இந்துமதத்தின் ஒரு அங்கமாகவே மாட்டிறைச்சி உணவு இருந்துவந்துள்ளது: வி.இ.குகநாதன்

ந்தியாவில் மாட்டிறைச்சிக்கான மறைமுகத்தடை மத்தியஅரசால் இந்துத்துவா கொள்கையினை அடிப்படையாகக்கொண்டு அமுல்படுத்தப்பட்டுள்ளது. மாட்டிறைச்சி வைத்திருப்பதாகச் சந்தேகிக்கப்படுவர்களே இந்து வெறியார்களால் நாடுபூராக அடித்துக்கொல்லப்படுகிறார்கள். இந்தப்பின்புத்திலேயே இந்துமதத்தின் மாட்டிறைச்சி தொடர்பான பார்வையினை ஆராய்வதே இப்பதிவின் நோக்கம்.

தேவாரம் சொல்லும் தகவல்-

மாட்டிறைச்சி(பசு) உணவு பற்றிய அப்பர் சுவாமிகளின் கருத்தினைப் பார்ப்போம். திருநாவுக்கரச நாயனார் மாட்டிறைச்சி சாப்பிடுவோரின் பக்திநிலையினை போற்றியுள்ளார். “சங்கநிதி பதுமநிதி” என ஆரம்பிக்கும் தேவாரத்தில் 6வது வரியில்” ஆவுரித்து தின்றுழலும் புலையரையும் “ இந்துமதத்தில் ஏற்றுக்கொண்டுள்ளார். (ஆதாரம்- சங்கநிதி பதுமநிதி தேவாரம், அப்பர் )

வேதங்கள் சொல்லும் தகவல்-

1. இருக்கு வேதம் (Rig vedda)- இந்திரனுக்கு பிடித்த இறைச்சி பசு, பசுவின் கன்று, குதிரை, எருமை ஆகியவனவாம்”. – ரிக் வேதம் (6/17/1)
(ஆதாரம்– ரிக் வேதம் (6/17/1)

2. யசூர் வேதம்- இதில் பலவகையான யாகங்கள் குறிப்பிடப்பட்டு அவற்றில் எவ்வாறு பசுக்கள் பலியிடப்படவேண்டும் எனக்குறிப்பிடப்படுகிறது.

அவையாவன:

👉:கோசவம்- பசுமாடுகளை கொல்லும் யாகத்தின் பெயர்

👉:வாயவீயஸ் வேதபசு – வாயு தேவதைகளுக்காக வெள்ளை பசுவை கொல்லுவது

👉:காம்யபசு – தனது எண்ணங்களை ஈடேற்றி கொள்வதற்கு உரிய பசு யாகம்

👉:வத்சொபகரணம் – கன்று குட்டியைக் கொலை செய்து நடத்தும் யாகம்

👉:அஷ்டதச பசுவிதானம்- 18 பசுக்களை கொலை செய்து நடத்தும் யாகம்

👉:ஏகாதசீன பசுவிதானம் – 11 பசுக்களை கொல்லும் யாகம்

👉:கிறாமாரண்யா பசு பிர்சம்ஷா – நாட்டிலும் காட்டிலும் உள்ள பசுக்களை கொன்று யாகம் செய்வது

👉:ஆதித்ய வேதபசு – சூரிய தேவனுக்கு பசு யாகம்

👉:ரிஷபாலம்பன விதானம் – எருதைக் கொன்று நடத்தும் யாகத்தின் விதி

3. அதர்வவேதம்- அதர்வண வேதம் கூறுகிறது. வேத காலப் பசு புனிதமானது என்பது எப்போது என்றால் அப்பசு பார்ப்பனருக்குப் பலிக்குரிய தொகையாகக் (‘தட்சணையாக’க்) கொடுக்கப்படும் போது மட்டும் தான்!

(ஆதாரம்-“புனிதப் பசுவின் புராணம்)

மனுதர்மம்-

“அறுத்துப் பலியிடும் இறைச்சியை உண்ணாத மனிதன், 21 ஜென்மங்களுக்கு, பலியிடும் விலங்காக உருவெடுப்பான்”.

(ஆதாரம் – மனு ஸ்மிருதி (பாகம் 5 / வசனம் 35)
“இறைச்சிக்குரிய மிருகங்களை மனிதர்கள் உண்ணுவது பாவமில்லை. உண்ணுபவர்களையும் உணவுகளையும் பிரம்மனே படைத்தான்”
. (ஆதாரம் – மனு ஸ்மிருதி (பாகம் 5 / வசனம் 30)

இதிகாசங்கள் சொல்லும் தகவல்-

1. மகாபாரதம்- நந்திதேவனுடைய மாளிகையில் விருந்தினர்களுக்காக இந்த பசு மாமிசங்களை சமைப்பதற்கு இரண்டாயிரம் சமையற்காரர்கள் இருந்தார்கள் .ஆயினும் பிராமாண விருந்தினர்களின் கூட்டம் அளவுக்கு மீறி இருந்த காரணத்தால் , மாமிசம் குறையாக இருக்கிறபடியால் தயவு செய்து சூப்பை அதிகமாக ஏற்றுக்கொள்ள வேண்டும் என்று விருந்தினர்களைச் சமையல்காரர்கள் கேட்டுக்கொள்ளப்பட்டது .”

(ஆதாரம்- – ,துரோண பருவம் 67: 1-2 மற்றும் 17-18 &சாந்தி பருவம் 27-28 ஸ்லோகங்கள்)

2. வால்மிகி இராமயணம்- “கொழுத்த கன்றை அடித்து உணவாக்கி இராமனும்க்குப் பரத்வாஜ முனிவர் படையலாக்கினார்-“

“ இறைச்சி உணவு மீது சீதை பெரும் ஆர்வம் காட்டி வந்தாள் என்ற விஷயத்தை யும் இந்த நூலிலுள்ள பல பாடல்களிலிருந்து ஊகிக்க முடிகிறது. கங்கையைத் தாண்டியபோது அரிசிச் சோறும், இறைச்சியும் கங்கையாற்றுக்கு சமைத்துத் தருவதாக சீதை உறுதி தந்தாள். தன் கணவனுடன் பத்திரமாகத் திரும்பி வந்தால், ஏராளமான மதுவைத் தருவதாக வாக்குறுதி தந்தாள். தன் கணவன் அவன் சபதத்தை நிறைவேற்றி முடித்தால் ஆயிரம் பசுக்களையும், நூறு ஜாடி மதுவையும் யமுனை ஆற்றுக்குப் படையல் தருவதாக அந்த ஆற்றைக் கடக்கும்போது சீதை வேண்டிக் கொள்கிறாள்”
(ஆதாரம்- வால்முகி ராமாயணம்)

வைணவ பக்தி இயக்கத்தின் உறுதியான ஆதரவாளரான இராமானந்தரால் (பதினான்காம் நூற்றாண்டு) எழுதப்பட்டதாகச் சொல்லப்படும் அத்யாத்ம இராமாயணத்திலும்கூட, இறைச்சி உணவின் மீது சீதை கொண்டிருந்த விருப்பம் சுட்டிக்காட்டப்பட்டிருப்பதை இங்கு குறிப்பிடுவது பொருத்தமான தாகவே இருக்கும்
(ஆதாரம்-அத்யாத்ம இராமாயணம்)

சங்கராச்சாரியார் (சரஸ்வதி) கருத்து-

இந்துக்களின் ஜகத்குருவான சங்கரச்சாரியார் கூறுகிறார் “யாகத்தின்போது பசுக்கள் பலியிடப்பட்டதும், பின்பு பிராமணர்கள் அதனை உண்பதும் உண்மைதான் , ஆனால் உப்பு, புளி சேர்க்காமல் தேசநலனிற்காக சிறிதளவே உண்டனர்.”
(ஆதாரம்- தெய்வத்தின் குரல் புத்தகம்)

விவேகானந்தர் கருத்து-

விவேகானந்தரின் கருத்து- “ஒரு காலத்தில் ‘பிராமணர்கள்’ மாட்டுக் கறி சாப்பிட்டார்கள். ‘சூத்திரர்’களை திருமணம் செய்து கொண்டார்கள். ‘பிராமணர்’களுக்கு சூத்திரர்கள் மாட்டுக் கறி உணவை சமைத்தார்கள்.”
(ஆதாரம்- விவேகானந்தர் உரை தொகுப்பு-தொகுதி 9)

“நான் சொல்வதைக் கேட்டால் உங்களுக்கு அதிர்ச்சியாக இருக்கும். நமது பழங்கால பழக்க வழக்கத்தின்படி மாட்டுக் கறியை சாப்பிடாதவன் நல்ல இந்து அல்ல.” (He is not a good Hindu who does not eat beef) – (ஆதாரம்-தொகுதி-3-அமெரிக்காவில் கலிபோர்னியாவில் ‘ஷேக்ஸ்பியர் கிளப்’பில் பிப்.2, 1900 அன்று ஆற்றிய உரை)

மகாத்மா காந்தியின் கருத்து- .

