இந்திய அரசின் உளவாளிகள் மீண்டும் இரத்தக்களரியை ஏற்படுத்த முயற்சி : எச்சரிக்கை

1983 ஆம் ஆண்டு இந்திய அரசும் அதன் உளவுத்துறையும் ஈழப் போராளிகளுக்கு இராணுவப் பயிற்சி வழங்கி போராட்ட இயக்கங்களிடையே மோதலை ஏற்படுத்தி ஈழப் போராட்டத்தை முள்ளிவாய்க்கால்வரை நகர்த்திவந்து அழித்தது தெரிந்ததே,
இந்திய அரசினதும் அதன் உளவுத்துறையான ரோ (RAW) இனதும் இவ்வாறான சீர்குலைப்புப் பயங்கரவாதம் ஆயிரக்கணக்கான மக்களதும் போராளிகளதும் உயிர்களைப் பலிகொண்டு தேசிய இனத்தின் ஆணிவேரையே அசைத்திருக்கிறது. இலங்கையில் ஏற்படும் சர்வதேச முரண்பாடுகளைக் கையாள்வதற்காகவும், ஈழப் போராட்டத்தை அழித்துத் துவம்சம் செய்வதற்காகவும் இந்திய அரசினதும் அதன் உளவுத்துறையினதும் நாசவேலைகள் மக்களின் இரத்ததை ஆறாகப் பாய்ச்சியுள்ளது.
இலங்கை அரசுடன் இணைந்து இலங்கையைச் சூறையாடும் இந்திய பல்தேசிய பண வெறியர்களின் அடியாளாக இன்று செயற்படும் இந்திய உளவுத்துறையும் அரசும் தமது பயங்கரவாத நடவடிக்கைகளை மேலும் முடுக்கிவிட்டுள்ளதற்கான அறிகுறிகள் தென்படுகின்றன.
புலம் பெயர் நாடுகளில் இந்திய அரசின் நேரடி உளவாளிகளாகத் தொழிற்படும் சில தமிழர்கள் இந்திய அரசு ஈழத் தமிழர்களுக்கு இராணுவப் பயிற்சி வழங்குவதாகவும் அதற்காப ஆட்சேர்ப்பு நடவடிக்கைகளில் தாம் ஈடுபட்டிருப்பதாகவும் கூறி பல முன்னை நாள் போராளிகளைத் தொடர்புகொண்டுள்ளனர்.
இலங்கையிலிருந்து இராணுவப் பயிற்சிக்கு ஆட்சேர்ப்பு நடத்துவதற்கு ஒத்துழைக்குமாறு இச் சமூகவிரோதக் கும்பலைச் சேர்ந்தோர் தொடர்புகளை ஏற்படுத்திவருகின்றனர். அண்மையில் இந்தியா சென்று வந்துள்ள இக்கும்பலைச் சார்ந்த சிலர் இந்திய அரசியல் பிரமுகர்களுடன் தாம் எடுத்துக்கொண்ட புகைப்படங்களை ஆதரமாகக் காட்டிவருகின்றனர்.
ஐரோப்பிய நாடுகள் பலவற்றிலும் தனி நபர்களாகவும் குழுக்களாகவும் செயற்படும் இக்கும்பல் இதுவரை நூறுபேருக்கு மேல் பயிற்சிக்காக திரட்டப்பட்டுள்ளதகவும் கூறிவருகின்றது.
இந்திய இராணுவப்பயிற்சியிலிருந்து இந்திய அமைதிப்படை ஈறாக முள்ளிவாய்க்கால் படுகொலைகள் வரை இந்தியாவின் கோரமுகத்தை ஈழத்தமிழர்கள் நேரே கண்டிருக்கிறார்கள். தமது சொந்த நாட்டின் மக்களையே தமது பல்தேசிய எஜமானர்களின் நலன்களுக்காக தெருக்களில் கொன்றுபோடும் இந்திய அரசின் புதிய சதிவலையை மக்கள் இனம்கண்டுகொவது அவசியம்.
இரத்தக்களரியை ஏற்படுத்தி எஞ்சிய தமிழர்களையும் அழிக்க முயலும் இச்சதிகாரக் கும்பல்கள் மக்கள் மத்தியில் அடையாளப்படுத்தப்பட்டு அம்பலப்படுத்தபட வேண்டும்.