Tag Archives: T .சௌந்தர்

தமிழ்த்திரை இசையில் ராகங்கள் : [ 5 ] : T.சௌந்தர்

ராக ரசங்களில் ஊற்றெடுத்து நமது உள்ளார்ந்த உணர்வலைகளில் பேருணர்ச்சியை எழ வைத்த சினிமாப் பாடல்கள் ஏராளம்.அந்த வகையில் ராகங்களின் நுண்ணிய கூறுகளிலிருந்து விரிந்தெழுந்து கதை மாந்தரின் இன்னிசைப் பாடல்களாக தோன்றி , இசை ரசிகர்களின் ஆன்மாவை ஊடுருவி ஆழ வேரூண்றியுள்ளமை அவற்றின் சிறப்பாகும்.

அவ்விதம் உருவான பாடல்கள் காலக்கழிவாக போகாமல் மக்கள் நெஞ்சங்களில் எரியும் கனல்களாக, நிலைபெற்ற் பாடல்களாக்கி, மக்களின் இதயத்தில் பதிய வைத்த திரை இசையமைப்பாளர்களின் பேரார்வம வியக்கத்தக்கது.அவர்கள் அடைந்த “தம்மை மறந்த படைப்புப் பரவச” [ Unconscious creative impulse ] அனுபவத்தை மற்றவர்களும் பெற வைத்தது அவர்களது பேராற்றாலாகும்.

மரபு, மரபாக வந்த ராகங்களில் தாம் அடைந்த இன்பத்தை,அனுபவத்தை பிறரும் அனுபவிக்க வேண்டும் என அவர்கள் காட்டிய பேரார்வத்துடிப்பு அதன் மூலகாரணமாய் அமைந்தது.மரபிசையில் தாம் கண்ட ஒலியின்பங்களை தங்கள் காலத்து இசைப் போக்குககளில் பொருத்தமாக இணைத்தும், இழைந்தும் ரசம் ததும்பும் பாடலக்ளைத் தந்து பல சந்ததிகள் தாண்டி ரசிக்கக் கூடிய பாடல்களைத் தந்தார்கள். அவை நாம் பெற்ற பாக்கியமாகும்.

பெரும்பாலான நமது இசையமைப்பாளர்கள் தமிழ் செவ்வியல் இசையில் ஆழ்ந்த அறிவு பெற்றிருக்கவில்லை என்பது பெருங் குறையாக கருதப்பட முடியாது.நாடக மரபில் வந்த அவர்கள் ராகங்கள் பற்றிய அடிப்படையான சில விசயங்களைத் எடுத்துக் கொண்டு உணர்ச்சி வெளிப்பாட்டை, கலை நயத்தோடு காண்பிப்பதில் கரை கண்டவர்களாக விளங்கினார்கள்.தம்மை வளர்த்துக் கொள்ள தமிழ் செவ்வியல் இசை வார்ப்புகளில் உந்துதல் பெற்றார்கள்.

அந்த உந்துதல் அல்லது வேட்கை, ராகங்களை ஜீவநதியாக ஓட வைத்தது.ராகக் கூறுகளை நவீனத்துடன் இணைத்து, இணைத்து மரபுக் கோடு அறுபடாமல் பாதுகாத்தார்கள்.இன்று பல நிலைகளில் ராக இசை குலைந்தாலும்,அங்காங்கே அதன் கோடு தொடர்கிறது.

தமிழ் செவ்வியல் இசையில் எண்ணற்ற ராகங்கள் இருந்தும் ஒரு குறிப்பிட்ட சில ராகங்களின் பிரயோகம் நாடகத்திலிருந்து சினிமா வரை பல தசாப்தங்களாக எதிரொலித்துக் கொண்டேயிருக்கிறது.அவை புதுமை நோக்கில் பயன்படுத்தப்பட்டமையே காரணம் எனலாம்.அதே போல பிற இராகங்கள்

தமிழ் இசையில் ஆதியில் 12.000 ராகங்கள் வழக்கத்தில் இருந்ததென்றும் , அவை வர வரக் குறைந்து வந்ததென்றும் தமிழசை ஆய்வாளர்கள் கூறுவர்.இன்றிருக்கும் பல நூறு ராகங்களில் சிலவே உயிர்ப்புடன் இருப்பதுடன் பொதுமைப்பண்பில் சிறப்பாகவும் இருக்கின்றன.நினைக்க, நினைக்க ஆழ்ந்த இனபம் தரும் திரைப்பாடல்களில் இலைமறை காயாய் அந்த இராகங்கள் விளங்கின.இவ்வகைத் திரையிசைப் பாடல்கள் சமுதாயத்தில் ஒரு புதிய விழிப்புணர்ச்சியை உண்டாக்கியது.

தமிழ் திரையிசையின் பரிணாம வளர்ச்சிப் போக்கில் 1940 களிலிருந்து மாற்றம் கண்டு வளர்ந்துள்ளது.பாடல் இசையமைப்பு முறை , பாடும் முறை , வாத்திய அமைப்பு முறை போன்றவற்றில் அந்தந்தக் காலத்துக்கு ஏற்ப புதுமைகள் முன்னணிக்கு வந்து சென்றுள்ளன.காலத்துக்காலம் ஏற்ப்படும் புதுமைகள் அந்தக் காலத்திலேயே முதன்மை இடத்தை வகித்து பின் அதன் மதிப்பை இழக்க, வேறொரு புதிய முறை அதற்கு முன்பிருந்த முறையிலிருந்து உருவாகுவதால் அவை பழமையிலிருந்து உயிர் பெறுகிறது எனலாம்.

1940 களில் இருந்து 1990கள் வரை வெளியான தமிழ்திரை இசைப்பாடல்களை நினைவிலிருத்துவோமாயின் ராகங்கள் இயக்குசக்தியாக ,உந்துதல் சக்தியாக , சிறப்புக் கூறாக அமைத்துள்ளது.

popdance1990 களின் பின் உலகமயக் கொள்கைகள் ” அரச கொள்கையாக ” அறிமுகமாகியதுடன் பல துறைகளிலும் ஆதிக்கம் செலுத்தத் தொடங்கியது. அது திரை இசையிலும் மிகக் குறுகிய காலத்தில் புகுந்து ஆடிப்படைத்து வருகிறது.புதிய உலகமயக் கொள்கை ஆதரவாளர்களான மேட்டுக்குடியினர்,மேட்டுக்குடியினராகத் துடிக்கும் நடுத்தர ,படித்த வர்க்கத்தினரின் குண இயல்புகளுக்கு தீனி போடுவதாகவும் மாறி கறை படிந்து வருகிறது.

பாரதி சொன்ன ” ஓரிரண்டு வருஷ பழக்கம் உள்ள தமிழ் மக்கள் எல்லோருக்கும் விளங்கும் படி ” என்றில்லாமல் தமிழ் மக்களின் அடையாளமாக இருக்கும் இசையின் கூறுகளை அழித்தொழிக்கும் கலைத் திறனற்ற குப்பைகளை உருவாக்குவதிலும் உந்துதல் காட்டி வருவது வருந்தத் தக்கதாகவே உள்ளது.எல்லாவற்றையும் ஆங்கில மோகக்கண்ணாடி அணிந்து கொண்டு சந்தைச் சரக்காக மாற்றி தமிழ் சார்ந்த மெல்லிசைக்கு கொள்ளி வைத்தாயிற்று.பிறருடையதை எல்லாம் தங்கள் சொந்தச் சரக்காக செய்து தங்கள் பண்பாட்டைப் படுகொலைக்குள்ளாக்குகிறார்கள்.அவர்களை வைத்தே தேசிய கீதம் பாட வைப்பது அறச்சிதைவாகும்.

தமிழ் திரையில் ராகங்கள் தொடர்ச்சியாக பயன்பட்டு வந்ததெனினும் , குறிப்பாக ஒரு சில ராகங்களே தொடர்ச்சியாகப் பயன்பட்டு வந்துள்ளன.இராகங்களின் அடிப்படையான குணாம்சங்களை, மரபு ரீதியாக சொல்லப்பட்டு வந்த நியமநெறிகளை அனுசரித்தும், தாண்டியும் இசை இன்பச் சிதறல்களாக , நவரசங்களை இசை வடிவங்களில் சுதந்திரமாக ராகங்களின் இயல்பையும் அதன் மூலம் உணர்வுகளின் உன்னத நிலைகளையும் அழகாக பொருத்தித் தந்திருக்கின்றார்கள்.ராகங்களை தாம் விரும்புவது போல, தமது ஆளுமைக்கு ஏற்ப படைத்து அந்த அனுபவ உணர்வை பிறரும் உணரும்படி செய்து வெற்றி கண்டிருக்கின்றார்கள்.

நாடக அரங்கில் புகழ் பெற்று சினிமாவிலும் சாதனை படைத்த ராகங்களில் முதன்மையான ஒன்று ஆபேரி ராகம்.தங்கள் படைப்புத் திறனுக்கு வாய்ப்பாக இசையமைப்பாளர் அதிசயக்கத் தக்க வகையில் பயன்படுத்தியிருக்கும் ராகம் இந்த ஆபேரி.மக்கள் இதயங்ககளை வெல்லும் தங்கள் இலக்கில் சுதந்திரமாக எந்த தயக்கமுமில்லாமல் இசை மெட்டுக்களை உருவாக்கி அற்ப்புதங்களைச் செய்து காட்டியிருக்கின்றர்கள் நமது சினிமா இசையமைப்பாளர்கள.

கரகரப்பிரியாதமிழ் செவ்வியல் இசையில் இந்த ராகம் 22 ஆவது மேளகர்த்தாவான கரகரப்பிரியா என்ற ராகத்தின் பிள்ளை ராகம்.கர்நாடக் தேவகாந்தாரி என்று தமிழில் இதற்க்கு இன்னும் ஒரு பெயர் உண்டு. இந்த ராகத்தை ஹிந்துஸ்தானி சங்கீதத்தில் பீம்பிளாஸ் என்று அழைக்கின்றனர்.மிகவும் புகழ் வாய்ந்த ராகம்.மிக எளிதில் மக்களின் மனங்ககளில் ஒட்டக்கூடிய ராகம்.உள்ளக்கிளர்ச்சியை ஏற்ப்படுத்தி உணர்வுகளை மேம்பட வைக்கின்ற இந்த ராகம் ,மேம்போக்காக பாடினாலும் மனக்கிளர்ச்சியை உண்டாக்கும் கம்பீரமான ராகம்.நாதஸ்வர இசையில் கேட்க்கும் போது இதன் முழுமையான இன்பத்தை இன்பத்தை நாம் நுகரலாம்.
இந்த ராகத்தில் செவ்வியல் இசையில் கீழ் கண்ட கீர்த்தனைகள் பிரபலமாக உள்ளன.

பஜரே மானச ஸ்ரீ ரகு வீரம் – மைசூர் வாசுதேவாச்சாரியார்
நகுமோ நீ கனலேனி நாதா – தியாகய்யர்
காயா ரோகனேத்யம் – முத்துசுவாமி தீட்சிதர்

இவற்றில் நகுமோ கனலேனி என்ற தியாகராஜர் கீர்த்தனை கர்னாடக இசை மேடைகளில் மிக்க புகழ் பெற்றது.இந்தப் பாடல் பல சினிமாக்களிலும் இடம் பெற்று புகழ் பெற்றது.
அல்லுடுகாரு [ 1990 ] என்ற தெலுங்கு திரைப்படத்தில் இசைமேதை கே.வீ.மகாதேவன் இசையில் , கே.ஜே.ஜேசுதாசும் , பூர்ண சந்தர் என்ற பாடகரும் மிக அற்ப்புதமாக இந்தப் பாடலை பாடியுள்ளனர்.மெய்சிலிர்க்க வைக்கின்ற சங்கதிகள் நிறைந்த கீர்த்தனை.சங்கரதாச சுவாமிகள் தனது நாடகங்களில் அற் ப்புதமாகப் பயன்படுத்திய ராகம்.அந்த ராகத்தின் அதி சியர்ப்புக்களை அனுபவித்ததால தான் திரை இசையமைப்பாளர்களும் விடாமல் பயன்படுத்தி வந்துள்ளனர்.இந்த ராகத்தின் சிறப்பை சொல்ல வார்த்தைகளில்லை.இந்த வாழ்வை முழுமையாகக வேண்டும் என்றால் இந்த ராகத்தை அனுபவிக்க வேண்டும்.

1940 களில் இருந்து தமிழ் – ஹிந்தி சினிமாக்களில் ஆபேரி ராகத்தில் ஏராளமான பாடல்கள் வெளிவந்திருக்கின்றன. இப்போதும் ஆங்காங்கே வந்த வண்ணம் இருக்கிறன.இனிமைமிக்க ஆபேரி ராகத்தில் அமைந்த பாடல்கள் சிலவற்றைப் பார்ப்போம்.

ஆபேரி ராகத்தில் அமைந்த பாடல்களின் முழுமையான் தொகுப்பு அல்ல இது.ஏதாவது தவறு இருப்பின் , விபரம் தெரிந்தவர்கள் சுட்டிக்காட்டினால் திருத்திக் கொள்ளலாம்.

சூலமங்கலம் சகோதரிகள் பாடும் ” கந்த சஷ்டி கவசம் ” பாடலின் ஆரம்பமே ஆபேரி ராகத்திலேயே தொடங்கும்.

துதிப்போர்க்கு வல்வினை போம் துன்பம் போம் – நெஞ்சில்
பதிப்போர்க்குச் செல்வம் பலித்துக் கதித்தோங்கும்
நிஷ்டையும் கைகூடும் நிமலர் அருள்
கந்தர் சஸ்டி கவசந்தனை
அமரர் இடர் தீர அமரம் புரிந்த ∙
குமரன் அடி நெஞ்சே குறி …

என்று ஆரம்பிக்கும் வரிகளும் தொடரும் வீணை இசையும் உள்ளத்தை அந்த இசைக்குள் இழுத்துவிடும்.அப்படி ஓர் ஈர்ப்பை ஏற்ப்படுத்தி மக்களை வசப்படுத்தும் வல்லமை ஆபேரிக்கு தான் உண்டு.

” உள்ளம் உருகுதையா முருகா உன்னடி காண்கையிலே ” என்ற பாடலும் [ பாடலை எழுதியவர் கவிஞர் வாலி] , பாடல் வரிகளுக்கு ஏற்ப ஆபேரி ராகத்தில் அமைக்கப்பட்டது போலும்! T.M .சௌந்தரராஜன் நன்றாகப் பாடிய பாடல்களில் ஒன்றாகும்.

சந்தனமும் ஜவ்வாதும் சேர்ந்து மணம் கமள….

yesudas“சந்தனமும் ஜவ்வாதும் சேர்ந்து மணம் கமள “என்றொரு பக்திப்பாடல் கே.ஜே.ஜேசுதாஸ் பாடி புகழ் பெற்ற பாடல்.1980 ம் வருடம்யாழ்ப்பாணத்தில் நடைபெற்ற இசைக்கச்சேரியில் முதன் முதலில் கேட்கும்வாய்ப்பு கிடைத்தது.மிக அற்ப்புதமாக , தனது கம்பீரக் குரலால் கே.ஜே.ஜேசுதாஸ் பாடி இசை ரசிகர்களை அன்று பிரமிக்க வைத்தார்.அதை தொடர்ந்த எத்தனையோ வருடங்களாக என்னை ஆக்கிரமித்த பாடல் இது. இந்தப் பாடலை மெல்லிசை கச்சேரியில் ஒரு விதமாகவும் , கர்னாடக இசை நிகழ்ச்சியில் வேறு விதமாகவும் பாடி நம்மை அன்று பரவசபடுத்தினார் ஜேசுதாஸ்.

1. பித்தன் என்றாலும் அவன் பேயன் என்றாலும் -பாடியவர்:என்.சி.வசந்தகோகிலம்
மிகவும் புகழ் பெற்ற பாடல்.1940 களில் மிகவும் புகழ பெற்ற பாடகியாக விளங்கிய என்.சி.வசந்தகோகிலம் என்கிற பாடகி பாடிய பாடல்.ஆபேரியின் மிக அழகான வார்ப்பு. இந்தப் பாடல் சினிமாவில் வந்ததா அல்லது தனிப்பாடலா என்பது பற்றிய விபரம்தெரியவில்லை.அற்ப்புதமான பாடல். இந்த பாடலை சில வருடங்களுக்கு முன்பு சுதா ரகுநாதன் மீண்டும் பாடியிருந்தார்.

2. வீணையின் இனிமையைத் தரும் – படம் :ராமராஜ்ஜியம் [1940 ]
இந்த பாடலும் என்.சி.வசந்தகோகிலம்பாடிய அழகான பாடல்.ஆபேரி ராக உருவத்தில் மெல்லிசையின் கூறுகள் அழகு சேர்க்கின்ற பாடல்.

3. மனமே கணமும் மறவாதே – படம் :சாவித்திரி – பாடியவர்:எம்.எஸ் .சுப்புலட்சுமி – இசை : – கவிஞர் :பாபநாசம் சிவன்
எம்.எஸ் .சுப்புலட்சுமி அவர்கள் மிகவும் சிறப்பாகப் பாடிப் புகழ் பெற்ற பாடல். இசைரசிகர்கள் மனதில் என்றென்றும் வாழும் பாடல்.

4. எப்படி பாடினரோ – தனிப்பாடல் [ Private Albam ]-பாடியவர்:டி.கே..பட்டம்மாள்
தமிழ் பாடல்களை பாடுவதில் முன்னணியில் நின்ற டி.கே.பட்டம்மாள் பாடிய அழகான பாடல்.ஆபேரி ராகத்திற்கு எடுத்துக் காட்டாக இன்று பரவலாக எல்லோராலும் பாடப் படுகின்ற பாடல்.தற்காலத்தில் இந்த பாடலை பாடி அதன் புகழைப் பரப்பி வருபவர் டி.கே.பட்டம்மாளின் பேத்தி நித்யஸ்ரீ.

5 .வெள்ளை தாமரை பூவி இருப்பாள்- பாரதி பாடல் – பாடியவர் :

தனிப்பாடல்[ PRIVATE SONG ] என்று அந்தக்கால இசைத்தட்டாக வந்த பாரதி பாடல்.இந்த பாடலைப் பல கலைஞர்களும் பாடியிருக்கின்றார்கள்.மிக சமீபத்தில் உன்னிகிருஷ்ணனும் பாடியிருக்கின்றார் என்பது குறிப்பிடத்தக்கது.ஆபேரி என்ற ராகம் என்றதும் பலருக்கும் நினைவுக்கு வருகின்ற பாடல இதுவாகும்.பாடசாலைகளில் சரஸ்வதிப்பூஜைகளில் அதிகம் பாடப்படுகின்றபாடல்.

6 . ஆருயிரே அமுதே- படம் : பாண்டுரங்கா [1939 ] – பாடியவர் : கிருஷ்ணமூர்த்தி + சிவபாக்கியம்

ஜோடியாகப் பாடப்படும் காதல் பாடல்.தமிழ் செவ்வியல் இசைப்பாங்கில் நிறைய கமகங்கள் வைத்து அமைக்கப்பட்ட பாடல். 1940 களின் காதல் பாடல்களுக்கு உரிய போக்கு இந்தபாடலில் தென்படும்.பாடியவர்கள மிக அருமையாக , உணர்வு பொங்கப் பாடியிருப்பது சிறப்பான அம்சம்.சில் இடங்களில் மெய் சிலிரிக்க வைக்கும்பாடல்.

7. மானும் மயிலும் ஆடும் சோலை – படம் :அபூர்வ சகோதரர்கள் – பாடியவர்:பி.பானுமதி – இசை : எஸ்.ராஜேஸ்வர ராவ்

ராகத்தை மெல்லிசையால் மறைத்து பாடப்படும் இனிமையான காதல்பாடல்.எஸ்.ராஜேஸ்வரராவ் மெல்லிசை பாடல்களைத் தந்த முன்னோடிகளில் ஒருவர்.மிகச் சிறிய பாடல்.

ஆபேரி ராகத்தில் பிரமிக்க தக்கவகையில் பல வெற்றி பாடலக்ளைத் தந்தவர்களில் முதன்மையான முன்னோடி இசையமைப்பாளர் ஜி.ராமநாதன்.அவருடைய வெற்றிப் பாடல்கள் [Hits songs ] வரிசையை பார்த்தாலே அது புரியும். ஒரே ராகம் தான்ஆனாலும்,பாடலுக்குப் பாடல் மிக வித்தியாசமான நிறங்களை , ரசங்களை வெளிப்படுத்தி வெற்றி கண்டார் ஜி.ராமநாதன்.

8. வாராய் நீ வாராய்- படம் :மந்திரிகுமாரி [ 1949 ] – பாடியவர்கள்:திருச்சி லோகநாதன் + ஜிக்கி – இசை :ஜி ராமநாதன்

ஜி.ராமநாதன் இசையமைத்த இந்தப் பாடல தமிழ் நாட்டையே ஓரூ கலக்குகலக்கிய பாடல் என்று சொல்வார்கள்.இன்று கேட்டாலும் சுவை குன்றாத பாடல்.தமிழ் சினிமாவில் ஹிந்தி திரைப்படபாடலகளின் பாதிப்பில்லாமல் தனித்துவமாக இசையமைக்க முடியும் என்றதைரியத்தை வழங்கிய பாடல் என்று சொல்லலாம்.

9. நம் ஜீவாதரமே செல்வம் -படம்: பொன்முடி 1950 – பாடியவர்கள்: ஜி ராமநாதன்+ டி.வீ.ரத்தினம் – இசை :ஜி ராமநாதன்

ஜி .ராமநாதன் , தனது கனத்த குரலில் எழுச்சியூட்டக் கூடிய வகையில் பாடிய பாடல். பொருள் வளத்தின் முக்கியத்துவத்தை பறை சாற்றும் பாடல். இசைமேதை நௌசாத் இசையமைத்த ” தூ மேரே சாந்து நீ ” என்ற பாடலின் தாக்கம் மிக்க பாடல்.

10. யானை தந்தம் போலே பிறை நிலா – படம் :அமரகவி[1952 ] – பாடியவர்கள்:தியாகராஜபாகவதர்+ பி.லீலா – கவிஞர் :கம்பதாசன் – இசை :ஜி ராமநாதன்

தன்னுடைய இனிமையான குரலில் தியாகராஜபாகவதர் பாடிய அற்ப்புதமான பாடல். மெல்லிசைப் பாங்காக அமைந்தாலும் அருமையான சங்கதிகளைக் கொண்ட பாடல். ஒலிப்பதிவு வசதிகள் குறைந்த அந்தக் காலத்திலேயே மிக நேர்த்தியாக பாடலின் நிறைவில் ஒன்றுக்குள் ஒன்றாக ஒலிக்கின்ற ,இசையுக்திகள் பயன்படுத்தப்பட்டுள்ள பாடல். இன்று கேட்கும் போதும் மலையில் வீசும் குளிர்த் தென்றல் தழுவும் சுகத்தை தருகின்ற பாடல்.
இந்தப்பாடலின் தாக்கம் ஹிந்தி சினிமாவிலும் எதிரொலித்தது என்று சொல்லுமளவுக்கு ஒரு பாடல் இந்தப் பாடல் வெளிவந்த சில வருடங்களுக்கு பின் வெளிவந்தது.

11. பேரின்பமே வாழ்விலே நேர்ந்ததே – படம் :தேவகி[1952 ] – பாடியவர்கள்:திருச்சி லோகநாதன் + பி.லீலா – இசை : ஜி ராமநாதன்

வேகத்துடன் ஆரம்பிக்கும் பாடல்.துரிதமான கமகங்களால் அழகு பெற்றுள்ள பாடல்.வேகமாகப்பாடினாலும் இனிமை குன்றாமல் பாடக் கூடிய பி.லீலா கச்சிதமாகப் பாடிய பாடல்.ஜி.ராமநாதன் அவர்களின் முத்திரை பாடலில் தெரியும்.

12. கேட்பதெல்லாம் காதல் கீதங்களே – படம் :இல்லறஜோதி[1955 ] – பாடியவர்:பி.லீலா – இசை : ஜி ராமநாதன்

இசைக்குயில் பி.லீலா மிகச் சிறப்பாகப் பாடிய பாடல். செவ்வியல் இசை அடிப்படையில் அமைக்கப்பட்ட பாடல்.அந்த காலத்தில் இந்த வகை பாடலை பாடுவதில் புகழ் பெற்றிருந்தவர் , கர்னாடக இசை பாடகி எம்.எல்.வசந்தகுமாரி , இருந்தாலும் பி.லீலாவும் மிக அற்ப்புதமாகப் பாடக்கூடியவர் என்பதை பல பாடல்கள் மூலம் ஜி.ராமநாதன் நிரூபித்திருக்கின்றார்.என்னை பொருத்தவரை பி.லீலா எள்ளளவும்எம்.எல்.வசந்தகுமாரிக்கு குறைந்தவரில்லை என்பது எனது கருத்தாகவே இருந்து வந்துள்ளது.எனது குடும்பத்தில் , குறிப்பாக எனது தந்தை[எம்.எல்.வசந்தகுமாரி அபிமானி ] எனது கருத்தை அவ்வளவாக ஏற்றுக்கொள்வதில்லை.அது ஒரு புறம் இருந்தாலும் பி.லீலா பாடுவதில் எந்த குறையையும் காண முடியாது என்பது தான் உண்மை. செவ்வியல் இசை ரசிகர்களால் ரசிக்கப்பட்ட பாடல்.

12. கண்ணல்ல தூங்கம்மா – படம்:இல்லற ஜோதி 1956 – பாடியவர்:பி.லீலா – இசை :ஜி ராமநாதன்

தாலாட்டு பாடல்களுக்கு பயன்படும் சம்பிரதாயமான ராகங்கள் என இல்லாமல் ஆபேரி ராகத்தில் போடப்பட்ட தாலாட்டு பாடலாகும். இது தமிழ் சினிமாவின் முதல் முயற்சி எனலாம்.இதனைப் பின்பற்றி பின்னாளில் மெல்லிசை மன்னர்கள் விஸ்வநாதன் ராமமூர்த்தி காலத்தில் ஆபேரி ராகத்தில்” சிங்கார புன்னகை கண்ணாரக் கண்டாலே” என்ற தாலாட்டுப் பாடலை அமைத்துபெரும் புகழ் அடைந்தார்கள்.

13. சிங்கார புன்னகை கண்ணாரக் கண்டாலே – படம் :மகாதேவி [1957 ] – பாடியவர்கள்:பாலசரஸ்வதிதேவி +ராஜேஸ்வரி – இசை :விஸ்வநாதன் ராமமூர்த்தி- கவிஞர் :கண்ணதாசன்.

இந்தப்பாடலின் இனிமையும்,அதனால் அடைந்த புகழும் தமிழ் சினிமாவில் தாலாட்டு பாடல் என்றாலே ஆபேரி ராகம் என்று ஒரு trendஉருவாகியது. தாலாட்டுப்பாடல்களாக வெளி வந்து மாபெரும் வெற்றியடைந்தது.

தாய்மையின் உணர்வை மிக அழகாக வெளிப்படுத்தும் மென்மையான குரல் வளம் கொண்ட பாலசரஸ்வதிதேவி அழகாகப் பாடிய பாடல்.இதே பாடல் படத்தில் சிறை காட்சியிலும் ஒலிக்கும்.மனதை நெகிழ வைக்கும் முறையில் ராகமாலிகையாக ஒலிக்கும்.மிக மிக உருக்கமாக ஒலிக்கும்பாடல். தியேட்டரில் இந்த பாடலைக் கேட்டு அழாதவர்கள் இருந்திருக்க முடியாது எனலாம்.

14. ஏன் பிறந்தாய் மகனே ன் பிறந்தாயோ- படம் :பாகப்பிரிவினை [1959 ] – பாடியவர்கள்:TMS – இசை : விஸ்வநாதன் ராமமூர்த்தி – கவிஞர் :கண்ணதாசன் ]

கை , கால்கள் வழங்காத ஒருவன் தன மகனை தாலாட்டும் விதத்தில் பாடப்பட்டாலும் , தன மனைவியையும் அவள் தனக்காக செய்திருக்கும் தியாகத்தையும் போற்றும் ஓர் அருமையான பாடல்.தாலாட்டு என்றாலும் தன மனைவிக்கு தன்னால் கிடைக்காத மகிழ்க்ச்சி தன மகனாலாவது கிடைக்க வேண்டும் என சிறப்புறுத்தி காட்டுவதாகவே பாடல் அமைந்துள்ளது.

” மண் வளர்த்த் பொறுமை எல்லாம் மனதில் வளர்ததவளாம் ” என்ற வரிகளை பாடும் போது பாடலின் உணர்ச்சி நம்மைஆட்கொண்டுவிடுகிறது.அங்கே ஆபேரி துலங்குகிறது.

15. மலர்ந்தும் மலராத பாதி மலர் போல – படம் :பாசமலர் [1960 ] – பாடியவர்கள்:TMS + பி.சுசீலா – இசை : விஸ்வநாதன் ராமமூர்த்தி -கவிஞர் :கண்ணதாசன்

இந்தப் பாடல் இன்றளவும் சுவை குன்றாமல் இனிக்கின்ற பாடல். என்றென்றும் அழியாத பாடலாக காலத்தை வென்று நிற்கின்ற பாடலாகவும் உள்ளது எனலாம்.மெல்லிசை வார்ப்பில் அமைந்த அற்புதப் பாடல்.ராகத்தை மறைத்து உணர்வுக்கு முக்கியத்துவம் கொடுக்கும் மெல்லிசை மன்னர்களின் சாகாவரம் பெற்ற பாடல்.போலித்தனமும் , உள் ஒன்று வைத்து புறம் ஒன்று என வாழாத , எந்தவித எதிர்பார்ப்பும் இல்லாத,உண்மையான சகோதர பாசத்தை , அதன் ஆன்மாவை ஊடுருவி சென்ற பாடல்.

16. சின்ன அரும்பு மலரும் – படம்:பங்காளிகள் [1960 ] – – பாடியவர்கள்: திருச்சி லோகநாதன் + பி.சுசீலா -இசை :எஸ்..தட்சிணாமூர்த்தி
தமிழ் சினிமாவில் வந்த தாலாட்டுப்பாடல்களில் மிகவும் முக்கியமான பாடல்.திருச்சி லோகநாதன் தனியேயும் , பி.சுசீலா தனியேயும் பாடிய பாடல.இருவரும் மிக அற்ப்புதமாகப்பாடிய பாடல்.தாலாட்டு பாடலில் உணர்ச்சி செறிவுமிக்க இன்னுமொரு பாடல.

ஜி.ராமநாதன் இசையமைத்த ஆபேரி ராகப் பாடல்கள்:

17. அன்பே என் ஆரமுதே வாராய் – படம்:கோமதியின் காதலன்1956 – பாடியவர்: சீர்காழி +ஜிக்கி – இசை :ஜி ராமநாதன்
ராகத்தில் புதைந்திருக்கும் ஜீவன்களை வெளிக்கொண்டு வருவதில் நிபுணரான ஜி.ராமநாதன் அவர்களின் இசையில் உணர்வுகள் ததும்பும் காதல் பாடல்.ஜனரஞ்சகக் கற்பனையை உசுப்பிவிடும் பாடல்.ஆனந்தம் என்று சொல்வதா ..? அற்ப்புதம் என்று சொல்வதா..? அமுதம் என்று சொல்வதா..?இந்த பாடலை பாடிய .சீர்காழி கோவிந்தராஜனும், ஜிக்கியும் ஒப்புவமை இல்லாமல் பாடியிருக்கின்றார்கள்.சுருக்கமாகச் சொன்னால் மெய் சிலிர்க்க வைக்கும் பாடல் இது.
இதை எழுதும் பொது எனது அபிமான இசையமைப்பாளர் ஜி.ராமநாதனை நினைக்காமல் இருக்க முடியவில்லை.

18. கண்ணிலே இருப்பதென்ன கன்னி இள மானே – படம் :அம்பிகாபதி[1956 ] – பாடியவர்:பி.பானுமதி- இசை : ஜி ராமநாதன்
ஆபேரி ராகம் முழு ஜொலிப்போடு முழங்கும் அதே நேரம் ஜனரஞ்சக ரீதியிலும் மாபெரும் வெற்றி பெற்ற பாடல்.இதுவும் ஜி.ராமநாதன் அவர்களின் முத்திரைப்பாடல்.மெய்சிலிர்க்க வைக்கும் பாடல்.பி.பானுமதி பாடிய இந்தப் பாடல் தமிழ் மக்கள் என்றென்றும் ரசிக்கும் பாடல்களில் ஒன்றாகும்.பாட்டு பாட வராத என் தாத்தா ஒருவர் ” ஒரு கன்னி இள மானே ..ஒரு கன்னி இள மானே..” என்று பாடித்திரிந்த பாடல்.அம்பிகாபதி படத்தின் மிகப்பெரிய வெற்றி பாடலகளில் ஒன்று.இந்த பாடல் மகிழ்ச்சியாகப் பாடப்படாபாடல்.இந்த பாடலை சோகப்பாடலாக டி.எம். சௌந்தரராஜன் உணர்வு பொங்கப் பாடியிருப்பார். சிறிய பாடலாக அது அமைந்தாலும் உள்ளத்தைக் கவரும் பாடல் என்பதில் ஐயமில்லை.

19. ராஜயோகமே பாரீர் – படம் : வணங்காமுடி[1959 ] – பாடியவர்:பி.சுசீலா – இசை : ஜி ராமநாதன்
படகில் உல்லாசமாக தோழியருடன் நாயகி பாடும் பாடல்.நாமும் அந்த பயணத்தில் போகும் உணர்வை தருகின்ற பாடல்.உல்லாச உணர்வை வெளிப்படுத்த பெண்கள் குரல்களில் அற்ப்புதமான ஹோரஸ் பயபடுள்ளது.பி.சுசீலா வழமை போல மிகஅருமையாகப்பாடிய பாடல்.ஜி.ராமநாதவெள்ளத்தின் பிரமிக்க வைக்கும் கற்பனைப் பாடல்.
இந்தப்பாடலின் முடிவில் மிக அருமையான ஒரு மிக்ஸ் செய்திருப்பார் ஜி.ராமநாதன்.படத்தில் நாயகி இந்த பாடலை பாடி முடிக்கும் தருணத்தில், நாயகன் பாடல் ஹம்மிங்கில் ஆரம்பிக்கும்.முதல் பாடலின் இறுதியிலும் , நாயகன் பாடும் பாடலின் தொடக்கமும் இணைக்கப்படும்.அந்தப் பாடல் சீர்காழி கோவிந்தராஜன் பாடும் ” மலையே உன் நிலையை நீ பாராய் ..” என்ற ஜோன் புரி ராகப்பாடல்.நல்ல இணைவாக இரண்டு ராகங்களும் இணைக்கப்பட்டிருக்கும்.
20. பூவாமராமும் பூத்ததே -படம்: நான் பெற்ற செல்வம் – பாடியவர்கள்: டி .எம் சௌந்தரராஜன் + ஜிக்கி – இசை :ஜி ராமநாதன்
சௌந்தரராஜன் + ஜிக்கி இணைந்து ஜோடியாக பாடிய நல்ல பாடல்களில் இந்த இனிமையான காதல் பாடலும் ஒன்று.உருண்டோடும் தாளத்தில் ஜிக்கியின் விறுவிறுப்பான கமகங்கள் ஜி.ராமனாதனின் கம்பீரமான இசையமைப்பையும் காட்டும் அற்ப்புதமான பாடல்.

21. கண்களின் வெண்ணிலவே – படம்:மணிமேகலை 1959 – பாடியவர்கள்: டி.ஆர்.மகாலிங்கம்+ பி.பானுமதி – இசை :ஜி ராமநாதன்
ஜி.ராமனாதனின் இன்னுமொரு கம்பீரமான பாடல்.ஓங்கி குரல் எடுத்து உச்சஸ்தாயியில் பாடும் T.R.மகாலிங்கம் + P.பானுமதி பாடிய பாடல்.அமைதியாக தொடங்கும் பாடல் சரணங்களில் உச்சங்களைத் தொடும் பாடல்.ராமனாதனின் முத்திரை பாடல்.

22. வெள்ளிப்பனி மலையின் மீதுலாவுவோம்- படம்:கப்பலோட்டிய தமிழன் 1960- பாடியவர்: சீர்காழி கோவிந்தராஜன் – இசை :ஜி ராமநாதன்
இடையே இராகங்கள மாறி , மாறி ராகமாலிகையாக வருகின்ற பாடல் . முதல ஆரம்பம் ஆபேரியில் கம்பீரமாக ஒலிக்கின்ற பாடல் . திருச்சி லோகநாந்தனும் , சீர்காழி கோவிந்தராஜனும் கம்பீரமாகப் பாடிய பாடல்.

23. கண்ணன் மன நிலையை- படம்:தெய்வத்தின் தெய்வம்1963 – பாடியவர்கள்: இசை:எஸ்.ஜானகி – இசை :ஜி ராமநாதன்
சிங்காரவேலனே தேவா பாடல் வெற்றியின் தொடர்ச்சியாக எஸ்.ஜானகி பாடிய பாடல்.இதுவும் ஒரு புகழ் பெற்ற பாடல்.

24.அறம் காத்த தேவி- ஏ.எம்.ராஜா + ஜிக்கி – இசை: ஜி ராமநாதன்
மென்மையாகப் பாடக்கூடிய ஏ.எம்.ராஜாவையே கம்பீரமாக பாட வைத்த ஜி.ராமநாதனின் பாடல்.பின்னணியில் ஹோரஸ் மிக எழுச்சி தரும் வகையில் அமைந்த பாடல்.உற்சாகம் தரும் பாடல்.ஜிக்கி மிக எழுச்சியாகப் பாடிய பாடல்.

25. காதலாகி கசிந்து- படம்:திருவருட்ச்செல்வர் – பாடியவர்கள்: டி .எல் .மகாராஜன் – இசை : கே.வீ .மகாதேவன்
திருச்சி லோகநாதனின் மகன் மகராஜன் 13 வயதில் , T.M.சௌந்தரராஜனுடன் இணைந்து மிக அருமையாகப் பாடிய பாடல்.ஆபேரி ராகத்தி மிக அழகாகப் பாடியிருந்தார்.
26. மாசில் வீணையும் – படம்:திருவருட்ச்செல்வர் – பாடியவர்:T.M.சௌந்தரராஜன்- இசை : கே.வீ .மகாதேவன்
காதலாகி என்ற பாடலைத் தொடர்ந்து இந்த பாடலல்ஒலிக்கும்.
27. கோமாதா என் குல மாதா -படம்:சரஸ்வதி சபதம் – பாடியவர்:பி.சுசீலா – இசை : கே.வீ .மகாதேவன்
மிக அழகாக ஆபேரியின் உருவம் தெரியும் படியான ராக ஆலாபனையுடன் தொடங்கும் பாடல்.கோரஸ் இசையும் சேர்ந்து இனிமை ததும்புகின்றபாடல்.

28. இசைத் தமிழ் நீ செய்த -படம்: திருவிளையாடல் – பாடியவர் – தீ.ஆர்.மகாலிங்கம் – இசை : கே.வீ .மகாதேவன்
K.V.மகாதேவனின் சக்தி மிக்க படைப்பு.கம்பீரமாக இறைவனிடம் வேண்டும் அதே நேரத்தில் உருக்கமும் ததும்பும் பாடல்.T.R.மகாலிங்கம் அர்ப்புதமாக்ப் பாடிய பாடல்.

29. மயக்கம் எனது தாயகம் – படம்:குங்குமம் – பாடியவர்: டி.எம்.சௌந்தரராஜன் இசை : கே.வீ .மகாதேவன்
K.V.மகாதேவனின்அழகான பாடல். சோகத்திலும் அழகாக மிளிரும் பாடல்.சௌந்தரராஜன் மென்மையாக பாடிய பாடல்.கம்பீரமான ஒரு ராகத்தில் தன்னிரக்கப் பாடல ஒன்றை தந்து தன்னை இசைமேதை என்று K.V.மகாதேவன் அவர்கள் நிரூபித்த பாடல்.தன மன வேதனையை ,ஆழ்ந்த வலியுடன் வெளிப்படுத்தும் இந்த பாடலில் வாத்திய இசை அருமையாக இருக்கும்.

30. சிங்கார வேலனே தேவா -படம்: கொஞ்சும் சலங்கை – பாடியவர்: எஸ்.ஜானகி – இசை : எஸ்.எம்.சுப்பைய்யா நாயுடு.
மகிழ்ச்சிமயமான மனோநிலையை வெளிப்படுத்தவும் , உள்ளத்தில் அழகுணர்ச்சியையும் உண்டாக்கும் ஆற்றலும் கொண்ட நாதஸ்வர இசைநம் ஆன்மாவை நிறைத்துவிடும் வல்லமை கொண்டது.திரைப்படப்பாடல்களில்நாதஸ்வர இசையும் இரண்டறக்கலந்து இணைந்த பலவெற்றிப்பாடல்கள் நாதஸ்வர இசையை மக்கள் மத்தியில் இன்னும் பிரபலமாக்கியது.
அதன் ஆரம்பமாக கொஞ்சும் சலங்கை [ 1962] படம் அமைந்தது.அந்தப்படத்தில் இடம் பெற்ற ” சிங்கார வேலனே தேவா” என்ற பாடல்ஆபேரி ராகத்தில் அமைக்கப்பட்டு மாபெரும் வெற்றியடைந்தது.அந்தக்காலத்தில் இது போன்ற செவ்வியல் இசை கலந்த [ SEMICLASSICAL SONGS ]பாடல்களைப் பாடுவதில் மிகவும் சிறப்பு வாய்ந்த பாடகியாக விளங்கிய திருமதி .பி.லீலா பாட அழைக்கப்பட்டார்.எனினும் ” நாதஸ்வர சுருதிக்கு இணையாக எஸ்.ஜானகி தான் சிறப்பாகப் பாடக்கூடியவர் ” என்று எஸ்.ஜானகியை , பி.லீலா சிபார்சு செய்ததால் எஸ்.ஜானகிக்கு அந்த வாய்ப்பு போனது.அந்தப் பாடலை இசையமைத்தவர் எஸ்.எம்.சுப்பைய்யா நாயுடு.”அந்த பாடலின் மெட்டு தேவார இசைக்கு போடப்பட்ட மெட்டு என்ற சர்ச்சைகள் ஏற்ப்பட்டு ,சில தடைகளை தாண்டி தான் வரவேண்டியிருந்தது “என ஆய்வாளர் வாமனன் குறிப்பிடுவது மனம் கொள்ளத் தக்கது.எனினும் ஆபேரி ராகத்தை பிரபல்யப்படுதிய பாடல்களில் மிக முக்கியமான பாடலாக இன்று வரை விளங்க்குகின்றது.இந்த பாடலில் ” சாந்தா ..! ஏன் நிறுத்தி விட்டாய் ?உன் பாடலை கேட்க ஓடோடி வந்த என்னை ஏமாற்றாதே” என்ற ஜெமினி கணேஷன் பேசும் வசனங்களும் புகழ் பெற்றது எல்லோரும் அறிந்ததே !

