அணு சக்தி ஒப்பந்த நிறைவேற்றம் தாமதம் கவலையளிக்கிறது: அமெரிக்கா

இந்திய – அமெரிக்க அணு சக்தி ஒத்துழைப்பு ஒப்பந்தத்தை நிறைவேற்றுவதில் ஏற்பட்டுவரும் தாமதம் கவலையளிக்கிறது என்று கூறியுள்ள அமெரிக்கா, தாமதமாகும் ஒவ்வொரு நாளும் நிலைமையை சிக்கலாக்கிவிடும் என்று கூறியுள்ளது.வாஷிங்டனில் இன்று செய்தியாளர்களிடம் பேசிய அமெரிக்க அயலுறவுத் துறையின் பேச்சாளர் ஷான் மெக்கார்மாக், அணு சக்தி ஒப்பந்தத்தை நிறைவேற்றுதல் தொடர்பாக இந்திய அரசு மேற்கொண்டுவரும் ஒவ்வொரு முயற்சி குறித்தும் தங்களுக்கு தெரியப்படுத்தப்பட்டு வருவதாகக் கூறியுள்ளார்.

 

அணு சக்தி ஒத்துழைப்பை நடைமுடைப்படுத்திட வேண்டும் என்பதில் புதுடெல்லியுடன் தொடர்பில் இருந்து வருவதாகவும் கூறியுள்ள மெக்கார்மாக், அமெரிக்காவில் புதிதாக பதிவியேற்கப்போகும் அரசுதான் இதனை ஆராயப் போகிறது என்றாலும், அதற்கு முன்பு சர்வதேச அணு சக்தி முகமை மற்றும் அணு தொழில்நுட்ப விற்பனைக் குழு (என்.எஸ்.ஜி.) ஆகியன விவாதிக்க வேண்டியுள்ளது என்று கூறினார்.

இந்திய – அமெரிக்க அணு சக்தி ஒத்துழைப்பு ஒப்பந்தத்திற்கு ஆளும் கூட்டணியில் இடம்பெற்றுள்ள கட்சிகளிடமிருந்து ஒப்புதல் பெற்றுவிட்ட காங்கிரஸ் கட்சி, ஆட்சிக்கு வெளியில் இருந்து ஆதரவளித்துவரும் இடதுசாரிகளின் ஆதரவு கிடைக்காததால் சிக்கலில் உள்ளது.

தங்களுடைய எதிர்ப்பையும் மீறி ஒப்பந்தத்தை நிறைவேற்ற முற்பட்டால் ஆட்சிக்கு அளித்துவரும் ஆதரவை திரும்பப் பெறுவோம் என்று இடது கூட்டணி வெளிப்படையாக அறிவித்திருக்கும் நிலையில், வரும் 25ஆம் தேதி நடைபெறவுள்ள ஐக்கிய முற்போக்குக் கூட்டணி – இடதுசாரி கட்சிகளின் ஒருங்கிணைப்புக் குழுக் கூட்டத்தில் எடுக்கப்போகும் முடிவைப் பொறுத்து ஒப்பந்தம் நிறைவேறுமா அல்லது ஆட்சிக்காக ஒப்பந்தம் கிடப்பில் போடப்படுமா என்பது தெரிந்துவிடும்.

இந்திய அதிகாரிகள்-மகிந்த சந்திப்பு: இனப்பிரச்சனை?

இந்திய உயர்மட்ட அரச பிரதினிதிகள் குழுவொன்று கொழும்பிற்கு திடீர் விஜமொன்றை மேற்கொண்டுள்ளது. முன் கூட்டியே திட்டமிடப்படாத இத் திடீர் விஜயம் இந்திய தேசிய பாதுகாப்புச் சபையின் ஆலோசகர் எம்.கே.நாராயணன், பாதுகாப்பமைச்சர் விஜய் சிங், வெளிவிவகார அமைச்சர் ஷிவ் சக்கர் ஆகியோரை உள்ளடக்கியதாகும்.
மாத இறுதியில் நடை பெறும் சார்க் மாநாடு தொடர்பாகவே இவ் விஜயம் அமைந்த்தது என இந்தியத் தூதரகம் அறிவித்தாலும் இலங்கை அதிகாரிகள் பலதரப்பு பேச்சுக்கள்நடைபெறும் என அறிவித்துள்ளனர்.
சனி (21/06/2008) காலை இக்க்குழுவினர் ஜனாதிபதி மகிந்த ராஜபக்ஷவை சந்திக்கும் என உறுதியாகியுள்ளது.
புது டெல்லியிலிருந்து விஷேட விமானத்தில் இலங்கை நேரப்படி 11:30 இற்கு வந்திறங்கிய இம் மூவரும் இலங்கை பாதுகாப்பு அதிகாரிகளை ஏற்கனவே சந்தித்துப் பேச்சுக்கள்நடாத்தியுள்ளனர்.

