All posts by inioru admin

பியர் விலைக்குறைப்பால், கள்ளு விற்பனையில் வீழ்ச்சி!

பியர் விலைக் குறைப்பினால் நாட்டில் கள்ளுவிற்பனை வீழ்ச்சியடைந்துள்ளதாக வடமாகாண பனை அபிவிருத்திக் கூட்டுறவுச் சங்கம் தெரிவித்துள்ளது. அத்துடன் 50 வீதமான கள்ளுப்போத்தல்கள் விற்பனையின்றி தேங்கிக் கிடப்பதாகவும் அக்கூட்டுறவுச் சங்கம் அறிவித்துள்ளது.

இது தொர்பாக பனை அபிவிருத்திக் கூட்டுறவுச் சங்கங்களின் வலிகாமப் பிரதேசத்தின் தலைவர் செல்வராசா தெரிவிக்கையில்,

பியரின் விலையை அரசாங்கம் குறைத்துள்ளதால் உள்ளூர் உற்பத்திக் கள்ளின் நுகர்வு குறைவடைந்துள்ளதுடன், தென்பகுதிக்கு ஏற்றுமதி செய்யப்பட்டு வந்த கள்ளின் அளவும் குறைவடைந்துள்ளது எனத் தெரிவித்தார்.

இதனால் கள்ளு இறக்கி தமது வாழ்வாதாரத்தை முன்னெடுத்துச் செல்லும் பல குடும்பங்கள் மோசமாகப் பாதிக்கப்பட்டுள்ளன.

இந்நிலையில், மைத்திரிபால சிறிசேன ‘போதையற்ற நாட்டினை ‘ உருவாக்குவோம் எனக் கூறிக்கொண்டு நாடுபூராகவும் பல நிகழ்வுகளை நடத்தி வருகின்றார்.

ஆனால் மறுபுறம் வரவு-செலவுத் திட்டத்தில் பியரின் விலைiயைக் குறைக்கின்றது அரசாங்கம்.

ஒருபுறம் மக்களுக்கு போதையற்ற நாட்டை உருவாக்குவதற்கு தாம் போராடுவதாகக் காட்டிக்கொண்டு மறுபுறம் பியரின் விலையைக் குறைத்து மக்களை போதைக்கு அடிமையாக்கும் நடவடிக்கையில் அரசாங்கம் இறங்கியுள்ளது.

நாட்டைக் கடனில் தள்ளிய அரசாங்கம், ஒருபுறம் மக்களின் பணத்தினைக் கொள்ளையடித்து, மக்களை போதைக்கு அடிமையாக்குவதுடன், ஆட்சியிலுள்ளவர்கள் தமது அதிகாரங்களைப் பயன்படுத்தி சொத்துக்களைக் கொள்ளையடிப்பதுடன், கொள்ளை இலாபம் ஈட்டுவதற்காக நாடுதழுவிய ரீதியில் பல மதுபான உற்பத்தி நிலையங்களைத் திறந்து வருகின்றனர் என்பது வெளிப்படை.

அத்துடன், உள்ளூரில் உற்பத்தி செய்யப்பட்டு வரும் கள்ளுக்கு வரி விதிக்கும் அரசாங்கம், இயற்கையான கள்ளுக்கு தடைவிதித்து அத்தொழிலில் ஈடுபட்டு வரும் மக்களை மேலும் வறுமைக்கோட்டுக்குப்படுத்தும் நடவடிக்கையிலும் இறங்கியுள்ளது.

வித்தியாதரனை யாழ். மாநகர முதல்வராக்கினால் உதயன் தமிழ்த் தேசியக் கூட்டமைப்புக்கு எதிராகச் செய்தி வெளியிடும் – சரவணபவன்!

வித்தியாதரனை யாழ். மாநகரசபையின் முதல்வராக்கினால் யாழிலிருந்து வெளிவரும் உதயன் நாளிதழ் தமிழ்த் தேசியக்கூட்டமைப்புக்கு எதிராகச் செய்தி வெளியிடும் என அப்பத்திரிகையின் ஸ்தாபகரும், தமிழ்த் தேசியக் கூட்டமைப்பின் நாடாளுமன்ற உறுப்பினருமான சரவணபவன் இரா.சம்பந்தனுக்கு எச்சரிக்கை விடுத்துள்ளார்.