மாட்டிறைச்சி தின்ன மாட்டோம் என்று கூறும் ஆசாரம் மிகுந்த இந்துக்கள் மருத்துவத்திற்காக மாட்டிறைச்சித் தேநீர் குடிப்பதைக் காந்தியடிகள் பலமுறை கேலி செய்திருக்கிறார்.
(ஆதாரம்-“புனிதப் பசுவின் புராணம்)
பிற இந்துமதப் பெரியோர்கள்-
. மாட்டிறைச்சியைத் தின்பது பற்றிக் காளிதாசர், பவபுத்தி, இராஜசேகரர், சிறீஹர்சர் ஆகியோருடைய எழுத்துகளில் இருக்கும் குறிப்புகள் நிறைய சொல்கின்றன.

மாற்றம்-

இவ்வாறு இந்துமதத்தின் மிக முக்கிய அங்கமாகவிருந்த மாட்டிறைச்சி உணவு பவுத்த,சமண மதங்களின் செல்வாக்கினாலேயே குறைந்துபோனது. சமணர்களை கழுவேற்றி, பவுத்தத்தையும் இந்தியாவினை விட்டுத்துரத்தியபோதே இந்துமதத்தில் மாட்டிறைச்சி தவிர்க்கப்பட்டது. இன்று இதனை அரசியலாக்கி தனிமனிதனின் உணவுப்பழக்கம்வரை தமது மதவாதத்தினை நீட்டுவது ஒரு வெறுப்பு அரசியலேயன்றி வேறில்லை.

பெரியாரியமும் இந்து மதமும் : இராமியா

நாடாளு மன்றத் தேர்தலில் பா.ஜ.க. வெற்றி பெற்று ஆட்சியைப் பிடித்ததில் இருந்து, ஒடுக்கப்பட்ட வகுப்பு மக்களை மூளை வெளுப்பு செய்யும் பணியில் காவிக் கும்பலினர் சுறுசுறுப்பு அடைந்தனர். இப்பொழுது உத்தரப் பிரதேம், உத்தரகாண்ட், கோவா, மணிப்பூர் மாநிலங்களில் ஆட்சியைக் கைப்பற்றிய பின் அவர்கள் அப்பணியில் தலை கால் தெரியாத வேகத்துடன் செயல்படத் தொடங்கி இருக்கிறார்கள்.

அவர்கள் இப்பொழுது முக்கியமாக முன்வைக்கும் வாதம், பெரியாரியவாதிகள் இந்து மதத்தை மட்டுமே எதிர்க்கின்றனர்; பிற மதங்களை எதிர்க்க அஞ்சுகின்றனர் என்பது தான். இதற்கு அவாளும், அவாளால் மூளை வெளுப்பு செய்யப் பட்ட மற்றவர்களும் கொடுக்கும் விளக்கம் இது தான்.

இந்துக்கள் சாதுவானவர்கள்; சகிப்புத் தன்மை உடையவகள்; இவர்களை விமர்சிப்பதால் எதிர்த் தாக்குதல் இராது; ஆகவே துணிவாக எதிர்க்கலாம். ஆனால் இஸ்லாமியர்களும், கிருத்துவர்களும் அப்படி அல்ல; அவர்கள் சிறிதும் சகிப்புத் தன்மை இல்லாதவர்கள்; தங்களை எதிர்ப்பவர்களை வன்முறையால் தாக்கிஅழிவை ஏற்படுத்தி விடுவார்கள். ஆகவே அவர்கள் மீது தாக்குதலைத் தொடுக்க அஞ்சுகின்றனர்.

அவாளின் இந்த விளக்கம் கலப்படம் இல்லாத பட்டவர்த்தமான பொய்யே. பெரியார் மூட நம்பிக்கைகளைக் கண்ட போது, இஸ்லாமிய, கிருத்துவ மதத்தினரை மட்டும் அல்ல; நாத்திகத்தை அடிப்படையாகக் கொண்ட புத்த மதத்தினரையும் விமர்சிக்கத் தயங்கவில்லை,

மாரியம்மன் தீமிதி விழாவைப் போல், இஸ்லாமியர்களிடையே சந்தனக் கூடு தீமிதி விழா நடைபெறுவதை விமர்சித்து இஸ்லாமியர்களிடையேயே பெரியார் பேசி இருக்கிறார். சகிப்புத் தன்மை இல்லாதவர்கள் என்று காவிக் கும்பலினால் சித்தரிக்கப் படும் இஸ்லாமியர்கள் இதைக் கேட்டு வெட்கப் பட்டார்களே ஒழிய வெகுண்டு எழவில்லை.

இந்நிகழ்வு குறித்து திருநெல்வேலி மாவட்டம், சாத்தான் குளத்தில் 28.7.1931 அன்று முகம்மது நபி பிறந்த நாள் விழாவில் பெரியார் பின் கண்டவாறு பேசினார்.

“சென்ற வருஷம் ஈரோடு அல்லாசாமிப் பண்டிகையைப் பற்றி ஈரோடு கூட்டத்தில் கண்டித்துப் பேசினேன். எனது ஈரோடு சகோதரர்கள் அதற்கு சிறிதும் கோபித்துக் கொள்ளாமல் வெட்கப் பட்டார்கள். அதன் பிறகு இந்த வருஷம் அந்தப் பண்டிகை நின்று விட்டது. எனக்கு மிக சந்தோஷம். கோபித்துக் கொண்டிருந்தால் இந்த வருடமும் நடத்தி இருப்பார்கள்”

இப்பேச்சு 2.8.1931 குடி அரசு இதழில் வெளி வந்து உள்ளது.

பெரியாரியவாதிகள் மூட நம்பிக்கைகளையும், மக்களின் சுதந்திரத் தன்மைக்கு விலங்கிடும் எந்தச் செயல்களையும் எதிர்க்கும் போது மதங்கள் அதற்குத் தடையாக எப்போதுமே இருந்தது இல்லை. மக்களுக்கு அவை யாரால், எவ்வளவு ஆழமாக, எவ்வளவு வலிமையாகப் பாதிக்கிறது என்பதைப் பொறுத்துத் தான் எதிர்ப்பின் தீவிரம் இருக்கிறது.

இது இந்தியவில் மட்டும் அல்ல; உலகம் எங்ககும் நிகழும் நிகழ்வு தான். பிரிட்டன் தத்துவ ஞானி பெர்ட்ரண்ட் ரஸ்ஸல் (Bertrand Russel) “நான் ஏன் கிருத்துவன் அல்ல?” என்று, தான் பார்க்கும் சமுதாயத்தில் பாதிப்பை ஏற்படுத்தும் கிருத்துவ மதத்தைத் தான் விமர்சித்தாரே ஒழிய, இந்து மதத்தையோ, இஸ்லாமிய மதத்தையோ விமர்சிக்கவில்லை.

வங்க தேச வீராங்கனை தஸ்லிமா நஸ் ரீன் இஸ்லாமிய மதத்தைத் தான் விமர்சித்தாரே ஒழிய, இந்து மதத்தையோ, கிருத்துவ மதத்தையோ விமர்சிக்கவில்லை,

அவாளுக்கு இவை எல்லாம் தெரியாதா? நன்றாகத் தெரியும். அது மட்டும் அல்ல. இஸ்லாமிய மக்களுடனும், கிருத்துவ மக்களுடனும் கலந்து பழகியது போல், இந்து மக்களுடனும் பெரியார் கலந்து பழகிய செய்திகளும் அவாளுக்கு நன்கு தெரியும்.