மறுபடி நோர்வே களத்தில்: இலங்கை விவகாரம்

நோர்வேயின் உதவி வெளிநாட்டமைச்சர் ரேமொண்ட் ஜோன்சன் இலங்கையின் இறைமையையும் ஒருமைப்பாட்டையும் மதிப்பதாக தெரிவித்துள்ளார். விடுதலைப் புலிகளுக்கும் சிறீ லங்கா அரசிற்குமிடையிலான ஆறு சுற்றுப் பேச்சுவார்த்தைகளின் நடுவர்களாகச் செயற்பட்ட நோர்வே அமைச்சரது இவ்வறிக்கை பசில் ராஜபக்ஷ பேச்சுவார்ததைக்குப் பச்சைக் கொடி காட்டியிருக்கும் நேரத்தில் வெளியானதென்பது பலரது கவனத்தையும் ஈர்த்துள்ளது.

மீண்டும் பேச்சுவார்த்தை: பசில் ராஜபக்ஷ

விடுதலைப் புலிகளுடன் பேச்சு வார்த்தை நடத்த இலங்கை அரசு தயாராக உள்ளது என்று இலங்கை அதிபர் ராஜபக்ஷவின் சகோதரரும் அவரது ஆலோசகருமான பாசில் ராஜபக்ஷ கூறினார்.

பேச்சுவார்த்தைக்கு நாங்கள் எப்போதும் தயாராகவே உள்ளோம். ஆனால் பேச்சுவார்த்தை தொடங்குவதற்கு சாதகமான சூழலை ஏற்படுத்த வேண்டும் என்று அவர் வலியுறுத்தினார்.

விடுதலைப் புலிகள் ஆயுதங்களைக் கைவிடும்வரை மீண்டும் பேச்சுவார்த்தை என்ற பேச்சுக்கே இடமில்லை என்று அதிபர் ராஜபக்ஷ நிபந்தனை விதித்துள்ளது குறித்து கேட்டபோது, என்னென்ன நிபந்தனைகள் என்பது குறித்து ஆலோசித்து முடிவு செய்யப்படும் என்றார் பாசில்.

ஆனால் பேச்சுவார்த்தைக்கு தயார் என்று அதிபர் ஏற்கெனவே அறிவித்துவிட்டார். விடுதலைப் புலிகள் ஈழத் தமிழர்களின் பிரதிநிதிகள்தான் மறுக்கவில்லை. ஆனால் அவர்கள் மட்டுமே தமிழர்களின் ஒட்டுமொத்த பிரதிநிதிகள் என்பதை ஏற்க முடியாது. இது ஏற்கெனவே நிரூபிக்கப்பட்டுள்ளது. அதற்காக தமிழர்களிடம் விடுதலைப் புலிகளுக்கு ஆதரவே இல்லை. விடுதலைப் புலிகளுக்கு செல்வாக்கே இல்லை என்று நான் சொல்லவில்லை. அவர்களுக்கென்று குறிப்பிட்ட செல்வாக்கு உள்ளது என்றார் அவர். ஆனால் விடுதலைப் புலிகள் போக்கு ஏற்றுக்கொள்ளும்படி இல்லை. பேச்சுவார்த்தை மூலம் தீர்வு காணவே அரசு எப்போதும் விரும்புகிறது. இருப்பினும் தற்போதைய நிலையில் மீண்டும் போர் நிறுத்தம் அறிவிக்க வாய்ப்பில்லை என்று அவர் கூறினார். வெள்ளிக்கிழமையிலிருந்து போர் நிறுத்தத்தைக் கடைப்பிடிக்கப் போவதாக விடுதலைப் புலிகள் அறிவித்துள்ளனர். அரசு தரப்பில் இது ஏற்றுக்கொள்ளப்படுமா என்று கேட்டபோது, இது குறித்து முடிவு செய்ய காலஅவகாசம் தேவை என்றார் பாசில்.