31. தங்க நிலவில் கெண்டை இரண்டு – திருமணம் -பாடியவர்கள்:ஏ.எம்.ராஜா +ஜிக்கி – இசை : எஸ்.எம்.சுப்பைய்யா நாயுடு
A.M.ராஜாவும் ஜிக்கியும் இணைந்து பாடிய காதல் பாடல் வரிசையில் மிகவும் இனிமையான பாடல் இது .ஆபேரியின் அழகுகளை மெல்லிசை வார்ப்பில் தந்தார் மிகப் பழம் பெரும் இசை மேதை எஸ்.எம்.சுப்பைய்யா நாயுடு.

32. வாராயோ வெண்ணிலாவே – படம்:மிஸ்ஸியம்மா [ 1955 ] – பாடியவர்கள்: ஏ.எம்.ராஜா + பி.லீலா – இசை : எஸ்.ராஜேஸ்வர ராவ்
மெல்லிசையின் முன்னோடி இசையமைப்பாளர் எஸ்.ராஜேஸ்வர ராவ் அவர்களின் இசை வீச்சு இந்த பாடல்.அந்த கால கட்ட இசையை கவனித்தால் இந்த பாடல் எவ்வளவு புதுமையான பாடல் என்பது புரியும்.இந்த பாடல் ஹிந்தியிலும் வெளிவந்து புகழ் பெற்றது.இந்த பாடல் ஹிந்தி படமாக்கப்பட்ட போது அந்த படத்தின் இசையமைப்பாளராக இருந்த இசை மேதை ஹேமந்த் குமார் இந்த\எ பாடலை அப்படியே பயன்படுத்தினார்.பொதுவாக ஹிந்தி பதிப்பில் பாடல்களை மாற்றுவதுஇ அந்தக் கால வழமையாக இருந்தது.
ஆபெரியின் இந்த இனிய இசையை யாரால் மறுக்க முடியும் ? என்பது மட்டுமல்ல இனிமையாகப்பாடிய ஏ.எம்.ராஜா + பி.லீலா இணையும் முக்கியமானதாகும்.

33. சுய நலம் பெரிதா – படம்:யார் பையன் – பாடியவர்:கண்டசாலா – இசை : எஸ்.ராஜேஸ்வர ராவ்
சோக இசையாக ஒலிக்கும் இந்த பாடலும் புதிய ஒரு கோணத்தில் ஆபேரியை காட்டுகிறது.சோக ரசத்துடன் மனம் தளராத கம்பீரத்தையும் கண்டசாலா தனது குரலில் வெளிப்படுத்தும் போது இனம் புரியாத சோகம் நம்மை வாட்டுகிறது.

34. தென்றல் உறங்கிய போதும் – படம்:பெற்ற மகனை விற்ற அன்னை [ 1958 ] – பாடியவர்கள்:ஏ.எம்.ராஜா + பி.சுசீலா -இசை : விஸ்வநாதன் ராமமூர்த்தி
ஆரம்ப கால மெல்லிசை மன்னர்களின் தேனிலும் இனிக்கின்ற அற்புதமான பாடல்களில் இந்த பாடல் மிக முக்கியமான பாடல்.நெஞ்சில் உற்சாகம் பீறிட வைக்கின்ற பாடல்.காதலர்களின் குதூகலத்தைத் துல்லியமாக வெளிப்படுத்தியிருக்கின்ற பாடல்.இடையிடையே ஹம்மிங் இணைந்து நம்மை பரவசப்பட வைக்கின்ற பாடல்.
இசைமேதை நௌசாத் இசையமைத்த ஹிந்தி பாடலான ” ” என்ற பாடலின் பாதிப்பில் உருவான பாடல் தான் என்றாலும் தன்னளவில் முழுமை பெற்ற பாடல்.

35. வெள்ளிநிலா வானத்திலே வந்து போகுதடா – படம்:காதல் படுத்தும் பாடு – பாடியவர்: பி.சுசீலா – இசை :டி.ஆர்.பாப்பா
சோக ரசத்தில் புதிய கோணத்தில் காட்டப்படுகின்ற அற்ப்புதமான பாடல்.மிகத் திறமை வாய்ந்த டி.ஆர்.பாப்பா அவர்களின் இனிய கற்பனை.இனிமையான வாத்திய இசை கொண்ட பாடல்.உணர்வுகளை கிளர்த்தி ,சோகத்தில் நம்மை அமிழ்த்துகின்ற பாடல்.

36. வேலோடு விளையாடும் முருகையா – படம்:சித்ராங்கி [ 1964] – பாடியவர்: பி.சுசீலா – இசை : வேதா
செவ்வியல் இசைப்பாங்கில் அமைக்கப்பட்ட பாடல்.பரவலாக ஹிந்தி பாடல்களை ” கொப்பி “பண்ணும் இசையமைப்பாளர் என்று அறியப்பட்ட வேதா என்ற இசை மேதையின் பாடல்.
வேதா தனித்தனமையுடன் இசையமைக்கும் திறமை கொண்டவர் என்பதை பல பாடல்கள் மூலம் நிரூபிக்கலாம்.அதில் ஒன்று இந்தபாடல்.

37. பழமுதிர்ச்சோலையிலே பார்த்தவன் -படம்: குழந்தையும் தெய்வமும் [1965] – பாடியவர்: பி.சுசீலா- இசை : எம்.எஸ். .விஸ்வநாதன்
செவ்வியல் இசைப்பாங்கில் மெல்லிசை மன்னர் இசையமைத்த பாடல் இது.

38.மனம் படைத்தேன் உன்னை நினைப்பதற்கு – படம்:கந்தன் கருணை – பி.சுசீலா இசை :கே.வீ .மகாதேவன்
நாதஸ்வர இசையில் மனம் பறி கொடுத்த இசைமேதை கே.வீ.மகாதேவனின் அழகான கற்பனையில் அமைந்த பாடல்.நாதஸ்வர இசையையும் இணைத்திருப்பது மனத்தை பரவசப்படுத்துகிறது.மங்களகரமான பாடல்.நாதஸ்வரத்தின் மகிமையா இல்லை சுசீலாவின் மகிமையா இல்லை மகாதேவன் மகிமையாஎன்று ஆச்சர்ய பட வைக்கின்ற பாடல்.

39. திருப்பரம் குன்றத்தில் நீ சிரித்தாள் – படம்:கந்தன் கருணை – பி.சுசீலா + சூலமங்கலம் ராஜலட்சுமி இசை:கே.வீ .மகாதேவன்
மிகவும் இனிமையான பாடல். இசையமைப்பாளர் குன்னக்குடி வைத்தியநாதன் இசையமைத்த பக்திப் பாடல், படத்திற்கு பொருத்தமான பாடல் என்பதால் இணைக்கப்பட்ட பாடல்.

40. கல்யாண சாப்பாடு போடு முன்னே – படம்:கந்தன் கருணை – எஸ் .ஜானகி இசை:கே.வீ .மகாதேவன்
ஆபேரி ராகத்தை மென்மையாகக் மெல்லிசைப் பாங்கில் குழைத்து வரும் பாடல்.மிகமேன்மையாக எஸ்.ஜானகி பாடிய ஆரம்பகாலப் பாடல்.

42. எஜமான் பெற்ற செல்வமே என் சின்ன எஜமானே – படம்:அள்ளி பெற்ற பிள்ளை- பாடியவர்:ஜி.ராமநாதன் – இசை :கே.வீ .மகாதேவன்
இசைமேதை ஜி.ராமநாதன் அவர்கள் , இசை மேதை கே.வீ. மகாதேவன் அவர்கள் இசையில் பாடிய அபூர்வமான பாடல்.மிக அருமையாகவே தமிழ் சினிமாவில் இவ்விதமான இணைவுகள் நடைபெற்றுள்ளது.உணர்ச்பூர்வமாக பாடும் ஆற்றல்மிக்க ஜி.ராமநாதன் சிறப்பாகப் பாடிய பாடல்.படத்தில் அசரீரி யாக ஒலிக்கும்.இறந்த தனது எஜமானின் குழந்தையை குதிரை தாலாட்டுவது போன்ற காட்சியில் ஒலிக்கும் பாடல்.

43. பூமாலையில் ஓர் மல்லிகை – படம்:ஊட்டி வரை உறவு – டி.எம் சௌந்தர்ராஜன் +பி.சுசீலா இசை :எம்.எஸ்.விஸ்வநாதன்
ஆபேரி ராகத்தின் சிறப்பு என்னவென்றால் ஹம்மிங்கில் குரலில் அதன் பாவங்களை காட்ட ஏதுவான ராகம். இது பொதுவாக நாதஸ்வர இசையின் பாதிப்பு என்று தான் சொல்ல வேண்டும்.இந்த ராகம் நாதஸ்வரத்தில் மேன்மை பெற்று விளங்குவதால் , அதை கேட்டுக்கும் இசையமைப்பாளர்கள் அதன் பாதிப்பால் தங்களும் அவ்விதமான உத்திகளைச் சேர்த்து அந்த ராகத்தின் மகிமையை பாடல்களில் பயன்படுத்தி வெற்றி பெற்றிருக்கின்றார்கள்.
நாடகப்பாங்கில் ஓங்கிக் குரல் எடுத்துப் பாடும் முறையை இந்த பாடலின் ஆரம்ப ஹம்மிங் மிக அழகாக நினைவூட்டி மெல்லிசையின் பக்கம் இதமாக இணைத்திருக்கும் கைவண்ணம் அற்ப்புதமானது.பாடலின் பல்லவி நௌசாத் அவர்களின் பாடல் ஒன்றின்[ Tu Mera Chand mein tere chandni – Film : Dillagi – Music : Nausad ]ஆரம்ப புல்லாங்குழல் இசையை தழுவியதாக அமைந்தது.ஆபெரி ராகத்திற்க்கு பெருமை சேர்த்த பாடல்களில் இதுவும் முக்கிய பாடலாகும்.

44.கண் ஒரு பக்கம் நெஞ்சொரு பக்கம் – படம்:நிறைகுடம் – டி.எம் சௌந்தர்ராஜன் + பி.சுசீலா இசை :வீ.குமார்
பொதுவாக இந்தப் பாடலை மெல்லிசைமன்னர் எம்.எஸ்.விஸ்வநாதனின் பாடல் என்றே என்ன வைக்கும் பாடல் மேல் சொன்ன ” பூ மாலையில் ஓர் மல்லிகை ” பாடலின் தாக்கம் இந்த பாடலிலும் உண்டு.வாத்திய அமைப்பிலும் மெல்லிசையின் தாக்கம் உள்ள பாடல்.இனிமையான பல பாடல்களைத் தந்த வீ.குமாரின் நல்ல ஆபேரி ராகப்பாடல்.

45. ராகங்கள் பதினாறு உருவான வரலாறு – படம்:தில்லு முல்லு – எஸ்.பி.பாலசுரமணியம் இசை :எம்.எஸ்.விஸ்வநாதன்
மெல்லிசைமன்னர் எம்.எஸ்.விஸ்வநாதனின் படைப்பாற்றல் பிரமிக்கத் தக்கது.காலத்திற்க்கேற்ப மெல்லிசைக்கு முக்கியத்துவம் கொடுத்து இசையமைக்கப்பட்ட ஆபேரி

46. கவிதை அரங்கேறும் நேரம் – படம்:அந்த 7 நாட்கள் – பி.ஜெயச்சந்திரன் +எஸ்.ஜானகி இசை எம்.எஸ்..விஸ்வநாதன்
மெல்லிசைமன்னர் எம்.எஸ்.விஸ்வநாதனின் சற்று செவ்வியலிசை கலந்து உணர்வுகளைக் கிளர்த்துகின்ற பாடல். குறிப்பாக வாத்திய இசை மிக அருமையாக அமைக்கப்பட்டுள்ள பாடல்.

47.கண் வழி புகுந்து – படம்:தூக்கு தூக்கி – T.M.சௌந்தரராஜன் + M.S.ராஜேஸ்வரி – இசை : ஜி.ராமநாதன்

சௌந்தரராஜனின் ஆரம்ப கால் காதல் பாடல்.கண்டசாலாவின் பாணியில் பாடினாரோ என்று எண்ணத் தோன்றும் பாடல்.ஜி.ராமநாதனின் சங்கதிகள் அங்கங்கே விழுகின்ற பாடல்.

48. நிலவுக்கு என் மேல் என்னடி கோபம் -படம்: போலீஸ்காரன் மகள்- பி .பி.ஸ்ரீநிவாஸ் இசை ;எம்.எஸ்.விஸ்வநாதன்
விஸ்வநாதன்- ராமமூர்த்தியின் புதுமைமிக்க பாடல்.நோகாமல் பி.பி.ஸ்ரீநிவாஸ் பாடிய பாடல்.

49.பொனென்ன பூவென்ன கண்ணே – படம்:அலைகள் 1973 – பி.ஜெயச்சந்திரன் -இசை : எம்.எஸ்.விஸ்வநாதன்
பி.ஜெயச்சந்திரன் பாடிய ஆரம்பகாலப் பாடல் .எப்போது கேட்டாலும் திகட்டாத பாடல்.விஸ்வநாதனின் ஆற்றல் மிக்க பாடல்.மனதில் சலனங்களை எழுப்பும் பாடல்.

50.ஆடும் ஊஞ்சலைப் போலே – படம்:என்தங்கை [1952] – டி.ஏ. மோதி + பி.லீலா
G.கோவிந்தராஜுலு நாயுடு என்ற பழம் பெரும் இசையமைப்பாளர் [ T.G.லிங்கப்பாவின் தந்தை ] இசையமைத்த பாடல்.

51. மலைச் சாரலில் இளம் பூங் குயில் – ஒரு குடும்பத்தின் கதை – கே.ஜே.யேசுதாஸ் + சசிரேகா – இசை: வீ.குமார்

52. பூவே நீ யார் சொல்லி யாருக்காக மலர்கின்றாய் – தணியாத தாகம் [1982 ] – மலேசிய வாசுதேவன் + எஸ்.ஜானகி- இசை:A.A.ராஜ்
மிக அருமையான மெல்லிசைப்பாடல் ராஜ் என்ற இசையமைப்பாளர் அதிகம் பேசப்படாதவர்.ஒருதலை ராகம் படத்தில் டி.ராஜேந்தருடன் பணியாற்றியவர்.அந்தப் பாடல்கள் பற்றிய சிறு சர்ச்சைகளும் இடம் பெற்றன.A.A.ராஜ் பழம்பெரும் இசையமைப்பாளர்களான எஸ்.ராஜேஸ்வரராவ் , மாட்டர் வேணு போன்றவர்களிடம் உதவியாளராகப் பணியாற்றியவர்.

மிகக் குறுகிய காலத்தில் வேகமாகவும் தரமாகவும் இசையமைக்கும் ஆற்றல் பெற்ற இசைஞானி ஒவ்வொரு ராகத்திலும் மற்ற இசையமைப்பாளர்கள் எல்லோரும் இசையமைத்த ஒட்டு மொத்த எண்ணிக்கையளவு பாடலகளை சில சமயம் அதற்க்கு அதிகமாகவும்இசையமைத்தவராவார். ஆபேரி ராகத்தில் வியக்கத்தக்க அளவில் பல வண்ணங்களில் வித விதமான பாடல்களைத்தந்து அதிசயிக்க வைத்திருப்பார் இசை ஞானி இளையராஜா.

இளையராஜா இசையமைத்த ஆபேரி ராகப் பாடல்கள்:

01 . அன்னக்கிளி உன்னைத் தேடுதே – படம்:அன்னக்கிளி 1976- பாடியவர் : எஸ்.ஜானகி – இசை: இளையராஜா
முதல் படத்திலேயே மிக அருமையான மெட்டுகளை தந்த இசைஞானியின் அபாரத்திறமைக்கு எடுத்துக்காட்டான பாடல்.பாடலின் ஆரம்ப ஹம்மிங் இனம் புரியாத உணர்வுகளைக் கிளர்த்தி விடும்.என் பதின்ம வயதில் , என் ஞாபகத்தில் இந்த பாடலை கேட்ட அந்த இடத்திலேயே என்னை நிற்க வைத்த முதல் பாடல். எங்கு கேட்டாலும் அங்கேயே நின்று பாடல் முழுதும் கேட்க வைத்த பாடல்.இந்த பாடலின் ஹம்மிங் அவ்வளவு ஈர்ப்பாக இருந்தது.ஒரு தேவதை என்னை அழைப்பதாக நான் உணர்ந்த பாடல்.இனம் புரியாத சோகம் என்னைத் தாக்கியது. ஆனால் இந்த படத்தை கிட்டத்தட்ட 30 வருடங்கள் கழித்தே பார்த்தேன்.பாடலை முதன்முதலில் கேட்ட அந்த பனங் கூடலும் , சோழகக் காற்றும் என்றென்றும் என் நினைவில் இருந்து நீங்காது.

02 . குயிலே கவி குயிலே- படம்:கவிக்குயில் 1977 – எஸ்.ஜானகி – இசை: இளையராஜா
புல்லாங்குழலில் ஜால வித்தைகளை காட்டும் ஆரம்ப கால பாடல்களில் இதுவும் ஒன்று.வாத்திய பிரயோகங்களில் புதுமை காட்டிய பாடல்.ஆரம்ப இசையில் தொடங்கி , இடை இசை எல்லாவற்றிலும் நாட்டுபுறத்தின் அழகை காட்டும் பாடல்.கண்ணை மூடி கேட்டால் கிராமிய அழகுகள் விரிந்து செல்ல வைக்கும் பாடல்.

03 . செந்தூரப்பூவே செந்தூரப்பூவே-படம்: பதினாறு வயதினிலே – 1977 – எஸ்.ஜானகி – இசை: இளையராஜா
இந்தப் பாடலில் மேற்க்கத்திய ஹார்மொனி இசையின் இணைப்பு மிக அருமையாக இருக்கும்.இந்த காலகட்டத்தில்17ஆம் நூற்றாண்டின் சிம்பொனி இசையின் கூறுகளை இளையராஜா தமிழ் சினிமாவில் இணைக்கத்த் தொடங்கிய காலமாகும்.அவரின் இசைக் கனவுகள் நனவாகத் தொடங்கிய காலம்.அந்த இசையின் துல்லியம் செந்தூரப்பூவே பாடலில் துல்லியமாக விழுந்திருக்கிறது.தமிழ் நாடுப்புற இசையின் வீச்சும் ,மேலை ஹார்மொனி இசையின் இனிமையும் ஆபேரி ராகத்தில் பின்னிப் பிணைக்கப்பட்டிருக்கும் அதிசயத்தை நிகழ்த்தினார்.இந்த பாடலில் இளையராஜாவின் அபிமான இசையமைப்பாளரான எஸ்.டி .பர்மானின் [ S.D.Burman ] இசையின் தாக்கத்தையும் நாம் அவதானிக்கலாம்.அவர் இசையமைத்த சர்மிலி என்ற ஹிந்தி படத்தில் இடம் பெற்ற ” Khilte Haine Gul Yahan ” என்ற லதா மங்கேஸ்கர் பாடிய பாடலின் தாக்கம் தெரியும்.
காட்சியின் மனப்பதிவை மைய்யமாகக் கொண்டு பாடலின் இடையிசையை புத்தாக்கம் செய்து தமிழ் சினிமாவில் இசையின் மேன்மையை உயர்த்தியவர் இளையராஜா.
“நீ என்ன பேச வேண்டும் என்று விரும்புகிறாயோ அதைப் பேச அதனால் இயலாது ” என்று மொழியின் குறைபாடுகளை Beckett என்ற அறிஞர் கூறியதை இளையராஜாவின் இசை நினைவூட்டும்.

04 . சிந்து நதிக்கரையோரம்- படம்:நல்லதொரு குடும்பம் – 1978 – பாடியவர்கள் :T.சௌந்தரராஜன் + P .சுசீலா – இசை: இளையராஜா
இனிமையான பாடல்.மென்மையான மெட்டு. இளையராஜாவின் முத்திரை பதித்த பின்னணி இசை.சுசீலா அளவுக்கு சௌந்தரராஜன் குரலில் மென்மை வெளிப்படவில்லை என நினைக்கின்றேன்.
ஆபேரியை அழகு படுத்திய பாடல் என்பதில் சந்தேகமில்லை.

05 . வசந்த கால கோலங்கள் – படம்:தியாகம் 1978 – பாடியவர் : எஸ்.ஜானகி – இசை: இளையராஜா
தொன்மஇசை நிகழ்கால உணர்வுகளையும் அருமையாக வெளிப்படுத்தும் அதே வேளை சோக உணர்வுகளைக் கிளர்ந்தெளவும் வைக்கும் ஆற்றல் கொண்டது என்பதை உணர்த்தும் பாடல்.வேரில் நின்று புதுக்கிளைகள் பரப்பி மரம் காட்டும் அதிசயம் போல மரபிசை ராகங்களில் நின்று திழைக்கவும், புதுமைகளில் திழைக்கவும் வைத்த இசைஞானியின் பாடல்.எஸ்.ஜானகி பாடிய அருமையான பாடல்.

06 . வா பொன் மயிலே நெஞ்சம் ஏக்கத்தில் – – படம் : பூந்தளிர் 1979 – பாடியவர்: SPB
ஒத்திசைவின் ஒழுங்கும் ,ஒன்றிணைந்த லயமும் இரண்டறக் கலந்த பின்னணியில் , தன்னையே பறி கொடுக்கும் காதலின் உன்னதத்தை உணர்த்த ஆபேரியை இனிமையின் உருவமாக்கி இசைஞானி தந்த நம் உயிரிலே கலந்த பாடல்.

07 . மேகம் கருக்குது- படம்:ஆனந்த ராகம் 1982 – பாடியவர்கள் : K .J .ஜேசுதாஸ் + S.ஜானகி – இசை:இளையராஜா
நாட்டுப்புற சாயம் பூசிய ஆபேரி இது.எந்த ஒரு தொன்மையான ராகத்தையும் பட சூழ்நிலைக்கு தகுந்த மாதிரி மாற்றியமைக்கும் இசை வித்தைகளை சினிமா இசையமைப்பாளர்கள் மரபுகளை கையகப்படுத்தும் அதே வேளை சூழலுக்கு ஏற்ப மாற்றுவதிலும் வல்லவர்களாக இருந்திருக்கின்றார்கள் என்பதை உணர்த்தும் பாடல்.

08 . காளிதாசன் கண்ணதாசன் – படம்:சூரக் கோட்டை சிங்கக்குட்டி 1983 – P.ஜெயச்சந்திரன் + P .சுசீலா – இசை: இளையராஜா
இளையராஜாவின் இசைக்கலவை தெரிகின்ற பாடல்.செவ்வியல் இசை ராகம் நாட்டுப்புறம், மெல்லிசைவடிவம்,அழகு சேர்க்கும் வாத்திய இசை பரிவாரங்கள் இணைக்கப்பட்ட பாடல்.ஆனால் ஏதோ ஒரு அவசரமும் தெரின்கின்ற பாடல்.

09 . சின்னஞ சிறு வயதில் எனக்கோர்- படம்:மீண்டும் கோகிலா 1982 – பாடியவர்கள் : K .J .ஜேசுதாஸ் + S.P.சைலஜா – இசை: இளையராஜா
இந்த பாடலின் இறுதியில் ஜேசுதாஸ் பாடும் ம் …ம் …..ம் …ம்…. என்ற சங்கதிகள் ஆபேரியின்கம்பீரத்தையும் , ஜேசுதாசின் குரல் உறுதியையும் ,கம்பீரத்தையும் காட்டி நிற்கும். இவ்விதம் ” ம் …ம் …..ம் …ம்….” மை வேறுயாராவது பாடகர்கள் பாடுவார்களா என்பது சந்தேகமே.

10 . விளக்கு வைச்ச நேரத்திலே- படம்:முந்தானை முடிச்சு 1983 – பாடியவர்கள்: இளையராஜா + S.ஜானகி – இசை: இளையராஜா
கிராமியத்தை மிக லாவகமாகக் கொண்டுவரும் பாடல்.

11 . ராசாத்தி உன்னை காணாத நெஞ்சு- படம்:வைதேகி காத்திருந்தாள் 1985 – பாடியவர்: P.ஜெயச்சந்திரன் – இசை:இளையராஜா
ஜெயச்சந்திரன் பாடிய மிகவும் பிரபல்யமான பாடல்.உளுந்தூர்பேட்டை என்ற இடத்தில் இந்த திரைப்படம் காணிக்கப்பட்ட போது இந்த பாடலை கேட்க காட்டு யானைகள் வந்ததாகவும் , பாடல் முடியும் வரை நின்று கேட்டு விட்டு போகும் என்ற செய்திகள் வெளிவந்தன.ஆபேரியை மனிதர்களா மட்டுமல்ல யானைகளும் ரசித்து மகிழ்ந்திருக்கின்றன.

12 . பூவே பூச்சூட வா- படம்:பூவே பூச்சூட வா 1985 – பாடியவர்கள்: K .J .ஜேசுதாஸ் + சித்ரா – இசை:இளையராஜா
K .J .ஜேசுதாஸ் + சித்ரா பாடிய இந்த பாடல் தனிமையின் துயரத்தை வெளிப்படுத்தும் மனதை நெகிழ வைக்கின்ற பாடல்.உறவுக்காக ஏங்கும் உயிர் படும் வதையை அற்ப்புதமாக வெளிப்படுத்திய இசைஞானியின் அசாத்தியமான பாடல்.எப்ப்போது கேட்டாலும் உயிரை வதைக்கும் பாடல்.

13 . குருவாயூரப்பா- படம்:புது புது அர்த்தங்கள் 1990 – பாடியவர்கள்: S.P.B + சித்ரா – இசை:இளையராஜா
உற்சாகமான காதல் பாடல் என்றாலும் மெல்லிதான ஒரு சோகம் அதனுள்ளில் ஒட்டிக்கொண்டிருக்கும் பாடல்.

14 . வெள்ளி கொலுசு மணி – படம்:பொங்கிவரும் காவேரி 1990 – பாடியவர்கள்: அருண்மொழி + சித்ரா – இசை:இளையராஜா
உள்ளுணர்வில் உற்சாகம் பொங்கிப் பிரவாகிக்கும் பாடல். பாடலின் ஆரம்ப இசை நெஞ்சை அள்ளும் ஆபேரியைக் முன் நிறுத்தி விடுகிறது.பாடல் முழுவதும் உற்சாகம் ததும்புகின்ற பாடல்.கற்பனை வீச்சு மிக்க பாடல்.இளையராஜாவின் அடையாளப்பாடல்.கற்பனைகளின் உச்சம்.

15 . பூங் குயில் ஒன்று- படம்:வீட்லே விசேஷங்க 1990 – பாடியவர்கள்: S.P.B + சித்ரா – இசை:இளையராஜா

16 . ராக்கம்மா கைய தட்டு- படம்:தளபதி 1991 – பாடியவர்கள் : S.P.B + சுவர்ணலதா – இசை: இளையராஜா
ஆபேரியை தொட தொட அற்ப்புதங்கள் போல எத்தனை விதமான பாட்லக்ளைத் தந்த இசைஞானியின் அழகியல் உன்னதத்தை காட்டும் புதையல்.ஆபேரி ராகத்தை ஒரு புதுப் பரிமாணத்திற்கு இட்டுச் சென்ற பாடல்.வீணாய் போகும் திரைக் காட்சிக்கு சங்கீதத்தின் அழகால் ஒரு ஆராதனை தேவையா? என்று கேட்க வைக்கும் பாடல்.இசை மந்திர ஜாலப்பாடல்.பாடலின் பின்பகுதியில் ஆனந்த பைரவி இணைப்பும் அபாரம்.இரண்டு ராகங்களின் இணைப்பும் அலாதியானவை.இரண்டு ராகங்களும் நாட்டுப்புற இசை ராகங்கள்.அதில் ஒன்றை பக்திக்கும் ஒன்றை டப்பாங்கூத்துக்கும் பயன்படுத்திய ராஜாவின் கைவண்ணம்.

17 . ஊரெல்லாம் உன் பாட்டு தான்- படம்:ஊரெல்லாம் உன் பாட்டு 1990 – பாடியவர்: K .J .ஜேசுதாஸ் – இசை:இளையராஜா
வீரியம் மிக்க இசைப்படைப்பு.ஓங்கிக் குரல் எடுத்து பாடுவதற்கு ஏற்ற ராகம் என்பதால , பாடலின் ஆரம்ப ஆலாபனை அற்ப்புதமாக அமைந்துள்ளது.இளையராஜா , ஜேசுதாஸ் , சுவர்ணலதா போன்றோர் மூன்று விதமாகப்பாடப்பட்ட பாடல்.மூன்றும் நன்றாக இருக்கும்.

18 . பூங் காவியம் பேசும் ஓவியம்- படம்:கர்ப்பூரமுல்லை 1990 – பாடியவர் : K .J .ஜேசுதாஸ் + பி.சுசீலா + சித்ரா – இசை:இளையராஜா
வலியின் உக்கிரம் இசையின் ஆன்மாவாகி நம்மையும் பரவசப்படுத்துகின்ற பாடல்.பாடகர்கள் தெரிவு அற்ப்புதம்.அன்னையை அணைக்கத் துடிக்கின்ற பிரிவின் ஏக்கத்தையும், தன்னிரக்கததையும்ஒன்று சேர்க்கும் மனநிலையை தருகின்ற பாடல்.பாசத்தின் விசும்பல்.பின்னணி இசை காவியம் படைக்கிறது.இது போன்ற அற்ப்புதங்களை இசைஞானியின் இசையில் தான் கேட்கலாம்.

19 . என்னை தொட்டு அள்ளி கொண்ட- படம்:உன்னை நினைச்சேன் பாட்டு படிச்சேன் 1990 – பாடியவர் :S.P.B + சுவர்ணலதா -இசை:இளையராஜா
இந்த பாடல் 1990 களில்வந்த சிறப்பான பாடல்களில் ஒன்று எனலாம்.மனதை அள்ளிக் கொண்டு போகின்ற பாடல்.எதிர்பாராத விதமாக வரும் ஆண் குரலின் ஹம்மிங் கம்பீரத்தை தரும்.அந்த ஹம்மிங் என்பதே அந்த ராகத்தின் சிறப்பம்சமாகும்.அந்தப் பாடலின் உச்சமும் அந்த ஹம்மிங்கில் தான் நிறைந்திருக்கிறது.

20 . உன் மனசுலே பாட்டு தான் – படம்:பாண்டி நாட்டு தங்கம் 1990 – பாடியவர்கள்: S.P.B + சித்ரா — இசை: இளையராஜா
ஆபேரி ராகத்தில் கிராமிய பாணியில் மிக அழகான பாடல்.

21 . என் பாட்டு என் பாட்டு – படம்:பூமணி – பாடியவர் : இளையராஜா – இசை: இளையராஜா
ஆபேரி ராகத்தில் சோகத்தை பின்னித் தரும் பாடல்.ஏற்கனவே பல பாடல்களை இதே ராகத்தில் அமைத்தாலும் புது ரகமாக தரும் இசைஞானியின் படைப்பாற்றலை சொல்லும் பாடல்.நாட்ட்ப்புற தாளத்தில் இசைந்து வருகின்ற பாடல்.பாடலின் ஆரம்ப ஹம்மிங்குடன் இழையும் புல்லாங்குழல் இசையின் அமைதியும் பின்வரும் சரணமும் மிக அழகானவை.நம் நெஞ்சை துவைக்கிற மெட்டு.

22 . முத்தமிழே முத்தமிழே- படம்:ராமன் அப்துல்லா – பாடியவர்கள் : S.P.B + சித்ரா – இசை: இளையராஜா
விம்மிவரும் அழுகையை ராஜஇசையால் ஆற்றுப்படுத்தும் பாடல்.காதலின் பரவசமும், தவிப்பும் அலையலையாய் பொங்கி வருவதை இசையில் தந்து நம்மை இனம் புரியாத வேதனையில் நம்மை மூழ்கடிக்கும் பாடல்.

23 . பூங் காற்று திரும்புமா- படம்:முதல் மரியாதை – பாடியவர்கள் : மலேசியா வாசுதேவன் + S.ஜானகி – இசை: இளையராஜா
கசப்பும், சதா நிந்தனையும்,அவமானங்களையும் நிதம் அடையும் ஒரு நடுத்தர மனிதனின் தவிப்பு, தலைநிமிர்ந்து நிற்க வேண்டியவன் துயரத்தால் துடிக்கும் பாடல்.அவனை தேற்றஅன்னையின் மிடுக்கோடு நிற்கும் இளம் பெண் காட்டும் பாசமும் , பரிவும் மிக அழகாக வெளிப்படும் பாடல்.வாத்தியங்ககளின் நுண்மைகளை கிராமிய மரபில் தீராத புதுமைகளை நிதானத்துடன் பின்னிய இளையராஜாவின் பாடல். இதில் வரும் புல்லாங்குழலை கேட்டுக்கொண்டே இருக்கலாம்.

24 . துள்ளி திரிந்ததொரு காலம்- படம்:முதல் மரியாதை – பாடியவர் : S.P.B – இசை:இளையராஜா
தொலைத்த வசந்தத்தை தேடும் துன்பியல் பாடல்.பாடல் தரும் உணர்வெழுச்சி நம் தொண்டையை அடைத்து விடுகிறது.வாத்தியம் ஓலமிட்டு அழுவதில்லை. பாடலின் போக்கில் துள்ளும் இசை அலையாக எழுந்து நம் நெஞ்சங்ககளை ரணமாக்கி விடுகிறது.உயர்ந்த இசை நம் நெஞ்சத்தை அசைத்து விடுகிறது.

25 . மனசு மயங்கும் மௌனராகம் படம்- சிப்பிக்குள் முத்து – பாடியவர் : S.P.B + S.ஜானகி – இசை:இளையராஜா
மென்மையான பாடல்.ஆனால் மெய் சிலிர்க்க வைக்கும் பாடல்.ஆபேரி ராகத்தை இப்படி எல்லாம் வளைக்க முடியுமா என்று என்ன வைக்கும் பாடல்.விரகதாபத்தை மிக அருமையாக வெளிப்படுத்தியிருக்கும் பாடல்.பின்னணி இசையின் நாயகன் இசைஞானி மிக அருமையாக பெண்களின் கோரஸ் இசையை பயன்படுத்திய மெல்லிசையின் சிகரப்பாடல்.மனதில் இனம் புரியாத உணர்வலைகளை எழுப்பும் பாடல்.வர்ணிக்க வார்த்தையில்லை.

26 . மஹா ராணி உன்னை தேடி – -பாடியவர்கள் : P.ஜெயச்சந்திரன் + S.ஜானகி – இசை: இளையராஜா
பார்வைக்கு ஒரு புதிய பாடல் போல தொற்றம் காட்டினாலும்,செந்தூரப்பூவே ,செந்தூரப்பூவே என்ற பாடலின் தாக்கம் உற்றுக் கவனித்தால் பிடிபட்டுவிடுகின்றதுஎன்பேன்.ஆனாலும் அந்தச் சாயலை மறைக்க பின்னணி இசை முயன்றிருக்கிறது.ஆனாலும் முழுமையாக ஒளித்து வைக்க முடியவில்லை.

27. எந்தன் வாழ்க்கையின் அர்த்தம் சொல்ல வந்த மகளே – படம்:சின்ன கண்ணம்மா – மனோ – இசை: இளையராஜா
தன்னோடு வாழ்ந்தவளின் நினைவூட்டங்களை மீட்டும் பாடல்.நம்மையும் அனுதாப உணர்வுக்கு இட்டுச் செல்லும் பாடல்.சோகப்பாடல் என்ற வரையறைகளைத் தாண்டி இன்பமும் , நினைவலைகளில் அமிழ்ந்த சோகத்தையும் ஒன்றாகக் குழைத்த இசைஞானியின் கற்பனை வியக்க வைக்கிறது.

28. தேவதை போல் ஒரு பெண் இங்கு – படம்:கோபுரவாசலிலே – தீபன்+ சுரேந்தர் + மனோ + மலேசியா வாசுதேவன் – இசை:இளையராஜா
பொங்கிப் பெருகும் ஆனந்த உணர்வை ஒழுங்கான இசை லயத்துடன் தரும் பாடல்.பொதுவாக நான்கு ஆண் பாடகர்கள் இணைந்து பாடும் பாடல் தமிழ்சினிமாவில் அபூர்வமாக இடம் பெற்றிருக்கிறது.கர்ணன் படத்தில் சீர்காழி கோவிந்தராஜன், ஸ்ரீநிவாஸ் ,திருச்சி லோகநாதன் , சௌந்தரராஜன் பாடிய ” மழை கொடுக்கும் கொடையும் ” என்ற பாடலைப் பாடினார்கள்.அந்தப் பாடலில் ஒவ்வொரு பாடகரும் ஒவ்வொரு ராகத்தை பாடுவார்கள்.
அந்தப் பாடலுக்குப் பின் நான்கு பாடகர்கள் இணைந்து பாடும் பாடல் இது.நான்கு குரல்களும் ஒன்றிணைந்து பாடலின் இனிமையை வெளிப்படுத்தும் பாங்கு சிறப்பானது.இசை தரும் உணர்வை மிக அற்பபுதமாக பாடகர்கள் போட்டி போட்டுக் கொண்டு வெளிப்படுத்தியிருக்கின்றனர்.கவாலி இசைப்பாணியில் பாடல் ஆரம்பித்து ,இளையராஜாவின் தனி முத்திரை பொதிந்த வாத்திய இசையுடன் ஆபேரி ராகத்தின் உயிர் நுண்கூறுகளை அருமையாக திரட்டித் தந்த பாடல்.

30. பூ என்றும் பொன்னே என்றும் – படம்:துருவ நட்சத்திரம் – S.P.B + சித்ரா – இசை: இளையராஜா

ஆபேரி ராகத்தில் இன்னுமொரு சிறப்பான பாடல்.பலவிதமாக பரிசோதனை செய்யும் இளையராஜாவின் படைப்பு.இசை நலம் மிக்க பாடல்.ஒரே ராகத்தில் எத்தனை பின்னல்கள் என்று அதிசயிக்க வைக்கும் இளையராஜாவின் கற்ப்பனைப்பாடல்.

31. உன்னை காணாமல் நானேது -படம்: கவிதை பாடும் அலைகள – அருண்மொழி + சித்ரா – இசை: இளையராஜா

ஆபேரி ராகத்தின் உணர்ச்சியூட்டத்தை தனது பிரிக்கவியாலாத பின்னணி இசையால் ஒன்றித்து ராகத்தைப் பெருமைப்படுத்தும் பாடல்.பாடலைக் கேட்க்கும் போது ஏதோ மின்சாரம் பாய்ந்து நாடி நரம்புகளை சிலிர்க்க வைக்கும் பாடல்.key board இசை அழகாக பயன் படுத்தப்பட்டுள்ள பாடல்.

32. ஆராரோ பாட்டுப்பாட நானும் தாயில்லை -படம்: பொண்டாட்டி தேவை – அருண்மொழி + சித்ரா – இசை: இளையராஜா
வெளிப்பார்வைக்கு ஒரு புதிய பாடல் போல் தெரிந்தாலும் , உற்றுக் கேட்டால் “பூ என்றும் பொன்னே என்றும்” என்ற பாடலின் சாயல் தெரிகின்ற பாடல்.

33. எனக்கு பிடித்த பாடல் – படம்:ஜூலி கணபதி – விஜய் யேசுதாஸ் + ஸ்ரேயா கோஷல் – இசை: இளையராஜா
மேலைத்தேய பாணியில் ஒரு மெல்லிசையாக , புது தினுசான ஒரு பாடல்.ஸ்ரேயா கோஷல் ,விஜய் ஏசுதாஸ் பாடிய பாடல்.நவீன ஆபேரி என்றாலும் உணர்வு நிறைந்த பாடல்.

34. ஆராரோ பாட்டுப்பாட நானும் தாயில்லை -படம்: பொண்டாட்டி தேவை – அருண்மொழி + சித்ரா – இசை: இளையராஜா
வெளிப்பார்வைக்கு ஒரு புதிய பாடல் போல் தெரிந்தாலும் , உற்றுக் கேட்டால் “பூ என்றும் பொன்னே என்றும்” என்ற பாடலின் சாயல் தெரிகின்ற பாடல்.

35. ஊரெல்லாம் உன் பாட்டுத் தான் – படம்: ஊரெல்லாம் உன் பாட்டு – கே.ஜே.ஜேசுதாஸ் + சுவர்ணலதா + இளையராஜா
மூன்று பாடகர்கள் தனித் தனியே பாடிய பாடல்.மிகவும் அழகான பாடல்.ஒவ்வொரு பாடலும் அழகாகப் பாடப்பட்டிருக்கும்

34. எனக்கு பிடித்த பாடல் – படம்:ஜூலி கணபதி – விஜய் யேசுதாஸ் + ஸ்ரேயா கோஷல் – இசை: இளையராஜா
மேலைத்தேய பாணியில் ஒரு மெல்லிசையாக , புது தினுசான ஒரு பாடல்.ஸ்ரேயா கோஷல் ,விஜய் ஏசுதாஸ் பாடிய பாடல்.நவீன ஆபேரி என்றாலும் உணர்வு நிறைந்த பாடல்.

36. கடல் அலை கால்களை -படம்: பொம்பள மனசு – பி.ஜெயச்சந்திரன் – இசை: ரத்னா சூரியன்
ரத்தினசூரியன் எற்ற இசையமைப்பாளர் இசையில் வெளிவந்த பாடல்.இந்த படத்திற்கு பிறகு இவர் இசையமைத்தாரா என்பது தெரியவில்லை.பி.ஜெயச்சந்திரன்அழகான குரலில் பாடிய இனிமையான பாடல்.எளிமையான வாத்திய இசை கொண்ட பாடல்.

37. அமுத மழை பொழியும் முழு நிலவிலே – படம்: பொம்பள மனசு – T.L.தியாகராஜன் இசை: ரத்னா சூரியன்
ரத்தினசூரியநின் அழகான பிரபல்யம் பெற்ற பாடல்.இந்த பாடலைப் பாடியவர் மறைந்த பழம் பெரும் பாடகர் திருச்சி லோகநாதனின் மூன்றாவது பாடகப் புதல்வர் தியாகராஜன்.மிக அருமையாகப் பாடியிருந்தார் தியாகராஜன்.இன்று கேட்டாலும் இனிக்கின்ற , அருமையான ஆபேரி ராகப் பாடல்.