உள்ளூராட்சித் தேர்தலின் ஆசனப் பங்கீட்டுப் பிரச்சனை ஓரளவு தீர்த்தபின்னர், தற்போது, யாழ். மாநகர முதல்வர், தெரிவில் வித்தியாதரனுக்கு எதிராக அவரது மைத்துனரான சரவணபவன் எதிர்ப்பு வெளியிட்டு வருகின்றார்.

கடந்த ஜனாதிபதித் தேர்தலின்போது தமிழ்த் தேசியக் கூட்டமைப்பில் இணைவதற்கு வித்தியாதரன் எடுத்த முயற்சி தோல்வியில் முடிவடைந்தது.

இதனால், அவர் முன்னாள் போராளிகள் என சிலரை இணைத்து ஜனநாயகப் போராளிகள் கட்சியை உருவாக்கி அதில் போட்டியிட்டு படுதோல்வியைச் சந்தித்திருந்தார்.

இந்நிலையில், வித்தியாதரனை யாழ். மாநகர முதல்வராக நியமிக்க தமிழ்த் தேசியக் கூட்டமைப்பின் தலைவர் இரா.சம்பந்தன் மற்றும்சுமந்திரன் ஆகியோர் விருப்பம் தெரிவித்த நிலையிலேயே சரவணபவன் இதற்கு எதிர்ப்பு வெளியிட்டுள்ளார்.

இதனால் வித்தியாதரனின் யாழ். மாநகர முதல்வராகும் கனவும் பொய்த்துப்போய்விட்டது.

யாழ். கோட்டையில் இராணுவத்தின் மாபெரும் உணவுத் திருவிழா!

யாழ். கோட்டையில் எதிர்வரும் 15ஆம் நாள் தொடக்கம் 17ஆம் நாள் வரை சிறிலங்கா இராணுவத்தினரால் மிகவும் பிரம்மாண்டமாக உணவுத் திருவிழா நடாத்தப்படவுள்ளது.

வடமாகாண விடுதிகள் சங்கத்துடன் இணைந்து இவ்வுணவுத் திருவிழா நடத்தப்படவுள்ளதாக சிறிலங்கா இராணுவம் அறிவித்துள்ளது.

யாழ். கோட்டைக்கு முன்பாக நடைபெறவுள்ள இத்திருவிழாவில், இராணுவத்தின் இசை நிகழ்ச்சியும் நடைபெறவுள்ளது.

2009ஆம் ஆண்டு யுத்தம் நிறைவடைந்த பின்னர் வடக்கு மாகாணம் எங்கும் ஏ-9 வீதியை அண்டி இராணுவம் பல உணவு விடுதிகளைத் திறந்து வர்த்தக நடவடிக்கையில் ஈடுபட்டு வருகின்றது. அத்துடன், மக்களின் காணிகள் இராணுவத்தினரால் அபகரிக்கப்பட்டு பயிர்ச்செய்கை மேற்கொள்ளப்பட்டு வருகின்றது.

இராணுவத்தின் வர்த்தக நடவடிக்கைக்கு பல்வேறு மட்டங்களிலிருந்து எதிர்ப்புக்களை வெளியிட்டாலும், இராணுவமோ வடக்கு மாகாணத்தில் திட்டமிட்டு வர்த்தக நடவடிக்கையில் ஈடுபட்டு வருகின்றது.

அத்துடன், முடி திருத்துமிடம், தையலகம் போன்றவற்றையும் இராணுவம் நடத்தி வருவதினால் மக்கள் பெருமளவில் பாதிக்கப்பட்டு வருகின்றனர். இதற்கெதிராக மக்கள் போராடியும் அரசாங்கம் எந்தவித நடவடிக்கையும் எடுக்கவில்லை.

இன்னிலையில், தற்போது உணவுத் திருவிழாவை ஆரம்பிப்பதுடன், இசைநிகழ்வினையும் இராணுவத்தினர் நடத்தவுள்ளனர்.

 

தேர்தலில் போட்டியிட வரதராஜப் பெருமாளுக்கு இலங்கைக் குடியுரிமை!

வடக்குக் கிழக்கின் முன்னாள் முதலமைச்சரும், ஈபிஆர்எல்எவ் கட்சியின் பத்மநாபா அணியின் தலைவருமான வரதராஜப் பெருமாளுக்கு நேற்று இலங்கை அரசாங்கத்தினால் இலங்கைக் குடியுரிமை வழங்கப்பட்டுள்ளது.

