ் + கல்யாணி + மத்யமாவதி +ஸ்ரீராகம் + சுத்தசாவேரி +மோகனம்

ராகங்களை மிக இனிமையாகக் கையாண்ட மேதமையும் , பாடலின் உணர்வுகேற்ப ,நகைச்சுவையும், எள்ளலும் , கிண்டலுமாய் வர்ணஜாலம் காட்டும் இனிய பாடல்.மெல்லிசைமன்னர்களை புகழ வார்த்தையில்லை.

42 ஜெய ஜெய சாவித்திரி தேவி – படம்: பாடியவர் : பி.லீலா – இசை :
கல்யாணி ராகத்தில்ஆன்மாவை வருடும் மிக அருமையான பல்லவியை கொண்டு ஆரம்பமாகும் பாடல்.பரிபக்குவமும் , கம்பீரமும் குரலில் கொண்ட பி.லீலா ஒரு பிடி பிடித்த பாடல் என்று துணிந்து கூறத்தக்க பாடல்.கற்பரசிகளின் பெருமை கூறும் இந்தப்பாடலில் கல்யாணி, பிலகரி , சரஸ்வதி , காபி போன்ற ராகங்ககள் மிக அருமையாகப்பயபடுத்தப்பட்டுள்ளன.

43 காயாத கானகத்தே – படம்: ஸ்ரீவள்ளி [1948] – பாடியவர்: டி.ஆர்.மகாலிங்கம் – இசை :சங்கரதாஸ் // சுதர்சனம்
சங்கரதாஸ் நாடகங்களில் கிட்டப்பா பாடி புகழ் பெற்ற இந்தப்பாடல் இது.பைரவி ராகத்தில் விருத்தமாக ஆரம்பித்து ” மேயாத மான் ” என்று விதம் விதமான நளினங்கள் காட்டி, பின் காபி ராகத்தில் நிறைவும் பாடல். ஸ்ரீவள்ளி என்றால் இந்த பாடல் தான் கேட்பவர்கள் மனதில் ஒலிக்கும் வண்ணம் பாடி அசத்தியிருப்பவர் கிட்டப்பாவை மானசீகக் குருவாக கொண்ட டி.ஆர்.மகாலிங்கம்.

44 திருமால் பெருமைக்கு நிகரேது – படம்:திருமால் பெருமை [1968] – பாடியவர் :டி.எம்.சௌந்தரராஜன் – இசை :கே.வீ மகாதேவன்
பால் கடல் அலை மேலே என்ற எம்.எல் வசந்தகுமாரியின் பாடலைப் போல திருமாலின் அவதாரங்களை வரிசையாக எடுத்துக்கூறும் பாடல் இது.
இந்தப்பாடலில் மத்யமாவதி + தன்யாசி +மோகனம் +கானடா + சாரங்கா + கமாஸ் + சாவேரி + சாருமதி + சுருட்டி + பேகடை போன்ற ராகங்களை மாலையாக கோர்த்து அழகு காண்பிப்பார் திரையிசைத்திலகம் கே.வீ.மகாதேவன் அவர்கள்.

45 ஒன்றானவன் உருவில் இரண்டானவன் – படம்:திருவிளையாடல் [1968] – பாடியவர் :கே.பி.சுந்தராம்பாள் – இசை :கே.வீ மகாதேவன்
பக்திப்படங்களில் நல்ல பாடல்கள் இருக்கும் என்று நிரூப்பிக்கும் வகையில் பாடலகள் அமைந்திருக்கும்.அந்த வகையில் அமைந்த பாடல் இது.தனக்கேயுரிய பாங்கில் உணர்ச்சி மேலிடப்பாடும் சுந்தராம்பாள் பாடிய இனிய அதிர்வு தரும் பாடல்.

46 வென்றிடுவேன் நாட்டையும் நாதத்தால் – படம்:அகத்தியர் [1971] – பாடியவர்கள் : டி.எம்.சௌந்தரராஜன் + சீர்காழி கோவிந்தராஜன் – இசை :குன்னக்குடி வைத்தியநாதன்

சமமா..? நீ சமமா ? நீ சரிசமமா…? சதமா ..நீ சதமா ..?பரிகாசமா ..சாகசமா ? நீ பாதக மனிதா !. என எள்ளலையும் , நையாண்டியையும் சுரங்களில் அமைத்து பாத்திரங்களின் மன நிலையை துல்லியமாகக் காட்டும் வித்தகப்பாடாடல்.

ராவணனும் அகத்தியரும் போட்டியாகப் பாடும் அமர்க்களப்பாடல்.இசைவல்லாளன் ராவணனின் நையாண்டியும் , அகத்தியரின் பதற்றமும் , நிதானமும் பாட்டில் வெளிப்படும் பாடல்.

தெறிக்கும் மின்னல் போல குறுகிய கவி வரிகளில் மிகப்பெரிய ராகங்களின் உயிர் நிலையங்களை தொட்டுக்காட்டி செல்லும் இனிய சங்கதிகள் நிறைந்த பாடல் இனிய ராகங்களின் அழகுகளை மிகப்பெரிய தொகுப்பாக தந்த இசையமைப்பாளர் குன்னக்குடி வைத்தியநாதனின் இசைஞானத்தின் அபார வெள்ளிப்பாடு!

ஓங்கி குரல் எடுத்து பாடும் பாணியில் வந்த இரு பெரும் பாடகர்கள் இணைந்து பாடி அசத்தியிருக்கிறார்கள்.
இந்தப்பாடலில் “நாட்டையும் நாதத்தால் “என்ற பகுதி நாட்டை , “அந்த பைரவி துணைவன் ” என்ற பகுதி பைரவி ,”இசை கேட்டு எழுந்தோடி வந்தான் ” என்ற பகுதி தோடி , ” ஆரபி மானம் கொள்வார் ” என்ற பகுதி ஆரபி , “சண்முகப்ரியன் என்னும் தைரியமா “சண்முகப்ரியா ,

நாட்டை , பைரவி , தோடி , ஆரபி , சண்முகப்ரியா ,தர்பார் , ஹம்சத்வனி , வசந்தா , மோகனம் போன்ற ராகங்கள் ராகமாலிகையாக வரும் பாடல்.

47 ஏழு சுரங்களுக்குள் எத்தனை பாடல் – படம்:அபூர்வ ராகங்கள் [1975] – பாடியவர் : வாணி ஜெயராம் – இசை : எம்.எஸ்.விஸ்வநாதன்
மெல்லிசைமன்னரின் இசையாற்றலை நிலைநாட்டும் ஒப்பற்ற பாடல்களில் ஒன்று.கதையோட்டத்தின் மனவோட்டவரைவை மிக துல்லியமாக காட்டும் தன்னிகரில்லாத பாடல்!

காணும் மனிதருக்கு எத்தனை சலனம்
கற்பனை சந்தோசத்தில் அவனது கவனம் ….சலனம் ,கவனம் போன்ற சொற்களை பாடும் இடங்கள் மட்டுமல்ல அனாயாசமான சங்கதிகளை கொண்ட அருமையான பாடல்.
வாணி ஜெயராம் அற்புதமாகப்பாடிய இந்தப்பாடல் பந்துவராளி , ரஞ்சினி , சிந்துபைரவி , காம்போதி போன்ற ராகங்களால் அலங்கரிக்கப்பட்ட பாடல்.

48 அதிசய ராகம் ஆனந்த ராகம் – படம்:அபூர்வ ராகங்கள் [1975] – பாடியவர் : கே.ஜே.ஜேசுதாஸ் – இசை : எம்.எஸ்.விஸ்வநாதன்
படத்தின் தலைப்புக்கேற்ப அமைந்த இந்தப்பாடல் சுவையுணர்வின் தனித்தன்மையுடன் அரிதான ராகமாகக் கருதப்படும் மகதி ராகத்தில் முன் பகுதி அமைக்கப்பட்டுள்ளது.
புதிதாய் மலர்ந்திருக்கும் ஒரு அழகிய மலரின் இளமை வனப்பும் , மென்மையும் ,எளிமையும் கொண்ட இசைப்படைப்பு.ராகத்தின் ஆழமும் ,கூர்மையும் ,இனிமையும் ஒன்று சேரக் காட்டும் உயிர்த்துடிப்பு மிகுந்த இந்தப்பாடல் இளைஞன் ஒருவனின் காதல் உணர்ச்சிப்பெருக்கை நிதானத்துடன் ,அமைதியுடனும் வெளிப்படுத்துகிறது.
பாடலின் பின்பகுதியில் காதலை வெளிப்படையாக வெளிப்படுத்தும் விதமாக பிரகடனம் செய்ய வேண்டிய தேவை ஏற்படுவதால் பைரவி ராகத்தில் அமைகிறது.
அரிதான ராகத்திலேயே இனிமையும் ,எளிமையுமிக்க பாடல்களை அள்ளி வீசி மெல்லிசையில் புதுப்பாதை வகுத்து தன்னை மாபெரும் இசைமேதை என எத்தனயோ பாடல்களில் நிரூபித்தவர் மெல்லிசைமன்னர் எம்.எஸ்.விஸ்வநாதன்.

இந்தப்பாடலை தனது ஆண்மையும் , இனிமையும் , கம்பீரமும் , நிதானமும் ,ஆழமும் மிக்க குரலால் பாடி சிறப்பித்தவர் கே.ஜே .ஜேசுதாஸ்.

பாடல் அமைந்த ராகங்கள் மகதி , பைரவி.மகதி ராகம் கேட்பதற்கு வலஜி என்கிற ராகம் போலவும் இருக்கும்.அருமையான இசையமுதம்!

49 என்ன சமையலோ என்ன சமையலோ – படம்:உன்னால் முடியும் தம்பி [1988 – பாடியவர் : எஸ்.பி .பி + சித்ரா + சுனந்தா – இசை : இளையராஜா
மிக இனிமையான மோகனராகத்தில அமைந்த பல்லவியுடன் ஆரம்பாகும் கலகலப்பான பாடல்.மோகனத்தைத் தொடர்ந்து நாதஸ்வர இசையுடன் எழுச்சி அதிர்வு தரும் கல்யாணி ராகமும் ,தொடர்ந்து வசந்தா ராகமும் , முடிவில் மத்யமாவதி ராகத்தில் மங்களமாக சமையலை நிறைவு செய்யும் ராகங்களின் ரசங்களை தந்த பாடல்.

50 நாத வினோதங்கள் நடன சிங்காரங்கள் – படம்:சலங்கை ஒலி [1983] – பாடியவர் : எஸ்.பி .பி + எஸ்.பி.சைலஜா – இசை : இளையராஜா
தனது படைப்பாற்றலின் வீச்சு எல்லையற்றது என இசைஞானி நிரூபித்த பாடல்களில் ஒன்று.ஸ்ரீரஞ்சனி ராகத்தில் ஆரம்பிக்கும் இந்தப்பாடல் விறுவிறுப்பான , வீறுகொண்ட அதே வேலை கருணை மிகு ஹம்சானந்தி ராகத்திற்கு மெல்லிழைவான முறையில் மாறி செல்கிறது.

51 நீ இல்லாத போது – படம்:இளமைக்கோலம் [1980] – பாடியவர் : மலேசியா வாசுதேவன் + சுஜாதா – இசை : இளையராஜா

வானவில்லின் நிறங்கள் ஒன்றை ஒன்றை கலந்து கரைவது போல சங்கராபரணம் , கல்யாணி , கம்சத்வனி , போன்ற ராகங்கள் ஜாலம் காட்டும் இந்தப்பாடல் மேலையத்தேய இசையின் இனிய கலப்பில் இளையராஜாவின் தனி முத்திரை பதித்து கிரகபேதம் காட்டும் பாடல்.

