அ. மார்க்ஸ் கொழும்பில்…..

‘இனியொரு’ பொறுப்பாளர்களுக்கு, வணக்கம். இலங்கைக்கு என்னை அழைத்தவரும், அங்கு பயணத்தை ஒழுங்கு செய்தவரும் எழுத்தாளர் அந்தனி ஜீவா அவர்கள். எனது கைப்பணத்திலும் சுகன், நந்தன், லெனின் மதிவானம், ரவீந்திரன், ஜோதிகுமார், ஜேம்ஸ், மகேந்திரன் போன்ற தோழர்களின் உதவியிலுமே அங்கு சென்று திரும்பினேன். அங்கிருந்த 15 நாட்களும் தங்குமிடம், உணவு, வாகனம் போன்ற தேவைகள் அனைத்தையும் நண்பர்களே ஏற்பாடு செய்திருந்தனர்.

பாதுகாப்புத்துறையின் அனுமதியை பெற்றாக வேண்டுமென்றும், முதல்முறை என்பதால் விமானத்தில் மட்டுமே செல்லமுடியும் என்பதுமான நிபந்தனைகள் யாழ்ப்பாணத்திற்கு செல்லும் என் ஆர்வத்தை மறித்தன. தவிரவும் என் கைவசமிருந்ததில் அவ்வளவு பெரும்தொகையை விமானத்திற்கென்று செலவிட இயலாதவனாகவும் இருந்தேன். எனவே யாழ்ப்பாணம் வராமலே நாடு திரும்புவதாக தோழர் ரெங்கனிடம் தெரிவித்த போது, இவ்வளவு தூரம் வந்துவிட்டு ஏமாற்றத்துடன் திரும்பவேண்டாம் என்று அறிவுறுத்தினார். எனக்காகவே கொழும்பு வந்து அலைந்து பாதுகாப்புத்துறையின் அனுமதி பெற்றதுடன் அவர் தன் சொந்தப்பணத்தில் கொழும்பிலிருந்து யாழ்ப்பாணத்திற்கு டிக்கெட் எடுத்துக்கொடுத்தார். இந்த ஏற்பாடுகளை செய்வதில் ஏற்பட்ட காலதாமதம்/ இழுத்தடிப்பினால் அக்-17-21 வரை யாழ்ப்பாணத்தில் இருக்கலாம் என்ற விருப்பம் நிறைவேறாமல் போனது. 19 ம் தேதிதான் அங்கு போக முடிந்தது. அங்கிருந்த நாட்களில் மிகுந்த தோழமையுடன் கவனித்துக்கொண்டார். அங்கொரு கூட்டத்திற்கும் ஏற்பாடு செய்திருந்தார்.

எனது பயணத்தில் தோழர் ரெங்கன் இந்தமட்டிலுமே தொடர்புபடுகிறார். ஆனால் நீங்களோ “சில மாதங்களுக்கு முன் டக்கிளஸ் தேவானந்தாவின் ஆலோசகரும் இலங்கை ஜனநாயக ஒன்றியத்தின் (எஸ்.எல்.டி.எப்) முக்கிய பிரமுகருமான ரங்கன் தேவராஜனின் பயண ஏற்பாட்டில் தமிழ் நாட்டு எழுத்தாளர் ஆதவன் தீட்சனயா இலங்கை வந்து சென்றது குறிப்படத்தக்கது” என்று எழுதியிருக்கிறீர்கள். இப்படியான பொய்களை பரப்பி அவதூறு செய்து திருப்தியடையும் மனநோயிலிருந்து எப்போது விடுபடப் போகிறிர்கள்? உங்களையொத்த ஒரு துப்பறியும் சங்கர்லால் ஆதவன் தீட்சண்யா ரா உளவாளியாக இலங்கை வந்திருக்கிறான் என்று அங்கே ஒரு புரளியை கிளப்பிவிட்ட நகைச்சுவையும் இருக்கிறது.

போதாக்குறைக்கு, கல்யாணம் ஒன்றுக்கு கொழும்பு சென்றுவிட்டு அப்படியே தமிழர் பகுதிக்கும் தலைகாட்டிவிட்டு வந்த ( இப்படியான வேலைகளை ‘ கண்ணாலத்துக்குப் போன மாதிரியும் ஆச்சு, சித்தப்பன் மகனுக்கு பொண்ணு பார்த்த மாதிரியும் ஆச்சு என்று வேடிக்கையாக சொல்வர்) பா.செயப்பிரகாசம் என்ற ரிடையர்டு புரட்சியாளர், தமிழர்களைப் பார்ப்பதற்காகவே ஏதோ ராவாராத்திரியில் இக்கரையிலிருந்து அக்கரைக்கு கடலுக்கடியில் நீந்தியே கரையேறிய சாகசத்தைப் போல தனது இலங்கைப் பயணத்தை வர்ணித்துக் கொண்டதோடு, ஆதவனது இலங்கைப் பயணத்தில் ஏதோ மர்மம் இருப்பதாக புளுகிக் கொண்டேயிருக்கிறார். ஒரு அரசு ஊழியர் வெளிநாடு போய்வர அழைப்பிதழ் ஒன்று தேவை என்ற அடிப்படையில் மத்திய மாகாண சாகித்திய விழாவின் அழைப்பிதழ் ஒன்றை அனுப்பியிருந்தார் அந்தனி ஜீவா. அவ்விழாவிற்கான அரசாங்க அழைப்பாளர்கள் பேரா.அப்துல் காதரும், இன்னொரு பேராசிரியையும்தான். இதில் மர்மம் என்னவென்று பா.செ தான் விம் பவுடர் போட்டு விளக்கவேண்டும். இந்த அழைப்பிதழை மனதில் வைத்துதான் “ அரசாங்க அழைப்பின் பேரில் ஆதவன்…” என்று நீங்களும்கூட முன்பொரு பதிவை வெளியிட்டீர்கள் போலும். (கொலைகார மண்ணை இந்த ரிடையர்டு புரட்சியாளர் மிதித்தாரா அல்லது ஜம்ப்லிங்கம் போல எம்பி எம்பி குதித்தே நடந்தாரா என்றெல்லாம் கேட்டு அவரை சங்கடப்படுத்த விரும்பவில்லை. வாழ்நாளில் ஒருபோதும் தன்னை இந்தியன் என்று சொல்லிக்கொண்டதேயில்லை என்று டமாரமடித்த இவர் எந்த நாட்டு பாஸ்போர்ட்டில் இலங்கை சென்றார் என்ற கேள்வியும் கூட இங்கு அவசியமற்றதுதான். எப்படியும் இதற்காக சிலபல கட்டுரைகளை பா.செ. எழுதாமல் ஓயமாட்டார். ஓரிரு வரிகள்/ வசைகளையாவது புதுசா எழுதுங்க பா.செ. அவதூறு செய்வது என்ற முடிவை முன்கூட்டியே எடுத்துவிட்டு சில பெயர்களையும் தேதிகளையும் பூர்த்தி செய்யும் வழக்கத்தை கைவிடுங்கள் )

