அமெரிக்க ஜனநாயகம் பணத்தை எங்கே பதுக்கியது?

ஜனநாயகத்தின் பேரால் உலகம் முழுவதும் போரையும் அழிவுகளையும் கட்டவிழ்த்துவிடும் அமெரிக்காவின் உட்புறத்தில் அவலத்தில் வாழும் மக்கள் கூட்டம் ஒன்று உருவாகிவருகிறது. அண்மையில் வெளியிடப்பட்ட தகவல்களின் அடிப்படையில் 35 வயதுக்கு உட்பட்ட இளைஞர்களில் 29 வீதமானவர்கள் தமது பெற்றோருடனேயே வாழ நிர்பந்திக்கப்பட்டுள்ளனர் எனத் தெரியவருகிறது. குறிப்பாக 18 வயதிற்கும் 31 வயதிற்கும் இடைப்பட்ட இளைஞர்களில் 36 வீதமானவர்கள் இன்னும் பெற்றோருடனேயே வாழ்வதாகத் தெரியவருகிறது.

வேலையின்மை, வாழ்க்கைச் செலவின் அதிகரிப்பு, இருப்பிடச் செலவின் தாக்கம் ஆகியன சமூகத்தில் ஏற்பட்ட இந்த மாற்றத்திற்குக் காரணம் என ஆய்வுகள் தெரிவிக்கின்றன.

உலகம் முழுவதையும் உலுக்கும் வறுமைக்கும் வேலையின்மைக்கும் வாழ்க்கைச் செலவிற்கும் யார் காரணம் என்ற கணக்கும் வெளியிடப்பட்டுள்ளது. அமெரிக்காவின் முதல் 400 பணக்காரர்களின் பெறுமதி 2 ரில்லியன் டொலர்கள் எனக் கணக்கிடப்பட்டுள்ளது. இத்தொகை 2012 ஆம் ஆண்டை விட 800 பில்லியன் அதிகமானதாகும்.

பத்துவருடங்களுக்கு முன்னைய தொகையை விட இரண்டு மடங்கிற்கு சற்று அதிகமானதாகும். ஆக, பொருளாதார நெருக்கடி என்ற பெயரில் அமெரிக்க அரசு மக்களின் பணத்தை பணக்காரர்களின் வீடுகளுக்கு அனுப்பிவைத்துவிட்டு மக்களை வறுமைக்குள் வாழப்பழக்கி வருகிறது. இதனையே அவர்கள் ஜனநாயகம் என அழைக்கின்றனர், பணம்படைத்தவர்களுக்கான இந்த ஜனநாயகதை மக்கள் புரிந்துகொள்ள ஆரம்பித்துள்ளனர், மக்கள் தாம் வாழ்வதற்கான புதிய ஜனநாயக முறைமையை விரைவில் உருவாக்குவார்கள் என்பதற்கான அனைதுது அறிகுறிகளும் தென்பட ஆரம்பித்துவிட்டன..