38. நீல வான ஓடையில்- படம்:வாழ்வே மாயம் 1983 – பாடியவர்: S.P.B இசை : கங்கை அமரன்
கங்கை அமரன் இசையமைத்த புகழ் பெற்ற பாடல்.இளையராஜாவின் பின்னணி இசையின் பாதிப்பு இவரிடம் நிறையவே இருக்கும்.வெளிப்படையாக பாடல்களைப் பற்றி வெளிப்படையாகப் பேசும் கங்கைஅமரன் , இந்தப் பாடலுக்கான உந்துதல் சொல்லும் பொழுது , எத்தனையோ பழைய பாடல்களைக் கேட்ட உந்துதலில் தான் இசையமைப்பது வழக்கம் என்றும் , குறிப்பாக இந்த பாடலின் உந்துதல் அனார்க்கலி [1953] என்ற ஹிந்திப் படத்தில் C.ராமச்சந்திரா என்ற இசைமேதையின் இசையில் வந்த ” yeh zindagi usi ki hai ” என்ற லதா மங்கேஸ்கர் பாடிய பாடலிலிருந்து கிடைத்தது என்று கூறியிருந்தார்.அந்தப் பாடல் அதே மெட்டில் தமிழில் ” என் சிந்தை நோயும் தீருமா ” என்று இசைமேதை ஜி.ராமநாதன் இசையிலும் , இசைமேதை ஆதினாராயன் ராவ் இசையமைத்த தமிழ்-தெலுங்கு படமான அனார்க்கலி படத்தில் ” ஜீவிதமே சபலமோ ” என்ற பாடல்களாக ஜிக்கியின் குரலில் வந்தன.

39. ஜானகி தேவி ராமனை தேடி – படம்:அம்சாரம் அது மின்சாரம் – பாடியவர்: சித்ரா இசை: சங்கர் கணேஷ்
1970 களில் ஆரம்பித்து ஆங்காங்கே நல்ல பல பாடலளைத் தந்த சங்கர்- கணேஷ் இரட்டையர்களின் இனிமையான ஆபேரி வார்ப்பு இந்தப் பாடல்.மெல்லிசை மன்னர் விஸ்வநாதன் காலத்திலிருந்து , அவரின் நிழலில் வளர்ந்த இந்த இரட்டையர்கள் குறிப்பிடத்தக்க நல்ல பாடல்களைத் தந்தவர்கள் என்பதை மறுக்க முடியாது.பல பாடல்களைத் தழுவல்கலாகத் தந்தாலும் அருமையான பல மெட்டுகளைத் தந்தவர்கள்.

40. ரோசாப்பூ சின்ன ரோசாப்பூ – படம்: சூரியவம்சம் -பாடியவர்: ஹரிகரன் இசை :S.A.ராஜ்குமார்
[ இந்தப்பாடல் இளையராஜா இசையமைத்த ” ராசாத்தி உன்னை காணாத நெஞ்சு ” என்ற பாடலின் பாதுப்பு நிறைய உள்ள பாடல்.] பாடல் எழுதுதல் , இசையமைத்தல் போன்றவற்றில் திறமை மிக்க எஸ்.ஏ.ராஜ்குமார் ஹிந்தி திரை இசையால் பாதிக்கப்பட்டு பல பாடல்களைத் தந்திருக்கின்றார்.ஒரே மேட்டில் பல பாடல்களை போட்டு அவற்றை வெற்றிப்பாடலக முயன்றவர்.இவர் இசையமைத்த நல்ல மெல்லிசைப் பாடல் பல் உண்டு.இளையராஜாவின் பாதிப்பால் பல பாடல்களை உருவாக்கியிருக்கின்றார்.

41. துளி துளி மழை துளி – படம்:புது வெள்ளம் [ 1975 ] -P.சுசீலா – இசை : எம்.பி.ஸ்ரீநிவாசன்
எம்.பி.ஸ்ரீநிவாசன் என்ற இசைமேதை இசையமைத்த பாடல்.விரகதாபத்தை , வாழ்வின்பத்தை அனுபவிக்கத் துடிக்கின்ற வாஞ்சைப்பாடல்.வார்த்தையால் விளக்க முடியாத போதை தருகின்ற லாஹிரி பாடல்,மனதை இனம் புரியாத உணர்வுகளைக் கிளர்த்தி இன்ப விருந்து தரும் பாடல்.ஆபேரி தரும் உன்னத இசை.இந்தப் பாடலின் மெட்டையே அந்தப் படத்தில் டைட்டில் இசையாகவும் பயன்படுத்திருப்பார் எம்.பி.ஸ்ரீநிவாசன்.

42. ராசா ராசா உன்னை – படம்: மானஸ்தன் – ஹரிகரன் + சித்ரா இசை :S.A.ராஜ்குமார்
இந்தப்பாடல் இளையராஜா இசையமைத்த ” உன்னை காணாமல் நானேது ” [ படம்:கவிதை பாடும் அலைகள் ] என்ற பாடலின் பாதிப்பு நிறைய உள்ள பாடல் என்றாலும் மிக அழகான பாடல்.இனிமையான புல்லாங்குழல் ,செனாய் பயன்படுத்தியுள்ளார்.

ar-rahman43. கண்ணோடு காண்பதெல்லாம் – படம்:ஜீன்ஸ் – நித்யஸ்ரீ மஹாதேவன் – இசை : ஏ.ஆர் .ரகுமான்
ஏ.ஆர்.ரகுமானின் பாணியில் எங்கும் தாளம் எதிலும் தாளம் வகைப்பாடல்.ஆட்டம் தான் பிரதானம்.பாடலில் வரும் ஜதிகளை தான் எட்டு விதமாகப் பாடிக்கொடுத்ததாக நித்யஸ்ரீ ஒரு போட்டியில் சொல்லியிருக்கின்றார்.ராகத்தின் இயல்பால் பாடல் கவரப்படுகிறது.

குறிப்பிடும் படியாக தாளம் தான் தலை தூக்கி நிற்கிற பாடல்.” பைலா ” போடும் இளைஞர்கள் மத்தியில் இந்த ராகத்தை அறிமுகப் படுத்தியமை பாராட்டுக்குரியது.

44 .திருடிய இதயத்தை திருப்பி கொடுத்துவிடு காதலா – – ஹரீஸ் ராகவேந்திரா + சித்ரா இசை : பரணி
இதயத் தவிப்பை அற்ப்புதமாக வெளிப்படுத்திய பாடல். புது இசையமைப்பாளர்களில் மெல்லிசைப்பாங்கான , இனிமைமிக்க பாடல்களைத் தந்த புதிய இசையமைப்பளர்களில் தந்து திறமையை காட்டியவர பரணி.பாடியவர்களும் அற்ப்புதமாக பாடிய பாடல்.

இன்னும் சில புதிய பாடல்கள்

44. கனா காண்கிறேன் கண்ணாலனே – படம்: ஆனந்த தாண்டவம் இசை ஜி .வீ.பிரகாஸ்
45. கனாக் கண்டேனடி கனாக் கண்டேனடி – பார்த்திபன் கனவு – இசை: வித்யாசாகர்
46. வாராய் என் தோழியே – படம் அரசியல் – இசை:வித்யாசாகர்
47. பூத்திருக்கும் வானமே – படம்: புதையல் இசை : வித்யாசாகர்
48. மனசெல்லாம் மழையே – படம்: சகுனி – இசை ஜி .வீ.பிரகாஸ்

ஆபேரியின் சுகத்தை அனுபவிக்க வேண்டும் என்றால் சமீபத்தில் வந்த பழசி ராஜா படத்தில் வந்த “குன்னத்தை குன்னக்கும் ” என்ற சித்ரா பாடும் மலையாள பாடலைக் கேட்கவும்.

[ தொடரும் ]

முன்னைய பதிவுகள்:

தமிழ்த்திரை இசையில் ராகங்கள் : [ 4 ] : T.சௌந்தர்

தமிழ்த்திரை இசையில் ராகங்கள் : [ 3 ] : T.சௌந்தர்
தமிழ்த்திரை இசையில் ராகங்கள் : [ 2 ] – T.சௌந்தர்
தமிழ்த்திரை இசையில் ராகங்கள் : [ 1 ] – T.சௌந்தர்

 

தமிழ்த்திரை இசையில் ராகங்கள் : [ 3 ] : T.சௌந்தர்

gramanathan 2நாடகங்களில் தியாகராஜ பாகவதருக்கு மட்டுமல்ல வேறு சில கலைஞர்களுக்கும் பின்பாட்டு பாடியவர் ஜி.ராமநாதன். கனத்த குரல் என்றாலும் இதமாமகப் பாடக்கூடியவர். நாடகங்களில் இருந்தே தியாகராஜபாகவதரின் நண்பரானவர்.அதற்க்கு முன் அண்ணன் சுந்தர பாகவதரின் ஹரிகதா காலட்சேபங்களில் பின்பாடு பாடி வந்தவர்.அந்தத் தொடர்பால் நாடகத்திற்கும் , பின் சினிமாவுக்கு வந்து சேர்ந்த மேதை தான் ஜி.ராமநாதன்.

தமிழ் சினிமாவில் கனமான ராகங்களில் , சாஸ்திரீய இசை கெடாமல் மெல்லிசைப் பாங்கான பாடல்களை அமைத்து மக்களை பேரின்ப வெள்ளத்தில் மூழ்கடித்தவர்.கர்நாடக இசை வித்துவான்களின் வாய்களில் நுளையாத ராகங்கள் என்று அழைக்கப்பட்ட ராகங்களில் பாடல்களை அமைத்து பாமரர்களையும் அந்த பாடல்களை , அந்த ராகங்களைப் பாட வைத்த
வர் இசைமேதை ஜி.ராமநாதன் .

” சங்கீத விஷயம் ” என்ற தலைப்பில் பாரதி மிக நொந்து கூறுவான்..

” நானும் பிறந்தது முதல் இன்றுவரை பார்த்துக் கொண்டே வருகிறேன். பாட்டுக் கச்சேரி தொடங்குகிறது. வித்வான் ‘வாதாபி கணபதிம்’ என்று ஆரம்பஞ் செய்கிறார். ‘ராமநீ ஸமான மெவரு’, ‘மரியாத காதுரா’, ‘வரமுலொஸகி’ ஐயையோ, ஐயையோ, ஒரே கதை.

எந்த ஜில்லாவுக்குப் போ, எந்த கிராமத்திற்குப் போ, எந்த ‘வித்வான்’ வந்தாலும், இதே கதைதான். தமிழ்நாட்டு ஜனங்களுக்கு இரும்புக் காதாக இருப்பதால், திரும்பத் திரும்பத் திரும்பத் திரும்ப ஏழெட்டு பாட்டுக்களை வருஷக் கணக்காகக் கேட்டுக் கொண்டிருக்கிறார்கள்.தோற் காது உள்ள தேசங்களிலே இந்தத் துன்பத்தைப் பொறுத்துக் கொண்டிருக்கமாட்டார்கள்.”

சங்கீத வித்துவ சிரோன்மணிகள குறிப்பிட்ட சில ராகங்களைப் பாடி மக்களை அலுத்துப் போக வைத்த காலத்தில் சிரோன்மணிகளே அறியாத , அவர்கள் பாட விரும்பாத சாருகேசி என்ற ராகத்தை பாமர மக்களிடமும் கொண்டு சேர்த்த மாமேதை ஜி.ராமநாதன்.ஹரிதாஸ் என்ற படத்தில் ஜி.ராமநாதன் இசையமைத்து தியாகராஜ பாகவதர் பாடிய மன்மத லீலையை வென்றார் உண்டோ என்ற பாடல் மிகச் சிறந்த எடுத்துக்காட்டாகும்.இந்தப் பாடலின் புகழே சாருகேசி என்ற ராகத்தை சங்கீத வித்துவான்களைப் பாட வைத்தது.இந்த பாடலால் ஈர்க்கப்பட்ட செம்மங்குடி சீனிவாஸ் ஐயர் , ஜி.ராமநாதனைஅவரது வீடு சென்று பாராட்டியது வரலாறு. ” கிருபைய பாலையா சௌரே ” என்ற தியாகைய்யரின் சாருகேசி ராகப் பாடல் தூசி தட்டிப் பாடப்பட்டது. ” கிருபைய பாலையா சௌரே ” என்ற சாருகேசி ராகக் கீர்த்தனையை செம்மங்குடி சீனிவாஸ் ஐயரே பாடி புகழ் பெற வைத்தார்.

ராகங்களில் அற்ப்புதமான பாடல்களைத் தந்த ஜி.ராமநாதன் கர்நாடக இசையை முறையாகப் பயின்றவர் அல்ல. தனது கேள்வி ஞானத்தாலேயே இந்த சாதனையை நிலை நாட்டினார்.இசை இலக்கணங்களை அடிப்படையாக வைத்து கொண்டு பாடலகளை உருவாக்கிய அதே வேளை , அதனையும் தாண்டி தனது படைப்புக்களை மக்களின் ரசனைக்குரியதாக்கியும் கொடுத்தார்.

இந்தப் பண்பை கவிதை பற்றி தாகூர் கருத்துடன் ஒப்பு நோக்கலாம்.

” இலக்கண சூத்திரங்களை எண்ணிக் கொண்டிருந்தால் கவிதை இனபமளிக்காது.” – தாகூர்

எம்.எஸ்., ஜி.என்.பாலசுப்ரமணியம்,’சகுந்தலை’
எம்.எஸ்., ஜி.என்.பாலசுப்ரமணியம்,’சகுந்தலை’

நவீன கலைவடிவமாக கிடைத்த சினிமாவை சனாதனிகள் தீண்டத்தகாததாகவே கருதி வந்தனர்.புகழ் பெற்ற சங்கீத வித்துவான் ஜி.என்.பாலசுப்ரமணியம் சினிமாவில் நடித்த போது “பெரிய “கர்னாடக இசை வித்துவான்கள் கடுமையாக எதிர்த்ததுடன் , அவரது கச்சேரிக்கு பக்கவாத்தியம் வாசிக்கவும் மறுத்தனர்.பின்னர் எதிர்ப்புக்களையும் மீறி GNP படங்களில் நடித்தார்.

அதே போல் செம்மங்குடி சீனிவாசய்யர் சினிமாவில் நடிக்கும் தனது ஆசையை தந்தையாரிடம் கூறிய போது ” நீ சினிமாவில் நடித்தால் கிணற்றில் விழுந்து சாவேன்” என தந்தை சொன்னதால் சினிமா ஆசையைக் கைவிட நேர்ந்தது.

1990 களில் மெல்லிசை மன்னர் எம்.விஸ்வனாதனின் வாத்திய இசையுடன் இணைந்து , புகழ் பெற்ற கர்னாடக இசை கலைஞர் மஹாராஜபுரம் சந்தானம் நடாத்திய ” சங்கமம்” இசை நிகழ்ச்சிக்கு ‘ கர்னாடக இசையின் உரிமையாளர்’ என்று கருதப்பட்ட சங்கீத விமர்சகர் சுப்புடு பார்வையாளராகக் கூட வர மறுத்தார்.

இவை ஒரு ஒரு புறமிருக்க தமிழ் திரைப்படத்தால் விளைந்த ஒரே ஒரு நன்மைஎன்பதே அதன் இசை தான்.இசையில் தமிழருக்கு இருந்த நீண்ட மரபும் , அதன் அறுபடாத தொடர்ச்சியும் மற்றகலைகளை விட சிறப்பான இடத்தை இசை பிடித்துக் கொள்ள உதவியது. இசையில் பல புதிய முயற்ச்சிகளுக்கும் வழி ஏற்ப்பட்டது.

radioceylonஆனால் சினிமாப்பாடல்களை ஒலிபரப்புவதை இந்திய வானொலி நிலையங்கள் இருட்டடிப்புச் செய்தன.இந்த அருமையான சந்தர்ப்பத்தை பயன்படுத்திக் கொண்ட இலங்கை வானொலி பல கோடிமக்களைக் கவர்ந்தது.பாடகர்களும் தமது பாடலகளை வானொலியில் கேட்டுஆனந்தித்தனர்.பின்னாளில் உருவான பல பாடகர்கள் இலங்கை வானொலியை கேட்டு வளர்ந்தவர்களே.   1965 இலிருந்து தான் இந்திய வானொலிகள் திரைப்படப்பாடல்களை ஒலிபரப்ப தொடங்கின.ஆனால் மக்களில் அதிகப் பெரும்பான்மையினர் ரசிக்கும் மெல்லிசையை ஒடுக்கவும் , மக்களில் அற்ப தொகையளவில் ரசிக்கும் கர்னாடக இசைக்கு தேவைக்கு அதிகமான சலுகைகளையும் ,விளம்பரங்களையும் பார்ப்பனீய ஆதிக்க அரசுகளால் கொடுக்கப்பட்டன. இந்த சலுகைகளை பெற்றுக்கொண்டு மனம் போன போக்கில் குரல் வளமில்லாதவர்களும் பாடி தொலைத்தனர். இவ்விதம் நல்ல குரல் வளமற்ற பாடகர்கள் நமது காலத்தில் மட்டுமல்ல தன் காலத்திலும் இருந்ததை மேற்ப்படி கட்டுரையில் பதிவு செய்திருக்கின்றான் பாரதி!.

” இங்கே ஓரிரண்டு பேரைத் தவிர மற்றப்படி பொதுவாக வித்வான்களுக் கெல்லாம் தொண்டை சீர்கெட்டிருப்பதைப் பார்க்கும்போது, எனக்கு மிகவும் வியப்புண்டாயிற்று. ஒன்று போல எல்லோருக்கும் இப்படித் தொண்டை வலிமை குறைந்தும் நயங் குறைந்தும் இருப்பதன் காரணமென்ன?இதைப் பற்றிச் சில வித்வான்களிடம் கேட்டேன்.” – பாரதி

அவர்களை யாரும் கேள்வி கேட்க முடியாது என்ற அகங்காரம் தான் காரணமாக இருக்கமுடியும்.இந்த சேஸ்டைகளுக்கு நாடக மேடைப் பாடல்களும் , பின் வந்த சினிமா பாடல்களும் முடிவு கட்டின. நாடக . சினிமா பாடல்களை மக்கள் கொண்டாடினார்கள். எஸ்.ஜி .கிட்டப்பா, எம்.கே.தியாகராஜ பாகவதர்.பி.யூ.சின்னப்பா, கே.பி.சுந்தராம்பாள் ,டி.ஆர்.மகாலிங்கம் மக்கள் மத்தியில் பெரும் செல்வாக்கு பெற்றார்கள்.

இசை வகைகளிலும் ஏற்றத்தாழ்வு காட்டிய சனாதனிகள் வாத்தியங்களிலும் அதனை கடைப்பிடித்தார்கள்.மிருதங்கம் “வாசிப்பது ” , பறை ” அடிப்பது ” [ வாசிப்பதல்ல ] போன்ற நடைமுறைகளைக் குறிப்பிடலாம். நாடக மேடைகளில் பயன்படுத்தப்பட்ட ஹார்மோனியம் மீது அவர்கள காட்டிய விரோதம் அதன் உச்சம் எனலாம்.அகில இந்திய வானொலிகளில் இன்று வரை ஹார்மோனிய இசைக்கு என தனியே ஒரு கச்சேரி நிகழ்ச்சி ஒதுக்குவது கிடையாது.தான் வாழ்ந்த காலத்தை மீறிய புதுமையான பல கருத்துக்களை கூறிய பாரதியும் சனாதனிகளின் குரலை ஒலிப்பது போல ஹார்மோனியத்தை இகழ்ந்து பின்வருமாறு எழுதுகிறான்.

“..ஹார்மோனியம் தெரு முழுவதையும் ஹிம்சைப் படுத்திவிடுகிறது. ஒரு தேசத்தாரின் செவியைக் கெடுத்து ஸங்கீத உணர்ச்சி குறையும்படி செய்ய வேண்டுமானால், கிராமம் தோறும் ‘நாலைந்து ஹார்மோனியம்’ பரவும்படி செய்தால் போதும்.” – பாரதி

harmoniumஇவ்வாறு ஒதுக்கப்பட்ட , இழித்து பழிக்கப்பட்ட ஹார்மோனியத்தால் நாடக இசை வளம் பெற்றது என்பது தான் நடைமுறை உண்மையாக இருந்தது. கேவலமாகப் பேசப்பட்ட இந்த வாத்தியத்தில் பாண்டித்தியம் பெற்றவர்தான் இசைமேதை ஜி.ராமநாதன்.மிகவும் வேகமான தனது வாசிப்பால் ” பாஸ்ட் பிங்கர் ” [ Fast Finger ] ராமநாதன் என புகழ் பெற்றார். ஹார்மோனியத்தில் நளினமாடிய அவரது விரல்களிலிருந்து பிறந்தவை தான் அற்ப்புதமான அவரது பாடல்கள். அவர் மட்டுமல்ல திரை இசைத் திலகம் கே.வீ. மஹா தேவன் , மெல்லிசைமன்னர்கள் விஸ்வநாதன் ராமமூர்த்தி , இசைஞானிஇளையராஜா போன்ற பல இசைமேதைகள் உருவாக்கிய பாடல்களும் ஹார்மோனியத்தின் உதவியுடன் பிறந்தவையே!

நாடகங்களில் ஒலித்த பல ராகங்கள் சினிமாவிலும் ஒலித்தன. இன்றும் மிகவும் பரவலாக பயன்படும் ராகங்களில் மிக முக்கியமாக ஆபேரி என்கிற ராகம் இருந்து வருவதைக் குறிப்பிடலாம். இந்த ராகம் நாடக மேடையால் மிகவும் புகழ் அடைந்தது. ஜனரஞ்சகமாகப் பயன் படுத்தப்பட்ட ராகங்களில் வசீகர ராகமாகும்.

இந்த ராகத்தில் சங்கரதாஸ் சுவாமிகள் வெவ்வேறு விதமான சூழ் நிலைகளுக்கும் பொருத்தமாக பல பாடல்களை அமைத்து முன்மாதிரியாகத் திகழ்ந்தார்.பலராமன் பாடுவதாக அவர் அமைத்த ஒரு பாடல்

” பதி போற்றும் துதி ஏற்றும்
பலராமன் நானே “

இந்த பாடலை தியாகைய்யரின் மிகவும் புகழ் பெற்ற செவ்விசைப்பாடலான

” நகுமோ மோ கனலேனி
நாதாலி தெலிசி “

என்ற ஆபேரி ராக மெட்டை தழுவி அமைத்தார்.அந்த வர்ண மெட்டை அப்படியே பயன்படுத்தினார்.அதே ராகத்தில் மீண்டும் , வேறு ஒரு கோணத்தில் கோவலன் நாடகத்தில் கண்ணகி கோவலனுக்கு எழுதும் உருக்கமான கடிதப் பாடலாக கீழ் உள்ள பாடலை அமைத்தார்.

“மதியிலுயர் வணிகர்குல மதனில் வரு துணைவரடி
மலர்தொழுது கண்ணகை யெனும்
மாதெழுது மோலைமொழி யாதெனின்மனத்தினிய
வாசமிகு மோத விரிவாய்
அதிகமயல் கணிகைதர அவளுடைய சுகமடைய
அனுதினமு மரியகலவி
ஆசைபெற நாடியவள் வீடுகுடி யானபடி
யாலெனது தேக மெலிவாய்
கொதிசுரமு மிகவடைய வலிகுறுதி யுமதுடைய
குளிர்வதன மலரி னழகின்
கோலமது காணும்வரை தானநிலை யாகுமுயிர்
கூறுவது வோபி சகிலை
ததியதனில் வரவுமன மிசியவிலை யெனிலெனுடல்
தனையுமினி அறிய வசமோ
சற்றுகிருபா நோக்கம் வைத்துவர லிங்கனெழு
தத்துணிவு பட்ட திதுவே..”

கேட்பவர்களை உருக வைக்கும் பாடல்.

மீண்டும் சத்யவான் சாவித்திரி நாடகத்தில் ஒரு காட்சியில் காட்டில் சிங்கத்திடம் இருந்து சாவித்திரியை காப்பாற்றிய பின் , களைப்பில் உறங்கும் சத்தியவானை சாவித்திரி எழுப்பும் காட்சியில் பாடப்படும் ஒரு பாடல்..

சத்தியவான் : ஏனோ என்னை எழுப்பலானை மடமானே
எனக்கதனை உரைத்திடுவாய்
இசைந்து கேட்பேன் நானே

சாவித்திரி : சிங்கத்தால் நான் அடைந்த துன்பம் தீர்த்ததாலே
செய்த நன்றி எண்ணி வந்தேன் தேர்ந்த அன்பினாலே

சத்தியவான் : எந்த ஊரோ இருபது ஏது பேர் யார் தந்தை
என்றெனக்கு நீ உரைத்தால் இன்பம் கொள்ளும் சிந்தை
இன்பம் கொள்ளும் சிந்தை

சாவித்திரி : அழகிய மதுராபுரி அஸ்வபதி புத்திரி
அக்கம் பக்கம் பேர்கள் என்னை
அழைக்கும் பெயர் சாவித்திரி

இனிமையாகப் பாடப்படும் இந்தப்பாடல் மேல் சொன்ன ராகத்திலேயே [ஆபேரி ] அமைக்கப்பட்டாலும் , அதில் நாட்டுப்புற இசையின் தாக்கம் துல்லியமாகத் தெரியும்.நாட்டுப்புற இசையும் , செவ்வியல் இசையும் இணைந்த ஒரு அற்ப்புதப் பாடலாக இந்தப் பாடலை சுவாமிகள் அமைத்து பின் வந்த சினிமா இசையமைப்பாளர்களுக்கு வழி காட்டியாக இருந்தார் எனலாம்.

மேல் சொன்ன பாடலை ஏ.பி.நாகராஜன் தான் இயக்கிய நவராத்திரி [1963 ] என்ற படத்தில் பயன்படுத்தி கொண்டார்.அந்த படத்தின் இசையமைப்பாளர் கே.வீ.மகாதேவன் ,ஏ.பி.நாகராஜன் போன்றோர் பாய்ஸ் கம்பனி நாடக மேடை பரம்பரையிலிருந்து வந்தவர்கள்.படத்தில் இந்தப் பாடலை நகைச்சுவை கலந்த பாடலாக அமைத்தார்கள். ஆனால் நாடக மேடையில் அவ்வாறு பாடப்படுவதல்ல.

தமிழ் சினிமாவின் பழம் பெரும் இசையமைப்பாளர்கள் பலரும் சங்கரதாஸ் சுவாமிகளால் ஆரம்பித்து வைக்கப்பட்ட பாய்ஸ் கம்பனி [ Boys Company ] பரம்பரையில் இருந்து வந்தவர்கள் என்பதால் அது அவர்களுக்கு இயல்பாயும் அமைந்தது.

ஜி.ராமநாதன் , எஸ்.எம்.சுப்பைய்யா நாயுடு , எஸ்.வீ.வெங்கட்ராமன்,சி.ஆர்.சுப்பராமன் ,ஆர் .சுதர்சனம் , கே.வீ மகாதேவன் , சி .என்.பாண்டுரங்கன் ,எஸ்.என்.பாலசுப்ரமணியன் ,பி.எஸ்.திவாகர்,எம்.எஸ்.விஸ்வநாதன் போன்ற இசையமைப்பாளர்களை முக்கியமாகக் குறிப்பிடலாம்.

நாடகமேடையில் புகழ் பெற்ற இந்த ஆபேரி ராகம் நாட்டுப்புற இசை வேர்களில் இருந்து கிளர்த்த ராகங்களில் முக்கியமான ராகமாகும்.பழமையும் ,பெருமையும் வாய்ந்த ராகங்களில் முதன்மையான ராகமும் கூட.ராஜ கம்பீரத்தையும் ,வசீகரத்தையும் மனத்தில் உத்வேகத்தையும், உருக்கத்தையும் , இனிமையையும் ஒன்று சேர குழைத்துத் தருவது இந்த ராகத்தின் இயல்பு.

nadaswaramநாதஸ்வரத்தில் மிக விரிவாக வாசிக்கக்கூடிய இந்த ராகம் நம்மை பரவச நிலைக்கு இட்டுச் செல்லும். ஆபேரி ராகம் எடுப்பிலேயே நம் மனதை பிணிக்கும் வண்ணம் பாடல்களை அறிமுகம் செய்யும்ஆற்றல் கொண்டது. இயற்க்கையின் பேரழிலை நாள் முழுவதும் ரசிப்பது போல , நாள் முழுவதும் கேட்கத் தூண்டும் இந்த ராகம் உள்ளத்தில் மிக இலகுவாக இருக்கை போட்டு அமர்ந்து விடக் கூடிய வல்லமை கொண்டது.

தமிழ் செவ்வியல் இசையில் 22 வது மேளகர்த்தா ராகமான கரகரப்பிரியா ராகத்தின் சேய் ராகமாகும்.உணர்வு நிலைகளின் உன்னதங்களை எல்லாம் வெளிக்கொணரக் கூடிய ராகங்களில் மிக முக்கியமானதாக இருப்பதால் சினிமா இசையமைப்பாளர்கள் மிக நேர்த்தியாகப் பல விதமான பாடல்களைத் தந்து மக்களை பரவசப்படுத்தியிருக்கிறார்கள்.இந்தியா எங்கும் ஒலிக்கின்ற ராகங்களில் இதுவும் ஒன்று.

ஹிந்துதானி இசையில் இதை பீம்பிளாசி என்று அழைக்கின்றனர்.கர்நாடகதேவகாந்தாரி ,தேவகாந்தாரி என தமிழிலும் வேறு சில பெயர்களாலும் அழைக்கப்படுவதால் இந்த ராகம் குறித்து சில மயக்கங்களும் இருந்து வருகின்றன.

சினிமாவில் இந்த ராகத்தில் பலவிதமான பாடல்களை [என்னுடைய கேள்வி ஞானத்தில் ] கேட்கும் போது ஒரே ராகமாக இருப்பதை அவதானித்திருக்கின்றேன்.ஆனால் விஷயம் அறிந்தவர்கள என அறியப்பட்ட சிலரிடம் சில பாடல் குறித்து என்னுடைய சந்தேகங்களை கேட்ட போது அவர்கள் ,அது பீம்பிளாஸ் அல்ல , ஆபேரி என்றும் , இல்லை , இது கர்னாடகதேவகாந்தாரி என்றும் குழப்பியிருக்கின்றார்கள்.அது அவர்கள் தவறும் அல்ல என்பது மட்டுமல்ல. இது முறையாக கர்நாடக இசை தெரிந்த சிலருக்கும் தெரிந்திருக்கவில்லை என்பதும் புரிந்தது.

இசைக்கலைஞர்களின் செவ்விகளாலும் ,என்னுடைய அவதானிப்புகளாலும், தேடுதலாலும் இவை எல்லாம் ஒரே ராகம் என் கண்டு கொண்டதில் மகிழ்ச்சி.

இந்த குழப்பங்களுக்கு முக்கிய காரணம் ஹிந்துஸ்தானி இசையாகவும் இருக்கலாம். தமிழ் ராகங்களை கடன் வாங்கும் வட இந்திய சங்கீத நூலாசிரியர்கள் அதற்க்கு தாமே ஒரு பெயர் வைத்து அழைப்பதும் முக்கிய காரணமாகும். எல்லாம் வட மொழியிலிருந்து தான் வந்தது என்று சொல்ல விரும்புகின்ற , அது போன்ற கருத்தை ஒப்பிக்கின்ற பார்ப்பன இசைக்கலைஞர்களும் இதுபோன்ற கருத்துக்களுக்கு வலு சேர்த்து வருகிறார்கள்.

ஆபேரி போன்றே இன்னும் பல ராகங்களும் இது போன்ற குழப்பங்களுக்கு உள்ளாகியுள்ளன.இதைப் போன்றே சுத்த

சாவேரி என்கிற அற்ப்புதமான தமிழ் ராகமும் வடக்கே துர்க்கா என்ற பெயர் பெற்று வருகிறது.

தமிழ் ராகங்களை ஆராய்ந்த ஆபிரகாம் பண்டிதர் , தனது நூலில் பின்வருமாறு கூறும் கருத்து கவனத்திர்க்குரியது.

Abraham_Pandithar” தென்னாட்டில் பிரதி மத்திமத்துடன் பாடப்படும் கல்யாணி ராகம் வட நாட்டுக்குப் போய் கிரமம் மீறி பிரதி மத்திமத்தோடு வேறு இரண்டு மத்திமங்களையும் , அப்படியே காந்தார நிசாதங்களையும் இரண்டு இரண்டு சுரங்களைச் சேர்த்துக் கொண்டு தென்னாட்டுக்கு வர, தென்னாட்டில் உள்ளோர் அதை மிகவும் அழகாக இருக்கிறது என்று பழகுகிறார்கள்.இப்படியே ஆனந்த பைரவி , காம்போதி,தோடி முதலிய இராகங்களும் வர வர கலப்புற்றதாய் மார்க்க முறையைஇழந்து , முற்றிலும் தேசிகமாகி கர்னாடக சங்கீதத்தின் உயர்வைக் கெடுக்கும் நிலைக்கு வந்துள்ளன.” – ஆப்ரகாம் பண்டிதர்

பல நூற்றாண்டுகளாக வேற்று மொழியினர் ஆட்சிக்கு உட்பட்ட தமிழ் இசை தன் வளர்ச்சியை இழந்தது. இது குறித்து இந்திய கலைகளை உலகத்திற்கு அறிமுகம் செய்த கலாமேதை ஆனந்தக் குமாரசுவாமி அவர்கள் பின்வருமாறு எழுகின்றார்.

“The neglect of centuries, as in so many analogous cases, has proved less disastrous than the renewed patronage of a few decades.” – Anandha Kumaraswamy

“மற்ற வித்தைகளைப்பற்றிச் சொல்வது போலவே அநேக நூற்றாண்டுகளாய்ச் சங்கீதத்தைக் கைவிட்டதால் அதற்கு உண்டான இடையூறைவிட சென்ற கொஞ்ச வருஷங்களாய் அது அநேகரால் ஆதரிக்கப்பட்டதினால் உண்டான இடையூறு அதிகம்.” – ஆனந்தகுமாரசாமி

கலாமேதை ஆனந்தக் குமாரசுவாமி அவர்களின் கூற்றை மேற்கோள் காட்டி ஆப்ரஹாம் பண்டிதர் மிக முக்கிய குறிப்பொன்றையும் பின்வருமாறு எழுதுகின்றார்.

” இவர் இந்தியாவின் பல இடங்களுக்குச் சுற்றுப் பிரயாணம் செய்கையில் இந்தியாவின் சிற்ப வேலைகளைப் பற்றியும் சங்கீதத்தைப் பற்றியும் விசாரித்துக் கொண்டிருந்ததை நான் நேரில் அறிவேன். சங்கராபரண இராகத்தில் வழங்கிவரும் ரிஷப தைவதங்கள் கூடுதலாய் வருகிறதைப் பலரிடத்திலும் விசாரித்தும் சரியான பதில் கிடைக்காமையினால் என் வீட்டிற்கு வந்து நேரில் விசாரித்தார்கள். ரிஷபதைவதங்கள் கூடுதலாய் வருகிறதென்று சொல்லக் கேட்ட மாத்திரத்தில் மிகுந்த சந்தோஷமடைந்தார்கள்.” – ஆப்ரகாம் பண்டிதர்

காலத்திக்கேற்ப நடைபெறும் மாற்றங்கள் மூலம் கலை வடிவங்களும் தம்மை புனருத்தாரணம் செய்யும் போது புது வடிவங்கள் பெற்றும் ,புது பெயர்கள் தாங்கியும் வருவதுண்டு. தமிழரான முத்துச்சுவாமி தீட்சிதர் சில ராகங்களுக்கும் தனது இஸ்டப்படி பெயர் வைத்து அழைத்திருக்கின்றார்.அவற்றை அவரது சீடர்கள் ” முத்துச்சுவாமி தீட்சிதர் பாரம்பரியம் ” என்ற அடை மொழியுடன் அழைப்பது வழக்கம்.அவர் ஆபேரி ராகத்திற்கு இட்ட பெயர் தேவகாந்தாரி என்பதாகும்.

ஆனாலும் இந்த ராகங்களின் மகோன்ன

melakartha_ragas

தத்தை உணர்ந்த இசையமைப்பாளர்கள் இந்த பிரச்சனைக்குள் நுழையாமல் தமது காரியத்தில் மட்டும் கண்ணாயிருந்தார்கள்.

அந்தக்கால சினிமா இசையமைப்பாளர்கள் இசை இலக்கணங்களை நன்கு தெரிந்து கொண்டும் ,தேவைக்குஏற்ப இலக்கண வரம்புகளை எல்லாம் கடந்தும் நல்ல இசை தந்தார்கள்.

இசையின் இலக்கணங்களிலும் , தாள கணக்குகளிலும் மக்களை அல்லலுற வைக்காமல், இந்த செப்படி வித்தைகளில் மக்களை சிக்க வைக்காமல் இசையின் சிறப்பை புலப்படுத்தி ,அதன் இனிமையின் ஆற்றலை வெளிப்படுத்தினார்கள். இந்தக் கோளாறைத் தான் சுப்ரமணிய பாரதி கணக்கு , பிணக்கு , ஆமணக்கு என்று கிண்டல் செய்தாரோ ..?.

நமது இசையின் உயிர் நாடியே ராகங்கள் பாடுவதே என்பதை மறந்த அல்லது அந்த ராகங்களை இனிமையாகப் பாட முடியாதவர்கள் , குறிப்பாக இலங்கையிலும் பல வித்துவான்கள் இந்தக் கணக்கில் தான் இசை இருக்கிறது என்று விரல்களை முறிப்பது வேடிக்கையானது.

ராக இசையின் நுண் கூறுகளை ,அதன் உள்ளார்ந்ந்த திரட்சியை ,அதன் ரகசியங்களை , அதன்மகிமையை , அதன்அழகுகளைத் திரட்டி நமக்கு அள்ளித் தந்திருப்பவர்கள் சினிமா இசையமைப்பாளர்களே! அவர்கள் இசையமைத்து தந்த பாடல்கள் ” மேலான இசை ” என்று போற்றப்படும் கர்நாடக இசைக்கு எந்த விதத்திலும் ,எள்ளளவும் குறைந்ததல்ல.பல சந்தர்ப்பங்களில் மிகச் சிறப்பான கமகங்களை ஒரு சில நிமிடங்களிலேயே காண்பிக்கும் ஆற்றலையும் சினிமா இசையமைப்பாளர்கள் வெளிப்படுத்தினார்கள்.

கணக்கு வழக்குகளில் நின்று மல்லுக்கட்டாமல் , பகட்டைக்காட்டி , பிரமிக்க வைத்து ” மக்களை ஓட “வைக்காமல் மன நிறைவான , இனிமையான இசையைத் தந்தார்கள்.

[ தொடரும் ]

முன்னைய பதிவுகள்:

தமிழ்த்திரை இசையில் ராகங்கள் : [ 2 ] – T.சௌந்தர்

தமிழ்த்திரை இசையில் ராகங்கள் : [ 1 ] – T.சௌந்தர்

தமிழ்த்திரை இசையில் ராகங்கள் : [ 2 ] – T.சௌந்தர்

Shakunthala_1940_filmபெரும்பான்மை மக்களால் விரும்பபட்ட தெருக்கூத்துக்களிலும் , நாடகங்களிலும் பல் வகை இசைகள் பயன்பட்டு வந்திருக்கின்றன.எத்தனையோ தலைமுறை வாழ்க்கை அனுபவங்களால் மக்களின் அகமனத்தில் ஊறிய இசை வடிவங்களை நாடகங்களிலும் , பின் வந்த , நவீன கலைவடிவமான சினிமாவிலும் கேட்டு களிப்புற்றார்கள்.அதன் உயிர்ப்பகுதியாக நாட்டுப்புற இசை எல்லையற்ற ஆனந்தம் வழங்கியது.அவை உற்சாகம் ஊட்டுபவையாகவும் ,அவற்றின் தனித்தன்மை , மக்கள் சிந்தையில் பொதிந்த நகைசுவை உணர்வு பாடல்களிலும் பயன்பட்டு அவர்களை ஈர்த்தது.இது ஒருபுறமிருக்க பரந்துபட்ட மக்களிடமிருந்து அன்னியப்பட்ட , இல்லாத ஊருக்கு வழிகாட்டிக் கொண்டிருந்த பக்தி இசையான செவ்வியல் இசையை விட சினிமா இசை அவர்களுக்கு நெருக்கமானதாகவும் இருந்ததும் முக்கிய காரணமாகும்.பொதுவாக நாட்டுப்புற இசை நகைச்சுவை காட்சிகளில் பயன்படுத்தப்பட்டமை ரசிகர்களுக்கு களிப்பூட்டுவதாக இருந்தது..1940 களில் நகைச்சுவை பாடல்களாகவும் , தர்க்கப்பாடல்களாகவும் பல பாடல்கள் வெளி வந்தன.

கதாநாயகர்களுக்கு மட்டும் பாடல்கள் என்றில்லாமல் நகைச்சுவை நடிகர்களுக்கும் பாடல்கள் கொடுக்கப்பட்டன.கதாநாயகர்களின் தோழனாக நகைச்சுவைபாத்திரங்கள் அமைக்கப்பட்டு நகைச்சுவை நடிகர்களுக்கும் முக்கியத்துவம் கொடுக்கப்பட்டது.இதுவும் சங்கரதாஸ் சுவாமிகளின் நாடகங்களில் தான் இருந்து எடுக்கப்பட்டது என்பது ஆய்வாளர்களின் கருத்து.இந்த மரபு தொல்காப்பிய காலத்திற்கு பின் வந்த அகத்துறைப் பாடல்களில் , நகைச்சுவையை தோழியர் கூற்றாக அமைத்த மரபின் தொடர்ச்சி எனலாம்.தொல்காப்பியத்தின் 175 வது சூத்திரம் நாடகத்தில் நகைமொழி செவிலிகூற்றாக வரும் என்று விளக்குகிறார் பேராசிரியர் அ.சா.ஞானசம்பந்தன்.[ தமிழ் நாடக வரலாறும் சங்கரதாச சுவாமிகளும் – பேராசிரியர் அ.சா.ஞானசம்பந்தன்]

ஆரம்பகால தமிழ் சினிமாவில் சாதாரண மக்களின் பேச்சு மொழியிலேயே நகைச்சுவைப் பாடல்கள் மிகுதியாக இருந்தன.கதாநாயகப் பாத்திரங்களின் பாடல்கள் தமிழ் செவ்வியல் சார்ந்த அல்லது அதனைச் சார்ந்த மெல்லிசை வடிவமாக இருக்க நகைச்சுவைப் பாடல்கள் நாட்டுப்புற இசை சார்ந்ததாகவே இருந்தன. இவை மக்கள் நேரடியாக புரியக் கூடிய , அதிகம் சிந்தனைக்கிடமில்லாத வகையில் கொண்டு செல்லும் ஒரு உத்தியாகும்.. இன்று வரை அந்த நிலையில் பெரிய மாற்றங்கள் ஏதுமில்லை எனலாம்.

