இலங்கை ஜனாதிபதி மஹிந்த ராஜபக்‌ஷவிற்கான வாக்குவேட்டையில் இந்திய உச்ச நட்சத்திரங்கள் : எம்.ரிஷான் ஷெரீப்

நான் ஏற்கெனவே இந்தக் கட்டுரையில் (இந்திய நடிகர்களுடன் இணைந்து இலங்கை மக்களை நிர்வாணிகளாக்கும் ஜனாதிபதி மஹிந்த ராஜபக்ஷ! – https://inioru.com/?p=43260 ) குறிப்பிட்டதற்கிணங்க இலங்கை ஜனாதிபதித் தேர்தலுக்கு இன்னும் சில நாட்களே உள்ள நிலையில், ஜனாதிபதி மஹிந்த ராஜபக்‌ஷவின் பிரச்சாரக் கூட்டங்களுக்கு பொதுமக்களை ஈர்ப்பதற்காக இந்திய உச்ச நட்சத்திர நடிகர், நடிகைகள் இலங்கைக்கு வருகை தர ஆரம்பித்துள்ளனர். இதன் முதற்கட்டமாக இன்று (29.12.2014) காலை, 9W256 இலக்க விமானத்தில் நடிகர் சல்மான்கான், நடிகை ஜெக்குலின் ஃபெர்ணாண்டஸ் ஆகியோர் இலங்கை வந்திறங்கியுள்ளனர். எதிர்வரும் நாட்களில் இன்னும் பல நட்சத்திரங்கள் வரவிருப்பதாக அதிகார மட்டத் தகவல்கள் தெரிவிக்கின்றன.

தமது நாளாந்த வருமானமே பல கோடி இலங்கை ரூபாய்களாகும் நிலையில் இந்திய நடிக, நடிகைகள் எவரும் இலவசமாக இங்கு வரப் போவதில்லை. இந்தியப் பிரதமர் மோடியின் பிரச்சாரக் கூட்டங்களில் நடிகர்கள் ஈடுபடுத்தப்பட்டதைப் போன்று இந் நடிகர்களும் இலங்கையில் செலவளிக்கப் போகும் காலத்தின் பெறுமதி இப்பொழுதே கோடிக் கணக்கில் கைமாறியிருக்கும்.

இலங்கையில் காலநிலை மாற்றத்தால் இந்த மாதம் முழுவதும் அடைமழையினாலும், வெள்ளப் பெருக்கினாலும், மண் சரிவுகளாலும் பலர் மரணமடைந்தும், இலட்சக்கணக்கான பொதுமக்கள் இடம்பெயர்ந்துமுள்ள இந் நிலையில், அம் மக்களின் நலன் குறித்தோ, நிவாரணம் குறித்தோ சிறிதும் சிந்திக்காது, இவ்வாறான நடிகர்களுக்கென கோடிக்கணக்கில் மக்களின் பணத்தை ஜனாதிபதி மஹிந்த ராஜபக்‌ஷ செலவழிப்பது குறித்து என்னவென்பது?

– எம்.ரிஷான் ஷெரீப்
mrishanshareef@gmail.com