ஒரு வருடமாக வவுனியா மத்திய பேருந்து நிலையத்தை இயங்கவிடாது தடுக்கும் இலங்கை போக்குவரத்துச் சங்க ஊழியர்கள்!

வவுனியாவில் 195 மில்லியன் ரூபாவில் புதிதாக அமைக்கப்பட்ட மத்திய பேருந்து நிலையம் கடந்த ஒரு வருடமாக இயங்க முடியாத நிலையில் உள்ளது. இதற்கு இலங்கைப் போக்குவரத்துச் சங்கப் பேருந்துகள் இப்பேருந்து நிலையத்திற்குச் செல்ல மறுத்துவருகின்றமையே பிரதான காரணமாக உள்ளது.

வவுனியாவில் மத்திய கடைத் தொகுதிகளுக்குள் நீண்டகாலமாக இலங்கை போக்குவரத்துச் சபையின் பேருந்து நிலையம் இயங்கிவந்தது. அதேநேரம் தனியார் பேருந்து நிலையங்கள் வீதியோரத்திலேயே இயங்கி வந்தன.

இந்நிலையில், வவுனியா நகரத்தை அபிவிருத்தி செய்வதற்கு பேருந்து நிலையமொன்று அவசியம் என பலதரப்பட்டவர்களாலும் கோரிக்கைகள் விடுக்கப்பட்ட நிலையில் 195 மில்லியன் ரூபா செலவில் வடமாகாண சபையினால் இப்பேருந்து மத்திய நிலையம் அமைக்கப்பட்டது.

இது கடந்த வருடம் திறக்கப்பட்டாலும், இப்பேருந்து நிலையத்துக்குள் வடமாகாண இலங்கைப் போக்குவரத்துச் சங்கத்தினர் செல்வதற்கு மறுத்து வருவதுடன், பல பணிப்புறக்கணிப்புப் போராட்டங்களிலும் ஈடுபட்டு வந்தனர்.

இந்நிலையிலேயே, குறித்த பிரச்சனை தொடர்பாக நீதிமன்றத்திலும் வழக்குத் தாக்கல் செய்யப்பட்டு விசாரணைகள் இடம்பெற்று வரும் நிலையில், நாளைக்குள் சம்பந்தப்பட்ட அனைத்துத் தரப்பினருடனும் பேசி ஒரு முடிவுக்கு வருமாறு வடமாகாண முதலமைச்சர் சி.வி.விக்னேஸ்வரனுக்கு நீதிமன்றம் அறிவித்திருந்தது.

இதனையடுத்து முதலமைச்சருக்கும் சம்பந்தப்பட்ட தரப்பினருக்குமிடையில் இடம்பெற்ற பேச்சுவார்த்தையை அடுத்து அனைத்து பேருந்து சேவைகளையும் புதிய பேருந்து நிலையத்திலிருந்து இயங்குமாநு அறிவுறுத்தல் விடுக்கப்பட்டது.

முதலமைச்சரின் இந்த உத்தரவையடுத்து, நேற்று பழைய பேருந்து நிலையத்திற்கு வாயிற் தடை போடப்பட்டது. இதனால், வடமாகாண இலங்கைப் போக்குவரத்துச் சபையினர் தொடர் பணிப்புறக்கணிப்பில் ஈடுபட்டு வருகின்றனர். இவர்களுக்கு ஆதரவாக பழைய பேருந்து நிலைய கடை உரிமையாளர்களும் தமது வியாபாரம் வீழ்ச்சியடைந்துள்ளதாகவும் கடையடைப்புப் போராட்டத்தில் ஈடுபட்டுள்ளனர்.

அனைத்துப் பேருந்துகளும் தரிப்பதற்கென மக்களால்தான் ஒரு பொதுவான மத்திய நிலையம் கோரப்பட்டது. இந்நிலையில் புதிய மத்திய நிலையத்தில் இலங்கை போக்குவரத்துச் சபை சேவையில் ஈடுபடப்போவதில்லையென அறிவித்து பல போராட்டங்களை முன்னெடுத்து வருகின்றனர். இவர்களின் பின்னணியில் இருப்பவர்கள் யார்? இதனால் இவர்களுக்கு என்ன ஆதாயம்? இதனால் தமது போக்குவரத்தின்மூலம் பெறப்படும் வருமானம் குறைவடையும் என்ற அச்சம் காரணமாக அரசாங்கமே, இவர்களைத் தூண்டி விடுகின்றதா என்ற சந்தேகமும் உருவாகியுள்ளது.