ஒரு நாளில் இதை முடிவு செய்துவிட முடியாது. எல்லாவற்றையும் யோசித்து முடிவு செய்யப்பட வேண்டிய ஒன்று என்றும் அவர் கூறினார்.

விடுதலைப் புலிகளுடன் பேச்சுவார்த்தை நடத்தத் தயாராக இருக்கும் அதேவேளையில் மக்களின் தேவைகளைப் பூர்த்தி செய்ய வேண்டியது அரசின் கடமை. அதோடு பயங்கரவாதமும் ஒடுக்கப்பட வேண்டும் என்றும் அவர் கூறினார்.
-தினமணி நாளிதள் சென்னை

அகதிகள் போர்வையில் இந்தியாவுக்குள் ஊறு விளைவிப்போரை அனுமதிக்க முடியாது:கருணாநிதி

என்ற போர்வையில் இந்தியாவுக்குள் ஊடுருவி, இந்திய இறையாண்மைக்கு ஊறு விளைவிப்போரை அனுமதிக்க முடியாது. அவர்கள் மீது கடும் நடவடிக்கை எடுக்கப்படும் என்று தமிழக முதல்வர் மு.கருணாநிதி எச்சரித்துள்ளார்.

தீவிரவாத அமைப்புக்கள் தமிழ்நாட்டில் காலூன்ற எந்த வகையிலும் இடமளிக்காது, பாதுகாப்புப் படையினர் இரும்புக்கரம் கொண்டு அடக்க வேண்டும் என்றும் கூறினார். சென்னையில் மாவட்ட ஆட்சித் தலைவர்கள், காவல்துறை அதிகாரிகள் மத்தியில் இன்று உரையாற்றுகையிலேயே முதல்வர் கருணாநிதி இவ்வாறு தெரிவித்துள்ளார்.

சென்னை தலைமைச் செயலகத்தில் மாவட்ட அதிகாரிகள் மற்றும் பொலிஸ் அதிகாரிகள் ஆகியோர் கலந்துகொள்ளும் இரு நாள் மாநாடு இன்று காலை 9.30 மணிக்கு ஆரம்பமானது.

இந்த மாநாட்டுக்கு முதலமைச்சர் கருணாநிதி தலைமை தாங்கி உரையாற்றுகையில் மேலும் கூறியதாவது:

மக்களாட்சியில் நம்பிக்கையில்லாத சில தீவிரவாத அமைப்புகள் தீவிரவாதத்தைத் தமிழ்நாட்டில் வேரூன்ற வைத்து அமைதியைக் குலைக்க முயல்வதாகத் தெரிகிறது. இத்தகைய தீவிரவாத அமைப்புகள் தமிழகத்தில் காலூன்ற எவ்வகையிலும் இடம்கொடுத்திடாமல் காவல்துறை இதனை இரும்புக்கரம் கொண்டு ஒடுக்கிட வேண்டும். கடந்த பல ஆண்டுகளாக இலங்கையில் நிலவிவரும் இனக்கலவரம் காரணமாக தமிழ்நாட்டிற்கு இலங்கைத் தமிழர்கள் அகதிகளாக வரும் நிலை தொடர்கிறது. 31.05.2008 அன்றைய நிலவரப்படி தமிழ்நாட்டிலுள்ள 117 இலங்கை அகதிகள் முகாம்களில் 73 ஆயிரத்து 433 இலங்கைத் தமிழர்கள் அகதிகளாகத் தங்கியுள்ளனர்.

அகதிகளாக வாழும் இலங்கைத் தமிழர்களில் சிலர் பல்வேறு ஆவணங்களைச் சட்டத்திற்கெதிரான வழிகள் மூலம் பெற்று தமிழகத்தில் சொத்து வாங்குவதில் ஈடுபடுவதாகத் தகவல்கள் அரசின் கவனத்திற்கு வந்துள்ளன. இவற்றை பரிசீலித்து இந்தியக்குடி மகனாக அல்லாதவர் இவ்வுரிமைகளைப் பெற வழியில்லை என்பதை நீங்கள் உறுதி செய்திட வேண்டும்

இலங்கை இனப்பிரச்சினையால் இந்தியாவுக்கு பாதிப்பு – மன்மோகன் சிங்

இலங்கை இனப்பிரச்சினையின் தாக்கம் தீவிரம் அடைந்துள்ளதன் மூலம் இந்தியாவுக்கு பாரிய பிரச்சினை ஏற்பட்டுள்ளதாக இந்திய பிரதம மந்திரி மன்மோகன் சிங் தெரிவித்துள்ளார். புது டில்லியில் நிகழ்வொன்றில் பங்கேற்ற அவர் இலங்கையில் இனப்பிரச்சினை தீவிரம் அடையும்போது அதிகளவான அகதிகள் இந்தியாவுக்கு வருகை தருவதாக குறிப்பிட்டார். எனவே, இந்தியாவுக்கு பிரச்சினையை ஏற்படுத்தியுள்ளதாக அவர் தெரிவித்தார்.

