இலங்கை அரசை பாதுகாப்பதற்கான உளவுப்பிரிவினரே இந்திய நாடாளுமன்றக் குழு : விக்கிரமபாகு

இந்த குழுவின் வரவினை எந்த விதத்திலும் தமிழர் விரும்பவில்லை. இவர்கள் மூக்கறுபட்ட கொலைவெறியரை காக்கும் நோக்கிலேயே இங்கு வருகை தந்துள்ளனர். இது அனைத்து தமிழரும் அறிவர். பாவம் இந்தியாவில் கிட்டாத தமிழன் இரத்தம் தோய்த விருந்தை வயிறுபுடைக்க உண்டுவிட்டு இனவெறிக் கொலைவெறியரை வாழ்த்தி வணங்கி செல்லவே வருகின்றனர்.நடக்கட்டும்.

அமைதிப்படை என்ற பெயரில் இலங்கை வந்த இந்தியப்படையின் சிப்பாய்கள் ஈழமண்ணில் தமிழர்கள் வாழ்விலுள்ள வளத்தையும் செழிப்பையும் பார்த்துவிட்டு இதனைவிட வேறென்ன உங்களுக்கு வேண்டும் என்று ஆச்சரியமும் பொறாமையும் அடைந்து ஈழத்தமிழர்களின் உயிரையும், உடமைகளையும் தாக்கியழித்த சம்பவங்கள் நிறையவே உண்டு. தன் அருகேயுள்ள ஒரு சிறிய தீவின், ஒரு சிறுபான்மை இனம் தனக்கு வேண்டிய உரிமைகளுக்காக போராடிய அதன் உணர்வுகளை புரிந்துகொள்ள முடியாத இந்தியா என்ற பெரும் கண்டம் வல்லரசாகவேண்டிக் கனவுகாண்கிறது.

அரை நூற்றாண்டுக்கும் மேலாக அழிவையே சந்தித்து வரும் ஈழத்தமிழர்கள், இடைவெளிகள் கிடைக்கும் போதெல்லாம் தங்கள் வாழ்வையும், வளத்தையும் மீட்டெடுக்கத் தவறியதில்லை. வஞ்சகமாக தமிழர்படையை அழித்து, யுத்தம் நிறுத்தப்பட்ட மூன்று ஆண்டுகளுக்குள்ளும் அழிவிலிருந்து மீண்டெழும் முயற்சியிலும் அவர்கள் சோர்ந்துவிடவில்லை.

தற்போது இலங்கை வந்துள்ள இந்திய நாடாளுமன்றக் குழுவை தமிழர்களின் அழிக்கப்பட்ட பகுதிகளை சென்று பார்ப்பதற்கு இலங்கை அரசு அனுமதிக்கப் போவதில்லை. தமிழர்கள் தங்கள் முயற்சியால் மீட்டெடுத்த வளங்களையும் அதன் செழிப்பையும் பார்த்துவிட்டு ஆகா ஓகோ என்று அந்தக்குழு வியப்படையப்போவது உறுதி. இதற்கு காரணம் மகிந்தாவே என்று புகழ்மாலை சூட்டி இந்திய அரசையும், இலங்கை அரசையும் போர்க்குற்றங்களில் இருந்து பாதுகாக்கும் செயல்பாடுகளையே முன்னெடுப்பதும் உறுதி.