52 சங்கத்தமிழ் கவியே சந்தங்கள் – படம்:மனதில் உறுதி வேண்டும் [1988] – பாடியவர் : கே.ஜே.ஜேசுதாஸ் + சித்ரா – இசை : இளையராஜா
கலைச் செறிவும் ,சுகமும் இணைந்த பாடல் ஒன்றிற்கு உதாரணம் இந்தப்பாடல் என்று சொல்லுமளவுக்கு , மிக எடுத்த எடுப்பிலேயே நெகிழ்ச்சி தரும் இனிய ராகமான ஆபேரி ராகத்தை மென்மையான லயத்தில் பல்லவியை அமைத்திருக்கிறார் இசையமைப்பாளர்.

பாடலின் அனுபல்லவியோ இதயத்தை இளக வைக்கும் பாகேஸ்வரி ராகத்தில் மிக இயல்பான ஆற்றொழுக்குடன் கரைந்து மாறுகிறது.இனிய செறிவுடன் வரும் மிக அழகான சங்கதிககளை இதமாக அசை போடுகிறார் ஜேசுதாஸ்.

பாடலின் சரணம் பாடலின் பெருமையை ஏற்றி வைப்பது போல கல்யாணவசந்தம் ராகத்தில் உயிர்ச்சங்கிலியில் பிணைத்து நிறைகிறது.

நன்கு பழக்கப்பட்ட மரபு வாத்தியங்களிலேயே வசீகரமும் , உயிர்ப்பும் ,ரீங்காரமும் தரும் பின்னணி இசையால் தொன்மத்தை சாறுபிழிந்து அருமருந்தாக்கியிருக்கிறார் இசைஞானி இளையராஜா.
தகுந்த முறையில் பாடி பெருமைப்படுத்தியிருக்கிரார்கள் பாடகர்கள்!

53 கல்லில் உயிர் காட்டிடலாம் கன்னி மயிலே – படம்: உளியின் ஓசை 2010 – பாடியவர் :ஸ்ரீராம் பார்த்தசாரதி – இசை :இளையராஜா

புலர்கின்ற பொழுது காட்டு ” என்ற விருத்தத்துடன் பூபாளம் ராகத்தில் ஆரம்பமாகும் பாடல்.
கல்லில் உயிர் காட்டிடலாம் கன்னி மயிலே என்று ஆரம்பமாகும் பல்லவி அருமையான கல்யாணி ராகத்திலும்

சோழர் தம் கொடி மேவும் புலி காட்டு + கல்யாணி , சேரன் கை வில் காட்டு இமை காட்டு = தர்மவதி .விழி காட்டு பாடியர் தம் கயல் காட்டு = தர்மவதி ராகம் என உணர்வுகளின் உன்னதங்களில் விளையாடி ,மீண்டும் சுழன்று கல்யாணி சென்று

“உடல் உழைப்பின் களைக்காக உழைப்பாளர் நிலை காட்டு ” என்ற பகுதி வசந்தா ராகத்தில் பல அசைவுகளை காட்டி உணர்வுகளின் வீச்சை அள்ளி வீசி நிறைவுறுகிறது.

ஸ்ரீராம் பார்த்தசாரதி மிக நன்றாகப் பாடிய பாடல்.

54 அபிநயம் காட்டுகின்ற ஆரணங்கே – படம்: உளியின் ஓசை 2010 – பாடியவர் :பாம்பே ஜெயஸ்ரீ + சுதா ரகுநாதன் – இசை :இளையராஜா

சில ராகங்களைப்பாடக் கூடாது என்றும் அவை இனிமையற்றவை என்றும் “அமங்கலமான “ராகங்கள் என்று வர்ணிக்கப்படும் விவாதி ராகங்களில் சில பாடல்களை தந்தவர் இசைஞானி இளையராஜா.

விவாதி ராகங்கள் என்பது மிக நெருக்கமான சுரங்களைக் கொண்ட ராகங்களாகவும்,அதிகமான சுரங்களைக் கொண்ட ராகங்களாகவும் இருப்பவை. அதனால் ராகங்களின் நிலைகள் தடுமாறி விடும் அபாயமுண்டு.சுரங்களின் நிலைகள் மேல், கீழாக வருவதால் பாடுவது மிகுந்த சிரமம் தருவதால் கர்னாடக இசை வித்துவான்கள் “அமங்கலம் ” என்று கூறி அவற்றைத் தொடுவதில்லை.

எனினும் கர்னாடக இசையில் பாண்டித்தியமிக்க கே.ஜே.ஜேசுதாஸ் இவற்றை ஒரு சவாலாக எடுத்துக் கொண்டு விவாதி ராகங்களை மிகச் சிறப்பாகப் பாடி அசத்தியிருக்கிறார்.

சினிமாவிலும் இசைஞானி அனாயாசமாக விவாதி ராகத்தில் பாடல்களை அமைத்தும் பெருமைப்படுத்தியிருப்பது கவனத்திற்குரியது.

சாருகேசி ராகத்திற்கு நெருக்கமான ராகமான ராகவர்தினி என்ற ராகத்தில் பல்லவியைக் கொண்டு ஆரம்பமாகும் பாடல்.ராகவர்தினி ஒரு விவாதி ராகம்.

” முத்தை பழிக்கும் ” என்ற பகுதியில் நுழையும் பகுதியில் கரகரப்ப்ரியா ராகத்திலும் , ” முத்துத் தமிழ் கொஞ்சும் வண்ணச் சலங்கை “என்ற பகுதி பேரின்பம் தரும் ஆபேரி ராகத்திலும் “உடன் பிறப்பு என பிறந்த நடனக்கலையே ” என்ற பகுதி சுத்ததன்யாசி ராகத்திலும் அதைத்தொடந்து வரும் எழுச்சிமிக்க வயலினிசையோடு வரும் ” அடி எடுக்க தவறுமின்றி ” என்ற பகுதி மயக்கம் தரும் பந்துவராளி ராகத்திலும் விளாசித் தள்ளியிருக்கிறார் இசைஞானியார்.

பாடலுக்கு இரண்டு இனிமையான குரல்களைப் பயன்படுத்தியமை அதை பெறுமதியாக்கியுமமுள்ளது.நடனம் நம் கண் முன்னே விரியும் இசையமைப்பு !

55 சங்கீதம் என் தேகம் அன்றோ – படம்: கோயில் புறா [1980]- பாடியவர் : வாணிஜெயராம் – இசை :இளையராஜா

சிதம்பரி என்ற விவாதி ராகத்தில் ஆரம்பமாகும் இந்தப்பாடல் , கல்யாணியில் மிக அருமையாகத் தொட்டு சென்று, சண்முகப்ரியாவின் கம்பீரத்தையும் கனிவையும் காட்டி செல்கிறது.

ராகமாலிகையில் அமைந்த பக்திப்பாடல்கள் நிறைய உண்டு.அந்த வரிசையில் முக்கியமான பாடல்களாக நான் கருந்தும் பாடல்கள் இரண்டு .

01 கந்த சஷ்டி கவசம் – இசையமைத்து பாடியவர்கள் : சூலமங்கலம் சகோதரிகள்

உருக்கமும் , எழுச்சியும் தரும் ஆபேரி ராகத்தில் ஆரம்பித்து பந்துவராளி , கல்யாணி , தோடி ,என சுழன்று மயக்கும் பாடல்.

02 சீர்காழி கோவிந்தராஜன் பாடிய அபிராமி அந்தாதி – 72 ராகங்களில் இசையமைக்கப்பட்ட சாதனையாகும். அதனை இசையமைத்தவர் இசைமேதை டி.ஆர்.பாப்பா.

முன்முடிவுகளால் திணிக்கப்பட்ட ,புதிய பாய்ச்சலுக்கு பெருந்தடைக்கல்லாக இருந்த சனாதனப்பார்வையை மீறி ராகங்களை ஆழ்நோக்குடன் தடத்தை மாற்றி ,வேறு கோணங்களில் எல்லாம் சிந்தித்து இசையில் புதிய அகத்தூண்டுதலைத் திறந்து விட்டவர்கள் திரையிசையமைப்பாளர்களே!

உள்ளத்தில் எழுச்சியூட்டும் எத்தனை ,எத்தனை விதம் ,விதமான உணர்ச்சிகளை ராகங்களில் பின்னிப்பிணைத்து உளம் பிணிக்கும் பாடல்களாக்கியதுடன் , உலகின் பிற இசைப்போக்குகளை , மரபுகளை இனிமையாய் கலந்து மனம் லயிக்க வைத்து இசையில் மாற்றுவழிச் சிந்தனையை உருவாக்கி மக்கள் மனதில் இடம் பிடித்த திரையிசையமைப்பாளர்கள் என்றென்றும் தங்கள் படைப்பில் நின்று நிலைப்பார்கள்.

வாழ்வின் அடித்தளமாக விளங்கும் பொருளாதார நோக்கம் பின்னணியில் இருப்பினும் மரபைசையின் ராக மாண்புகளை மீறாமலும் ,தமது கற்பனைத் திறத்துக்கேற்ப பாடல்களைத் தந்து பல ஆயிரம் வருடங்கள் மக்கள் பழகி வந்த மண்ணிசையில் பிறந்த ராகங்களை இசையின் ஒரு கிளையாக விளங்கும் மெல்லிசையில் புகுத்தி, எளிமையாக பாமரனும் ரசிக்க வைத்து ,அந்த ரசனை விளையாட்டில் புதிய கற்பித்தல் நெறியை உண்டாக்கியவர்கள் திரையிசையமைப்பாளர்கள் என எண்ணத் தோன்றுகிறது.

பன்னெடுங்காலமாக மக்களின் மூதறிவிலிருந்து தோன்றிய , இனிமை என்ற அடிப்படையில் அமைந்த நமது இசையை மிகவும் எளிமையாக யாரும் பாடக் கூடிய பாடல்களாக அமைத்து இராகங்களை ஆலாபனை செய்யவும் வைத்தார்கள் சினிமா இசையமைப்பாளர்கள்!

” நாட்டுப்புறப்பாடல்களில் இருக்கும் ஒலிநயம் ராகங்களாக வளர்ந்திருக்கின்றனவே தவிர ,அந்த ராகங்களை யாரும் புதிதாக உண்டாக்கிவிடவில்லை.தாலாட்டில் பாட்டு ,கல்யாணத்தில் பாடு ,வயல்வரப்பில் பாட்டு என்றிருந்த ராகங்களே சங்கீதமாயின.புன்னாகவராளி , கேதாரகௌளை , மத்யமாவதி போன்ற ராகங்கள் இப்படி உருவானவை தான்.
பழம்விர்பவன் “நாகப்பழம் …..நாகப்பழம் ஆழாக்கு ஓரணா ” என்று அந்தக்காலத்தில் பாட்டுப்பாடி விற்பான் .அது “புன்னாகவராளி “ராகம். எனவே ஒவ்வொரு ராகத்திற்கும் பழைய நாட்டுப்புறப் பாடல்களே அடிப்படை. ” என்பார் இசைப்பேராசிரியர் டாக்டர் எஸ்.ராமநாதன்.

இந்த மக்கள் ராகங்களை அவர்களே நெருங்க முடியாமல் செய்த சனாதன நரித்தனத்தை அமைதியாய் உடைத்து நொறுக்கி , அதை மீண்டும் மக்களிடம் உணர்ச்சி நிறைந்த இசை மூலம் மலர வைத்த பெருமை சினிமா இசைக்கு உண்டு.கனதி மிக்க ராகங்களையும் கொடுக்கும் விதத்தில் கொடுத்தால் மக்கள் ரசிப்பார்கள் என்று “கர்னாடக இசையை ஒப்புவிப்பவர்களுக்கு” போதனையையும் செய்தார்கள்.