இனப்பிரச்சினையை பொறுத்தவரையில் அது இலங்கையின் உள்நாட்டுப் பிரச்சினையாக உள்ளது. மறுபுறத்தில் அது இந்தியாவின் வெளிநாட்டு கொள்கையுடன் சம்பந்தப்பட்ட பிரச்சினையாக உள்ளது என இந்திய பிரதமர் குறிப்பிட்டார். இந்திய அயல்நாடுகளான பாக்கிஸ்தான், பங்களாதே, நேபாளம் மற்றும் சீனா ஆகிய நாடுகளுடனான உறவுகளை பேணிவருகின்றது. எனினும், இதன்போது தமது தேசிய வாதத்தை பாதுகாக்கும் நடவடிக்கைகளில் இந்தியா அவதானமாக இருந்து வருவதாக மன்மோகன் சிங் தெரிவித்தார்.

இதேவேளை, அயல்நாடுகள் தம்மை பலப்படுத்திக் கொள்ள வேண்டும் என்பதை இந்தியா விரும்புகிறது. ஏனெனில், குறித்த நாடுகளின் பிரச்சினை இறுதியில் இந்தியாவின் பிரச்சினையாக மாறுவதாக இந்திய பிரதம மந்திரி சுட்டிக்காட்டினார்.

இலங்கையின் உள்விவகாரங்களில் இந்தியா அநாவசியமாக தலையிடாது – அமைச்சர் போகொல்லாகம

இலங்கையின் உள்விவகாரங்களில் இந்திய அரசாங்கம் அநாவசியமாக தலையிடாது என வெளிவிவகார அமைச்சர் ரோஹித போகொல்லாகம நம்பிக்கை வெளியிட்டுள்ளார். இந்தியா இலங்கை தொடர்பான தனது கொள்கையை மாற்றி விரைவில் இனப்பிரச்சினையில் தலையிடும் என்று தாம் நம்புவதாக விடுதலைப் புலிகளின் முக்கியஸ்தர் ஒருவர் கருத்து வெளியிட்டுள்ள நிலையிலேயே அமைச்சர் போகொல்லாகம இவ்வாறு கூறியுள்ளார்.

அடுத்த மாதம் இறுதியில் கொழும்பில் ஆரம்பமாகவுள்ள சார்க் மாநாட்டில் கலந்து கொள்வதற்கு இந்திய பிரதமர் மன்மோகன் சிங்கிற்கு உத்தியோகபூர்வ அழைப்பிதழை வழங்குவதற்காக புதுடில்லி சென்றுள்ள வெளிவிவகார அமைச்சர் ரோஹித போகொல்லாகம இந்திய ஊடகமொன்றிற்கு கருத்து தெரிவிக்கையிலேயே இவ்வாறு தெரிவித்துள்ளார்.

அதில் அவர் மேலும் கூறியுள்ளதாவது:

விடுதலைப் புலிகளின் செல்வாக்கு சரிந்து வருகின்றது. அவர்கள் வசமுள்ள பகுதிகளும் வேகமாக சுருங்கிவருகின்றன. எனினும் இனப்பிரச்சினைக்கு இராணுவ ரீதியில் தீர்வுகாண முடியாது. இனப்பிரச்சினைக்கான இறுதித் தீர்வு அரசியல் ரீதியிலேயே அமையும். நாட்டில் பயங்கரவாதத்துக்கு எவ்வித இடமும் வழங்காமல் அனைத்து தரப்பினராலும் ஏற்றுக்கொள்ளக்கூடிய தீர்வு காணமுடியும். இலங்கையின் உள்விவகாரத்தில் இந்தியா அநாவசியமாக தலையிடாது என நாம் உறுதியாக நம்புகின்றோம். அதற்கான எந்த அவசியமும் ஏற்படவில்லை.

