ஆண்டாள்-தேவடியாள்-வைரமுத்து-சர்ச்சை: வி.இ.குகநாதன்

சில நாட்களிற்கு முன் தினமணி செய்தித்தாளில் கவிஞர் வைரமுத்து எழுதிய “தமிழை ஆண்டாள்” எனும் கட்டுரையில் மேற்கோள் காட்டிய ஒரு வாக்கியம் இன்று தமிழக ஊடகப்பரப்பிலும், பொதுவெளியிலும் பெரும் கருத்துமோதலை ஏற்படுத்தியுள்ளது.  அதில் அவர் மேற்கோள் காட்டிய ஒரு வாக்கியத்தில் ஆண்டாள் ஒரு தேவடியாள் எனக் குறிப்பிட்டதே இந்தக் குழப்பங்களிற்கெல்லாம் காரணம்.  இதனை இவர் ஒன்றும் சொந்தக்கருத்தாகக்கூறவில்லை, மாறாக அமெரிக்காவின் இண்டியானா பல்கலைக்கழகத்தின் சுபாஷ் சந்திர மாலிக்கை ஆசிரியராகக்கொண்டு வெளியிட்ட “Indian movement – some aspects of dissent, protest and reform” என்ற ஆய்வு நூலில் ஆண்டாள் பற்றி இப்படி ஒரு குறிப்பு எழுதப்பட்டிருக்கிறது என மேற்கோளே காட்டியிருந்தார்.  உடனேயே ஆண்டாளினை வைரமுத்து கேவலப்படுத்திவிட்டார் என இந்துமதவாதிகள் பொங்கியெழுந்து அவரது தலையினை வெட்டவேண்டும் என தலிபான் அவதாரம் எடுத்துவிட்டார்கள். இன்று இவ்வாறு கூச்சலிடும் மதவாதிகளின் முன்னோர்களே இந்துமதத்தின் ஒரு சடங்காக தேவடியாள்/ தேவதாசி முறையினைப் பேணியவர்கள் என்பதுதான்  இங்கு வேடிக்கையானது.

தேவடியாள்(பரத்தை)வரலாறு:

இந்த விலைமகளிர் தொழிலே உலகின் முதற்தொழில் என வேடிக்கையாகக் கூறுவார்கள். அந்த வகையில் பார்த்தால் இந்த விலைமகளிரின் தோற்றம் என்பது வரலாற்றுக்காலத்திற்கு முற்பட்டது. வரலாற்றில் தாய்வழிச் சமுதாயமாக மனிதர்கள் இருந்தபோது எல்லோருமே பொதுமகளிராகவேயிருந்தார்கள்(1). அதே போன்று சங்ககாலத்திலும் இற் பரத்தை(ஒருவனிற்கு மட்டும்),நயப்புப் பரத்தை(பலருக்கும் நயப்பவள்) மருதநிலத்தில் இருந்ததாகக் குறிப்புக்கள் உண்டு. அதே போன்று சங்கமருவிய காலத்தில் பரத்தையர்முறைமை இருந்தற்கு தரவாக மாதவி சிலப்பதிகாரத்தில் காணப்படுகிறார். இவ்வாறு காலகாலமாக பரத்தைமுறை காணப்பட்டாலும் அதனை மதச்சடங்காக மாற்றி கடவுளுடன் தொடர்புபடுத்தியது பார்ப்பன வைதீக(இன்றைய இந்து) மதமேயாகும்.  வைதீக மதமே தேவடியாள் (தே= தெய்வம்+அடியாள்= பணிபுரிபவள்) எனும் கருத்துருவாக்கத்தினை உருவாக்கி அதனை பொட்டுக்கட்டல் எனும் சடங்காக கோயிலிலேயே அந்தணர்களைக் கொண்டு நடாத்திவைத்தது.  இதனை பெருமளவிற்கு நிறுவனரீதியான நடைமுறைக்குள்ளாக்கியது இராசராச சோழன் ஆட்சியிலேயிலேயே இடம்பெற்றது என்பதற்கு தரவாக தஞ்சைப் பெருங்கோயில் கல்வெட்டுக்கள் (2)காணப்படுகின்றன. இராசராச சோழன் காலத்திலேயே இவ்வாறு தேவடியாள் முறை நிறுவனரீதியாக மதச் சடங்காக ஆக்கப்பட்டிருந்தாலும் அதற்கு முன்னரே கோயில்களில் நிறுவனரீதியற்ற முறையில் பின்பற்றப்பட்டு வந்திருக்கலாம் என உய்த்துணரமுடிகிறது. அக் காலப்பகுதியிலேயே (குறிப்பாக எட்டாம் நூற்றாண்டின் நடுப்பகுதியில் ) ஆண்டாள் வாழ்ந்தாகக் கருதப்படுகிறது.