ராகங்களை வைத்துக் கொண்டு அவர்கள் உணர்ச்சியற்ற கச்சேரி வைக்கவில்லை என்பதும் , ஆயினும் பல சினிமாப்பாடல்களையும் அந்தப் பாடல்களின் ராகங்களை ஆலாபனை செய்து பாடினால் அது கர்நாடக இசைக்கு நிகராக இருக்கும் என்பதையும் நாம் காண்கிறோம்.

தமிழில் பழங்காலம் தொட்டு பழகிவரும் பாடல் வகைகள் எத்தனையோ உண்டு.அந்த வகையில் சினிமாவில் வெளிவந்த பாடல்களையும் இணைத்துக் கொள்ளும் வகையில் தனக்கென ஓர் தனித்துவத்தைக் கொண்டு மக்கள்மயமாகி இருக்கிறது சினிமா இசை.

தமிழ் சினிமா இசையைப் பொறுத்தவரையில் ஆரம்பகால இசையமைப்பாளர்களான பாபநாசம் சிவன் , ஜி.ராமநாதன் முதல் இசைஞானி இளையராஜா வரை பல்வேறு அலைவரிசையில் ராகங்களில் நின்று மெல்லிசையின் கொடியை உயர்த்திப் பிடித்து வந்ததைக் காண்கிறோம்.

தமிழ் திரையால் விளைந்த ஒரே நன்மையும் இசைதான் என்பதை நாம் பெருமையாகவும் கூறலாம்!

tsountharசௌந்தர் 26 பகுதிகளாக எழுதிய நீண்ட ஆய்வுக் கட்டுரை இத்துடன் நிறைவிற்குவருகிறது. தமிழ் சினிமாவில் கர்நாடக இசையின் ஆளுமை தொடர்பான துறைசார் நிபுணத்துவத்துடன் கூடிய இந்த ஆய்வு தமிழிசையின் வளர்ச்சிக்கு வலுச் சேர்க்கும் என்பதில் மாற்றுக் கருத்து இருக்கமுடியாது. சௌந்தரின் இக் கட்டுரைத் தொடரை மேலும் சேர்க்கைகளுடன் நூலுருவில் வெளியிடும் முயற்சிகள் நடைபெறுகின்றன. 

முற்றும்.

தமிழ்திரை இசையில் ராகங்கள் [ 25 ] – T.சௌந்தர்
தமிழ்த்திரை இசையில் ராகங்கள் : [ 24 ] : T.சௌந்தர்
தமிழ்த்திரை இசையில் ராகங்கள் : [ 23 ] : T.சௌந்தர்
தமிழ்த்திரை இசையில் ராகங்கள் : [ 22 ] : T.சௌந்தர்
தமிழ்த்திரை இசையில் ராகங்கள் : [ 21 ] : T.சௌந்தர்
தமிழ்த்திரை இசையில் ராகங்கள் : [ 20 ] : T.சௌந்தர்
தமிழ்த்திரை இசையில் ராகங்கள் : [ 19 ] : T.சௌந்தர்
தமிழ்த்திரை இசையில் ராகங்கள் : [ 18 ] : T.சௌந்தர்
தமிழ்த்திரை இசையில் ராகங்கள் [ 17 ] : T.சௌந்தர்
தமிழ்த்திரை இசையில் ராகங்கள் [ 16 ] : T.சௌந்தர்
தமிழ்த்திரை இசையில் ராகங்கள் [ 15 ] : T.சௌந்தர்
தமிழ்த்திரை இசையில் ராகங்கள் [ 14 ] : T.சௌந்தர்
தமிழ்த்திரை இசையில் ராகங்கள் : [ 13 ] : T.சௌந்தர்
தமிழ்த்திரை இசையில் ராகங்கள் : [ 13 ] : T.சௌந்தர்
தமிழ்த்திரை இசையில் ராகங்கள் : [ 12 ] : T.சௌந்தர்
தமிழ்த்திரை இசையில் ராகங்கள் : [ 11 ] : T.சௌந்தர்
தமிழ்த்திரை இசையில் ராகங்கள் : [ 10 ] : T.சௌந்தர்
தமிழ்த்திரை இசையில் ராகங்கள் : [ 9 ] : T.சௌந்தர்
தமிழ்த்திரை இசையில் ராகங்கள் : [ 8 ] : T.சௌந்தர்
தமிழ்த்திரை இசையில் ராகங்கள் : [ 7 ] : T.சௌந்தர்
தமிழ்த்திரை இசையில் ராகங்கள் : [ 6 ] : T.சௌந்தர்
தமிழ்த்திரை இசையில் ராகங்கள் : [ 5 ] : T.சௌந்தர்
தமிழ்த்திரை இசையில் ராகங்கள் : [ 4 ] : T.சௌந்தர்
தமிழ்த்திரை இசையில் ராகங்கள் : [ 3 ] : T.சௌந்தர்
தமிழ்த்திரை இசையில் ராகங்கள் : [ 2 ] – T.சௌந்தர்
தமிழ்த்திரை இசையில் ராகங்கள் : [ 1 ] – T.சௌந்தர்

ஒப்பாரும் , மிக்காருமற்ற நடிகை திருமதி மனோரமா: T .சௌந்தர்

manoramaதமிழ் சினிமாவின் மிகத்திறமை வாய்ந்த நடிகையாகத் திகழ்ந்தவர் மனோரமா அவர்கள்.

இறந்த ஒருவர் பற்றி ஒப்புக்கு சொல்லும் கருத்தல்ல இது. நிதானமாக அவர் நடித்த கதாபாத்திரங்களை அலசும் யாரும் வந்தடையும் முடிவு இதுவாகத்தானிருக்கும்.

தனது பால்யவயதில் குடும்பத்தின் வறுமையால் “பாய்ஸ் ” நாடகக் கம்பனியில் சேர்ந்து , பல இன்னல்களுக்கு மத்தியில் சினிமாவில் நுழைந்து பல கோடி ரசிகர்கள் மனதில் இடம் பிடித்தவர் மனோரமா.

நடிப்பில் மிகவும் கடினமாதாகக் கருதப்படும் நகைச்சுவை பாத்திரங்களில் நடித்து , தன்னை சிறந்த நகைச்சுவை நடிகையாக வளர்த்து பிரபலமடைந்த அவர் சிறந்த குணசித்திர நடிகையாகவும் நல்ல பாடகியாகவும் பரிணமித்தார்.அதுமட்டுமல்ல தமிழகத்தின் எல்லா வட்டார வழக்குகளையும் மிக இயல்பாக பேசி நடிக்கும் பேராற்றலையும் கொண்டவராகத் திகழ்ந்தார்.

சினிமாவில் அவர் ஏற்று நடித்த குணசித்திர பாத்திரங்களில் நாம் மனோரமாவை காண முடியாதவாறு அந்தக் கதாபாத்திரங்களாகவே மாறியிருப்பார்.எத்தனையோ எண்ணற்ற பாத்திரங்களை ஏற்று நடித்து நம் மனங்களில் நீங்கா இடத்தைப் பிடித்திருக்கிறார்.

சினிமா மட்டுமல்ல தன்னை வளர்த்த நாடக அரங்குகளிலும் அவர் முனைப்புடன் செயல்பட்டார்.அதுமட்டுமல்ல தொலைக்காட்சி நாடங்களிலும் நடித்து பெரும் புகழ் ஈட்டினார்.

கோமல் சுவாமிநாதன் இயக்கத்தில் தூரதர்சன் தொலைக்காட்சியில் வெளியான ” என் வீடு ,என் கணவன் ,என் குழந்தை ” என்ற நாடகம் அவரின் ஒப்பற்ற நடிப்புக்கு மகுடம் சூட்டியது.அந்த நாடகத்தைபார்த்த எண்ணற்ற ரசிகர்கள் மனோரமாவின் நடிப்பையே பாராட்டி தனக்கு தொலைபேசி அழைப்புகளை மேற்கொண்டதாகவும் ,அதை பார்த்த வெளிநாட்டு ரசிகர்கள் பலரும் அந்த தொலைகாட்சி நாடகத்தின் பிரதி கேட்டு தன்னிடம் தொடர்பு கொண்டதாகவும் அதை இயக்கிய கோமல் சுவாமிநாதன் 1990 களில் வியந்து எழுதியிருந்தார்.

சுபமங்களா இதழில் கோமல் , தான் இயக்கிய அந்த நாடகம் பற்றியும் அதில் அன்னபூரணி என்ற கதா பாத்திரத்தில் நடித்த மனோரமா பற்றியும் வியந்து பாராடி எழுதியமை என் நினைவுக்கு வருகிறது.

அதுமட்டுமல்ல மனோரமாவின் தொழில் பக்தி , நேரம் தவறாமை , நடிப்பில் அவருக்கு இருந்த தாகம்
போன்றவற்றையும் பலரும் குறிப்பிட்டு பேசியிருக்கிறார்கள்.தில்லானா மோகனாம்பாள் படத்தில் பல ஜாம்பவான்களுடன் இணைந்து தனி ஒளி காட்டிய நடிப்பை யாரால் மறக்க முடியும்.

நடிப்பு மட்டுமல்ல தனித்தன்மை மிகுந்த பாடகியாகவும் விளங்கினார் மனோரமா.அவர் பாடிய “தெரியாதோ நோக்கு தெரியாதோ” [ சூரியகாந்தி 1973] , ” பார்த்தாலே தெரியாதோ நோக்கு அடியே சரசு ” [ ஸ்ரீ ராகவேந்திரா 1985] போன்ற மகத்தான வெற்றிப்பாடல்களை யாரால் மறக்க முடியும்!?

பிறவிக்கலைஞரானஅவரது இழப்பு நல்ல ரசிகர்களுக்கு மாபெரும் இழப்பு!

ஜே.ஆர்- தெருவோரத்தில் அனாதரவாகக் கொல்லப்பட்ட ஒரு ‘துரோகியின்’ மாவீரர் நாள் கதை: சபா நாவலன்

ipkfஅவனுக்கு மீசை அரும்பய்த்தொடங்கிய நாளிலிருந்தே போராட்டமும் ஆயுதங்களோடு முளைவிட ஆரம்பித்திருந்தது. எண்பதுகளின் ஆரம்பத்திலேயே அவனது போராட்ட வாழ்க்கை ஆரம்பமாகிவிட்டது. கல்வியன்காட்டிலிருந்து பருத்தித்துறை வரைக்கும் தனது சைக்கிளில் இயக்கக் கூட்டத்திற்குச் சென்று வந்திருக்கிறான். நெல்லியடியில் நான்கைந்து இளைஞர்களோடு ஈழப் போராட்டத்தை வெற்றிகொள்ள மற்றொரு வழியும் இருப்பதாக பலிபீடம் என்ற குழு பிரச்சாரம் செய்துவந்த போது அதனோடு இணைந்துகொண்டான்.

எண்பதுகளின் ஆரம்பத்தில் இயக்க வேறுபாடுகளின்றி, சோசலிசம், வர்க்கம், புரட்சி என்று அனைத்துப் போராளிகளும் உச்சரித்தனர். தீவிர வலதுசாரி இயக்கமாகக் கருதப்பட்ட விடுதலைப் புலிகள் கூட சோசலிசத் தமிழீழம் என்ற கருத்தை முன்வைத்தது.

வெளி நாட்டுக்குப் போவதைப் பற்றி யாரும் பேசிக்கொள்வதில்லை. வெறுப்பின் மொழி அன்னிய தேசத்தின் செல்வச் செழிப்ப்பைப் பற்றி வியந்துகொண்ட காலம் இன்னும் தோன்றியிருக்கவில்லை. அப்போதெல்லாம், வெற்றியின் மொழியே இளைஞர்களுக்குத் தெரிந்திருந்தது. மனிதாபிமானமும் மற்றவர்களை மதிக்கின்ற பண்பும் ஒரு புறத்தில் சமூகத்தில் துளிர்விட ஆரம்பித்திருந்த அதே வேளை வெறித்தனமும் வன்மமும் கூட மறுபுறத்தில் வேர்விட ஆரம்பித்தது.