சாப்பாட்டிற்குப் பதிலாக காப்புறுதித் திட்டம் – அரசாங்கம்!

இந்த வருடம் ஒக்ரோபர் மாதத்திலிருந்து இலங்கையில் கல்வி கற்கும் அனைத்துப் பாடசாலை மாணவர்களுக்கும்  காப்புறுதித்திட்டத்தினை நடைமுறைப்படுத்தப்போவதாக  அரசாங்கம்  அறிவித்திருந்தது.

இதற்காக, வரவு செலவுத் திட்டம் மீதான வாசிப்பின்போது, 2700 மில்லியன் ரூபா ஒதுக்கப்பட்டுள்ளதாகவும், அரசாங்கம் மற்றும் தனியார் பாடசாலைகளில் கல்வி கற்கும் 45 இலட்சம் மாணவர்களுக்கும் இக்காப்புறுதி வழங்கப்படும் என கல்வி இராஜாங்க அமைச்சர் அகிலவிராஜ் காரியவசம் தெரிவித்திருந்தார்.

இலங்கையில் அரசாங்கத்தினால் இலவச கல்வி, இலவச சீருடை மற்றும் இலவச உணவு வழங்கப்பட்டு வந்தது.

இந்நிலையில், 2018ஆம் ஆண்டு பாடசாலைகளிலிருந்து உணவுகள் வழங்கப்படமாட்டாது என பாடாசலை மாணவர்களுக்கு தெரிவிக்கப்பட்டுள்ளது.

இலங்கையைப் பொறுத்தமட்டில் குறிப்பாக வடக்குக் கிழக்கில் யுத்தம் இடம்பெற்றதால் மக்கள் மிகவும் மோசமாகப் பாதிக்கப்பட்டுள்ளனர். இலங்கையில் இம்மாவட்டங்களில் பெரும்பாலான மக்கள் வறுமைக்கோட்டுக்குள்ளேயே வாழ்ந்து வருகின்றனர்.

அத்துடன், பெரும் எண்ணிக்கையிலான மாணவர்களுக்கு வீட்டில் ஒழுங்கான உணவு வழங்கப்படுவதில்லை. சில மாணவர்களுக்கு வீட்டில் உண்பதற்கு உணவிருக்காது.

இவ்வாறான நிலையில், பாடசாலைகளில் வழங்கப்படும் இலவச உணவானது நிறுத்தப்பட்டு அதற்காக அரசாங்கத்தினால் ஒதுக்கப்பட்ட நிதியே காப்புறுதித் திட்டமாக  மாணவர்களுக்கு அறிமுகப்படுத்தப்பட்டுள்ளது.

ஒரு மனிதனுக்கு அத்தியாவசியமான உணவை நிறுத்தி, மாணவர்கள் நோயாளியாகும் பட்சத்தில் அவர்களுக்கான வைத்தியச் செலவுக்காகவே இத்திட்டத்தை அறிமுகப்படுத்தியதாக அரசாங்கம் தெரிவிக்கின்றது.

உயிர்வாழ அவசியமான உணவையே நிறுத்தி காப்புறுதித் திட்டம் வழங்கும் அரசாங்கத்தின் முட்டாள்தனமான முடிவால் பெருமளவு பாடசாலை மாணவர்கள் பாதிப்படைவார்கள் என்பதை மறுக்கமுடியாது.

அத்துடன், மாணவர்களை அரசாங்கமே நோயாளிகளாக்கி, அதில் ஆதாயம் பெறுகின்றது. இலவசம் என்ற பெயரில், பெரியதொரு கொள்ளையை அரசாங்கம் மேற்கொள்கின்றது என்பதே நிதர்சனமான உண்மை.

மக்கள் தொண்டர்களுக்கு விசேட அதிரடிப்படையினரின் பாதுகாப்பு!

