ஆவணப்பட இயக்குனர் தோழன் சரத் சந்திரன் மரணம் : யமுனா ராஜேந்திரன்

 

 கேரள சினிமாவின் முக்கியமான ஆளுமையான ஜான் ஆப்ரஹாமின் நண்பரும், அவர் குறித்து ‘தங்களது உண்மையுள்ள ஜான்’ எனும் ஆவணப்படத்தை உருவாக்கியவரும், தன்னளவிலேயே புகழ்வாய்ந்த பல ஆவணப்படங்களின் இயக்குனராக விளங்கியவருமான நண்பர் சரத் சந்திரன் கடந்த ஏப்ரல் 1 ஆம் திகதி, கேரள மாநிலும் திருச்சூரில் ரயிலிருந்து தவறி விழுந்து மரணமுற்றார்.

 1958 ஆம் ஆண்டு பிப்ரவரி மாதம் 16 ஆம் திகதி கேரளத்தில் பிறந்த சரத் சந்திரன் தொழில்முறையில் கணக்காளர் என்றாலும் திரைப்படத்திலேயே அவரது ஆர்வம் இருந்தது. ஆறு ஆண்டுகள் கல்வி வளர்ச்சி அதிகாரியாக சவுதி அரேபியாவில் பிரிட்டிஸ் கவுன்சிலில் பணியாற்றிய அவர் எண்பதுகளின நக்ஸலைட் அரசியலில் ஆதர்ஷம் பெற்றவர். ஜான் ஆப்ரஹாமுடன் ‘ஒடஸா’ மக்கள் திரைப்பட இயக்கத்தில் இணைந்து செயல்பட்ட அவர், பிற்பாடு ‘விப்ஜியார்’ எனும் அமைப்பைத் துவங்கி ஆவணப்படங்களைத் தயாரிப்பதோடு, அவ்வமைப்பின் சார்பில் மாற்றுத் திரைப்பட விழாக்களையும் கேரளத்தில் நடத்தி வந்தார்.

 கேரளத்தில் நடைபெற்ற மகத்தான மக்கள் போராட்டமான செங்காரா நிலப் போராட்டம் உள்பட பல மக்கள் போராட்டங்களில் முன்னணியில் நின்று செயல்பட்டவர். ஆதிவாசிக் குழந்தைகள் பற்றி இவர் உருவாக்கிய ‘கனவு’ எனும் ஆவணப்படமும், பிளாச்சிமடா மக்கள் இயக்கத்தை முன்வைத்து இவர் உருவாக்கிய ‘ஆயிரம் நாட்களும் ஒரு கனவும்’ எனும் ஆவணப்படமும், பத்துக்கும் மேற்பட்டு இவர் உருவாக்கிய ஆவணப்படங்களில் முக்கியமான இரு ஆவணப்படங்களாகும்.

 அவரது நினைவைப் போற்றும் முகமாக அவரது நண்பர்களும் தோழர்களும் வரும் திங்கட்கிழமை 12 ஏப்ரல் 2010, ஒரு அஞ்சலி நிகழ்வை சென்னையில் ஏற்பாடு செய்திருக்கிறார்கள். மாலை ஆறு மணிக்குத் துவங்கும் அந்நிகழ்வு சென்னையிலுள்ள நுங்கம்பாக்கம் லயோலா காலேஜ் அருகிலுள்ள AICUF மண்டபத்தில் நடைபெறும் எனவும் அவரது நண்பர்கள் அறிவித்திருக்கிறார்கள்.

 மக்கள் சினிமாவை விளைந்த அமரன் தோழன் சரத் சந்திரனுக்கு எமது மனமார்ந்த அஞ்சலி.