ஆரம்பகால தமிழ் சினிமாவில் வெளி வந்த நாட்டுப்புறப்பாங்கில் அமைந்த நகைச்சுவைப் பாடல்கள் :

01 கட்டி கரும்பே முத்தம் கொடுத்திடு – ஸ்ரீவள்ளி 1945 – டி.ஆர்.ராமசந்திரன்- இசை : R.சுதர்சனம்
02 அம்மான் மகனை உன்னை மாட்டி வைக்கிறேன் – ஸ்ரீவள்ளி 1945 – இசை : R.சுதர்சனம்
03 தாகம் தீர்ந்ததல்லால் – ஸ்ரீவள்ளி 1945 – டி.ஆர்.மகாலிங்கம் + பி.ஏ.பெரியநாயகி இசை : R.சுதர்சனம்
04 தங்குத டிங்காலே – இன்பவல்லி 1949 – N .S .கிருஷ்ணன் + T.A. மதுரம் – இசை : ஜி. ராமநாதன்
05 சம்பளமே … எலுமிச்சம்பளமே – இன்பவல்லி 1949 – N .S .கிருஷ்ணன் + T.A. மதுரம் – இசை : ஜி. ராமநாதன் [ தர்க்கப்பாடல் ]
06 நம்ம வாத்தியார் – சபாபதி 1941 -T .R .ராமச்சந்திரன் – இசை : R.சுதர்சனம்
07 வருவார் என் மணவாளன் – சபாபதி 1941 -T .R .ராமச்சந்திரன் – இசை : R.சுதர்சனம்
08 மயிலைக்காளை மாடுகளா – சபாபதி 1941 – – இசை : R.சுதர்சனம்
09 கட்டாயம் கல்யாணம் பண்ணிக்க – சபாபதி 1941 – – இசை : R.சுதர்சனம் [ தர்க்கப்பாடல் ]
10 தெருவில் வாராண்டி – பக்த கௌரி 1945 – U.R ஜீவரத்தினம் – இசை :
11 பாட்டைக் கேட்கோணும் – பாதுருஹரி 1945 – T .A மதுரம் இசை :
12 நாடகத் தமிழ் பாட – ஔவையார் – K .P .சுந்தராம்பாள்

ஜி.ராமநாதன் இசையமைத்த நாட்டுப்புறப்பாங்கான பாடல்கள் சில :

01. குன்றுதோர் ஆடிவரும் குமாரவடி வேலன் – படம்: மதுரைவீரன் – பாடியவர் 😛 .லீலா -இசை:ஜி.ராமநாதன்
02. காட்க்குள்ளே கண்ட பூவு கண்ணைப் பறிக்குது படம்: நான் பெற்ற செல்வம் – பாடியவர் :TMS -இசை:ஜி.ராமநாதன்
03. ஏறாத மலைதனிலே – படம்: தூக்குத் தூக்கி – பாடியவர் :TMS – இசை:ஜி.ராமநாதன்
04. வாங்க மச்சான் வாங்க – படம்: மதுரைவீரன் – பாடியவர் :TMS -இசை:ஜி.ராமநாதன்
05. சும்மா இருந்த சொத்துக்கு நட்டம் – படம்: மதுரைவீரன் – பாடியவர் 😛 .லீலா +குழு – இசை:ஜி.ராமநாதன்
06. ஏச்சி பிழைக்கும் தொழிலே சரிதானா – படம்: படம்: மதுரைவீரன் – பாடியவர் :TMS + ஜிக்கி – இசை:ஜி.ராமநாதன்
07. அத்தானும் நான் தானே – படம்: சக்கரவர்த்தி திரும்கள் – பாடியவர் :S.c .கிருஷணன் + TV ரத்தினம் – இசை:ஜி.ராமநாதன்
08. சங்கத்துப் புலவர் பலர் – படம்: சக்கரவர்த்தி திரும்கள் – பாடியவர் :sc.கிருஷணன் + சீர்காழி – இசை:ஜி.ராமநாதன்
09. தந்தான தந் தானத் தந்தானே – படம்: காத்தவராயன் – பாடியவர் :J.P.சந்திரபாபு + ஜிக்கி – இசை:ஜி.ராமநாதன்
10. ஜிகு ஜிகு ஜிகுவென – படம்: காத்தவராயன் – பாடியவர் :J.P.சந்திரபாபு + ஜிக்கி – இசை:ஜி.ராமநாதன்
11. ஆலோலம் ஆலோலம் – படம்: அரசிளங் குமரி – பாடியவர் :P.சுசீலா – இசை:ஜி.ராமநாதன்
12. மாட்டு வண்டி பூட்டிகிட்டு – படம்: வீரபாண்டிய கட்ட பொம்மன் – பாடியவர் :TMS + TV ரத்தினம் – இசை:ஜி.ராமநாதன்
13. ஆத்துக்குள்ளே ஊத்து வெட்டி – படம்: வீரபாண்டிய கட்ட பொம்மன் – பாடியவர் :T.லோகநாதன் + A ரத்தினமாலா + ஜமுனாராணி -இசை:ஜி.ராமநாதன்
14. மாட்டு வண்டி பூட்டிகிட்டு – படம்: வீரபாண்டிய கட்ட பொம்மன் – பாடியவர் :TMS + TV ரத்தினம் – இசை:ஜி.ராமநாதன்
15. வாராண்டி வாராண்டி குட்டி சாத்தான் – படம்: காத்தவராயன் – பாடியவர் :J.P.சந்திரபாபு + A ரத்தினமாலா – இசை:ஜி.ராமநாதன்
16. எத்தனையோ கை பார்த்தேன் – படம்: காத்தவராயன் – பாடியவர் :TMS + ஜிக்கி – இசை:ஜி.ராமநாதன்
17. தந்தான தந் தானத் தந்தானே – படம்: காத்தவராயன் – பாடியவர் :J.P.சந்திரபாபு + ஜிக்கி – இசை:ஜி.ராமநாதன்
18. கண்ணே உன்னால் நான் அடையும் – படம்: அம்பிகாபதி – பாடியவர் :N .S .கிருஷணன் + மதுரம் – இசை:ஜி.ராமநாதன்
19. கன்னித் தமிழ் கண்டெடுத்த காவிய சோலையடி – படம்: அம்பிகாபதி – பாடியவர் :சீர்காழி + கோமளா – இசை:ஜி.ராமநாதன்
20. ஆடட்டுமா கொஞ்சம் பாடட்டுமா – படம்: அம்பிகாபதி – பாடியவர் :P.சுசீலா – இசை:ஜி.ராமநாதன்
21. பிறக்கும் போது பிறந்த குணம் – படம்: சக்கரவர்த்தி திருமகள் – பாடியவர் :- சீர்காழி – இசை:ஜி.ராமநாதன்.
22. டக்கு டக்கு டக்கு – படம்: வீரபாண்டிய கட்டபொம்மன் – பாடியவர் :எஸ்.வரலட்சுமி + P.சுசீலா + A.ரத்னமாலா – இசை:ஜி.ராமநாதன்
23. அஞ்சாத சிங்கம் என் காளை – வீரபாண்டிய கட்டபொம்மன் – பாடியவர் :P.சுசீலா – இசை:ஜி.ராமநாதன்
24. கறந்த பாலையும் காகம் குடியாது – வீரபாண்டிய கட்டபொம்மன் – பாடியவர் :TMS – இசை:ஜி.ராமநாதன்

இசை மேதை ஜி.ராமநாதன் மட்டுமல்ல பிற இசையமைப்பாளர்களும் நாட்டுப்புற இசையில் பல பாடல்களை தந்திருக்கிறார்கள். அவற்றுள் மிகச் சில உதாரணங்கள் :

25 அக்கா மகளே – சுமங்கலி – S.C .கிருஷ்ணன் + A. ரத்னமாலா – இசை : K.V.மகாதேவன்
26 வாங்க எல்லோரும் சேர்ந்து – கூண்டுக்கிளி – T.M.S +P.லீலா – இசை : K.V.மகாதேவன்
27 ஆத்தாடி தள்ளாத – பெரிய கோவில் -K.ஜமுனாராணி + L.R.ஈஸ்வரி – இசை : K.V.மகாதேவன்
28. உன் திரு முகத்தை – மகாதேவி – பாடியவர் :J.P.சந்திரபாபு + A.ரத்னமாலா – இசை:விஸ்வநாதன் – ராமமூர்த்தி
29. தந்தானா பாட்டு பாடி – மகாதேவி – பாடியவர் :J.P.சந்திரபாபு + A.ரத்னமாலா – இசை:விஸ்வநாதன் – ராமமூர்த்தி
30. ஏரு பூட்டுவோம் – மகாதேவி – பாடியவர் :TMS + P.லீலா+ ஜமுனாராணி – இசை:விஸ்வநாதன் – ராமமூர்த்தி
31. குறுக்கு வழியில் – மகாதேவி – பாடியவர் :TMS – இசை:விஸ்வநாதன் – ராமமூர்த்தி
32. மணப்பாறை மாடு கட்டி – மக்களைப் பெற்ற மகராசி – பாடியவர் :TMS – இசை:K.V.மகாதேவன்
33. தாராபுரம் தாம்பரம் – மக்களைப் பெற்ற மகராசி – பாடியவர் :S.C.கிருஷ்ணன் + A.ரத்னமாலா – இசை:K.V.மகாதேவன்
34. தர்மம் என்பார் நீதி என்பார் – பதி பக்தி – பாடியவர் :TMS + J.P.சந்திரபாபு – இசை:விஸ்வநாதன் – ராமமூர்த்தி
35. அம்பிகையே முத்து மாரியம்மா – பதி பக்தி – பாடியவர் :TMS + P.சுசீலா – இசை:விஸ்வநாதன் – ராமமூர்த்தி
36. பிள்ளையாரு கோவிலுக்கு – பாகப்பிரிவினை – பாடியவர் :TMS + P.லீலா – இசை:விஸ்வநாதன் – ராமமூர்த்தி
37. தேர் ஓடும் எங்கள் சீரான மதுரையிலே – பாகப்பிரிவினை – பாடியவர் :TMS + P.லீலா – இசை:விஸ்வநாதன் – ராமமூர்த்தி
38. தேர் ஓடும் எங்கள் சீரான மதுரையிலே – பாகப்பிரிவினை – பாடியவர் :TMS + P.லீலா – இசை:விஸ்வநாதன் – ராமமூர்த்தி
39. நல்ல காலம் வருகுது – புதையல் – பாடியவர் :TMS – இசை:விஸ்வநாதன் – ராமமூர்த்தி
40. சின்ன சின்ன இழை பின்னி பின்னி வர – புதையல் – பாடியவர் :P.சுசீலா – இசை:விஸ்வநாதன் – ராமமூர்த்தி
41 . ரீ ..ரீ …ரீ .. ரீ வாங்க ரீ ..ரீ …ரீ – கல்யாணப்பரிசு – பாடியவர் :சீர்காழி – இசை:A.M.ராஜா
42. சும சும சம் சம் சம் – புனர் ஜென்மம் – பாடியவர் :எஸ்.ஜானகி – இசை:T.சலபதிராவ்
43. ஓகோ .. நீ சும்மா சும்மா – இதயகீதம் – குழுவினர் – இசை : T.G.லிங்கப்பா

பின்னாளில் மெல்லிசைப்பாங்கான காதல் பாடல்களிலும் மிக அற்ப்புதமாக நாட்டுப்புறத் தாளத்தை பயன் படுத்தியாவர் K.V.மகாதேவன் அவர்கள்.

பார்வையாளர்களுடன் நேரடியாகத் தொடர்பு கொள்ளும் கலைவடிவமான நாடகக் கலையில் நவரச உணர்வுகளை வெளிக்கொணரும் பல் வகை பாடல்கள் நாடகத் தேவையை ஒட்டி பயன்பட்டும் வந்தன.

சோழர் ஆட்சியின் வீழ்ச்சியோடு நாடகத்தின் வளர்ச்சியும் குன்றியது. பின் 13 ஆம் நூற்றாண்டில் புத்துயிர் பெற்ற தமிழ் நாடக வளர்ச்சி பலவிதமான இசைகளை உள்வாங்கி வந்துள்ளது. பள்ளு நாடகம் ,குறவஞ்சி நாடகம் , குழுவ நாடகமும் ,நொண்டி நாடகம் , அருணாசலக் கவிராயர் [ 1712 – 1799 ] எழுதிய கீர்த்தனை நாடகம் என்பன இசையுடன் இணைந்தனவாக இருந்தன.

இவை மட்டுமல்ல , கரகாட்டம் போன்ற கலை வடிவங்களும் மக்களின் வரவேற்ப்பை பெற்றிருந்தன. லாவணி , வில்லுப்பாட்டு ,கதாகலாட்சேபம் போன்ற கதை சொல்லும் முறைகளும் பாடல் வடிவிலேயே இருந்தமையும் குறிப்பிடத்தக்கது.

” ஒரு சிறந்த படைப்பாளி தன மரபில் நின்று படைப்பதும், சில சமயம் அவனது படைப்பால் அந்த மரபே செழுமைப்படுவதும் உண்டு. தனியே பழைய மரபை ஒட்டி படைப்பது மட்டும் அவனது திறமையை வெளிப்படுத்தாது. பழமையிலிருந்து உதிக்கும் புதிய மரபில் நின்று அவன் படைக்கும் கலையில் தனித்தன்மையை காட்டும் போது கலையில் அவனுக்கு ஒரு நிரந்தர புகழையும் வழங்கி விடும.”

இந்த கருத்தை வலியுறுத்தும் மாபெரும் கலைஞராக சங்கரதாஸ் சுவாமிகள் விளங்கினார் என்றால மிகையில்லை.தமிழ் நாடக வளர்ச்சி அவர் வரவால் புத்துயிர் பெற்றது என்பர். அவருடைய நாடகங்களில் இசையே மிகுந்துதிருந்தது.அவருடைய இசை நாடகங்களில் பயன்பட்ட முக்கிய இசைக் கூறுகளாக

1. தென்னக இசை [ கர்னாடக இசை ]
2.. தமிழ்திருமுறை இசை [ தேவார இசை ]
3. நாட்டுப்புற இசை
4.. ஹிந்துஸ்தானி இசை
5.. மேலைத்தேய இசை

எனப் பல்வகை இசை அமைந்ததென ஆராய்ச்சியாளர் அரிமளம் .எஸ்.பத்மநாபன் அவர்கள் குறிப்பிடுகின்றார்.இந்த இசை வகைகளுடன் அவர் காலத்தில் புகழ் பெற்றிருந்த கீர்த்தனை நாடக இசையையும் பயன்படுத்தினார்.
நாடுப்புற கலைவடிவங்களில் உள்ள இசை வடிவங்கள் பலவற்றையும் உள்வாங்கியதாக நாடகப்பாடல்கள் அமைக்கப்பட்டன.குறிப்பாக ஒப்பாரி இசை , தெம்மாங்கு , சிந்துப் பாடல்கள் அவரது நாடகங்களில் பயன்படட்டுள்ளன.

“சாகப் போகும் தருவாயிலும் பாட்டு , செத்துக்கிடந்தாலும் பாட்டு , அழும் போதும் பாட்டு , எந்தச் சந்தர்ப்பத்திலும் பாட்டு என்பது அன்றைய நாடகம் பற்றிய கருத்தாக இருந்தது.”
இது அன்றைய நாடகத்தில் இசை வகித்த முக்கியத்துவத்தை உணர்த்தி சொல்லிய கருத்தாகும்.இந்த பாடல் படுத்திய பாடு பெரும்பாடு என்றே எண்ணத் தோன்றுகிறது.

தமிழ் செவ்வியல் இசைக்கு முக்கியத்துவம் கொடுத்த சங்கரதாஸ் செவ்வியல் அரங்குகளில் புகழ் பெற்ற ராகங்களை தனது நாடகங்களில் பயன்படுத்தி பரந்து பட்ட மக்கள் மத்தியில் பிரபலப்படுத்தினார்.

தமிழ் செவ்வியல் இசையில் கீர்த்தனைகளின் வர்ண மெட்டுக்களை , ராகங்களை எடுத்துக் கொண்டு தனது நாடக பாத்திரங்கக்ளுக்குப் பொருத்தமாக அவற்றை அமைத்தார்.அதன் மூலம் அந்த வர்ண மெட்டுக்களை பிரபலப்படுத்தினார் . அவற்றை செவ்வியல் பரீச்சயம் இல்லாத பாமர மக்கள் , செவ்வியல் இசைக் கலைஞர்கள் பாடும் போது , ” சுவாமிகளின் நாடக பாடல்களை பாடுகிறார்கள் ” என்று சொல்லும் அளவுக்கு அவற்றை பிரபலப்படுத்தினார் என்பார் ஆய்வாளர் அரிமளம் .எஸ்.பத்மநாபன்.

hindustani_picஅவர் வாழ்ந்த காலத்தில் பார்சி நாடகக் குழுவினரால் பிரபல்யப்படுத்தப்பட்ட ஹிந்துஸ்தானி இசை , இசை ரசிகர்களிடம் வரவேற்பைப் பெற்றது.ஹிந்துஸ்தானி இசையில் ஆர்வம் காட்டிய சங்கரதாஸ் குலாம் முகமது அப்பாஸ் என்ற ஹிந்துஸ்தானி இசைக்கலைஞரிடமிருந்து இசை நுட்பங்களை அறிந்து கொண்டார். ஹிந்துஸ்தானி ராகங்களான ஜோன்புரி , ஜமுனாகல்யாணி ,சிந்துபைரவி ,பெகாக் அக்கால நாடகங்களில் அறிமுகமாயிருந்தன.

அதுமட்டுமல்ல ஆங்கிலேய ஆட்சியில் கிறிஸ்த்தவ மத பிரசாரத்திற்காக பயன்படுத்தப்பட்ட பாடல்களை, எட்வேர்ட் போல் [Edward Poul ] என்பவர் தொடர்பால் தமிழில் சுரப்படுத்துவதில் பங்களித்த சங்கரதாஸ் சுவாமிகள் ஆங்கில வர்ண மெட்டுக்களின் அமைப்புக்களையும் அறியும் வாய்ப்பையும் பெற்றுகொண்டார்.இந்த இசையின் கூறுகளை ஞான சௌந்தரி என்ற தனது நாடகத்தில் அங்கங்கே பயன்படுத்தியுள்ளார்.

பாடல் வடிவினைக்கொண்ட தெருக்கூத்து , காவடிச்சிந்து ,கீர்த்தனை ,கதாகாலட்சேபம் ,விருத்தங்கள், தருக்கள் என்ற பாடல் வடிவம் ,[ இதில் ஓரடிக்கீர்த்தனை , ஈரடிக்கீர்த்தனை வகைகள் உள்ளன ] , தெம்மாங்கு ,சிந்து இசை வகைகள் பயன்பட்டுள்ளதுடன் நல்ல இசை பயிற்சி ,தமிழ் மொழியில் பயிற்சி போன்றவற்றையும் முக்கியமானதாகக் கருதினார் சுவாமி.

நாடகத்தில் ஹார்மோனிய இசை , பின்பாட்டு , முன்பாட்டு போன்ற இசை யுக்திகள் அறிமுகம் செய்யப்பட்டன.

சங்கரதாஸ் சுவாமிகளின் நாடகத்தில் பயன் பட்ட செவ்வியல் ராகங்கள் சில:

1. நாடகம் : வள்ளிதிருமணம் நாடகம்

பாடல் : 1 . ஞான தேசிகா மெய் ஞான தேசிகா – ராகம் : தோடி
இந்தப்பாடல் தியாகராஜசுவாமிகளின் ” ஆரம்கிபவே பா – ஸார கிம்பவே ” என்ற தோடி ராக கீர்த்தனத்தின் பாதிப்பாகும்.

பாடல் : 2 . முருகன் திருமால் மருகன் – பெருமை அந்த
முக்கணணனுக்குமில்லை – ராகம் : அடானா

பாடல் : 3 .”சுந்தரம் நிறைந்து ததும்பும் சிறந்த மங்கை ” – ராகம் : நாட்டக்குறிஞ்சி

2. நாடகம் : பவளக்கொடி

பாடல் : 1 . எத்தனை நேரம் இப்படி நிற்ப்பேன் – ராகம் : தன்யாசி தாளம் : ஆதி
பாடல் : 2 . ஏதுக்கு இந்த விசாரம் – ராகம் : நாட்டக்குறிஞ்சி தாளம் : ஆதி
இந்தப்பாடல் தியாகராஜ சுவாமியின் ” சங்கீத ஞானமு ” என்ற அதே ராகப் பாடலை
ஓட்டியமைந்தததாகும்.இதே ராகத்தில் வள்ளிதிருமணம் நாடகத்தில்
“சுந்தரம் நிறைந்து ததும்பும் ” என்ற பாடலும் பயன் படுள்ளது.

பாடல் : 3 . ஏதுக்கிந்த சரப்பளியினால் – ராகம் : பூர்விகல்யாணி தாளம் : ஆதி
பாடல் : 4 . செம்பவள வள்ளி போல் எங்கே வந்தாய் ” – ராகம் : மோகனம் தாளம் : ஆதி

பாடல் : 5 . அப்பா புலேந்திரனே அருமைக்கண்மணியே – ராகம் :முகாரி

3. நாடகம் : சத்தியவான் சாவித்திரி

பாடல் : 1 . நந்தவன அழகைக் கண்டு – ராகம் : கமாஸ்
இதே ராகத்தில் ” காமி சத்தியபாமா கதவை திறவாய் “என்று எஸ்.ஜி.கிட்டப்பா பாடி புகழ் பெற்றார்.
பாடல் : 2 . அம்மணி நீ சொல்லக் கேளாய் – ராகம் : பரசு

4. நாடகம் : ஞானசௌந்தரி

பாடல் : 1 . தந்தை இன்று தான் பிரிந்தார் – ராகம் : முகாரி – [ஏக்கப்பாடல் ]
இதே ராகத்தில் ராமன வனம் புகும் காட்சியில் அருணாசலக்கவிராயரின் ராமநாடகத்தில் பாடல் இடம் பெற்றுள்ளது.

பாடல் : 2 . இனிமேல் இவனை விட்டால் எனக்கு கெடுதி வரும் – ராகம் : சாவேரி

பாடல் : 3 . இந்த மாதிரி அன்பு செய்திடில் – ராகம் : பைரவி

பாடல் : 4 . மாதவம் செய் மாமுனியே – ராகம் : குறிஞ்சி

5. நாடகம் : கோவலன் சரித்திரம்

பாடல் : 1 . நீயே சகாயமென நினையாமல் மானே
நேசம் தாசி மேல் வைத்தேன் – – ராகம் : சகானா – தாளம் :மிஸ்ர சாபு

பாடல் : 2 . அடைக்கலமே அடைக்கலமே
அருமை குணமுள்ள நாயகியானாள் – ராகம் : ஆரபி – தாளம் :ஆதி
இந்தப்பாடல் வரிகளை அப்படியே இசை மேதை ஜி.ராமநாதன் ” கற்ப்புக்கரசி ” [1955] என்ற படத்தில் வரும் ஒரு கோவலன் இசை நாடகப்பாடலில் அர்ப்புதம்மாகப் பயன்படுத்தி இருப்பார்.அந்த பாடலை A.ரத்னமாலா + கே.ஜமுனாராணி + ஜிக்கி போன்றோர் அழகாகப் பாடியிருக்கின்றார்கள்.

பாடல் : 3 . மதியிலுயர் வணிகர்குல மதனில் வரு துணைவரடி
மலர்தொழுது கண்ணகை யெனும் – ராகம் : ஆபேரி

கோவலனுக்கு கண்ணகி எழுதும் கடிதம் போல் அமைந்த பாடல்.

பாடல் : 4 . வாராய் நேசா மதன உல்லாசா – ராகம் : பெகாக்

பாடல் : 5 . ஆபரண வகை யாவும் தந்தேனினி – ராகம் : நாட்டைக்குறிஞ்சி

இதே போன்று நாட்டுப்புறபாங்கில் தெம்மாங்கு , குறத்திப்பாடல் ,ஒப்பாரி ,நொண்டிச்சிந்து , கும்மிப்பாடல் போன்றவற்றையும் அப்பர் , சுந்தரர் , சம்பந்தர் ஆகியோரின் தேவார இசையையும் தேவைகளுக்கேற்ப பயன் படுத்தியிருக்கின்றார்.

மேலே குறிப்பிடப்பட்டுள்ள பாடல் வகைகளில் எல்லாம் ராகங்கள் விரவிக்கிடக்கின்றன.குறத்தி பாடல்களில் சங்கராபரணம் ,ஒப்பாரிப் பாடல்களில் முகாரி ,தெம்மாங்கு இசையில் யதுகுல காம்போதி, ஆனந்த பைரவி , மாயாமாளவ கௌளை , கும்மிப்பாடல்களில் ஆனந்தபைரவி, பைரவி தேவார இசையில் மோகனம் , பூபாளம் போன்ற ராகங்கள் காணப்படுகின்றன.

பெரும்பாலான திருவாசகப் பாடல்கள் மோகனராகத்தில் இசைக்கப்படுகின்றன.விருத்தபாடல்களாகவும் அவை பாடப்படும்.ஆதிகாலத்தில் வழங்கி வந்த முல்லைப்பண் என்பதே இன்றைய மோகனம் என்பது அறிஞர்களின் கருத்து.இசை அறிஞர் எஸ்.ராமநாதன் இதனை தனது ஆய்வுகள் மூலம் நிறுவியுள்ளார்.
பலவித பாடல்களுக்கும் அதற்க்கான ராகங்கள் என்னென்னவென்றும் , இன்னன்ன நேரங்களில் அவை பாடப்பட வேண்டும் என வகுக்கப்பட்டன.மிகப்பழங்காலம் தொட்டே தமிழில் பகல்பண்கள் , இராப்பண்கள் , பொதுப்பண்கள் என்ற வகைப்பாடு இருந்து வந்துள்ளது.

பகல்பண்கள் :
புறநீர்மை , பஞ்சமம் , இந்தளம் , கௌசிகம் , காந்தர பஞ்சமம் , தக்கேசி , பழம் பஞ்சுரம் , நட்டபாடை , சாதாரி .

இராப்பண்கள் :
சீகாமரம் , வியாழக்குறிஞ்சி , அந்தாளக்க்குறிஞ்சி , கொல்லி , மேகராகக்குறிஞ்சி , பழந்தக்க ராகம் .

பொதுப்பண்கள்:
செந்துருத்தி , திருத்தாண்டகம் ,செவ்வழி.
இந்த மரபின் தொடர்ச்சியாகவே பின் வந்த காலங்களில் சில முறைகள் பின்பற்றப்பட்டன.

திருப்பள்ளி எழுச்சி – பூபாளம்
திருப்பொன்னூசல் – பைரவி , நீலாம்பரி ,ஆனந்த பைரவி
திருச்சாழல் – ஆரபி
திருப்படையாட்சி – ஆனந்த பைரவி

திருவெம்பாவை என்பது மகளிர் பொய்கையில் நீர் விளையாடி மகிழும் அதிகாலைக்குரியது.மாணிக்க வாசகர் பாடிய திருவெம்பாவை மோகனத்தில் இப்போதும் மார்க்ழியில் பாடப்படுகிறது.
அவை மட்டுமல்ல நாட்டுப்புற இசையில் செஞ்சுருட்டி , உசேனி ,கமாஸ் , ஆபேரி , சிந்துபைரவி என எங்கும் ராகங்கள் நீக்கமற நிறைந்துள்ளன.
இவை மட்டுமல்ல அன்றாட வாழ்வின் பல நிகழ்வுகளுக்கும் ,கொண்டாட்டங்களுக்கும் ,பல்வகைத் தேவைகளுக்கும் இன்ன , இன்ன இசை அல்லது ராகங்கள் பயன் பட வேண்டும் என சில விதி முறைகளை கையாண்டார்கள்.உ +ம் : ஒரு திருமண வைபவத்தில் நாதஸ்வர இசையில் என்னென்ன ராகங்கள் பயன்பட வேண்டும் என்ற சில படிமுறைகள்:

மாப்பிள்ளை அழைப்பு – கல்யாணி
ஊர்வலம் புறப்படும் போது – சங்கராபரணம்
ஊர்வலம் போகும் போது – காம்போதி , தோடி
திருமண கூடத்தில் – கரகரப்பிரியா
நிச்சயதார்த்தம் – பியாகடை ,கானடா , அடானா
முகூர்த்தம்நடக்கும் போது – நாடக்குருஞ்சி , தன்யாசி
தாலி கட்டும் போது – ஆனந்தபைரவி

பண்டைக் கலாச்சாரத் தொடர்பால் தாய்லாந்து நாட்டில் இன்றளவும் கோயில்களில் தமிழில் தேவாரம் பாடப்படுவதாகவும் நாம் அறிகின்றோம். மோகன ராகத்தில் தேவாரம் பாடப்படுகிறது . தாய்லாந்து நாட்டு இசையிலும் மோகனராகம் பயன் பாட்டில் உள்ளது.

அந்தக் கால நாடகக் கலைஞர்கள் நாடக மேடைகளில் இந்த ராகங்களை எல்லாம் பாடி மக்களை மகிழ்ச்சிப்படுத்தினார்கள். ஆனால் அந்தகால நாடகக் கலைஞர்களின் வாழ்வு எவ்வாறிருந்தது என்பதை நாம் சிந்தித்துப் பார்க்கவேண்டும்.அந்த கால நாடக்கலைஞர்களின் நிலையை நாடக மேதை T.K.சண்முகம் [26 . 04 . 1912 – 15 . 02. 1973 ] தனது ” நாடகக்கலை ” எனும் நூலில் பின்வருமாறு விபரிக்கிறார்.

” நான் நாடகத்துறையில் இறங்கிய அந்த நாளில் [1918] நாடகக்கலைஞர்கள் மிகவும் இழிவாகக் கருதப்பட்டு வந்தார்கள்.கொலைகாரன், கொள்ளைக்காரன் முதலியவர்களைக் கண்டால் மக்கள் எப்படிப் பயந்து ஒதுங்கி வாழ்வார்களோ அதே நிலைதான் நாடகக்காரனுக்கும் இருந்து வந்தது.நாடகக்காரர் என்றால் குடியிருக்க வீடு கொடுக்கக்கூட மக்கள் பயந்தார்கள்.அனேக ஊர்களில் மயானக்கரைக்கு அருகே பேய்கள் வசிக்கும் வீடென்று ஒதுக்கப்பட்ட வீடுகளில் தான் அந்தக் காலங்களில் நாங்கள் குடியிருக்க நேர்ந்தது.” ஒரு தொழிலுமில்லாதார் நாடகக் காரரானார் “என்பது ஒரு பழமொழியாகக் கூட உருவாகியிருந்த காலம்.”

Sankaradass Swamigal Bookதவத்திரு சங்கரதாஸ் சுவாமிகள் [ 1867 – 1922 ] நாடகத்துறையில் நுழைந்தது 1891 ம் ஆண்டு.அவருடைய காலத்தில் தமிழ் சமூகத்தில் நாடகத்துறை எவ்வாறிருந்தது என்பதை நாம் ஊகித்துக்கொள்ளலாம்.சுவாமிகளின் வாழ்வைப் பற்றி நூல் எழுதிய நாடக மேதை T.K.சண்முகம்
” நாடக உலகம் மட்டுமன்று, தமிழ் இலக்கிய உலகமே தன் இதயத்தில் வைத்துப் ஒற்ற வேண்டிய பெரும் புலவர் தவத்திரு சங்கரதாஸ் சுவாமிகள்.ஆனால் , தமிழ் இலக்கிய வரலாறு எழுதுவோருக்கு எங்கள் சுவாமியைப்பற்றி எதுவும் தெரியாது.பெயரைத் தெரிந்த ஒரு சிலருக்கும் அவருடைய பெருமை தெரியாது.இது காலம் செய்த சதி.சுவாமிகளின் ஆயிரக்கணக்கான மாணாக்கர்களில் அடியேனும் ஒருவன், அவர் வாழ்ந்த காலத்தில் நான் அறியாச் சிறுவன்.நன்கு அறிமுகப்படுத்தும் அளவுக்கு உறவாடிப் பழ்கியவனல்லன்.
பெரியவர்கள் யாரேனும் இப்பணியை செய்திருந்தால் பெரு மகிழ்ச்சியடைந்திருப்பேன் என்ன செய்வது? எவரும் முன்வரவில்லை.” என்று எழுதுகின்றார்.

தமிழ் புலவர்கள் , அறிஞர்கள் போன்றவர்கள் அவரை ஒரு ” கூத்தாடி ” என்று கேவலமாக தான் கருதியிருக்க வேண்டும்.!இசை என்பது குறைந்த சாதியினருடன் அடையாளப்படுத்தபட்டு வந்ததென்பதையும் நாம் நினைவில் கொள்வதும் நலம்.

சுவாமிகளின் நாடக இசையில் மற்ற எந்த கலை வடிவத்தையும் காட்டிலும் கதாகாலாட்சேபத்தின் தாக்கமே மிகவும் அதிகம் என்பார் , சுவாமிகளின் பாலர் நாடக சபை மரபில் வந்த திரைப்பட நடிகர் எஸ்.எஸ்.ராஜேந்திரன் அவர்கள்.

சங்கரதாஸ் சுவாமிகளின் நாடகங்களில் பயிற்சி பெற்ற கலைஞர்களில் கிட்டப்பா சகோதரர்கள் மிக முக்கியமானவர்கள்.குறிப்பாக எஸ்.ஜி. கிட்டப்பா [1906–1933 ] தனது இனிய குரல் வளத்தால் எல்லோரையும் கவர்ந்தார்.மிக்க ஏழைக் குடும்பத்தில் பிறந்த கிட்டப்பா மிக இள வயதிலேயே [ 6 வயது ] வறுமை காரணமாக நாடகத்தில் சேர்க்கப்பட்டார். அவரது பாடல்களை கர்னாடக இசைகலைஞர்களும் ரசித்துக் கேட்டார்கள்.வள்ளி திருமணம் என்ற சுவாமிகளின் முதன்மை நாடகத்தில் நடித்து பெரும்புகழ் பெற்றார் கிட்டப்பா.
” இந்த நாடகத்தில் இசையும் ஒரு கதாபாத்திரம் ” என்பார் இந்திரா பார்த்தசாரதி .

நாடகமேடையில் தோன்றி தனது குரலினிமையால் பாடுவதில் புதிய பாங்கை உண்டாக்கினர்.இவ்விதம் முறையாக பாடுபவர்களால் நாடக இசையும் வளம் பெற்றது.எஸ்.ஜி.கிட்டப்பாவின் இனிமையான பாடல்கள் இசைத்தட்டுக்களாக வெளிவந்து புகழ் பெற்றன.ஓங்கி குரல் எடுத்துப் பாடும் அவரது குரல் 5 ,6 கட்டைகளுக்கும் அனாயாசமாக போகக்கூடியது .அவரது சுருதி 4 கட்டை என்பர்.அவரது பாடல்களை இன்றும் நாம் இசைத்தட்டுக்களில் கேட்டு மகிழலாம்.

கிட்டப்பா பாடி பிரபலமான பாடல்களில் :

எவரெனி நிர்னயின்சனா – ராகம்: தேவாம்ருதவர்சினி – தியாகராஜர் கீர்த்தனை

கோடையிலே இளைப்பாற்றிக் கொள்ளும் வகை கிடைத்த – ராகமாலிகை – வள்ளலார் பாடல்

காயாத கானகத்தே நின்றுலாவும் – ஸ்ரீ வள்ளி நாடகத்திற்க்காக சங்கரதாஸ் எழுதிய ராகமாலிகைப்பாடல் பாடல்

கீதா சமுத்திரம் – ராகம் : சுருட்டி – தியாகராஜர் கீர்த்தனை

ராக சுத்த ரச பாலமு தேசி – ராகம் : ஆந்தோளிகா

trmகிட்டப்பாவின் பாணியில் பல பாடகர்கள் பாடி புகழ் பெற்றார்கள்.அவர்களில் முக்கியமானவர்கள் சி.எஸ்.ஜெயராமன் , டி.ஆர். மகாலிங்கம் , வீ.ஏ .செல்லப்பா போன்ற பாடகர்கள்.இளவயது சி.எஸ்.ஜெயராமன் பாடிய போது கிட்டப்பாவே அவதாரம் எடுத்தது போல் இருந்தது என அந்தக்கால பத்திரிகைகள் எழுதின.ஆயினும் கிட்டப்பாவின் சுருதியில் பாடக்கூடிய டி.ஆர்.மகாலிங்கம் , கிட்டப்பாவின் பாணியில் பாடி புகழ் பெற்றார். மேல் சொன்ன கிட்டப்பாவின் பாடல்களை வேதாள உலகம் , ஸ்ரீவள்ளி போன்ற படங்களில் பாடினார்.

” காயாத கானகத்தே நின்றுலாவும் நற்காரிகையே ” என்ற பாடலை 1974 இல் வெளிவந்த ” ராஜபார்ட் ரங்கதுரை ” படத்தில் T.M.சௌந்தரராஜனும் கிட்டப்பாவின் சாயல் தெரியும்படி பாடியிருப்பார்.

டி.ஆர்.மகாலிங்கத்தின் பாடல் பாணியை பின்பற்றிப் பாடி புகழ் பெற்றவரே சீர்காழி கோவிந்தராஜன். அகத்தியர் [1972 ] படத்தில் இருவரும் இணைந்து பாடிய” இசையாய் தமிழாய் இருப்பவனே ” , ” நமச்சிவாய என சொல்வோமே ” போன்ற பாடல்களில் ஒற்றுமையை நாம் அவதானிக்கலாம்.

எம் .கே.தியாகராஜா பாகவதர் [ 1910 – 1959 ]

கிட்டப்பாவின் [ 1906 – 1933 ] சமகாலத்தவரான எம் .கே.தியாகராஜா பாகவதர் கிட்டப்பாவின் இசைத்தட்டுக்களை ஆர்வமோடு கேட்ட்வராவார்.இவரும் நாடக மேடையிலிருந்து திரைக்கு வந்த கலைஞரே.
எஸ்.ஜி.கிட்டப்பா வின் நாடகங்களைப் பார்ப்பதில் அலாதிப்பிரியம் கொண்டவராயிருந்தார்எம் .கே.தியாகராஜா பாகவதர். .தனித்தன்மையும் ஒப்பற்ற திறமையும் , தன்னிகரில்லாத குரல் வளமும் , அழகிய தோற்றமும் கொண்ட தியாகராஜ பாகவதர் சுருதி சுத்தமாக கர்னாடக இசை பாடல்களைப் பாடுவதில் வல்லவராயிருந்தார்.
மிக இளம் வயதிலேயே அபாரமாகப் பாடும் திறமை பெற்ற சிறுவன் தியாகராஜனின் திறமையை அறிந்த ரசிக ரஞ்சனி சபா அதிபர் எப்.ஜி. நடேசய்யர் தியாகராஜனின் தந்தையிடம் பின்வருமாறு கூறினார் .

” எனக்கொரு பையன் வேண்டும்! ஆமாம் , அவன் எப்படிப்பட்ட பையனாக இருக்க வேண்டும்தேரியுமா ? இந்த மஹா ஜனங்கள் இருக்கிறார்களே , ரசிக மகா ஜனங்கள் , இவர்கள் அவன் சிரித்தால் தாங்களும் சிரிக்க வேண்டும் ;அவன் அழுதால் தாங்களும் அழவேண்டும்.அவனை யாராவது அடித்தால் இவர்கள் உடனே எழுந்து சென்று அவனை அடித்தவனை அடித்து நொறுக்கத் துடிக்க வேண்டும்…”

baghavadar_thiyagarajaதந்தையாரை இணங்க வைத்து “அரிச்சந்திரா ” நாடகத்தில் லோகிதாசனாக நடிக்க வைத்தார்.தியாகராஜ பாகவதரின் தந்தையார் கதாகாலட்சேபத்தில் பின்பாட்டுக்கலைஞராகவும் , நாடகங்ககளிலும் நடித்து வந்தவர் என்பது குறிப்பிடத்தக்கது.தனது பாட்டுத்திறத்தால் மக்களை கவர்ந்த பாகவதர் பற்றி கலைவாணர் என்.எஸ்.கிருஷ்ணன்

” மக்கள் பாகவதரைத் தேடிக் கொண்டு வருகிறார்கள் , நானோ அவர்களைத் தேடிக்கொண்டு போகிறேன் .” என பெருமையாகக் கூறினார்.

பிறவியில் அவருக்கு அமைந்த பாடல் திறனும், இனிய குரலும் அவரது உயர்வுக்கு காரணமாயிருந்தாலும் , அவரது உழைப்பும் , ஊக்கமும் அவரது காலத்தில் வாழ்ந்த நாதஸ்வரமேதை திருவாடுதுறை ராஜரத்தினம்பிள்ளை ,புகழ் பெற்ற ஆலத்தூர் சகோதரர்கள் ,இசை மகா சமுத்திரம்’ என்று புகழப்படும் விளாத்திக்குளம் சுவாமிகள் , பாபநாசம் சிவன் ஆகியோரின் வழியை அவர் தக்க இடத்தில் தக்கவாறு பயன்படுத்தியதும் காரணமாகும்.

” கேட்ட மாத்திரத்தில் “ஓட வைக்கும் ” கர்னாடக இசையை மெல்லிசையாக்கி பாடி மக்களை மகிழ்வித்தவர் பாகவதர் ” என்பார் விந்தன்.

நெல்லையில் வாழ்ந்த விளாத்திக்குளம் சுவாமிகள் என்ற இசை மேதை பற்றி பழம்பெரும் எழுத்தாளர் கி.ராஜநாராயணன் சிறப்பாக எழுதியிருப்பது குறிப்பிடத்தக்கது.
விளாத்திக்குளம் சுவாமிகள் சண்முகப்பிரியா , சிந்துபைரவி ,நாகடப்பிரியா, புன்னாகவராளி போன்ற ராகங்களையே எப்போதும் பாடுவார் என எழுதுகின்றார் விந்தன்.

திருநீலகண்டர் [ 1938 ] படத்தில் ” பவள மால்வரை பனி படர்ந்தனையதோர் ” என்ற பைரவி ராகத்தில் ஆரம்பிக்கும் ராகமாலிகைப் பாடலுக்கான ,அருமையான சங்கதிகளை ,பிருக்காக்களை நாதஸ்வரமேதை திருவாடுதுறை ராஜரத்தினம்பிள்ளையிடம் கற்றுக்கொண்டு பாடினார் தியாக ராஜ பாகவதர்.
ராஜரத்தினம்பிள்ளையின் நாதஸ்வர வாசிப்பின் தன்மையை இந்த பாடலில் நாம் துல்லியமாகக் கேட்கலாம்.

ராஜரத்தினம்பிள்ளைசங்கீத சக்கரவர்த்தி ராஜரத்தினம்பிள்ளை மிகச் சிறந்த பாடகர் என்பது பலரும் அறியாத செய்தி.அவர் பாடி நடித்த காளமேகம் [1940] திரைப்படத்தில் தோடி ராகத்தில் அவர் பாடிய ” சண்முகன் காட்டிடும் ” என்ற விருத்தப்பாடலில் அசாத்தியமான கமகங்களால் பாவங்களை காட்டியிருப்பார்.அதுமட்டுமல்ல காளமேகம் படத்தில் பல பாடல்களை இவ்விதமாகப் பாடி அசத்தியிருப்பார்.

தமிழ்மக்கள் “சங்கீத சக்கரவர்த்தி ” எனப் பெருமை கொள்ளும் ராஜரத்தினம்பிள்ளை பாகவதரின் ரசிகராக இருந்தார்.