பழுத்த ஆத்திகரும், சைவ சமயத் தத்துவ ஞானியுமான மறைமலை அடிகள் பெரியாரின் கடவுள் மறுப்புக் கொள்கையை மறுத்தாலும், சமூக நலன்கள் என்று வந்த போது இருவரும் இணைந்து பணியாற்றி இருக்கின்றனர்.

அதே போல பழுத்த ஆத்திகரும், சைவ சமயத் தத்துவ ஞானியும், தேச பக்தருமான வ.உ.சி.யுடன் இணைந்து, பெரியார் சமூக நீதிக்காகப் பணி ஆற்றி இருக்கிறார். இதன் தொடர் நிகழ்வாக 5.11.1927 அன்று சேலம் நகரில், “எனது அரசியல் பெருஞ் சொல்” என்ற தலைப்பில் வ.உ.சி. உயர்நிலைகளில் பார்ப்பனர்கள் மட்டுமே இருப்பதைக் கண்டித்தும், விகிதாச்சாரப் பிரதிநிதித்துவம் வேண்டும் என்று கோரியும் பெரிய சொற்பொழிவையே ஆற்றி இருக்கிறார்.

இராமலிங்க சாமியின் பாடல் திரட்டு என்ற நூலைத் தனது குடி அரசு பத்திரிக்கையின் சார்பிலேயே வெளியிட்ட பெரியார், சமரச சன்மார்க்க சங்கத்தின் மீது விமர்சனம் செய்யவும் தயங்கவில்லை.

“சூத்திரன் என்றால் ஆத்திரம் கொண்டு அடி” என்ற சொற்றொடரை அவர் கைவல்யசாமியார் என்ற இந்து தத்துவ ஞானியிடம் இருந்து தான் பெற்றார்.

இவற்றை எல்லாம் கணக்கில் கொண்டு பார்த்தால், பெரியார், இஸ்லாமிய, கிருத்துவ நண்பர்களுடன் இணைந்து பணியாற்றியதை விட, இந்து மத நண்பர்களுடன் தான்அதிகமாக இணைந்து பணியாற்றி இருக்கிறார் என்று தெரியும்.

மக்கள் விடுதலைக்கு, நலன்களுக்கு எதிரானது எனும் போது, அவர் நாத்திக மதமான புத்த மதம் உட்பட அனைத்து மதத்தினரையும் சாடவே செய்தார். ஆகவே அவர் இந்து மதத்தை மட்டும் ஓர வஞ்சனையாக எதிர்த்தார் என்று கூறுவது கடைந்தெடுத்த அயேக்கியத்தனம்.

மத நம்பிக்கையாளர்களுடன் சேர்ந்து பணியாற்றுவதன் மூலம் மக்கள் விடுதலைக்கும், நலன்களுக்கும் பங்களிக்க முடியும் என்றால், அந்த வாய்ப்பை அவர் தவற விட்டது இல்லை. இதில் இந்து மத நம்பிக்கையாளர்களுடன் சேர்ந்து பணியாற்றவில்லை என்று கூறுவது முழுக்க முழுக்கப் பொய்.

,இன்று நம் நாட்டில் இந்து மதத்தால் நடக்கும் இழிவுகள் அனைத்துக்கும் அடிப்படை எது? அனைத்து வகுப்பு மக்களிலும் திறமைசாலிகளும், திறமைக் குறைவானவர்களும் இருக்கையில், பார்ப்பனர்கள் மட்டுமே உயர்நிலை வேலைகளுக்குத் தேர்ந்து எடுக்கப்படும் நிலை உள்ளது. இதனால் திறமைக் குறைவான பார்ப்பனர்களும் உயர்நிலைகளில் அமர்ந்து கொண்டு நிர்வாகத்தை நாசப்படுத்திக் கொண்டு இருக்கின்றனர். இதனால் நாட்டிற்கு அளவு கடந்த இழப்பு ஏற்படுகிறது.

பார்ப்பனர்களில் உள்ள திறமைக் குறைவானவர்கள் உயர்நிலை வேலைகளைப் பெற்று விடுவதால், அவர்கள் செய்ய வேண்டிய கீழ் நிலை வேலைகளை ஒடுக்கப்பட்ட வகுப்பில் உள்ள திறமைசாலிகள் செய்ய வேண்டிய நிலை ஏற்படுகிறது. இதனால் மனித வளம் வீணாகிறது. இதுவும் நாட்டிற்குப் பெரும் இழப்பு ஆகும்.

இதைத் தவிர்த்து அனைத்து வகுப்புகளிலும் உள்ள திறமைசாலிகள் உயர்நிலை வேலைகளிலும், அனைத்து வகுப்புகளிலும் உள்ள திறமைக் குறைவானவர்கள் அடுத்த நிலை வேலைகளிலும் வேலை செய்யும் அமைப்பாக, பொதுப் போட்டி முறையை முற்றிலும் ஒழித்து விட்டு, விகிதாச்சாரப் பங்கீட்டு முறையைச் செயல் படுத்துவதற்கு, இந்துச் சகோரதரர்கள் அனைவரும் முன்வர வேண்டும். அப்படி முன் வருபவர்களுடன் பெரியாரியவாதிகள் நிச்சயமாக இணைந்து பணி புரிவார்கள். அப்பொழுது அவர்கள் இந்து மதத்தை மட்டுமே எதிர்க்கிறார்கள் என்ற குற்றச்சாட்டு கலப்படம் அற்ற பொய் என்று தெளிவாக விளங்கும்.

நீரில் நிலம் எரிகிறது: யாழ்ப்பாணத்தில் அதிசயம்

இலங்கை அரச பேரினவாதத்தின் ஊது குழல்களாகச் செயற்படும் தமிழ்த் தேசியக் கூட்டமைப்பிற்கு எதிரான அரசியலில் ஏற்பட்ட வெற்றிடத்தை, மக்களைச் சுரண்டி வயிற்றுப் பிழைப்பு நடத்துவதில் அக்கட்சிக்கு எந்த வகையிலும் குறைவற்ற விக்னேஸ்வரன் கும்பல் நிரப்பிக்கொள்ள முனைகிறது. இலங்கை பேரினவாதம் தின்ற தொலைத்த மண்ணை நீண்ட காலத்திற்கு பாலைவனமாக்கும் சுன்னாகம் பேரழிவு விக்னேஸ்வரனின் ஆட்சிக் காலத்திலேயே நடத்தப்பட்டது. அதன் பின்னணியில் செயற்பட்ட முன்னை நாள் அமைச்சர் ஐங்கரநேசன் எந்த வகையான தண்டனையுமின்றித் தப்பிக்கொண்டார். அதனை ஒழுங்கமைத்த நபர் அவுஸ்திரேலியாவிலிருந்து வரவழைக்கப்பட்டு விக்னேஸ்வரனின் அரவணைப்பில் வடமாகாணத்தை நடத்தி வருகிறார்.
இன்று சுன்னாகம் சூழவர வட மாகாண சபையினால் சிதைக்கப்பட்ட மண்ணையும் நீரையும் குறித்துப் பேசுவதற்குக்கூட மனிதர்கள் இல்லை. ஊழலைச் பேரம்பேசும் கருவியாகப் பயன்படுத்திக்கொண்டு அடுத்த தேர்தலுக்கு வாக்குப் பொறுக்க அரசியல் கழுகுகள் வட்டமிட ஆரம்பித்துவிட்டன. விமர்சனம் சுயவிமரசனம் போன்ற உயரிய மனித விழுமியங்களெல்லாம் மரண தண்டனைக்கு உட்படுத்தப்பட்ட சமூகமொன்றில் சுமந்திரனுக்கு எதிராக விக்னேஸ்வரன் கதாநாயகனாக்கப்பட்டிருக்கிறார். இன்னும் ஏமாற்றப்படும் மக்கள் மத்தியிலிருந்து புதிய ஜனநாயக முற்போக்கு இயக்கங்கள் தோன்றும் வரை விக்னேஸ்வரன்களும் சுமந்திரன்களும் வெட்டவெட்டத் தழைப்பார்கள்!

