1997 ஆம் ஆண்டு ஒகஸ்ட் மாதம் 31 ஆம் திகதி பாரிசின் நகரின் மையப்பகுதியில் பாலம் ஒன்றின் கீழே டோடி யும் டயானவும் விபத்து ஒன்றில் மரணமானதாகத் தெரிவிக்கப்பட்டது. பிரித்தானிய பணக்காரர்களில் ஒருவரான டோடி அல் பயட்டின் தந்தை அது விபத்தல்ல கொலை என்பதை தொடர்ச்சியாகக் கூறிவந்தார்.
டயானா என்ற பெண் அதிகார வர்க்கத்தினுள் ஏற்பட்ட முரண்பாடுகளின் உற்பத்தி என்பதில் யாருக்கும் மாற்றுக் கருத்திருக்க முடியாது.
டயானாவிற்கு ஊடகங்கள் வழங்கிய முக்கியத்துவம் அரச குடும்பத்தவர் ஒருவருக்கு இதுவரை வழங்கப்பட்டதில்லை. ஆரம்பத்தில் தனது கணவர் சார்ள்ஸ் உடனான முரண்பாடுகளையும் தனது மகிழ்ச்சியற்ற திருமண வாழ்க்கையையும் டயானா வெளிப்படையாகவே பேச ஆரம்பித்தார்.தனது திருமண உறவில் மகிழ்ச்சியின்மை தொடர்பாக டயானா வெளிப்படையாகப் பேச ஆரம்பித்ததும், பிரித்தானிய அரச பரம்பரை மட்டுமல்ல அதிகார வர்க்கமும் அதிர்ச்சிக்கு உள்ளானது. பல்தேசிய வியாபார ஊடகங்கள் பரபரப்பிற்காக டயானாவின் செய்திகளை முக்கியத்துவப்படுத்திய அதே வேளை அவரை பாலியல் நோய் கொண்ட பெண்ணைப் போன்று உருவகப்படுத்தின. இரணுவ அதிகாரி ஒருவருடன் அவருக்கு உறவிருந்ததாகவும், பாக்கிஸ்தானைச் சேர்ந்த மருத்துவர் ஒருவருடன் காதல் கொண்டு உறவு வைத்துக்கொண்டதாகவும் பல்வேறு அருவருக்கத்தக்க பிரச்சாரங்களை ஊடகங்கள் ஒருமித்து மேற்கொண்டன.
அதிகாரவர்க்கமும் ஊடகங்களும் டயானா என்ற பெண்னை எவ்வளவிற்கு எவ்வளவு தரம் தாழ்த்தினவோ அவ்வளவிற்கு அவளவும் அவரின் மக்கள் மத்தியிலான செல்வாக்கு வளர ஆரம்பித்தது. சிறிய தீப்பொறி காட்டுத் தீயாக மாறியது போன்று டயானா பிரித்தானியாவில் கதாநாயகியானார். அது உலகம் முழுவதும் வியாபித்தது.
திட்டமிடப்பட்ட அவதூறுகளையும் கடந்து டயானாவின் செல்வாக்கு மக்கள் மத்தியில் வளர்ந்ததற்கான காரணம் என்ன?
முதலாளித்துவப் பொருளாதார இயக்கம் முடிவிற்கு வந்த கடந்த நூற்றாண்டின் ஆரம்பப் பகுதி முதல், ஐரோப்பிய நாடுகளில் குடும்பங்களின் இருப்பு கேள்விக்குள்ளானது. முதலாளித்துவம் தனது எல்லையைத் தாண்டி வீங்கியிருந்த பிரித்தானியாவில் 60 களிலேயே அதிகளவிலான விவாகரத்து வழக்குகள் தொடரப்பட்டன. குறிப்பாகப் பெண்கள் தெருவிற்குவந்து தமது உரிமைகளுக்காகப் போராட ஆரம்பித்தனர்.
இவற்றிற்கு எதிராக குடும்பம் என்பதன் ‘மாதிரி’யை (model)பிரித்தானிய அதிகார வர்க்கம் மக்கள் மத்தியில் முன்வைக்க முனைந்தது. அரசபரம்பரையை வாழும் கடவுள்களாக்குவதும் அவர்களைக் குடும்பங்களின் ‘மாதிரி’ யாக்குவதும் அதிகாரவர்க்கத்திற்கு வசதியானதாக அமைந்தது.