நடக்கவிருக்கும் தேர்தலில் போட்டியிடக்கூடியவாறு இக்குடியுரிமை வழங்கப்பட்டுள்ளதாக அரசியல் அவதானிகள் கருத்து வெளியிட்டாலும், வரதராஜப்பெருமாளை மீண்டும் வடக்கின் முதலமைச்சராக நியமிப்பதில் இந்தியா திரைமறைவில் காய்களை நகர்த்திவருவதாக தகவல்கள் கசிந்தது.

இந்நிலையிலேயே, வரதராஜப்பெருமாளுக்கு குடியுரிமை வழங்கப்பட்டுள்ளது. இந்திய அரசாங்கத்தினால் இலங்கையில் தமிழர் பிரதேசங்களான வடக்குக் கிழக்கு மாகாணத்தில் அமைக்கப்பட்ட பொம்மை அரசாங்கத்துக்கு முதலமைச்சராக நியமிக்கப்பட்டவரே வரதராஜப்பெருமாள்.

பின்னர், இந்திய இராணுவம் இலங்கையிலிருந்து வெளியேறியபின் அச்சுறுத்தல் காரணமாக இந்தியாவில் தஞ்சமடைந்த வரதராஜப் பெருமாளுக்கு இந்திய அரசாங்கம் பாதுகாப்பு வழங்கியது.

சுமார் 28 ஆண்டுகளாக இந்தியாவில் வசித்துவந்த வரதராஜப்பெருமாள் யுத்தம் நிறைவடைந்த பின்னர் மீண்டும் சுற்றுலா விசாவில் இலங்கைக்கு வருகை தந்தார்.

கடந்த வருடம் இலங்கைக் குடியுரிமையைப் பெற விண்ணப்பித்திருந்த வரதராஜப் பெருமாளுக்கு குடியுரிமை மறுக்கப்பட்டிருந்தது.

இந்நிலையில், இந்தியாவின் அழுத்தத்தினால் தற்போது அவருக்கு இலங்கைக் குடியுரிமை வழங்கப்பட்டுள்ளது எனத் தெரியவந்துள்ளது.

அடுத்த யாழ். மாவட்ட மாநகர முதல்வராக வித்தியாதரன்?

உள்ளூராட்சித் தேர்தல் களம் சூடுபிடித்துள்ள நிலையில் இன்னொரு புறம் யாழ். மாநகரசபை முதல்வருக்கான தெரிவும் தற்போது சூடுபிடிக்க ஆரம்பித்துள்ளது.

யாழ். மாவட்டத்தைப் பொறுத்தவரையில், யாழ். மாநகர சபையின் முதல்வராக  தமிழ்த் தேசியக் கூட்டமைப்பின் உறுப்பினரே தெரிவுசெய்யப்படவேண்டும்.அதனை அவர்கள் மற்றயகட்சிகளுக்கு விட்டுக்கொடுக்கத் தயாரில்லை.

யாழ். மாநகரசபை முதல்வர் தேர்தலில், தமிழ்த் தேசியக் கூட்டமைப்பு, தமிழ்த் தேசிய மக்கள் முன்னணி, ஈபிஆர்எல்எவ், ஈபிடிபி, முற்போக்கு தமிழ்த் தேசியக் கட்சி உட்பட பல கட்சிகள் போட்டியிடவுள்ளன.

ஆனாலும், தமிழ்த் தேசியக் கூட்டமைப்புக்குள்ளிருந்து, ஆறுபேர் மாநகர முதல்வர் கதிரைக்குப் போட்டியிடுகின்றனர்.

இவர்களுள், யாழ். பல்கலைக்கழகத்தின் முன்னாள் துணைவேந்தர் பாலசுந்தரப் பிள்ளையும் ஒருவர். இவர் ஆரம்பத்தில் தேர்தலில் போட்டியிட மறுத்தாலும், இறுதியில் சம்மதித்துள்ளார்.

அடுத்ததாக, ராஜதேவன், இவர் முன்னாள் மாநகரசபை முதல்வர். வெளிநாட்டில் வசிக்கும் இவர் தேர்தலில் போட்டியிடப்போவதாக சிறிலங்காவுக்கு வருகை தந்துள்ளார்.