கலைவாணர் என்.எஸ் .கிருஷ்ணனின் புதுமனை புகுவிழாவில் பாகவதரின் கச்சேரி இடம் பெற்றது.பாகவதரின் கதையை எழுதிய விந்தன் பின்வருமாறு எழுதுகிறார்.

“அந்தக் கச்சேரிக்கு வந்தவர்களில் இருவர் விசேசமாகக் குறிப்பிடத்தக்கவர்கள்.அவர்களில்; ஒருவர் கவிமணி தேசிக விநாயகம் பிள்ளை ; இன்னொருவர் திருவாடுதுறை ராஜரத்தினம் பிள்ளை .

எந்த ராஜரத்தினம் பிள்ளை ? என்று இதற்குள் கேட்கமாட்டீர்கள் என்று நினைக்கின்றேன்.” சங்கீத சக்கரவர்த்தி” என்று சொல்ல மனம் இல்லாமல் ” நாதசுவர சக்கரவர்த்தி ” என்று சிலர் “நாதசுவரம் ” என்பதற்கு மட்டும் ஒரு தனி அழுத்தம் கொடுத்துச் சொல்லிக் கொண்டிருக்கின்றார்களே , அந்த” சங்கீத சக்கரவர்த்தி” தான் !.

பாகவதரின் பாட்டின் மயக்கமோ என்னவோ.அன்று சாட்சாத் ராஜரத்தினம் பிள்ளை , சாட்சாத் ராஜரத்தினம் பிள்ளையாக நடந்து கொள்ளவில்லை;சாதாரண காலரி மாஸ்டர் போல் பாகவதருக்கு எதிர்த்தாற் போல் உட்கார்ந்து , ” ராதே உனக்குக் கோபம் ஆகாதடி பாடுங்கள் , உனைக்கண்டு மயங்காத பேர்களுண்டோ பாடுங்கள்!” என்று கேட்டுக்கொண்டே இருந்தார்; பாகவதரும் புன்னகையுடன் அவர் கேட்டுக்கொண்டிருந்த பாடல்களைஎல்லாம் ஒன்று விடாமல் பாடிக்கொண்டே இருந்தார்.

இதனால் என்ன ஆயிற்று என்கிறீர்கள்? ” பாகவதர் சாதாரண மக்களுக்காகப் பாடுகிறார். நாங்களோ சங்கீத விற்ப்பனர்களுக்காகப் பாடுகிறோம் ” என்று சொல்லிக் கொண்டிருந்த சில மகா வித்துவான்களின் கொட்டம் அடங்கிப் போயிற்று.”

ராஜரத்தினம் பிள்ளை போன்ற சங்கீத மேதைகள் மட்டுமல்ல பாமர மக்களும் தியாக ராஜ பாகவதரின் பாடலகளில் மயங்கினார்கள்.மேலோட்டமாகப் பார்க்கும் போது மெல்லிசையாகத் தோன்றும் அந்தப் பாடலகளில் கனதியான செவ்வியல் இசை ராகங்களே அவற்றின் அடிப்படையானதாக இருந்தன.

இசையமைப்பில் இசைமேதை ஜி.ராமநாதனும் , பாடல் எழுதிய பாபநாசம் சிவனும் அவற்றை தனது இனிமையான குரலால் பாடிய தியாகராஜா பாகவதரும் புதிய இசை சாம்ராஜ்ஜியத்தை படைத்தார்கள்.அந்தப் பாடல்கள் இன்று கேட்டாலும் இனிக்கின்ற பாடல்களே !

புகழின் உச்ச்சியில் இருந்த தியாகராஜபாகவதர் , ஸ்டூடியோவில் ஒரே ஒருவரைக் காணும் போது மட்டும் தான் கை கூப்பி வணக்கம் செலுத்துவாராம்! அந்தபெருமைக்கும் , மரியாதைக்குமுரியவராக இருந்தவர் இசைமேதை ஜி.ராமானாதன்.

ஜி.ராமானாதன் போட்ட வர்ண மெட்டுக்கள் காலம் கடந்தும் நிலைத்து நிற்கின்றன.அந்த மெட்டுக்களால் இனிமை நிறைந்த ராகங்கள் பரந்துபட்ட மக்களிடம் போய்ச் சேர்ந்தன.

பாபநாசம் சிவன் – ஜி.ராமநாதன் , தியாகராஜ பாகவதர் கூட்டணியில் வெற்றிபெற்ற பாடல்கள் :

1. அம்பா மனம் கனிந்துனது – படம் : சிவகவி [1943] – தியாகராஜ பாகவதர் – ராகம் : பந்துவராளி – இசை : ஜி.ராமநாதன்

2. ராதே உனக்கு கோபம் ஆகாதடி – படம் : – தியாகராஜ பாகவதர் – ராகம் : செஞ்சுருட்டி – இசை : ஜி.ராமநாதன்

3. சிவபெருமான் கிருபை வேண்டும் – படம் : நவீன சாரங்கதாரா – தியாகராஜ பாகவதர் – ராகம் : சுருட்டி – இசை :
ஜி.ராமநாதன்

4. ஞானக்கண் ஒன்று இருந்திடும் போதினிலே – படம் : – தியாகராஜ பாகவதர் – ராகம் : அசாவேரி – இசை : ஜி.ராமநாதன்

5. சந்திரர் சூரியர் -படம் :அம்பிகாபதி – தியாகராஜ பாகவதர் – ராகம் : மாண்டு – இசை : ஜி.ராமநாதன்

6. உலகில் இன்பம் வேறுண்டோ – படம் :அம்பிகாபதி – தியாகராஜ பாகவதர் – ராகம் : சிம்மேந்திர மத்திமம் – இசை :
ஜி.ராமநாதன்

7. நாடகமே உலகம் – படம் :அம்பிகாபதி – தியாகராஜ பாகவதர் – ராகம் : கமாஸ் – இசை : ஜி.ராமநாதன்

8. சிதம்பர நாத – படம் :திருநீல கண்டர் – தியாகராஜ பாகவதர் – ராகம் : ஹேமாவதி – இசை : ஜி.ராமநாதன்

9. மறைவாய் புதைந்த ஓடு – படம் :திருநீல கண்டர் – தியாகராஜ பாகவதர் – ராகம் : தர்பார் – இசை : ஜி.ராமநாதன்

10. ஒரு நாள் ஒரு பொழுதாகினும் – படம் :திருநீல கண்டர் – தியாகராஜ பாகவதர் – ராகம் : கமாஸ் – இசை : ஜி.ராமநாதன்

11. தீன கருணாகரனே நீலகண்டனே – படம் :திருநீல கண்டர் – தியாகராஜ பாகவதர் – ராகம் : – இசை : ஜி.ராமநாதன்

12. தியானமே எனது மனம் – படம் :அசோக்குமார் – தியாகராஜ பாகவதர் – ராகம் : காபி – இசை : ஜி.ராமநாதன்

13. சற்ப கோண போதன் – படம் :அசோக்குமார் – தியாகராஜ பாகவதர் – ராகம் : ஜோன்புரி – இசை : ஜி.ராமநாதன்

14. மாநில வாழ்வு பெரும் ஆனந்தம் – படம் :அசோக்குமார் – தியாகராஜ பாகவதர் – ராகம் : கல்யாணி – இசை : ஜி.ராமநாதன்

15. உன்னை கண்டு மயங்காத – படம் :அசோக்குமார் – தியாகராஜ பாகவதர் – ராகம் : – இசை : ஜி.ராமநாதன்

16. வதனமே சந்திர பிம்பமோ – படம் : – தியாகராஜ பாகவதர் – ராகம் : சிந்துபைரவி – இசை : ஜி.ராமநாதன்

17. வள்ளலைப் பாடும் வாயால் – படம் : – தியாகராஜ பாகவதர் – ராகம் : செஞ்சுருட்டி – இசை : ஜி.ராமநாதன்

18. சொப்பன வாழ்வில் மகிழ்ந்து – படம் : – தியாகராஜ பாகவதர் – ராகம் : விஜய நகரி + புவன் காந்தாரி – இசை : ஜி.ராமநாதன்

19. கவலையைத் தீர்ப்பது – படம் : – தியாகராஜ பாகவதர் – ராகம் : நாட்டக்குறிஞ்சி – இசை : ஜி.ராமநாதன்

20. அற்ப்புத லீலைகளை – படம் :சிவகாமி – தியாகராஜ பாகவதர் – ராகம் : மத்யமாவதி – இசை : ஜி.ராமநாதன்

21. தில்லையின் நாயகனே – படம் :சிவகாமி – தியாகராஜ பாகவதர் – ராகம் : சிந்துபைரவி +சாமா + பௌளி – இசை : ஜி.ராமநாதன்

22. என் உடல் தனில் – படம் :சிவகவி – தியாகராஜ பாகவதர் – ராகம் : யதுகுலகாம்போதி – இசை : ஜி.ராமநாதன்

23. கிருஷ்ணா முகுந்தா – படம் :சிவகாமி – தியாகராஜ பாகவதர் – ராகம் : நவரோஜ் – இசை : ஜி.ராமநாதன்

24. மன்மத லீலையை வென்றார் – படம் :ஹரிதாஸ் – தியாகராஜ பாகவதர் – ராகம் : சாருகேசி – இசை : ஜி.ராமநாதன்

25. கண்ணா வா மணி வண்ண வா – படம் :ஹரிதாஸ் – N.C.வசந்த கோகிலம் – ராகம் : சுத்த தன்யாசி – இசை : ஜி.ராமநாதன்

26. எனது மனம் துள்ளி – படம் :ஹரிதாஸ் – N.C.வசந்த கோகிலம் – ராகம் : மாண்டு – இசை : ஜி.ராமநாதன்

27. கதிரவன் உதயம் கண்டு – படம் :ஹரிதாஸ் – N.C.வசந்த கோகிலம் – ராகம் : பிலகரி – இசை : ஜி.ராமநாதன்

28. சியாமளா சியாமளா – படம் :சியாமளா – தியாகராஜ பாகவதர் – ராகம் : திலங் – இசை : ஜி.ராமநாதன்

அந்நாளைய நாடகங்களில் பின் பாட்டு , முன்பாட்டு முறைகள் முக்கியத்துவம் வாய்ந்ததவையாக விளங் கியதால் பாடக்கூடியவ்ரக்ளுக்குப் பயிற்சிக களனாகவும் நாடக மேடை திகழ்ந்தது.

[ தொடரும் ]

முன்னையது :

தமிழ்த்திரை இசையில் ராகங்கள் : [ 1 ] – T.சௌந்தர்

இலங்கை தேசிய கீதம்: இழந்து போன வசந்தத்தின் குறியீடு : T.சௌந்தர்

ananda1இலங்கை பாராளுமன்றத்தில் இலங்கையின் தேசிய கீதத்தை சிங்கள மொழியுடன் தமிழையும் இணைக்க வாசுதேவ நாணயக்காராவால் கொண்டு வரப்பட்ட கோரிக்கை ஜனாதிபதி மகிந்த ராஜபக்சயால் நிராகரிக்கப்பட்டது.

“ஒரு நாட்டின் தேசிய கீதம் எனபது ஒரு மொழியில் தான் பாடப்படுகிறது .இரு மொழியில் பாடப்படும் ஒரு நாட்டைத் தமக்குக் காட்டும்படி ” கேட்டு நாணயக்காராவின் “நாணய”த்தையும் பரிசோதித்திருக்கிறார். ஜனாதிபதி கேட்ட கேள்விக்கு நாணயக்காரா என்ன பதிலி றுத்தார் என்பது எந்த ஊடகங்களிலும் வெளியாகவில்லை.அல்லது பதிலளிக்க முடியாத நாணயக்காரா , ஜனாதிபதியின் உள்நோக்கத்தை அறிந்து ” நாணயமாக ” பதிலளிக்காமல் விட்டாரா என்பதை “பத்திரிகாதர்மத்திடம்” விட்டு விடுவோம்.

ஒரு நாட்டின் தேசிய கீதம் என்பது எல்லா நாடுகளிலும் ஒரு மொழியில் மட்டும் தான் பாடப் படுகிறதா ? இல்லை என்ற பதில் சொல்லி பல நாடுகளை உதாரணம் காட்டலாம் .

சுவிஸ் ,கனடா ,தென் ஆபிரிக்கா போன்ற நாடுகளில் ஒன்றுக்கு மேற்பட்ட மொழிகளில் தேசிய கீதம் பாடப்படுகின்றன.

ஒரு நாட்டின் இன , மத நல்லிணக்கத்தை அரசே ஏற்ப்படுத்த வேண்டும்.ஆனால் வலிந்து ஒரு மொழியை நீக்குவது பல்லின மக்களிடையே முரண்பாடுகளை வளர்க்கவே உதவும்.ஆட்சியாளர்களின் நோக்கம் அதுவே என்பதை சமீபத்திய சம்பவங்கள் நிரூபித்து வருகின்றன.அதில் ஒரு அங்கமாகவே தேசிய கீத விவகாரம் பயன்பட்டுள்ளது.ஆனால் இந்த தேசிய கீதம் பிறந்த பொழுதிலிருந்து பல நெருக்கடிகளை சந்தித்ததுடன் அரசியல்வாதிகளின் தலையீடுகளால் தொந்தரவுக்கும் ஆளாகியே வந்துள்ளது.

அவர்களின் அளவுக்கதிகமான தலையீடு இலங்கை தேசிய கீதத்தை எழுதிய இசைக்கலைஞரான ஆனந்த சமரக்கோன் [ 13.01.1911 – 05.04.1962 ] அவர்களின் மரணத்திற்கும் காரணமாகியது.

” நமோ நமோ மாதா ” என்று ஆனந்த சமரக்கோன் எழுதிய வரிகள் ” ந ” என்ற எழுத்தில் ஆரம்பிப்பதால் நாட்டிற்கே துரதிஸ்டம்,அமங்கலம் என்ற சாஸ்த்திர நம்பிக்கையின் அடிப்படையில் ” நமோ ” என்பதற்குப் பதிலாக ” ஸ்ரீ லங்கா மாதா “என்று ஆனந்த சமரக்கோன் அவர்களின் ஒப்புதல் இல்லாமலேயே மாற்றினார்கள்…இந்த சம்பவம் அவரது மரணத்திற்கும் காரணமாகியது எனலாம்.

இதனால் மனமுடைந்த அவர் அளவுக்கு அதிகமான தூக்கமாத்திரைகளை உட் கொண்டு மரணமடைந்தார்.இறப்பதற்கு முன் அவர் டட்லி சேனாநாயக்காவுக்கு எழுதிய கடிதத்தில்

” என்னுடைய குரலை நசுக்கி விட்டார்கள்.என்னுடைய மரணம் மட்டுமே என் வேதனையைப் போக்கும் ” என்று எழுதினார்.

” அரசும் ,அரசு சார்ந்த பண்டிதர்களும் சமரக்கோனைக் கொன்று விட்டார்கள் ” என்று சிங்களப் பத்திரிகைகள் எழுதின.

ஆனந்த சமரக்கோன் எழுதிய இலங்கைத் தேசிய கீதம் எந்த இனத்தையும் புகழாலாமல் ,இனவாத கருத்துக்களை விதைக்காமல் எழுதப்பட்டமை மிக முக்கியமானதாகக் கருதப்படுகிறது.சாந்திநிகேதனம் என்கிற தாகூரின் கலை கல்லூரியில் கலை பயின்ற ஆனந்த சமரகோனிடம் தாகூரின் தாக்கம் இருந்தது.

தாகூரின் ” ஜன கண மன ” என்ற இந்திய தேசிய கீதத்தின் சாயல் இலங்கை தேசிய கீதத்தில் கடுமையாகத் தெரிவதை நாம் காணலாம்.எனினும் இந்திய தேசிய கீதத்தை விட இனிமையானது இலங்கைத் தேசிய கீதம் என்பது மறுக்க முடியாத உணமையாகும்.

இந்தியாவெங்கும் ஒலிக்ககூடிய ராகமான பிலகரி ராகத்தில் இந்திய தேசிய கீதத்தை தாகூர் அமைத்தார்.வட இந்தியாவில் இந்த ராகத்தை பிலவால் என்று அழைப்பர்.தமிழ் செவ்வியல் இசையில் இந்த ராகம் [ பிலகரி ] வசந்த காலத்திற்கு உரிய ராகமாக போற்றப்படுகின்றது.இருந்தாலும் வங்காள நாட்டுப்புற இசையிலும் மிக அதிகமான அளவில் பயன்படுகின்ற ராகம் என்பதால் தான் தாகூர் இதைப் பயன்படுத்தியிருக்கின்றார்.

tagoreவசந்தத்தை எதிர் பார்க்கும் ஒரு வறிய குடும்பத்தின் கதையைச் சொன்ன சத்யஜித்ரே அவர்களின் படமான ” பாதர் பாஞ்சாலி ” என்ற கிராமிய படத்தின் பிரதான இசையாக [Theme Music ] இந்த பிலகரி ராகத்தையே , பல் வேறு சூழ் நிலைகளுக்குப் பொருத்தமாக அந்த படத்தின் இசையமைப்பாளர் இசைமேதை ரவிசங்கர் அமைத்திருப்பார்.

தமிழ் படத்திலும் இந்த ராகத்தின் ரீங்காரத்தை , கிராமப்புற அழகின் பின்னணியில் புல்லாங்குழல் இசையாக கவிக்குயில் படத்தில் இளையராஜா பயன்படுத்தியிருப்பார்.

தெலுங்கு விவசாயிகளின் அவல நிலையைஉண்மையாகப் படம் பிடித்துக்க் காட்டிய படமான ” மாபூமி “[ 1979 ] [எங்க நிலம் ] என்ற கிராமிய படத்தில் Title பாடலான ” பல்லே தூரி பில்ல காடா ” என்ற சோகம் ததும்பும் பாடலும் பிலகரி ராகத்திலேயே அமைக்கப்பட்டது.அந்த படத்தின் இசையமைப்பாளர்களில் ஒருவரான Goutam Ghosh என்பவர் வங்காளத்தைச் சேர்ந்தவர்.

இனிமையும் ,சோகமும் ,அழகும் ததும்பும் ஓர் அருமையான ராகத்தில் அமைந்த இனிய இசை கொண்டது இலங்கை தேசிய கீதம்.

இன்று தமிழ் மக்களின் இழந்து போன வசந்தத்தின் குறியீடாக இலங்கையின் தேசிய கீதமும் அமைந்து விட்டது.

தமிழ்த்திரை இசையில் ராகங்கள் : [ 1 ] – T.சௌந்தர்

காலங்களில் அவள் வசந்தம் 

கலைகளிலே அவள் ஓவியம் 

msvஎன்ற  கண்ணதாசனின்   பாடல் வரிகள் புகழ் வாய்ந்தவை. ஆனால்  எல்லோர் மனதையும் ஈர்த்து  உணர்வுகளை கிளர்த்துவதில்  பேராற்றல் கொண்டது  இசை.

கலைகளிலே முதன்மையான இடத்தையும்  பிடித்திருப்பது இசைக்கலையே !. எந்தக் கலைக்கும் வாய்க்காத இந்த சிறப்பு இசைக்கு வாய்த்திருப்பது அதிசயமும் அல்ல.
இசை மனிதப்  பொறிகளில்  மின்னலைகளை பாய்ச்சும்  ஒலி அதிர்வுகளுடன் தொடர்புடையது .நுண்கலைகள் ஒன்றுடன் ஒன்று  தொடர்பு கொண்டவையாக விளங்கினாலும் , அதில் தன்னிகற்ற கலையாக இசை உயர் நிலை பெற்றிருக்கிறது.பாமரர் முதல் பண்டிதர் வரை ரசிக்கும் ஒரே கலை ,  இசைக்கலை  என்பதில் யாருக்கும் இரண்டு கருத்து இருக்காது எனலாம்.

நல்ல இசை ரசனை வீண் டம்பத்தையும் ,வரட்டுப் பெருமையையும் நொறுக்கிவிடும்.கசடு நீங்கிய நல்  வாழ்வுக்கும்  துணை போகும்.உள்ளத்தில் ஒளியும் ,உணர்வும் பொங்கச் செய்வது இசை.

செவி , கண் , மூக்கு , வாய் , மெய்  என்ற ஐம் பொறிகளில் இன்பத்தை உண்டாக்கும் இயற்க்கை சூழலை வர்ணிக்கும் அப்பர் ” மாசில் வீணையும்  ” என  மிக நுட்பமாக இசையையே முன் நிறுத்துகிறார்.

எத்தனையோ இன்பம் இந்த நாட்டில்  உண்டு
அத்தனைக்கும் இன்பம் பாட்டில் உண்டு

என்று மகுடம் வைத்தது போல்  சொன்னான்  மக்கள் கவிஞன் பட்டுக்கோட்டைக் கல்யாணசுந்தரம். இன்பங்களை தேடிய மனிதன் இசையையும் அதில் அங்கமாகவே  கண்டான். துயரம் ததும்பும்  ஒரு பாடலிலும்  இன்பத்தை அனுபவிப்பவன் மனிதன்.

மன்னர்களின்  சபைகளில் இசை என்பது ” இன்பம் துய்த்தல் ” என்று கருதப்பட்டு வந்ததை நாம் வரலாற்றிலிருந்து அறிகின்றோம். இசையின் உன்னதங்களை பல அறிஞர் பெருமக்கள் விதந்து பேசியிருக்கின்றார்கள்.

Moziஇசையின் இந்த மயக்கும் ஆற்றல் , செயற்கரிய நல்ல காரியங்கள் செய்வதைத் தடுக்கும் ஆபத்தும் கொண்டது  என்று  சில அறிஞர்கள் கருதியிருக்கின்றனர்.சீன தத்துவ அறிஞர்  மோசி [ Mozi ,470  -391 BC ] ,” இசையும் நடனமும் பிரயோசனமற்றவை “என்றார்.இவரின் இந்த கருத்திற்காக பின்  வந்த தத்துவாசியர்களால் கண்டனத்துக்குள்ளாகியுமிருக்கின்றார் மோசி. ஸ்பெயின் நாட்டு தத்துவ மேதை George Santayana என்பவர் ” Music is Essentaially useless , as life is ” என்ற ஒரு கருத்தையும் கூறியிருக்கின்றார்.

எதிர்மறையாக இப்படிப்பட்ட சில  கருத்துக்கள் இருப்பினும் , இசையை போற்றிய கிரேக்கத் தத்துவ ஞானி பிளேட்டோவின் கருத்துக்களைச் சார்ந்தே அறிஞர்கள்  பலரும் கருத்துக்களை   வெளியிட்டுள்ளனர்.

” உலகம் வண்ணங்களால் என்னுடன் பேசுகிறது.என்னுடைய ஆன்மா இசையில் பதில் அளிக்கிறது !”  என்று  தாகூர் கூறியது மிகவும் நுட்பமான விடயமாகும்.காட்சியும் , ஒலியும்  இல்லாத உலகம் இல்லை. புற உலகை  அறிகின்ற வகையில் இரண்டு கலைகளும் மிக முக்கியத்துவம் வாய்ந்தவை என்பதை நாம் உணர்ந்து கொள்ளலாம்.


ஓசையும் , ஒலியும் இசைக்கு அடிப்படையானவை.. பேச்சுக்கும்    ஓசை, ஒலி தாம் அடிப்படை என்றாலும் பேச்சை , இசை பின்னுக்குத் தள்ளி விடுகின்றது.இனிய ஓசையிலும் , ஒலியிலும் உருவாவது இசை. இரண்டுக்கும் இருக்கும் வேறுபாடு  மிகவும் நுண்ணியது.  ஒலி என்பது சத்தத்தையும் , ஓசை என்பது ஒருவித லயத்துடன் வருவதையும் குறிக்கும்.

ஒலி குறுகியது. ஓசை பரந்தது.ஓசை, ஒலி எல்லாம் ஆனாய் நீயே என  ஓசையையும் , ஒலியையும் விதந்து  போற்றுவது அதன் முக்கியத்துவம் கருதியே.

ஒலியின் முக்கியத்துவத்தை ஆதிகால மனிதன் அறிந்திருக்கின்றான்.அதனால் தான்  புராதன மக்களின் மொழி இசையுடன் இயைந்திருந்தது என்பர்.

தமிழிலும் பல் துறை சார்ந்த பழைய நூல்கள் எல்லாம் பாட்டு வடிவிலும் இருப்பதை நாம் காணலாம்.பழங்காலத்தில் தமிழ் கவிதைகளை இசையுடன் பாடி வந்தனர்.அதன் வழியே மகாகவி பாரதியும் தனது கவிதைகளை இன்ன இன்ன ராகங்களில் பாட வேண்டும் என்ற குறிப்புக்களை எழுதிச் சென்றுள்ளான்.

tkcரசிகமணி டி.கே.சி அழகாகச் சொல்வார்.” தமிழ் பாடல்களுடைய அமைப்பையும் , அழகையும் அனுபவிக்க வேண்டும் என்றால் பாட வேண்டும்.எந்த ராகத்தைக் கொண்டாவது பாட வேண்டும். இந்த விசயத்தில் ஆங்கில ஹோதா ,உத்தியோக ஹோதா வந்து குறுக்கே நிற்க்கக் கூடாது  ” என்று.

உடலுழைப்பின் களை தெரியாமல் இருக்க எழுப்பிய பாட்டாளி மக்கள் எழுப்பிய ஒலிகள், ஓசைகள்  சந்தங்களாகி ,பின் நாட்டுப்புறப்பாடல்களாக மலர்ந்தன.உழைப்பின்  தாள கதிக்கேற்ப  அவர்களின் உள்ளத்திலிருந்து தன்னிச்சையாக பீறிட்டு எழுந்தவை. பல்லாயிரமாண்டுகளாக உழைக்கும் மக்கள் இயற்கையோடு இணைந்த வாழ்க்கையிலிருந்து  பெற்ற அனுபவங்களிலிருந்து    தங்கள் உள்ளத்து  உணர்வுகளை எல்லாம்  கொட்டித் தீர்த்த  பாடல்கள் அவை.
இவ்விதம் பாடப்பட்ட பாடல்களின் பாடகர்களும் ,கவிஞர்களும், இசையமைப்பாளர்களும் அந்த மக்களே . வாழ்வின் எல்லா நிலைகளையும் அவர்களின் பாடல்கள் தொட்டுச் செல்லும்.அவற்றில் கற்பனையும் உவமைகளும் சிறந்து விளங்கும் படியாக அமைந்திருக்கும்.இதனை நாட்டுப்புறப் பாடல்கள் அல்லது நாடோடிப்பாடல்கள்  என்று அழைப்பர்.

பல் வகை உழைப்பில் ஈடுபட்ட மக்கள்  தன்னானே , தனனானே , ஏ தன்னானே  என்று பாடியவைகளே பிற்காலத்தில் சந்தக் குழிப்புக்களாயின. அதன் ஓசை நயம் பெரும் புலவர்களையும் ஈர்த்த்திருக்கிறது. இந்த சந்தக் குழிப்புக்களே வண்ணப்பாடல்கள் ஆயின என்று ஆய்வாளர்கள் கருதுகிறார்கள். இதிலிருந்தே பிற்காலத்தில் ராகங்கள் விருத்தி அடைந்தன.

ஒலி  நயம் மிகுந்த கம்பன் பாடல்

                    தழையொலித்தன வண்டொலித்தன தரொலித்தன பேரியா

                    முழவொலித்தன தேரொலித்தன முத்தொலித்தன மல்குபேர்

                    இழையொலித்தன புள்ளொலித்தன யாழொலித்தன எங்கணும்

                    மழையொலித்தன போல்கலித்தன மனத்தின் முந்துறு வாசியே

தொல்காப்பியம் ஒலிநயம் , ஓசைநயம் குறித்து ஏராளமான செய்திகளைக் கூறுவதுடன் , குறிப்பாக ஒலி நயத்தின் சிறப்பை விளக்கும் வண்ணம் , சந்தம் போன்றவற்றையும்   விரிவாக பேசுகிறது.

” வண்ணந்   தானே நாலைந்தென்ப ..” என்று கூறி , அந்த இருபது வண்ணங்களை விபரித்துச் செல்கிறார் தொல்காப்பியர்.

                    பாஅ வண்ணந் தா வண்ணம்

                    வல்லிசை வண்ண மெல்லிசை வண்ண

                    மியைபு வண்ண மளபடை வண்ண

                    நெடுஞ் சீர் வண்ணங் குருஞ்சீர் வண்ணஞ்

                    சித்திர வண்ண நலிபு வண்ண

                    மகப்பாட்டு வண்ணம் புறப்பாட்டு வண்ண

                    மொழகு வண்ண மொரூஉ  வண்ண
மெண்ணு வண்ண மேந்தல் வண்ண
முருட்டு வண்ண முடுகு வண்ணாமன்
                     றாங்கன மறிப வறிஞ்சதிசி னோரே   – [ செய்யுள் :213]

அவர் பட்டியலிட்ட வண்ணங்கள்.

1. பாஅ வண்ணம்   2. தாஅ  வண்ணம்    3. வல்லிசை வண்ணம்   4. மெல்லிசை வண்ணம்   5.இயைபு வண்ணம்   6.அளபடை வண்ணம்   7.நெடுஞ்சீர்  வண்ணம்  8. குருஞ்சீர் வண்ணம்  9. சித்திர வண்ணம்   10. நலிபு வண்ணம்  11. அகப்பாட்டு வண்ணம்   12. புறப்பாட்டு வண்ணம்   13.ஒழுகு வண்ணம்   14. ஒருஉ வண்ணம்  15. எண்ணு வண்ணம்  16.அகைப்பு வண்ணம்  17. தூங்கல் வண்ணம் 18. ஏந்தல் வண்ணம் 19. உருட்டுவண்ணம்  20.முடுகு வண்ணம்

சொற்களின் ஒழுங்கான சீரமைப்பில்  ஓசை நயம் இயல்பாக உருவாகும் என்பர்.இசைந்து வரும் ஓசைநயம் இசை எனப்படும்.தொல்காப்பியத்தில் மட்டுமல்ல , பழங்காலத் தமிழ் இலக்கியங்கள் பலவும் வண்ணம்  பற்றிய செய்திகளைத் தெரிவிக்கின்றன.

” வள்ளிதழ்க் கோதை தானே இட்டதோர் வண்ணம் தன்னைக்
கொள்ளத்தான் முரலறுற்றுக் கோலமை வீணை கொண்டாள்  ”   
என்று சீவகசிந்தாமணியும்

”  எண்ணிய நூற் பெருவண்ணம் இடைவண்ணம் வனப்பென்னும்
வண்ண இசை வகையெல்லாம் மாதுரிய நாதத்தில்
நண்ணிய பாணியும் இயலும் தூக்கும் நடை முதற் கதியில்
பண்ணனமய எழும் ஓசை எம்மருங்கும் பரப்பினார்..”           
என்று  பெரியபுராணமும் கூறுகிறது.

சமணம் சார்ந்த  சங்க இலக்கியங்களில் சொல்லப்படும் பண் என்பதன் அடிப்படை  வண்ணப் பாடல்களே  என்பர்.

கவிதையிலும்  ஓசை நயம் முக்கியமானதாகும். உரைநடைக்கும் , கவிதைக்குமுள்ள வித்தியாசமே இந்த ஓசை நயம் என்கிற இசைத்தன்மை தான் காரணம் என்பர். ஓசைநயமும் , ஒலிநயமும் கவிதைக்கு மிக முக்கியமானதெனினும் ,கவிதைக்குரிய ஓசை நயம் பிரத்தியேகமானது.கவிதையில் இருக்கும் ஒலிநயம் உத்வேகம் தந்துவிடும். கவிதையில் எதுகை, மோனை போன்றவை  நினைவில் நிறுத்திக் கொள்ள பயன் படும் ஒலி நய  உத்திகள்  என்பர். மோனை மேடைப் பேச்சுக்களிலும் பயன்படக்கூடிய இனிய உத்தியாகும்.

பண்ணும்பத மேழும்பல வோசைத்தமி ழவையும்
உண்ணின்றதொர் சுவையும்முறு தாளத்தொலி பலவும்
மண்ணும்புன லுயிரும்வரு காற்றுஞ்சுடர் மூன்றும்
விண்ணும்முழு தானானிடம் வீழிம்மிழ லையே.

என சம்பந்தர் தனது தேவாரத்தில்  ஓசை , ஒலி  பற்றி  சொல்லிச் செல்கிறார்.

YARL_INSTRUMENTபழங்காலத்தில் யாழ் என்பதில் ஒரு பகுதியாக பண் வழங்கப்பட்டது. பண் பற்றிய ஏராளமான குறிப்புக்களையும்  தொல்காப்பியம் மற்றும்  பழந் தமிழ் இலக்கியங்கள் கூறுகின்றன. 103 தாய் பண்களிலிருந்து   11,991 இசைகள் உண்டாயின என்றும்   , காலப்போக்கில் அவை வர வரக் குறைந்து வந்ததென்றும் , தற்காலத்தில் 10 ராகங்கள் இன்றும் வழக்கில் உள்ளன என்றும்  இசையறிஞர் ஆப்ரகாம் பண்டிதர் கூறுகிறார். இதற்க்கான சிலப்பதிகார ஆதாரத்தையும் காட்டிச் செல்கிறார்.

“இசையென்பது நரப்படை வாலுரைக்கப்பட்ட பதினோராயிரத்துத் தொள்ளாயிரத்துத் தொண்ணூற்றொன்றாகிய ஆதியிசைகளும்.
அவையாவன :-
“உயிருயிர் மெய்யள வுரைத்தவைம் பாலினு

முடறமி ழியலிசை யேழுடன் பகுத்து
மூவேழ் பெய்தந் …. …. ….
தொண்டு மீண்ட பன்னீ ராயிரங்
கொண்டன ரியற்றல் கொளைவல்லோர் கடனே.”   –  
 [சிலப்பதிகாரம் அரங்கேற்றுகாதை]

என்னுஞ் சூத்திரத்தாலுறழந்து கண்டு கொள்க. என்கிறார்.

இந்தப் பண்களே இன்று ராகங்கள் என அழைக்கப்படுகின்றன. இந்த கூற்றை பின் வந்த பல சொல்லகராதிகளும் ஏற்றுக்கொள்கின்றன.

ராகம் பாடுதல் அல்லது ஆலாபனை என்றால் ஒரு குறிப்பிட்ட உணர்வை சொல் இல்லாமல் இசையில் வெளிப்படுத்துவதாகும்.ராகம் என்பது ஒலியின் கவிதை எனலாம்.

இந்த ராக நுட்பங்களையும் ,அவற்றை உருவாக்கும் முறையையும் , இசையமைப்பு முறைகளையும் மிகப் பண்டைக்காலம் தொட்டு தமிழ் மக்கள் மிக நன்கு அறிந்ததுடன் , அவற்றைப்  பாடியும்  இன்புற்றிருக்கின்றனர்.

பண் என்கிற தமிழ் சொல்லிற்கு ஈடாக பொருள் கொள்ளப்படும் வட மொழிச் சொல்லே   ராகம் என்று இன்றும் பரவலாக அறியப்பட்டு வருகின்றது.

” தமிழ் நாட்டில் பழங்காலத்திலிருந்தே இராக முறையைப் பண் முறை என்றும் ,இராகங்களைப் பண்கள் என்றும் அழைத்து வந்திருக்கிறார்கள்.முழு வடிவமும் முழுமையான அகல நீளமும் கொண்ட இராகங்களை பண்கள் என்றும் இவற்றிலிருந்து தோன்றுகிற சேய்  இராகங்களை பண்திறம் என்றும், பண் திறத்திறம் என்றும் தமிழர்கள் தொன்று தொட்டு அழைத்து வந்திருக்கிறார்கள்.எனவே , பண்முறை என்பது தமிழரின் இசை முறைக்கு மற்றொரு பெயர் ” என்பார் மீ.ப.சோமசுந்தரம்.

இசையறிஞர் வீ.பா.கா .சுந்தரம்  அவர்கள் அழகாக விளக்குவார்.

“ஏறு நிரலும் இறங்கு நிரலிலும் தனக்குரிய கோவை வரிசைகளைக் கொண்டு நிறம் தொடரக் [ உயர்ச்சி தோன்ற ] கமகங்கள் ததும்பக் கோவைகளை விரித்து வளர்த்துப் பாடுவதே பண் “. “பண்ணப்படுவது பண் எனலாம்.”
கோவைகளை கோத்து சுவைகள் தோன்றப் பண்ணப்பட்டமையால் பண் எனப் பெயர் பெற்றது.வெறும் கோவைகளை கோத்து விடுவதால் பண் அமைந்து  விடாது.ஒவ்வொரு கோவையையும் நீட்டியோ , குறுக்கியோ ,வளுக்கியோ , அசைத்தோ ஒலிப்பதால் எண் சுவைகள் தோன்றும்.இவ்வாறு பண்ணப்பட்டது பண் என வெவேறு நூல்களில் பண்  குறித்து குறிப்புக்கள் அமைந்துள்ளதை காண முடிகிறது.”

பண் என்பது தமிழில் பல பொருள்களில் வருகிறது.பண் என்பது இசை என்ற பொருளிலும் குறிப்பிடப்படுகிறது.

1. ” பாட்டிடை கலந்த பொருள வாகிப்
பாட்டின் இயல பண்ணத் திய்யே ”  – தொல்காப்பியம் – [ தோல்: செய்; 173 ]
பண்ணைத் தோற்றுவிப்பதால் பண்ணத்தி என்கிறார் தொல்காப்பியர்.

2. ” ஆடல் பாட லிசையே தமிழே
பண்ணே பாணி தூக்கி முடமே ” – சிலம்பு : [ அரங்: 45 -46 ]

3.  ” பண்ணியாழ்க் கரணமும்  பாடைப்பாடலும் ” – மணிமேகலை – ஊரலுரை: 20

4.  ” பண்என்ஆம் பாடற்கு இயைபுஇன்றேல் கண்என்ஆம்
கண்ணோட்டம் இல்லாத கண்  ” – குறள் :573  ராகம் என்ற பொருளில்

5.  ” தாளத்தோடு பொருந்திய இயற்றமிழ் பாவினோடு இசையை இயைத்துப் பாடும் போது அது திறம் தோன்ற  அதாவது பண்  அல்லது ராகம் தோன்ற இனிமையாக ஒலிக்கிறது.பழந்தமிழ் மக்கள் பண் என்று அழைத்ததை நாம் இப்போது ராகம் என்று அழைக்கிறோம்.” – து.ஆ.தனபாண்டியன்

6.  ” நிறை நரம்பிற்றே , பண்ணெனலாகும் ” – சேந்தன் திவாகரம்

7.  ” பாட்டின் பெயரும் பரிமாக்கலனையும் நாட்டிய பண்னும்  பண்ணென நவில்வர்  – பிங்கலநிகண்டு [ இசைப்பாட்டு என்ற பொருளில் ]

8.  ” பண்ணென்ப பாட்டும் பண்ணும்பரிமாவின் கலணையும்  ” -[ இசைப்பாட்டு என்ற பொருளில் ]

9.  ” இசை , இசைப்பாட்டு , ஏழு சுரம் உள்ள இசை ,யாழ் முதலிய கருவிகள், ஓசை        ,கூத்துவகை ,- தமிழ் -தமிழ் அகரமுதலி  – மு.சண்முகம்பிள்ளை.

என பண் பற்றிப் பலவிதமான கோணங்களிலும்  விவரிக்கப்பட்டிருக்கிறது.

ஆனாலும் ராகம் என்பது தமிழ் சொல் என்றும் , அராகம் என்ற  மூலச் சொல்லிருந்து உண்டானது  என்றும் வேர்ச் சொல்லியல் ஆய்வாளர் திரு.ப.அருளிகீழ் கண்டவாறு விளக்குவார்.

” உர் என்ற சொல் தமிழில் ஒலிக்கான மூலம். உரை என்பது  ஒலியிடு என்பதாகும். உர்  என்கிற  சொல் உரவு என்று வரும். உரவு என்பது  ஒலி யைக் குறிக்கும்.
முடங்கு என்பது மடங்கு  என்று வரும்,
முயங்கு எனபது மயங்கு என்று வரும் ,
குடம் என்பது கடம் என்று  வரும் ,
முயங்கு  என்பது மயங்கு என்று வருவதுபோல உரவு என்பது வந்தது.

உரவு என்கிற  சொல்  அரவு. அரவு என்றால் ஒலி என்று அர்த்தம். அரவு + அம் = அரவம் [ என்ன ஆள் அரவம் கேட்கிறது ], பாம்பு வகையில் சீறும் பாம்புக்கு அரவம் என்று பெயர்உண்டு. ” நாம நல் அரா “என்றால் நல்ல பாம்பு என்று அர்த்தம். அரவம் , அராவனம் , அராவம் என்பது ஒலி ஆகும்.  சிவப்பு என்பதை சிகப்பு என்பது போல அராவம்  என்பதை அராகம் என்பது போல அந்த அராகத்தில் “அ ” வை அகற்றிவிட்டு ராக என்று மாற்றினார்கள்.”

மேலும் அவர் தொடர்கிறார்.

ராகம்  என்பதற்கு வட மொழி சொல்லகராதியில் ” ரஞ் ” என்கிற சொல்லிலிருந்து வருவதாக குறிப்பிடுகின்றனர். ” ரஞ் ” என்பதின் பொருள்  நிறம் , சாயம் , சிவப்பு  நிறம் ,அடர்த்தி , பற்று , விளைவு ,மகிழ்ச்சி ,இரக்கம், அழகு.  அழகிலிருந்து வந்ததாக முடிக்கிறார்கள்.

” ராகம் என்பதற்கு நேரடியான விளக்கம் வட மொழியில் இல்லை ” என்பார் இசைப் பேராசிரியர் கோ.வைத்திலிங்கம்.

சங்க இலக்கியத்தில் கலிப்பா என்ற பாடல் அமைப்பில்  ஒரு உறுப்பு அராகம்  என்றழைக்கப்படுகிறது.பிங்கல நிகண்டு தரும் பின்வரும் பாடல்

“அராக நேர்திற முறுப்புக் குறுங்கலி
யாசா னைந்தும் பாலையாழ்த் திறனே.”  
என்ற  குறிப்பையும் தருகிறது.

முடகு என்பதும் அராகம் ,வண்ணம் , அடுக்கியல் என்ற அர்த்தத்தில் வரும் என்பார் இசை ஆய்வாளர் மம்மது.

முடுகும் ராகம் என்பதை நெகிழ்ந்த ஒசையவாகிய நெட்டெழுத்துக்கள் விரவாது குற்றெழுத்துகளால் இயன்று இடையறவு படாது பாடப்படுவது என்பர்.அதுமட்டுமல்ல பல்வேறு அமைப்பில் அமைக்கப்பட்ட தேவார திருபதிகங்களில் ” திருவிராகம்” என்றும் குறிப்பிடப்படுகின்றன.

திருவிராகம் என்பதில் இருந்தே  ராகம் எனும் சொல் பிறந்தது என்று சில ஆய்வாளர்கள் கருதுகிறார்கள்.