இதையெல்லாம் சொன்னவுடனே, அரசாங்க ஏற்பாட்டில் நீங்கள் சென்றுவரவில்லை என்ற உண்மை புரிந்துவிட்டது ஆதவன் என்று தாங்கள் ஓய்ந்துவிடப்போவதில்லை என்பதை நானறிவேன். மேற்சொன்ன ஆட்களெல்லாம் ஏன் ஆதவனுக்கு உதவினார்கள் தெரியுமா என்று அடுத்ததாக அவர்கள்மீது சேறடிக்க கிளம்புவீர்கள் என்பதும் அறிந்த விசயம்தான். எனக்காக செலவளிக்கும் பொருட்டு இவர்கள் எல்லோரிடமும் இலங்கை அரசாங்கம் முன்கூட்டியே ரகசியமாக பணம் கொடுத்து வைத்திருந்தது என்று நீங்கள் இன்னும் குற்றம் சாட்டாமல் இருப்பது எனக்கு ஆச்சர்யமாக இருக்கிறது. வசைபாடுவது கொண்டாடுவது என்ற எதிரெதிர் புள்ளிகளுக்கு இடையே ஆற்றலின் பெரும்பகுதியை செலவிட்டுக் கொண்டிருக்கும் உங்களைப் போன்றவர்களின் மனநிலையை எவரொருவரின் வெளிப்படைத்தன்மையும் மாற்றிவிடப்போவதில்லை.

மாற்றுக் கருத்துள்ளவர்களை- அவர்கள் எவ்வளவு எளியவர்களேயாயினும் அரசாங்கத்தின் கைக்கூலிகள் என்றும் துரோகிகள் என்றும் சிறுமைப்படுத்தி அவர்களை தமது கருத்தியல் நிலையிலிருந்து பின்வாங்கச் செய்வது – சோர்வடைய வைப்பது என்ற மலிவான உத்தி தற்காலிக பலன்களையும் குரூரமான திருப்தியையும் தரலாம். ஆனால் அதன்பொருட்டு அடையும் வெற்றியென்று எதுவுமில்லை என்பதை ரகசியமாகவேனும் உணராமலா இருப்பீர்கள்?

எந்த அதிகாரமுமில்லாத ஷோபாசக்தி, சுகன் போன்ற எளியவர்களையும் அவர்களது சில கருத்துகளுடன் உடன்பாடு தெரிவித்தமைக்காக என்னைப் போன்றவர்களையும் எதிரிகளாக பாவித்து தாக்குமளவிற்கு கருத்தியல் பலமற்றவர்களாகவே, உலகின் அதிநவீன ஆயுதங்களைக் கொண்ட முப்படைகளையும் மட்டற்ற சொத்துகளையும் மூலதனங்களையும் கொண்ட ஒரு அமைப்பின் ஆதரவாளர்கள் இருப்பதை என்னவென்று சொல்வது?

கடைசியாக ஒன்று, அரசாங்கத்தின் கைக்கூலியாகித்தான் பிழைப்பதென்றால் அதற்காக ஒருவர் தம்மாத்துண்டு இலங்கைக்கு சேவகம் செய்து அல்லாட வேண்டிய அவசியமில்லை நண்பர்களே. உங்களது தலைவர்கள் பலரும் விலகிக் கொண்ட பிறகு இந்திய அரசாங்கத்திடமே ஏராளமான காலியிடங்கள் இருப்பதாக தகவல்.

இனி நீங்கள் என்னமும் எழுதிக்கொள்ளுங்கள். உண்மையற்ற அந்த பொய்களுக்காக உங்களது மனசாட்சி எப்போதும் உறுத்தவே போவதில்லை. அவற்றுக்கு பதிலெழுதுவதில் எனக்கு பெரிதாக ஆர்வமுமில்லை. எனவே, களத்திலே நின்றேன் எதிரியைக் காணவில்லை என்று உங்களை நீங்களே பாராட்டிக்கொண்டு அட்டைக்கத்தியை சுழற்றிக்கொண்டேயிருங்கள். தவிரவும், உங்களது அவதூறுகளுக்கெல்லாம் உளைச்சலுற்று பதில் சொல்லக் கிளம்பினால் ஆயுசுக்கும் வேறு வேலை பார்க்கமுடியாது. ஒருவேளை நீங்கள் எதிர்பார்ப்பதும்கூட அதுதானோ?