பெரும்பான்மை இனத்தைச் சேர்ந்த மக்கள் பிரதிநிதிகளுக்கு விடுதலைப்புலிகளின் அச்சுறுத்தல் உள்ளதாக அரசாங்கத்தினால் விசேட அதிரடிப்படையினரின் பாதுகாப்பு வழங்கப்பட்டுள்ள நிலையில், தற்போது தமிழ் அரசியல் வாதிகள் சிலருக்கும் விசேட அதிரடிப்படையினரின் பாதுகாப்பு வழங்கப்பட்டுள்ளது.

அந்த வகையில், தமிழ்த் தேசியக் கூட்டமைப்பின் தலைவர் இரா.சம்பந்தனுக்கு 30 விசேட அதிரடிப்படையினர் பாதுகாப்பு வழங்கி வருகின்றனர்.

அத்துடன், தமிழ்த் தேசியக் கூட்டமைப்பின் பேச்சாளரும், யாழ் மாவட்ட நாடாளுமன்ற உறுப்பினருமான எம்.ஏ.சுமந்திரனுக்கு அண்மையில் முன்னாள் விடுதலைப் புலிகள் சுமந்திரனைக் கொலை செய்யத் திட்டம் தீட்டியதாகவும், அவரது பாதுகாப்புக்கு விடுதலைப் புலிகளால் அச்சுறுத்தல் ஏற்பட்டுள்ளது எனவும் தெரிவிக்கப்பட்டு, அவருக்கு அரசாங்கத்தினால் விசேட அதிரடிப்படையினரின் பாதுகாப்பு வழங்கப்பட்டுள்ளது.

இவர்களின் பின்னர் தற்போது உள்ளூராட்சித் தேர்தல் சூடுபிடித்துள்ள நிலையில், தேசிய சகவாழ்வு மற்றும் அரச கரும மொழிகள் அமைச்சர் மனோகணேசனுக்கு உயிரச்சுறுத்தல் ஏற்பட்டுள்ளதாகத் தெரிவித்து விசேட அதிரடிப்படையினரின் பாதுகாப்பு வழங்கப்பட்டுள்ளது.

இது தொடர்பாக அமைச்சர் மனோ கணேசன் தெரிவிக்கையில், தனக்கு மாத்திரம் விசேட அதிரடிப்படையினரின் பாதுகாப்பு வழங்கப்படவில்லையெனவும், வேறுபல அமைச்சர்களுக்கும் விசேட அதிரடிப்படையினரின் பாதுகாப்பு வழங்கப்பட்டுள்ளது எனவும் தெரிவித்துள்ளதுடன், தனக்கு மக்களினால் உயிரச்சுறுத்தல் ஏற்படவில்லையெனவும், கொழும்பிலுள்ள அரசியல்வாதிகளாலேயே உயிரச்சுறுத்தல் ஏற்பட்டுள்ளதாகவும் தெரிவித்திருந்தார்.

மக்களுக்கு தொண்டு செய்வதற்கு இதயசுத்தியுடன் செயற்படும் எந்தவொரு அரசியல்வாதியும் விசேட அதிரடிப்படையினரின் பாதுகாப்பைக் கோரமாட்டார்கள் என்பதே நிதர்சனம். இலங்கையைப் பொறுத்தமட்டில், எந்தவொரு அரசியல்வாதியும் மக்களுக்குச் சேவை செய்யும் நோக்கில் பதவிக்கு வருவதில்லை. மாறாக தம்மையும், தமது குடும்பத்தினரினதும் நலன் கருதி, பணம், புகழுக்காக மாத்திரமே அரசியலுக்கு வருகின்றமை கண்கூடே.

அரசாங்கத்தின் அழுத்தத்தினால் யாழில் பெயரின்றி இயங்கும் அம்மாச்சி உணவகம்!

வடமாகாணத்தைச்சேர்ந்த ஐந்து மாவட்டங்களிலும், தமிழர்களின் கலாச்சாரத்துடன் கூடிய உணவகமொன்று ‘அம்மாச்சி’ என்ற பெயருடன் வடமாகாண விவசாய அமைச்சினால் திறந்துவைக்கப்பட்டு சிறந்த முறையில் இயங்கி வருகின்றமை அனைவரும் அறிந்ததே.