ஊழல் குற்றச்சாட்டு என்பது பேரம் பேசும் அரசியல் வியாபாரம் அல்ல : வைத்திய கலாநிதி முரளி வல்லிபுரநாதன்

மாகாண சபை அமைச்சர்களின் ஊழல் மீதான நடவடிக்கைகளை முதலமைச்சர் எடுக்கத் தொடங்கியதை தொடர்ந்து தமிழரசுக் கட்சியின் உறுப்பினர்கள் முதலமைச்சர் மீதும் அவருடைய திணைக்களம் மற்றும் அவருடன் நெருக்கமாயிருக்கும் நிமலன் கார்த்திகேயன் ஆகியோர் மீதும் ஊழல் குற்றச்சாட்டுகளை சுமத்தி வருகின்றனர். இந்த நிலையில் தமிழ் மக்கள் மத்தியில் பல கேள்விகள் எழுந்திருக்கின்றன. ஒரு சாரர் இந்தக் குற்றச்சாட்டுகள் முதலமைச்சரை பழி வாங்க புனைந்து கூறப்படுபவை என்று கருதுகிறார்கள். இன்னொரு சாரர் இந்தக் குற்றச்சாட்டுக்களில் உண்மைகள் இருப்பதாக கருதுகின்றனர். ஆனால் அனைவர் மத்தியிலும் இந்தக் குற்றச்சாட்டுக்கள் ஏன் இவ்வளவு தாமதமாக முதலமைச்சர் ஊழல் விசாரணையை ஆரம்பித்தபின் தான் வெளிவருகின்றன என்ற கேள்வி எழுந்திருக்கிறது. இன்னொரு விதமாக கூறுவது என்றால் தற்போது எழுந்துள்ள குற்றச்சாட்டுகள் எங்களுடைய ஊழலை நீங்கள் வெளிப்படுத்தினால் நாங்கள் உங்களுடைய ஊழலை வெளிப்படுத்துவோம் என்பது போல இருக்கிறது. இதற்கு வலு சேர்க்கும் விதமாக “தற்போதுள்ள பிரச்சினைகளுக்கு முதலமைச்சர் தீர்வு காணாவிட்டால் அவர் மீது ஊழல் குற்றச்சாட்டை இலஞ்ச ஆணைக்குழு ஊடாக மேற்கொள்வேன்” என்று பாராளுமன்ற உறுப்பினர் சிறிதரன் மிரட்டி இருப்பதாக ஊடகங்களில் செய்தி வந்து இருக்கிறது. இதன்படி (மாகாண சபை அமைச்சர்கள் மீது சுமத்தப்பட்டுள்ள ஊழல்) பிரச்சினைகளுக்கு தீர்வு கண்டுவிட்டால் முதலமைச்சரின் ஊழலை பாராளுமன்ற உறுப்பினர் கண்டுகொள்ளமாட்டார் என்று கருத வேண்டியுள்ளது. மேலும் குற்றம் நிருபிக்கப்பட்டு பதவி விலகிய அமைச்சர்களின் மீதான மேலதிக நடவடிக்கை பற்றி இதுவரை கூட்டமைப்பு, தமிழரசுக் கட்சி தலைவர்களும் முதலமைச்சரும் எதுவும் பேசாது வாய் மூடி மௌனிகளாக இருப்பது முன்னாள் அமைச்சர்களின் ஊழலில் இன்னும் பலரும் சம்பந்தப்பட்டு இருப்பார்களோ என்ற ஐயத்தை ஏற்படுத்தியுள்ளது.

முப்பது வருட கால போராட்டத்தின் பின்னர் பெரும்பாலான தமிழ் மக்கள் ஊழலில் ஈடுபடும் அரசியல்வாதிகளை கடுமையாக வெறுப்பதுடன் பொதுமக்களின் அபிவிருத்திக்கான நிதியை கையாடுபவர்கள் கடுமையாக தண்டிக்கப் பட வேண்டும் என்றும் அரசியலில் இருந்து முற்றாக ஒதுக்கப் படவேண்டும் என்றும் கருதுகிறார்கள். இந்த உணர்ச்சியே ஊழலுக்கு எதிரான விசாரணைகளை தடுக்கும் வகையில் நம்பிக்கை இல்லாத தீர்மானத்தை கொண்டுவர முயன்றவர்களுக்கு எதிராக மக்களை எழுச்சி கொள்ள வைத்தது. ஊழலுக்கு எதிரான இந்த தமிழ் மக்கள் எழுச்சியை தமிழ் தேசியத்துக்கான எழுச்சி என்று சிலர் காட்ட முயன்ற போதிலும் உண்மையில் ஊழலினால் வெறுப்புற்று இருக்கும் சிங்கள முஸ்லீம் மக்கள் மத்தியில் கூட வட மாகாண முதலமைச்சர் மீது ஊழலுக்கு எதிராக உறுதியான நடவடிக்கை எடுத்தவர் என்ற வகையில் ஆதரவு அதிகரித்து இருக்கிறது. ஆனால் குற்றம் நிருபிக்கப்பட்ட மாகாணசபை உறுப்பினர்கள் மீது எந்தவித ஒழுக்காற்று நடவடிக்கையையும் கூட்டமைப்பும் தமிழரசுக் கட்சியும் இதுவரை எடுக்காதது மக்களை ஏமாற்றத்துக்கு உள்ளாக்கி இருப்பதுடன் தமிழ்க் கட்சிகளின் மீது அவநம்பிக்கை கொள்ள வைத்து இருக்கிறது. குறைந்த பட்சம் குற்றம் நிரூபிக்கப்பட்டவர்கள் கூட்டமைப்பில் இருந்து நீக்கப்பட்டு மாகாண சபை உறுப்பினர் பதவியில் இருந்தும் நீக்கப்படுவார்கள் என்று பலரும் எதிர்பார்த்தார்கள். தன்னால் நியமிக்கப்படும் விசாரணைக்குழுவை ஏற்றுக் கொள்ள முடியாவிடின் ஊழல் குற்றச்சாட்டுக்களை நிதி மோசடி புலனாய்வு பிரிவிடம் (FCID) ஒப்படைப்பேன் என்று தெரிவிக்கும் முதலமைச்சர் ஏற்கெனவே குற்றம் நிருபிக்கப்பட்ட அமைச்சர்கள் மீது எடுக்கப் போகும் நீதி வழங்கும் நடவடிக்கையானது வெளிப்படையாகவும் விரைவாகவும் இருக்கவேண்டும் என்று நல்லாட்சியில் நம்பிக்கை கொண்ட அனைவரும் எதிர்பார்க்கிறார்கள்.

ஊழல் குற்றச்சாட்டுக்குள்ளான ஏனைய இரு அமைச்சர்களும் இந்தமுறை முதலமைச்சரின் மேலதிக விசாரணைகளை எதிர்கொள்ள மறுப்பு தெரிவிப்பதுடன் தமது ஆதரவாளர்களைக் கொண்ட தெரிவுக் குழு ஒன்றை அமைத்து கண்துடைப்பு விசாரணை ஒன்றை நடத்தக் கோரிஇருப்பது மக்களை வெறுப்பேற்றியுள்ளது. போதாக்குறைக்கு அமைச்சர் சத்தியலிங்கம் மக்களை ஏமாற்றி முழு முட்டாள்கள் ஆக்கும் வகையில் FCID இடம் தானாகவே ஆஜராகி தன்மீது சுமத்தப்பட்ட குற்றச்சாட்டுக்களை சமர்ப்பித்து விசாரணைக்கு உட்படுத்தி தன்னை சுற்றவாளியாக நிரூபிப்பேன் என்று கேலியாக கருத்து தெரிவித்து வருகிறார். இன்று வரை தமிழரசுக் கட்சியின் மூத்த தலைவர்கள் இந்த ஏமாற்று பிரச்சாரங்களை கண்டு கொள்ளாமல் இருப்பது ஊழல் விருட்சமாக வளர்ந்து எங்கும் கிளை பரப்பி நிற்பது போன்ற தோற்றத்தை ஏற்படுத்தியுள்ளது.