ராகம் என்பது தமிழ் சொல்லே.இதனை  வட மொழி என்றால் தமிழில் இருந்து திரிக்கப்பட்ட , திருடப்பட்ட ஏராளமான சொற்க்களில் ஒன்று  என கொள்ளலாம். கால ஓட்டத்தில் மொழிகளுக்கிடையிலான முயங்குதலின் விளைவாகவும் இருக்கலாம்.ஆயினும்  சமஸ்கிருதத்தில் இருக்கின்ற ஏராளமான சொற்கள் [ 50 வீதம் ]  தமிழ்ச் சொற்கள் என்று சொல்வார் தேவநேயப் பாவாணர். அதுமட்டுமல்ல வட  மொழியில் இருப்பன எல்லாம் தமிழர்களுக்கு சொந்தமானவை அல்ல என்பதிலும் உண்மை இல்லை எனபார்.

யாழ் என்பது பெரும்பண் ஆகும். மருத யாழ், பாலை யாழ் , நெய்தல் யாழ் ,முல்லை யாழ் , குறிஞ்சி யாழ் என வாழ்ந்த நிலங்களை அடிப்படையாகக் கொண்டு அமைக்கப்பட்டன என்பர்.இவை மட்டமல்ல ச.ரி ,க, ம ,ப த , நி  போன்றவையும் தமிழில் உண்டானதே! சிலப்பதிகாரத்தில் ஊர்காண் காதை  என்ற பகுதியில் கீழ்  வரும் பாடல் உள்ளது.

‘ ச ரி க ம ப த நி யென்று ஏழெழுத்தால் தானம்
வரிபரந்த கண்ணினாய் வைத்துத் – தெரிவரிய
ஏழிசையும் தோன்றும் இவற்றுள்ளே பண்பிறக்கும்
சூழ்முதலாம் சுத்தத் துளை’

இந்த ராகங்ககளுக்கு உயிர் கொடுப்பவை சுரங்களில் பொதிந்திருக்கும் கமகங்கள் ஆகும்.இந்த கமகங்களே பிற நாட்டு இசையிலிருந்து நமது இசையை துல்லியமாக வேறுபடுத்திக்காட்ட உதவுகின்றது.
இதனை பழந் தமிழ் இலக்கியங்களில் உள்ளோசைகள் என அழைத்தனர்.இந்த உள்ளோசைகளை எவ்விதம் பாட வேண்டும் என்ற குறிப்பையும் சிலப்பதிகாரம் பதிவு செய்துள்ளது.

வார்தல், வடித்தல், உந்தல், உறழ்தல்
சீருடன் உருட்டல், தெருட்டல், அள்ளல்
ஏறுடைப் , பட்டடை என இசையோர் வகுத்த
பட்ட வகைதன் செவியின் ஒர்த்த   –   [ சிலப்பதிகாரம் 17 கானல்வரி  12- 6 ]

தமிழ் மக்களின்  இந்த  இசையை , ராகங்களை    வளர்த்தவர்கள்  பாணர்கள் என்று அழைக்கப்பட்டனர்.அறிஞர்  தேவநேயப் பாவாணர்
 ” இசைத் தமிழ்த் தொன்மை ” என்ற கட்டுரையில்  பின் வருமாறு விளக்குவார்.

” …  மேற்கூறிய இசைக் கருவிகளையெல்லாம் தொன்றுதொட்டுச் செய்து வந்தவரும் இயக்கி வந்தவரும் தனித் தமிழரே. அவர் பாணர், மேளக்காரர் (நட்டுவர்) என இரு வகுப்பினர். இசைத் தெய்வத் திற்கே மாதங்கி (பாடினி) என்றுதான் பெயர்….
பண்டைத் தமிழ்நாட்டில் இசைத்தமிழைச் சிறப்பாய் வளர்த்து வந்தவர் பறையருள் ஒரு பிரிவினரான பாணரே. இதனாலேயே “பாண் சேரிப் பற்கிளக்கு மாறு” என்னும் பழ மொழியும் எழுந்தது. பாணபத்திரர், திருநீலகண்ட யாழ்ப்பாணர். திருப்பாணாழ் வார் முதலிய யாழ்வேந்தரெல்லாம் பாணரே. 11ஆம் நூற்றாண்டில் தேவாரத் திற்கு இசை வகுத்தது திருநீல கண்ட யாழ்ப்பாணரின் மரபினரான ஒரு பெண்டாவர். 
தொல்காப்பியர் காலத்திற்கு முன்னிருந்து வழங்கிவரும் பாணாற்றுப் படை கூத்தராற்றுப் படை முதலிய செய்யுள்களும் நூல்களும் பாணரின் இசைத் தலைமையைப் புலப்படுத்தும்.”

இந்திய இசையின் சிறப்பம்சமான  இந்த ராகங்கள் தமிழ் மக்கள்  உலகுக்கு வழங்கிய கொடையாகும்.சுரங்களை இறங்கு நிலையாகவும் ,ஏறுநிலையாகவும் பாடும் போது    ராகங்கள் பிறக்கும்.சுரங்களை ஒழுங்கு முறையில் பாட பிறக்கும் இனிய இசையில் ரசம் பிறக்கும் என்பர்.பாடும் சுரங்களுக்கேற்ப ராகங்களும் மாறு படும்.இனிமையை முன்னிலைப் படுத்திய தமிழர்கள் இணைவான சுரங்களை வைத்து இனிய இசையை உணடாக்கியதுடன்  இனிமையற்ற இசையை உண்டாக்கக் கூடய சுரங்களின் சேர்க்கையை தவிர்த்தும் வந்திருக்கிறார்கள்.அதனை அவர்கள் அபஸ்சுரம்  [ Atone ] என அழைத்தனர்.

twelvetone4நவீன இசை வடிவமாக மாற்றம் கண்ட ஐரோப்பிய இசை அபஸ்வர இசையயும் இணைத்துக் கொண்டு [ Twelve Tone Series ]  வளர்ச்சியடைந்தது. ஆர்னொல்ட்   ஷூன்பேர்க்  [ Arnold Schoenberg – 1874–1951]என்ற ஆஸ்திரிய நாட்டுக் கலைஞரால் இது கண்டு பிடிக்கப்பட்டது.
தேவார காலத்தில் இசையில் மிக முக்கியான மாற்றங்கள் ஏற்ப்பட்டன.பல்லாயிரக்கணக்கான ஆண்டுகளுக்கு முன் தோன்றிய தமிழிசை ராகங்கள் மத வழி பாட்டுக்குள் திருப்பப்பட்டதால் புதிய பரிசோதனைகள் புறம் தள்ளப்பட்டு , பார்ப்பனீய சித்தாந்தத்துக்கு ஏற்ப குறுக்கப்பட்டு அதன் வளர்ச்சியும் தடுக்கப்பட்டன.உழைக்காமல் காலத்தை கொண்டு சென்ற பார்ப்பனீய சித்தாந்தம் தனது வாழ்வியல் உள்ளடக்கத்தை இசையிலும் திணித்து இறுக்கியது.தமிழிலக்கியங்களில் குறிப்பிடப்படும் பல்லியம்  [ Orchestra ] என்கிற வாத்திய இசையை புறக்கணித்து மதப் பிரச்சாரத்திற்கு,  மொழி சார்ந்த இசைக்கு முக்கியத்துவம் கொடுத்தது.உழைக்கும் மக்கள் சார்ந்த தாளலய இசை [ Rythmic ] முற்றாக மறுக்கப்பட்டு ஒதுக்கப்பட்டது.இது போன்ற ஒரு நிலையை நாம் மத்திய கால ஐரோப்பிய சர்ச் இசை வரலாற்றிலும் காண்கிறோம். ஐரோப்பாவில் 17 ஆம் நூற்றாண்டில் ஏற்ப்பட்ட எழுச்சி [ Revolution ] மதம் சாராத சிம்பொனி இசையை

[ Symphony] உருவாக்கியது. இசையை மதத்தின் தளைகளிலிருந்து பிரித்தது.இது  போன்றதொரு மாற்றம் தமிழ் , இந்திய சூழலில் சிந்தித்துப் பார்க்கமுடியாதிருந்தது.

முரசு இயம்பின; முருடு அதிர்ந்தன;
முரை எழுந்தன பணிலம்; வெண்குடை
அரசு எழுந்ததொர்படி எழுந்தன –                    என சிலப்பதிகாரத்தில் இளங்கோ பாடுகிறார்.

பல வகையான வாத்தியங்களின் பெயர்கள்  பண்டைத் தமிழ் இலக்கியங்களில் நிறைந்து காணக் கிடைப்பினும் , அவற்றின் சிறப்புக்கள் பேசப்பட்டாலும் “நரம்பின் மறை ” என்று தொல்காப்பியம் [133] யாழ் என்ற இசைக்கருவிக்கு இலக்கண நூல் இருந்தது என்று கூறினாலும் வாத்திய இசை என்பது பின்வந்தவர்களால் புறம் தள்ளப்பட்டு வந்துள்ளது.அதற்க்கான அங்கீகாரம் மறுக்கப்பட்டு ஒதுக்கப்பட்டது. வாத்தியங்களுக்கென தனியே ஒரு இசைமுறை இல்லாமல் போனது.
இன்று வரை வாத்தியஇசையென்பது மொழி சார்ந்த பாடல்களையே நம்பியிருக்கிறது. குறிப்பாக செவ்வியல் இசையில் தமிழ் கீர்த்தனைகளையும் , அதன் தொடர்ச்சியாக பின் வந்த மும்மூர்த்திகளின்  தெலுங்கு கீர்த்தனைகள் சார்ந்த தாகவே உள்ளன.வாத்திய இசை கலைஞர்கள் சங்கீத பாடல்களையே வாசிக்கும் நிலைக்குள்ளானார்கள்.

தமிழ் சூழலில் பக்தி இசை மட்டும் அங்கீகாரத்திற்க்குரியதாக விளங்கியது. அதன் மூலம் பக்தி இசை வளர்ச்சி பெற்றது.அந்த அடிப்படையிலிருந்து விலக முடியாத வண்ணம் இசை குறுக்கப்பட்டது.முன்னேர்ற்றத்திற்கோ , பரிசோதனைகளுக்கோ இடமளிக்காத பக்தி என்ற செக்கை சுற்றிய மாடாக இசை விளங்கியது.பண்டைத் தமிழ் கலைமரபில் இசைக் கலையுடன் தொடர்புடையதாகக் கருதப்பட்ட கூத்துக்கலையின் வீழ்ச்சியும் , பக்தி இயக்கத்தின் எழுச்சியும்  இதனை நிலை பெறச் செய்தன என எண்ணத் தோன்றுகிறது.

இந்திய நிலப்பிரபுத்துவ சமூக அமைப்பின்  அளவுகடந்த சலுகைகள் பெற்ற செல்லப்பிள்ளைகளாகவும் சுரண்டல் தத்துவதத்துவத்தின் ஞானதந்தைகளாகவும் விளங்கியவர்கள் பிராமணர்கள். தனது கற்பனைகளுக்கு ஏற்ப கடவுளையும் , கோயில்களையும்  கட்டமைத்த பார்ப்பனீய சித்தாந்தம் , நமது மரபு இசையின்  ராகங்களையும்   இசையையும் அதற்க்கு தொண்டாற்றவும் பணித்தது.
” பிராமண சமுதாயத்தால் நிர்வாகிக்கப்படும் சத்திரிய ஆ ட்சி பிறரால் வெல்ல முடியாததது ஆகும்.அது எப்போதும் வெற்றி பெறும் .” என்ற அர்த்த சாஸ்திர ஆசிரியரின் கருத்துக்கு ஏற்ப ஆட்சி நடாத்தினார்கள் தமிழ் மன்னர்கள். 15 ம் நூற்றாண்டில் சைவ சமய சித்தாந்தம் வகுக்கப்பட்டமையும் இதற்க்கு இன்னும் பலம் சேர்த்தது எனலாம்.மக்களை சுரண்டும் இந்த சித்தாந்தத்தை மன்னர்களும் ,நிலப்பிரபுக்களும் மகிழ்ச்சியுடன் ஆதரித்தனர்.

தமிழில் மும்மூர்த்தியினர் தோன்றி கீர்த்தனை என்கிற இசை வடிவத்தை அமைத்துக் கொடுத்த காலமும் இதுவே ஆகும்.

Mummoorthikalதமிழில் தோன்றிய மும்மூர்த்திகள்.

1. முத்துத் தாண்டவர் [ 1525-1625 ]
2. அருணாசலக் கவிராயர்  [1712-1779 ]
3. மாரிமுத்தாப் பிள்ளை   [1717-1787 ]

முத்து தாண்டவர் [ 1525-1625 ] எழுதிய
– சேவிக்க வேண்டும் ஐய்யா – ராகம் :கல்யாணி –  ஏக தாளம்
– சிற்சபைதனிலே கண்டு – ராகம் : நீலாம்பரி  –   திரிபுடை தாளம்
– நடனம் கண்ட போதே எந்தன் – ராகம்: ஆகிரி  – ஆதி தாளம்
– ஈசனே கோடி சூரிய பிரகாசனே – ராகம்: நளினகாந்தி
– ஆடிக்கொண்டார் அந்த வேடிக்கை காண – ராகம்: மாயாமாளவகௌளை

அருணாசலக் கவிராயர்  [1712-1779 ] எழுதிய

– எப்படி மனம் துணிந்ததோ – ராகம் : குசினி  – கண்டசாபு தாளம்
– ராமனுக்கு மன்னன் முடி தரித்தாலே – ராகம் : ஹிந்தோளம்   ஆதி தாளம்
– யாரோ இவர் யாரோ  –  ராகம் : பைரவி   – ஆதி தாளம்
– ஏன் பள்ளி கொண்டீர் ஐய்யா –  ராகம் : மோகனம் – ஆதி தாளம்

மாரிமுத்தாப் பிள்ளை   [1717-1787 ] எழுதிய
– இன்னமும் ஒரு தலம் இருக்கும் – ராகம்: சுருட்டி
– காலைத் தூக்கி நின்றாடும் தெய்வமே – ராகம்: யதுகுல காம்போதி
– தண்டனிட்டேன் என்று சொல்லடி –

போன்ற பல கீர்ததனைகள் புகழ் பெற்றிருந்தன.இவற்றில் பல பாடல்கள் இன்றும் பாடப்படுவனவாகும்.

ஆதி மும்மூர்த்திகளான  இவர்களின் பாடல்களைப் பின்பற்றி  தியாகய்யர் [ 1767 – 1848 ] , முத்துச்சுவாமி  தீட்சிதர் , சியாமா சாஸ்திரி [ 1762 – 1827 ] போன்றோர் சமஸ்கிருத்ததிலும் , தெலுங்கிலும் பாடல்கள் புனைந்து புகழ் பெற்றனர்.மன்னர்களும் , பிரபுக்களும், கோயில்களும் இந்த இசையை  ஊக்குவித்தனர்.முத்துசுவாமி தீட்சிதர் , சியாமா சாஸ்திரி , பட்டணம் சுப்பிரமணி அய்யர் தமிழைத் தாய் மொழியாகக் கொண்டவர்கள்  என்பது குறிப்பிடத்தக்கது.இருந்தும் அவர்கள் தமிழில் தங்கள்  பாடல்களை எழுதவில்லை. தெலுங்கு மொழி ஆளும் மொழியாகிய வரலாற்று சூழலில் அவர்கள் வாழ்ந்தார்கள்.

இவ்விதம் தமிழ் செவ்வியல் இசையில் நேரடியாக ராகங்கள் பயன்பட்டு வந்தது போலவே தமிழ் மக்கள் பழகி  வந்த பல் வகை இசை வடிவங்களின் உள்ளீடாக , மறை பொருளாக ராகங்கள் இருந்து வந்ததையும் நாம் அவதானிக்கலாம்.மக்களிசை என்று கருதப்படும் நாட்டுப்புற இசையின் வேர்களிலிருந்து தோன்றியவையே ராகங்கள்.நாட்டுப்புற இசைப்பாடல்களிலும் இராகங்களை எளிதாக அடையாளம் காணலாம். உதாரணமாக  ஆனந்தபைரவி , குறிஞ்சி, ஆபேரி , சிந்துபைரவி ,மாயமாளவ கௌளை , நாதநாமக்கிரியை  போன்ற ராகங்ககளை சொல்லலாம்.

தமிழ் சினிமாவின் ஆரம்ப காலத்திலிருந்தே இசையமைப்பாளர்கள் நாட்டுபுற இசையையை அங்கங்கே பயன் படுத்தி வந்திருக்கின்றார்கள். அவர்களில் முதன்மையானவராக  இசை மேதை ஜி.ராமநாதன் , இசைமேதை கே.வீ.மகாதேவன் போன்றோர் திகழ்ந்தார்கள்.

ஜி.ராமநாதன் மிக அதிக அளவில் நாட்டுப்புற இசையை, குறிப்பாக அதன் தாள லயத்தை மிக வெற்றிகரமாகப் பயன்படுத்திய மாமேதை  எனலாம்.அவர் இசையமைத்த பெருமபாலான படங்களில் இடம் பெற்ற பாடல்கள் இன்றும் சாட்சிகளாக உள்ளளன.நல்ல தங்காள் ,
அரசிளங்ககுமரி , காத்தவராயன் , மதுரைவீரன் , நான்பெற்ற செல்வம் , கற்புக்கரசி , சதாரம் , தூக்குத் தூக்கி , கோகிலவாணி  போன்ற படங்களில் நாடுப்புற இசை மிக தூக்கலாகத் தெரியும்.செவ்வியல் இசை ராகங்களை எவ்வாறெல்லாம் அற்ப்புதமாகப் பயன்படுத்தினாரோ  அதே  வீச்சுடன் நாட்டுப்புற   இசையையும் பயன்படுத்திய முன்னோடி இசையமைப்பாளர் தான்  இசைமேதை ஜி.ராமநாதன்.

காத்தவராயன் என்ற படம் தெலுங்கில்  காத்தவரயுனி கதா [ Karthavarayuni Katha 1958 ] என்ற பெயரிலும் வெளிவந்தது.தமிழில் இசையமைத்த ஜி.ராமநாதனுடன் , அஸ்வத்தாமா [ வீணை காயத்ரியின் தந்தை ] என்ற இசையமைப்பளரும் இணைந்து இசையமைத்தார். இந்தப் படத்தில் காதல் பாடலகளில் மெல்லிசைப் பாங்கு ஓங்கியிருக்கும். தமிழை விட தெலுங்கு சினிமா இசை மெல்லிசை வடிவத்தை முன்பே பின்பற்ற தொடங்கி விட்டார்கள் என்றே எண்ணத தோன்றுகிறது.பல தெலுங்கு இசையமைப்பாளர்கள் தமிழ் படங்களில் இசையமைத்து பெரும் புகழ் பெற்றார்கள்.

1950 களில் தமிழ் திரையிசையில் மேலைத்தேய இசையின் இணைவு ஆரம்பித்த வேளையில் புகழ் பெறத் தொடங்கிய கே.வீ.மகாதேவன்    திரையிசையில் நாட்டுப்புற இசையைப்  பயன் படுத்தி பல வெற்றி பாடலக்ளைத் தந்தார். ஜி.ராமநாதன் , கே.வீ .மகாதேவன் போலவே , இன்னும் மேல் சென்று  நாட்டுப்புற இசையின் முழு வீச்சையும் காட்டியவர்  இசைஞானி இளையராஜா.

தமிழ் செவ்வியல் இசை ராகங்களிலேயே நாட்டுப்புற பாங்கில்  ஏராளமான  பாடல்களை , அவருக்கு முன்பிருந்த இசைமேதைகளின் வழியில்  அதனை இன்னும் விஸ்தாரமாகச் செய்து காட்டியிருக்கின்றார் இசைஞானி இளையராஜா. செவ்வியல் இசை ராகங்களுக்கு நாட்டுப்புற சாயங்ககளை பூசி , அதிலிருந்து இது வந்ததோ , அல்லது இதிலிருது அது வந்ததா  என்பது போன்றிருக்கும் ஒரு நிலையை செய்முறையாக நிகழ்த்திக்  காட்டியிருப்ப்பார்.

சினிமாவில் வெளிவந்த ஏராளமான பாடல்கள் ராகங்களை அடிப்படையாகக் கொண்டு இசை யமைக்கப்பட்டவையே.அன்றிலிருந்து இன்று வரை இது தொடர்ந்து கொண்டுதானிருக்கிறது.1990 களிலிருந்து மேற்கத்தேய இசையின் தாக்கம் அதிகமாக இருப்பினும் ராகத்தை அடிப்படையாகக் கொண்ட பாடல்களும் ஆங்கங்கே வந்த வண்ணம் தான்  இருக்கின்றன. அந்நிய இசையை புரிந்து கொண்டு பயன்படுத்துவது என்பதில்லாமல்   ,அது ஒரு மோகமாக , நோயாக வளர்ந்தும் விட்டிருக்கிறது.எது எவ்வாறாயினும் மக்கள் மனதில் என்றென்றும் நிலைக்கப்போவது நமது மண்ணிலிருந்து , பண்பாட்டிலிருந்து உருவாகும் பாடல்களே!  இதனை நாம் ஏலவே வந்த பாடல்கள் மூலமும் இதனை நிரூபிக்கலாம்.

MANGAMMA  SAPATHAM1940 களில் மிகுந்த பொருள் செலவில் எடுக்கப்பட்ட மங்கம்மா சபதம் திரைப்படத்தில் மேல்நாட்டு  இசை  பெருத்த ஆரவாரத்துடன் பயன்படுத்தப்பட்டது.மிகப்பெரிய அளவில் விளம்பரப்படுத்தப் பட்டது.ஆயினும் அந்தப்பாடல்கள இன்று யாராலும் பேசப்படுவதில்லை. ஆனால் அதே காலத்தில் எடுக்கப்பட்ட ஹரிதாஸ் போன்ற படங்களில் ஒலித்த தியாகராஜ பாகவதர் பாடிய பாடல்கள் இன்றும் பேசப்படுகின்றன.மண்ணின் மணம் பாடலகளில் இருந்ததால் மக்கள்  அவற்றை தங்களுக்கு நெருக்கமானதாக  உணர்ந்தார்கள்.அதே போல் 1950 களிலும் 1960 களிலும் 1980 களிலும் வெளிவந்த பாடல்கள் மக்களின் ஊன் உயிர்களில் கலந்து விட்டன.அவை மெல்லிசை வடிவமாக , செவ்வியல் இசையாக, மேலைத்தேய இசையுடன் கலந்த மெல்லிசை வடிவமாக வெளி வந்து பாமரர் முதல் படித்தவர்களும் பாடக்கூடிய    பாடல்களாகவும் அமைந்திருந்தன.அதன் உள்ளீடாக , உயிர் நாடியாக இருந்தது அவர்கள் கால காலமாகப் பழகி வந்த ராகங்களே.

இன்றைய சினிமாவின் இசைக்கு முன்னோடியாக வழி காட்டி நின்றது தமிழ் கூத்து / நாடக இசை என்றால் மிகை  இல்லை.இதன் வளர்ச்சியை நாம் அறிய வேண்டும் என்றால் முதலில் நாடக இசையில் இருந்து தான் நாம் தொடங்க  வேண்டும்.

[ தொடரும் ]

தமிழ் சினிமா இசையில் அகத்தூண்டுதல்(5): T .சௌந்தர்

தமிழ் திரை இசையின் ஜாம்பவான்களாக இருந்த ஜி.ராமநாதன், எஸ்.வீ. வெங்கட்ராமன் , எஸ்.எம். சுப்பையாநாயுடு, சி.ஆர். சுப்பராமன் ,கே.வீ . மகாதேவன் , விஸ்வநாதன் ராமமூர்த்தி ,ஆர்.சுதர்சனம் , ஏ .எம் ராஜா ,கண்டசாலா , எஸ் .தட்சிணாமூர்த்தி , வீ. தட்சிணாமூர்த்தி , சீ. என் பாண்டுரங்கன், எஸ்.ராஜேஸ்வரராவ் , ஆதிநாராயணராவ் மற்றும் வேதா, ஜி .கே.வெங்கடேஷ் , ஆர் .கோவர்த்தனம், ஜி.தேவராஜன் , எம்.பி. ஸ்ரீனிவாசன், விஜயபாஸ்கர் போன்ற இசை மேதைகளின் வழித் தோன்றலாக இளையராஜா வருகிறார்.

இளையராஜாவின் வருகை தமிழ் திரையிசையின் புதிய பரிமாணமாக அமைந்தது.ஹிந்தி திரைப்படப்பாடல்களின் ஆதிக்கத்தின் நீட்சி தொடர்ந்த காலத்தில் இளையராஜா அறிமுகமானார்.1950 களில் ஆரம்பித்த தமிழ் மெல்லிசையாக்கம் , 1960 களில் நல்ல நிலையில் வளர்ந்ததெனினும் ஹிந்தி இசையின் தாக்கத்திலிருந்து முற்றாக விடு பட முடியவில்லை.ஹிந்தி படப்பாடல்கள் தொடர்ந்தும் செல்வாக்குச் செலுத்திவந்தன.1976 ல் அன்னக்கிளி வந்ததும் நிலைமை முற்றாக மாறியது என்பது தமிழ் திரையிசையின் வரலாறாகும்.எனது பத்து வயதுகளில் நான் கேட்ட அன்னக்கிளி பாடல்கள் மிக்க தாக்கம் விளைவித்தன. . கேட்ட இடத்திலேயே நின்று ,பாடல் முடியும் வரை நின்று கேட்ட பாடல்கள் அவை என்பது எனது முதல் இசை அனுபவம் ஆகும். குறிப்பாக எஸ்.ஜானகி பாடிய ” அன்னக்கிளி உன்னைத் தேடுதே ” என்ற பாடலில்ஆரம்பத்தில் வரும் ஹம்மிங் இனம் புரியாத மயக்கம் தந்தது என்பேன்.அந்தப் பாடலில் இழைந்திருந்த , இனம் புரியாத சோகம் , விம்மல் அதன் காரணமாக இருந்திருக்கலாம்.!

அந்த நேரத்தில் யார் பாடியது ,யார் இசையமைத்தது என்பதெல்லாம் தெரியாது.அறியாத வயதாக இருந்தாலும் நல்ல இசைக்காக மனம் திறந்திருந்தது என்பேன். ” அன்னக்கிளி உன்னைத்தேடுதே ” என்ற அந்தப் பாடல் அமைக்கப்பட்ட ராகம் ஆபேரி என்பது இப்போது புரிகிறது.

உருக்கமும் , இனிமையும் , ராஜகம்பீரமும் ஒன்றிணைந்த அற்ப்புதமான தமிழ் ராகம் ஆபேரி.இந்த ராகத்தில் அமைக்கப்படுகின்ற பாடல்கள் பெரும்பாலும் ஹம்மிங் உடன் தான் அமைக்கப்பட்டிருக்கும். அந்த பாடலில் அன்னக்கிளி என்ற பாத்திரத்தின் சோகம் சொல்லப்பட்டு விடுகிறது.

நாடகம் ,கூத்து போன்ற கலை வடிவங்களை விட மக்கள் சினிமாவை தமக்கு நெருக்கமனாதாக கருதுகின்றனர்.ஸ்டுடியோ தளங்களில் உருவான காட்சி அமைப்புக்கள் மாறி , கிராமங்களில் நேரடியாக ஒளிப்பதிவு செய்யும் ஒரு போக்கின் ஆரம்பமாக அமைந்த படமான ” அன்னக்கிளி ” யில் அறிமுகமானவர் இளையராஜா. கதைக்கேற்ப இசையும் கிராமத்தை பிரதிபலிப்பதாக அமைந்தது.படத்தின் டைட்டில் இசையே அதை கட்டியம் கூறி விடுவதாய் அமைந்தது.அந்த டைட்டில் இசையிலேயே தமிழக நாட்டுப்புற இசையும் ,மேலைத்தேய இசையும் இணைந்த இசையாக அதனை அமைத்திருப்பார் இசைஞானி இளையராஜா.

தமிழ் நாடக அரங்கு சங்கரதாஸ் சுவாமிகளால் எவ்வாறு புத்தெழுச்சி பெற்றதோ , அதை போன்றே தமிழ் திரை இசையும் இளையராஜாவின் இசையால் புத்தெழுச்சி பெற்றது எனலாம்.தமிழ் மரபுகளை நன்கறிந்த சங்கரதாஸ் சுவாமிகள் போலவே , இளையராஜாவும் அதிலிருந்தும் தனக்கு முன்பிருந்த திரை இசை மேதைகளின் பாதிப்பிலும் , அவற்றுடன் நாட்டுப்புற இசை, கர்னாடக இசை , மேலைத்தேய செவ்வியல் [ Western Classsical Music ] போன்ற இசை வகைகளின் இனிய கலப்பிசையாக தனது படைப்புக்களை உருவாக்கினார்.நாட்டுப்புற இசை , கர்நாடக இசை , மேலைத்தேய செவ்வியல் இசை போன்றவற்றில் அவருக்கு இருக்கும் தேர்ச்சி முன்பிருந்த இந்திய இசையமைப்பாளர்களுக்கோ அல்லது பின்னையவர்களுக்கோ இல்லை.இவை மட்டுமல்ல ஜாஸ் இசை போன்றவற்றிலும் அவருக்கு இருக்கும் அபாரத் திறமை இந்திய இசையமைப்பாளர்களுக்கு இல்லை எனலாம்.

இவ்விதம் பலவகை இசை தெரிந்தவராக இருந்த போதிலும் , அர்த்தமற்று குழப்பாமல் , அவற்றை எல்லாம் தனது கைதேர்ந்த கலை ஆற்றலால் கேட்கக் கேட்கத் திகட்டாத , கேட்கக் கேட்கப் புதுமைமிக்க , கலையுணர்வை அள்ளித்தரும் பாடல்களாக்கி தமிழ் மக்கள் மனங்களில் நிலைபெறச் செய்த மேதையாகத் திகழ்பவர் இசைஞானி இளையராஜா.பலவிதமான இசைகளையும் பின்னிப் பின்னி , குழைத்துக் குழைத்து இசையில் பிரமிப்புக்களை தோற்றுவித்த நேரத்தில், அவை தோற்றத்தில் எளிமையையும் கலந்திருக்கும் அர்ப்புதங்களை செய்து காட்டியவர் இசைஞானி.

அவருடைய பாடல்கள் ஒவ்வொன்றும் வெளிவரும் போது, அவற்றை முதலில் கேட்கும் போது , மிகச் சாதாரணமானது போல இருக்கும்.ஆனால் , தொடர்ந்து கேட்கக் கேட்க புது , புது விடயங்களை அவதானிக்கக் கூடியதாய் இருக்கும். கேட்கக் கேட்க புதுமை மிளிரும் பாடல்களாய் இருப்பதை நம் அனுபவத்தில் கண்டிருக்கிறோம்.

நாம் அன்றாடம் கேட்ட பல வாத்தியங்களின் ஒலிகளிலும் புதுவிதமான , வியப்பூட்டும் சப்தங்களை உண்டாக்கிக் காட்டினார்.அவை சப்த தொழில் நுட்பத்தால் செய்யப்பட்டதல்ல.அவை அவரது ஆரம்பகால பாடல்களில் , சிறப்பான தொழில் நுட்பம் இல்லாத காலத்திலேயே செய்து காட்டப்பட்டன என்பது வியப்புக்குரியது.!

மிகச் சிறந்த இசைமரபைக் கொண்ட தமிழ் சூழலில் , பலருக்கு அது சுமையாய் அமைந்து விட்ட சூழ் நிலையில் , அதிலிருந்து உள்ளக்கிளர்ச்சிகளை உருவாக்கக் கூடிய , சில சமயங்களில் அந்த மரபை மேலும் செழுமை படுத்தக் கூடிய இசை விநோதங்களை இளையராஜா படைத்துள்ளார்.பல குரல் இசையிலும் [ chorus ] , வாத்தியைசையமைப்பிலும் [ Orchestra music ] இவை வெவ்வேறு பரிமாணங்களில் வெளிப்பட்டிருக்கின்றன.பாடலின் போக்கில் , பின்னே இழுபட்டுப் போகும் மன சலிப்பைத் தரும் பாதையை மூடி ,பாடலின் உணர்வை மேலும் கூட்டும் படியாக வாத்திய இசையின் இனிமையால் கற்பனையில் புதிய தரிசனங்களைக் காட்டியவர் இளையராஜா.அவரது பாடலின் நடுவே வரும் இடையிசைகளை கேட்பவர்கள் இதனை உணரலாம்.

ஒரு பாடலில் , ஒரு தமிழ் செவ்வியல் [ கர்னாடக இசை ] ராகத்தை அடிப்படையாக கொண்ட மெட்டிருக்கும், அதில் நேர்த்தியான மேலைத்தேய செவ்வியல் வாத்திய இசையும் , தமிழக நாட்டுப்புற இசையின் கூறுகளும் , நம்மைப் பிடித்தாட்டும் நாட்டுப்புற தாளமும் ஒன்றிழைத்துப் பின்னப்பட்டிருக்கும்.நாட்டுப்புற இசை, கர்னாடக இசை , மேலைத்தேய செவ்வியல் [ Western Classsical Music ] போன்ற தனித்துவம் மிக்க இசை வகைகளை இளையராஜாவை போல் மிக லாவகமாகக் கலந்தவர்கள் யாரூமில்லை எனலாம்.தமிழ் மக்களின் உள்ளத்தில் பதிந்திருக்கும் , மண்ணில் வேர் ஊன்றிய இசையால் இசையுணர்வை தட்டி எழுப்பியவர் இசைஞானி. இந்த பேராற்றலால் இசையை தமிழ் சினிமாவின் கதாநாயகன் ஆக்கினார்.

முன்பிருந்த கதாநாயகர்களின் ஆதிக்கம் தகர்க்கப்பட்டது.இளையராவின் இசை இருந்தால போதும் , கதாநாயகர்களாக யாரையும் வைத்துக் கொள்ளலாம் என்கிற நிலை உருவாகியது.அற்பத்தனத்தின் சின்னமாக இருந்த தமிழ் திரை உலகின் கதாநாயகர்கள் பின்னுக்குத் தள்ளப்பட்டது நியாயமானதே. ஒரு சிலரை சிறந்த நடிகர்கள் என்றும் , வேறு சிலரை மட்டமான நடிகர்கள் என்பது போன்ற கருத்துக்களை தமிழ் பத்திரிகைகள் திட்டமிட்டு பரப்பி வந்தன. “பெரிய ” என்று அவர்களால் புளுகப்பட்ட ஜிகினா கதாநாயகர்கள் செய்வதை தான் இவர்களும் செய்தார்கள்.!! இந்த கதாநாயகர்கள் கூட இரண்டாம் பட்சமாக்கப்ப்ட்டார்கள்.அந்த”மட்டமான “நடிகர்களின் படங்களிலும் சிறப்பான இசை தான் இருந்தது. ஒரு இசையமைப்பாளருக்கு கட் அவுட் வைக்கப்பட்டது இசைஞானிக்கே என்பதும் அவரது இசையின் ஆத்திகம் எனலாம்.

இவரது கட்டுக்கடங்காத, மிதந்து வரும் இசை அலைகளுக்கு ஈடு கொடுக்க பாடலாசிரியர்களால் முடிவதில்லை. இவரது இசையின் கற்பனை வளத்துக்கு பாடலாசிரியர்களால் ஈடு கொடுக்க முடிவதில்லை.அதனால் பாடல் எழுதுவது என்பது அர்த்தமற்ற சடங்குகளாக்கப்பட்டன.

இசை என்பது தனி மொழி என்பது இசைஞானியின் வருகைக்குப் பின்னர் தான் ஏற்ப்பட்டது.மொழியின் மாயைகளை எல்லாம் இவரது இசை இலகுவாகக் கடந்து விடுவதால் , தடுமாறும் பாடலாசிரியர்களுக்கு அவரே அடி எடுத்துக் கொடுக்கும் நிலையும் நடந்தேறியுள்ளது. மெட்டுக்களுக்கு ஈடு கொடுக்க முடியாத ” கவிஞர்கள் ” ராஜா , ரோஜா , மயிலே , குயிலே ஏதேதோ எல்லாம் எழுதி தள்ளியிருக்கிறார்கள்.தமிழில் இயல் , இசை ,நாடகம் என்பது கலையின் வரிசைப்படுத்தலாகும்.படைப்பாற்றலில் முன்னிறுத்தப்பட்ட இயல் [ கவிதை ] பின்னுக்குத் தள்ளப்பட்டதையிட்டு பாடலாசிரியர்களை பின்னுக்குத் தள்ளுவதாகக் இளையராஜா மீது குற்றச் சாட்டு வைக்கப்பட்டது.

அவருக்கு முன்பிருந்த இசையமைப்பாளர்கள் எல்லாம் பாட்டுக்கு இசையமைத்தது போலவும் , இளையராஜா தான், தன்னுடைய மெட்டுக்கு பாடல எழுத நிர்ப்பந்தந்திப்பதகவும் செய்திகள் வெளியாகின.தமிழ் திரையிசையில் வெளிவந்த 99 வீதமான பாடல்கள் எல்லாம் மெட்டுக்கு எழுதப்பட்டவையே. அதில் ” பெரிய கவிஞர்கள் ” என்று பெயர் எடுத்தவர்கள் எல்லாம் மெட்டுக்கு பாடலை விரைவாக எழுதக்கூடியவர்களாக இருந்ததாலேயே அவ்விதம் பெயர் எடுத்தார்கள்.இசை என்பது மொழியின் எல்லைகளை எல்லாம் கடந்த . தன்னளவில் மிக உயர்ந்த கலை என்ற நிலை இளையராஜாவின் காலத்தில் அவரது இசையால் உருவானது.

படைப்பாற்றல் மிக்க ஒரு முழுமையான ஒரு கலைஞனாக அவரைக் குறிப்பிடலாம். மேலை நாட்டில் கலைஞர்கள் பெரும்பாலும் தாங்களே பாடல்களை எழுதி இசையமைத்துப் பாடுவார்கள்.அந்த வகையில் இந்தியாவில் அவரே பாட்டெழுதுவது , இசையமைப்பது , பாடுவது போன்றவற்றால் முழுமையான கலைஞனாக விளங்குகிறார்.எனக்குத் தெரிந்த வகையில் ஹிந்தி இசையமைப்பாளர் ரவீந்திர ஜெயின் என்பவர் பாடலாசிரியராக இருப்பவர் . ஆனால் அவர் பாடி நான் கேட்டதில்லை.இளையராஜா பாடல்களையும் மிகச் சிறப்பாக பாடுவார். உணர்ந்து பாடுவது அல்லது இதயத்தால் பாடுவது , அல்லது ஆத்மாவால் பாடுவதென்பதை அவர் எழுதி இசையமைத்துத் தானே பாடிய

” இதயம் ஒரு கோவில் – அதில்
உதயம் ஒரு பாடல் ” [ படம் : இதயக்கோயில் ]

என்ற பாடலில் துல்லியமாகக் கேட்கலாம். அதே பாடலை பாடகர் எஸ்.பி. பாலசுப்ரமணியமும் பாடியிருக்கிறார் [ இளையராஜாவின் பாடல் போல் அல்லாமல் வெறும் அலங்காரம் அதில் வெளிப்படும் ] ,எனினும் இளையராஜாவின் பாடல் உள்ளத்தால் பாடிய பாடல் என்பதை நாம் துல்லியமாய் கேட்கலாம்.இதே தன்மையை ” நானாக நான் இல்லை தாயே ” என்ற பாடலிலும் நாம் அவதானிக்கலாம்.எத்தனையோ பாடல்களை இதற்க்கு உதாரணம் கூறலாம்.

தமிழக நாட்டுப்புற இசை, கர்னாடக இசை போன்றவற்றுடன் அவரது இசைக்கு முக்கிய அகத்தூண்டுதலாக [ Inspiration ] இருந்தது மேலைத்தேய செவ்வியல் இசை [ Western Classsical Music ]ஆகும்.இசை ஒரு சமூகத்தின் பண்பாட்டின் விளைபொருள் என்றால் , அப்படிப்பட்ட இசை மற்றொரு பண்பாட்டிலிருந்து வரும் இசையுடன் கலப்பது அல்லது இணைப்பது என்பது இலகுவான காரியமல்ல.இரு வேறு நிலைப்பட்ட , பண்பாட்டுப் பின்னணியைக் கொண்ட இசையை கலப்பது என்பது இரண்டு இசையையும் கற்று தெளிந்தவர்களுக்கே சாத்தியமாகும்.குறிப்பாக ஹார்மொனியை அடிப்படையாகக் கொண்ட மேலைத்தேய செவ்வியல் இசையை [ Western Classical music ]நமது இசையுடன் கலந்து , இணைத்து அவர் தந்த இசை , உலக இசைக்கு கிடைத்த புது இசை எனலாம்.குறிப்பாக பாடல்களுக்கிடையில் அவர் கொடுத்திருக்கும் இடை இசைகளை [ InterLutes ] போல எங்கும கேட்டிருக்க முடியாது.

அவற்றையும் , அவர் இசையமைத்த படங்களின் பின்னணி இசையையும் ஒரு தொகுப்பாகத் தொகுத்தால் அவை உலக இசைக்கு ஒரு புதிய வகையான இசையாக அமையும் என்பதில சந்தேகம் இருக்கமுடியாது.அப்படிப்பட்ட ஓர் அழகும் , இனிமையும் நிறைந்த இசையை உலகில் எங்கும் கேட்டிருக்கவும் முடியாது.மேலைநாட்டு செவ்வியல் இசையில் ஞானமும் , பரீட்சயமும் இருந்தாலும் அவற்றில் நிறைய பரிசோதனை செய்யும் பேராசை , ஆர்வம் அவரை இயக்கியிருக்கிறது.அந்த பரிசோதனைகளில் அவர் தானும் பயின்று நம்மையும் மகிழ்வித்திருக்கிறார்.

வாத்திய இசைக் கலவைகளில் அவர் வடித்துத் தந்திருக்கும் வித விதமான, மனதை வருடுகின்ற வார்த்தையால் வர்ணிக்க முடியாத, கற்பனைகளின் உச்சங்களான இசைத் துணுக்குகளை எல்லாம் கேட்டால் அவரது இசையின் வேட்கை எப்படிபட்டது என்பது புரியும்.அந்தவகையில் அவருக்கு சமைதையாக யாரயும் முன் நிறுத்த முடியாது.அவை கற்பனையின் சிகரங்கள் என்று தான் சொல்லத்தோன்றுகிறது.

இவ்விதம் வித விதமான நாதக் கனலின் கலவைகளை , வெவேறு விதமான , பல வகைப்பட்ட வாத்தியங்களை வைத்து அவர் நிகழ்த்தியிருக்கும் நாத விநோதங்களின் மூலம் வாத்தியங்களைடையே ஒரு சமத்துவ நிலையை காண்பித்து வாத்தியங்களுக்கிடையேயும்ஒரு ஜனநாயகப் பண்பை சாவகாசமாகக் காட்டியிருப்பார்.வாத்தியங்களுக்கிடையே ஏற்றத் தாழ்வில்லை.இசையின் போக்குக்கு , அதன் வெளிப்பாட்டிற்கு ஏற்ப வாத்தியங்களின் சேர்க்கையை அவர் கையாளும் முறையில் அவர் ஒரு மகா சிற்பி. இசையில் எவ்வளவு தீவிரம் , ஆற்றல் இருப்பதால் தான் அவர் இது போன்ற அற்ப்புதங்களை அனாசாயமாக தந்திருப்பது சாத்தியமாகியிருக்கிறது .