அத்துடன், வடமாகாணசபை உறுப்பினர் ஜெயசேகரனும் மாநகரசபையின் முதல்வராக வருவதற்கு விருப்பம் தெரிவித்துள்ளார். ஆனால், ஜெயசேகரனை நியமிப்பதற்கு தமிழரசுக் கட்சியில் சிலர் விரும்பவில்லை.

அடுத்ததாக முன்னாள் நாடாளுமன்ற உறுப்பினர் சொலமன் சிறில் மற்றும் ஆர்னோல்ட் ஆகிய இருவரில் சொலமன் சிறில் அரசியலில் பிரகாசிக்காதவராகையால், அவர் அனைவராலும் நிராகரிக்கப்பட்ட நிலையில், ஆர்னோல்டால் அதிக வாக்கினைப் பெறமுடியும். ஆர்னோல்ட் அதிக வாக்குகளைப் பெற்றாலும், அவர் காப்புறுதி நிறுவனம் ஒன்றில் அதிகாரியாகப் பணி புரிகின்றார். இதனால் இவரை முதல்வராக நியமிப்பதற்கு கட்சி எதிர்ப்புத் தெரிவித்துள்ளது.

இறுதியாக, தமிழ்த் தேசியக் கூட்டமைப்பின் நாடாளுமன்ற உறுப்பினர் சரவணபவனின் மச்சானான வித்தியாதரனை நியமிப்பதற்கு கட்சியின் தலைவர் இரா.சம்பந்தன் பேச்சாளர் சுமந்திரன் ஆகியோர் விருப்பம் தெரிவித்துள்ளனர். இதற்கு சரவணபவன் கடுமை எதிர்ப்பைத் தெரிவித்துள்ளார். இருப்பினும் அவரைச் சமாதானப்படுத்தி வித்தியாதரனை அடுத்த மாநகர முதல்வராக நியமிப்பதற்கு இரா.சம்பந்தன் முயற்சி எடுத்துள்ளார்.

இன்னும் இரண்டொரு நாட்களுக்குள் வித்தியாதரன் யாழ். மாநகர முதல்வர் வேட்பாளராக  நியமிக்கப்படுவார் என எதிர்பார்க்கப்படுகின்றது.

கிளிநொச்சியில் அடையாள அழிப்பை மேற்கொள்வதற்கு துணைபோகும் சிறிதரன்!

தமிழீழ விடுதலைப் புலிகள் காலத்தில் ஆதரவற்ற ஆண் குழந்தைகளுக்கென உருவாக்கப்பட்ட காந்தரூபன் அறிவுச்சோலை எஸ்.கே. அறிவுச்சோலையாக பெயர் மாற்றம்செய்யப்பட்டு அடையாள அழிப்பு மேற்கொள்ளப்பட்டுள்ளது. இந்த அடையாள அழிப்பானது தமிழ்த் தேசியக் கூட்டமைப்பின் நாடாளுமன்ற உறுப்பினர் சிறிதரனின் அனுசரணையுடன் நடந்தேறியுள்ளது.

1993ஆம் ஆண்டு, தனது பெற்றோரைச் சிறுவயதில் இழந்த மேஜர் காந்தரூபனின் வேண்டுகோளுக்கமைய,  பெற்றோரை இழந்த சிறுவர்களின் கல்விக்காக விடுதலைப் புலிகளின் தலைவர் பிரபாகரனால் உருவாக்கப்பட்டது காந்தரூபன் அறிவுச்சோலை.

2009 ஆண்டு யுத்தம் நிறைவடைந்த பின்னர் திருவையாறு 2ஆம் பகுதியில் விடுதலைப் புலிகளின் கணினிப் பிரிவு இயங்கிவந்த 14 ஏக்கர் காணியில் இச்சிறுவர் இல்லத்தை அமைப்பதற்காக நாடாளுமன்ற உறுப்பினர் சிறிதரனை எஸ்.கே. என அழைக்கப்படும் சுவிஸ் வர்த்தகரான கதிர்காமநாதன் அணுகியுள்ளார்.

குறித்த 14 ஏக்கர் காணிகளும் பொதுமக்களுக்குச் சொந்தமானவை என்பதுடன்,  சிறுவர் இல்லம் அமைப்பதற்காக விடுதலைப் புலிகளினால் அக்காணிகளின் சொந்தக்காரர்களுக்கு பணம் கொடுத்துப் பெறப்பட்டது. அதன் பின்னர் குறித்த நிலப்பரப்பில் சிங்களப் பொறியியலாளர்கiளால் சிறுவர் இல்லங்களுக்கான கட்டடங்கள் அமைக்கப்பட்டது. இருப்பினும் அதில் குறித்த சிறுவர் இல்லம் இயங்கவில்லையென்பதுடன், விடுதலைப்புலிகளின் கணினிப்பிரிவு இயங்கி வந்தமையும் குறிப்பிடத்தக்கது.