       ஆண்டாள் உண்மையிலேயே தேவடியாளா (தேவதாசியா) என்றால் அது விவாதத்திற்குரியது. இந்துமத விளக்கத்தின்படி தெய்வத்திற்கே (தே) பணிபுரிபவள்(அடியாள்) என்றவகையில் தேவடியாள் எனத் துணிந்து கூறலாம். மறுபுறத்தில் பொதுவழக்கிலுள்ள தேவதாசி என்ற சொல்லிற்கான விளக்கத்தின்படி பொதுமகளா எனப் பார்த்தால், அதற்கான நேரடித்தரவுகள் எதுவுமில்லை.  மேலே குறிக்கப்பட்ட இண்டியானா பல்கலை ஆய்வானது ஆண்டாளின் பாடல்களில் காணப்படும் பாலியல் விடுதலைத் தன்மையினை அடிப்படையாகக்கொண்டே குறித்த முடிவிற்கு வந்திருக்கலாம். அதாவது பெண்களின் விடுதலை பெருமளவிற்கு அடக்கிவைக்கப்பட்டிருந்த அன்றைய நிலையில் ஒரு இளம்பெண் இவ்வாறு பாலியல் வேட்கை சொட்ட சொட்ட பாடல்களைப் பாடியிருக்க முடியுமா என்ற கேள்வியின் அடிப்படையில் முடிவெடுக்கப்பட்டிருக்கலாம். அது முடிந்த முடிவல்ல என்பது உண்மையே.

ஆண்டாள் அவமானக் குறியீடா?

ஒரு வாதத்திற்காக ஆண்டாள் அவ்வாறு பரத்தையாகவிருந்திருந்தாலும்கூட, அது அவரிற்கான அவமானமல்ல, மாறாக அது அந்த மதப் பிற்போக்குத்தன மற்றும் ஆணாதிக்கத்தின் அவமானமாகவே கருதப்படவேண்டும்.  ஆண்டாளின் பாடல்கள் கூட ஒரு பெண்ணின் பாலியல் விடுதலை உணர்வின் வெளிப்பாடாகவே கருதப்படவேண்டும்.  அதே போல ஆண்டாளின் தமிழ்ப் புலமையும், தமிழே வழிபாட்டு மொழியாகக் கருதப்படவேண்டும் என்ற மொழியுணர்வும் போற்றப்படவேண்டும். இதனால்தானோ என்னவோ  வைணவத் தென்கலை  சித்தாந்தத்தின் படி  ஆழ்வார்கள் பத்து  பேர் மட்டுமே (ஆண்டாள் , மதுரகவி ஆகியோரிற்கு இடமில்லை) . பின்பு ஆழ்வார்கள் பன்னிரண்டாக அதிகரிக்கப்பட்டாலும், சில வைணவர் ஆண்டாளையும், மதுரகவியினையும் இன்றும் ஏற்றுக்கொள்வதில்லை.  அதே போன்று ஆண்டாள் என்பதே ஒரு கற்பனைப் படைப்பு என ஏற்கனவே ராஜாஜி கூறியபோது (3) எதுவுமே பேசாதிருந்த மதவாதிகள், பா.ராகவன் ஆண்டாளைப் பற்றி ஏற்கனவே கிழக்குப் பதிப்பகத்தின் பெயரில் இதனைவிட கடுமையாக விமர்சித்து நூல் வெளியிட்டபோது மவுனமாகவிருந்த  மத வாதிகள் இப்போது பொங்குவதன் நோக்கம் கவனித்திற்கொள்ளப்படவேண்டும்.

வைரமுத்து எதிர்ப்பு அரசியலின் பின்னனி:

மேலே குறிப்பிடப்பட்ட பா.ராகவனும், ராஜாஜி ஆகியோர் பிரமணராகவிருந்தபடியால் அப்போது மவுனம் காத்த மதவாதிகள் இப்போது தமது மனுதர்மத்தின்படி பிரமணரல்லாத வைரமுத்து மேற்கோள் காட்டியதற்கே அவரது தலையினைக் காவு கேட்கிறார்கள். இன்னும் சில மிதவாதிகளோ(?) சன்னதியில் வந்து வைரமுத்து மன்னிப்பு கேட்கவேண்டும் என்கிறார்கள்.  வைரமுத்துவோ யாராவது தனது மேற்கோளைத் தவறாக புரிந்து துன்புற்றிருப்பார்களேயானால் அதற்கு ஏற்கனவே வருத்தம் தெரிவித்துவிட்டார். இதற்குப் பின்னும் மதவாதம் அடங்கியபாடில்லை.  இங்குள்ள நகைமுரண் என்னவெனில் இன்று வைரமுத்து இந்து மதத்தினை புண்படுத்திவிட்டதாக கூறும் மதவாதிகள்தான் அன்று தேவடியாள் முறையினை ஆதரித்து அதற்காக வாதிட, மறுபுறத்தே வைரமுத்துவின் கருத்துரிமைக்காகப் போராடும் பகுத்தறிவாளர்களே அன்று தேவடியாள் முறையினை ஒழிக்கப்போராடியிருந்தார்கள். குறிப்பாக சட்சபையில் தேவதாசி முறையினை ஆதரித்த இந்துமதக் காவலரான   சத்தியமூர்த்தி ஐயரினை எதிர்த்து சுப்புலட்சுமி ரெட்டி முன்வைத்த வாதம் (படம் காண்க) மிகவும் பரவலடைந்திருந்தது. தேவதாசி முறை ஒழிப்பில் டாக்டர் முத்துலட்சுமி, ராமாமிர்தம் அம்மையார், தந்தை பெரியார், அமிகம்மிகாயேல் என்ற கிறிஸ்தவ பெண் போதகர் ஆகியோர் ஆற்றிய பங்களிப்பு அளப்பெரியது.

          வைரமுத்து மீதான வன்மத்திற்கு மற்றொரு காரணமும்  உண்டு.  வைரமுத்துவின் இந்தக் கட்டுரையினை ஒரு தொடராகவே வெளியிட்டுவருகிறார். இதற்கு முந்திய ஒரு வள்ளலார் பற்றிய கட்டுரையில் வள்ளலாரின் மறைவு பற்றிய உண்மைத்தன்மையினை வெளிக்கொண்டுவந்திருந்தார்.  அதாவது வள்ளலாரின் பார்ப்பனய எதிர்ப்பு ஆன்மீகத்தில் கலங்கிப்போன மதவாதிகள் இறுதிக்காலத்தில் வள்ளலாரை தனிமைப்படுத்தி அவரினை எரித்துக்கொன்றுவிட்டு, அருட்பெரும் சோதியில் கலந்துவிட்டார் (நந்தனை எரித்துவிட்டு கூறியது போன்று)எனக் கதைகட்டிவிட்டிருந்ததனைக் கேள்விக்கு உட்படுத்தியிருந்தார். அப்போது கூச்சல் போட்டு தாம் அம்பலப்பட்டுப்போவதனை விரும்பாத பார்பனியம் இப்போது ஆண்டாள் விடயத்தினை முன்வைத்து தமது வன்மத்தை வெளிக்காட்டுகிறது. இவையே வைரமுத்து மீதான வன்மத்திற்கு காரணங்களே தவிர, அவர்களிற்கு ஆண்டாள் மீதான பற்றுக் காரணமில்லை.

     மதநம்பிக்கைகள் கேள்விக்கோ ஆய்விற்கோ அப்பாற்பட்டவை  என்று கருதுவோமாயின் இன்றைக்கும் பூமி தட்டை என்று நம்பிக்கொண்டும், கணவன் இறந்தவுடன் மனைவியினை எரித்துக்கொண்டும் இருக்கவேண்டியிருந்திருக்கும்.  எனவே வள்ளலார் அருட்சோதியில் எவ்வாறு கலக்கச்செய்யப்பட்டார் என்பது மட்டுமல்லாமல் ஆண்டாள் எவ்வாறு காற்றுடன் கலந்து காணமாற்போனார் எனவும் ஆய்வு செய்யப்படவேண்டும்.  துணைநின்றவை

  1. குடும்பம்,தனிச்சொத்து,அரசு ஆகியவற்றின் தோற்றம் (தமிழாக்கம்) (page7) -பிரடெரிக் எங்கல்ஸ்
  2. பண்டைத் தமிழர் வாழ்வும் வழிபாடும்(p.137) – க. கைலாசபதி
  3. “வாடாத மலர் ஆண்டாள்” – the tamil hindu.com (1-1-2015)

தமிழர் விடுதலைக் கூட்டணி வேட்பாளரை மண்வெட்டி கொண்டு துரத்திய சிறிதரனின் அடியாட்கள்!