சர்வகட்சி பாதுகாப்பு சபையினை அமைப்பதற்கு ஜனாதிபதி இணக்கம்

பாதுகாப்பு சபையை அமை ப்பதற்கான ஆரம்பகட்ட நடவடிக்கைகளை அடுத்த வாரம் மேற்கொள்வதாக ஜனாதிபதி மஹிந்த ராஜபக்ஷ உறுதியளித்துள்ளார்.

தேசிய சுதந்திர முன்னணியின் பிரதிநிதிகள் திங்கட்கிழமை அலரி மாளிகையில் ஜனாதிபதியை சந்தித்து பேச்சுவார்த்தைகளை நடத்தியபோதே இந்த உறுதிமொழி வழங்கப்பட்டதாக தெரிவிக்கப்படுகிறது.

இப்பேச்சுவார்த்தைகள் தொடர்பாக தேசிய சுதந்திர முன்னணியினர் தெரிவிக்கையில்,

ஜனாதிபதியுடனான சந்திப்பின் முன்னணியில் தலைவரும் எம்.பி. யுமான விமல் வீரவன்ச, பொதுச் செயலாளரும் எம்.பி.யுமான நந்த குணதிலக, தேசிய அமைப்பாளர் கமல் தேசப்பிரிய மற்றும் எம்.பி. க்களான பியசிறி விஜேநாயக, அச்சல சுரங்க ????? ஆகியோர் கலந்து கொண்டுள்ளனர். இப்பேச்சுக்களில் ஜனாதிபதி மட்டுமே கலந்துகொண்டுள்ளார்.

இதன்போது கருத்து தெரிவித்துள்ள விமல் வீரவன்ச எம்.பி. விடுதலைப்புலிகள் தென் பகுதிக்கு கொண்டு வந்த குண்டுகள் அனைத்தும் வெடிக்க வைக்கப்படவில்லை. எனவே எதிர்காலத்தில் சிவிலியன்களை இலக்கு வைத்து அதிபயங்கரமான தாக்குதல்கள் நடத்தப்படலாம்.

எனவே தேசிய பாதுகாப்பு மக்களின் பாதுகாப்பு தொடர்பாக அதிகளவில் கவனம் செலுத்த வேண்டும்.

படையினரின் தாக்குதல்களால் தோல்வியை கண்டு வரும் புலிகள் தென் பகுதியில் தாக்குதல்களை நடத்தி சிவிலியன்களை கெõலை செய்து அதன் மூலம் அரசாங்கத்தின் மீது பேச்சுவார்த்தைக்கான அழுத்தத்தை மக்கள் மத்தியிலிருந்து ஏற்படுத்தவும் ஏ9 பாதைக்கு மாற்றீடாக படையினர் மாற்றுப் பாதையை பயன்படுத்தி மேற்கொள்ளப் போகும் தாக்குதல்களை தடுக்கவும் தென் பகுதியில் மக்கள் மத்தியில் ஆத்திரத்தை ஏற்படுத்தி அப்பாவித் தமிழ் மக்கள் மீது வன்முறைகளை கட்டவிழ்த்து விட்டு அதனை சர்வதேச தலையீடுகளுக்கு பயன்படுத்துவது போன்ற முக்கிய விடயங்களை முன்வைத்தே தென்பகுதியில் புலிகள் சிவிலியன்கள் மீது தாக்குதல்களை நடத்துகின்றனர்.

எனவே எதிர்காலத்தில் மக்கள் அழிவுகளை தடுப்பதற்கு நடவடிக்கைகள் எடுக்கப்படவேண்டும்.

அதற்காக சர்வகட்சி பாதுகாப்புச் சபை அமைக்கப்பட வேண்டியது அவசியம் என்றார்.

இது தொடர்பாக இரண்டு மணிநேரம் ஆராய்ந்ததோடு ஜனாதிபதி சர்வகட்சி பிரதிநிதிகளை சந்திப்பதற்கும் இச்சபையை அமைப்பதற்கும் இணக்கம் தெரிவித்துள்ளார்.

இதன் ஆரம்பகட்டமாக அடுத்த வாரம் தனித்தனியாக அரசியல் கட்சிகளை சந்தித்து பேச்சு நடத்தவும் ஜனாதிபதி உறுதியளித்துள்ளார் என்று சுட்டிக்காட்டினார்