அரச குடும்பப் பெண்கள் கணவனுக்கும் குடும்ப அதிகாரத்திற்கும் கட்டுப்பட்டவர்கள், கடவுள் மீது மிகுந்த பக்திகொண்டவர்கள் போன்ற விம்பம் திட்டமிட்டு ஏற்படுத்தப்பட்டு இன்றுவரை அது தொடர்கிறது. அரச குடும்பத்தில் திருமணமான பெண்களின் சுதந்திரம் கணவனின் கைகளிலேயே தங்கியுள்ளது என்றும் அதையே மக்கள் பின்பற்ற வேண்டும் என்றும் ஒவ்வொரு மூலையிலும் பிரச்சாரம் மேற்கொள்ளப்பட்டது. இதுவே சமூகத்தின் பொதுப்புத்தியாக ஆண்களின் மேலாதிக்கம் மீண்டும் நிறுவப்படவும், பெண்களின் உரிமைக்கான போராட்டங்கள் மட்டுப்படுத்தப்படவும் பயன்பட்டது.
அரச குடும்பத்தால் கட்டமைக்கப்பட்ட குடும்ப வரைமுறையை டயானாவின் மணவாழ்க்கை முறிவும் அது தொடர்பாக அவரின் கருத்துக்களும் கேள்விக்கு உள்ளாக்குகின்றது.
மகிழ்ச்சியற்ற திருமண வாழ்க்கைக்குள் வாழ்ந்த பெண்களின் விவாகரத்து என்பதே சமூகத்தால் நிராகரிக்கப்படும் நிலையிலிருந்த போது டயானாவின் துணிச்சலான அறிக்கைகளும் நேர்காணல்களும், அரச குடும்ப ஒடுக்குமுறைக்கு எதிராக அவரின் நடவடிக்கைகளும் பிரித்தனியப் பெண்களை ஈர்த்தது, தமது துயரத்தை டயானா பேசுவதாக அவர்கள் எண்ணினார்கள். அரச குடும்பம் இனிமேல் ஒரு மாதிரி அல்ல அதன் வழி வந்த டயானா தான் தமது மாதிரி என்று ஆயிரக்கணக்கான பெண்கள் எண்ண ஆரம்பித்தனர்.
டயானா குறித்து ஊடகங்கள் ஏற்படுத்த முனைந்த விம்பம் தொலைந்து போக பெண்களின் மனதில் தங்களின் மீட்பர் போன்ற விம்பம் உருவானது.
டயானாவின் மரணத்தின் பின்னர் வெளியான ஊடக ஆய்வு ஒன்றில் ‘காதலற்ற மண வாழ்க்கைக்கு அடங்கிப் போவதை நிராகரிக்கும் பெண்ணாகவே டயானாவை பெண்கள் கண்டார்கள். தம்மை டயானா போன்ற ஒருவராக உருவகப்படுத்த எண்ணினார்கள்.’ எனக் குறிப்பிடப்பட்டது.
(Financial Times , (6-7/9/97): “Women looked up to her for refusing to succumb to a loveless marriage and deciding to make something more of herself.”)
வழமையாகவே தன்னார்வ நிறுவனங்களைப்(NGO) பயன்படுத்தி மேற்கொள்ளும் வேலைகளை டயானாவின் புதிய விம்பத்தின் ஊடாக அதிகார வர்க்கம் மேற்கொண்டது.
உலகின் ஒரு மூலையில் கண்ணிவெடி அகற்றிய டயானா, மறு நாள் கண்ணிவெடியால் காலிழந்த குழந்தைகளிடம் நலம் விசாரித்தார். புற்று நோயாளர்களைச் சந்திக்கிறார். எயிட்ஸ் நோயாளிகளுக்கு ஆதரவு கோருகிறார். வறுமையை ஒழிக்க வேண்டும் என்கிறார்.
ஆக, அதிகார வர்க்கம் எண்ணியது போல டயானாவை தற்காலிக சீர்திருத்தத்தின் விம்பமாகப் பயன்பட்த்திக்கொண்டாலும், அவர் குறித்த நல்ல அபிப்பிராயம் அவர் எதிர்பர்காமலேயே உலகம் முழுவதும் வளர ஆரம்பித்தது.
