பிரித்தானியாவின் தலைநகர் லண்டனில் குறித்த இரண்டு நிலக்கீழ் ரயில் நிலையங்களுக்கு இடையே Action for Rail (AfR) என்ற அமைப்பு நடத்திய ஆய்வில் பிரித்தானியாவில் வசிக்கும் சராசரி ஊதியத்தைக் கொண்ட உழைக்கும் மக்கள் தமது வருமானத்தில் 14 வீதத்தை நாளாந்த ரயில் பயணங்களில் செலவிடுவதாகக் கண்டறிந்துள்ளனர். இதே வகையான ஆய்வு ஜேர்மனி, பிரான்ஸ், ஸ்பெயின் இத்தாலி போன்ற நாடுகளில் மேற்கொண்ட போது சராசரி வருமானத்தில் முறையே 4.3, 3.8, 3.3, 1.3 நாளந்தப் பயணத்திற்குச் செலவிடுவதாகத் தெரியவந்துள்ளது.
பிரித்தானிய மக்களின் வாழ்க்கைத் தரம் அவர்களை அறியாமலேயே ‘வறிய’ நாடுகளின் நிலையை நோக்கி நகர்த்தப்பட்டுக்கொண்டிருக்கிறது.
பிரித்தானியாவிற்கு உயர்கல்வி கற்கும் கனவோடு செல்லும் இலங்கை இந்திய மாணவர்கள் தமது பணத்தின் பெரும் பகுதியை பிரையாணத்திலேயே செலவிடுகின்றனர். இவர்களில் பெரும்பாலனவர்களுக்கு வேலைசெய்வதற்கு அனுமதி வழங்கப்படுவதில்லை. வேலை பெற்றுக்கொண்டாலும் மணித்தியாலத்திற்கான அடிப்படை ஊதியத்தின் அரைவாசி கூட வழங்கப்படுவதில்லை.
தாம் பிரித்தானியாவில் மகிழ்ச்சியாக வாழ்வதாக தமது நாடுகளில் வாழ்பவர்களுக்குக் கூறுவதைச் சமூக அங்கீகாரமாக எண்ணும் இவர்கள் தம்மைச் சுற்றி இரும்புத் திரை ஒன்றை அமைத்துக்கொண்டு அதற்குள் தமது வாழ்வின் அவலத்தால் துயரடைகிறார்கள்.
புலம் பெயர் நாடுகளிலிருந்து இலங்கையில் தமிழீழம் பிடித்துத் தருவதாக அரசியல் பிழைப்பு நடத்தும் பலர், கல்வி கற்க வரும் தமிழ் மாணவர்களின் அவலத்தைக் கண்டு கொள்வதில்லை. புதிதாக பிரித்தானியா செல்லும் மாணவர்கள் அனைத்து வழிகளிலும் சுரண்டப்படுகிறார்கள். தமது அவலங்களை முறையிடுவதற்குக் கூட அவர்களுக்கு எந்த வசதிகளும் கிடைப்பதில்லை.