அவ்வாறான ஒரு சூழலில் தான் ஜே.ஆர் ஐச் சந்திக்கிறேன். 1983 ஆம் ஆண்டின் மத்திய பகுதியாக இருக்கலாம். அது யாழ்ப்பாணத்தின் ஒரு மாலைப்பொழுது. சிறிய ஜீப் களில் அரச புலனாய்வுத் துறை சுற்றித்திரிகின்ற காலம். ஜே,ஆர் ஈழப் போராட்டத்திற்கு தமது குழுவே அரசியல் தலைமை வழங்கும் என்கிறான். ஆயுத மோகமும் இந்தியத் தலையீடும் மக்கள் போராட்டங்களால் அழிக்கப்பட்டுவிடும் எனக் கூறிய ஜே.ஆர், அவற்றிலெல்லாம் தான் சார்ந்த குழுவின் பதிவுகள் நிச்சயமாக இருக்கும் என்றான்.

கல்வியன்காட்டில் இயக்கங்கள் ஒன்றுகூடும் தேனீர் சாலை தான் அக்கா கடை. அங்கு கடை மூடும் வரையும் நாங்கள் பேசிக் கொள்கிறோம்.

அங்கிருந்து ஜே.ஆர் இன் வீடு நீண்ட தூரமில்லை. சைக்கிளில் கதைத்தபடியே சென்று ஜே.ஆர் இன் வீட்டை அடைகிறோம். அங்கு குடும்பத்தில் அத்தனை பேரும் அரசியல் உரையாடலில் பங்கு கொள்கின்றனர்.

நான் சார்ந்த டெலோ இயக்கத்தைப் பலப்படுத்துவதே எனது நோக்கம். இந்திய இராணுவப் பயிற்சியை நானும் எதிர்க்கிறேன் ஆனால் இன்று சமூகம் முழுவதும் அதன் பின்னால் அணிதிரண்டு நிற்பதால் அதானால் ஏற்படும் அழிவுகளைத் தடுக்க போராளிகளை அரசியல் மயப்படுத்த வேண்டும் என்கிறேன். ஜே.ஆர் ஒத்துக்கொள்ளவில்லை. அவரின் அண்ணன் அது சரி என்கிறார்.

ஜே.ஆர். இன் அண்ணன் ராசபாதையில் அமைந்துள்ள நிறுவனத்தில் பாதுகாப்பு உத்தியோகத்தராகப் பணிபுரிந்தார். கராட்டியில் கறுப்புப் பட்டி வரை பயிற்சி பெற்றுள்ளதாகக் கூறுகிறர்.

எனக்கு இன்னும் பத்தொன்பது வயதுதான். ஜே.ஆர் இற்கு பதினேழு வயது முடிந்திருக்கவில்லை.

டெலோ இயக்கத்தில் ஜே.ஆர் இன் அண்ணைப் போன்று ஒருவர் இணைந்துகொண்டால் எமது இராணுவத்தின் தளபதிகளில் ஒருவராகிவிடலாம் என்று எண்ணிக்கொண்டேன்.

இரண்டு நாட்களின் பின்னர் அவர் வேலை செய்யும் நிறுவனத்தின் முன்பாகப் பல மணி நேரம் காத்து நின்று அவரைச் சந்தித்தேன்.

அச்சந்திப்புக்கள் சில நாட்கள் மட்டுமே நீடிக்கின்றன. அவருடன் அரசியல் பேசுவதற்குக் என்னுடன் வந்த மிசோ ராம் என்ற ரெலோ உறுப்பினர் அவரைப் பயிற்சிக்காக இந்தியாவிற்கு அனுப்பிவைத்ததைப் பின்னதாக அறிந்துகொள்கிறேன்.

ஜே.ஆர் இன் குடும்பம் வறுமையின் விழிம்பிலேயே வாழ்ந்துவந்தது. அண்ணைன் உழைப்பு வயதான தாய் தந்தையர், சகோதரிகள் என அனைவரதும் நாளாந்த வாழ்வாதாரமாக அமைந்திருந்தது. வறுமையின் அமைதிக்குள் வாழ்க்கையின் மகிழ்ச்சியை அனுபவித்திருந்த அந்தக் குடும்பத்தின் வேர் அறுக்கப்பட்டது போன்ற உணர்வு எனக்கு ஏற்பட்டது.

அப்போது இலங்கையின் ஜனாதிபதியாக இருந்த அமெரிக்க அடியாள் ஜே.ஆர்.ஜெயவர்த்தன சுருக்கமாக ஜே.ஆர் என்றே அழைக்கப்பட்டார். பார்த்தீபனின் மூக்கு ஜே.ஆர் ஐப் போன்று நீளமானது என்பதால் அவர் ஜே.ஆர் என நண்பர்களால் அழைக்கப்பட்டதால் பின்னாளில் பார்த்தீபன் மறைந்து போய் ஜே.ஆர் மட்டுமே நிரந்தரமானார்.

ஜே.ஆர் ஐச் சந்தித்து நடந்தவற்றை எப்படியாவது சொல்லிவிட வேண்டும் என்று எண்ணிக்கொண்டிருந்தேன். சில நாட்களின் பின்னர் மங்கிய மாலைப் பொழுது ஒன்றில் அவனது வீட்டிற்குச் செல்கிறேன்.

எனது குரல் கேட்டதும் தனது வாடகை வீட்டின் சுருங்கிய படலை வரைக்கும் அமைதியாக நடந்துவந்த ஜே.ஆர் என்னை வீட்டுப் பக்கம் வரவேண்டாம் என்று தூரே அழைத்துச் சென்றார். அண்ணன் இயக்கப்பயிற்சிக்குக் கொண்டு செல்லப்பட்டது தொடர்பாக குடும்பத்தினருக்குத் தெரியும் என்றும் அனைவரும் என் மீது கோபமாக இருப்பதாகக் கூறினார்.

நிலைமைகளைத் தான் விளங்கிக் கொண்டுள்ளதாகவும், உணர்ச்சி வசப்பட்ட இளைஞர்கள் இராணுவப் பயிற்சிக்கு இந்தியாவிற்குச் செல்வது பெரும் ஆபத்தை ஏற்படுத்தும் என்பதால் என்னுடன் ஒத்துழைப்பதாகக் கூறினார். இதனால் நாட்டிலிருந்து அரசியல் வேலை செய்பவர்களோடு தான் இணைந்துகொள்வதாகக் கூறினார்.

அதேவேளை ஜே.ஆர் இன் இயக்கத்தை ஆரம்பித்த தேவதாஸ் தென்னிந்தியா சென்ற பின் அவரது தொடர்பும் அறுந்துபோனதாகக் கூறுகிறார்.

சில நாட்களின் பின்னர் நாங்கள் மீண்டும் சந்தித்து டெலோ இயக்கத்தின் அரசியல் பிரிவில் வேலை செய்வதற்காக மனோ மாஸ்ரிடம் ஜே.ஆர் ஐக் கூட்டிச் செல்வதாக உறுதி கூறி விடைபெற்றுக்கொள்கிறேன்.

அப்போது டெலோ இயக்கத்தில் மத்திய குழு ஒன்றை உருவாக்கி அதனை ஜனநாயக மயப்படுத்த வேண்டும் என்ற மனோ மாஸ்டரின் முயற்சியோடு இணைந்திருந்தவர்களின் நானும் ஒருவன்.

அந்த முயற்சியில் தோல்வியடைந்து மனோ மாஸ்டருடன் வெளியேறிய எனது டெலோ இயக்க வாழ்கை எட்டு மாதங்கள் வரை மட்டுமே நீடித்தது.

மீண்டும் நான் ஜே.ஆர் ஐச் சந்தித்த போது, டெலோ இயக்கம் என்னைத் தண்டிப்பதற்காகத் தேடிக்கொண்டிருந்தது. மரண பயத்யத்தில் எனது தலைமறைவு வாழ்க்கை கிராமங்களுகுள்ளேயே நகர்ந்து சென்றது.

ஜே.ஆர் டெலோ இயக்கத்தின் பிரச்சாரப் பிரிவில் முழு நேரமாகப் பணியாற்றிக்கொண்டிருந்தார்.
இயக்கத்தில் முற்போக்கு அணியொன்று உருவாகிக் கொண்டிருப்பதாகவும், அதனுடன் இணைந்து இயக்கத்தை மாற்றப் போவதாகவும் கூறிக்கொண்டிருந்தார்.

இயக்கங்களை இனிமேல் மாற்ற முடியாது என்றும் அதற்கு வெளியில் புதிய அரசியல் முன்வைக்கப்பட வேண்டும் என்றும் நான் வாதிட்டேன். கிராமங்களின் நான் செய்யும் அரசியல் வேலைகள் பற்றி ஜே.ஆர் இடம் கூறிய போது, அதற்குத் தான் உதவி செய்வதாகக் கூறினார்.

indian_military_training1985 ஆம் ஆண்டின் ஆரம்பத்திலேயே டெலோ இயக்கப் போராளிகள் இந்தியாவிலிருந்து பயிற்சியை முடித்துக்கொண்டு ஆயுதங்களோடு நாடு திரும்ப ஆரம்பித்திருந்தனர்.

அண்ணைன் வரவிற்காகக் காத்திருந்த ஜே.ஆர் உம் குடும்பத்தினரும் அந்தத் துயரச் செய்தியை அறிந்துகொண்டனர். ஜே.ஆர் இன் அண்ணன் இந்தியாவில் தற்கொலை செய்து மரணித்துப் போனதாக இயக்கப் பொறுப்பாளர் ஒருவர் செய்தி கொண்டு வந்திருந்தார்.

அது தற்கொலை அல்ல உள் முரண்பாடுகளால் நடத்தப்பட்ட கொலை என்பது உறுதி செய்யப்பட நீண்டகாலம் எடுத்தது.

டெலோ இயக்கத்தின் உள் கட்டமைப்ப்க்களின் மாற்றம் ஏறடுத்த முடியாது என்ற முடிவிற்கு சில காலங்களின் முன்னதாகவே ஜே.ஆர் வந்திருந்தான். வெளியில் மற்றொரு அரசியல் இயக்கம் தோன்றினால் பல ஆயிரம் தியாக உணர்வுள்ள் போராளிகள் டெலோவை விட்டு வெளியேறிவிடுவார்கள் என்று ஜே.ஆர் நம்பியிருந்ததால் என்னுடன் கிராமங்களில் வேலை செய்ய ஆரம்பித்தான். தேசிய மாணவர் மன்றம் என்ற மாணவர் அமைப்பை உருவாக்கி நூற்றுக்கும் மேற்பட்ட பாடசாலைகளில் தெரு நாடகங்களை அரங்கேற்றினோம். அவற்றுடன் ஜே.ஆர் இணைந்து செயற்பட ஆரம்பித்திருந்தான்.

இதே வேளை ஜே.ஆர் இன் அண்ணன் உயிருடன் இயக்கத்தின் சிறையில் அடைத்து வைக்கப்பட்டிருக்கலாம் என்று அவரது வீட்டுக்கு அருகிலிருந்து இந்தியா சென்று பயிற்சியெடுத்த ஒருவர் கூறியதும், ஜே.ஆர் இன் இன்னொரு சகோதரரை இந்தியாவிற்கு அனுப்பி அவரைத் தேடுவது என குடும்பத்தினர் தீர்மானித்தனர்.