தற்போதைய சூழ்நிலையில் எதிர்கட்சித் தலைவர் இரா. சம்பந்தன் மற்றும் ஏனைய சிரேஷ்ட தமிழ் தலைவர்கள் மௌனத்தைக் கலைத்து கட்சி பேதமின்றி ஊழலுக்கு எதிராக உறுதியான நடவடிக்கை எடுக்கவேண்டும் என்று அனைவரும் எதிர்பார்க்கிறார்கள். தமிழரசுக் கட்சித் தலைவர்கள் கட்சியின் எதிர்காலத்தை தியாகம் செய்வதா அல்லது ஊழலில் ஈடுபட்ட தலைவர்களை தியாகம் செய்வதா என்ற சத்தியசோதனைக்கு உட்பட்டு இருக்கிறார்கள். இதேவேளை முதலமைச்சர் அல்லது அவரது திணைக்களத்தில் ஊழல் இடம் பெற்று இருந்தால் முதலமைச்சரின் அதிகாரத்துக்கு உட்பட்ட மாகாண சபையினால் அதை நீதியாக விசாரிக்க முடியாது. அத்தகைய சூழ்நிலையில் முதலமைச்சருக்கு கட்டுப்படாத ஒரு சுயாதீன விசாரணைக்குழு அமைக்கப்பட வேண்டும். தமிழரசுக் கட்சி உறுப்பினர்கள் முதலமைச்சர் மீது சுமத்தும் ஊழல் குற்றச்சாட்டுக்களில் உண்மை இருந்தால் அவருடைய அதிகாரத்துக்கு கட்டுப்படாத லஞ்ச ஊழல் ஆணைக் குழு அல்லது நிதி மோசடி புலனாய்வுப் பிரிவு அல்லது பாராளுமன்றத்தினால் அமைக்கப்பட்ட விசாரணைக்குழு அல்லது ஜனாதிபதி விசாரணைக்குழு போன்ற ஒரு அமைப்பில் நேர்மையாக முறைப்பாட்டை செய்து முதலமைச்சருக்கு எதிரான விசாரணையை ஏற்படுத்த வேண்டும். நீதிபதியான முதலமைச்சர் அத்தகைய குற்றச்சாட்டுகளை சூழ்ச்சி செய்யாமல் எதிர்கொள்வார் என்று நம்புகிறேன். அதை விடுத்து முதலமைச்சர் ஒரு ஊழல் குற்றச்சாட்டை வைத்தால் நாங்களும் பதிலுக்கு ஒரு குற்றச்சாட்டை வைப்போம் என்ற நாடகமும் முதலமைச்சர் அமைச்சர்கள் மீதான குற்றச்சாட்டுக்களை நிறுத்தினால் முதலமைச்சர் மீதான குற்றச்சாட்டுகளை நிறுத்துவோம் என்று பேரம் பேசுவதும் ஒட்டுமொத்த தமிழினத்தின் எதிர்காலத்தையும் கேள்விக்குறி ஆக்கியுள்ளது. தமிழர்களுக்கு அரசியல் தீர்வு கிடைத்தாலும் ஊழல் என்னும் நோய் சமூகத்தில் இருந்து அகற்றப்பட்டாலே உண்மையான சமூக அபிவிருத்தி எட்டப்படும். அதை விடுத்து தமிழ்நாட்டைப் போல் ஆட்சியாளர்கள் தங்களுக்கும் தங்களுடைய வாரிசுக்களுக்கும் மாத்திரம் சொத்து சேர்த்து அபிவிருத்தி செய்யும் நிலையை நோக்கி போய்க் கொண்டிருக்கிறோமா என்பதே இன்று தமிழ் மக்களின் பிரதான கவலையாக இருக்கிறது.

வைத்திய கலாநிதி முரளி வல்லிபுரநாதன்
03.07.2017

குழந்தையின் புத்திக்கூர்மைக்குத் தாயின் மரபணுவே ( X chromosome) காரணம்:வி.இ.குகநாதன்

Mother’s genes determine child’s intelligence

பொதுவாக ஒருவர் படிப்பிலோ அல்லது விளையாட்டுத்துறையிலோ ஒரு சாதனை செய்யும்போது இவர் இன்னாருடைய பிள்ளை தெரியுமா? என்று தந்தைக்கே அந்தப்பெருமை யினை அளிக்கிறோம். ஒரு பிள்ளை பெறும் வெற்றிக்கு தந்தையினைக் காரணமாக்கும் நமது சமூகம் , மறுபுறத்தில் பிள்ளையின் தோல்விக்கு அல்லது ஒழுங்கீன நடவடடிக்கைக்கு மட்டுமே தாயின் வளரப்பினைக் காரணம் கூறுகிறது. அண்மையில் வெளிவந்த “குற்றம்23” என்ற திரைப்படத்தில்கூட பிறக்கப்போகும் ஒரு குழந்தையின் திறனிற்குத் தந்தையின் விந்தணுக்களே காரணம் என்பதுபோல காட்சி அமைக்கப்பட்டிருக்கும். இவற்றுக்கு எல்லாம் காரணம் அறிவுத்திறன் தந்தையிடமிருந்தே குழந்தைக்கு கடத்தப்படுகிறது என்ற தவறான கருத்தேயாகும். இந்தக் கருத்தினை உடைக்கும் வகையில் அண்மையில் வாசிங்டன் பல்கலைக்கழகத்தின் (University of Washington) ஆய்வுமுடிவானது அமைந்துள்ளது.

இந்த ஆய்வு வெளிப்படுத்தும் முடிவு யாதெனில் தாயிடமிருந்து கடத்தப்படும் X-குரோமோசோம்களே குழந்தைகளின் அறிவுத்திறனுக்குக் காரணமாகவிருக்கிறது என்பதாகும். ஒரு குழந்தைக்கு தாயிடமிருந்து இரு X குரோமோசோம்களும், தந்தையிடமிருந்து ஒரு Xகுரோமோசோமும் ஒரு Y குரோமோசோமும் கடத்தப்படுகிறது. இதில் தாயிடமிருந்து கடத்தப்படும் Xகுரோசம்களே குழந்தையின் புத்திக்கூர்மைக்குக் காரணமாக அமைய, மறுபுறத்தில் தந்தையிடமிருந்து வரும் ஒருX குரோசம் எதுவித தாக்கத்தினையும் ஏற்படுத்துவதில்லை என்பது கண்டறியப்பட்டுள்ளது. ஆய்வுகூட மட்டத்தில் எலிகளை வைத்து முதலில் மேற்கொள்ளப்பட்டுவந்த இந்த ஆய்வு கிளாஸ்கோ (Glasgow ) வில் 12686 பேரினை சோதனைக்கு உட்படுத்தி முடிவுக்கு வந்துள்ளது. ஆய்வின்படி குழந்தையின் அறிவுத்திறனானது 40-60 வீதம்வரை தாயிடமிருந்து கடத்தப்பட மிகுதி குழந்தை வளருகின்ற சூழ்நிலையிலேயே தங்கியுள்ளது என முடிவாகியுள்ளது. எனவே குழந்தையின் அறிவுத்திறனிற்குத் தாயே காரணம் என்ற அறிவியற்கண்டுபிடிப்பனது காலகாலமாக எம்மிடையே இருந்துவந்த ஒரு ஆணாதிக்க சிந்தனையினை முடிவுக்கு கொண்டுவந்துள்ளது.

இந்த அறிவியற்சிந்தனைகள் இல்லாதபோதும் நமது தமிழர்கள் ஆதிகாலத்தில் தாய்வழிச் சமூகமாகவே இருந்திருக்கிறார்கள். தமிழர்களிற்கு மதம் பிடிப்பதற்கு முன் அன்னை வழிபாடாக கொற்றவை வழிபாட்டுமுறையே இயற்கையுடன் இணைந்ததாக இருந்திருக்கிறது. இப் பேரன்னை வழிபாட்டின் தலையாய மாந்திரீகர்களாக பெண்களே இருந்திருக்கிறார்கள், பின்பு ஆணாதிக்கமானது மதத்தின் துணையுடன் பெண்களை கருவறைக்குத் தீண்டத்தகாதவராக்கியது வரலாறு. பெண்களின் கருவளத்தினை அடிப்படையாகக்கொண்டு அக்காலத்தில் பெண்களே சக்திவாய்ந்தவர்களாக உலகெங்கும் மதிக்கப்பட்டார்கள். காலப்போக்கில் ஆணாதிக்கமானது இந்த நிலமையினை தலைகீழாக மாற்றியது. இத்தகைய பின்புலத்திலேயே இந்த “அறிவிற்கு ஆண்” என்ற தவறான கருத்துருவாக்கம் உருப்பெற்றது.