யுத்தம் நிறைவடைந்தபின், இக்காணிகள் இராணுவத்தினரால் ஆக்கிரமிக்கப்பட்டிருந்தது. அக்காணிகளைப் பெறுவதற்கு  காணி உரிமையாளர்களால் கரைச்சிப் பிரதேச சபையில் வேண்டுகோள் விடுக்கப்பட்டமையும் குறிப்பிடத்தக்கது.

இந்நிலையில், இந்த 14 ஏக்கர் நிலப்பரப்பும் கரைச்சிப் பிரதேச சபையினால் கதிர்காமநாதனுக்கு வழங்கப்பட்டுள்ளது. ஒரு பிரதேச சபையினால் தனியொருவருக்கு 14 ஏக்கர் காணியை வழங்கமுடியாது. இதற்காக, அக்கிராமத்தில் சிறிதரனின் ஆதரவாளர்கள் சிலரின் பெயரை இணைத்து, தமது கிராமத்துக்கு சிறுவர் இல்லம் அமைப்பதற்கான அனுமதியை வழங்குமாறு கோரி கரைச்சிப்  பிரதேச செயலகம், மாவட்டச் செயலகம் மற்றும் கிளிநொச்சி மாவட்ட ஒருங்கிணைப்புக் குழுவுக்கு கதிர்காமநாதனூடாக அனுப்பிவைக்கப்பட்டது.

கிளிநொச்சி மாவட்ட ஒருங்கிணைப்புக் குழுக் கூட்டத்தில் இதற்கான அனுமதியும் வழங்கப்பட்டது.

இந்நிலையில், காணி உரிமையாளர்களில் இருவர் சிறிதரனிடம் முறையிட்டபோது, உங்களது காணிகளைப் பெற்றுத் தருவதாக இருந்தால், முன்னாள் போராளிகளுக்கு உதவுவதற்கு தலா இரண்டு இலட்சம் ரூபா வழங்கவேண்டுமெனவும், இல்லாவிட்டால் உங்கள் காணியைப் பெற்றுத் தரமுடியாது எனவும் தெரிவித்துள்ளார்.

இதனையடுத்து உரிமையாளர்களான கணபதிப்பிள்ளை சண்முகசுந்தரம் மற்றும் திருநாவுக்கரசு பொன்னம்பலம் ஆகியோர் நீதிமன்றத்தில் வழக்குப் பதிவு செய்துள்ளனர்.

யுத்தம் நிறைவடைந்த பின்னர், செஞ்சோலை மற்றும் காந்தரூபன் அறிவுச்சோலைப் பிள்ளைகள் வவுனியாவில் இயங்கும் சிவன் ஆலயத்தினரால் பராமரிக்கப்பட்டு வந்தனர். பின்னர் செஞ்சோலை சிறுவர் இல்லம் கிளிநொச்சியில், கே.பி என அழைக்கப்படும் குமரன் பத்மநாதனால் இயக்கப்பட்டு வருகின்றது.

இதைவிட, கிளிநொச்சியில், கருணா நிலையம், மகாதேவா சிறுவர் இல்லம், காந்தி நிலையம் போன்ற சிறுவர் இல்லங்கள் இயங்கி வருகின்றன. இந்நிலையில், கிளிநொச்சியில் சிறுவர் இல்லம் ஒன்று அமைப்பதற்கு அவசியமேதுமில்லை.

அத்துடன், அரச சட்டத்தின்படி கண்டபடி சிறுவர் இல்லங்கள் அமைக்கமுடியாது. இந்நிலையிலேயே, சிறிதரன் அவர்கள் அரசாங்கத்திலுள்ள சில அதிகாரிகளுக்கூடாக, காந்தரூபன் அறிவுச்சோலை பதிவெண்ணில் எஸ்கே. அறிவுச்சோலைக்கான அனுமதியைப் பெற்றுள்ளமை தெரியவந்துள்ளது.