மாதகலில் இருந்து கடத்தல் செய்பவர்களின் படகு ஒன்றை ஒழுங்குசெய்து இந்தியா பயணமான அவர், இடை நடுவில் இலங்கைக் கடற்படையின் தாக்குதலுக்கு உள்ளாகி மரணித்துவிடுகிறார்.

இப்போது, ஜே.ஆர் இன் குடும்பம் அவரும் சகோதரியும், வயதான தாய் தந்தையருமாகச் சுருங்கிவிடுகிறது. புத்திர சோகமும் முதுமையின் வலியும் பெற்றோர்களைக் கொன்று தின்றுகொண்டிருக்க, ஜே.ஆர் வேலைக்குச் செல்லவேண்டிய நிலைக்குத் தள்ளப்படுகிறான்.

அச்சகம் ஒன்றில் பகுதிநேர வேலை பெற்றுக்கொண்ட ஜே.ஆர் இன் ஊதியம் மட்டுமே குடும்பத்தைக் காப்பாற்றுவதற்குப் போதுமானதாக இருக்கவில்லை. அவனது வயதான தந்தை சினிமா தியட்டர் ஒன்றில் பாதுகாப்பு உத்தியோகத்தராகப் பணியாற்ற ஆரம்பிக்கிறார்.

86 ஆம் ஆண்டில் டெலோ இயக்கம் தமிழீழ விடுதலைப் புலிகளால் அழிக்கப்படுகிறது. நூற்றுக்கணக்கான டெலோ போராளிகள் கண்ட இடத்திலேயே சுட்டுக்கொல்லப்படுகின்றனர். பலர் வீடு வீடாகச் சென்று கைது செய்யப்படுகின்றனர். சிலர் விசாரணையின் பின்னர் சுட்டுக்கொல்லப்பட்டனர். சிலர் விடுதலை செய்யப்படுகின்றனர்.

ஜே.ஆர் உம் அவரது வீட்டுக்கு அருகாமையிலிருந்து பாஸ்கரனும் கைதாகின்றனர். ஜே.ஆர் டெலோவை விட்டு விலகியிருந்ததாலும் அவரது அண்ணனின் படுகொலை தொடர்பான தகவல்களலும் அவர் ஒரு வாரத்தின் உள்ளாகவே எச்சரிக்கைகளின் பின்னர் விடுதலை செய்யப்படுகின்றான்.

பாஸ்கரனின் மரணச் செய்தி சில காலங்களின் பின்னர் அவரது வீட்டாருக்குத் தெரிவிக்கப்படுகின்றது.

விடுதலையான ஜே.ஆர் இன்னும் தீவிரமாக அரசியல் வேலைக செய்யப்பட வேண்டும் என்றும் , மக்களை அணிதிரட்டி எழுச்சி ஒன்றை ஏற்படுத்தத் தவறினால் இலங்கை அரசாங்கம் ஆயுதப் போராட்டத்தை அழித்துவிடும் என்ற கருத்தை முன்வைக்கிறான். இலங்கை அரசாங்கத்திற்கு எதிரான தலைமறைவு இராணுவக் குழு ஒன்றை மக்கள் போராட்டங்களுக்கு ஆதரவாக கட்டமைக்க வேண்டும் என்ற கருத்தையும் திட்டத்தையும் முன்வைக்கிறான். டெலோ ஆயுதங்களைப் பதுக்கி வைத்திருந்த ஜெகன்நாதன் என்பவரது வீட்டுக்கு என்னை அழைத்துச் சென்று அங்கிருந்த கைக்குண்டுகள் சிலவற்றை எடுத்து கிராமம் ஒன்றில் புதைத்து வைக்கிறோம்.

rajeev1987 இல் இலங்கை இந்திய ஒப்பந்தத்தின் அடிப்படையில் அமைதிகாக்கும் படை என்ற பெயரில் இந்திய ஆக்கிரமிப்பு இராணுவம் வட கிழக்கை ஆக்கிரமித்துக்கொண்டது.

தமிழீழ விடுதலைப் புலிகளுக்கும் இந்திய இராணுவதிற்கும் இடையேயான பேச்சுக்கள் நடைபெற்றுக்கொண்டிருந்தன. அப்போது இந்திய இராணுவத்திற்கு எதிராக ஆர்ப்பாட்டங்களையும் குண்டுவெடிப்புக்களையும் தயார் செய்ய வேண்டும் என ஜே.ஆர் என்னிடம் வந்து விவாதித்தான்.

பேச்சுக்கள் முறிவடைந்ததும், புலிகள் இந்திய இராணுவத்தின் மீது தாக்குதல் நடத்த ஆரம்பித்தனர். புலிகளின் தாக்குதலுக்கு அஞ்சி தென்னிந்தியாவில் தங்கியிருந்த டெலோ இயக்க உறுப்பினர்களை இந்திய இராணுவம் தன்னோடு அழைத்து வந்து பாதுகாப்பு அரண்களிலும், முன்னரங்கங்களிலும் பயன்படுத்திக்கொண்டது.

கல்வியன்காட்டு சந்தியில் அமைக்கப்பட்ட பாதுகாப்பு அரண் ஜே.ஆர் இன் வீட்டிற்கு அருகில் அமைந்திருந்தது. அங்கு காவல் வேலையில் ஈடுபட்டிருந்த ஒருவர் ஜே.ஆர் ஐ அடையாளம் கண்டுகொண்டு அழைத்திருக்கிறார். ஜே.ஆர் அவரோரு நீண்ட நேரம் பேசியிருக்கிறார். நாட்டுக்காகப் போராட அனைத்தையும் துறந்து சென்ற அவர் இந்திய இராணுவத்தின் மாய வலைக்குள் அகப்பட்டிடுப்பதாக ஜே.ஆர் இடம் துயர்பட்டுக்கொண்டார்.

இலங்கைக்கு வந்து தமிழீழம் பெற்றுத் தருவதாகவே இந்திய இராணுவம் தங்களைக் கூட்டிவந்ததாகவும் கூறியிருக்கிறார். ஜே.ஆர் தனது அண்ணனுக்கு என்ன நடந்தது எனக் கேட்டிருக்கிறான்.

அதன் பின்னர் அவ்வழியால் போகும் போதெல்லாம் அவர் ஜே.ஆரை இடைமறித்துப் பேச்சுக்கொடுப்பது வழக்கம். இத்தகவல் விடுதலைப் புலிகளின் புலனாய்வுத் துறைக்கு எட்டியிருக்க வேண்டும்.

கல்வியன்காட்டுச் சந்திக்கு அருகாமையில் ஜே.ஆர் தமிழீழ விடுதலைப் புலிகளின் உறுப்பினர் ஒருவரால் அவரது தலையில் சுடப்பட்டு படுகொலை செய்யப்பட்டார் என்ற தகவல் மட்டும் எனக்குக் கிடைத்தது.

இந்திய இராணுவத்தின் உளவாளி ஒருவரைச் சுட்டுக் கொலை செய்துவிட்டதாக கொலை செய்த புலிகளின் உறுப்பினர்கள் அருகிலிருந்தவர்களுக்குக் கூறியிருக்கிறார்கள்.

தனது வாழ் நாள் முழுவதும் ஒடுக்குமுறைக்கு எதிராகப் போராடுவதைப் பற்றி மட்டுமே சிந்தித்துக்கொண்டிருந்த ஜே.ஆர் தெருமுனை ஒன்றில் அனாதரவாகக் கிடந்தான்.
ஜே.ஆர் இன் குடும்பத்திலிருந்த மூன்று ஆண்பிள்ளைகளையும் போராட்டம் பலியெடுத்துக்கொண்டது.

நான் பல்கலைக் கழகத்தில் படிப்பைத் தொடர்வதாகத் தீர்மானித்து இரண்டாவது வருடத்தில் தான் கொலை நடந்தது.

அன்று… கணிதத்தில் சிறப்புப் பிரிவிற்குத் தெரிவு செய்யப்பட்டதற்காக விருந்து கொடுக்குமாறு பல்கலைக்கழக நண்பர்கள் கேட்டிருந்தார்கள் பல்கலைக் கழகத்திற்கு முன்னாலிருந்த அபிராமி என்ற உணவுக்கடையில் நண்பர்களை எதிர்பார்த்து தேனீர் ஒன்றை அருந்திக்கொண்டிருக்கிறேன்.

திடிரென ஒரு குரல் என்னைக் கடுமையான வார்த்தைகளால் விசாரித்தது.

‘எங்களது குடும்பத்தையே சிதைத்துவிட்டு எந்தக் கவலையும் இல்லாமல் தேனீர் சாப்பிடுகிறாயா’ என்று உணவகம் முழுவதும் அதிரும் வகையில் சத்தமிட்டது ஜே.ஆர் இன் அப்பா.

எனக்கு அங்கிருந்து மெதுவாக எழுந்து செல்வதைத் தவிர வேறு வழி தெரியவில்லை.

பின்னர் விசாரித்ததில் பல்கலைக் கழகத்தில் தற்காலிக பாதுகாப்பு உத்தியோகத்தராக வேலை செய்வதற்கு ஜே.ஆர் இன் அப்பா வந்திருந்தாகத் தெரியவந்தது. அந்த தந்தையின் கூற்றில் கோபம் மட்டுமல்ல, நியாயமும் இருந்தது.

நான் வெற்றியின் மொழியைப் பேசி இயக்கத்திற்கு என்ற அழைத்துச் சென்ற நூற்றுக்கணக்கானவர்களுள் ஜே.ஆர் உம் ஒருவன்.

அவர்களில் பெரும்பாலானவர்களை நான் மீளச் சந்தித்ததில்லை. செத்துப் போனவர்கள் எத்தனை பேர் மீண்டவர்கள் எத்தனை பேர் எனக்குத் தெரியாது. என்னுடைய வாழ்கைய ஒருவகையில் செதுக்கிக் கொண்ட சுயநலவாதியாகவே நான் என்னை எண்ணுவதுண்டு. கடந்த கால அழுக்குகளைக் கழுவிக் கொள்வதற்கான மாற்று என்னிடம் இல்லை.

ஆனால் ஜே.ஆர் ஐப் பொறுத்தவரை தியாகி, மாவீரன், என்ற அனைத்து வரைமுறைகளுக்குள்ளும் அடக்கப்படக்கூடியவன்.

ஜே.ஆர் கொல்லப்பட்ட சரியான திகதி எனக்குத் தெரியாது. ஆனால் அவன் கொல்லப்பட்ட முப்பதுவருட இடைக்காலத்தில் புலிகள் சாராத அனைத்துப் போராளிகளும் துரோகிகள் என்ற விம்பத்தை அதிகாரவர்க்கம் திட்டமிட்டு உருவாக்கியது.

சமூகத்தைப் பிளந்து அதன் ஒரு பகுதியைத் துரோகிகளாக்கி ஜே.ஆர் இன் குடும்பத்தைப் பல தடவை கொன்று போட்டிருக்கிறது ஆதிக்க வர்க்கம். இவையெல்லாம் முன்னமே திட்டமிடப்பட்ட செயற்பாடுகள். பல உளவாளிகள் ஆரம்பத்திலிருந்தே இயக்கங்களில் நுளைந்துகொண்டனர். உலகின் உளவு நிறுவனங்களுக்காக வேலைபார்த்த பல்வேறு கூலிகள் இயக்கங்களின் தத்துவார்த்தத் தலைவர்களாக நியமிக்கப்பட்டிருந்தனர்.