கிளிநொச்சி மாவட்டத்தில் பிரமந்தனாறுப் பிரதேசத்தில் தமிழ்த் தேசியக் கூட்டமைப்பின் நாடாளுமன்ற உறு;ப்பினர் சிறிதரனின் அடியாட்கள் உதய சூரியன் சின்னத்தில் போட்டியிடும் வேட்பாளரை மண்வெட்டிகொண்டு துரத்தியுள்ளனர்

தமிழ்த் தேசியக் கூட்டமைப்பின் நாடாளுமன்ற உறுப்பினர் சிறிதரன் தனது கோட்டையாக வைத்திருக்கும் கிளிநொச்சியில் வேறு கட்சிகளைச் சேர்ந்த வேட்பாளர்கள் தேர்தலில் போட்டியிடுவதற்கு எச்சரிக்கை விடுத்து வரும் நிலையில், பிரமந்தனாறுப் பிரதேசத்தில் தனது கையாள் ஒருவர் போட்டியிடுவதால் உதயசூரியன் கட்சியைச் சேரந்த வேட்பாளருக்கே தனது அடியாட்களைக் கொண்டு அச்சுறுத்தல் விடுத்துள்ளார்.

கிளிநொச்சி மாவட்டத்தில் சிறிதரனால் தேர்தலில் போட்டியிட்டுவதற்காக களமிறக்கப்பட்டவர்கள் அனைவரும், ஏதோ ஒரு வகையில் சமூகத்தை அழிக்கும் நோக்குடையவர்களே. உதாரணத்துக்கு வேழமாகிலிதன் என்பவர், பல பாலியல் சேட்டைகளில் ஈடுபட்டவர்.

இதேபோன்று தர்மபுரத்தில் கந்துவட்டி வாங்கும் ஒருவரை நியமித்த சிறிதரன், உண்மையில் மக்கள் நலன் கருதி, மக்களுக்குச் சேவை செய்யும் தொண்டர்கள் எவரையுமே நியமிக்காது, தனக்கு நெருங்கியவர்களை வேட்பாளர்களாக நியமித்துள்ளார்.

தேசிய பாடசாலைகளில், இராணுவம், காவல்துறை, வைத்தியர் ஆகியோரின் பிள்ளைகளுக்கு முன்னுரிமை – அரசாங்கம்!

தேசிய பாடசாலைகளில் சிறிலங்காப் படையினர், காவல்துறையினர் மற்றும் வைத்தியர்களின் பிள்ளைகளுக்கு அரசாங்கத்தினால் முன்னுரிமை வழங்கப்பட்டமை பெரும் விமர்சனத்தை உருவாக்கியுள்ளது.

தற்போது, தேசிய பாடசாலைகளில் அனுமதி பெறுவது என்பது இயலாத நிலையில், சிறிலங்காப் படையினர், காவல்துறையினர் மற்றும் வைத்தியர்களின் பிள்ளைகளுக்கு முன்னுரிமை வழங்குமாறு அரசாங்கம் பணிப்புரை விடுத்துள்ளது.

அரசாங்கத்தின் இச்செயலுக்கு பல மனித உரிமை அமைப்புக்கள் எதிர்ப்புத் தெரிவித்துள்ளன. இருப்பினும் அரசாங்கம் இவ்வாறு செயற்படுவதானது, சமூகத்தின் ஒரு பகுதியினருக்கு மாத்திரம் அளிக்கப்படும் இந்த முன்னுரிமை, அரசாங்கத்தின் அனுசரணையுடன் இடம்பெறும் மனித உரிமை மீறல் என இலங்கை மனித உரிமை ஆணைக்குழு குற்றஞ்சாட்டியுள்ளது.

இலங்கையைப் பொறுத்தமட்டில் அனைவருக்கும் இலவசக் கல்வியை அரசாங்கம் வழங்குகின்றது. இருப்பினும், தேசிய பாடசாலைகளில் மாத்திரமன்று பல உயர்தர பாடசாலைகளிலும் மாணவர்களை இணைப்பதில் பாகுபாடு காட்டப்பட்டு வருகின்றது.

இதுபற்றி கல்வி அதிகாரிகள் தெரிந்து வைத்திருந்தாலும், எவரும் உரிய அதிகாரிகளிடம் தெரிவித்து எந்தவித நடவடிக்கையும்எடுப்பதில்லை.

