வாக்களிப்பதில் மக்கள் அதிகளவு ஆர்வத்தை வெளிப்படுத்தவில்லை!

7 ஆவது பாராளுமன்றத்திற்கு நேற்று முன்தினம் வியாழக்கிழமை இடம்பெற்ற தேர்தலின் பெறுபேறுகள் முழுமையாக அறிவிக்கப்படாத நிலையில் ஆளும் ஐக்கிய மக்கள் சுதந்திர முன்னணி அறுதிப் பெரும்பான்மை பலத்தைப் பெற்று அமோக வெற்றியீட்டியிருப்பதுடன், அக்கட்சி ஏற்கனவே தெரிவித்திருந்த 2/3 பெரும்பான்மைப் பலத்தைப் பெற்றுக்கொள்வதற்கு இன்னமும் குறைந்த தொகை ஆசனங்களே தேவையாக உள்ளது.

நேற்று வெள்ளிக்கிழமை மாலை வரை உத்தியோகபூர்வமாக அறிவிக்கப்பட்ட 180 ஆசனங்களில் ஐக்கிய மக்கள் சுதந்திர முன்னணி 120 ஆசனங்களைப் பெற்றிருந்தது. அரசாங்கத்தை அமைப்பதற்கு 112 ஆசனங்கள் போதுமானதாகும். 225 எம்.பி.க்களைக் கொண்ட பாராளுமன்றத்தில் அரசியலமைப்புத் திருத்தத்தை மேற்கொள்வதாயின் 2/3 பெரும்பான்மைப் பலம் தேவைப்படுகின்றது. அதற்கு 150 ஆசனங்கள் தேவை. ஆனால், ஆளும் கட்சி அந்த இலக்கை எட்டாவிடினும் சிறிய தொகை ஆசனங்களை எதிர்த்தரப்பிலிருந்து திரட்டிக் கொள்வதற்கான வாய்ப்புகள் ஆளும் கட்சிக்குக் காணப்படுகின்றன.

தமிழ் பேசும் மக்களை பெரும்பான்மையாகக் கொண்ட வடக்கு, கிழக்கு மாகாணங்களில் தமிழ்த் தேசியக் கூட்டமைப்பே 13 ஆசனங்களைப் பெற்று தனிப்பெருங்கட்சியாக மீண்டும் தோற்றம் பெற்றுள்ளது. தென்னிலங்கையில் ஆளும் ஐக்கிய மக்கள் சுதந்திரக் கூட்டமைப்பு பிரதான எதிர்க்கட்சியான ஐக்கிய தேசியக் கட்சி தலைமையினால் ஐ.தே.மு.விலும் பார்க்க பாரிய இடைவெளி வித்தியாசத்தில் வெற்றிபெற்றுள்ளது.

கொழும்பில் ஐ.ம.சு.மு. 10 ஆசனங்களையும் ஐ.தே.க. 7 ஆசனங்களையும் ஜெனரல் சரத் பொன்சேகா தலைமையிலான ஜனநாயக தேசியக் கூட்டணி 2 ஆசனங்களையும் பெற்றுள்ளன.

இதேவேளை, ஜனாதிபதித் தேர்தலிலும் பாராளுமன்றத் தேர்தலிலும் ஆளும் ஐக்கிய மக்கள் சுதந்திர முன்னணி பாரிய வெற்றியீட்டியிருப்பதானது, இலங்கையின் இன நெருக்கடி, அரசியல் தீர்வு காண்பதற்கான கருத்தொருமைப்பாட்டை சம்பந்தப்பட்ட சகல தரப்பினர் மத்தியிலிருந்தும் ஏற்படுத்திக் கொள்வதற்கு ஜனாதிபதிக்குக் கிடைத்திருக்கும் வாய்ப்பென்று அரசியல் விமர்சகர்களும் இராஜதந்திரிகளும் கருத்துகளைத் தெரிவித்திருக்கின்றனர்.

தேர்தல் பிரசாரத்தின் போது அரசியலமைப்பில் தேவையான மாற்றத்தை ஏற்படுத்துவதற்கு பலம் வாய்ந்த பாராளுமன்றம் ஒன்று அவசியமென ஜனாதிபதி மகிந்த ராஜபக்ஷ திரும்பத் திரும்ப கூறிவந்துள்ளார். சிறுபான்மையினர் குறிப்பாக தமிழ் மக்களின் நியாய பூர்வமான கவலைகளுக்கு பரிகாரம் காண்பதற்கான அரசியல் தீர்வை காண்பதற்கு அரசியல் அமைப்பு ரீதியான மாற்றம் தேவைப்படுகின்றது.

வடக்கு, கிழக்கில் தமிழ்த் தேசியக் கூட்டமைப்பு அதிகளவு ஆசனங்களைப் பெற்றிருக்கும் நிலையில் அரசியல் தீர்வை அமுல்படுத்துவதற்குத் தேவையான அரசியலமைப்பு மாற்றத்தை மேற்கொள்வதற்கு வேண்டிய ஆசனங்களின் எண்ணிக்கையை தமிழ்க் கட்சிகளிடமிருந்தும் எதிரணியிடமிருந்தும் ஜனாதிபதி திரட்டிக் கொள்வதற்கான வாய்ப்பு இப்போது ஏற்பட்டிருக்கிறது.

தேர்தல் முடிவுகள் ஜே.வி.பி.யின் வாக்கு வங்கி வீழ்ச்சி கண்டிருப்பதை வெளிப்படுத்துகின்றது. பிரதான எதிர்க்கட்சியான ஐ.தே.க.வின் வாக்குகள் வீழ்ச்சிகண்ட தன்மையையும் இப்பெறுபேறுகள் எடுத்துக் காட்டுகின்றன.

இது இவ்வாறிருக்க அரசியலமைப்பின் பிரகாரம் ஜனாதிபதி இரு தடவையே பதவி வகிக்க முடியும் ஆனால், இந்த இருவருட பதவிக் கால எல்லையை மாற்றியமைப்பதற்கு சில சமயம் ஜனாதிபதி எதிர்பார்க்கக் கூடும். அதாவது, 2/3 பெரும்பான்மை பலத்துடன், அதனை மேற்கொள்ள கூடுமென தேசிய சமாதானப் பேரவையான தலைவர் ஜெகான் பெரேரா “வொய்ஸ் ஒப் அமெரிக்கா வுக்கு தெரிவித்திருக்கிறார்.

பாராளுமன்றத்தில் அதிகளவுப் பெரும்பான்மைப் பலத்தைப் பெற்றுக் கொள்வதானது ராஜபக்ஷ விரும்பிய எதனையும் செய்யக் கூடியதற்கு இடமளிப்பதாக அமையுமென்று மாற்றுக் கொள்கைகளுக்கான நிலையத்தின் தலைவர் கலாநிதி பாக்கியசோதி சரவணமுத்து கூறியுள்ளார். “இதுவே கவலையளிக்கும் விடயமாகும். நாட்டின் ஜனநாயகத்திற்குத் தாக்கத்தை ஏற்படுத்துவதாக அது அமையக் கூடும்%27 எனவும் அவர் கூறியுள்ளார்.

நன்றி! தினக்குரல்