மேற்கூறிய ஆணாதிக்கசச்சிந்தனையினையே இந்த அறிவியற்கண்டுபிடிப்பு முறியடித்துள்ளது. என்றாலும் என்ன? இனிவருங்காலத்தில் குழந்தையின் வெற்றிகளின்போது மௌனமாகவிருந்துவிட்டு, தோல்விகளின்போது இந்த ஆய்வினையே ஆதாரமாகக்கொண்டு பழியினை தாய்மீது போட்டுவிடமாட்டமா என்ன?

ஊழல் குற்றச்சாட்டு நிருபிக்கப்பட்ட முன்னாள் அமைச்சர் திரு. ஐங்கரநேசனின் சவாலை ஏற்கத் தயார் : வைத்திய கலாநிதி முரளி வல்லிபுரநாதன்

நீதிபதிகள் குழுவினால் ஊழல் குற்றச்சாட்டுக்கள் நிருபிக்கப்பட்டு அமைச்சர் பதவியில் இருந்து விலகிய திரு.ஐங்கரநேசன் மறுபடியும் சுற்றவாளி போல நாடகமாடி விசாரணைக் குழுவின் அறிக்கை தொடர்பில் எனது பெயரையும் குறிப்பிட்டு நீதிமன்ற படியேறப்போவதாக தெரிவித்திருப்பது தொடர்ந்தும் தமிழ் மக்களை ஏமாற்றும் முயற்சி ஆகும். உண்மையில் விசாரணைக் குழுவை ஏற்றுக் கொள்ள முடியாது இருந்தால் ஆரம்பத்திலேயே விசாரணையில் பங்குபற்றாது அதை நிராகரித்து இருக்க வேண்டும் அல்லது குறைந்த பட்சம் எதிர்ப்புடன் தனது விளக்கத்தை (statement under protest) வழங்கி இருக்கவேண்டும்.

முதலில் விசாரணைக் குழுவை ஏற்றுக்கொண்டு தனது பசப்பு வார்த்தைகளினால் ஏமாற்ற முயன்று சாட்சியங்களினால் இவரது விளக்கங்கள் பச்சைப் பொய்கள் என்று நிரூபிக்கப்பட்ட நிலையில் தீர்ப்பு எதிராக வந்ததும் கேவலமான வார்த்தைகளினால் விசாரணைக் குழுவில் இருந்த மரியாதைக்குரிய நீதியரசர்களையும் ஏனைய உறுப்பினர்களையும் மாகாண சபையிலும் ஏனைய பொது இடங்களிலும் அவர்களை தனிப்பட்ட முறையில் திட்டுவதும் சோரம் போனவர்கள் என்று மிக கேவலமாக வர்ணிப்பதும் அநாகரிகமான செயல்கள் ஆகும். சுண்ணாகம் நீர் மாசடைதல் விடயத்தில் இவர் பல்தேசியக் கம்பெனியை காப்பாற்றுவதற்காக அதிகார துஷ்ப்பிரயோகத்தில் ஈடுபட்டு போலி நிபுணர் குழுவை அமைத்து பொய் அறிக்கையை வெளியிட்டு அந்தப் பகுதி மக்கள் தொடர்ந்தும் மாசடைந்த நீரை பருகுவதற்கும் அதன் மூலமாக தமிழினத்தை அழிப்பதற்கும் முயன்றது இப்போது தெளிவாக நிரூபிக்கப் பட்டுள்ளது. இந்த நிரூபணமான உண்மையை உறுதி படுத்துவதற்காக திரு ஐங்கரநேசனின் சவாலை ஏற்றுக் கொள்வதோடு ஏற்கெனவே மல்லாகம் நீதிமன்றில் நிலுவையில் உள்ள வழக்குக்கு முரண்படாத வகையில் எந்த நீதிமன்றத்திலும் சந்திப்பதற்கோ அல்லது தொலைக்காட்சியில் பகிரங்க விவாதத்துக்கோ தயாராக உள்ளேன் என்பதை இத்தால் அனைவருக்கும் அறியத் தருகிறேன்.

வட மாகாண சபை ஊழல் விவகாரத்தில் உண்மையான நீதி நிலைநாட்டப் படவேண்டுமானால் அமைச்சர் பதவியை தியாகம் செய்யும் கண்துடைப்புக்களை விடுத்து நேர்மையான வெளிப்படையான விசாரணையை நடாத்தி முறைகேடுகளையும், நிதி மோசடிகளையும் மக்களுக்கு வெளிப்படுத்தி மக்களின் அபிவிருத்திக்கான சூறையாடப்பட்ட நிதியை வசூலிப்பற்கான நடவடிக்கை எடுக்கப்பட வேண்டும். மேலும் அமைச்சுக்களின் கீழ் முறையாகக் கணக்குக்காட்டப்படாத ஆவணங்கள் பரிசீலனை செய்யப்படுவதுடன் தனி நபர்களின் வருமான மூலங்கள், சொத்துக்கள் பற்றிய விபரங்கள் விசாரணையில் உள்ளடக்கப்பட வேண்டும். மனு நீதி கண்ட சோழன் காலத்தில் பாதிக்கப்பட்ட பசுவுக்கே முறைப்பாடு செய்யக்கூடிய சந்தர்ப்பம் அளிக்கப்பட்டது போல் மாகாண சபை உறுப்பினர்களினால் கொண்டுவரப்பட்ட குற்றச் சாட்டுகளை மட்டும் விசாரிக்காமல் பாதிக்கப்பட்ட அப்பாவி பொதுமக்களும் முறைப்பாடு செய்யக்கூடிய பொறிமுறை வடமாகாண சபையில் ஏற்படுத்தப் படவேண்டும். திரு ஐங்கரநேசன் செய்த நிதி மோசடி மற்றும் ஊழல்கள் தொடர்பான விபரங்கள் நிதி மோசடி புலனாய்வுப் பிரிவினரிடம் (FCID ) ஒப்படைக்கப்படுவதோடு மாகாண சபை உறுப்பினர் பதவியில் இருந்தும் நீக்கப்பட்டு மோசடி செய்த நிதி மீள பெறப்பட்டு உரிய தண்டனையும் வழங்கப்படவேண்டும்.

மேலும் நல்லாட்சிக்கான அரசாங்கம் ஊழலை ஒழிப்பதற்காகவும் வெளிப்படைத் தன்மையை பேணுவதற்காகவும் பொது வாழ்வில் ஈடுபட்டுள்ள பாராளுமன்ற உறுப்பினர்கள் அனைவரும் தமது சொத்துக்களை கட்டாயமாக வெளிப்படுத்துவதற்கான முயற்சியில் ஈடுபட்டுள்ள இந்த வேளையில் நான் திரு ஐங்கரநேசனுக்கும் அவரது முன்னாள் அமைச்சரவை சாகாக்களுக்கும் ஒரு பதில் சவாலை விடுக்க விரும்புகிறேன். கடந்த 24 வருடங்களாக வைத்தியராகவும் வைத்திய நிபுணராகவும் எந்த சந்தர்ப்பத்திலும் கையூட்டு பெறாமலும் அதிகார துஷ்ப்பிரயோகத்தில் ஈடுபடாமலும் நேர்வழியில் அரசாங்க ஊதியம், விரிவுரையாளர் கொடுப்பனவு மற்றும் தனியார்துறையில் சேவை மூலமாக பெற்றுக் கொண்ட பணத்தில் நான் சேர்த்த எனது சொத்துக்களையும் சேமிப்புகளையும் வெளிப்படுத்த தயாராக உள்ளேன். அதுபோல் எனது சவாலை ஏற்று நீங்கள் நாலு பேரும் உண்மையில் ஊழலில் ஈடுபடாத சுற்றவாளிகள் என்றால் உங்களுடைய சொத்து விபரங்களை வெளியிட தயாரா ? வெளியிட முடியாவிட்டால் தமிழ் மக்களை தொடர்ந்தும் ஏமாற்றாமல் ஊழலில் ஈடுபட்டதை நேர்மையாக ஏற்றுக் கொண்டு மாகாண சபை உறுப்பினர் பதவியில் இருந்தும் பொது வாழ்க்கையில் இருந்தும் முற்றாக ஒதுங்கிக் கொள்ள வேண்டும்.