இந்நிலையில், அரசாங்கமே இராணுவம், காவல்துறை, வைத்தியர்களுக்கு முன்னுரிமை வழங்கி சாதாரண மக்களின் கல்வி உரிமையை பறிக்கும் நடவடிக்கையில் ஈடுபட்டுள்ளது.

 

தமிழ் மக்கள் தமிழ்த் தேசியக் கூட்டமைப்புக்கு வாக்குப் போடாவிட்டால், புதிய அரசியலமைப்பு நிறைவேற்றப்படமாட்டாது – சுமந்திரன்!

எதிர்வரும் பெப்ரவரி மாதம் 10 நாளன்று நடைபெறவுள்ள உள்ளூராட்சித் தேர்தலில் தமிழ் மக்கள் தமிழ்த் தேசியக் கூட்டமைப்புக்கே வாக்குகளைப் போடவேண்டுமெனவும், அவ்வாறு போடாதுவிட்டால் புதிய அரசியலமைப்பு நிறைவேற்றப்படமாட்டாது எனவும், தமிழ்த் தேசியக் கூட்டமைப்பின் நாடாளுமன்ற உறுப்பினர் சுமந்திரன் நேற்று பருத்தித் துறையில் நடைபெற்ற கூட்டமொன்றில் உரையாற்றியிருந்தார்.

மேலும் அவர், புதிய அரசியலமைப்புக்கான இடைக்கால அறிக்கையில், சமஷ்டித் தீர்வே பரிந்துரைக்கப்பட்டுள்ளதெனவும், அதனையே ஏக்கிய ராஜ்ய எனக் குறிப்பிட்டுள்ளதாகவும் ஏக்கிய ராஜ்ய என்றால் ஒருமித்த நாடு எனவும் இதுபற்றி மக்கள் குழம்பிக்கொள்ளத் தேவையில்லையெனவும் உரையாற்றியிருந்தார்.

சுமந்திரன் மேடைகளில் மக்களுக்கு இவ்வாறு பிரச்சாரம் செய்துவரும் நிலையில், சிறிலங்கா அரசாங்கத்தைச் சேர்ந்த மைத்திரிபால சிறிசேன மற்றும் ரணில் விக்கிரமசிங்க ஆகியோர் ஏக்கிய ராஜ்ய என்றால் ஒற்றையாட்சியுடைய நாடு எனவும், அதில் எந்த மாற்றமும் கிடையாது எனவும், இந்நாட்டில் சிங்கள மொழிக்கே முன்னுரிமை வழங்கப்படும் எனவும் மக்களுக்குத் தெரிவித்து வருகின்றனர்.

அதைவிட மேலாக, இடைக்கால அறிக்கையை உருவாக்கியவர்களுள் முக்கியமானவர்களுள் ஒருவரான ஜயம்பதி விக்கிரமரட்ணவும், இடைக்கால அறிக்கையில் இலங்கை ஒற்றையாட்சியுடைய நாடு என்பது அழுத்திக் கூறப்பட்டுள்ளதாகத் தெரிவித்துள்ளார்.

இவ்வாறிருக்கையில், தமிழ்த் தேசியக் கூட்டமைப்பைச் சேர்ந்த நாடாளுமன்ற உறுப்பினர் எம்.ஏ.சுமந்திரின் இடைக்கால அறிக்கையில், சமஷ்டி ஆட்சியே வலியுறுத்தப்பட்டுள்ளதாகவும், அதற்கும் மக்கள் தமிழ்த் தேசியக் கூட்டமைப்புக்கு ஆதரவு வழங்கவேண்டுமெனவும், இல்லாவிட்டால் சமஷ்டித் தீர்வு கிடையாது போகும் என மக்களை ஏமாற்றும் நடவடிக்கையில் ஈடுபட்டு வருகின்றனர்.

முல்லைத்தீவில் கடற்படை முகாமமைக்க 671 ஏக்கர் நிலப்பரப்பை அபகரிக்க அரசு அனுமதி!

முல்லைத்தீவு மாவட்டம் வெள்ளான் முள்ளிவாய்க்கால் உள்ளடங்கலாக 671 ஏக்கர் நிலப்பரப்பினை அபகரிப்பதற்கு சிறிலங்கா கடற்படையினருக்கு அரசாங்கம் அனுமதியளித்துள்ளது.

தகவல் உரிமைச் சட்டத்தின் கீழ் விகல்ப என்ற ஊடகத்தின் ஆசிரியர் சம்பத் சமரக்கோன், எழுப்பியிருந்த வினாவுக்கு காணிகள் மற்றும் நாடாளுமன்ற மறுசீரமைப்பு அமைச்சின் மேலதிக செயலர் தயாரத்ன கருத்துத் தெரிவிக்கையிலேயே மேற்கண்டவாறு தெரிவித்துள்ளளார்.

