ஆக்கிரமிக்கப்பட்டுள்ள பாலஸ்த்தீன பிராந்தியங்களிலிருந்து விலகிச் செல்லுமாறு இஸ்ரேலிடம், இலங்கை கோரிக்கை!

தானே அதேவிதமான குற்றத்தைச் செய்துவரும் ஒரு அரசாங்கம் இப்படிக் குரல் எழுப்புவது நம்மைச் சிரிக்கவோ சினக்கவோ வைக்கலாம்.
ஆனால் இங்கே நிலப்பறிப்புக்கு ஆளாகிவரும் மக்களின் பிரதிநிதிகள் என்று சொல்லப்படும் தமிழ்க் கட்சிகள் ஆக்கிரமிக்கப்பட்டுள்ள பாலஸ்த்தீன பிராந்தியங்களிலிருந்து விலகிச் செல்லுமாறு இஸ்ரேலிடம் எப்போதாவது கேட்டுள்ளனவா?

பேரினவாதக் கட்சிகள் நேர்மையாக நடப்பதாக நான் சொல்லவில்லையே.
அவர்கள் கபடநோக்குடன் தான் இப்போது இஸ்ரேலை விமர்சிக்கிறர்கள். (கடந்த 15-20 வருடமாக இரண்டு பேரினவாதக் கட்சிகளுமே அடக்கித்தான் வாசித்தன).

எனது கவலை ஏதெனின், பிரதேசம் தொடர்பாக நாம் எவ்வாறு பாதிக்கப் படுகிறோமோ அதை விடப் பன்மடங்கு மோசமாகப் பாதிக்கப் படும் ஒரு மக்களுக்காகக் குரல் எழுப்ப நமது தலைமைகள் என்றுமே ஆயத்தமில்லை என்பது தான்.
இது நீதிக்காகப் போராடும் மக்களிடமிருந்து நம்மைத் தனிமைப் படுத்தும் என்பதை விட, அறம் சார்ந்த்த ஒரு பிரச்சனையுமாகும்.
நம்மிடையே இஸ்ரேல், அமெரிக்கா பற்றி உள்ள மயக்கங்கள் காரணமோ தெரியவில்லை.

திட்டமிட்ட குடியேற்றங்கள் டி.எஸ். சேனாநாயகவால் தொடக்க பட்டவை. தமிழரசுக் கட்சி அதைப் பற்றிப் பேசிய போதும் மக்கள் மத்தியில் அதைப் பிரசாரமாக எடுத்துச் செல்லவில்லை. சட்டவிரோதக் குடியேற்றங்கள் தமிழரசுக் கட்சி யூ.என்.பியுடன் 7-கட்சிக் கூட்டில் இருந்த போதும் நடந்து 1977க்குப் பிறகு தீவிரமாயின.

தமிழ் மக்கள் என்ற முறையில் அரசாஙத்தின் இரட்டை வேடத்தை நாம் விமர்சிப்பது அவசியம்.
அதே வேளை, நமது நிலைப்பாட்டையும் நடத்தையையும் பற்றிச் சிந்திக்க வேண்டும்.
நமக்கென ஒரு அறப் பார்வை இல்லாத போது அநீதி பற்றிய நமது சொற்கள் மதிப்பிழக்கின்றன.