போர்க்குற்ற விசாரணை புஸ்வாணமானது : புலம்பெயர் குழுக்கள் பொறுப்புக்கூற வேண்டும்

உலகத்தின் சுவடுகளே தெரியாமல் அழிக்கப்பட்ட மிகச்சில போராட்டங்களுள் ஈழப் போராட்டம் பிரதானமானது. போர்க்குணமும் போராட்ட உணர்வுமற்ற ஒரு தனிமனதனும் எஞ்சியிராத இப் போராட்டத்தை 2009 ஆம் ஆண்டு வரை தனது பிடிக்குள் வைத்திருந்த விடுதலைப் புலிகள் இனப்படுகொலை ஒன்றின் ஊடாக அழிக்கப்பட்ட பின்னர், அதன் என்சிய பகுதிகளையும் புலம்பெயர் அமைப்புக்கள் அழித்துத் துவம்செட்ய்துவிட்டன. வன்னி இனப்படுகொலையின் பின்னர், போராட்டத்தை இலங்கைப் பேரினவாதிகள் ஊடாக அழித்துச் சிதைத்த ஏகாதிபத்தியங்களின் அடியாட்கள் மக்கள் மீது உளவியல் யுத்தம் ஒன்றைக் கட்டவிழ்த்துவிட்டனர். குறிப்பாக இலங்கை, இந்தியா மற்றும் புலம்பெயர் நாடுகளில் தமிழ்த் தேசிய முழக்கங்களை முன்வைத்த ஏகாதிபத்திய அடியாள் குழுக்களே இந்த உளவியல் யுத்த்ததின் ஏஜண்டுகளாகத் தொழிற்பட்டன.

‘முப்படைகளையும் கொண்டிருந்த தமிழீழ விடுதலைப் புலிகளே தோற்கடிக்கப்பட்டமையால் இனிமேல் ஏதாவது ஏகாதிபத்திய நாடுகளை வால் பிடித்துத் தான் விடுதலை பெற முடியும் என்றும், போராட்டம் சர்வதேச மயப்படுகிறது என்றும்’ இக் குழுக்கள் மக்களையும் எஞ்சியிருந்த போராளிகளை நம்பவைத்தன.

அமெரிக்கா, பிரித்தானியா இந்தியா போன்ற அழிப்பில் ஈடுபட்ட அதிகாரவர்க்கங்களையே நம்புமாறு கடந்த 9 வருடங்களாக மக்கள் மீண்டும் அமைப்பாக உருவாவதை சிதறடித்தன.

‘கடந்த காலப் போராட்டத்தின் தவறுகளிலிருந்து கற்றுக்கொண்டு நம்பிக்கையோடு முன் செல்வோம்’ என குர்திஸ்தான் போராட்டம் மீழ் எழுந்த வேளையில் முன்வைக்கப்பட்ட கருத்துக்கள் முற்றாக நிராகரிக்கப்பட்டன. கடந்த காலப் போராட்டம் விமர்சனத்திற்கு அப்பாற்பட்டது என்றும், புதிதாக எதுவுமில்லை என்றும் இனிமேல் ஏகாதிபத்திய நாடுகளைக் குறுக்கு வழிகளில் சார்ந்திருப்பதே சரியானது என்றும் மக்களை நம்பவைத்தன.

ஐக்கிய நாடுகள் மனித உரிமைப் பேரவையின் 34ம் அமர்வுகள் தற்போது ஜெனீவாவில் நடைபெற்று வருகின்றது. இந்த அமர்வுகளில் அமெரிக்கா, பிரித்தானியா உட்பட நாடுகள் இலங்கை தொடர்பிலான தீர்மானம் ஒன்றை சமர்ப்பிக்க உள்ளன.
போர்க்குற்றங்களுக்குப் பொறுப்பு கூறுதல் மற்றும் நல்லிணக்கத்தை ஏற்படுத்தல் உள்ளிட்ட முக்கிய பரிந்துரைகளை அமுல்படுத்துவதற்கு கால அவகாசம் வழங்கப்பட வேண்டுமென இத் தீர்மானம் முன்வைப்படவுள்ளது,

அதற்கு இலங்கை அனுசரணை வழங்கவுள்ளது.

புலம் பெயர் அமைப்புக்களும், தமிழ் வாக்குப் பொறுக்கிகளும் வலம் வந்த ஐ.நாவும் அதனை நடத்தும் ஏகபோக நாடுகளும் வன்னி இனப்படுகொலையின் போது நடைபெற்ற போர்க்குற்றங்களைக் கூட விசாரணைக்கு உட்படுத்தத் தயார் நிலையில் இல்லை.

மக்கள் இக் கால இடைவெளிக்குள் அமைப்புகளாக அணிதிரட்டபடவில்லை. புதிய போராட்ட அரசியல் முன்வைக்க்ப்படவில்லை. போராளிகளும் அவர்களின் எஞ்சியிருந்த போர்குணமும் அழிக்கப்பட்டுவிட்டன.
இன்னும் இரண்டு வருட கால அவகாசம் ஈழப் போராட்டத்தின் கடந்த காலத்தையே சுவடுகளே இல்லாமல் சிதைத்துவிடும்.

இவற்றிற்கெல்லாம், தமிழ்த் தலைமைகள், குறிப்பாக புலம்பெயர் தலைமைகள் நாளைய சந்ததிக்குப் பொறுப்புக்கூறவேண்டும்.

சிறு பொறி மட்டுமே! பெரு நெருப்பு அல்ல!! : இராமியா

சட்டம் எவ்வளவு நல்லதாக இருந்தாலும், அதை நடைமுறைப் படுத்துபவர்கள் மோசமானவர்களாக இருந்தால், மக்களுக்கு எவ்விதப் பயனும் கிடைக்காது. சட்டம் எவ்வளவு மோசமானதாக இருந்தாலும், அதை நடைமுறைப் படுத்துபவர்கள் நல்லவர்களாக இருந்தால், மக்களுக்கு ஓரளவுக்குப் பயன் இருக்கும் என்று மேதை அம்பேத்கர் கூறினார்.

விவசாய, நகர்ப்புற நில உச்ச வரம்புச் சட்டங்கள் மிகவும் நல்லவை. ஆனால் அதன் செயலாக்கம் முதலாளித்துவ, நிலப்பிரபுத்துவ அதிகாரிகளிடம், அரசியல்வாதிகளிடம் இருந்ததால் மக்களுக்கு எவ்விதப் பயனும் இல்லாமல் போயவிட்டது.

வாஜ்பாய் தலைமை அமைச்சராக இருந்த பொழுது “அனைவருக்கும் கல்வி” எனும் திட்டத்தை மிகவும் ஆடம்பரமாக அறிவித்தார். ஆனால் அதற்கு ஒதுக்கப்பட்ட நிதியைக் காவிக் கும்பலினர் பழங்குடி மக்கள் வாழும் பகுதிகளில், கோவில்களில் பஜனப் பாடல்களைப் பாடுவதற்கும், சுண்டல் விநியோகிப்பதற்கும் செலவழித்தனர். ஆனால் காமராசர் எந்தவித ஆடம்பரமும் இல்லாமல் கிராமப்புறங்களில் பள்ளிகளைத் திறந்தார்; கல்வியை அளித்தார். மோசமான முதலாளித்துவ, பார்ப்பன ஆதிக்கச் சட்டங்களின் கீழ், கடுமையான நிதிப் பற்றாக் குறையிலும் காமராசரால் கல்வியை அளிக்க முடிந்தது.

