21.03.2009.
பதவிக்காக தமிழினப் படுகொலைக்கு துணைபோன முதல்வர் கருணாநிதியை தமிழக மக்கள் மன்னிக்க மாட்டார்கள் என அ.தி.மு.க. பொதுச் செயலாளர் ஜெயலலிதா கூறியுள்ளார்.
இது குறித்து அவர் செவ்வாய்க்கிழமை வெளியிட்ட அறிக்கையில்
“மாநில நிர்வாகம் எதுவும் பின்னுக்குத் தள்ளப்படவில்லை’ என கருணாநிதி கூறியுள்ளார். கடுமையான மின்வெட்டு, விஷம் போல் ஏறும் விலைவாசி, வெறிச்சோடிக் கிடக்கும் தொழிற்பேட்டைகள், லட்சக்கணக்கான தொழிலாளர்கள் வேலையிழப்பு, வேலையில்லாத் திண்டாட்டம், சட்டம் – ஒழுங்கு சீரழிவு என ஏராளமானவற்றை மாநில நிர்வாகம் பின்னுக்குத் தள்ளப்பட்டிருப்பதற்கு சான்றாகக் கூறலாம்.
“ஆம்புலன்ஸில் வந்து உயர் நீதிமன்றத் தலைமை நீதிபதியை சந்திக்கத் தயாராக இருக்கிறேன்’ என்று மருத்துவமனையிலிருந்து கடிதம் எழுதியதாக கருணாநிதி கூறுகிறார். ஆனால் வழக்கறிஞர்களையும், நீதிபதிகளையும், பொதுமக்களையும் கண்மூடித்தனமாகத் தாக்க காவல் துறையினருக்கு யார் உத்தரவிட்டது என்பது குறித்து இதுநாள் வரையிலும் பதில் அளிக்கவில்லை.
இதன் மூலம் குழந்தையையும் கிள்ளிவிட்டு, தொட்டிலையும் ஆட்டிவிடும் கருணாநிதியின் கபட நாடகம் வெட்ட வெளிச்சமாகிவிட்டது. நான் ஏதோ வசைமாறி பொழிந்து அறிக்கைகள் விட்டதாக கருணாநிதி ஒரு பட்டியலிட்டுள்ளார். அந்த பட்டியலில் உள்ள வார்த்தைகளைப் பார்க்கும்போது அவை வசைமாறி பொழியும் அறிக்கைகள் அல்ல. உண்மை நிலையை நாட்டு மக்களுக்கு எடுத்துரைக்கும் அறிக்கைகள் என்பது விளங்கும். 4.10.2008 அன்று நான் வெளியிட்ட அறிக்கையில் “கருணாநிதி பேச்சு, மூச்சற்றுப் போவார், வாய் மூடிக் கிடப்பார்’ எனக் குறிப்பிட்டதாக கருணாநிதி கூறியுள்ளார். தமிழர்களின் நலன், பாதுகாப்பு, நல்வாழ்வு என்பன பற்றிய பேச்சு எழும்போதெல்லாம் கருணாநிதி பேச்சு, மூச்சற்றுப் போவார். வாய்மூடிக் கிடப்பார் என்றுதான் நான் குறிப்பிட்டிருந்தேன்.
அண்டை மாநிலங்களுடனான நதிநீர் பிரச்னை, இலங்கைத் தமிழர்கள் பிரச்னை, கச்சத் தீவு பிரச்னை என்றால் வாய்மூடிக் கிடப்பார் என்பதுதான் இதற்குப் பொருள். இதுதான் உண்மை நிலை. அதில் தவறு ஒன்றும் இல்லை.
காவிரி பிரச்னை தொடர்பாக 19.2.2007 அன்று அனைத்துக் கட்சிக் கூட்டத்தை கருணாநிதி கூட்டினார். ஆனால் இன்றுவரை அந்த பிரச்னையில் எந்த முன்னேற்றமும் ஏற்படவில்லை. காவிரி நடுவர் மன்றத்தின் இறுதித் தீர்ப்பை மத்திய அரசிதழில் வெளியிடக் கூட மத்திய அரசு முன்வரவில்லை. இது குறித்து மத்திய அரசிடம் கருணாநிதி வற்புறுத்தியது இல்லை. அதனால்தான் இலங்கைத் தமிழர் பிரச்னை குறித்து அனைத்துக் கட்சிக் கூட்டத்தை கூட்டும் தார்மீக உரிமை கருணாநிதிக்கு இல்லை என தெரிவித்திருந்தேன்.
