தமிழுக்கு ஆபத்து ஹிந்தி மொழியல்ல;​ ஆங்கில மொழியால்தான் நிகழும் – ச.தமிழ் செல்வன்

உலகத் தமிழ்ச் செம்மொழி முதல் மாநாடும்,​​ தமிழாசிரியர் நிலையும் என்ற தலைப்பில் மாநில அளவிலான சிறப்பு மாநாடு மதுரையில் ஞாயிற்றுக்கிழமை ​நடைபெற்றது.​ ​ இதில் ச.தமிழ்ச்செல்வன் பேசியது: காங்கிரஸ் கட்சிக்கும் சுதந்திரத்துக்கும் என்ன உறவு உள்ளதோ அதே உறவு போன்றதுதான் தமிழகத்தில் திராவிடக் கட்சிகளுக்கும் தமிழுக்கும் உள்ளது.​ ஆனால் 43 ஆண்டுகால திராவிடக் கட்சிகளின் ஆட்சியால்,​​ வட்டார வழக்குகள் அகராதிகள் வெளிக்கொணரப்படவில்லை.​ வெளிக்கொண்டுவரப்பட்ட ஒன்றிரண்டு வட்டார வழக்கு அகராதிகளும் தனிப்பட்ட நபர்களின் முயற்சியாலேயே வெளிக் கொண்டு வரப்பட்டுள்ளன. ​ ​ பல்கலைக்கழகங்களிலும்,​​ கல்லூரிகளிலும் மானுடவியல் மற்றும் சமூகவியல் குறித்த இளங்கலைப் படிப்புகள் இல்லை.​ கிராமியப் பாடல்களுக்கும் இதே நிலைதான்.​ இது ஆராய்ச்சி அளவில் மட்டுமே வழங்கப்பட்டு வருகிறது.​ அதேபோல் தமிழ் நாடகங்களுக்கான சிறப்புப் பள்ளிகளும் இதுவரை ஏற்படுத்தப்படவில்லை. ​ ​ அடுத்த 10 ஆண்டுகளில் 300 ​ மொழிகள் அழிந்துவிடும் என யுனெஸ்கோ தெரிவித்துள்ளது.​ நமது மத்திய அரசின் உலகமயமாக்கல் கொள்கையால் அடுத்த 50 ஆண்டுகளில் இந்தியாவில் மட்டும் தமிழ் உள்பட 200 மொழிகள் அழியும் எனவும் தகவல்கள் தெரிவிக்கின்றன.​ தமிழுக்கு ஆபத்து ஹிந்தி மொழியல்ல;​ ஆங்கில மொழியால்தான் நிகழும். தமிழகத்தில் தமிழ்வழிக் கல்வியின் தரம் குறைவாக இருப்பதாக அரசே திட்டமிட்டு பரப்பி வருகிறது.​ இது மறைமுகமாக தனியார் பள்ளிகள் வளர்ச்சிக்கான ஆதரவுப் பிரசாரமே.​ இதையும் மீறி தமிழ்வழிக் கல்வியில் படித்த அரசுப் பள்ளி மாணவ,​​ மாணவியர் சாதிக்கும் அளவுக்கு ஆசிரியர்கள் பயிற்றுவித்து வருவதும் குறிப்பிடத்தக்கது. ​ ​ முதல்வர் கருணாநிதிக்கு எப்போதுமே பிரமாண்டம் என்பது பிடிக்கும்.​ 133 அடி உயரத்தில் திருவள்ளுவர் சிலை அமைத்தது,​​ பிரமாண்டமான வள்ளுவர் கோட்டம்,​​ சட்டப்பேரவைக் கட்டடம் என இதற்குச் சான்று கூறலாம்.​ அதன்படியே தற்போது உலகத் தமிழ்ச் செம்மொழி மாநாடும் நடத்தப்படவுள்ளது என்றார். ​ மாநாட்டுக்கு தமிழ்நாடு தமிழாசிரியர் ஒருங்கிணைப்புக் குழு மாநில ஒருங்கிணைப்பாளர் இதயகீதன் தலைமை வகித்தார்.​ கருமாத்தூர் கல்லூரி தமிழ்த் துறைப் பேராசிரியர் வெ.சுந்தரவள்ளி,​​ எழுத்தாளர் சு.வெங்கடேஷன்,​​ தமிழாசிரியர்கள் நா.முத்துநிலவன்,​​ பிரின்ஸ் கசேந்திரபாபு,​​ காந்திகிராமம் கிராமியப் பல்கலைக்கழகத் தமிழ்த் துறைப் பேராசிரியர் மு.குருவம்மாள் உள்ளிட்டோர் பங்கேற்றனர். மாநாட்டில் நிறைவேற்றப்பட்ட தீர்மானங்கள்: தமிழ்நாட்டில் தமிழை முழுமையாக ஆட்சி மொழியாக்க வேண்டும்,​​ தமிழ் மொழியை இந்தியாவின் ஆட்சி மொழிகளில் ஒன்றாக்க வேண்டும். தமிழ்மொழியைப் பயிற்று மொழியாகவும்,​​ பாடமொழியாக்கிடவும் வேண்டும்,​​ காலியாக உள்ள சுமார் 7 ஆயிரம் தமிழாசிரியர் பணியிடங்களை நிரப்பி,​​ புதிய தமிழாசிரியர் பணியிடங்களை உருவாக்கவேண்டும்,​​ கல்லூரிகள்,​​ பல்கலைக்கழகங்களில் போதிய தமிழ் விரிவுரையாளர்களை நியமிக்க வேண்டும். ​ ​ ​ இலங்கைத் தமிழர்களைப் பாதுகாத்து சமஉரிமை வழங்கி சொந்த இடத்தில் குடியமர்த்த வேண்டும்,​​ தமிழ் இலக்கியம் அனைத்தையும் உலகின் பிற மொழிகளில் மொழி பெயர்க்க வேண்டும்,​​ தமிழாசிரியர்களுக்கும் தமிழ்ப் பேராசிரியர்களுக்கும் சிறப்புப் பயிற்சியும்,​​ ஊக்க ஊதியமும் வழங்க வேண்டும் உள்ளிட்ட தீர்மானங்கள் நிறைவேற்றப்பட்டன.​