குறித்த உணவகமானது, கிளிநொச்சி, முல்லைத்தீவு, மன்னார் மற்றும் வவுனியா மாவட்டங்களில் அம்மாச்சி உணவகம் என்ற பெயர் பலகையுடனேயே இயங்கி வருகின்றது. ஆனால், யாழ். மாவட்டத்தில் மாத்திரம் எந்தவொரு பெயருமின்றி இயங்கி வருகின்றது.

அம்மாச்சி உணவகத்தில்,, இயற்கையான முறையில் அதிக சுகாதாரத்துடன் தயாரிக்கப்படும் உணவுகளை மிகவும் மலிவாகப் பெற்றுக்கொள்ளமுடியும். இதன்காரணமாக அம்மாச்சி என்ற உணவகத்தின் பெயர் பட்டிதொட்டியெல்லாம் அடிபட்டுள்ளதுடன், வாடிக்கையாளர்களின் எண்ணிக்கையும் நாளுக்குநாள் அதிகரித்து வருகின்றது.

அத்துடன், இவ்வுணவகம் அமைந்துள்ள பிரதேசத்தைச் சேர்ந்த மகளிர் அமைப்புக்கள் குறைந்த தொகையினை வாடகையாகச் செலுத்திவிட்டு, இங்கு உணவுற்பத்தி செய்து தமது வருமானத்தைப் பெருக்கமுடியும்.

இதன்மூலம் தமிழ் மக்களின் பாரம்பரிய உணவுமுறைகளை தொடர்ச்சியாகக் கடைப்பிடிக்கமுடியும் என்பதும் இதன் சிறப்பம்சம்.

இவ்வாறு நாளுக்குநாள் வாடிக்கையாளர்களின் எண்ணிக்கை அதிகரித்து வருவதை பொறுக்கமுடியாத அரசாங்கம், யாழில் அமைக்கப்படும் அம்மாச்சி உணவகத்துக்கு ‘ஹெல போஜன’ எனப் பெயரிடுமாறும், அரசாங்கத்தின் நிதியுதவியில் இவ்வுணவகம் அமைக்கப்பட்டதால், இதனை விவசாய அமைச்சர் துமிந்த சில்வாவே திறந்துவைக்கவேண்டுமெனவும் வலியுறுத்தப்பட்டது.

இருப்பினும், இதற்கு அப்போதைய விவசாய அமைச்சராக இருந்த பொ.ஐங்கரநேசன் எதிர்ப்புத் தெரிவித்து வந்ததனால் இதன் திறப்புவிழாவும் காலந்தாழ்த்தப்பட்டுக்கொண்டிருந்தது. பின் ஐங்கரநேசன் பதவி இழந்ததும், வடமாகாணமுதலமைச்சர் சி.வி.விக்னேஸ்வரனும் எதிர்ப்புத் தெரிவித்து வந்த நிலையில், தற்போதைய வடமாகாண விவசாய அமைச்சர் க.சிவனேசன் அவ்வுணவகத்துக்கு எந்தவொரு பெயர்ப்பலகையையும் நிறுவாது மக்கள் முன்னிலையில் திறந்துவைத்துள்ளார்.

ஹெல போஜன திட்டத்தில் இலங்கை பாரம்பரிய உணவுகள்தான் விற்பனை செய்யப்படுகின்றன. அதில் தமிழ் பாரம்பரிய உணவுகளிற்கு இடமில்லை. ஹெல போஜனின் பெயரில் வடக்கின் பாரம்பரிய உணவுகளை விற்பனை செய்யலாமென மத்திய அரசு கூறினாலும், அது தொடர்ந்து நீடிக்குமா என்பது சந்தேகமே?

விடுதலைப் புலிகளால் உருவாக்கப்பட்ட கனடா தமிழ் காங்கிரசின் பொங்கல் நிகழ்வில் ரூபவாகினி கூட்டுத்தாபன நிர்வாகிகள் மற்றும் சிறிலங்கா தூதருக்கு அழைப்பு!

கனடாவில் தமிழ் காங்கிரசினால் வருடந்தோறும் கொண்டாடப்பட்டு வரும் தமிழ் மக்களின் உழவர் திருநாளான தைப்பொங்கல் நிகழ்வுக்கு ரூபவாகினி கூட்டுத்தாபன நிர்வாகிகள் மற்றும் கனடாவுக்கான சிறிலங்கா தூதுவருக்கும் அழைப்பு விடுக்கப்பட்டமை தமிழ் மக்கள் மத்தில் அதிருப்தியை ஏற்படுத்தியுள்ளது.