பாடல்களில் பலவிதமான உணர்வு நிலைகளுக்கு ஏற்ப வாத்தியங்களை அவர் பிரயோகித்திருக்கும் முறையை ஒவ்வொரு பாடலிலும் கேட்டு அதிசயிக்கலாம்.அதிலும் ஒவ்வொரு வாத்தியங்களிலும் என்னென்ன விதங்களில் எல்லாம், கலா நேர்த்தியுடன் இடையிசையை வழங்கியிருகிறார் என்பதை ஏராளமான பாடல்களின் மூலம் உதாரணங்களாகக் காட்டலாம்.அவற்றைப் பாடல்களுடன் கேட்பது முழுமையான இன்பம். ஆனால் இடையிசையை [ InterLutes ] தனியே பிரித்தெடுத்துத் தனியே கேட்கும் போது அதன் இனிமையும் , அவர் கலாமேதமையும் உணரலாம். ஏனெனில் அப்போது தான் அதில் முழுக் கவனமும் நம்மால் செலுத்த முடியும்.இல்லை என்றால் பாடலின் இனிமையில் மெய்மறந்து போக நேரிட்டு விடும்.வாத்தியனகளின் அரசன் என்று வர்ணிக்கப்படும் வயலின் என்ற வாத்தியத்தை அவர் எத்தனையோ விதங்களில் பயன்படுத்தி சாதனை படைத்திருக்கிறார்.ஒவ்வொரு பாடலிலும் நாம் அதனை கேட்கலாம். எத்தனை விதவிதமாக இசையை தந்த அவர் அவை போல மீண்டும், மீண்டும் வராமலும் பார்த்திருக்கின்றார்.தொல்காப்பியர் கீழ் கண்ட பாடலில் சொல்வார்.

சிதைவெனப் படுபவை வசையற நாடில்
கூறியது கூறல்; மாறுகொளக் கூறல்;
குன்றக் கூறல்; மிகைபடக் கூறல்;
பொருளில கூறல்; மயங்கக் கூறல்;
கேட்போர்க் கின்னா யாப்பில் ஆதல்;
பழித்த மொழியான் இழுக்கக் கூறல்;
தன்னா னொருபொருள் கருதிக் கூறல்;
என்ன வகையினும் மனங்கோ ளின்மை;
அன்ன பிறவும் அவற்றுவிரி யாகும். (தொல்.110)

கூறியது கூறல்; மாறுகொளக் கூறல், குன்றக் கூறல்; மிகைபடக் கூறல்;. பொருளில கூறல்; மயங்கக் கூறல் இலக்கியத்திற்கு மட்டுமல்ல இசை போன்ற கலைகளுக்கும் பொதுவானதாக உள்ளது எனலாம். இந்த வழுக்களை மிக நுட்பமாகத் தவிர்த்திருக்கிறார் இளையராஜா. அவர் நினைத்திருந்தால அவர் போட்டமெட்டுக்களையே திருப்பித் , திருப்பி வெவேறு விதமாகப் போட்டிருக்க முடியும்.

அவர் அவ்வாறு செய்திருந்தாலே அவர் இன்னும் 30 வருடங்கள் நிற்க முடியும்.கற்பனையின் அதீதங்களை படைத்த அவர் , ஒவ்வொரு பாடலிலும் புதிது , புதிதாக தாவி சென்றிருக்கிறார். இவரது படைப்பாற்றல் திறன் என்பது மனித மூளையின் அற்ப்புதங்கள் அல்லது வினோதங்கள் என்று தான் எண்ணத்தோன்றும்.

மேலைத்தேய இசையில் CounterPoint [ மெட்டுக்குள் மேட்டு ]என்று சொல்லப்படுகின்ற ஒரு சிக்கலான , மேலைத்தேய இசையமைப்பாளர்களில் மிகவும் திறமைமிக்கவர்களால் கையாளப்படும் ,மிக இனிமையனதுமான ஒரு நுட்பம் இருக்கிறது.அதில் சிறந்து விளங்கியவர் Johannes Sebastian Bach [ 1665 – 1750 ] என்ற சிம்போனி இசை மேதை.அந்த இசை முறையை இளையராஜா ஒரு சில தமிழ் பாடல்களில் முழுமையாகச் செய்து காட்டியிருக்கிறார்.கீழ் கண்ட பாடல்களில் முழுமையாக இந்த முறையை பயன் படுத்தி வெற்றி கண்டிருக்கிறார்.

1. என் கண்மணி உன் காதலி [ படம்: சிட்டுக்குருவி ] பாடியவர்கள்: எஸ்.பி.பாலசுப்ரமணியம் + எஸ்.ஜானகி இந்தப் பாடல் பற்றிய சுவையான தகவலையும் இளையராஜா சொன்னார். இந்த CounterPoint [ மெட்டுக்குள் மேட்டு ] முறையை இந்த பாடல் காட்சிக்கு பொருத்தமாக வந்த போது, கவிஞர் வாலிக்கு இந்த இசை முறை பற்றி விளக்கிய போது அவருக்கு ஒன்றுமே புரியவில்லை என்றும் , பின் தானே ஒரு பாடலை முன்மாதிரியாக எழுதிக்காட்டி விளக்கிய பின்னர் தான் அவர் முழுமையாக அந்தப் பாடலை எழுதியதாக சொன்னார் இளையராஜா.

2. பூமாலையே தோள் சேரவா [ படம்: பகல் நிலவு ] பாடியவர்கள்: இளையராஜா + எஸ்.ஜானகி

3. தென்றல் வந்து தீண்டும் போது [ படம்: அவதாரம் ] பாடியவர்கள்: இளையராஜா + எஸ்.ஜானகி
இந்த CounterPoint முறையை ஒவ்வொரு பாடல்களிலும் வரும் இடை இசையில் வரும் வாத்தியங்களில்எத்தனையோ விதம் ,விதமாகவும் , கோரஸ்களில் விதமாகவும் ஆயிரக்கணக்கான பாடல்களில் வார்த்தையால் வர்ணிக்க முடியாதளவு CounterPoint களை அள்ளிவீசியிருப்பார் இசைஞானி. விதம் ,விதமான நிறங்களை தான் விரும்ய கோணங்களில் நிறுத்தி உணர்வுகளை வெளிப்படுத்தி இருப்பார்.மரபு ராகங்களைக் நவீன இசைக்குள் இழுத்து வந்த இவரது கலா மேதமைத்தனம் இவருக்கு முன்பும் , பின்பும் எவருக்கும் இருக்கவில்லை.

சிறுகதையில் புதுமைப்பித்தன் , புராதன கதை மாந்தரை உலாவவிட்டதைப் போல இசையில் தனக்கு முன்பிருந்த இசை மேதைகளின் படைப்புக்களை தனது இசையில் தோரனைகளாக உலவ விட்டு , தனது படைப்புக்களுக்கு உத்வேகம் [ Inspiration ] மூட்டி நம்மை இனம் புரியாத பரவசத்திற்கு உள்ளாக்கியவர் இளையராஜா! தனக்குக் கிடைத்த சந்தர்ப்பங்களில் த்னன்னையும் விஸ்தரித்துக் கொண்டு , தான் கற்றவற்றிலிருந்து பெற்ற அனுபவம் மட்டுமல்ல தன ஆளுமையால் இசையில் புதிய பரிமாணங்களை செய்து காட்டியவர்ர் இளையராஜா.

ஜி.ராமனாதனின் பாடல்களையும் , சி.ஆர் .சுப்பராமனின் பாடல்களையும் , விஸ்வநாதன் ராமூர்த்தியின் பாடல்களையும் ,இவர்களைப் போலவே இன்னும் பல இசைமேதைகளின் பாடல்களை எல்லாம் தோரனைகளாக்கி, எல்லோரும் இலகுவில் கண்டு பிடிக்க முடியாதவாறு இசையில் ஒரு புத்துணர்ச்சியை , விழிப்புணர்வை ஏற்ப்படுத்தினார்.பாடல்களில் சௌந்தர்யத்தையும் , நெகிழ்வையும் , உருக்கத்தையும் , களிப்பையும் , நகைச்சுவையையும் , நுட்பமாகவும் , அநாயாசமாகவும் செய்து தனது மேதைத்தனத்தை நிரூபித்தவர் இசைஞானி இளையராஜா.INSPIRATION ஆக அவை எடுத்தாளப்பட்டாலும் கேட்பவர்கள் நெகிழும் வண்ணம், ஆச்சரியப்படும் வண்ணம் , குதூகலிக்கும் வண்ணம் இருக்கும்.கைதேர்ந்த கலா மேதமை அவரது தனித்துவாமாகும்.

ஜி.ராமநாதன் இசையமைத்த சக்கரவர்த்தி திருமகள் [1957 ] படத்தில இடம் பெற்ற” சங்கத்துப்புலவர் பலர்” [ பாடியவர்கள்:என்.எஸ்.கிருஷ்ணன் , சீர்காழி கோவிந்தராஜன் ] என்ற பாடலை அகத்தூண்டலாகக் [Inspiration] கொண்டு
” சாதி மத பேதமின்றி சண்டை சிறு பூசல் இன்றி சகலரும் செல்லும் சினிமா” [பாடியவர் : இளையராஜா ] பாடலில் மேல் சொன்ன என்.எஸ்.கிருஷ்ணன் பாடலின் நையாண்டி தன்மை நிறைந்திருக்கும்.

சி.ஆர் .சுப்பராமன் இசையமைத்த தேவதாஸ் படத்தில் இடம் பெற்ற
” ஓ.. ஒ . ஒ தேவதாஸ் …” என்ற பாடலை [பாடியவர்கள்: கண்டசாலா + ராணி ] ஆதாரமாக வைத்துக் கொண்டு” அடி வான் மதி என் பார்வதி “ [படம் : சிவா ]
பாரியாத பூவே அந்தக தேவ லோக தேனே “

” ஒ.. பாட்டி நல்ல பாட்டி தான் “போன்ற பாடல்களை அற்ப்புதமாக அமைத்ததுடன் , வாத்திய இசையால் நம்மை புதிய உலகத்திற்கும் அழைத்துச் சென்றிருப்பார்.தேவதாஸ் பட பாடலின் அந்த டியூன் நமக்கு பரீட்ச்யமாயிருந்தாலும் , அதையும் தாண்டி பல்வேறு நிலையில் அது புது பாடலாகி விட்டது.அந்த பாடலில் நம்மை வைத்து புதிய உலகத்தைச் சுற்றி காட்டியது போல.!! நமக்கு தெரிந்த டியூன் தான எனினும், நமக்கு தெரியாத டியூனும் அதில் இருக்கும்.கீழ் கண்ட பாடலிலும் இது போன்ற செய்திகள் உண்டு.

” முதன் முதாலாக காதல் டூயட் பாட வந்தேனே ” [படம்: நிறம் மாறாத பூக்கள் ] என்ற பாடலின் நடுவே “எழிலார் சிற்பமாக என் எதிரில் நாணி மறைந்திடுவாள் ” என்ற வரிகளைக் கொண்ட தேவதாஸ் பட பாடலான ” சந்தோசம் தரும் சவாரி போவோம்” என்று தொடங்கும் பாடலின் வரிகளை அனாயாசமாக பயன்படுத்தியிருப்பார்.

” தரைமேல் பிறக்க வைத்தான் ” [ பாடியவர்:டி.எம் .சௌந்தரராஜன் ] [இசை: விஸ்வநாதன் ராமூர்த்தி, படம் : படகோட்டி]என்ற பாடலை அகத்தூண்டலாகக் கொண்டு [Inspiration]

” கடலிலே எழும்புற அலைகளை கேளடி ” [பாடியவர் : இளையராஜா ] பாடலில் மேல் சொன்ன தன்மை நிறைந்திருககும்.
இவை இசையில் நனவோடை யுத்தி எனலாம்.நினைவுப் பாதையில் மேல் மன எண்ணத்தின் செயல்பாடாகவும் , அடிமன எண்ணத்தின் செயல்பாடாகவும் அமையும் முறை.இந்த யுத்தி இலக்கியத்தில் பயன்படுத்தப்பட்டுள்ளது. இது அலை , அலையாக எழும் உள் மன எண்ணங்களை சித்தரிக்கும் முறை என்பர்.

” நான் பார்த்ததிலே அவள் ஒருத்தியைத் தான் ” [ படம் : அன்பே வா / பாடியவர்:டி.எம் .சௌந்தரராஜன் ] [இசை: விஸ்வநாதன் என்ற பாடலை அகத்தூண்டலாகக் கொண்டு

” புது மாப்பிள்ளைக்கு நல்ல யோகமடா” [ படம்: அபூர்வ சகோதரர்கள் ] என்ற பாடலை, யாரும் கண்டு பிடிக்க முடியாதவாறு அமைத்தார்.அது மட்டுமல்ல தமிழ் நாட்டுபுற இசையின் நுண்ணிய அழகுகளை எல்லாம் காட்டியதுடன் , அதன் நுண் விவரணைகளின் மூலம் தமிழ் செவ்வியல் இசையின் [கர்னாடக இசை ] ராகங்களை காட்டி , நாடுப்புற இசையின் செம்மைப்படுத்தப்பட்ட ஒரு வடிவம் தான் தமிழ் செவ்வியல் இசை [கர்னாடக இசை ] என்பதை எத்தனையோ பாடல்களில் நிரூபித்தவர்இளையராஜா. சிந்துபைரவி [1984] படத்தில் , ” பாடறியேன் படிப்பறியேன்” என்ற பாடல் மூலம் ஒரு காட்சியில் , நாடுப்புற இசையிலிருந்து தான் கர்நாடக இசை வந்தது என நிரூபிக்கும் ஒரு காட்சி எல்லோரும் அறிந்தது.

ஆனாலும் நூற்றுக்கணக்கான ,அவர் இசையமைத்த பாடல்கள் நாட்டுப்புற பாணியில் அமைந்த பாடல்களிலும் செவ்வியல் இசை ராகங்கள் இருக்கும்.அந்த ராகங்களை எல்லாம் இழுத்து நாட்டுப்புற சாயம் போட்டு விட்டிருப்பார்.இவ்விதம் மெட்டுக்களை மாற்றுவதை மெல்லிசைமன்னர் விஸ்வநாதனின் வார்த்தையில் சொல்வதனால்” வேட்டிக்கு சாயம் பூசுவது போல “.!

” நெஞ்சம் மறப்பதில்லை அது ” [ பாடியவர்:பி .பி .ஸ்ரீநிவாஸ் + சுசீலா ] [இசை: விஸ்வநாதன் ராமூர்த்தி, படம் : நெஞ்சம் மறப்பதில்லை [1963 ]என்ற பாடலை அகத்தூண்டலாகக் கொண்டு [Inspiration]

வான் உயர்ந்த சோலையிலே – இதயக்கோயில் – எஸ்.பி.பாலசுப்ரமணியம் + எஸ்.ஜானகி பாடிய அந்த பாடலின் ஆரம்பத்தில வரும் ஹம்மிங்கை அமைத்திருப்பார் இளையராஜா.

இந்த மாதிரியான இசையில் அகத்தூண்டுதல் [ INSPIRATION ] போன்ற விடயங்களை , நுட்பங்களை எல்லாம் பொது ஜனங்களுக்கு வெளிப்படையாகச் சொன்னவரும் இளையராஜா தான்!!. மக்கள் மத்தியில் இசை பற்றிய ஒரு விழிப்புணர்வும் , விரிந்த பார்வையும் அவரின் வருகையால் ஏற்ப்பட்டது என்பதும் மறுக்கமுடியாத உண்மையாகும்.மதுரையில் 1987 இல் நடைபெற்ற , ஆர்மேனியாவில் இடம் பெற்ற பூகம்பத்தால் பாதிக்கப்பட்ட மக்களின் நிவாரண நிதிக்காக நடைபெற்ற இசை நிகழ்ச்சியில் மூத்த இசையமைப்பாளர்களான கே.வீ.மகாதேவன் , எம்.எஸ்.விஸ்வநாதன் முன்னிலையில் , விஸ்வநாதன் ஒரே சந்தத்தில் அமைந்த பாடல்களை எல்லாம் எப்படி, எப்படி வெவ்வேறு பாடல்களாக மாறினார் என்பதை அவர்கள் முன்னிலையில் பாடிக்காண்பித்தார்.அதனை விஸ்வநாதன் ” இது நமது தொழில் ரகசியம் , அதை இங்கே பேசக்கூடாது”என்று சொல்லி விட்டு தானும் எப்படி எப்படி எல்லாம் மாற்றினேன் என்று பாடிக்காட்டினார் . அன்று அந்த மேடையில் இளையராஜா பாடிக்காட்டிய ஒரே சந்தத்தில் அமைந்த பாடல்கள வருமாறு.

1. ” வீடு வரை உறவு வீதி வரை மனைவி

காடு வரை பிள்ளை கடைசி வரை யாரோ ” [ படம் : பாத காணிக்கை ]

2. ” பேசுவது கிளியா பெண்ணரசி மொழியா
கோவில் கொண்ட சிலையா கொத்துமலர் கொடியா” [படம் : பணத்தோட்டம் ]

3. ” மாம்பழத்து வண்டு வாசமலர் செண்டு
யார் வரவை கண்டு வாடியது இன்று ” [படம் : பந்தபாசம் ]

இந்த மூன்று பாடலகளையும் மாற்றி, மாற்றி அந்தந்த மெட்டிலும், அதே சமயம் அடுத்த பாடலின் மெட்டலும் பாடலாம். ” வீடு வரை உறவு வீதி வரை ” என்ற பாடலின் மெட்டை வைத்துக் கொண்டு மற்ற இரண்டு பாடல்களையும் பாடலாம். அதே போலவே ஒவ்வொரு பாடல்களையும் அவ்விதம அடுத்தடுத்த பாடலின் மெட்டில் பாடலாம்.சந்தம் ஒன்றாக இருக்கும்.இந்த பாடல்களின் அமைப்பு முறையை இளையராஜா பின்னரும் பலமேடைகளில் பாடிக்காட்டியிருக்கிறார்.இந்த சந்தப்பாடல் என்பது தொல்காப்பியம் போன்ற பழந்தமிழ் இலக்கியங்களில் சொல்லப்பட்டிருக்கிறது.அது தனியே ஒரு துறையாக கருதப்படுவதாகும்.அவை வண்ணப்பாடல்கள் என்றும் அறியப்படுகின்றன.இந்த வண்ணப்பாடல்களில் சமயக் குரவரான சம்பந்தர் வியக்கத்தக்க பாடல்களை எழுதியுள்ளார்.அருணகிரிநாதரும் சிறப்பான சந்தக்கவிதைகளை தந்தவராவார்.அருணகிரிநாதரின் “ஏறுமயில் ஏறு விளையாடும் முகம் ஒன்று ” சந்தப்பாடலை அடிப்படையாககொண்டு இளையராஜா மாங்குயிலே பூங்குயிலே சேதி ஒன்று கேளு என்ற கரகாட்டகாரன் படப்பாடலை தந்தார்.அந்தப் பாடல் மிகப்பெரிய வெற்றிப்பாடலாகும்.

நாட்டுப்புற இசை என்றாலே ” எல்லாம் வெறும் தன்னானே , தன்னானே தானே “என்றும் தங்களை ” மேன்மக்களாக ” கருதிய , புதுமைப்பித்தன் வார்த்தையில் சொன்னால் ” அரிசி உணவை உட்கொள்ளும் பிராணிகள் ” இளையராஜா பயன் படுத்திய நாட்டுப்புற இசையால் கொதிப்புற்றார்கள்.

” நிதி சால சுகமா – ராம
நி சந்நிதி சேவ சுகமா”

[ அதாவது காசு சம்பாதிப்பது நல்லதா ? இல்லை உன் சந்நிநிதியில் சேவை செய்வது நல்லதா ?] என்று பாடி ” காசுக்காக பாட மாட்டேன் ” , ” மன்னனையும் புகழ்ந்து பாட மாட்டேன் ” என்று சங்காரம் செய்த தியாகய்யரை பெருமையாக , முன் மாதிரியாகக் காட்டி விட்டு , ” ஒரு கச்சேரிக்கு இவ்வளவு தொகை தந்தால தான் கச்சேரிக்கு வருவேன்” என்று தியாகய்யரின் ” கொள்கைகளை ” குழி தோண்டிப்புதைத்தவர்கள் இளையராஜாவை எதிர்த்தார்கள். 50 கீர்த்தனைகளை வைத்துக்கொண்டு பிழைப்பை நடாத்தியவர்கள் நாட்டுப்புற இசையின் வல்லமையை காட்டிய இளையராஜா மீது ” அறம் ” பாடினார்கள்.1977 , 1978 காலங்களில் ” இதயம் பேசுகிறது ” என்ற வார இதழில் கர்னாடக இசையின் கொடுமுடி என்று கருதப்பட்ட இசை விமர்சகர் சுப்புடு, இளையராஜாவை தாக்கி எழுதிக்கொண்டிருந்தார்.அதில் வெளிப்பட்டதேல்லாம் காழ்ப்ப்புணர்ச்சி தவிர வேறொன்றுமில்லை. பிற்காலத்தில் அதே சுப்புடு இளையராஜாவை புகழ்ந்து தள்ளியிருக்கிறார்.சுப்புடுவுடன் நேரடியாகப் பழகிய ராகவன் தம்பி என்பவர் பின்வருமாறு எழுதுகிறார்.

” பிற்காலத்தில் சுப்புடு இளையராஜா பற்றிய தன்னுடைய கருத்துக்களை முற்றிலும் மாற்றிக் கொண்டார். நேர்ப்பேச்சில் ஒருமுறை உண்மையாவே அவன் ராகதேவன் தான்யா… அவனை மாதிரி கல்யாணியையும் , ஹம்சானந்தியையும் இப்படிக் கும்பாபிஷேகம் பண்ணி அசத்த முடியாதுய்யா… என்பார். இது தவிர இளையராஜாவின் செந்தூரப்பூவே பாடலை சுப்புடு சொக்கிப் போய்க் கேட்டதை நான் கண்டிருக்கிறேன்.”

அதையெல்லாம் தாண்டி கர்னாடக இசை தனக்கு சாதாரணம் என்பது போல , அதில் பயன்படும் ராகங்களை வைத்து பல அற்புதங்களை செய்துகாட்டினார்இளையராஜா. .அதுமட்டுமல்ல கர்நாடக இசைக்கு ஒரு புதிய ராகத்தையும் கண்டு பிடித்து வழங்கியுள்ளார்.அந்தராகத்தின் பெயர் பஞ்சமுகி என்பதாகும்.” எல்லாம் வெறும் தன்னானே , தன்னானே தானே” என்று சொன்னவர்களுக்குப் பதிலடியாக நாடுப்புற இசையின் சிறப்புக்களை அங்கும் ,இங்கும் அலைய விட்டு ,தமிழ் செவ்வியலிசையின் [ கர்னாடக இசை ] ராகங்களில் ஊடுருவி அவற்றுடன் மேலைத்தேய செவ்வியல் வாத்திய இசைஇலிருந்து புறப்படும் சௌந்தர்ய சங்கீத ஒலியை குழைத்து உணர்வில் தங்கவும் , மனதை உருக வைக்ககூடிய பாடல்களால் மக்களை கட்டிப்போட்டார்.இவ்விதமான இசையை இந்தியா என்றும் கேட்டதில்லை.அதன் அடிநாதம் நாட்டுப்புற இசையிலேயே இருந்தது எனலாம்.அதுமட்டுமல்ல இசை மீதிருந்த அதீத ஈடுபாடும் ,இசை பற்றிய தேடலும் , உலக இசை பற்றிய ஆர்வமும் அவரை அகன்ற வெளிகளில் சாதாரணமாக அவரைப் பயணிக்க வைத்தது. அதனை இசைஞானி இளையராஜா ” என் கனவும் நனவும் இசையே ” என்று மிக அழகாகச் சொல்வார்.

அந்த இசை மூலம் தமிழ் மக்களின் இசை எனபது கர்னாடக இசை , மட்டுமல்ல நாட்டுப்புற இசையும் தான் என்பதை நிரூபித்துக் காட்டினார்.இசை ஒரு பண்பாட்டிலிருந்து உருவாகிறது என்பது உலக அளவில் ஒப்புக்கொண்ட கருத்தாகும்.இந்தக் கருத்தை தமிழ் மக்கள் மத்தியில் அவர்களது இசை எது என்பதை தெளிவு படுத்திக் காட்டியவர் இளையராஜா.நாட்டுப்புற இசை என்பது உலகில் தோன்றிய எல்லா இசைக்கும் அடிப்படையானது என்பதை உலக இசையறிந்தவர்கள் அறிவார்கள்.நாட்டுப்புற இசையில் இருந்தே செவ்வியல் இசை பிறந்தது என்பது உலக அளவில் ஏற்றுக் கொள்ளப்பட்ட உண்மை.தமிழ் மொழியிலும் அவ்வாறே.எனினும் தமிழில், தமிழ் மக்களின் உழைப்பால் உருவான இசைகளை திருடிய கூட்டம் நாட்டுபுற இசையை இழிவானதாக் கருதியது.இவ்விதம் உலகில் எந்த இசையையும் யாரும் இவ்வளவு கேவலாமகக் கருதுவதில்லை..இந்த நிலையை உடைத்தெறிந்தவர் இசைஞானி இளையராஜா தான் என்பது எல்லோரும் அறிந்ததே.” இசை என்பது ஒரு சமூகத்தின் உயர்ந்த நாகரீகத்தின் அடையாளம்” என்பர்.. அந்த வகையில் உலக இசைக்கு ஒரு பெரிய கொடையாக கிடைத்தது தமிழ் செவ்வியல் இசையான கர்னாடக இசையாகும்.குறிப்பாக தமிழ் மக்கள் உருவாக்கிய ராகங்கள் உலக இசைக்கு வழங்கப்பட்ட மிகப் பெரிய கொடையாகும்.அதுவும் தமிழ் நாட்டுப்புற இசை தந்த கொடை எனலாம்.

நாட்டுப்புற இசையிலிருந்து அகத் தூண்டுதல் [ INSPIRATION }பெற்று , அவற்றைத் தங்கள் உள்ளத்தில் தேக்கி , தமது படைப்புக்களில் மதத்தான அனுபவமாக மாற்றிய உலக இசை மேதைகளின் வரிசையில் இடம் பிடிக்கிறார் இளையராஜா.

இலக்கியத்தில் புதுமை செய்ய வேண்டும் என்றால் பாமரர்களின் மொழி நன்கு கைவரப் பெற வேண்டும் என்பார் பேராசிரியர் சித்தலிங்கைய்யா. அது இசைக்கும் பொருந்தும் எனலாம்.நாட்டுப்புற இசையின் பாதிப்புப் பெற்ற இசைகலைஞர்கள் பலர் மிகச் சிறந்த இசை மேதைகளாக , இசையமைப்பாளர்களாக இருந்திருக்கிறார்கள் என்பதற்கான உதாரணங்களை உலகெங்கிருந்தும் எடுத்துக் காட்டலாம்.மேலைத்தேய இசையுலகில் சிம்பொனி இசை மேதைகளான மொசார்ட், ஹைடன் , மொசார்ட் , பீத்தோவன் , டோவாரக் மற்றும் பார்தாக் , வாஹன் வில்லியம்ஸ் போன்ற எண்ணற்ற கலைஞர்களை உதாரணம் காட்டலாம்.

ஜோசெப் ஹைடன் [Joseph Haydn [ 31.03. 1732 – 31.05.1809 ] அவரது குடும்பத்தின் இசையார்வத்தால் தனது இளமைக்காலம் தொட்டு நாட்டுபுற இசையில் ஆர்வம் காட்டி வந்தார்.அவரது தாய், தந்தை பாடிய நாட்டுப்புற பாடல்கள் , அவரது முதுமைக்காலத்திலும் மறையவில்லை என்று அவரது சுயசரிதை எழுதிய georg August Griesinger என்பவர் குறிப்பிட்டுள்ளார்.அதுமட்டுமல்ல இளைஞாக இருந்த ஹைடன் நாட்டுப்புற இசையை சேகரிக்க வயல்களிலும் வேலை செய்தார் என்று Giuseppe Carpani என்ற எழுத்தாளர் பதிவு செய்திருக்கிறார். ஹைடன் ஜிப்சி இசையிலும் மிக்க ஈடுபாடு காடினார்.அவரது இசைக் குழுவில் பல ஜிப்சி இனக்கலைஞர்கள் பங்களித்தார்கள்.தனது இசைப்படைப்புக்களில் தேவையான இடங்களில் விரிவாக நாட்டுப்புற இசையை பயன் படுத்தியிருக்கிறார் என்று இசை விமர்சகர்கள் பாராட்டியிருக்கிறார்கள்.

மொசார்ட் [ Mozart 1756 – .1791 ] பிரெஞ்சு நாட்டுப்புற இசையிலும் ஈடுபாடு கட்டியவர்.பிரெஞ்சு நாட்டுப்புற இசையிலிருந்து அவர் பெற்ற உத்வேகம் [ Inspiration ] “Variation on the French Folk song ” Twelve Variation on ‘ Ah vous dirai -je , Maman’ என்ற இசை உருவாகக் காரணமாகியது. இந்த இசை வடிவத்திலிருந்து உருவாக்கப்பட்டதே Twinkle..Twinkle.. Little Star , Baa,Baa black Sheep போன்ற குழந்தைகளுக்கான பாடல்கள்.

பீத்தொவேன் [ Beethoven 1770 – 1827 ] தனது ஆரம்பகால இசைப்படைப்புகளில் தான் கேட்டு மகிழ்ந்த நாட்டுப்புற இசையை, இயற்க்கை ஒலிகளை சிம்போனிகளில் பயன் படுத்தியுள்ளார்.அதுமட்டுமல்ல ஆங்கிலேய , ஐரிஸ் நாட்டுப்புறப் பாடல்களிலும் ஈடுபாடுகாட்டினார்.

அந்தோனியோ ட்வோரக் [ Antonio Dvorak 1841 – 1904 ] என்ற சிம்பொனி இசைக்லைஞரும் தனது வழிகாட்டிகளான மொசார்ட் , பீத்தோவன் , ஹைடன் போன்று ஐரோப்பிய நாட்டுப்புற இசையிலும் , இன்னும் ஒரு படி மேலே போய் அமெரிக்க நாட்டுப்புற இசையிலும் ஈடுபாடுகாட்டினர்.அவர் 1892 – 1895 காலப் பகுதிகளில் அமெரிக்காவில் தங்கி வாழ்ந்தார். குறிப்பாக அமெரிக்கப் பூர்வீக மக்களின் இசையையும் , ஆபிரிக்க கறுப்பின மக்களின் இசையிலும் அதீத ஈடுபாடு காட்டினார். Harry Burliegh என்ற கறுப்பின இசைக்கலைஞர் அவரால் முன்னுக்கு கொண்டு வரப்பட்டார். அவர் மூலம் கறுப்பின மக்களின் மதம் சார்ந்த இசையை [ Spiritual ] அறிமுகம் செய்தார். Harry Burliegh என்பவரே கறுப்பின மக்களில் தோன்றிய முதல் செவ்வியல் இசைக்கலைஞராக விளங்கினார். ட்வோரக் தனது ஒன்பதாவது சிம்போனியில் பூர்வீக அமெரிக்க மக்களின் இசையை பயன்படுத்தினார்.Dvorak – Symphony 9 ” From the New World” என்பது அந்த இசை வடிவத்தின் பெயராகும்.
இந்திய அளவில் ,ஹிந்தி திரை உலகில் எஸ்.டி.பர்மன் ,ஹேமந்த் குமார், சலீல் சௌத்திரி , ஷங்கர் ஜெய்கிசன் , நௌசாத் , சி.ராமச்சந்திரா , ரோசன் , மதன் மோகன் ,ஜெயதேவ் போன்ற இன்னும் பல கலைஞர்களை நாட்டுப்புற இசையில் ஈடுபாடு காட்டியதற்கு எடுத்துக்காட்டாகச் சொல்லலாம்.எஸ்.டி.பர்மன் ,ஹேமந்த் குமார், சலீல் சௌத்திரி போன்ற இசைமேதைகள் வங்காள நாட்டுப்புற இசையிலும் . சி.ராமச்சந்திரா மராட்டிய நாட்டுப்புற இசையிலும் , சங்கர் ஜெய்கிசன் பஞ்சாப் நாட்டுப்புற இசையிலும் தோய்ந்ததால் தான் , திரையில் இசை பின்னனல்களாக அவற்றை இழைத்து அற்ப்புதங்களை நிகழ்த்தினார்கள்.

குறிப்பாக எஸ்.டி. பர்மன் வங்காள நாட்டுப்புற இசைக்கலைஞராக தனது இசை வாழ்வை தொடங்கியவர். தாகூரின் பாடல்களால் உந்துதல் பெற்றவர்.வங்காள நாட்டுப்புற பாடலகளை பாடுவதில் வல்லவரான எஸ்.டி.பர்மன் வங்காள நாட்டுப்புற பாடல்களைப் பாடி இசைத் தட்டுக்களாக வெளியிட்டுள்ளார்.நாட்டுப்புற பாடல்கள் மட்டுமல்ல செவ்வியலில் மெல்லிசை கலந்த பாடல்களைப் பாடுவதிலும் திறமையானவராக இருந்தார்.அவருடைய இசையமைப்பில் உருவான பல ஹிந்தி திரைப்பட பாடலகளில் வங்காள நாட்டுப்புற இசையின் தாக்கம் இருப்பதை நாம் கேட்கலாம்.ஹிந்தி திரைப்பட இசையுலகின் மிகச்சக் சிறந்த இசையமைப்பாளர்களில் இசைமேதை எஸ்.டி. பர்மன் மிக முதன்மையானவர் எனலாம். இவர் இசையமைத்த sujatha [1959] என்ற படத்தில் அவர் இசையமைத்து , அவரே [எஸ்.டி. பர்மன் ] பாடிய அற்ப்புதமான பாடலான

SUN MERE BANDHU RE என்ற பாடலின் ஹம்மிங்கை அடிப்படையாக வைத்துக் கொண்டு , மெல்லிசைமன்னர்கள் விஸ்வநாதன் ராமமூர்த்தி பாகப்பிரிவினை படத்தில் இடம் பெற்ற

” தாழையாம் பூ முடித்து
தடம் பார்த்து நடை நடந்து ” என்னும் ஒரு கிராமியப்பாடலாக வடித்துத் தந்தார்கள்.தமிழில் இந்தப் பாடல் சிறந்த நாட்டுற இசை என்ற அந்தஸ்த்தை பெற்று விளங்குகிறது.உண்மையில் அது வங்காள நாட்டுப்புற இசையின் கொடையாகும்.இந்தப் பாடல் அமைந்த ராகம் பிலகரி.இந்தியாவில் பரவலாக எல்லா இடங்களிலும் இந்த ராகம் பயன்பாட்டில் உள்ளது.

மேலே சொன்ன எஸ்.டி. பர்மனின் பாடலின் சாயலில் இளையராஜா அமைத்த பாடல்.

” உனக்கெனத்தானே இந்நேரமா நானும் காத்திருந்தேன் ” – படம் : பொண்ணு ஊருக்கு புதிசு – பாடியவர்கள்: இளையராஜா + ஜென்சி இந்த பாடலில் தோரணைகளில்சில ஒற்றுமை இருக்கிறதெனினும் , முழுமையாக வெளியே தெரியாது.

அவரைப் போன்றே ஹேமந்த் குமார் என்கிற இசை மேதையும் வங்காள இசைவடிவங்களிளிருந்து உந்துதல் பெற்றவர். சி.ராமச்சந்திரா மராட்டிய நாடுப்புற இசையுடன் மேலைத்தேய[ penny goodman ] இசையை கலந்த முன்னோடியாவார்..Albela [ 1952 ] படத்தில் இந்த வகைக் கலப்பு இசையை கேட்கலாம்.

எஸ்.டி. பர்மன் தனது அந்திமக்காலத்தில் இசையமைத்த ” ஆராதனா ” , ” மிலி ” போன்ற திரைப்படங்களில் வெளி வந்த பாடல்கள் மெல்லிசையில் சாகாவரம் பெற்ற பாடல்களாக விளங்குகின்றன.சலீல் சௌத்திரி வங்காள நாட்டுப்புற இசையுடன் , மேலைத்தேய செவ்வியல் இசை வடிவத்தையும் இணைத்து பல இனிமையான பாடல்களைத் தந்திருக்கிறார்.மதுமதி என்ற திரைப்படத்தில் வரும் பாடல்களில் அவருடைய இனிமையான கலவை இசையை நாம் கேட்டு மகிழலாம்.மலையாளத்தில் அவர் இசையமைத்த ” செம்மீன் ” படப்பாடல்களான ” கடலின் அக்கறை போனோரே “[ பாடியவர் ஜேசுதாஸ் ] ,” மானச மைனே வரு ” [ பாடியவர்: மன்னா டே ] , ” பெண்ணாளே பெண்ணாளே.. ” [ பாடியவர்கள்: ஜேசுதாஸ் + லீலா ] போன்ற தமிழ் மக்கள் மத்தியிலும் பெரும் புகழ் பெற்றவையாகும். அந்தப் பாடலகளில் வங்காள நாடுப்புற இசையின் தெறிப்புக்களை நாம் கேட்கலாம்.

எஸ்.டி.பர்மன் ,ஹேமந்த் குமார், சலீல் சௌத்திரி , ஷங்கர் ஜெய்கிசன் , நௌசாத் , சி.ராமச்சந்திரா , ரோசன் , மதன் மோகன் ,ஜெயதேவ் போன்ற இசை மேதைகளை இசைஞானி அடிக்கடி நினைவு கூருவதும் , அவர்களை போற்றுவது தற்ச்செயலானது அல்ல.இசையில் ஒருவன் சாதனை படைக்க வேண்டும் என்றால் அவனுக்கு மக்கள் இசை வசப்பட்டிருக்க வேண்டும் என்பதை தனது இசை முன்னோர்களின் வழியில் சென்று , அவர்களையும் மீறி இசையில் பிரமிப்புக்களை செய்து காட்டியவர் இசைஞானி இளையராஜா.இந்த பிரமிப்புக்கள் தொழில் நுட்பத்தால் செய்யப்பட்டவை அல்ல .

கலையில் தொழில் நேர்த்தியின் அவசியம் குறைத்து மதிப்பிட முடியாததெனினும் , தொழில் நுட்பம் மட்டும் கலையாகி விடாது.உணமையான கலை என்பது தொழில் நுட்பத்தையும் தாண்டிச் செல்லுவதாகும்.தொழில் நுட்பத்தை வாகனமாகக் கொண்டு கற்பனையின் உச்சங்களை எல்லாம் மிகச் சாதாரணமாக தாண்டிச் சென்றிருப்பார்இளையராஜா.அவரது மூத்த சகோதரரான பாவலர் வரதராஜன் தலைமையில் , ஒன்றுபட்ட கம்யுனிஸ்ட் கட்சியின் கலைக்குழுவில் பணியாற்றிய காலங்களில் இளையராஜா பெற்ற உந்துதல், அனுபவங்கள் அவரது இசைக்கு அடிப்படையானதாக அமைந்தது எனலாம். தமிழ்நாட்டு கிராமங்களில் அவர்களது கலைக்குழுவின் கால்கள் படாத இடமில்லை என்பார்கள்.
” மாட்டு வண்டி போகாத ஊருக்குக் கூட எங்கள் பாட்டுவண்டி போயிருக்கு ” , இது வெறும் வார்த்தையல்ல ,பதினைந்து ஆண்டுகள் நாங்கள் பெற்ற அனுபவம் , இன்று உபயோகித்துக் கொண்டிருக்கும் ஆர்மோனியப் பெட்டியை பல மைல்கள் தலையில் தூக்கி , நடந்து சென்று கிராமம் கிராமமாக பாடியிருக்கிறோம்.”- என்பார் இளையராஜா.

அந்த நாளைய அரசியல் செய்திகளை எல்லாம் தேவையான இடங்களில் பாடல்களாக அமைப்பதில் சிறந்து விளங்கிய பாவலர் வரதராஜன் அவர்களின் மூலம் இசை நுட்பங்களை எல்லாம் கற்றுக் கொண்டார். இந்த நினைவுகளை பற்றி இளையராஜா நிறைய சொல்லியிருக்கிறார்.இவ்வாறு ஊர் ஊராராக சுற்றியதன் மூலம் மக்களின் இசையை கற்றதோடு , மக்களின் ரசனையையும் அறியும் வாய்ப்பையும் பெற்றுக்கொண்டார் இளையராஜா.மற்ற இசையமைப்பாளர்களுக்கு கிடைக்காத வாய்ப்பு அவருக்கு கிடைத்தது. மற்ற இசையமைப்பாளர்கள் திரையில் அறிமுகமாகி மக்களுக்கு அறிமுகமானவர்கள்.இளையராஜாவோ மக்களிடம் அறிமுகமாகி , அவர்களது ரசனைகளை அறிந்து கொண்டு திரைக்கு அறிமுகமானவர்.மக்கள் இசையில் நின்று கொண்டு , அவர்களே அதிசயிக்கும் வண்ணம் பல புதுமைகளை செய்து காட்டினார்.மக்களுக்கு தெரிந்த இசை , ஆனாலும் தெரியாத பக்கங்களையும் காட்டும் இசை வல்லுநர் ஆனார். அதனால் தான் எல்லாத் தரப்பு மக்களாலும் ஏக மனதாக ஏற்றுக் கொள்ளப்பட்டார்.அவர் ஒரு சிறந்தைசையமைப்பாளர் என்பதை ஒரு பாமரனும் ஒத்துக் கொள்வான். பாலமுரளியும் ஒத்துக்கொள்வார்.