குறித்த பிரதேசமானது மக்களுக்குச் சொந்தமான பிரதேசமாகும். தமது பிரதேசத்தை தம்மிடம் வழங்குமாறு கோரி கேப்பாப்புலவில் மக்கள் தொடர் போராட்டத்தில் ஈடுபட்டு வருகின்றனர்.

இருப்பினும், வெள்ளான் முள்ளிவாய்க்கால், வட்டுவாகல் ஆகிய இரண்டு பிரதேசங்களையும் உள்ளடக்கியே இவ்விராணுவமுகாம் அமைப்பதற்கு அரசாங்கம் அனுமதியளித்துள்ளது.

2009 ஆம் ஆண்டு இறுதி யுத்தம் இடம்பெற்ற பிரதேசங்களான வெள்ளான் முள்ளிவாய்க்கால் மற்றும் வட்டுவாகல் பிரதேசங்கள் மர்மம் நிறைந்த பிரதேசங்களாகும்.

இறுதி யுத்தத்தின்போது இப்பிரதேசங்களிலேயே பலர் கொன்றொழிக்கப்பட்டனர். அத்துடன் சரணடைந்தவர்கள் பலரும் இவ்விடங்களிலேயே சிறிலங்கா இராணுவத்தினரால் சித்திரவதை செய்யப்பட்டு படுகொலை செ;ய்யப்பட்டமைக்கான ஆதாரங்கள் வெளியாகியிருந்தன.

இந்நிலையிலேயே, வட்டுவாகல், வெள்ளான் முள்ளிவாய்க்கால் ஆகிய பகுதிகளில் உள்ள 671 ஏக்கர் காணிகள் பொதுத் தேவைக்காக சுவீகரிக்கப்படும் என்று கடந்த ஆண்டு ஓகஸ்ட் மாதம், அமைச்சர் கயந்த கருணாதிலக அறிவித்திருந்தார்.

எனினும், இக்காணி ககடற்படையினரின் முகாம் அமைப்பதற்காகவே அபகரிக்கப்பட்டுள்ளதாக காணி உரிமைச் சட்டத்தின் கீழ் அரசாங்கம் பதிவுசெய்துள்ளது.

இருப்பினும், மக்கள் இதற்கு எதிர்ப்புத் தெரிவித்து வருவதுடன், போராட்டத்திலும் ஈடுபட்டு வருகின்றனர்.

யுத்தம் நிறைவடைந்த காலத்திலிருந்து, இப்பிரதேசம் இராணுவத்தினரால் தொடர்ச்சியான கண்காணிப்புக்குட்படுத்தப்பட்டு வருகின்றமையும் குறிப்பிடத்தக்கது.

மூதூரில் டக்ளஸ் தேவானந்தாவுக்கும் மக்களுக்குமிடையே முறுகல்!

மூதூர் பிரதேசத்தில் பெப்ரவரி மாதம் நடைபெறவுள்ள உள்ளூராட்சித் தேர்தலுக்கான பிரச்சார நடவடிக்கைக்கு ஈபிடிபி கட்சியின் தலைவர் டக்ளஸ் தேவானந்தா சென்று உரையாற்றியபோது அப்பிரதேச மக்களுக்கும் அவருக்குமிடையே முறுகல் ஏற்பட்டதுடன், மக்கள் அவரிடம் பல கேள்விகளைக் கேட்டதால், அச்சுறுத்தலுக்குள்ளாக்கப்பட்டனர்.

சம்பவம் தொடர்பில் தெரியவருவதாவது, ஈபிடிபி கட்சியின் தலைவர் டக்ளஸ் தேவானந்தா நேற்று பிரச்சார நடவடிக்கைக்காக மூதூர் கிராமத்திற்குச் சென்று மக்களுன் உரையாற்றியபோது, மக்களில் ஒருவர் ‘நீங்கள் கடந்த சில மாதங்களுக்கு முன்னர் எமது கிராமத்துக்கு வருகை தந்து ஏனைய அரசியல்வாதிகளைப் போன்றே கருத்துக்களைத் தெரிவித்திருந்தீர்கள். அத்துடன் கிராமத்தை அபிவிருத்தி செய்வதற்காக உங்களுடைய கட்சி நிதியிலிருந்து குறிப்பிட்ட தொகையை ஒதுக்குவதாக தெரிவித்திருந்தீர்கள், ஆனால் உங்களால் தெரிவிக்கப்பட்ட எதனையும் நீங்கள் இக்கிராமத்திற்குச் செய்யவில்லை.