இதனால் தற்காலிகமாக சில காலங்கள் அடங்கிப் போயிருந்த அரச குடும்ப கிசுகிசுக்கள் டயானாவை அதிலிருந்து அகற்றி சேவைசெய்யும் பெண்ணக்கியது.
அரச குடும்பத்திலிருந்து தனிமைப்படுத்தப்பட்ட டயானாவிற்கு ‘பிஸி’ யான விம்பம் ஒன்று உருவானது. இதன் பின்னர் டயானா அரச குடும்ப விவகாரங்களில் தலையிடாமலும் காதல் விவகாரங்களில் ஈடுபடாமலும் ‘விம்பத்தைக் காப்பாற்றிக்கொள்வார்’ என அதிகாரவர்க்கம் எதிர்பார்த்தது.
இவ்வாறான விம்பத்தைப் பயன்படுத்திக்கொண்ட டயான தனது புதிய காதலர் டோடி அல் பயத் என்ற இஸ்லாமியரோடு பொதுவான இடங்களில் தோன்ற ஆரம்பித்தார். இப்போது பிரித்தானிய அரச பரம்பரையப் பாதுக்காக்கும் அதிகார வர்க்கம் மறுபடி விழித்துக்கொண்டது. அவதூறுகளால் இனிமேலும் டயானாவை அழித்துவிட முடியாத அளவிற்கு டயானாவின் மக்கள் மத்தியிலான செல்வாக்கு வளர்ந்திருந்தை அறிந்துகொண்ட அதிகார வர்க்கம் அவரை முழுமையாக அழித்துவிடவேண்டும் என்ற முடிவிற்கு வருகிறது.
ஆரம்பத்தில் டயானாவின் மரணச் சடங்குளில் கூடக் கலந்துகொள்ள மறுத்த பிரித்தானிய மாகாராணி இறுதியில் கலந்துகொள்கிறார். தேசியக் கொடி அரைக்கம்பத்தில் பறக்கவில்லை. மீண்டும் ஊடகப் பிரச்சாரங்கள் டயானாவைக் கடவுளாக்கின. டயானாவிற்கும் அரச குடும்பத்திற்கும் சிறிய ஊடலே முரண்பாடுகளுக்குக் காரணம், என்ற பிரசாரத்தை ஊடகங்கள் ஆரம்பித்தன.
டயானாவின் மரணத்தின் பின்பு 16 வருடங்கள் தொலைந்து போய்விட்டன.
இப்போது வெளியாகியிருக்கும் புதிய சாட்சி வலுவான ஆதாரங்களை முன்வைத்திருக்க வேண்டும்என்றே கருத இடமுண்டு. மக்களின் அபிப்பிராயத்தில் மாற்றங்களை ஏற்படுத்தவல்ல நிகழ்வு என்பதால் விசாரணை நடத்தப்படுகிறது என்கிறார்கள். ஆனால் எவ்வாறான சாட்சித் தகவல்கள் வழங்கப்பட்டது என்பதை வெளியிடமுடியாது என்கிறார்கள்.
டயானா காலத்தில் அரச பரம்பரையின் பாதுகாப்பு அமைப்பிற்குப் பொறுப்பாகவிருந்த டே டேவிஸ், தகவல் வெளியான உடனேயே தொலைக்காட்சியில் தோன்றி டயானாவின் மரணம் விபத்து என மூன்று வேறுபட்ட விசாரணைகளில் தெரியவந்துள்ளதாகவும் கொலை என்பது ஏற்க முடியாது எனவும் தெரிவித்துள்ளார்.
எது எவ்வாறாயினும் அரச குடும்பத்தின் தேவை அதிகாரவர்கத்திற்கு இன்னும் அவசியமானதாகவிருப்பதால் அவர்கள் மீண்டும் புனிதமாக்கப்படுவார்கள்.
எந்தப் பெறுமானமுமற்ற டயானா என்ற உயர்குடிப் பெண்ணை பாலியல் நோயாளியாகவும் கதநாயகியாகவும் மாற்றி இறுதியில் அதிகாரவர்க்கமும் ஊடகங்களும் கொலை செய்துவிட்டன.