மோதல்களுக்குத் தனிச் சிங்களச் சட்டமே காரணம் : சந்திரிக்கா

சனல் 4 தொலைக்காட்சி ஒளிபரப்பிய இலங்கையின் கொலைக்களங்கள் எனும் ஆவணப்படத்தை பார்த்த எனது மகன் தன்னை ஒரு இலங்கையர் எனவும், பௌத்தர் எனவும் கூற வெட்கப்படுகிறேன் எனத் தெரிவித்ததாக முன்னாள் ஜனாதிபதி சந்திரிக்கா பண்டாரநாயக்க குமாரதுங்க தெரிவித்தார். இலங்கை மன்றக் கல்லூரியில் நேற்று நடைபெற்ற முன்னாள் நீதியரசர் கே.பாலகிட்ணர் நினைவுச் சொற்பொழிவின் போதே அவர் இவ்வாறு தெரிவித்தார்.

“28 வயதான எனது மகன் பிரித்தானிய தொலைக்காட்சியில் ஆவணப்படத்தை பார்த்த பின்னர் தான் ஓர் இலங்கையர் எனவும், பௌத்தர் எனவும் கூறுவதற்கு வெட்கப்படுவதாக எனக்கு தொலைபேசி மூலம் தெரிவித்த காலை நேரத்தை எனது வாழ்நாள் முழுதும் மறக்கமாட்டேன்” என சந்திரிக்கா பண்டாரநாயக்க தெரிவித்தார்.

எனது மகளும் இதேபோன்ற கருத்தை தெரிவித்தார். எமது நாட்டவர்கள் இத்தகைய பயங்கர நடவடிக்கையில் ஈடுபடுவார்கள் என்பது குறித்து அவர் அதிர்ச்சியையும் அச்சத்தையும் வெளிப்படுத்தினார்.

ஒரு தேசம் என்ற வகையில் இலங்கையர்கள் தோல்வியடைந்துவிட்டோம் என்பதை ஏற்றுக்கொள்ளும் தன்னடக்கத்தை நாம் கொண்டிருப்போம். எமது தவறுகளை ஒப்புக்கொள்வதற்கான நேர்மையையும் திருத்தங்களை செய்வதற்கான பெருந்தன்மையையும் நாம் கொண்டிருப்போம்.

நிரூபிக்கப்பட்ட உண்மைகளையும் நேர்மையான விமர்சனங்களையும் தொடர்ச்சியாக நிராகரிப்பது எவரினதும் பிரச்சினையை தீர்க்காது என முன்னாள் ஜனாதிபதி சந்திரிக்கா மேலும் தெரிவித்தார்.

இந்த நாட்டின் பயங்கர வன்முறை மோதல்களுக்கு 1956 ஆம் ஆண்டின் தனிச்சிங்கள சட்டமே காரணம் என அவர் கூறினார்.