முஸ்லீம்களை இணைந்து போராட அழைக்கும் நாடுகடந்த அரசின் திமிர்

இலங்கையில் தமிழ்ப் பேசும் முஸ்லீம்களின் இலங்கை அரசிற்கு எதிரான போராட்டத்திற்கு ஆதரவளிப்பதாக ஆரம்பிக்கும் நாடுகடந்த அரசின் அறிக்கை ஆரம்பித்ததும் ஏதோ இவர்கள் மனிதத்தை மதிக்க ஆரம்பித்துவிட்டார்கள் என்ற உணர்வைத் அனைவருக்கும் தோற்றுவித்தது.

1915 ஆம் ஆண்டு இலங்கையில் முதன் முதலில் சிங்கள பௌத்த பேரினவாதிகளின் வன்முறை முஸ்லீம்களையே குறிவைத்துத் தாக்கியது. முஸ்லீம்கள் தெருத்தெருவாகத் தாக்கப்பட்டனர். அவர்கள் வர்த்தக நிலையங்கள் தீ மூட்டிக் கொழுத்தப்பட்டன. 4075 கடைகளும் வீடுகளும் சிங்கள பௌத்த வெறியூட்டப்பட்ட காடையர்களால் சூறையாடப்பட்டன. நான்கு தமிழ்ப் பேசும் முஸ்லிம் பெண்கள் பாலியல் வன் புணர்விற்கு உட்படுத்தப்பட்டனர். 17 பள்ளி வாசல்கள் தீமூட்டி எரிக்கப்பட்டன. 85 பள்ளிவாசல்கள் சேதமாக்கப்பட்டன. 25 வரையான முஸ்லீம்கள் கொல்லப்பட்டனர். இதே வேளை இன்னொரு துயரமும் அரங்கேறிக் கொண்டிருந்தது. தமிழ் தலைவர்களில் ஒருவரான சேர்.பொன்னம்பலம் இராமனாதன் முஸ்லீம்களுக்கு எதிரான கருத்துக்களை முன்வைத்தார்.

இவை அனைத்தையும் மறந்த முஸ்லீம்கள் 1920 இலிருந்து 30 வரைக்கும் இராமநாதனின் முக்கிய ஆதரவாளர்களாகத் திகழந்தனர்.

தமிழ்ப் பேசும் மக்களின் தேசிய விடுதலைப் போராட்டம் ஆயுதப் போராட்டமாக மாற்றமடைந்த 80 களில் முஸ்லிம்களில் பலர் தமிழ் விடுதலை இயக்கங்களில் இணைந்து போராடி மடிந்திருக்கிறார்கள்.

அது நீண்ட நாள் நீடிக்கவில்லை. இன்று சாதிய முரண்பாடுகளைத் தூண்டி சாதிச் சங்ககங்களை இலங்கை அரசு தமிழ்க் காடையர்களை வைத்து உருவாக்கி இராணுவத் துணைக்குழுக்களாக உருமாற்றுவதைப் போல, முஸ்லிம் காடையர்களை தமிழ் விடுதலை இயக்கங்களுக்கு எதிராக உருவாக்கிற்று. முஸ்லிம் குடியேற்றங்களை கிழக்கில் ஆங்காங்கு தோற்றுவித்தது. இவற்றைக் கையாள வலுவற்ற ஏகபோக அரசுகளின் அழுத்தக் குழுக்கள் போன்று செயற்பட்ட விடுதலை இயக்கங்கள் முஸ்லீம் மக்கள் அனைவரையுமே எதிரிகளாக்கி அப்பாவிகள் மீது தாக்குதலைத் தொடுத்தன.

கிழக்கில் இவ்வாறு நடைபெற்ற போதிலும் யாழ்ப்பாணத்தில் முஸ்லிம் மக்களின் நிலை வேறுபட்டதாக இருந்தது. அவர்களில் பெரும்பாலானோர் விடுதலை இயக்கங்களின் ஆதரவாளர்களாகவும் உறுப்பினர்களாகவும் இருந்திருக்கிறார்கள்.