10.10.2008 அன்று நான் வெளியிட்ட அறிக்கையில் தமிழர்கள் மீது கருணாநிதிக்கு உண்மையிலேயே அக்கறை இருக்குமானால், இலங்கை ராணுவத்துக்கு பயிற்சி அளிக்கும் மத்திய அரசுக்கு, தி.மு.க. அளித்து வரும் ஆதரவை உடனடியாக திரும்ப பெற வேண்டும். அப்படிச் செய்தால்தான் மத்திய அரசு மனிதாபிமான அடிப்படையில் இலங்கைத் தமிழர்களுக்கு ஆதரவாக செயல்பட முன்வரும் என தெரிவித்திருந்தேன். என்னுடைய கோரிக்கைகள் ஏற்கப்பட்டிருக்குமானால், இந்த நேரத்தில் இலங்கையில் நிச்சயமாக போர் நிறுத்தம் ஏற்பட்டிருக்கும். தமிழினப் படுகொலை தடுத்து நிறுத்தப்பட்டிருக்கும்.
அற்ப பதவி சுகத்திற்காக, தமிழினப் படுகொலைக்கு துணைபோன கருணாநிதியை தமிழக மக்கள் மன்னிக்க மாட்டார்கள் என்பதை கருணாநிதிக்கு இந்தத் தருணத்தில் சுட்டிக் காட்ட விரும்புகிறேன்.
மக்கள் பிரச்னைகளில் கவனம்: அ.தி.மு.க. பொதுச் செயலாளர் என்ற முறையிலும், தமிழ்நாடு சட்டப்பேரவையின் எதிர்க்கட்சித் தலைவர் என்ற முறையிலும் ஜனநாயக ரீதியில், உண்மை நிலையை அறிக்கைகள் வாயிலாக மக்களுக்கு தெரிவிக்க வேண்டியது எனது கடமை. நான் ஆற்றும் ஜனநாயகக் கடமைகளையெல்லாம் வசைமாறி பொழியும் அறிக்கைகள் என கருணாநிதி குறிப்பிடுவது மிகுந்த வருத்தத்தை அளிக்கிறது. எனவே, மரபுக்கு ஒவ்வாத அறிக்கைகள் வெளியிடுவதையும், என்னைக் குறை கூறுவதையும் கருணாநிதி நிறுத்திக் கொள்ள வேண்டும். எனது அறிக்கைகளில் உள்ள மக்கள் பிரச்னைகளின் உண்மை நிலைகளைப் புரிந்து கொண்டு, அவற்றைத் தீர்ப்பதில் கவனம் செலுத்த வேண்டும் என தனது அறிக்கையில் ஜெயலலிதா கூறியுள்ளதாக இந்திய இணையத்தளம் செய்தி வெளியிட்டுள்ளது
ஜெயலலிதாவின் தற்போதைய மனமாற்றம் எதிர்வரவுள்ள இந்தியதேர்தலையிட்டான பல்டி என்பதை முழு உலகமும் அறியும். ஆனாலும் அவரது பேச்சுக்கள் மு.கருணாநிதியை
தன் செயலுக்காக பச்சாதாபங்கொள்ள வைக்கும் என்பதுவும் உண்மை.
இன்றைய அவரது உணர்ச்சிமிகு(?) பேச்சுக்களை வைத்துக்கொண்டு ஒரு வேளை நாளை அவர் அமைக்கும் கூட்டணி வெற்றிபெற்று அவரது செல்வாக்குபெற்ற கட்சியின்/ அல்லது
அவரது ஆட்சியேதான் மத்தியில் அமைந்தாலும் ஈழத்தமிழருக்கான நிலைப்பாட்டில்தான்
அவர் இருப்பார் என்றெல்லாம் நாம் நம்பிக்கைகொள்ள முடியாது.