இசையைத் தங்கள் கோரப்பிடிக்குள் வைத்திருந்த இசைச் சனாதநிகளையும் ஒப்புக் கொள்ள வைக்கும் வல்லமை அவரது இசைக்கு இருந்தது.” வெறும் தன்னானே ..தன்னானே ” என்று எள்ளி நகையாடியவர்களின் வாய்களுக்கு அவரது இசை பூட்டு போடப்பட்டது.சினிமா இசைக்கு முழு அங்கீகாரம் கிடைத்தது.கொடுக்கும் விதத்தில் கொடுத்தால் எல்லோரும் ரசிப்பார்கள் என்பதை நிரூபித்துக் காட்டியவர் இசைஞானி இளையராஜா.பல வழிகளைக் கொண்ட , பல திசைகளைக் கொண்ட ,கட்டுக்கடங்காத இசை உலகம் இளையராஜவினுடையது.இசை பற்றிய ஆழமான புரிதலும் , மரபும் , நவீனமும் பற்றிய விழிப்புணர்வும் கொண்டவர் இளையராஜா..இசையில் மண்வாசனை , தமிழ் செவ்வியல் இசை , மேற்கத்தேய

செவ்வியல்இசை , மேற்கத்தேய பொப் இசை போன்ற பல்வகை இசையிலும் ஆழமானபுரிதல் அவர்க்குண்டு.இசையில் நுனிப்புல் மேய்வது , அதைமறைக்க நவீன தொழில் நுட்ப ஒலிகளைப் பயபடுத்தி மக்களை பயமுறுத்துவது போன்ற செப்படி வித்தைகள் அவரது இசையில் கிடையாது.இசையில் நவீனம் பற்றிய ஆழமான புரிதல் கொண்டவர் இசைஞானி இளையராஜா.அவர் வளர்ந்த அளவுக்கு தமிழ் திரைத்துறையினர் வளராததால் ,சப்த சித்துவிளையாட்டுக்கள் , இசையில் நுனிப்புல் மேயும் சிறுபிள்ளைத்தனங்கள் படத் தயாரிப்பாளர்களுக்கும் , இயக்குனர்களுக்கும் போதுமானதாக இருக்கிறது.அவருக்கு இசையில் அகத் தூண்டுதலாக பல இசை மேதைகள் இருந்திருக்கிறார்கள்.தனக்கு முன்பிருந்த எல்லா இசையமைப்பாளர்களின் பாடல்களை எல்லாம் நிரம்ப கேட்டிருக்கிறார்.எங்கோ

எதிரொலித்தவைகளை அல்லது எதிரொலிகளின் எதிரொலிகளாக ஒலிக்க விடுபவரல்ல ராஜா.பலவிதமான உணர்வுகளை நம்முள் எழச் செய்வது அவரது இசை. ” உணர்ச்சியில்லாமல் நல்ல இசையை வழங்குதல் சாத்தியமில்லாத ஒன்று.. உங்கள் உணர்ச்சியின் முன் நீங்கள் செய்யும் தவறுகளும் , குற்றங்களும் மங்கிப் போய்விடும்.” – என்பார் இசைமேதை Yehudi Menuhin . இந்த இசை மேதையின் மேற்கோளுக்கு ஒப்ப சாதாரண நான்கு வரிகளில் உள்ள ஒரு சிறிய பாடலில் கூட இசையால் உணர்ச்சியை வெளிப்படுத்தியிருப்பார் இளையராஜா. சாதாரணமாக உள்ள சில வரிகளை இசைக் காவியம் ஆக்கும் தன்மை அவரது இசைக்கு இருக்கிறது.நாயகன் படத்தில் வரும் Theme Music , இசையை எளிமையான நான்கு வரிகளை வைத்து படத்தின் ஆத்மாவை காட்டியிருப்பார் இசைஞானி.நாயகன்

God father [ 1972 ] என்ற புகழ் பெற்ற படத்தை அப்பட்டமாக காப்பியடித்து மணிரத்தினம் ” பெரிய ” டைரக்டர் ஆன படம். God father என்ற ஆங்கிலத் திரைப்படத்தில் வரும் Theme Music மிகவும் அற்ப்புதமாக இருக்கும்.அதை இசையமைத்தவர்கள் அந்த திரைப்படத்தை இயக்கியவரான Francis Ford Coppola என்பவற்றின் தந்தையாரான Carmine Coppola என்பவரும் Nino Rota என்ற புகழ் மிக்க இசையமைப்பாளரும் ஆவார்கள். அந்த திரைப்படத்தின் உயிர் மூச்சே அந்த Theme Music தான் என்று அடித்துச் சொல்லலாம்.வார்த்தையால் வர்ணிக்க முடியாதளவுக்கு வசீகரமும் , மர்மமும் , இனம் புரியாத சோகமும் , இனிமையும் நிறைந்த இசை என்பேன்.அந்த இசைக்காகவே அந்த படத்தை எத்தனையோ முறை பார்த்த ஞாபகம்.சிசிலியன் நாட்டுப்புற இசையில் இருந்து கிடைத்த மெட்டு என்பத எனது ஊகம்.அந்த மெட்டு கீரவாணி ராகத்திற்கு மிக நெருக்கமாய் உள்ள மெட்டு.

நாயகன் படத்தின் உயிரை கீழ்க் கண்ட நான்கு வரிகளை வைத்து காவியமாக்கியிருப்பார் இசைஞானி இளையராஜா.

” தென்பாண்டிச் சீமையிலே
தேரோடும் வீதியிலே
மான் போல வந்தவனை

யாரடித்தாரோ….”

சாதாரண சொற்களில் எவ்வாறு கவிதை ஆற்றலை வெளிப்படுத்துவது என்பதை பாரதி அருமையாக விளக்குவான்.

“கல்லை வைர மணி ஆக்கல் – செம்பைக்
கட்டித் தங்கம் எனச் செய்தல் – வெறும்
புல்லை நெல் எனப் புரிதல் …… ” பாரதி

என்னும் பாரதி வரிகளுக்கு ஒப்ப சாதாரண வரிகளுக்கு இசையால் உயிர் கொடுத்துவிடுபவர் இளையராஜா.

தனக்குக் கிடைத்த சந்தர்ப்பங்களில் தன்னையும் விஸ்தரித்துக் கொண்டு , தான் கற்றவற்றிலிருந்து பெற்ற அனுபவம் மட்டுமல்ல தன ஆளுமையால் இசையில் புதிய பரிமாணங்களை செய்து காட்டியவர்ர் இளையராஜா.

இசை என்ற பேராற்றலில் வாத்தியங்களை தன் எண்ணத்திற்கும்,தான் விரும்பிய இடங்களின் எல்லைகளுக்கும் சென்று , தேவையான போது கட்டுப்படுத்தவும் , ரசிகர்களின் ஆழ் மன கடலின் இருக்கும் எண்ணங்களை , கற்பனை திறனைத் தூண்டி விடவும் , அநாசாயமாக இசையின் எல்லைகளை எல்லாம் தாவித் தாவி தாண்டும் ஆற்றல் பெற்ற ஓர் அற்ப்புத இசையை வழங்குவதில் இவருக்கு ஈடு இணையாருமில்லை எனலாம்.

மனித நுண்ணுணர்வில் உள்ளுயிர்ப்பை ஏற்ப்படுத்தும் இயற்க்கை வாத்தியக் கருவிகளை வைத்து இவர் எழுப்பிய இசை ஜாலங்களுக்கு தமிழில் ஈடு இணை யுண்டா ? இந்தியாவில் உண்டா?

அதுமட்டுமல்ல இசை மீதிருந்த அதீத ஈடுபாடும் ,இசை பற்றிய தேடலும் , உலக இசை பற்றிய ஆர்வமும் அகன்ற வெளிகளில் அவரைப் பயணிக்க வைத்தது.

வட இந்திய , ஹிதித் திரைப்பட இசை தமிழ் நாட்டிலும் ஆதிக்கம் செலுத்தி வந்த சூழ் நிலையில் இளையராஜாவின் ” அன்னக்கிளி ” இசையால் ஹிந்தி மோகம் குறைந்தது என்பது சாதாரண விடயமல்ல.மிகத் திறமை வாய்ந்த இசையமைப்பாளர்கள் பலர் அப்போதும் இசையமைத்துக் கொண்டிருந்தார்கள்.பின்னர் இளையராஜாவின் திரை இசை ஹிந்தியிலும் மெதுவாகப் பரவியது.

அதன் வளர்ச்சி 1990 க்ளில் அப்பட்டமாகப் பிரதி பண்ணுமளவுக்கு வளர்ந்தது.குறிப்பாக Anand Milin என்ற இசையமைப்பாளர் இளையராஜாவின் பல வெற்றிப்பாடல்களை எல்லாம் ஹிந்தி திரைப்பாட்ல்களாக்கியுள்ளார்.அந்த வகையில் ஒரு தமிழ் இசையமைப்பாளரின் பாடல்கள் ஹிந்தியில் அப்பட்டமாகக் கொப்பியடிக்கப்பட்டது இளையராஜாவின் பாடல்களே.! ஹிந்தி மொழி எதிர்ப்புக் காலத்திலும் ஹிந்தி பாடல்கள் பிரபலமாக இருந்தன.

இளையராஜாவின் தமிழ் பாடல்கள் பல ஹிந்தி திரைப்பட இசையமைப்பாளர்களுக்கு உந்துசக்தியாக இருந்தது. சில உதாரணங்கள்.

1 . ராஜா ராஜாதி ராஜன் இந்த ராஜா – அக்கினிநட்சத்திரம் – இளையராஜா

Tap , Tap Tapori – film: Baagi [1990 ] Singers Amit kumar + Anand chitragupt Music: Anand Milin
2 . கேளடி கண்மணி பாடகன் சங்கதி – புது புது அர்த்தங்கள் – எஸ்.பி.பி

chandni raat Hai – film: Baagi [1990 ] Music: Anand Milin

3 . இளைய நிலா பொழிகிறதே – பயணங்கள்முடிவதில்லை – எஸ்.பி.பி
Neele Neele Ambar – film : Kalakar – Kishore kumar music : Kalyanji anandji
4 . ஒ , ப்ரியா ப்ரியா – இதயத்தைத் திருடாதே – மனோ + சித்ரா

ஒ, Piya ,Piya – film: Dil – Music: Anand Milin

5 . அண்ணே அண்ணே சிப்பாய் அண்ணே – கோழி கூவுது – இளையராஜா

Ekh D0 theen Chor – film: tazaab [1988] Music: Laxmikanth Pyarelaal

6 . ஒரு நாள் உன்னோடு ஒரு நாள் – உறவாடும் நெஞ்சம் [ 1976 ] – எஸ்.பி.பாலசுப்ரமணியம் + எஸ்.ஜானகி இசை: இளையராஜா

ஒரே நாள் உன்னை நான் நிலாவில் – இளமை ஊஞ்சலாடுகிறது [1978] – எஸ்.பி.பி + வாணி ஜெயராம் இசை: இளையராஜா

நான் எண்ணும் பொழுது ஏதோ சுகம் – film: அழியாத கோலங்கள் [1979] இசை: சலில் சௌத்ரி இந்த மூன்று பாடல்களிலும் ஆச்சரியமான ஒற்றுமை இருக்கிறது.

இளையராஜாவின் இசையில் மேலைத்தேய இசையின் பாதிப்பு.

1 . Danza, No1 from cancion Y danca [ Antonio Ruiz Pipa ]

எந்தப் பூவிலும் வாசம் உண்டு – முரட்டுக்காளை – எஸ்.ஜானகி இசை; இளையராஜா

2 . My favorite Things – Sound of Music

பூட்டுக்கள் போட்டாலும் – சத்திரியன் – எஸ்.ஜானகி இசை; இளையராஜா

3 . Singing In The Rain – Film : SInging In The rain – Gene Kelly

ஒ கோ மேகம் வந்ததோ – மௌனராகம் – எஸ்.ஜானகி இசை; இளையராஜா

4 . Corazon Herido – [ Wounded Heart ] Composed: conzalo Vargas – rythm: Bolivia

இவள் ஒரு இளங்குருவி – பிரம்மா – எஸ்.ஜானகி இசை; இளையராஜா

5 . My Mine – [ Hypnotic Tango ]

ஊர் ஓரமா ஆத்துப் பக்கம் – இதயக்கோயில் – இளையராஜா + சித்ரா இசை; இளையராஜா / இந்த பாடல் நேரடியாத் தெரியாது.தாளம் ஓரளவு ஒத்து போகும்.

6 . Rock Aroud The Clock

ரம்பம் பம் ஆரம்பம் – மைக்கேல் மதன காம ராஜன் – எஸ்.பி.பாலசுப்ரமணியம் இசை; இளையராஜா

7 . Alegra En Almaguer – ” Les Flute Indienn syd

நேற்றிரவு நடந்ததென்ன – இன்னிசை மழை – எஸ்.பி.பாலசுப்ரமணியம் + எஸ்.ஜானகி இசை; இளையராஜா

8 . Legend of the gorry – Richard clayderman – Desparado

ஒ ..பட்டர் பிளை – மீரா – எஸ்.பி.பாலசுப்ரமணியம் + ஆஷா போஸ்லே இசை; இளையராஜா

9 . Money Money – ABBA

கண்மலர்களின் அழைப்பிதழ் – தைப்பொங்கல் – இளையராஜா + எஸ்.ஜானகி இசை; இளையராஜா

10 . Boney M – Sunny 1976

டார்லிங் டார்லிங் – பிரியா – பி.சுசீலா இசை; இளையராஜா/ மேற்சொன்ன Boney M – Sunny 1976 என்ற பாடலின் ஒரிஜினல் வடிவம் கீழே உள்ளது.

Victor D’mario & his Orchestra – Jueves [Tango ] rafael Rossi /Udenino toranzo ( recorded: 19.06. 1951)

11 . Roses From South – J.Strauss – Arranged by : James Last

புத்தம் புதுக் காலை – அலைகள் ஓய்வதில்லை – எஸ்.ஜானகி இசை; இளையராஜா

02:40 ஆவது நிமிசத்தில் கொஞ்ச இடத்தில் வரு இசைப்பகுதி ” புத்தம் புது காலை ” இசைப்பகுதியுடன் இசைந்து போகும்.

12 . Jezebel ( Million Seller – no 2 Hit ) 1951 – frank Laine – The Norman Luboff Choir

லவ்வுன்ன லவ்வு , மண்ணெண்ணெய் – மீரா – மனோ + மின்மினி இசை; இளையராஜா

இது போன்ற ஸ்பானிய இசையை , அல்லது ஜிப்சி இசையை எம்.எஸ்.விஸ்வநாதனும் ” சம்போ சிவ சம்போ ” போன்ற பாடலிலும் பயன்படுத்தியிருப்பார்.

13 . Lambada இசையை அடியொற்றி

ஊர் அடங்கும் சாமத்திலே -புதுப்பட்டி பொன்னுதாய் – சுவர்ணலதா + உமா ரமணன் இசை; இளையராஜா
Lambada பாடலின் மெல்லிசைப் பாங்கு ” ஊர் அடங்கும் சாமத்திலே ” என்ற பாடலில் தெரிப்புக்கலாக விழும்.

மேலைத்தேய செவ்வியல் இசையில் [ WESTERN CLASSICAL MUSIC ] உந்துதல் பெற்று இளையராஜா இசையமைத்த பாடல்கள்:.

1 . Dvorak’s New World Symphony , 3rd Movement

சிட்டுக் குருவி முத்தம் தருது – film:சின்னவீடு [1985 ] Singers: எஸ்.பி.பாலசுரமணியம் + எஸ். ஜானகி t Music: இளையராஜா

2. Shubert Last Symphony [ 1822 ] இந்த இசைப்பகுதியின் பாதிப்பில் உருவானது கீழ் உள்ள பாடல்.நேரடியாக தெரியாது எனினும் தோரணைகளில் அதன் சாயல் தெரியும்.

இதயம் போகுதே – film:புதிய வார்ப்புக்கள் [1978 ] Singers: ஜென்சி Music: இளையராஜா இந்த விடயம் சமீபத்தில் இளையராஜாவே சொல்லித்தான் அறிந்தோம்.

3 . Mozart , 25th Symphony , !st Movement

வீட்டுக்கு வீட்டுக்கு வாசல் படி வேணும் – film: கிழக்கு வாசல் [1978 ] Singer: இளையராஜா Music: இளையராஜா மேலைத்தேய சிம்பொனி இசையைக் கூட எடுத்துக் கொண்டு தமிழ் நாட்டுப்புற இசைக்கு இசைவாக தந்திருப்பது ஆச்சரியப் படுத்துவதாகும்.அந்த இசையில் ஒரு மிகச் சிறிய துரும்பு தான் அது.அடஹி வைத்து விளையாடிஇருப்பார்.வல்லவனுக்குப் புல்லும் ஆயுதம் அது.

4 . George Bizet’s 1897 L’Arlésienne Suite Number One, 4th movement, called ‘Carillon’

A .B. C நீ வாசி – கைதியின் டயரி – ஜேசுதாஸ் – வாணி ஜெயராம்

5 . Vivaldi four Season Spring Part 1

பொன்மாலை பொழுது – film:நிழல்கள் [1980 ] Singers: எஸ்.பி.பாலசுரமணியம் Music: இளையராஜா இந்த பாடலில் மேல் சொன்ன இசைப்பகுதியின் தெறிப்புகள் தெரியும்.நேரிடையாக சொல்ல முடியாது. கேதார ராகத்தின் ஆளுமைக்கு இந்த பாடல் வந்து விடுவதால் புதிய பாடலாகி விடுகிறது.

இளையராஜாவின் தாக்கமில்லாத இசையமைப்பாளர்கள் யாருமில்லை என்னுமளவுக்கு , அவருடைய இசையின் தாக்கம் அவரது சம கால இசையமைப்பாளர்களிலும் இருந்தது. சில உதாரணங்களைப் பார்ப்போம்.

1. ஜெர்மனியின் செந்தேன் மலரே – உல்லாசப்பறவைகள் – எஸ்.பி.பாலசுப்ரமணியம் + எஸ்.ஜானகி இசை : இளையராஜா
சித்திரமே உன் விழிகள் – நெஞ்சிலே துணிவிருந்தால் – கே ஜே .ஜேசுதாஸ் + வாணி ஜெயராம் இசை : சங்கர் கணேஷ்

2. உச்சி வகுந்தெடுத்து – ரோசாப்பூ ரவிக்கைக்காரி – எஸ்.பி.பாலசுப்ரமணியம் இசை : இளையராஜா
பட்டு வண்ண ரோசாவாம் – கன்னிப்பருவத்திலே – மலேசியா வாசுதேவன் + சைலஜா இசை : சங்கர் கணேஷ்

3. வெண்ணிலா ஓடுது – நாளை உனது நாள் – கே ஜே .ஜேசுதாஸ் + வாணி ஜெயராம் இசை : இளையராஜா
கொண்டையில் தாழம் பூ – அண்ணாமலை – எஸ்.பி.பாலசுப்ரமணியம் + சித்ரா இசை : தேவா

4. ராசாத்தி உன்னை காணாத நெஞ்சு – வைதேகி காத்திருந்தாள் – ஜெயச்சந்திரன் + வாணி ஜெயராம் இசை : இளையராஜா
ரோசாப்பூ சின்ன ரோசாப்பூ – சூரிய வம்சம் – ஹரிஹரன் + சித்ரா இசை : எஸ்.எ. ராஜ்குமார்

5. வளையோசை கல கல கலவென – சத்யா – எஸ்.பி.பாலசுப்ரமணியம் + லதா மங்கேஷ்கர் இசை : இளையராஜா
வேலை வேலை ஆம்பளைக்கு – அவ்வை சண்முகி – எஸ்.பி.பாலசுப்ரமணியம் + சித்ரா இசை : தேவா

6. மழை வருது மழை வருது குடை கொண்டு வா – ராஜா கைய வச்சா -கே ஜே .ஜேசுதாஸ் + சித்ரா இசை : இளையராஜா
கொஞ்ச நேரம் கொஞ்ச நேரம் – சந்திரமுகி – மதுபாலகிருஷ்ணன் + ஆசா போலே இசை : வித்யாசாகர்

7. காட்டிலே கம்மன் காட்டிலே – ராஜகுமாரன் -எஸ்.பி.பாலசுப்ரமணியம் + சித்ரா இசை : இளையராஜா
தாமர பூவுக்கும் தண்ணிக்கும் – பசும்பொன் – கிருஷ்ண சந்திரன் + சுஜாதா இசை : வித்யாசாகர்

8. உன்னைக் காணாமல் நானேது – கவிதை பாடும் அலைகள் -அருண்மொழி + சித்ரா இசை : இளையராஜா

ராசா ராசா உன்னை கட்டி வச்சேன் – பசும்பொன் – ஹரிகரன் + சித்ரா இசை :S.A. ராஜ்குமார்

9. துள்ளி துள்ளி நீ பாடம்மா – சிப்பிக்குள் முத்து – எஸ்.பி.பாலசுப்ரமணியம் + சித்ரா இசை : இளையராஜா
ஆகாயம் கடல் நிறம் நீளம் தான் – பாசவலை – எஸ்.பி.பாலசுப்ரமணியம் + சித்ரா இசை :மரகதமணி

1 0. தீபங்கள் ஏற்றும் இது கார்த்திகை தீபம் – தேவதை – எஸ்.பி.சரண் + சந்தியா இசை : இளையராஜா
AIRTEL MOBILE ADVERT SONG – – MUSIC இசை :A.R.ரகுமான்

1 1. ஒரே நாள் உன்னை நான் – இளமை ஊஞ்சலாடுகிறது -எஸ்.பி.பாலசுப்ரமணியம் + வாணி ஜெயராம் இசை : இளையராஜா
சகானா சாரல் தூருதோ – சிவாஜி – உதித் நாராயன் + சின்மயி MUSIC இசை :A.R.ரகுமான்

1 2. என்கிட்டே மோதாதே – -எஸ்.பி.பாலசுப்ரமணியம் இசை : இளையராஜா
மதுரைக்கு போகாதடி – அழகிய தமிழ் மகன் – உதித் நாராயன் + சின்மயி MUSIC இசை :A.R.ரகுமான்

ரகுமான் தான் இளையராஜாவின் பாடல்களை கேட்பதில்லை பேட்டிகள் கொடுப்பவர்.!!

1 3. மனசு மயங்கும் மௌன கீதம் – சிப்பிக்குள் முத்து – எஸ்.பி.பாலசுப்ரமணியம் + எஸ்.ஜானகி இசை : இளையராஜா

மந்திரம் சொன்னேன் வந்துவிடு – வேதம் புதிது – மனோ இசை :தேவேந்திரன்

தேவேந்திரன் , மற்றும் ரவீந்திரன் போன்ற மிகச் சிறந்த இசையமைப்பாளர்களும் இளையராஜாவின் இசையில் அல்லது அவரது வாத்தியக் கலைவையால் பாதிப்புற்றவர்கள் எனலாம்.

ரவீந்திரன் [ 1941 – 2005 ] மிகச் சிறந்த இசையமைப்பாளராக மலையாள சினிமாவில் திகழ்ந்தவர்.கர்னாடக இசையில் தேர்ச்சி பெற்ற ரவீந்திரன் , கர்நாடக இசையுடன் மெல்லிசை கலந்த [ SEMI- CLASSICAL SONGS ] பாடல்களை மிக அற்ப்புதமான முறையில் இசையமைத்துத் தன்னை மேதை என நிரூபித்தவராவார். அவர் இசைInயமைத்த பரதம் , ஹிஸ் ஹைனெஸ் அப்துல்லா , கமலதளம் , ராஜ சில்பி , சூரிய காயத்திரி போன்ற திரைப்படப் பாடல்கள் இனிமை மிக்கவையாகும்.தனக்கென ஓர் பாணியை அமைத்து வெற்றி பெற்றவர் ரவீந்திரன்.

இளையராஜா தனக்கு முன்பிருந்த இசையமைப்பாளர்களைப் பற்றி வியந்து பல முறை போற்றி பாராட்டியுள்ளார். அவர்களது இசையின் தாக்கம் தன்னில் ஏற்ப்படுத்திய உணர்வுகளைப்பற்றியும் , அவர்கள தந்த பாடல்களின் சிறப்புக்களையும் பேசியிருக்கிறார்.ஹிந்தியில் ஹேம்சந்த் பிரகாஷ், நௌசாத், சி.ராமச்சந்திரா , எஸ்.டி.பர்மன் , ஷங்கர் ஜெய்கிஷன், ரோஷன், மதன் மோகன் , ஹேமந்த் குமார் , சலில் சௌத்ரி போன்ற இசைமேதைகளின் பாடல்களிலிருந்து அகத்தூண்டுதாலாக சில பாடல்களை அவர் தந்துமிருகிறார்.

சலில் சௌத்திரியின் இசைக்குழுவில் கிட்டார் வாத்தியக் கலைஞனாக அவர் பணியாற்றியதால் ,அவரில் பாதிப்பு இருக்கிறது என எண்ணத் தோன்றுகிறது.குறிப்பாக வாத்திய இசைக்கருவிகளின் சேர்க்கைகளில் அந்த பாதிப்பு இருப்பதாக நினைக்கிறன்.சல்லீல் சௌத்திரியும் மேலைத்தேய செவ்வியல் இசையில் மிக்க ஈடுபாடு கொண்ட கலைஞனாக இருந்ததும் ஒரு காரணமாயிருக்கலாம்.

1. KORA KAGAZ THA – ARATHANAA [ 1969 ] – KISHORE KUMAR + LATA MANGESHKAR MUSIC : S.D.BURMAN

தேவதை ஒரு தேவதை – பட்டாகத்தி பைரவன் [ 1979 ] – எஸ்.பி.பாலசுப்ரமணியம் + எஸ்.ஜானகி இசை : இளையராஜா

2. KHILTE HAIN GUL YAHAAN – SHARMELEE [ 1971 ] – LATA MANGESHKAR MUSIC : S.D.BURMAN

செந்தூரப் பூவே செந்தூரப் பூவே – பதினாறு வயதினிலே [ 1977 ] – எஸ்.ஜானகி இசை : இளையராஜா மேல் சொன்ன பாடலின் inspiration ஆக இருக்கலாம். கண்டுபிடிக்க முடியவில்ல்லை. இந்த ராகம் ஆபேரி என்பதால சில ஒற்றுமையும் இருக்கலாம்.

3. O.. NIRDAI PREETAM – STREE [ 1961 ] – LATA MANGESHKAR MUSIC : C.ராமச்சந்திர

கண்கள் எங்கே நெஞ்சமும் எங்கே – கர்ணன் 1964 – பி.சுசீலா இசை: மெல்லிசைமன்னர்கள் விஸ்வநாதன் ராமமூர்த்தி
மாலையில் யாரோ மனோத்து பேச – சத்திரியன் [ 1991 ] – ஸ்வர்ணலதா இசை : இளையராஜா

இந்தப் பாடல்களில் எங்கோ சில் சாயல்கள் உண்டு. நிச்சயமாக எங்கே என்று சொல்ல முடியாதளவுக்கு உந்துதலை [ inspiration ] ஒளித்து வைத்திருக்கிறார்கள். அருமையான INSPIRATION என்று சொல்லலாம். இந்த மூன்று பாடலும் அமைந்த ராகம் சுத்ததன்யாசி ராகம்.காடும் ,காடு சார்ந்த இடத்திற்குப் பொருத்தமான ராக்கம் என்பார்கள். இந்தப் பாடல்களும் காட்டுப்பகுதியிலே படமாக்கப்பட்டிருக்கும். மேலே தந்துள்ள ஹிந்தி படம் சகுதலை பாடுவதாக அமைக்கப்பட்டது. இந்த சுத்ததன்யாசி ராகம் சிலப்பதிகாரத்திலும் பயன் பட்டுள்ளது என்றும் கூறி பாடியும் காட்டுவார் தனது குரு நாதரான தன்ராஜ மாஸ்டர் என்று ஒரு பேட்டியில் இசைஞானி இளையராஜா சொல்லியிருக்கிறார்.அந்த தன்ராஜ் மாஸ்டர் என்பவர் வேறு யாருமல்ல. கர்னாடக இசை என்பது தமிழ்மக்களின் இசை என்பதை ஆணித்தரமாக நிரூபித்த மாமேதை ஆப்ப்ரகாம் பண்டிதரின் பேரன்.

4. o bekarar dil ho chuka hai – KHORAAR [ 1964 ] – LATA MANGESHKAR MUSIC : HEMANT KUMAR இந்தப் பாடலில் வரு முதல் ஹம்மிங் மட்டும் கீழ்க் உள்ள பாடலில் வரும்.

ராசாவே உன்னை விட மாட்டேன் – அரண்மனைக்கிளி [ 1992 ] – எஸ்.ஜானகி இசை : இளையராஜா

5. Buddham saranam gachchami – angulimaal [ 1964 ] – manna dey MUSIC : ANIL BISWAS இந்தப் பாடலில் வரு முதல் பகுதி மட்டும் கீழ்க் உள்ள பாடலில் வரும்.
தரை வராத ஆகாய மேகம் – சந்திரலேகா [ 1995 ] – உன்னிகிருஷ்ணன் இசை : இளையராஜா

6 . APNE DIL SE BADAI DUSHMA – BETAB [1983 ] – LATA + SHABIR KUMAR MUSIC: R.D.BURMAN
பொம்முக்குட்டி அம்மாவுக்கு என்ற பாடல் மேலே உள்ள பாடலின் மிகவும் STRONG INSPIRATION என்று சொல்லலாம்.

சினிமா இசையில் , வாத்திய இசையில் [ orchestration ] அவர் பெற்றிருந்த அசாத்தியமான திறமை சினிமா இசைக்கு வெளியேயும் சில இசைப்படைப்புக்களை உருவாக்க உதவியிருக்கிறது.அதற்க்குச் சிறந்த சான்றுகளாக விளங்குபவை

1. HOW TO NAME IT
2. NOTHHING BUT WIND

என்ற இரண்டு சிறந்த இசைப்படைப்புக்களாகும்.

” HOW TO NAME IT ” – [எப்படி பெயரிட்டு அழைப்பது ] , ” NOTHHING BUT WIND ” [ காற்றைத்தவிர வேறில்லை ] இவை மேற்கத்திய இசை , கர்நாடக இசை இணைந்த ஒரு கலப்பிசையாகும்.இரண்டு வித்தியாசமான செவ்வியல் இசைகளின் Inspiration னிலிருந்து கிடைத்த இசை.இந்த இசைத்தட்டுக்கள் வெளிவந்த போது இசைமேதை ரவிஷங்கருக்கு போட்டு காண்பித்த போது ” இதை இந்தியன் ஒருவன் உருவாக்கியிருக்க முடியாது ” என்றார். அதனை சுபின் மேத்தா கேட்க வேண்டும் என்று ரவிசங்கர் அனுப்பி வைத்த போது அந்த ஆல்பத்தைக் கேட்டு பிரமித்த சுபின் மேத்தா ” இந்த இசையமைப்பாளருக்கு எத்தனை உதவியாளர்கள்? ” என்று கேட்டாராம்.

இளையராஜா தனது மானசீகக் குருவாகக் கருதும் Paul Mauriat [1925 – 2006 ] என்கிற பிரெஞ்சு செவ்வியல் இசைக்கலைஞரின் வாத்தியஇசை அமைப்பை தனது இசையின் முன்னுதாதரணமாக[ Musical Inspiration ] கருதுபவர். Paul Mauriat வின் இசையின் பாதிப்பு இளையராஜாவின் வாத்திய இசைச் சேர்ப்பில் இருப்பதை நாம் காணலாம்.Paul Mauriat மேற்கத்தேய செவ்வியல் இசையை எடுத்துக் கொண்டு நவீன இசைக்கருவிகளுடன் இணைத்து புதுமை செய்த இசைமேதையாவர். HOW TO NAME IT என்ற இளையராஜாவின் படைப்பைக் கேட்டு விட்டு ” Somethink different and wonderfull ” என்றும் மிகவும் மனம் திறந்து பாராட்டியதுடன் , இதை நான் வைத்துக் கொள்ளலாமா என்று கேட்டிருக்கிறார்.

இளையராஜாவின் இது போன்ற படைப்புக்களின் பரிசோதனை முயற்சிகளுக்கு களம் அமைத்துக்கொடுத்தது சினிமா இசையே.அங்கு அவர் பெற்ற பயிற்ச்சியும் , அதனால் அவர் பெற்ற ஞானமும் , இசை பற்றிய விரிந்த பார்வையும் தான் அவரை இந்தியாவின் தலைசிறந்த இசைக்கலைஞன் ஆக்கியது.
கர்னாடக இசை ராகங்களை இளையராஜா பயன்படுத்தும் பாங்கும் அதில் பாண்டித்தியம் பெற்றவர்களும் வியப்பதாக இருக்கும்.பழத்தில் பிழிந்தெடுத்த ரசமாய் , ஜீவ ரசமாய் , ராகங்களின் உள்ளடக்கத்தில் அவர் நிகழ்த்தியிருக்கும் அற்ப்புதங்கள் அவரை ராஜசில்பி எனச் சொல்லும்.இசையில் புதுமை நோக்கில் எவ்வளவு தீவிரம் காட்டினாரோ அவற்றை எல்லாம் மரபில் நின்றே செய்து காட்டினார் என்பது இசை குறித்த அவரின் தீவிரத்தைக் காட்டும்.புழக்கத்தில் இல்லாத எத்தனையோ ராகங்கள் அழகின் லயங்களைக்காட்டி உயிர் பெற்று நிற்கின்றன.அதற்க்கு ஏராளமான உதாரணங்களைக் காட்ட முடியும்.

ரீதி கௌளை என்ற ராகத்தில் அவர் இசையமைத்த ” சின்னக் கண்ணன் அழைக்கிறான் ” [ படம் ; கவிக்குயில் -1977- ] என்ற பாடல் ஒரு பானை சோற்றுக்கு ஒரு சோறு பதம் என்பது போல சொல்லலாம்.இந்த ரீதி கௌளை ராகத்தில் இளையராஜாவுக்கு முன்பிருந்த இசையமைப்பாளர்கள் ஒரு முழுமையான பாடலில் பயன்படுத்தினார்கள் என்பதுஎனக்குத் தெரிந்த வரையில் இல்லை என்பேன். ராகமாலிகையாகப் பயன்பட்டிருக்கலாம் என நம்புகிறேன்.இதே போலவே நாடகப்பிரியா[ நெஞ்சே குருநாதரின் -படம்: மோகமுள் ] , பவானி [ பார்த்த விழி – படம்:குணா ], நளினகாந்தி [ என்தன நெஞ்சில் நீங்காத – படம்: கலைஞன் ] போன்ற பாடல்களை சொல்லலாம்.பிற இசையமைப்பாளர்கள் பயன்படுத்தாத ராகங்களை பயன்படுத்தி வெற்றி கண்டார்.

தமிழ் மண்ணில் வேர் ஊன்றி வளர்ந்த இசையை அடிப்படையாக வைத்துக் கொண்டு திரை இசையில் எத்தனையோ விதம் விதமான பாடல்களை அவர் தந்திருக்கிறார்.அவரது இசை பற்றி இன்னும் எத்தனையோ தலைப்புக்களில் கட்டுரைகள எழுதுவதற்கான விசயங்கள் உள்ளன.இந்தக் கட்டுரையின் பாடுபொருளான அகத்தூண்டுதல்[ INSPIRATION ] என்பதே இளையராஜாவின் இசை ஏற்ப்படுத்திய உந்துதலாலேயே எழுந்தது.பல விதமான இவரது பாடல்கள் இசை பற்றிய புத்துணர்வை என்னுள் ஏற்ப்படுத்தின.இனிமையான மெட்டுக்களைத் தந்த இசை மேதைகளின் இசைச் சாறுகளை எல்லாம் பிழிந்தெடுத்து . அதன் உன்னதங்களை எல்லாம் தனது அழகியல்மிக்க இசையால நமக்கு தொய்வில்லாமல் தந்த இசை மேதை இளையராஜா. அவரது இயல்பான திறமையும் , கடின உழைப்பும் தந்த பலன்களை நாம் மட்டுமல்ல இனி வரும் சந்ததிகளும் அனுபவிக்கப்போகிறார்கள்.

என்னதான் உலக இசை மற்றும் , மேற்கத்தேய இசையால் அவர் உந்துதல் பெற்று அவர் இசையமைத்திருந்தாலும் , அதனை நமது இசைக்கு ஏதுவாக அமைத்துப் புதுமை செய்தார்.அவற்றில் பிறநாட்டு சிறப்பான இசைவகைகளை இழுத்து வந்து நம் முன் நிறுத்தினாலும் , அவை நம்மீது ஆதிக்கம் செலுததுபவையுமல்ல.நம்மீது திணிப்பதுமல்ல.அவை வேறான இசையாக இருந்த போதிலும் அவற்றை நமது இசையுடன் இழைத்து இசைவாக்கியது தான் மாபெரும் சாதனை.அந்த இசை மூலம் அவர் நமது கற்பனைக்கு சவால் விட்டிருப்பார்.
நீரோடைகள் , பனிமலைகள், பச்சை பசும் வயவேளிகள்,மேகங்களால் மூடப்பட்ட நீல மலைகள், காலைக்கதிரின் ஒளிக்கற்றைகள , மாலைக்கதிரின் வெம்மை இது போன்ற பல இயற்கையின் பேரழகுகளை எல்லாம் தனது வாத்திய இசையால் நம் மனக் கண்களில் நிறுத்தினார்.பாடல்களில் அவர் செய்திருக்கும் இசைக்கோலங்கள் வேறு ஒருவர் தனது வாழ் நாளில் செய்ய வேண்டியதை குறுகிய கால எல்லைக்குள் , அதி வேகமாச் செய்து காட்டினார்.வேகமாச் செய்தாலும் தரத்தில் குறைந்தவயுமல்ல எனபது அவரது கலையாற்றலுக்கு எடுத்துக் காட்டாகும்.இன்று சில இசையமைப்பாளர்கள் வருசத்திற்கு
ஓரிரண்டு படங்களுக்கு இசையமைக்கப் படுகின்ற பாடுகளை நாம் அறிவோம்.அவ்விதம் நீண்ட நாட்கள் எடுத்தும் பாடல்கள் சிறப்பாக அமைவதில்லை.

இணையத் தளங்களில் பாடல்களை தேடுவோர் இளையராஜா கொடுத்துள்ள சிறந்த பாடல்களின் பட்டியலையும் ,அவரது சமகலாத்தவரும் , அவருக்குப் பின் வந்தவர்களின் சிறந்த பாடல் பட்டியலையும் ஒப்பிட்டுப் பார்த்தாலே அவரது வேகமும் , தரமும் நிறைந்த பாடல்களைத் தரும் ஆற்றலை உணர்ந்து கொள்ளலாம்.எந்தவித பின் புலமும், கூட்டணியும் ,பரிவாரங்களும் ,அரசியல் பின் புலமும் இல்லாமல் தனித்து தன் இசை ஒன்றையே நம்பி “இசையின் எல்லா பரிமாணங்களிலும் ” வெற்றிக்கொடி நாட்டியவர் இந்திய அளவில் இளையராஜா ஒருவரே.

வட இந்தியாவில் ஹேம்சாந் பிரகாஸ் , அணில் பிஸ்வாஸ் , நௌசாத், S.D. பர்மன் , C.ராமசந்திரா , கய்யாம் , ஹேமந்த் குமார் , ஷங்கர் ஜெய்கிஷன் , சலீல் சௌத்திரி , மதன் மோகன் , ரோஷன் , O.P.நய்யார் , ரவி , R.D.பரமன் , தென்னிந்தியாவின் G.ராமநாதன் ,S.M.சுப்பைய்யா நாயுடு ,S.V. வெங்கட்ராமன் , C.R.சுப்பராமன் ,கோவிந்தராஜிலு நாயுடு , R.சுதர்சனம் , C.N.பாண்டுரங்கன் , S.தட்சிணாமூர்த்தி , K.V.மகாதேவன் , V.தட்சிணாமூர்த்தி , S.ராஜெஸ்வராவ் , A.ராமராவ் , S.ஹனுமந்தராவ் ,T.சலபதிராவ் , கண்டசாலா ,A.M.ராஜா ,பெண்டலாயா , பாப்பா , லிங்கப்பா , விஸ்வநாதன் ராமமூர்த்தி , R.கோவர்த்தனம், வேதா ,G.தேவராஜன் , வேதா, M.P.ஸ்ரீனிவாசன் , G.K.வெங்கடேஷ் , M.S.பாபுராஜ் போன்ற இசைமேதைகளின் இசை ஊற்றுகளிலிருந்து உருவான மகாநதியே இசைஞானி இளையராஜா.
பெருநதிகள் கொண்டு வந்து சேர்க்கும் பலவகை நறும் மூலிகைகள் மகாநதியில் கலந்தது போலவே மேல் சொன்ன அத்தனை இசைமேதைகளின் இசை , மற்றும் அவர்களது நிறைவேறாத ஆசைகள் , கனவுகள் , கற்பனைகள் இளையராஜாவின் இசையால் நிறைவேறியுள்ளன என்று சொல்லலாம்.ஒரு இசையமைப்பாளர் [ COMPOSER ] என்ற சொல்லுக்கு முழுமையாக அர்த்தம் கொடுப்பதாயிருந்தால் இளையராஜாவையே இந்தியாவின் ஒரே ஒரு COMPOSER என்று சொல்லவேண்டும்.

இசைஞானி இளையராஜா இந்த நூற்றாண்டு தந்த அதிசயம்.
ஊன் உயிர்கள் உள்ளமெல்லாம்
உருகிடவே அருவியைப்போல்
தேனமுதத் தென்றலிலே
கானமுதம் பொங்குதடா

ஊட்டும் தாய் அன்பினிலே
உள்ளதெல்லாம் சொல்லி உன்னை
வாட்டமின்றி கண் வளர
வாழ்த்தியதும் இன்னிசையே

ஆடுவதும் பாடுவதும் அவரவர்க்கு வாய்ப்பதல்லால்
வீடு தோறும் கீரையைப் போல்
விலை போட்டு வாங்குவதா ?

என்ற S.C. கிருஷ்ணன் பாடிய பழைய பாடல் வரிகளை கேட்கும் போது இளையராஜாவும் ,அவரது இசைப் பேராற்றலும் என் நினைவுக்கு வரும்.

“புது ராகம் படைப்பதாலே நானும் இறைவனே, விரலிலும் குரலிலும் ஸ்வரங்களின் நாட்டியம் அமைத்தேன் நான்…”அவர் பாடுவதாக காண்பித்தது தற்செயலானதா…?

அதுமட்டுமல்ல இசைமேதை மொசார்ட் பற்றி இன்னொரு இசைமேதையான பிரான்ஸ் சுபேர்ட் [ Franz Shubert ] சொன்ன வாசகங்கள் கன கச்சிதமாக இளையராஜாவுக்கும் பொருந்துகிறது!. இளையராஜாவின் இசையில் பிரமிக்கும் போதெல்லாம் இந்த வாசகங்கள் என் நினைவுக்கு வந்து போவதை தவிர்க்க முடிவதில்லை.
” A world that has produed a Mozart is a world worth saving. what a picture of a better world you have given us , Mozart ! ” – Franz Shubert

அவருக்குப் பின் வந்த பல இசையமைப்பாளர்கள் தாளத்தை வைத்து முழக்குவது , ஒரு மெட்டை வைத்துக் கொண்டு , அதையே திரும்ப,திரும்ப அலுப்புத் தட்டும் வரையில் செய்து கொண்டிருக்கிறார்கள்.இந்த ஆற்றல் அற்ற படைப்புக்களை ஏதேதோ பெயர் சொல்லியும் அழைக்கிறார்கள்.

தொடரும் …..

முன்னைய பகுதிகள்:

தமிழ் சினிமா இசையில் அகத்தூண்டுதல் 4 : T .சௌந்தர்
தமிழ் சினிமாஇசையில் அகத்தூண்டுதல் 3 : T .சௌந்தர்
தமிழ் சினிமாஇசையில் அகத்தூண்டுதல்(2) : T .சௌந்தர்
தமிழ் சினிமாஇசையில் அகத்தூண்டுதல் : T.சௌந்தர்