தமிழர்களின் இனவெறி இது தான் தமிழ் வீரமா ? : இக்பால் செல்வன்

முள்ளிவாய்க்கால் படுகொலை முடிந்து மூன்று ஆண்டுகள் கடந்துவிட்டன. இலங்கைத் தமிழர்களின் எதிர்க்காலம் எந்த திசையை நோக்கிப் போகப் போகின்றது என்பதை யாரும் அறியவில்லை. இலங்கைத் தமிழ் அரசியல்வாதிகள் மிகவும் பொறுமையாக செயல்பட்டு வருகின்றார்கள். ஏனெனில் முள்ளில் சேலை சிக்கியுள்ளது, அவசரப்பட்டால் கிழிவது சேலை அல்லவா.

ஆனால் ஈழத் தமிழர்களை வைத்தே அரசியல் செய்து வரும் தமிழ்நாட்டு அரசியல் வாதிகளுக்கு வேறு பிழைப்பே இல்லை என்பதை நாம் நன்கு அறிவோம். பெரிய முதலைகளான திமுக, அதிமுக போன்றவைகளாலேயே ஈழத் தமிழர்களுக்கு ஒன்றையும் கிழிக்க முடியவில்லை. இந்திய இராணுவத்தை அனுப்பி தனி ஈழம் அமைப்போம் என்றார் ஜெயராம் ஜெயலலிதா ஆனால் அது சாத்தியமற்றது என்பது சின்னக் குழந்தைக்குக் கூட தெரியும். அதே போல ஈழத்தமிழர் நலன்களுக்காக மூன்று மணிநேரம் மட்டுமே உண்ணாவிரதம் இருந்து சாதனைப் படைத்தார் முத்துவேல் தகஷ்ணாமூர்த்தி கருணாநிதி.

அவை தான் பழையக் கதை என்றாகிவிட்டது. கடைசி வரை தமிழ்நாட்டுத் தமிழர்களால் ஈழத் தமிழர்களுக்கு தீர்வு வாங்கிக் கொடுக்க முடியாது என்பதை நிரூபித்துவிட்டோம். அண்மையக் காலமாக செத்துப் போன டெசோவை தூக்கிக்கொண்டு மக்களை ஏமாற்றப் பார்த்தார்கள். அதுவும் பலிக்கவில்லை.

இந்த நிலையில் அடுத்த முதல்வர் நாற்காலிக்கு குறி வைத்திருக்கும் சீமான், அவரை உசுபேற்றிவிடும் வைக்கோ முதலானோர்கள் சும்மா இருந்தால் என்னவாகும். மகிந்த ராஜபக்ஷேவின் இந்திய வருகையைத் தடுக்க வக்கில்லாதவர்கள், தமது வீரத்தை அப்பாவி சிங்கள மக்கள் மீதுக் காட்டியுள்ளார்கள். சிங்கள இனவாத அரசுக்கு பூரண உதவிகளை செய்த இந்திய நடுவண் அரசினை எதிர்க்கத் துணிவில்லாத வாய்ச்சவடல் பேசுவோர் அவ்வப்போது நோஞ்சான்களை தாக்கி தமது வீரத்தை நிரூபிக்கின்றார்கள்.

இதே வகையில் வேளாங்கண்ணி, பூண்டி திருத்தலங்களுக்கு யாத்திரை வந்த அப்பாவி சிங்கள மக்கள் 184 – பேர் மீது தமது வீரத்தைக் காட்டியுள்ளார்கள். அவர்களில் பலர் இலங்கையின் ரோமன் கத்தோலிக்க மீனவ மக்கள். ஒரு காலத்தில் இந்தியாவில் இருந்து இலங்கைக்கு குடியேறி பின்னர் சிங்கள மக்களாகவே மாறிவிட்ட தமிழர்கள் தான் என்பதைக் கூட நாம் மறந்துவிட்டோம். அவர்களில் பலர் முழு சிங்களவர்கள் கூட இல்லை, சரளமாக தமிழை வீடுகளில் பேசக்கூடிய தமிழர்களே. பலர் தமிழ் நன்கு தெரிந்த சிங்களவர்கள்.

அவர்கள் இலங்கையிலேயே பௌத்த பேரினவாத அச்சுறுத்தலுக்கு அஞ்சி வாழும் விளிம்பு நிலை மனிதர்கள். மீன்பிடி தொழில் போன்ற இயல்பான தொழில் செய்யும் உழைப்பாளர்கள். அவர்களின் அதிகப் பட்ச யாத்திரை தமிழ்நாடும், இந்தியாவும் தான். அதனைவிட்டு ரோமுக்கு போகும் அளவுக்கு வசதிப் படைத்தவர்கள் இல்லை. இப்படிப்பட்ட எளிமையான மனிதர்கள் மீது தமது இனவெறிக் கோபத்தைக் காட்டுவதன் மூலம், சிங்கள பௌத்த இனவெறியாளருக்கும், இவர்களுக்கும் பெரிய வித்தியாசம் இல்லை என்பதை நிரூபித்துவிட்டார்கள்.