மீண்டும் தேர்தல் பிரச்சாரத்திற்கு இங்கு வந்துள்ளீர்கள், மீண்டும் அபிவிருத்தி செய்யப்போவதாகக் கூறுகிறீர்கள். தேர்தலின் பின்னர் கிராமத்தை அபிவிருத்தி செய்வீர்கள் என்பதில் என்ன உத்தரவாதம் உள்ளது எனக் கேள்வி எழுப்பியிருந்தார்.

இதற்குப் பதிலளித்த டக்ளஸ் தேவானந்தா மக்களைப் பார்த்து நீங்கள் ஏதோவொரு அரசியல்கட்சி சார்பாக தன்னைக் குழப்புவதாக தெரிவித்தார். இதற்கு மக்கள் மத்தியிலிருந்து, நாங்கள் உங்களைக் குழப்பவில்லை. உங்களால் சொல்லப்பட்ட அபிவிருத்தி வேலைகளை நீங்கள் இக்கிராமத்திற்குச் செய்தால் நாங்கள் உங்களுடன் இணைந்து செயற்படத் தயார் எனத் தெரிவித்திருந்தனர்.

இதன்போது, அங்கு காணொளி எடுத்த கிராமத்தவர் ஒருவரின் தொலைபேசியைப் பறித்த ஈபிடிபியினர், அதனைச் சேதப்படுத்தியுமிருந்தனர்.

தேர்தல் காலங்களில் மாத்திரம் கிராமங்களுக்குச் செல்லும் அரசியல் கட்சிகள், அங்கு மக்களிடம் கிராமத்தை அபிவிருத்தி செய்து தருவோம் எமக்கு வாக்குப் போடுங்கள் எனத் தெரிவித்துவிட்டு, தேர்தல் நிறைவடைந்ததும், அந்த மக்களைப் பற்றிச் சிந்திப்பதில்லை. அதற்கான பிரதிபலனை டக்ளஸ் தேவானந்தா மூதூரில் எதிர்கொண்டுள்ளார்.

அதேபோல், வடக்கில் உள்ள அரசியல்வாதிகளும் தமது வாக்குறுதிகளுக்கான பலனை விரைவில் சந்திக்க நேரிடும் என்பதே நிதர்சனம்.

கோத்தபாய ராஜபக்ஷவின் கையாளும், 116 பவுண் நகைக் கொள்ளையருமான விஜயகாந்த் யாழ். மாநகரசபைத் தேர்தலில் தமிழர் விடுதலைக் கூட்டணி சார்பில் போட்டி!

மகிந்த ராஜபக்ஷவின் ஆட்சிக்காலத்தில் அப்போதைய பாதுகாப்புச் செயலராக இருந்த கோத்தாபய ராஜபக்ஷவுடன் சேர்ந்தியங்கியவரும், வீடு புகுந்து 116 பவுண் நகையைக் கொள்ளையடித்தவருமான விஜயகாந்த் என்பவர் யாழ். மாநகரசபைத் தேர்தலில் தமிழர் விடுதலைக் கூட்டணியில் போட்டியிடுகின்றார்.

2013 யூலை மாதம் வங்கியில் 116 பவுண் நகை அடகு வைக்க விஜயகாந்த் சென்றபோது வங்கி ஊழியர் ஒருவரின் திருட்டு போன நகையும் அதில் இருந்தது. இதையடுத்து கோப்பாய் காவல்துறையினருக்கு விடயம் அறிவிக்கப்பட, விஜயகாந்த் உள்ளிட்ட நால்வர் கைதாகி, பின்னர் பிணையில் விடுவிக்கப்பட்டனர்.

இதனையடுத்து, 116 பவுண் நகையை திருடியது, அடகு வைக்க முயன்றது உள்ளிட்ட நான்கு குற்றச்சாட்டுக்கள் சுமத்தப்பட்டு விசாரணைகள்  நடைபெற்று வருகின்றது.

இவர்கள் மீதான குற்றச்சாட்டு சந்தேகத்திற்கிடமின்றி நிரூபிக்கப்படவில்லையாயினும், எதிர்வரும் பெப்ரவரி மாதம் 1ஆம் நாள் தீர்ப்பு வழங்கப்படும் என எதிர்பார்க்கப்படுகின்றது.

