பகிரங்க கடிதம் –  புதிய பண்பாட்டுத்தளம் எதற்கு ?:  அசோக் யோகன்

//இக்குழு தமது எஜமானர்களுக்காக இரண்டு பிரதான நோக்கங்களை நிறைவேற்றிக்கொள்கிறது. முதலில், சாதிய மற்றும் பிரதேச முரண்பாடுகளைக் கூர்மைப்படுத்தி பேரினவாதிகளின் பிரித்தாளும் நோக்கத்திற்குத் துணை செல்கிறது. இரண்டாவதாக புலிகளின் அடிப்படைவாதக் கருத்துக்களுக்கு எதிரான முற்போக்கு ஜனநாய கோட்பாடுகள் நோக்கிய அணிதிரள்தல் நிகழாமல் இரும்புத் திரை ஒன்றை ஏற்படுத்துகிறது.//
சரியான அவதானிப்பு இது.அசோக் சொல்லும் கருத்துக்கள் மிகவும் கவனிக்கத் தக்கது.

கிட்டத்தட்ட இலங்கை தலித் மேம்பாட்டு முன்னணியினரை சிறு பிள்ளைகளாகவும்,அரசியலில்”வஞ்சகம்”அற்றுச் செயற்படுவதுமாகக் காட்டிவிடும் அரசியலொன்றும் நமக்குள் உண்டு! -இது இவர்களைவிட ஆப்பத்தானதென்பேன்.இங்கு அசோக் மிகநேர்மையாக இந்தக் கும்பலது அரசியல் சாய்வைக் கணித்துச் சொல்கிறார்.

இலங்கை தலித் மேம்பாட்டு முன்னணித் தலைவர் தேவதாசன் மற்றும் கிழக்கு மாகாணசபைப் பேச்சாளர் ஞானம் போன்றோரது அரசியல் மற்றும் அதுசார்ந்த நகர்வுகள் குறித்தும் இத்தகைய கருத்தோடு உலா வரும் அரசியலுரையாடலுக்கு எதிராக அசோக் முன் வைக்கும் கருத்துக்களை நாம் மிகக் கவனமாகக் கவனிக்க வேண்டும்.

கடந்த பல தசாப்தாமாகச் சிங்களப் பேரினவாதவொடுக்குமுறைக்குட்படும் இலங்கைச் சிறுபான்மையினங்களது அரசியல் பிரச்சனையுள் மிக நேர்த்தியாகக் குழிப்பறிப்புகளைச் செய்யும் அரசியற் தந்திரத்தை இவர்கள் செவ்வனவே செய்து வந்திருக்கின்றனர்.தேவதாசன், ஞானம் போன்றவர்களும்,நிர்மலா -இராகவன் , கீரன் குழுக்களுமாக இலங்கை அரசைச் சார்ந்து மக்களை அண்மித்தபோதெல்லாம் இலங்கைப் பாசிச மகிந்தா அரசை சனநாயக அரசாகவே பேசியும் -எழுதியும் வந்தனர்.
இவர்கள்தாம் முள்ளிவாய்க்கால் அழிவுக்குப் பின் சில மாதங்களில் (டிசெம்பர் 2009 இல்)யாழ்ப்பாணஞ் சென்று மகிந்தாவுக்கு நன்றியும் ;இலங்கையில் சமாதானம் -சனநாயகம் மலர்ந்துவிட்டதென்றும் , “தமிழர்கள் தமிழ் தேசியவாதத்தையும் ; தமிழர்கள் எனும் உணர்வையும் “விட்டொழித்து, “நாம் அனைவரும் இலங்கையர்கள் “என்றுணர்ந்து ,இலங்கையை முன்னேற்ற வேண்டுமென்றனர்.

கிழக்கு மாகாணத்தைப் பிளந்தெடுத்து , அதைச் சிங்கள -இந்திய அரசுகளுக்குடந்தையாக மாற்றும் தந்திரத்துள் இவர்கள் முன்வைத்த “யாழ் மேலாதிக்கம்-மையவாதம்;யாழ்ப்பாணியம் -வேளாளியம் ” போன்ற அரசியற் கருத்தாக்களின் பின்னே நிகழ்த்தப்பட்ட பிளவுவாத அரசியலின் வினையென்ன?

இவர்கள் எங்ஙனம் தமிழ்பேசும் மக்களது சுயநிர்ணயத்தை மறுத்து மகிந்தாவின் தலைமைக்காக மக்களைப் பிளந்தார்களோ அதேயளவு மூர்கத்தோடுதாம் தமிழ்பேசும் மக்களைப் பிரதேச -சாதிய ரீதியாகப் பிளந்து இந்திய -இலங்கையின் அரசியற் சூழ்ச்சிக்கேற்பக் கருத்தாடினார்கள்.