அவர்களுக்கு முறையான பாதுகாப்புக் கொடுக்காமல் தமிழக அரசும் உடனேயே அவர்களை திருப்பி அனுப்பிவிட்டது. இது எவ்வளவு பெரிய அநாகரிக செயல் தெரியுமா ? நாய் கடிக்கின்றது என்பதால் திருப்பிக் கடிப்போம் என்ற மன நிலை. தமது வீரத்தை தம்மை விட வலியவர்கள் மீதுக் காட்டினால் ஆபத்து என்பதறிந்து, தம்மைவிட வலியமையற்ற மக்கள் மீது காட்டுகின்றனர் இந்த தமிழ் தேசியவாதிகள்.

இலங்கையை எதிர்ப்பது என்றால் தூதரகத்தினை எதிர்க்கலாமே ! அல்லது மஹிந்த ராஜபக்க்ஷே இந்தியா வரும் போது நேருக்கு நேராக சென்று எதிர்க்கலாமே. அதை எல்லாம் விட்டுவிட்டு அப்பாவி மக்கள் மீது தமது கோரமுகத்தைக் காட்டுவது வேதனை தருகின்றது. இவர்களின் இந்த செயலால் ஒட்டு மொத்த தமிழகத் தமிழர்களும் இப்படியானவர்கள் தான், வெறிப்பிடித்தவர்கள் என்பதாகவே உலக ஊடகங்கள் சித்தரிக்கும் அல்லவா.

நாம் தமிழர், விடுதலைச் சிறுத்தைகள் கட்சி, தமிழ் தேசிய பொதுவுடமைக் கட்சி, மதிமுக போன்றவை தமிழ்நாட்டு மக்களிடம் ஆதரவு பெற இப்படியான ஈனச் செயல்களை செய்கின்றனர். இதனால் ஈழத் தமிழர்களுக்கு துளியேனும் நன்மை கிடைக்குமா சொல்லுங்கள் ?

நாளை இதே போல இனவெறியை சிங்கள அமைப்புக்களும் இலங்கையில் காட்டலாம். அதன் பின் விளைவுகள் மிக மிக ஆபத்தாய் அமையும். ஏற்கனவே நொந்து நூலாய் போன ஈழத்தமிழர்களுக்கு இது மேன்மேலும் வேதனையை மட்டும் தரவல்லது. அத்தோடு சிங்களப் பகுதிகளில் வாழும் மலையகத் தமிழர்களின் வாழ்க்கையையும் இதுப் போன்ற சம்பவங்கள் பாதிப்படையச் செய்யும் அல்லவா.

இந்த கொசுறுக் கட்சிகளின் அரசியல் போதைக்கு ஊறுகாயாக இருப்பது அப்பாவி மக்கள் மட்டுமே. இவர்களின் எதிர்ப்பார்ப்பு எல்லாம் ஒன்று தமிழ்நாட்டு மக்களில் சிலரை இனவெறியூட்டி அவர்களின் வாக்குக்களைப் பெறுவது. இப்படியான அடாவடித்தனங்களை செய்து அதன் மூலம் புலம்பெயர் தமிழர்களிடம் நல்ல பெயர் எடுத்து அவர்களிடம் இருந்து காணிக்கைகள் பெறுவது. அத்தோடு புலம்பெயர் ஈழத்தமிழர்களிடம் நல்ல பெயர் வாங்குவதன் மூலம் தமிழ்நாட்டுத் திரைப்படங்களை நல்ல விலைக்கு விற்றுக் காசாக்குவது. அவ்வளவு தான் ! உண்மையில் வன்னிப் பகுதிகளில் வறுமையில் சிக்கித் தவிக்கும் அப்பாவி தமிழர்களுக்கு இச்செயலால் ஒருவேளை கஞ்சியாவது கிடைக்குமா சொல்லுங்கள் !

இறுதியாக வள்ளுவரின் வாக்கினை இங்குப் பகிர்ந்துவிட்டுப் போகின்றேன்.
செல்லா இடத்துச் சினந்தீது செல்இடத்தும்
இல்அதனின் தீய பிற.
தன் கோபம் தன்னைவிட வலியார் மேல் உண்டானால் அது தனக்கே தீதாகும்; தன்னைவிட எளியவர் மேல் உண்டாயின் அதனைவிட தீமையுடையது வேறில்லை.

http://www.kodangi.com/2012/09/tamil-fascists-attacks-innocent-sinhala-tamil-pilgrims.html