இன்றும் தியாக உணர்வு மிக்க புலிகளின் போராளிகள் கூட எத்தனையோ ஜே.ஆர்களை மறுபடி மறுபடி கொன்று போடுகின்றனர். அவர்கள் தெரிந்துகொண்ட வரலாறும் அவர்களின் பொதுப்புத்தியும், ஏனென்றே தெரியாமல் செத்துப்போன உணர்வு மிக்க போராளி ஜே.ஆர் ஐ இன்னும் நீண்ட காலத்திற்குத் துரோகியாகவே கருதிக்கொள்ளும். இன்றும் அரசியல் சார்ந்த அடையாளத்திற்குப் பதிலாக இயக்கங்கள் சார்ந்த குழுவாதமே முன்னணி சக்திகளை முகாம்களாகப் பிளவுபடுத்தி வைத்திருக்கிறது.

ஜே.ஆர் இற்கு அருகில் மற்றொரு பிணமாக அனாதையாக நானும் மரணித்துப் போயிருக்கலாமே என பல தடவைகள் துயருற்றிருக்கிறேன். ஒவ்வோரு தடவையும் ஜே,ஆர் கொல்லப்படும் போது நானும் செத்துப் பிழைப்பதாகவே உணர்கிறேன்.

தமது இளவயதின் ஆசாபாசங்களை தொலைத்துவிட்டு, புத்தகங்களுக்கு விடைகொடுத்துவிட்டு போராடுவதற்காக மட்டுமே சென்ற ஆயிரக்கணக்கான தியாகிகள் துரோகிகளாக்கப்பட்டனர். மரணித்தவர்களின் புதைகுழிகளிலும் சாம்பல் மேடுகளிலும் அவர்கள் மீண்டும் மீண்டும் கொலை செய்யப்பட்டனர். இக் கொலைகள் தமிழினத்தை கோரமான மனோநிலை கொண்ட மக்கள் கூட்டமாக உலக மக்களுக்கு அறிமுகப்படுத்தியது.

மக்களும் போராளிகளும் அப்பாவிகள் என்றும் அதிகார வெறிகொண்ட தலைமைகளும் அவை வரித்துக்கொண்ட அரசியலின் மூலமுமே தமிழர்கள் தொடர்பான தவறான பிரதிவிம்பத்தை வழங்கிவருகிறதுஎன ஈனக் குரலில் சொன்னவர்களின் வாதம் எடுபடவில்லை.

இன்று ஐ.நாவும் ஏகபோக அரசுகளும் போராட்டத்தின் நியாயத்தை அழிப்பதற்காக அத் தவறுகளைப் பயன்படுத்திக்கொள்கின்றன. போராளிகளின் புதைகுழிகளிகளுக்குள் அவர்களை மீண்டும் கொன்று போடுகின்றன.

uk_maveerarஏனைய இயக்கங்களிலிருந்த சந்தர்ப்பவாதிகள் பலர் புலிகளில் இணைந்து தம்மைத் தியாகிகளாகவும், தமது முன்னை நாள் தோழர்களைத் துரோகிகளாகவும் பிரச்சாரம் செய்தனர். புலம்பெயர் புலிகள் இப் போக்கின் பிரதான கருவிகளாகினர். அவர்கள் பெரும்பாலும் தம்மை நியாயப்படுத்துவதற்காக ஏனைய இயக்கங்களிலிருந்த சற்றுப் பேசத் தெரிந்தவர்களை ஆலோசகர்களாக நியமித்துக்கொண்டனர்.

தமது எஜமான விசுவாசத்தைக் காட்டுவதற்காக வெறித்தனமான புலிகள் இயக்க விசுவாசிகளாக அவர்கள் தமது போலித்தனத்தை வெளிப்படுத்திக்கொள்கின்றனர். ஏகாதிபத்தியங்களும் அவற்றின் உளவுப்படைகளும் புலிகள் இயக்கப் போராளிகளைப் போர்குற்றத்திற்காகத் தண்டிக்கும் போது முதலில் காட்டிக்கொடுப்பவர்கள் இவர்களாகத்தானிருப்பார்கள்.

புலிகளை அழித்து சொத்துக்களைக் கையகப்படுத்திக்கொண்ட புலம்பெயர் பினாமிகளில் பெரும்பகுதியினர் தாம் சார்ந்திருந்த இயக்கங்களின் தோழர்களை நினைவுகூர்வதில்லை.

இந்த வியாபாரிகளின் கூட்டிணைவில் நடத்தப்படும் புலம்பெயர் மாவிரர் நிகழ்வில் ஜே.ஆர் என்ற ‘துரோகி’ தலைகாட்டமாட்டான். புலிகளின் தலைவர் பிரபாகரனையே அனாதையாக்கிவிட்டு மாவீரர் வியாபாரம் நடத்தும் இக் கூட்டத்திற்கு ஜே.ஆர் ஒரு கேடா என்ன?

(எதுவும் கற்பனையல்ல…)

விடியல் விரையும் : விஜி

syrian refugees created by western war

ஆரத் தழுவுகின்றன அகதிகளை
யுத்தங்களின் ரகசியங்கள் புரியாத
அப்பாவி மக்களின் மனங்கள்

அப்பழுக்கற்ற நேயத்தின் பிரவாகத்தில்
ஜனநாயகம் தருகிறோம்
நல்லாட்சி அமைக்கிறோம் – போலி முழக்கங்கள்
புறந்தள்ளி
மனித தன்மை வாழ்வதற்காய்
மக்களின் மீள் சேர்க்கை ஆரம்பமாகின்றது – இனி
சிறு பொறிகள் பெருந் தீயாகும்

தம்மை போல் அச்சமற்று
தம்மை போல் பசியற்று
தம்மை போல் மகிழ்ந்து
தம்மை போல் வாழ்ந்து போகட்டும்- வானம் போல்
விரிந்த மென்மை மனங்கள்
கண்ணீரை மட்டுமா துடைக்கும்
செந்நீரையும் அவையே நிறுத்தும்!

நெடுந்தூரங்களில் இருந்து
பாதங்கள் கொப்பளிக்க
நடந்து வந்தவர் வருக
பசியும் தாகமும் வருத்த
கண்கள் ௶ஞ்சையாகி
மயங்கி சோர்ந்தவர்
வருக

மனிதம் மீதான நேசிப்பில்
களங்கமற்ற இதயங்கள்
கரங்களை நீட்டி வரவேற்கும்

பிறப்பதற்கு முன்னரே
தாயின் கருவறைக்குள்ளேயே
அகதியானவர் வருக
பிறந்து சில மணித்துளிகளுள்
அகதியானவர் வருக
அனாதையானவரும் வருக
நிலத்தை இழந்தவர் வருக
அதன் மீதான அனைத்தையும் இழந்தவர்
மூச்சை இழக்கு முன் வருக

குருதியும் கண்ணீரும் பெருகிட
கடல்களில் தரைகளில்
சிதறிடும் மரணத்தை – இனி
நெடு நேரம் பொறுத்திடார்

அடக்கப்படுதலினதும் கொல்லப்படிதலினதும்
அடையாளங்களாய்
முள் வேலிகள் விரிவடைகின்றன
முள்ளி வாய்க்காலில் தொடங்கி
பனி உறையும் தேசங்களின் எல்லைகள் ஈறாக
கரங்களும் மனங்களும் இணையும்

தீ மூண்ட நெஞ்சினராய்
வெகுண்டெழும் மக்கள் கூட்டம்
வரலாற்றுப பாதையில்
திசை திரும்பி பயணிக்கும்
அன்றைய நாளில்
அடக்கும் அதிகாரம் அகதியாகும்!

சுதந்திரம் என்பது என்னவென்றும்
நல்லாட்சி என்பது என்னவென்றும்
பாடங்கள் புகட்டும் அந்த
விடியலே விரைக!

தீபன் படத்தின் அரசியலைப் புரிந்துகொள்ளல் பற்றி….. : வாசுதேவன்

dheepanmovie
தீபன் திரைப்படத்திற்காக புலம்பெயர் சூழலிலிருந்து உள்வாங்கப்பட்ட சோபாசக்தி(இடது)

2014 ம் ஆண்டு ஒக்ரோபர் மாதமளவில் ஜக் ஓடியார் “எரான்”; எனும் புதிய திரைப்படத்தை நெறியாள்கை செய்ய உள்ளார் என்ற பத்திரிகைச் செய்தி ஓடியாரின் ரசிகர்களுக்கு மகிழ்வளித்திருந்தது. 2015ம் ஆண்டின் கான் திரைப்பட விழாவை முன்நிறுத்தி இப்படப்பிடிப்பு நிகழ உள்ளதாகவும் அறிவிக்கப்பட்டது.

18ம் நூற்றாண்டின் பிரபல பிரஞ்சு அரசியல் தத்துவமேதையான மோந்தெஸ்கியோவின் “பாரசீகக் கடிதங்கள்” எனும் நூலின் பாணியிலான அரசியல் கருத்தோவியமாக திரைப்படம் அமையும் எனவும் ஓடியார் தெரிவித்திருந்தார்.

இத்திரைப்படத்தின் நோக்கத்தை முழுதாகப் புரிந்து கொள்ள “பாரசீகக் கடிதங்கள்” பற்றிய முன்னறிவு இன்றியமையாததாகும்.

நேரடியாகவும், வெளிப்படையாகவும் தன் அரசியற் கருத்தை முன்வைக்க முடியாத ஒரு முடியாட்சிச் சூழலில், புனைபெயரில் மோந்தெஸ்கியோ இந்நூலை எழுதியிருந்தார்.

அதாவது, பாரசீகத்தில் இருந்து இரண்டு குடிமக்கள் ஐரோப்பா விற்கும், குறிப்பாக பிரான்சுக்கும் வருகை தந்து அவர்கள் தமது நண்பர்களுக்கு எழுதும் கடிதங்களாக அந்நூல் அமைந்திருந்தது.

உண்மையைச் சொல்லுவதானால், தனது தாய் நாட்டின்பால் கொண்ட அக்கறையால், அதன் அரசியல், சமூக, மதச் சூழ்நிலைகளின் மீதான தனது காட்டசாட்டமான விமர்சனத்தை அவர் இரண்டு பாரசீக இஸ்லாமியர்களின் பார்வையாக முன்வைத்தார். திட்டமிட்ட வகையிலும், பிரஞ்சு மக்களுக்கு அரசியற் பிரக்ஞையை ஊட்டும் வகையிலுமாக இந்நூல் பிரஞ்சு தேசத்தை அந்தியர்களின் பார்வையில் இழிவுபடுத்தியிருந்து.

இந்தப்பாணியில்தான், ஒடியாரும் தனது “எரான்” (பின்னாளில் “தீபன்” ஆக்கப்பட்ட) திரைக்காவியத்தை இயக்குவதாக முன்கூட்டியே அறிவித்தார். இவ்வியம் பலருக்குத் தெரியாமலிருந்தது ஒன்றும் ஆச்சரியப்படக்கூடியதல்ல.

பாசிசக் கட்சியான தேசிய முன்னணியின் தலைவர் மரீன் லூ பென்
பாசிசக் கட்சியான தேசிய முன்னணியின் தலைவர் மரீன் லூ பென்

அடுத்து, கடந்த சில வருடங்களாக பிரான்சின் அரசியல்வாதிகள் போட்டிபோட்டுக்கொண்டு அரபோ-இஸ்லாமிய எதிர்ப்புவாதத்தை முன்னிலைப்படுத்தி, அதற்குப் பசளையிட்டு வளர்த்தெடுத்துக் கொண்டிருக்கிறார்கள். பொருளாதார நெருக்கடிச் சூழ்நிலையானது பாசிசக் கட்சியான தேசிய முன்ணணியை முதன்மைக்கட்சிகளுள் ஒன்றாக மாற்றிவிட்டது. அடுத்து வரும் ஆண்டுகளில் இக்கட்சி ஆட்சியதிகாரத்தைக் கைப்பற்றும் எனும் அச்சம் ஜனநாகயவாதிகள் மத்தியில் தோன்றாமலுமில்லை.