2 thoughts on “தமிழுக்கு ஆபத்து ஹிந்தி மொழியல்ல;​ ஆங்கில மொழியால்தான் நிகழும் – ச.தமிழ் செல்வன்”

  1. முதலில் சி.பி.எம். கம்பனிப் பங்குதாரர் என். ராமின் Frontline ஏட்டில் தமிழ் பேர்களைத் தமிழ்ப் பேர்கள் மாதிரி எழுதச் சொல்வாரா தமிழ்ச்செல்வன்?
    எல்லாம் இந்தி உச்சரிப்புக்கு ஏற்றபடி தான் எழுதப்படுகிறது.

  2. த.மு.எ.ச – தமிழினம் முன்னேறாமல் இருக்க எடுக்கப்பட்ட சங்கம். இந்திய கம்யூனிஸ்ட் கம்பெனிகளின் முதலாளிகளான மலையாளிகள் அப்புறம் பெங்காலிகள் அப்புறம் ராம்கள் தமிழினத்துரோகத்தையே செய்து வந்திருக்கின்றனர். செம்மொழி மாநாட்டுக்கு தீர்மானம் போடுகிற த.மு.எ.ச ஈழ் இறுதி யுத்தத்தின் போது மொளனம் காத்தது. த,மு.எ.ச மட்டும் இல்லை இடதுசாரி சிந்தனை அல்லது தத்துவம் கொண்ட எல்லா அமைப்பும் மொளனமே காத்தன. (மொக்கக்கா வாக பல ஆண்டுகள் வாழும் ம.க,இ.க வும் தான்).இன்றைய இந்தியாவின் பாஸிஸ்ட்கள் கம்யூனிஸ்ட் களே.முதலாளிகளின் ஸ்பான்சர்களில் திரைப்படக்காரர்களை அழைத்து கலை இலக்கிய இரவு நடத்தி ஜீவனம் பார்க்கும் த.மு.எ.ச., உங்களை எல்லாம் மார்க்ஸ் பார்த்தால் தான் எழுதியதை எல்லாம் தீக்கு இரையாக்கிவிட்டு மலக்குழியில் வீசிவிட்டு தற்கொலை செய்து கொள்வார். நீங்கள்  மலையாள மொழிக்கு செம்மொழி அந்தஸ்து கிடைப்பதற்கான போராட்டத்தை தானே நடத்த வேண்டும், என்ன புதுசாய் தமிழ் மொழியைப் பற்றியும் திடிரென இலங்கைத் தமிழரைப் பற்றி யும் கதைக்கிறீர்கள். ஒரு வேளை இந்து ராம் மகிந்தாவிடம் பேசி இலங்கையில் கலை இலக்கிய இரவு நடத்த ஏற்பாடு செய்கிறேன் என்று இருக்கிறாரா? பெரும் ஸ்பான்சருக்கு உறுதி அளித்துள்ளாரா? இனி இங்கே உண்டியல் குலுக்க முடியாது என்பதால் இலங்கையில் குலுக்கலாம் என்று பொலிட் பீரோ முடிவு செய்துவிட்டதோ?

Comments are closed.