இன்றைய நிகழ்வுகள் சட்டங்கள் மோசமானவையாக இருந்தால் அவற்றை நடைமுறைப்படுத்தும் நல்லவர்கள் இடம் பெற முடியாமல் போய்விடும் என்று மெய்ப்பித்துக் கொண்டு இருக்கின்றன.

சுற்றுச் சூழல் கேடும், புவி வெப்ப உயர்வும் முதலாளித்துவ உற்பத்தி முறை தொடர்ந்தால், உலகம் அழிந்துவிடும் என்று அச்சுறுத்திக் கொண்டு இருக்கின்றன. அதன் விளைவுகளால் உலக மக்களிடையே அமைதியின்மையும், தீவிரவாதமும் வளர்ந்து வருகின்றன. ஆகவே முதலாளித்துவ முறைக்குக் கடிவாளம் போட வேண்டும் என்று போப் ஆண்டவரும், அமெரிக்க அதிபர் பதவிக்கு ஜனநாயகக் கட்சியின் சார்பில் போட்டியிட முயன்ற பெர்னி சாண்டெர்சும் (Bernie Sanders) உரக்கச் சொன்னார்கள், ஆனால் அமெரிக்க அரசியல்வாதிகள் போப் ஆண்டவர் மதம் தொடர்பான வேலைகளை மட்டும் செய்தால் போதும் என்று கூறி விட்டனர். பெர்னி சாண்டெர்சைப் பொறுத்த மட்டில் அவர் வேட்பாளாகக் கூடத் தேர்ந்தெடுக்கப் படவில்லை. அது மட்டும் அல்ல; புவி வெப்பம் உயரவில்லை என்று பச்சைப் பொய்யைக் கூச்ச நாச்சம் இல்லாமல் கூறும் டொனால்ட் டிரம்ப் அதிபராகத் தேர்ந்தெடுக்கப்ட்டு இருக்கிறார். இப்பொழுது அமெரிக்க மக்கள் அவரை எதிர்த்து அமைதி வழியில் போராடிக் கொண்டு இருக்கின்றனர்.

உலக நிகழ்வுகள் ஒரு புறம் இருக்கட்டும். நம் தமிழ் நாட்டு நிகழ்வுகளைப் பார்ப்போம். முதல்வர் ஜெயலலிதாவின் மறைவுக்குப் பிறகு பல பரபரப்பான நிகழ்வுகள் நடந்து உள்ளன. சசிகலா முதல்வர் ஆவதற்கு முயன்றார். ஆனால் சொத்துக் குவிப்பு வழக்கில் தண்டனை பெற்றதால், எடப்பாடி பழனிச்சாமியை அப்பதவிக்கு நியமித்தார், அ.இ.அ.தி.மு.க.வைச் சேர்ந்த சட்ட மன்ற உறுப்பினர்களைக் கூவத்தூர் சொகுசு விடுதியில் சிறை வைத்து, அவர்களை அப்படியே குண்டுக் கட்டாகத் தூக்கிக் கொண்டு போய் அவர்களுக்கு ஆதரவாக வாக்களிக்க வைத்தார். தமிழக மக்கள் அனைவரும் இதற்கு எதிராகக் கொந்தளித்து நின்ற போதிலும், மக்களின் விருப்பத்திற்கு எதிராக இச்செயல் வெற்றிகரமாக நிறைவேற்றப் பட்டது.

இந்நிகழ்வுக்கு முன் மாணவர்களும், இளைஞர்களும் மெரினா கடற்கரையில் குழுமி ஏறு தழுவல் விளைாயட்டை அனுமதிக்க வேண்டும் என்று போராடி, உச்ச நீதிமன்றம், மத்திய அரசு, மாநில அரசு என அனைத்து அரசுப் பொறியமைவுகளையும் வென்றதைச் சுட்டிக் காட்டி, இதே போல் மக்களின் முழுமையான எதிர்ப்பை மீறி அமைந்த அரசையும் எதிர்த்துப் போராட வேண்டும் என்று மிகப் பெரும்பான்மையான மக்கள் சமூக வலைத்தளங்களில் குரல் கொடுத்தனர். ஏறு தழுவல் போராட்டம் போல், இப்போராட்டம் சென்னையில் மட்டும் அல்லாமல் தமிழ்நாடு முழுவதும் நடத்தப்பட வேண்டும் என்றும் அறைகூவல் விடுத்தார்கள்.

ஆனால் இப்போராட்டம் தொடங்கப்படவே இல்லை. ஏறு தழுவல் போராட்டத்தில் வெளிப்பட்ட வீரம், மக்கள் எதிர்ப்பு அரசுக்கு எதிரான போராட்டத்தில் வெளிப்பட முடியாமல் போனதற்குக் காரணங்கள் யாவை?

ஏறு தழுவல் போராட்டத்தில் வெளிப்பட்ட மக்களின் ஆற்றல் மகத்தானது என்று கூறிக் கொண்டாலும், அது ஒரு சிறு பொறியே ஒழிய பெரு நெருப்பு அல்ல. ஒரு முறை ஊதினாலேயே அவிந்து விடும் அளவிற்கு வலிமைக் குறைவானது. அப்படி என்றால் உச்ச நீதிமன்றம், மத்திய அரசு போன்ற வலிமை மிக்க அரசுப் பொறியமைவுகள் எப்படிப் பணிந்தன? உண்மையில் ஏறு தழுவல் விளையாட்டு நடப்பதைப் பற்றியோ, நடக்காமல் போவதைப் பற்றியோ அரசுக்கு எந்த விதமான அக்கறையும் கிடையாது. அவர்களைப் பொறுத்த மட்டில் பார்ப்பன ஆதிக்கத்தையும், முதலாளித்துவப் பொருளாதார முறையையும் பாதுகாக்க வேண்டும் என்பதில் மட்டும் தான் அக்கறை. அந்த விஷயங்களைப் பற்றி விவாதம் கூட வந்து விடக் கூடாது என்பதற்காகத் தான் மற்ற விஷயங்களில் நம்மை அழுத்துகிறார்கள்.

இவர்களுடைய அழுத்தத்தை மீறி, அனைத்து வகுப்பு மக்களிலும் அனைத்து நிலையிலும் அறிவும் திறனும் உடையவர்கள் இருப்பதால், கல்வி, வேலை வாய்ப்பு, சமூக, பொருளாதார நடவடிக்கைகளில், அனைத்து நிலைகளிலும் அனைத்து வகுப்பு மக்களும் இடம் பெறும் விதமாக, விகிதாச்சாரப் பங்கீடு முறை வேண்டும் என்று போராடிப் பாருங்கள். மேலும் சுற்றுச் சூழல் கேடும், புவி வெப்ப உயர்வும் உலகை அழிவுப் பாதையில் கொண்டு செல்வதைச் சுட்டிக் காட்டி அதைத் தடுத்து உலகை மீட்டு எடுக்க, இலாபம் வருகிறது என்பதற்காகப் புவி வெப்பத்தை உயர்த்தும் பண்டங்களை உற்பத்தி செய்யக் கூடாது என்று போராடிப் பாருங்கள்.

அப்போராட்டத்தில் அரசாங்கங்களும் சரி! நீதிமன்றங்களும் சரி! பணியாது. அரசின் ஒவ்வொரு உறுப்பும் மிகவும் கோரமாக மக்களின் மேல் தாக்குதலைத் தொடுக்கும். ஏறு தழுவல் போராட்டத்தின் இறுதியில் தொடுக்கப்பட்ட தாக்குதல் ஒரு சிறு பொறி மட்டுமே என்று உணரும் அளவிற்கு அடக்குமுறை மிகப் பெரும் நெருப்பாக உருவெடுக்கும்.

ஏறு தழுவல் போராட்டத்தில் வெளிப்பட்ட மாணவர்களின், இளைஞர்களின் ஆற்றல் எந்த வித்திலும் போதாது. அது ஒரு சிறு பொறி மட்டுமே. பெரு நெருப்பு என்று சொல்லும் அளவிற்கு வெளிப்பட்டால் தான் பார்ப்பன ஆதிக்க, முதலாளித்துவ அரசை எதிர்கொள்ள முடியும்.