நாடாளுமன்ற உறுப்பினர் சிறிதரன், மக்களுக்கு தன்னையொரு விடுதலைப் புலிகளின் விசுவாசியெனக் காட்டுவதற்காக மாவீரர் தினம், முள்ளிவாய்க்கால் நினைவு தினம் என்பவற்றைக் கொண்டாடிக்கொண்டு மறுபக்கம், இவ்வாறு அடையாள அழிப்புகள் செய்துவருகின்றமை கண்கூடு.

கூட்டமைப்பை நாடிபிடித்துப் பார்க்கும் ரணில்!

உள்ளூராட்சித் தேர்தல் சூடுபிடித்திருக்கும் நிலையில், முக்கிய கட்சிகளான சிறிலங்கா சுதந்திரக் கட்சி மற்றும் ஐக்கியதேசியக் கட்சி உட்பட தமிழ்த் தேசியக் கூட்டமைப்பு போன்ற கட்சிகளிலிருந்து கட்சித் தாவல்கள், பேச்சுவார்த்தைகள் என தேர்தல் களம் சூடுபிடிக்கத் தொடங்கியுள்ளது.

இந்நிலையில், தமிழ்த் தேசியக் கூட்டமைப்பின் நிலைப்பாடு தொடர்பாக ரணில் விக்கிரமசிங்க நாடிபிடித்துப் பார்க்கும் செயலில் இறங்கியுள்ளார்.

ஏற்கனவே மைத்திரி தலைமையிலான சிறிலங்கா சுதந்திரக் கட்சியானது மகிந்த அணியுடன் இணைந்து போட்டியிடுவதற்கு சில நிபந்தனைகளை விதித்துள்ளதாகவும், அந்த நிபந்தனைகளுக்கு மைத்திரி தலைமையிலான சிறிலங்கா சுதந்திரக் கட்சி ஆதரவு வழங்குமாயிருந்தால், தமிழ்த் தேசியக் கூட்டமைப்பு ஐக்கிய தேசியக் கட்சிக்கு ஆதரவு வழங்கும் என தமிழ்த் தேசியக் கூட்டமைப்பின் பேச்சாளர் எம்.ஏ.சுமந்திரன் தெரிவித்துள்ளார்.

இந்நிலையிலேயே, தமிழ்த் தேசியக் கூட்டமைப்பின் ஆசனப் பங்கீட்டில் முக்கியமாக முல்லைத்தீவு மற்றும் மடடக்களப்பு மாவட்டங்களில் முரண்பாடுகள் உருவாகி தமிழரசுக் கட்சியைத் தவிர அனைத்துக் கட்சிகளும் இந்தியாவின் நிகழ்ச்சிநிரலுக்கேற்ப ஆனந்தசங்கரியின் தமிழர் விடுதலைக் கூட்டணியுடன் இணைந்துள்ளன.

இதனையடுத்து சிறிலங்காப் பிரதமர் ரணில் விக்கிரமசிங்க, தமிழ்த் தேசியக் கூட்டமைப்பின் தலைவர் இரா. சம்பந்தனுக்குத் தொலைபேசி அழைப்பெடுத்து, பிரிந்து சென்ற கட்சியினை ஒன்றிணைக்குமாறு பணிப்புரை விடுத்திருந்தார்.

இந்நிலையில், தமிழ்த் தேசியக் கூட்டமைப்பின் பங்காளிக் கட்சிகளுடன் தமிழ்த் தேசியக் கூட்டமைப்பின் தலைவர் இரா.சம்பந்தன் தனித்தனியாக சந்தித்துப் பேசி வருவதுடன், தமிழ்த் தேசியக் கூட்டமைப்பின் வெற்றிக்காக தான் எந்த விட்டுக்கொடுப்புக்கும் தயார் என அறிவித்துள்ளார்.

இதனையடுத்து, ரணில் – கூட்டமைப்பு இணைப்பு உறுதியாகியுள்ள நிலையில், சிறிலங்கா சுதந்திரக்கட்சி அரசாங்கத்திலிருந்து விலகும் பட்சத்தில் ரணில் விக்கிரமசிங்க தலைமையிலான ஆட்சி உறுதியாகியுள்ளது.

இத்தேர்தலில் ரணில் – கூட்டமைப்பு இணைப்பினாலோ, அல்லது ஏனைய தமிழ்க் கட்சிகளின் இணைவினாலோ தமிழ் மக்களுக்கு எந்தவித நன்மையும் கிடைக்கப்போவதில்லை என்பதே நிதர்சனமாகும்.