யுத்த காலத்தில் வெளிநாடுகளில் புலம்பெயர்ந்துவாழும் தமிழ் மக்களிடையே பல்வேறு அமைப்புக்கள் உருவாக்கப்பட்டு, பல அமைப்புக்கள் தாயக மக்களுக்கு உதவி செய்ததுடன், இலங்கையில் நடைபெற்ற இனப் படுகொலைக்கு எதிராக ஒன்றிணைந்து போரடினர்.

2009ஆம் ஆண்டு யுத்தம் நிறைவடைந்தபின்னர், இவ்வாறான அமைப்புக்களின் செயற்பாடுகள் அனைத்தும் தலைகீழாக மாறத் தொடங்கியுள்ளன. சிறிலங்கா அரசாங்கம் தனது தந்திரோபாயத்தின்மூலம் இவ்வமைப்புக்களை வளைத்துப்போட்டு வருகின்றது.

இவ்வாறு சிறிலங்கா அரசாங்கத்தின் தந்திரோபாயத் திட்டத்திற்கு கனடாவின் தமிழ் காங்கிரசும் பலியாகியுள்ளது.

இச்செய்தியினை தமிழ் காங்கிரஸ் நிராகரித்ததுடன், தமிழ் காங்கிரசினால்  கொண்டாடப்படும் நிகழ்வை ஆவணமாக்குவதற்கு ரூபவாகினி கூட்டுத்தாபனம் தம்மிடம் அனுமதி கோரியதாகவும் தாம் அதற்கு இணக்கம் தெரிவித்ததாகவும் தமிழ் காங்கிரஸ் அமைப்பு கூறிவருகின்றது.

ரூபவாகினி கூட்டுத் தாபனமானது சிறிலங்கா அரசாங்கத்தின் உத்தியோகபூர்வ செய்தி நிறுவனம். இதில் பணியாற்றுபவர்களும் சிறிலங்கா அரசாங்கத்தின் கைக்கூலிகள்.

இவ்வாறிருக்கும் நிலையில், யுத்த காலப்பகுதியில் ரூபவாகினி உண்மைக்குப் புறம்பான செய்திகளை தொடர்ச்சியாக வெளியிட்டு, மக்களை குழப்பும் நடவடிக்கையில் ஈடுபட்டு வந்தது.

இவ்வாறான ஒரு நிறுவனமே, ஒருபுறம் மக்களுக்காக உதவுவதாகக் கூறிக்கொண்டு, மறுபுறத்தில் சிறிலங்கா அரசாங்கத்திடமிருந்து சலுகைகளைப் பெறுவதுடன், அரசாங்கத்தின் சூழ்ச்சிக்கும் விலைபோய் வருகின்றது.

ஆனந்தசங்கரி, சுரேஸ்பிரேமச்சந்திரனுக்கிடையில் முரண்பாடு, உடைகிறதா தமிழ் தேசிய விடுதலைக் கூட்டமைப்பு?

உள்ளூராட்சித் தேர்தலையடுத்து, தமிழ்த் தேசியக் கூட்டமைப்புக்குள் இடம்பெற்ற ஆசனப் பங்கீடுகளினால் முரண்பாடு ஏற்பட்ட நிலையில் ஈபிஆர்எல்எவ் கட்சி தமிழ்த் தேசியக் கூட்டமைப்பிலிருந்து பிரிந்து தமிழர் விடுதலைக் கூட்டணியுடன் இணைந்து தமிழர் தேசிய விடுதலைக் கூட்டமைப்பு என்ற கூட்டணி உருவாகியது.

தற்போது தமிழர் தேசிய விடுதலைக் கூட்டமைப்புக்குள் அங்கம் வகிக்கும் தமிழர் விடுதலைக் கூட்டணிக்கும் ஈபிஆர்எல்எவ் இற்குமிடையில் ஆசனப் பங்கீட்டில் முரண்பாடு தோன்றியுள்ளது.