இந்த சம்பவம் நடந்தபோது விஜயகாந்த் ஈ.பி.டி.பியில் இருந்தார். சம்பவத்தையடுத்து கட்சியிலிருந்து நீக்கப்பட்டார்.

கட்சியிலிருந்து நீக்கப்பட்ட விஜயகாந்த், மைத்திரிபால சிறிசேன ஆட்சிக்கு வந்ததும், மைத்திரிக்கு குடைபிடித்த விஜயகாந்த் இறுதியில் தமிழர் விடுதலைக் கூட்டணியில் இணைந்து மாநகர முதல்வராகப் போட்டியிடவுள்ளார்.

 

அரசியலாக்கப்பட்ட வவுனியா பேருந்து நிலையப் பிரச்சனை!

கடந்த மூன்று நாட்களாக இலங்கை போக்குவரத்துச் சங்கத்தின் வடபிராந்திய ஊழியர்களின் பணிப்புறக்கணிப்புக்கு தீர்வு காணப்பட்டபோதிலும், அவர்கள் இதுவரை போராட்டத்தைக் கைவிடவில்லை.

இச்சிக்கலை தீர்க்கும் விதமாக இன்று யாழ்ப்பாணத்தில் சந்திப்பொன்று நடந்தது. இச்சந்திப்பில் இலங்கை போக்குவரத்துச் சபை அதிகாரிகளும் கொழும்பிலிருந்து வருகை தந்திருந்தனர். தனியார் போக்குவரத்து சங்க பிரதிநிதிகளும் இதில் கலந்து கொண்டனர்.

வடமாகாண முதலமைச்சர் தலைமையில் நடைபெற்ற இக்கூட்டத்தில், புதிய பேருந்து நிலையத்தில், இலங்கை போக்குவரத்துச் சங்கத்தினருக்கு தனியாக இடம் ஒதுக்கித் தருமாறு விடுக்கப்பட்ட கோரிக்கைக்கு இணக்கம் தெரிவிக்கப்பட்டது. அத்துடன், பழைய பேருந்து தரிப்பிட வர்த்தகர்களுக்கு, அவர்கள் விரும்புமிடத்து புதிய பேருந்து நிலையத்தில் வர்த்தக நடவடிக்கையை மேற்கொள்வதற்கு ஒழுங்குகள் செய்துதரப்படும் எனவும் உறுதியளிக்கப்பட்டது.

இதற்கு தனியார் போக்குவரத்துச் சங்க ஊழியர்கள் இடப்பற்றாக்குறையைக் காரணம் காட்டி எதிர்ப்புத் தெரிவித்ததையடுத்து, அருகிலுள்ள காணியில் வர்த்தக நடவடிக்கையை மேற்கொள்ள நடவடிக்கை எடுக்கப்படும்என உறுதியளிக்கப்பட்டது.

இந்நிலையில், இலங்கைப் போக்குவரத்துச் சங்க ஊழியர்கள் சிலர் தமிழ்த் தேசியக் கூட்டமைப்பின் நாடாளுமன்ற உறுப்பினருடன் கொழும்பில் இலங்கை போக்குவரத்துச் சங்க அதிகாரிகளைச் சந்தித்து, போக்குவரத்துச் சங்க அமைச்சரை வவுனியாவுக்கு அழைத்துவந்து அவர் வழங்கும் தீர்வின் பின்னரே போராட்டத்தைக் கைவிடுவதாக போர்க்கொடி தூக்கியுள்ளனர்.

அத்துடன், புதிய பேருந்து நிலையத்தை பிரித்து தமது பிரதேசத்தைச் சுற்றி மதில் எழுப்பவேண்டுமெனவும் கோரியுள்ளனர்.

இப்போராட்டத்தின் பின்னணியில் தமிழ்த் தேசியக் கூட்டமைப்பின் நாடாளுமன்ற உறுப்பினர் சுமந்திரனே செயற்படுவதாகவும், ஏற்கனவே விக்னேஸ்வரனுக்கும் சுமந்திரனுக்கும் இடையில் ஏற்பட்ட முரண்பாட்டுக்கு பழிவாங்கும் நோக்கிலேயே சுமந்திரன் இவ்வாறு செயற்படுவதாக தெரியவந்துள்ளது.

எது எவ்வாறிருப்பினும் கடந்த மூன்று நாட்களாக பல்வேறு வழிகளில் அல்லலுறும் மக்களுக்கு இலங்கைப் போக்குவரத்துச் சங்க ஊழியர்களின் செயற்பாடு அதிருப்தியை ஏற்படுத்தியுள்ளது.