இதனைக் கூடக் கருத்தில் கொள்ளாத தமிழீழ விடுதலைப் புலிகள் 1990 ஆம் ஆண்டு யாழ்ப்பாணத்தில் வாழ்ந்த அனைத்து முஸ்லிம்களையும் ஒரு இரவுக்குள் தமது பாரம்பரிய நிலங்களிலிருந்து வெளியேறுமாறு ஆயுத முனைய்ல் பணித்தனர்.
அவர்களிடமிருந்து தங்க நகைகளும் சொத்துக்களும் புலிகளால் பறிமுதல் செய்யப்பட்டது.

இரவோடு இரவாக சாரி சாரியாக முஸ்லீம் மக்கள் தாம் பரம்பரை பரம்பரையாக வாழ்ந்து வழகமாக்கிய மண்ணை விட்டு வெறுங் கையோடு துரத்தப்பட்டனர். கைக் குழந்தைகளின் அழுகுரல்கள், முதியவர்களின் முனகல்கள், கண்ணீர் மல்கிய மனிதர்கள், நிறைமாதக் கற்பிணிப் பெண்கள் என்று எந்த வேறுபாடுமின்றி தமது மண்ணிலிருந்து பிடுங்கி எறியப்பட்டனர்.
இச்சம்பவம் போராட்ட வரலாற்றில் நிரந்தரக் கறைபடிந்த நிகழ்வு. இதனைத் தமக்கு ஏதுவாகப் பயன்படுத்திக்கொண்ட முஸ்லிம் பிழைப்புவாதத் தலைமைகள் முரண்பாட்டை ஆழப்படுத்தும் தமது வேலையை ஆரம்பித்தன.
இன்று புலிகள் இல்லை. போராட்டம் சிதைக்கப்பட்டுவிட்டது. முஸ்லிம் மக்கள் மீது ராஜபக்ச பாசிஸ்டுக்களின் திட்டமிட்ட வன்முறை கட்டவிழ்த்துவிடப்படுகின்றது.

முஸ்லிம் மக்கள் தம்மை ஒழுங்கமைத்துப் போராட முற்படுகிறார்கள். சிங்கள பௌத்த பாசிஸ்டுக்கள் பௌத்த அடிப்படைவாத அமைப்புகளை தாமே தோற்றுவித்து முஸ்லிம்களின் கலாச்சார மையங்கள் மீது தாக்குதல் நடத்துகின்றனர். தேவையேற்பட்டால் முஸ்லிம்கள் மீதான இனப் படுகொலைக்குத் தயாராகி வருகின்றனர்.
இன்று வட கிழக்குத் தமிழர்கள் மட்டுமல்ல, முஸ்லிம்களும், சிங்கள உழைக்கும் மக்களும், மலையக மக்களும் ராஜபக்ச பாசிஸ்டுக்களால் மிருகத்தனமாக ஒடுக்கப்படுகின்றனர்.

கொலை வெறிகொண்ட இராணுவத்தை மட்டும் வைத்துக்கொண்டுள்ள இலங்கை பேரினவாத பாசிஸ்டுக்களுக்கு இலங்கையில் எல்லைக்குள் வாழும் பெரும்பான்மையான மக்கள் எதிரிகளே. போர்க்குற்ற விசாரணை நடத்துகிறோம் என்று மக்களை ஏமாற்றும் ஏகபோக நாடுகளும் அவற்றின் அடிவருடிகளான புலம்பெயர் ஐந்தாம் படை பிழைப்புவாதிகளையும் விட ராஜபக்சவின் பலமான எதிரிகள் இவர்கள் தான்.

இந்தப் பின்னணியில் இலங்கை அரச பாசிஸ்டுக்களால் தாகுதலுக்கு உள்ளாகும் முஸ்லிம்களை நாடுகடந்த தமிழீழம் தம்மோடு இணைந்து போராட அழைக்கிறது. அதுவும் தமிழ் மக்களோடு போராட்டத்தில் இணைந்து கொள்ளக் கோரிக்கை விடுக்கிறது.