ஆசனப் பங்கீட்டு மோதலால் தனிமரமாகிப்போன தமிழரசுக் கட்சியும், இந்தியாவின் சூழ்ச்சிக்குப் பலியாகிய தமிழர் விடுதலைக் கூட்டணியும்!

உள்ளூராட்சித் தேர்தல் நடைபெறவுள்ள நிலையில், தமிழ்த் தேசியக் கூட்டமைப்பில் அங்கம் வகிக்கும் பங்காளிக் கட்சிகளுக்குள் இடம்பெற்ற முரண்பாடினால், தமிழரசுக் கட்சியைத் தவிர அனைத்துக் கட்சிகளும் தமிழத் தேசியக் கூட்டமைப்பிலிருந்து விலகி, ஆனந்தசங்கரியின் தலைமையிலுள்ள தமிழர் விடுதலைக் கூட்டணியில் இணைந்துள்ளன.

இதனால் தனிமரமாகிப்போன தமிழரசுக் கட்சி, தனது இருப்பைத் தக்கவைத்துக்கொள்வதற்காக அங்கத்துவக் கட்சிகளில், மக்களின் செல்வாக்கினைப் பெற்றுள்ள உறுப்பினர்களைத் தமிழரசுக் கட்சிக்குள் இணைப்பதற்கு வெளிப்படையாகவே பேரம்பேசி வருகின்றது.

இதற்குச் சான்றாக அண்மையில் ஈபிஆர்எல்எவ் கட்சியைச் சேர்ந்தவரும், முல்லைத்தீவு மாவட்டத்தைப் பிரதிநிதித்துவப்படுத்தும் வடமாகாணசபை உறுப்பினர் ரவிகரன் தமிழரசுக் கட்சியின் சலுகைகளுக்கு விலைபோய் அக்கட்சியில் இணைந்துள்ளார்.

இந்த அற்ப சலுiகைகளை மறைப்பதற்காக ‘தலைவர் பிரபாகரன் கைகாட்டிய கட்சியைவிட்டு விலகுவதற்கு தான் தயாரில்லையெனவும் அறிக்கையும் விடுத்திருந்தார்.

இலங்கை அரசியலில் தேர்தல் காலங்களில் விடுதலைப் புலிகளே பேசுபொருள். அதற்கமையவே ரவிகரனும் தனது சுயலாபத்துக்காக விடுதலைப் புலிகளின் தலைவர் பிரபாகரiனை ஓர் ஆயுதமாகக் கையாண்டுள்ளார்.

இந்நிலையில், தமிழரசுக் கட்சி தமிழ்த் தேசியக் கூட்டமைப்புக்குள் எதேச்சதிகாரப் போக்குடன் செயற்படுவதாகவும், அக்கட்சியின் கொள்கையான வடக்குக் கிழக்கு இணைப்பு, சமஷ்டியாட்சி முறை என்பவற்றையெல்லாம் கைவிட்டுவிட்டு, அரசாங்கத்தின் நலனுக்காக செயற்படுகின்றது எனக் குற்றம சாட்டிய அங்கத்துவக் கட்சிகள் அனைத்தும் ஆனந்தசங்கரியின் தமிழர் விடுதலைக் கூட்டணியின்கீழ் அணிதிரண்டுள்ளனர்.

தமிழர் விடுதலைக் கூட்டணியின் கொள்கையாக ஒற்றையாட்சியின்கீழ், 13ஆவது அரசியலமைப்பின்படி ஆட்சியமைப்பதே. இதனைத்தான் 1990ஆம் ஆண்டு இந்தியா தமிழ் மக்கள் மீது திணித்திருந்தமையும் குறிப்பிடத்தக்கது.

தமிழ் மக்கள் எந்த உரிமைக்காக காலம் காலமாகப் போராடினார்களோ, அவற்றையெல்லாம் கைவிட்டுவிட்டு, தற்போது ஆரம்ப கட்டத்திற்கே  அரசியல்வாதிகள் மக்களை இழுத்துச் சென்றுள்ளனர். இதனால் ஆதாயமடைவது இந்தியாவும், சிறிலங்கா அரசுமேயொழிய, தமிழ் மக்கள் இல்லையென்பதை இந்த அரசியல்வாதிகள் புரிந்துகொள்வார்களா?