வவுனியா நகரசபைத் தொகுதியில் தமிழர் விடுதலைக் கூட்டணி தனது வேட்பாளர்களை நியமிப்பதற்கு நாடாளுமன்ற உறுப்பினர் சிவசக்தி ஆனந்தன் மறுத்துவருகின்றார். இதனையடுத்து ஆனந்த சங்கரிக்கும், சிவசக்தி ஆனந்தனுக்குமிடையில் சுமார் இரண்டு மணித்தியாலங்களாக பேச்சு இடம்பெற்றது.

சிவசக்தி ஆனந்தன் இணக்கம் தெரிவிக்காத நிலையில், கோபமடைந்த ஆனந்த சங்கரி, மனச்சாட்சிப்படி நடந்து கொள்ளுங்கள் எனத் தெரிவித்துவிட்டு அங்கிருந்து வெளியேறியுள்ளார்.

எந்தப் பிரச்சனையால் ஈபிஆர்எல்எவ் தமிழ்த் தேசியக் கூட்டமைப்பிலிருந்து விலகியதோ, அதையே தற்போது தமிழர் விடுதலைக் கூட்டணியிலிருந்து சுரேஸ்பிரேமச்சந்திரன் செய்து வருகின்றார்.

தமிழ் மக்களைப் பொறுத்தவரையில், அனைத்து அரசியல் கட்சிகளும் தமது சுயலாபத்துக்காகவே போட்டியிடுகின்றனர். இதில் சம்பந்தனுக்கு விதிவிலக்காக செயற்படுபவர்கள் எவருமேயில்லையென்பதே யதார்த்தம்.

 

ஒரே வீட்டில் சகோதரிகள் இருவர் இருவேறு கட்சிகளில் போட்டி!

எதிர்வரும் பெப்ரவரி மாதம் நடைபெறவுள்ள உள்ளூராட்சித் தேர்தலில் ஒரே குடும்பத்தைச் சேர்ந்த சகோதரிகள் இருவர் இருவேறு கட்சிகளில் போட்டியிடவுள்ளனர்.

அனுராதபுரம் சிறைச்சாலையில் உணவுத் தவிர்ப்புப் போராட்டத்தில் ஈடுபட்டுவந்த மதியரசன் சுலக்சனின் சகோதரிகள் இருவருமே இருவேறு கட்சிகளில் போட்டியிடவுள்ளனர்.

இரண்டு அரசியல் கட்சிகளின் தலையீடு காரணமாகவே இரண்டு சகோதரிகள் இரண்டு கட்சிகளுக்குமாக தேர்தலில் போட்டியிடுவதாக தெரியவந்துள்ளது.

செப்ரெம்பர் மாதம் வவுனியா நீதிமன்றத்தில் நடைபெற்று வந்த மூன்று தமிழ் அரசியல் கைதிகளினது வழக்கு விசாரணை நிறைவடையும் தறுவாயில் சாட்சிகளுக்கு வவுனியாவில் அச்சுறுத்தல் ஏற்பட்டுள்ளது எனக் காரணம் கூறப்பட்டு மூன்று அரசியல் கைதிகளினதும் வழக்கு விசாரணை அனுராதபுரம் நீதிமன்றத்திற்கு மாற்றப்பட்டமை அனைவரும் அறிந்ததே.

இதனையடுத்து மூன்று அரசியல் கைதிகளும் தொடர் உணவுத் தவிர்ப்புப்போராட்டத்தில் ஈடுபட்டு வந்த நிலையில் இவர்களுக்கு ஆதரவாகவும், தமிழ் அரசியல் கைதிகளின் விடுதலைக்காகவும் பல்வேறு தரப்பினர் போராட்டங்களை முன்னெடுத்து வந்தனர்.

இந்நிலையில், குறித்த மூன்று அரசியல் கைதிகளையும் அனுராதபுரம் சிறைச்சாலைக்குச் சென்று சந்தித்த தமிழ்த் தேசிய மக்கள் முன்னணியின் சட்டத்தரணிகள்  அவர்களின் பிரச்சனைகளைக் கையாண்டனர்.

இதேவேளை, ரெலோ அமைப்பு ஒருபடி மேல் சென்று அவ்வரசியல் கைதிகளை அடிக்கடி சந்தித்துக் கலந்துரையாடியதுடன், முஸ்லிம் மற்றும் சிங்களச் சட்டத்தரணிகள்மூலம் இப்பிரச்சனையைக் கையாண்டனர்.