பொருளாதாரப் பிரச்சனைகளின் உண்மைவேரை மறைக்கும் பெருநிதியங்களின் சதிவலைப் பின்னல்களின் பகுதியாக முதன்மையூடகங்களும் மாறிவிட்டன. தினமும் இவ்வூடகங்கள் சிறிது சிறிதாக இஸ்லாமிய எதிர்ப்பு வாதத்தை நஞ்சாக மக்கள் மத்தியில் ஊட்டிக்கொண்டிருக்கின்றன. அவ்வப்போ நடைபெறும் பயங்கர வாதச் சம்பவங்களும் இவ்வாறான ஊடகங்களுக்குத் தீனி போட்டுக்கொண்டிருக்கின்றன.

முன்னொரு காலத்தில், பாசிசக் கட்சியான தேசிய முன்னணிக்கு ஆதரவு தெரிவிப்பதை வெட்கத்துக்குரிய விடயமாகக் கருதிய பிரஞ்சுக்காரர்கள் தற்போதெல்லாம் அதையொரு தேசிய விடுதலைக்கான கட்சியாகப் போற்றிப் புகழ்கிறார்கள். இதில், பல புத்திஜீவிகளும் அடங்குகிறார்கள் என்பது தான் அச்சத்திற்குரிய விடயம்.

உவெல்பெக்
உவெல்பெக்

பிரான்சில், ஐரோப்பாவில் என்றும் கூடச்சொல்லலாம், இஸ்லாமியர்களில் வெறுப்பை உமிழும், இஸ்லாமை இழிவுபடுத்தும் படைப்புகளுக்கு ஊடகங்கள் முக்கியத்துவம் அளித்து அவற்றை முன்தள்ளிவிடுகின்றன என்பது ஒரு இரகசியமான விடயம் அல்ல. உவெல்பெக் எனப்படும் சர்ச்சைக்குரிய பிரஞ்சு எழுத்தாளர் இஸ்லாம் பிரான்ஸை ஆக்கிரமிக்கபோகிறது எனும் பாணியிலான ஒரு நாவலை எழுதினார். அது மில்லியன் கணக்கில் மேற்குலகெங்கும் விற்கப்பட்டது. எரிக் ஸெமூர், அலன் பங்கியல்குரொத் போன்ற மற்றும் பல யூதஇனப் புத்திஜீவிகள் அடிக்கடி சர்ச்சைக்குரிய இஸ்லாமிய எதிர்ப்புக் கோசங்களை அள்ளி கொட்டிக்கொண்டேயிருக்கிறார்கள்.

தொலைக்காட்சியில் அவர்கள் இல்லாத நிகழ்ச்சிகளே இல்லையெனும்அளவிற்கு அவர்களின் பிரசன்னம் அச்சமூட்டுவதாக உள்ளது.

இஸ்லாமிய எதிரப்பு வாதமென்பது தற்போது பிரான்சில் பெரும் முக்கியத்ததுவத்தைப் பெற்றுவிட்டதுடன், பொதுவாக வெளிநாட்டவர்களின் எண்ணிக்கை சகிக்கமுடியாத அளவிற்கு அதிகரித்துவிட்டது எனும் கருத்து மிகப்பெரும்பாலான பிரஞ்சு மக்களின் மனதில் விசாலித்து விட்டிருக்கும் இந்நிலையின்தான் “தீபன்” திரைப்படம் உருவாக்கப்பட்டது என்பதை மனதிருத்தியே இந்தப்பிரஞ்சுப் படத்தை அணுகுதல் வேண்டும்.

மேலும், பிரான்சில் அண்ணளவாக பத்து வீதமானவர்கள் இஸ்லாமிய மார்க்கத்தைப் பின்பற்றுபவர்கள். அவர்களில் மிகப்பெரும்பான்மையினர் சாத்வீகமாக வாழ்பவர்கள். அனதை;து ஐரோப்பியப் பெருநகரங்களிலும் போன்று பிரான்சின் பெருநகரங்களின் புறநகர்ப்பகுதிகளும் உழைக்கும் வர்க்கத்திற்காக ஒதுக்கப்பட்ட நவீன சேரிகளாகக் காணப்படுகின்றன. இங்கு வாழ்பவர்களின் மிகப்பெரும்பான்மையினர் வெளிநாட்டுக் குடிமக்கள். இப்புறநகர்கள் திட்டமிட்டமுறையில் அபிவிருத்தி செய்யப்படாத இடங்களாகவே காணப்படுகின்றன.

சாதாரண ஒரு பாடசாலையில் உள்ள வசதிகள் இப்பகுதிகளில் கல்விகற்கும் மாணவர்களுக்கு வழங்கப்படுவதில்லை. இப்பகுதிக்கட்டடங்கள் கூட பிரஞ்சுக்காரர்களால் முயற்கூடுகள் என்று அழைக்கப்படுகின்றன.

எல்லாவற்றையும் மீறி கல்வி கற்று உயர்பட்டங்களைப் பெற்றபோதும் அரபோ-இஸ்லாமியர்களுக்கு அவரவர் தகுதிக்கேற்ற வேலை எடுப்பது என்பது மிகமிகக் கடினமானது.

அண்ணனுக்கு நடக்கும் சிறுமைப்படுத்தல்களைப் பார்த்து தம்பி படிப்பில் அக்கறை கொள்வது சாத்தியமற்ற விடயமாகியது. இன்னும் இன்னும் பல்வேறு காரணங்களால், புறநகரங்கள் வன்முறையின் உறைவிடங்களாகவும், போதை வஸ்து வியாபார மையங்களாகவும் உருப்பெற்றன. இவ்விடயத்தை பொதுமைப்படுத்தி எல்லாப் புறநகரங்களும் இவ்வாறுதான்உள்ளன என்றும் கூறிவிடமுடியாது. ஐரேப்பா முழுவதிலுமே இவ்வாறான புறநகரங்கள் உள்ளன. (சுவிசைத் தவிர்க்கலாம்என நினைக்கிறேன்).

அடுத்து,ஒன்றரை நூற்றாண்டுக்களுக்கும் அதிகமான காலத்தைய காலணித்துவ ஒடுக்குமுறையுறவு வட ஆபிரிக்க அரபுலகிற்கும் பிரான்சுக்குமிடையில் உள்ளது. அல்ஜீரிய யுத்தத்தின் தளும்புகள் இன்னமும் ஆறாதிருக்கிறது. முதலாம், இரண்டாம் உலக யுத்தங்களின் போது ஏராளமான கறுப்பின மற்றும் அரபுப் போராளிகள் பிரான்சுக்காக, பிரஞ்சு மக்களின் விடுதலைக்காகப் போராடி மாண்டார்கள். அதற்குரிய உரிமையும் அந்தஸ்த்தும் தங்களுக்கு வழங்கப்படவில்லை என்ற சினமும் , வெறுப்பும் மேற்குறிப்பட்டவரகளின் வழித்தோன்றல்களின் மனத்திலேயூறியுள்ளன.

தன் பிரதேசத்தில் அடிமை முறைமை நீக்கப்பட்டபோது பிரஞ்சுக்காரன் தென்னிந்தியத் தமிழர்களைத்தான் தன் தீவுகளுக்குக் கூட்டிச்சென்று அடிமைகள் போல் வேலை செய்ய வைத்தான்.

அல்ஜீரியர்கள் மீது தாக்குதல் நடத்தும் பிரஞ்சுப் படைகள்
அல்ஜீரியர்கள் மீது தாக்குதல் நடத்தும் பிரஞ்சுப் படைகள்

ஓழுங்கான முறையில் மொழியறிவும், உரிமைசார்ந்த பிரக்ஞையும் கொண்ட அரபு மற்றும் ஆபிரிக்க இளைஞர்களை வேலையிலிருந்து நிறுத்தி பரிசின் உணவகங்கள் எல்லாம் தமிழர்களை வேலைக்கமர்த்தியபோது முன்யைவர்கள் தமிழர்கள் மீது வெறுப்புற்றார்கள் என்பதை எத்தனைபேர் அறிந்திருக்கிறீர்கள். வேலைச் சட்டங்களை அறியாது அடிமைகளாக வேலைசெய்வதற்கு எம்மவர்கள் வேறு வழியின்றி ஒத்துக்கொண்டபோது அவர்கள் பாதிக்கப்பட்டார்கள். தற்போது தமிழர்களுக்குப் பதிலாக பங்காளதேசிகள் வேலைகெடுக்கப்படுகிறார்கள் என்பது வேறொரு கதை.

ஒருபகுதி வெளிநாட்டவரை வைத்து இன்னொரு பதியினரைக் “காய்வெட்டுவதில்”பிரஞ்சுக் குட்டி முதலாளித்துவத்தினர் கைதேர்ந்தவர்கள்.

மேற்குறிப்பிட்ட அனைத்து விடயங்களையும் உள்வாங்கினால் மாத்திரம் அன்றி தீபன் படத்தின் அரசியல் நோக்கத்தை யாரும் விளங்கிக்கொள்ள முடியாதென்பது வெள்ளிடை மலையாகும்.

தீபன் திரைப்படத்துள்……..

ஓடியார்
ஓடியார்

“தீபன்” திரைக்கதையமைப்பு மற்றும் அதன் படத்தொகுப்பு அல்லது படத்தொடுப்பு ஓடியார் எத்தனை தூரம் தன் இலக்கைத் துல்லியமாக அடைந்துள்ளார் என்பதைக் காட்டுகிறது.

இலங்கையின் யுத்தமுடிவில் ஆரம்பமாகும் திரைக்கதையானது, ஆரம்பத்தில் தன் பயணத்தை வேகமாக ஆரம்பிக்கின்றது (திரைக்கதையை ஏற்கெனவே தெரிந்திருந்த படியால் விழிப்பு நிலையிலிருந்து படத்தைப் பார்க்கும் சந்தர்ப்பம் எனக்குக் கிடைத்தது). மிகக்குறுகிய நேரத்தில் கதை பிரான்சுக்கு வந்து சேர்ந்துவிட்டதை அவதானிக்கவும் முடிந்தது.

அதாவது, ஓடியார் சொல்ல வந்த விடயத்திற்கான சுருக்கமான முன்னுரையாகவே கதையின் இந்தப்பகுதி விரைந்து சென்றது. மூன்றாவது மண்டல நாடொன்றின் யுத்தத்தின் விளைவு ஐரோப்பாவை நோக்கி, குறிப்பாக, தீபனின் பிரான்சுக்குச் செல்லும் விருப்பை வெளிப்படுத்தி விரைகிறது.

சிலவருடங்களுக்கு முன், முக்கியமான அமைச்சர் ஒருவர் “உலகின் வறுமையனைத்தையும் பிரான்சுக்குள் ஏற்கமுடியாது” என்று கூறிய பிரபல்யமான கூற்று இன்னமும் அரசியல்வாதிகளினால் ஞாபகப்படுத்தப்படும் ஒரு கூற்றாக காணப்படுகிறது. இதில் பிரஞ்சு மொழியில் வறுமை (la misère) என அவர் சொல்லும் பல அர்த்தங்களைக் கொண்டது.

தீபன் படத்தின் இந்த முதற்தொடக்கம், பிரஞ்சுக்காரர்களுக்கு இந்த வாக்கியத்தை அல்லது அதையொத்த ஒரு உளவியல் படிமத்தை இன்றை அரசியல் சூழலில் கொடுத்திருக்கும் என நான் எண்ணுகிறேன். இதுவே ஓடியாரின் இலக்காக அமைந்தது எனவும் எண்ணுகிறேன்.