இலங்கை அரச பாசிஸ்டுக்கள் வட கிழக்குத் தமிழர்களை தேசிய இனம் என்பதை அங்கீகரிக்க மறுப்பதைப் போலவே நாடுகடந்த தமிழிழம் முஸ்லீம்களை தனித் தேசிஅ இனமாக அங்கீகரிக்க மறுக்கிறது. அவர்களின் சுய நிர்ணைய உரிமையை நிராகரிக்கிறது. ‘தமிழ், முஸ்லீம், சிங்களம்’ என்றெல்லாம் பேச வேண்டாம் எல்லாரும் இலங்கையரே’ என்ற ராஜபக்சவின் மொழியை நாடுகடந்த அரசு பேசுகிறது.

இன்று மக்களை நேசிக்கும் எந்த ஜனநாயகவாதிக்கும் சிறுபான்மைத் தேசிய இனங்களின் பிரிந்துசெல்லும் உரிமைக்கான போராட்டத்தின் வெற்றியே இலங்கையில் அழிவுகளிலிருந்து மீழ்வதற்கான ஒரே வழி என்பதில் சந்தேகங்கள் இருக்கமுடியாது.

இந்த நிலையில் ஒடுக்கப்படும் முஸ்லிம் மக்களதும், மலையக மக்களைதும் தன்னுரிமையை அங்கிகரிப்பதும் சுய நிர்ணய உரிமைக்கான அவர்களது போராட்டத்தை சுய நல நோக்கின்றி மனிதர்கள் என்ற அடிப்படையில் நேர்மையாக அங்கீகரிப்பதும் அவர்களுடைய போராட்டத்திற்கு வலுச் சேர்பதுமே ராஜபக்ச அரசையும் பேரினவாத பாசிசத்தையும் அழிப்பதற்கான ஒரே வழி,

அதிலும் குறிப்பாக முஸ்லிம்கள் மத்தியில் கடந்தகாலத்தின் மன்னிக்க முடியாத கசப்பான நிகழ்வுகளுக்காக சுய விமர்சனம் செய்துகொள்வது ஒவ்வொரு மக்கள் பற்றுள்ள மனிதனதும் தாரிமீகக் கடமை. அமரிக்காவையும் இந்தியாவையும் கூட்டிவந்து ராஜபக்சவை அழிக்கிறோம் என்று பிழைப்பு நடத்தவேண்டிய எந்த அவசியமும் இல்லை. போராடும் சிறுபான்மைத் தேசிய இனங்களோடும் சிங்கள உழைக்கும் மக்களோடும் இணைந்து கொண்டாலே ராஜபக்ச அரசு சிறுபான்மை அரசாகிவிடும். இவர்கள் அனைவரதும் ஒருங்கிணைந்த ஆதரவோடு சிறுபான்மைத் தேசிய இனங்கள் தமது பிரிந்து செல்லும் உரிமைய வென்றெடுக்கவும் முழு இலங்கையை அழிக்கப்படுவதிலிருந்து காப்பாற்றவும் இயலும்.

======================================================================================

சிங்கள பௌத்த தேசியவாதத்திற்குள் சிக்கியுள்ள முஸ்லிம் மக்களின் உரிமைப் போராட்டத்திற்கு ஆதரவு: நாடுகடந்த தமிழீழ அரசாங்கம்

இலங்கைத் தீவில் சிங்கள பௌத்த தேசியவாதத்தினால் முஸ்லிம் மக்கள் மீது கட்டவிழ்த்து விடப்பட்டிருக்கும் அராஜகத்தினை வன்மையாக கண்டிப்பதோடு, முஸ்லிம் மக்களின் உரிமைக்கான போராட்டத்திற்கு தனது வலுவான ஆதரவினை தெரிவித்துக் கொள்வதாக நாடுகடந்த தமிழீழ அரசாங்கம் அறிவித்துள்ளது.