இருப்பினும், ரெலோ அமைப்பின் சிவாஜிலிங்கத்தினால் ஒழுங்கு செய்யப்பட்ட சட்டத்தரணிகள் இருவரும் பணத்தினை வாங்கிவிட்டு, வழக்கிற்கு முன்னிலையாகவில்லை.

அத்துடன், சிவாஜிலிங்கத்தைச் சந்தித்த மைத்திரிபால சிறிசேன நல்ல முடிவு கிடைக்கும் எனத் தெரிவித்தும் எந்தப் பலனும் கிடைக்கவில்லை.

வழக்கும் தொடர்ந்து நடைபெறவுமில்லை. அதற்கான தீர்ப்பும் வழங்கப்படவில்லை.

இவ்வாறிருக்கையில், மதியரசன் சுலக்சனின் குடும்பத்துடன் இரண்டு கட்சிகளும் நெருக்கமான தொடர்பைப் பேணிவந்தனர்.

இதன் விளைவாக, தற்போது சுலக்ஷனின் இரு சகோதரிகளும் கரவெட்டி தெற்கு மேற்கு பிரதேசசபை தேர்தலில் தமிழ்த் தேசிய மக்கள் முன்னணி மற்றும் ரெலோ அமைப்பின் சார்ப்பில் போட்டியிடவுள்ளனர்.

மாகாணசபைத் தேர்தலில் மாவை சேனாதிராஜாவுக்கு எதிராக களமிறங்குகின்றார் விக்னேஸ்வரன்!

எதிர்வரும் செப்ரெம்பர் மாதம் நடைபெறவுள்ள மாகாணசபைத் தேர்தலில் தமிழரசுக் கட்சி சார்பாகப் போட்டியிடவுள்ள அக்கட்சியின் தலைவர் மாவைசேனாதிராஜாவுக்கு எதிராக தமிழர் விடுதலைக் கூட்டணியின் உதயசூரியன் சின்னத்தில் வடமாகாண முதலமைச்சர் சி.வி.விக்னேஸ்வரன் போட்டியிடவுள்ளதாக ஈபிஆர்எல்எவ் கட்சியின் செயலாளரும், வன்னி மாவட்ட நாடாளுமன்ற உறுப்பினருமான சிவசக்தி ஆனந்தன் தெரிவித்துள்ளார்.

ஆனால், இது பற்றி வடமாகாண முதலமைச்சர் சி.வி.விக்னேஸ்வரன் எந்தக் கருத்தினையும் வெளியிடவில்லை.

இருந்தபோதிலும், வடமாகாண முதலமைச்சர் சி.வி.விக்னேஸ்வரனால் ஊடகங்களுக்கு வாரம் ஒரு கேள்வி பதிலில் தமிழ்த் தேசியக் கூட்டமைப்புத் தொடர்பில் பல அதிருப்திகளை வெளியிட்டு வருகின்றார்.

அதற்கமைய, தமிழ்த் தேசியக் கூட்டமைப்பானது, கொள்கைக்கும், யதார்த்த நிலைக்கும் முற்றிலும் மாறுபட்டுச் செயலாற்றுவதாகக் குற்றஞ்சாட்டிய வடமாகாண முதலமைச்சர், சி.விவிக்னேஸ்வரன், தேர்தல் காலங்களில் தமது கொள்கைகளை மக்களுக்கு தெரிவிக்கும் இவர்கள் தேர்தல் முடிந்த பின்பு , மக்களுக்கு வழங்கிய உறுதிமொழிகளையெல்லாம் தூக்கியெறிந்துவிட்டு பணக் கையாடல்களை மாத்திரம் தாமே மேற்கொண்டுவருகின்றனர் எனப் பகிரங்கமாகக் குற்றம் சாட்டியிருந்தார்.

இது தவிர, உள்ளூராட்சித் தேர்தலில் தமிழ்த் தேசியக் கூட்டமைப்பின் சார்பில் போட்டியிடவுள்ள புளொட் மற்றும் ரெலோ அமைப்புக்களும் எதிர்வரும் காலங்களில் தமிழ்த் தேசியக் கூட்டமைப்புடன் இணைந்து போட்டியிடப்போவதில்லையென  அறிவித்துள்ளன.