இவர்கள் எடுத்த முடிவும் -அரசியற்றெரிவும் தமிழ் பேசும் மக்களது சுயநிர்ணயக் கோரிக்கையையே சிதைத்துச் சின்னா பின்னமாக்கியது.கருத்தியற்றளத்திலும் -அரசியல் கட்சி -அமைப்பு நகர்விலும் இவர்கள் மகிந்தா அரசினது அனைத்துப் பரிணாமங்களையும் ஆதரித்துப் பிரச்சாம் செய்து, தமது அரசியலை நகர்த்துபவர்கள்.ஆனால் ,இனிவரும் ஒரு அரசியல் மாற்றத்துக்காக இவர்களிற் பலரோ தற்போது மேற்குலக லொபிகளாக மாறிவிட்டுள்ளனர்.இது யு.என்.பி. இரணிலின் பின் நகர்த்தப்படும் இலங்கையின் ஆட்சி மாற்றத்தைக் குறித்து தற்போது இயங்கத் தொடங்குகிறது!

இத்தகைய குழுக்களின் ஒரு பிரிவினரோ இப்பவும் “இந்தியாவின் தயவில் இலங்கையிலொரு தீர்வு சாத்தியமெனும்” தேவரமானது எப்பவும் போலவே இந்தியத் திருவிளையாட்டே.இது, கைவிலகிப் போகும் இந்தியப் பிராந்திய நலன்களின் அதீத தேய்வில் இந்தியா கவலையுறும் ஒரு நிகழ்ச்சி நிரலாக இப்போதிருப்பதற்கானவொரு முன்னெடுப்பாக நாம் உணரலாம்.இதற்காகக் கிழக்கு மாகாணம் பிரித்தெடுக்கப்பட்டு அங்கே செயற்கையான முரண்பாடுகளை உருவாக்கித் தமிழ் பேசும் மக்களின் சுயநிர்ணயவுரிமை என்பதையே கேலிக்குரிய கோசமாக உணர வைக்கப்படுகிறது.இத்தகைய உணர்வு,கிழக்கைத் தனித்த மக்கட்டொகுதியுடைய மாகாணமாக்கிக் கிழக்குக்கான தனி இன அடையாளத்தைப் போர்த்துகிறது.இதைப் பிள்ளையானூடாகச் செய்து முடிக்கும் தகுதியிலேயேதாம் பிள்ளையானின் அரசியல் வரலாறிருக்கிறது.

புலம்பெயர் தமிழர்கள் மத்தியில்,மிக எளிமையான சொல்லாடல்கள்மூலம் ஒரு இனத்தின் வாழ்வாதார அடிப்படைக் கோரிக்கைகளை கிண்டலக்குட்படுத்திச் சீரழிக்கும் நரித் தனத்துடன் கருத்தாடுகிற தமிழ்ச் சூழலொன்று, இக் குழுவினர்களது அரசியலிலிருந்து மிக வலுவாக வளர்ந்துள்ளது.இது, மக்களின் உரிமைகளை சாதி -பிரதேச வாத அரசியலில் நீர்த்துப் போக வைத்தபடி,இந்திய மேலாதிக்கக் கனவுகளுக்கு வக்காலத்து வேண்டுவதில் தனது எஜமான விசுவாசத்தைக் காட்டிக் கொள்கிறது.மற்போது இலங்கை அரசினது ஆட்சி மாற்றத்துக்காக மீளக் கட்டியமைக்கும் படுமோசமான கட்சி, அரசியலில் மிகக் கேவலமாகத் திசைவழிகளை அமைக்கும் தமிழ்க் கட்சிகள்-முன்னாள் ஆயுதக் குழுக்கள் முன் வைக்கும் அரசியல் தாம் எதிர்ப்பு அரசியலாம்! ஆக எதிர்ப்பு அரசியல் நிலையோ இன்று, ஆளும் வர்க்ககங்களுக்கிசைவாகப் பிற்போக்குச் சக்திகளால் முன்னெடுக்கப்படுகிறது.
தமிழர்களைத் தனித்தேசப் போராட்டத்துக்குத் தள்ளிய சிங்கள மையவாதத்தைக் கேள்விக்குட்படுத்தாத இந்தத் தலித்துவ -பிரதேச “ஜனநாயகவாதிகள்” இதுவரை சிங்கள அரசினதுகளது இனவாத வரலாற்றை விவாதிக்கத் திரணியற்றவர்களாகிச் சிங்கள மேலாதிக்கத் தோடு கைகோற்றனர் , தலித்தின் பெயரால் -பிரதேச வாதத்தின் பெயரலால்.

.இது சிங்கள இனவெறி அரசினது எந்த வரலாற்றுப் பயங்கரங்களையும் சிறுபிள்ளைத் தனமாக விவாதிக்க முனையும் இன்றைய காலத்தில், நாம் தொடர்ந்தும் அடிமைப்படும் கருத்தியல் மற்றும் அரச வன்முறை ஜந்திரங்களுக்கும் ஒத்திசைவாக இருக்கும் அரசியல் சித்து விளையாட்டாகிறது இது.இதனால் இலாபம் அடையும் இயக்க-கட்சி அரசியல், மக்களிடமிருந்து அந்நியப்பட்ட சூழலில்,மக்களின் உண்மையான வாழ்வியல் தேவைகளைக் தமது எதிர்கால இருப்புக்குக் கோசமாக்கிறது.இதுவே இன்றைய தமிழர்களின் தலைவிதி.

ஶ்ரீரங்கன்
22.11.2014