இனப்படுகொலையும் பி.பி.சி இன் போலிக் கண்ணீரும்

யுத்தத்தின் இறுதிக் கட்டத்தில் பெருமளவான பொதுமக்கள் கொல்லப்பட்டிருந்தனர் என்று தெரிவிக்கப்படுகிறது. இலங்கையில் முன்றரை ஆண்டுக்கு முன் யுத்தத்தின் இறுதிக் கட்டத்தில் பொதுமக்களை அழிவிலிருந்து பாதுகாக்க ஐநா மன்றம் மோசமாகத் தவறியுள்ளது என்று ஐநாவுக்குள் நடத்தப்பட்ட விசாரணை அறிக்கை ஒன்று கூறுகிறது.
இந்த அறிக்கையின் ஒரு பகுதி பி.பி.சி இற்குக் கிடைத்ததாக செய்தி வெளியிடப்பட்டது.
அமரிக்காவின் செய்மதிகள் அனைத்தும் பார்த்துக்கொண்டிருக்கும் வேளையில் முகவரி தெரியாத இணைய ஊடகங்களிலிருந்து பிபிசி போன்ற ஏகபோக ஊடங்கள் வரை பார்த்துக்கொண்டிருக்கும் போதே அனைத்துக் கொலைகளும் நடத்தப்பட்டன. இன்றும் இவர்களின் கண்முன்னாலேயே இனச் சுத்திகரிப்பு நடைபெறுகிறது.
லிபியா போன்ற அரபு நாடுகளில் மக்கள் திரள் திரளாகக் கொல்லப்படுவதாக போலி ஆவணங்களைத் தயாரித்துப் பரப்பிய ஐ.நா உம் அதன் பிரச்சார ஊடகமான பிபிசி உம் அமரிக்க ஆக்கிரமிப்பின் முகவர்களாக செயற்பட்டன. போலியான காணொளிகள், ஆவணங்கள் எல்லாம் ஆக்கிரமிப்பின் முன்னர் உலக மக்களுக்குக் காண்பிக்கப்பட்டமை பின்னதாக வெளிவந்தது.
வன்னியில் நடைபெற்ற மனிதப் படுகொலைகளின் பின்னணியில் செயற்பட்ட ஐ.நா உம் அதன் பிரச்சார ஊடகங்களும் தன்னார்வ நிறுவனங்களும் இன்று இவை அனைத்தும் தற்செயலாக நடைபெற்ற தவறுகள் என தங்களை புனிதப்படுத்திக் காட்ட விரும்புவதன் பின்னால் இன்னொரு சதித் திட்டம் தீட்டப்படுகிறதா என்ற சந்தேகங்கள் எழுகின்றன.
ஒடுக்கப்படும் தேசிய இனங்களும், மக்களும் ஐ.நா என்ற அமரிக்க அடியாள் அமைப்பின் மீது நம்பிக்கைவைப்பதும், ஏகபோக அரசுகளின் ஊடகங்களின் ஆக்கிரமிப்பு அரசியலை புரிந்துகொள்ளாமல் இருப்பதும் ஆபத்தானது.

குறுக்கு வழிகளில் விடுதலை பெற்றுவிடமுடியாது. உரிமைகளை விற்று அடிமைத்தனத்தை மட்டுமே விலைக்கு வாங்கிக்கொள்ள முடியும்.