பிரபாகரன் உடல் போன்று தோற்றமளிக்கும் சடலம்:இலங்கை தொலைக்காட்சியில்.

விடுதலைப்புலிகள் அமைப்பின் தலைவர் வேலுப்பிள்ளை பிரபாகரனது என்று தோன்றுகிற சடலத்தை இலங்கை தொலைக்காட்சி ஒளிபரப்பியுள்ளது.

அந்த வீடியோவில், பிரபாகரனது முகச் சாயலுடன் காணப்படும், கெரில்லாக்களின் உடையணிந்த சடலம் ஒன்று காணப்பட்டது. அதன் தலைப்பகுதி ஒரு துணியால் மறைக்கப்பட்டிருந்தது. ஒருவேளை அந்தப் பகுதியில் காயத்தை மறைப்பதற்காக அது இருக்கலாம்.

அந்த சடலத்தின் மரபணுச் சோதனைகள் அது பிரபாகரன்தான் என்பதை உறுதி செய்ததாக இலங்கை இராணுவம் கூறுகிறது.

அவர் நேற்று கொல்லப்பட்டார் என்று இலங்கை அரசாங்க ஊடகங்கள் கூறியதற்கு மாறாக, அவரது சடலம் இன்றுதான் மீட்கப்பட்டது என்று இலங்கை இராணுவத் தளபதி சரத் பொன்சேகா தெரிவித்துள்ளார்.

அதேவேளை, பிரபாகரனது உடலை தான் பார்த்து, அதனை அடையாளம் கண்டதாக, அவரது பழைய சகாவும், தற்போதைய அமைச்சருமான, கருணா என்று அழைக்கப்படும், விநாயகமூர்த்தி முரளிதரன் தெரிவித்துள்ளார்.