பாலகுமார், யோகி மரணம் : அரசியல் கைதிகளின் நிலை?

தமிழ் அரசியல் கைதிகள் சாரிசாரியாக விசாரணையின்றித் தடுத்துவைக்கப்பட்டுள்ளனர். இனச்சுத்திகரிப்ப்பைத் திட்டமிட்டு நடத்திவரும் இலங்கை அரசு கைதிகளின் சிறைக்கூடங்கள் குறித்த விபரங்களைக் கூட வெளியிட மறுக்கிறது. இலங்கை வதை முகாம்களின் கோரம் எவ்வாறு அமைந்திருக்கும் என்பதற்கு பாலகுமார், யோகி ஆகியோரின் மறைவு சான்றுகளாகும்.
கடந்த வருடம் இவர்கள் கொழும்பில் தடுத்துவைக்கப்பட்டுள்ளனர் என்ற தகவல்களை இலங்கை அரச சார்பு ஊடகங்கள் வெளியிட்டன.
இந்தநிலையிலேயே இவர்கள் வன்னி இறுதிப்போரின் போது கடந்த ஆண்டு கொல்லப்பட்டு விட்டதாகக் கூறியிருக்கிறார் சிறிலங்காவின் சிறைச்சாலைகள் மீளமைப்பு, புனர்வாழ்வு அமைச்சர் டியூ.குணசேகர.

போரினால் கணவனை இழந்தவர்களுக்கு உதவிகளை வழங்குவதற்கு அவசரத் திட்டம் ஒன்று நடைமுறைப்படுத்தப்பட வேண்டியுள்ளதாக அவர் கொழும்பு ஆங்கில நாளிதழுக்குத் தெரிவித்துள்ளார். வவுனியா,யாழ்ப்பாணம். கிளிநொச்சிப் பகுதிகளில் போரினால் கணவனை இழந்த பெண்களைச் சந்தித்த பின்னரே அவர் இவ்வாறு கூறியிருக்கிறார்.

அவர் அந்தப் நாளிதழுக்கு மேலும் கருத்து வெளியிடுகையில், தான் சந்தித்த கணவனை இழந்த பெண்களுள் க.வே. பாலகுமாரனின் மனைவி மற்றும் யோகரட்ணம் யோகியின் மனைவியும் உள்ளடங்கியிருந்தனர் என்று கூறியிருக்கிறார். பாலகுமாரன் கடந்த ஆண்டு வன்னி கிழக்கில் நடந்த போரின் போது கொல்லப்பட்டு விட்டதாகவும் அவர் கூறியுள்ளார்.