இலங்கையில் இடதுசாரிக் கட்சிகள், தமிழீழ விடுதலை இயக்கம்(TELO) போன்றவற்றின் ஆரம்பகால செயற்பாட்டாளரும் பின்னாளில் தமிழீழ விடுதலைப் புலிகளில் இணைந்துகொண்டவருமான புதுவை இரத்தினதுரை இன்னமும் தடுப்புக்காவலில் உள்ளதாக இலங்கை அரச சார்பு பேரினவாத ஊடகமான திவயின செய்தி வெளியிட்டுள்ளது. ரெலோ இயக்கம் அழிக்கப்பட்டதும் புலிகளின் இலக்கிய நிகழ்வுகளில் இணைந்துகொண்ட புதுவை பின்நாட்களில் புலிகளின் பிரச்சாரக் கவிஞரானார். தமிழீழ விடுதலைப் புலிகளின் பண்பாட்டுக்கழகத்தின் பொறுப்பாளராகவிருந்த புதுவை இரத்தினதுரை வன்னிப்படுகொலையின் பின்னர் இலங்கை அரசிடம் சரணடைந்த புலிகளின் உயர்மட்ட உறுப்பினர்களில் ஒருவராகக் கருதப்படுகின்றார்.
சரணடைந்த புலிகளின் உயர்மட்ட உறுப்பினர்கள் குறித்த தகவல்கள் எதுவும் வெளியிடப்படாத நிலையில் புதுவை இரத்தினதுரை குறித்த தகவல்கள் வெளியாகியுள்ளன. அதே வேளை புதுவை இரத்தினதுரையை விடுதலை செய்யக் கோரும் பிரச்சாரங்களை சிலர் புலம்பெயர் நாடுகளில் ஏற்கனவே ஆரம்பித்திருந்தனர் என்பது குறிப்பிடத்தக்கது.
