“நேபாளத்தில் புதிய அரசொன்றை அமைப்பதற்கான சதித்திட்டத்திற்காக கேவலமான செயலில் இந்தியா”: பிரசண்டா

நேபாளத்தில் புதிய அரசொன்றை அமைப்பதற்கான சதித்திட்டத்திற்காக நேபாளத்தின் பாராளுமன்ற உறுப்பினர்களை வாங்கியும் விற்றும் மிகக் கேவலமான செயலில் இந்தியா ஈடுபட்டுள்ளதாக பதவி விலகியுள்ள முன்னாள் பிரதமர் பிரசண்டா கடுமையாகக் குற்றஞ்சாட்டியுள்ளார்.
நேபாள இராணுவத் தளபதியை பதவிநீக்கம் செய்வது தொடர்பாக ஜனாதிபதி ராம் பரன் யாதவ்விற்கும் பிரதமர் பிரசண்டாவுக்கும் இடையிலிருந்து வந்த முரண்பாட்டைத் தொடர்ந்து பிரசண்டா பிரதமர் பதவியிலிருந்து விலகினார்.

இராணுவத்தளபதி ஜெனரல் கடாவலை பதவி நீக்கியதாக பிரதமர் பிரசண்டா அறிவித்திருந்த நிலையில் கடாவலுக்கு ஜனாதிபதியால் மீண்டும் பதவி வழங்கப்பட்டதைத் தொடர்ந்தே பிரசண்டா பதவி விலகியிருந்தார்.

இந்நிலையில், புதிய அரசொன்றை அமைப்பதற்கு ஜனாதிபதி ராம் பரன் 5 நாள் காலக்கெடுவையும் விதித்திருந்தார்.

இதனைத் தொடர்ந்து நேபாளத்தில் ஏற்பட்டுள்ள அரசியல் குழப்பத்திற்கு இந்தியாவை சாடியுள்ள பிரசண்டா மேலும் தெரிவிக்கையில்;

நேபாள எம்.பி.க்களை வாங்கியும் விற்றும் நேபாளத்தில் குழப்பத்தை ஏற்படுத்தும் முயற்சியில் அரசியல் கட்சிகள் ஈடுபட்டுள்ளன.

மக்களால் நிராகரிக்கப்பட்டுள்ள அரசியல் கட்சிகளும் தலைமைத்துவம் வகிப்பதற்கு பொருத்தமற்ற அரசியல் கட்சிகளுமே இவ்வாறான கேவலமான செயற்பாட்டில் ஈடுபட்டுள்ளன.

இவ்வாறான கட்சிகள் வெளிநாடுகளின் தந்திரோபாயமான ஆலோசனைகளின்படியே செயற்பட்டு வருகின்றன.

இராணுவத் தளபதியை பதவிநீக்கம் செய்த தினத்தன்று காலை என்னை சந்தித்த அரசியல் கட்சி ஒன்றின் தலைவர் எம்.பி.க்களை வாங்குவதற்கு பலகோடிகளை செலவிட வேண்டியதாக உள்ளதாக தெரிவித்தார்.

அத்துடன், இவ்வாறான சூழ்நிலை அரசியலை அபாயகரமான நிலைக்குள் தள்ளியிருப்பதாகவும் அந்த எம்.பி. என்னிடம் கூறியிருந்தார்.

நேபாள அரசியலில் வெளிநாடுகளின் தலையீட்டுக்கு எதிர்ப்புத் தெரிவித்தும் இராணுவத்தினருக்கு எதிரான சிவில் யுத்தத்திற்குமான ஏவுகணையாகவே தனது இராஜிநாமா அமைந்துள்ளதெனத் தெரிவித்தார்.