அடுத்து, அகதிகளை வரவேற்று, அவர்களைத் தன் சமூக, கலாச்சார மற்றும் பொருளாதாரக் கட்டமைப்பினுள் உள்வாங்கும் நடவடிக்கையில் பிரான்ஸ் அக்கறை கொள்வதில்லை என்பதையும் அதனால் ஏற்படக்கூடிய ஆபத்துக்களையும் ஓடியார் முன்வைக்கிறார்.

செயற்கைக் குடும்பம் (அதாவது யாரும் எந்த அடையாளத்துடனும், பொய்களுடனும் பிரான்சுக்குள் நுழையலாம் எனும் கருத்தை முன்னிறுத்தி) அரசியலமைப்பினால் வழங்கப்பட்டுள்ள அகதியுரிமையைப் பெற்று அவர்கள் வேலை பெற்றுக்கொண்டு செல்வதிலிருந்து திரைக்கதை தன் வேகத்தைக் குறைத்துக்கொள்கிறது.

செயற்கைக் குடும்பம் வேலைக்கமர்தப்பட்டு, அங்கு வசிப்பதற்குச் செல்லும் இடத்தின் பெயர்: “பசும் புல்வெளி”.

அதாவது ஓதுக்குப்புறமான, சட்டத்தாலும் நிர்வாகத்தாலும் கைவிடப்பட்ட, அந்நியர்களுக்காகக் கட்டப்பட்ட, வன்முறையும் போதைவஸ்தும் குடிகொண்டுள்ள இடத்திற்கு ஓடியார் இட்ட பெயர் “பசும் புல்வெளி”.

ஓடியார் இந்தப்படத்தை பிரஞ்சுக்காரர்களை இலக்கு வைத்துத்தான் இயக்கினார் என்ற விடயம் மிகவும் முக்கியமானது. கதைக்காக அவர் தெரிந்து கொண்ட “கடுகு சீரகம்” தான் தமிழர் பிரச்சனை.

எடுத்த எடுப்பிலேயே செயற்கைக் குடும்பம் “பசும் புல்வெளி” க்கு வரும்போதே காட்சிகள் அச்சமூட்டும் வகையிலாக அமைக்கப்பட்டுள்ளன. இக்குடும்பம், மொழியறியாது, விழிபிதுங்க, இளையாளின் மொழி பெயர்ப்புடன் “பசும் புல்வெளி” க்குள் நுழைகிறது.

“போரை வெறுத்த போராளியில் மீளெழுந்தது போர்க்குணம்” எனும் மகுடவாக்கியம் திரைப்படம் வெளியாகுவதற்கு முன்னரே விளம்பர யுக்தியாகப் பயன்படுத்தப்பட்டதால், படம் எப்படி முடியப்போகிறது என்பதை முன் கூட்டியே ஊகிக்கக் கூடியதாக இருந்தது படத்தின் ஒரு பலவீனமான அம்சமாகவே பார்க்கப்படவேண்டும்.

வாழ்க்கையின் ஒவ்வொரு படிநிலையிலும் வன்முறையின் பிரசன்னம் உள்ளதாக ஓடியாரினால் காட்டப்படும் “அந்நியர் சேரி” அச்சமூட்டுவதாக உள்ளது.

அங்கு வாழ்பவர்கள் அனைவரையும் போதைவஸ்து டீலர்களின் கட்டுப்பாட்டில்வாழ்பவர்கள் போலவும், ஆபிரிக்க, அரபு இளைஞர்கள் அனைவருமே கட்டற்ற வன்முறையாளர்கள் போலவும், அதுவே இயல்பானதும், அவர்கள் சார்பில் நியாயப்படுத்தக் கூடியதுமான ஒன்று என்பது போலவும் கதையும் காட்சிகளும் கட்டமைக்கப்பட்டுள்ளது.

பிரான்சில் அந்நியனாக “அந்நியர் சேரியில்” வாழ்ந்தவன் என்ற வகையில் ஒரு அதிர்ச்சியைக் கொடுக்கும் காட்சியாவே நான் இதைப்பார்க்கிறேன். இந்தக் காட்சிகளினால் பிரஞ்சுக்காரர்களுக்குக் கடத்தப்பட்டிருக்கும் செய்தி என்ன என்பதை இப்படத்தைப் பார்த்த சில பிரஞ்சுக்காரர்களுடன் உரையாடியபோது புரிந்து கொண்டேன். ஓடியார் தனது இலக்கில் வெற்றிகொண்டுள்ளார் என்பதை சந்தேகமறப்புரிந்து கொள்கிறேன்.

“அந்நியர் சேரியின்” பாடசாலையில் வகுப்பறைகள் பிரஞ்சுப் பிரசன்னமேயற்ற இடங்களாகக் காட்டப்படுகின்றன. பாடசாலையென்பதும் வன்முறையின் உற்பத்தி மையமாகக் காண்பிக்கப்படுகிறது.

தீபனின் செயற்கைக் குடும்பத்தில் காதலின் ஊற்றுக்கண் திறப்பதைக் காட்டும் காட்சிகள் செறிவற்றுக் காணப்படுவதுபோல் தோன்றினாலும், நடிகர்களின் நடிப்புத்திறமை அதை ஈடுசெய்கிறது என்று சொல்லலாம். ( இது பற்றி மூன்றாவது ஒரு பகுதியில் கூறுகிறேன்)

DHEEPAN_Stillயாழினியின் தணியாத லண்டன் கனவுக்கு மத்தியிலும், செயற்கைக் குடும்பத்துடன் ஒட்டமுடியாத ஒரு மனேநிiலியிலும், அவளுக்கு ஒரு வேலை வாய்ப்பு எட்டுகிறது. முன்கட்டடத்தில் உள்ள ஒரு முடக்குவாதம் கொண்ட, பேசுந்தன்மையிழந்த ஒரு வயோதிபரைப்பராமரித்தல் மற்றும் அவருக்கு சமைத்துப்போடல்.

அதையடுத்து, அந்த வயோதிபரின் சகோதரியின் மகனின் மீள்வருகை. பல மாதங்களாகச் சிறைவாசம் அனுபவித்து விட்டுவரும் ஓரு போதவஸ்து வியாபார குட்டித்தலைவனின் வருகை. “அந்நியர் சேரியின்” இளசுகளின் பட்டாசுக் கொண்டாட்டம். தீபனின் கையறு நிலை. கடமையுணர்வும், விருப்பும் இருந்தும் தன்வேலையைக் கூடச் சரியாகச் செய்ய முடியாது தவிக்கும் குழப்பநிலை. எங்கும் வன்முறையின் வியாபகம்.

யாழினிக்கும், தீபனுக்குமான காதலின் “நிறைவேற்றம்” ஆலய வழிபாட்டுக்கு அழைத்துச் செல்கிறது. ஆலயம், வழிபாடு பூஜை என எல்லாம் முடிந்தபின் காலாச்சார ஆடைகளுடன் ஒரு பூங்காவின் ஏரிக்கரையில் “தமிழர் கூட்டம்” பிக்-நிக் செய்கிறது. ஓடியார் பிரஞ்சுக்காரர்களுக்கு அனுப்பிய இன்னொரு முக்கிய செய்தி.

பிரஞ்சு தேசம் அச்சமுற்றிருக்கும் ஒரு நிலையில் அந்நியர் தங்கள் அடையாங்களைக் காவிக்கொண்டு தங்களை ஆக்கிரமிக்கிறார்கள் என்ற கோசம் ஓங்கியுள்ள நிலையில் அதற்குத் தூபமிட்டுள்ளார் ஓடியார். இந்த நாட்டிலே என்ன நடக்கிறது என்பதை கிஞ்சுத்தும் அறியாவர் இதைக்காணுதல் கடினம். ஆம் பிரான்சின் சமூகக்குழுமங்கள் தம்மைச் சுற்றிக் கலாச்சார வேலிபோட்டு தம்மை பிரஞ்சு தேசத்துடன் கலந்துகொள்ளாது வாழ்கிறார்கள். ( “தமிழர்கள் பிரஞ்சுக்காரர்களை மார்ச் கிரக வாசிகள்போல் பார்க்கிறார்கள்” – வானொலிப் பேட்டியில் ஓடியார் கூறியது.)

fnபிரஞ்சு தேசம் “சமுகக் குழுமங்களாகிக்” கொண்டிருக்கிறது. தேசத்தின் கலாச்சார, அடையாள ஒருமைப்பாடு அழிக்கப்பட்டுக்கொண்டிருக்கிறது என்ற பாசிசக் கட்சியான தேசிய முன்ணியின் சுலோகங்களுக்கான நிறைவேற்றுச் சாட்சியங்களாக ஓடியார் இக்காட்சியை முன்வைத்துள்ளார் என்று நான் எண்ணுகிறேன். தேசிய முண்ணணி ஆதரவாளர்கள் மத்தியில் இப்படத்திற்கு உள்ள ஆதரவை வேறு விதமாகப் புரிந்து கொள்ளமுடியாதுள்ளது.

முப்பதாம் ஆண்டுகளில் ஜேர்மனியில் நிலவிய அரசியல் காலநிலை தற்போது பிரான்சில் காணப்படுகிறது என்று முற்போக்கு வாதப் பிரஞ்சுக்காரர்கள் கூறுவதை இப்போ நான் நினைந்து கொள்கிறேன்.

மான் வேட்டையாட நாம் ஓடுகையில் சிங்கம் எங்களைக் கலைப்பதைக் காணாமல் இருப்பது எத்தனை ஆபத்தானது.

யூதர்களை இலக்குவைத்த “மூன்றாவது ராச்சியம்” யார்யாரையெல்லாம் மாய்த்தது என்பதை நாம் எல்லோரும் அறிவோம். “அடை-கறுவல்” என்று நாம் கூறும் மக்களை இலக்கு வைக்கும் பிரஞ்சுப் பாசிசம் எங்களை உய்விக்கும் என நினைப்பவர்களே கண்ணைத் திறவுகங்கள். பெருநிதியங்கள் பிரஞ்சு மக்களின் பொருளாதார நெருக்கடிக்கு எதனைப் பலியிட எண்ணுகிறார்கள் என்பதன் அறிகுறிகள் உங்களுக்குத் தென்படவேயில்லையா ? 2017 ம் ஆண்டு வரையும் பொறுத்திருங்கள்.

ஒரு திரைப்படத்தின் காட்சிகள் ஒவ்வொன்றும் நுணுக்கமாக ஆராயப்பட்டு, ஒவ்வொரு படிமங்களும் குறித்த ஒழுங்கில் தொடுக்கப்பட்டு, பலதடவைகள் பார்வையிடப்பட்டபின்னர்தான் காட்சிக்கு வருகின்றன. இது யாருக்கும் தெரிந்த விடயம்.

ஒரு காட்சியை எடுக்கிறேன்…

எழுத்தாளரும் கவிஞரும் மொழிபெயர்பாளருமான வாசுதேவன்
எழுத்தாளரும் கவிஞரும் மொழிபெயர்பாளருமான வாசுதேவன்

யாழினிக்கும், இளையாளுக்குமிடையிலான முரண்பாட்டையடுத்து, அவர்களுக்கிடையில் ஒரு பாச உரையாடல் நடைபெறுகிறது. அந்த உரையாடலில் இளையாள் அணிந்திருக்கும் ரி-சேட்டை மறக்காமல் உற்று நோக்குங்கள். அதில் “NEW WORLD ORDER” எனும் வாக்கியம் பொறிக்கப்பட்டிருக்கிறது. இது எதேச்சையானது என என்னை நம்பவைக்க யாராலும் முடியாது. இதுவே இப்படத்தின் முத்திரையும் வெற்றியும்.

நான் பிரான்சில் வாழும் தமிழனல்ல. நான் இங்கு வாழும் ஒரு அந்நியன்.

(தொடரும்)